Ke Bo-mang ba Tlotlisang Molimo Kajeno?

“Jehova, Molimo oa rōna, ua tšoaneleha ho amohela khanya le tlhompho le matla.”—TŠENOLO 4:11.

1, 2. (a) Ke mehlala efe e bontšang lefapha le bitsoang biomimetics? (b) Ho hlaha potso efe, hona karabo ea eona ke efe?

KA LETSATSI le leng lilemong tsa bo-1940, moenjiniere e mong oa Switzerland, e leng George de Mestral o ile a tsamaea le ntja ea hae ho ea otlolla maoto. Ha a khutlela hae, o ile a hlokomela hore o hometsoe ke hlabahlabane liaparong ebile e hometse ntja ea hae. Kaha o ne a batla ho tseba ka hlabahlabane ena, o ile a e hlahloba ka mochine o hōlisang ponahalo ea lintho tse nyenyane ’me a hlolloa ke lihakisi tseo tse nyenyane tse itšoareletsang ka ntho e ’ngoe le e ’ngoe e nang le sekhoketsane. Qetellong, o ile a qapa lesela le nang le likhoketsane tsa maiketsetso. Hase de Mestral feela ea ileng a kopitsa tlhaho. United States, bara ba Wright ba ile ba qapa sefofane ka mor’a hore ba ithute kamoo linonyana tse khōlō li fofang kateng. Moenjiniere oa Lefora Alexandre-Gustave Eiffel o ile a rala tora ea Paris e reheletsoeng ka eena, a sebelisa melao-motheo e lumellang lesapo la motho la serope ho jara boima ba ’mele.

² Mehlala ena e bontša se bitsoang biomimetics, e leng lefapha la saense le lekang ho etsisa boqapi bo fumanoang tlhahong.a Leha ho le joalo, ke ho utloahalang ho botsa: Ke hangata hakae baqapi bao ba tlotlisang Moqapi oa hlabahlabane e nyenyane, linonyana tse khōlō, lesapo la motho la serope le lintho tse ling tsohle tse hlollang tse hloliloeng tseo batho ba bangata ba qapang lintho tsa bona ba itšetlehile ka tsona? ’Nete e soabisang ke hore lefatšeng la kajeno, ke ka seoelo Molimo a fuoang tlotla kapa khanya e mo tšoanelang.

3, 4. Lentsoe la Seheberu le fetoletsoeng e le “tlotliso” le bolela’ng, hona le lokela ho bolela’ng ha le sebelisoa ho Jehova?

³ Ba bang ba ka ’na ba ipotsa, ‘Ke hobane’ng ha ho hlokahala hore ho tlotlisoe Molimo? Na Molimo e se e ntse e se ea khanyang?’ Ke ’nete hore Jehova ke Motho ea khanyang ka ho fetisisa bokahohleng, empa seo ha se bolele hore batho bohle ba mo nka e le ea khanyang. Ka Bibeleng, lentsoe la Seheberu le fetoletsoeng e le “tlotliso” le na le moelelo oa “boima.” Le bolela ntho leha e le efe e etsang hore motho a bonahale a khahleha kapa e le oa bohlokoa ho batho ba bang. Ha le sebelisoa ho Molimo, le bolela se etsang hore Molimo e be ea khahlehang ho batho.

⁴ Ke ba seng bakae kajeno ba elang hloko se etsang hore Molimo e be ea khahlehang. (Pesaleme ea 10:4; 14:1) Ha e le hantle, batho ba hlaheletseng sechabeng, haeba le teng ba lumela hore Molimo o teng, ba ’nile ba susumelletsa batho ho hlompholla ’Mōpi ea khanyang oa bokahohle. Ba entse seo ka litsela life?

‘Ha ba na Boikemelo’

 5. Bo-rasaense ba bangata ba hlalosa limakatso tsa pōpo joang?

⁵ Bo-rasaense ba bangata ba tsitlella maikutlo a hore Molimo ha a eo. Joale, ba hlalosa meeka ea pōpo joang, ho akarelletsa moloko oa batho? Ba hlalosa limakatso tse joalo ka hore li bile teng ka ho iphetola ha lintho, e leng matla a sa laoloeng ke letho a etsang hore lintho li iketsahalle feela tjee. Ka mohlala, ’muelli oa khopolo ea ho iphetola ha lintho Stephen Jay Gould, o ile a ngola tjena: “Re mona ka lebaka la mofuta o itseng oa litlhapi tse sa tloaelehang tse neng li e-na le mapheo a sa tloaelehang a ileng a khona ho iphetola maoto a libōpuoa tse phelang lefatšeng . . . Re ka ’na ra labalabela tlhaloso e ‘utloahalang’—empa ha e eo.” Ka ho tšoanang, Richard E. Leakey le Roger Lewin ba ile ba ngola ba re: “Mohlomong batho ba bile teng ka lebaka la tlokotsi e itseng e etsahetseng bophelong.” Esita le bo-rasaense ba bang ba tsotang botle le boqapi ba lintho tsa tlhaho ha ba ise tlotliso ho Molimo.

 6. Ke’ng se thibelang ba bangata ho fa Molimo tlotla e mo tšoanelang e le ’Mōpi?

⁶ Ha barutehi ba bolela hore khopolo ea ho iphetola ha lintho ke ’nete, ba fana ka maikutlo a hore ke batho ba hlokang tsebo feela ba hanang ho e amohela. Ba bangata ba arabela joang lipolelong tse joalo? Lilemong tse seng kae tse fetileng, monna e mong ea ithutetseng khopolo ea ho iphetola ha lintho o ile a buisana le batho ba amohelang khopolo eo. O ile a re: “Ke fumane hore batho ba bangata ba lumelang khopolo ea ho iphetola ha lintho ba e lumela hobane ba boleletsoe hore batho bohle ba bohlale baa e lumela.” E, ha batho ba rutehileng ba hlahisa maikutlo a bona a latolang boteng ba Molimo, ba thibela ba bang ho fa Molimo tlotla e mo tšoanelang e le ’Mōpi.—Liproverbia 14:15, 18.

 7. Ho ea ka Baroma 1:20, ke’ng e ka bonoang ka ho hlaka pōpong e bonahalang, hona hobane’ng?

⁷ Na bo-rasaense ba fihletse qeto ea bona hobane linnete le bopaki li bontša seo? Che! Re pota-potiloe ke bopaki ba hore ho na le ’Mōpi. Ha a bua ka eena, moapostola Pauluse o ile a ngola: “Litšobotsi tsa hae tse sa bonahaleng li bonoa ka ho hlaka ho tloha pōpong ea lefatše [ea batho] ho ea pele, hobane li lemohuoa ka lintho tse entsoeng, esita le matla le Bomolimo ba hae ba ka ho sa feleng, hoo [ba sa lumelang] ba se nang boikemelo.” (Baroma 1:20) ’Mōpi o fane ka bopaki bo hlakileng pōpong ea hae. Ke kahoo Pauluse a bolelang hore ho tloha ha batho ba qala ho ba teng, ho ’nile ha khoneha hore batho ba ‘lemohe’ bopaki ba hore Molimo o teng kaha ba bo bona pōpong e bonahalang. Bopaki boo bo hokae?

 8. (a) Lihloliloeng tsa leholimo li paka matla a Molimo le bohlale ba hae joang? (b) Ke’ng se bontšang hore bokahohleng ho na le Moqapi oa Tsohle?

⁸ Re bona bopaki ba hore Molimo o teng maholimong a tletseng linaleli. Pesaleme ea 19:1 e re: “Maholimo a bolela khanya ea Molimo.” “Maholimo”—letsatsi, khoeli le linaleli—a paka matla le bohlale ba Molimo. Palo ea linaleli ka boeona e re tlatsa tšabo e nang le tlhompho. ’Me lihloliloeng tsena tsohle tsa leholimo ha li solle feela sepakapakeng, empa li latela melao e tobileng ea tlhaho.b (Esaia 40:26) Na ke ho utloahalang ho hlalosa hore tlhophiso e joalo e tlisitsoe ke matla a sa laoloeng ke letho a etsang hore lintho li iketsahalle feela tjee? Ntlha ea bohlokoa ke hore bo-rasaense ba bangata ba bolela hore bokahohle bo qalile ka tšohanyetso. Moprofesa e mong ha a hlalosa se boleloang ke sena, o ile a ngola a re: “Taba ea hore haesale bokahohle bo le teng e ipiletsa haholoanyane ho batho [ba nang le maikutlo] a hore Molimo ha a eo kapa ba belaellang boteng ba hae. Ka ho tšoanang, ho bonahala taba ea hore bokahohle bo bile le qalo e hloka hore ho be le moqapi oa tsohle tse teng; etsoe ke mang ea ka nahanang hore seo se ka etsahala empa ho se na moo se qalileng teng?”

 9. Bohlale ba Jehova bo bonahala joang liphoofolong tseo a li bōpileng?

⁹ Mona lefatšeng re boetse re bona bopaki ba hore Molimo o teng. Mopesaleme o ile a khotsa a re: “Jehova, mesebetsi ea hao e mengata hakaakang! Kaofela ha eona u e entse ka bohlale. Lefatše le tletse lihlahisoa tsa hao.” (Pesaleme ea 104:24) “Mesebetsi” ea Jehova, ho akarelletsa liphoofolo tseo a li bōpileng, e paka bohlale ba hae. Joalokaha re boletse qalong, boqapi ba lintho tse phelang bo hlolla hoo bo-rasaense ba lulang ba leka ho bo etsisa. Nahana ka mehlala e meng e seng mekae. Bafuputsi ba ithuta manaka a ikharileng a liphoofolo, ka sepheo sa ho etsa lihelmete tse matlanyana; ba hlahloba mofuta o mong oa ntsintsi o litsebe li lethoethoe, ka sepheo sa ho ntlafatsa lintho tse thusang motho ho utloa; ba hlahloba masiba a mapheo a sephooko, ka sepheo sa ho ntlafatsa lifofane tse fofang ka lenyele. Empa le ha motho a ka leka hakae, a ke ke a atleha ho etsisa boqapi bo phethahetseng bo fumanoang tlhahong. Buka e bitsoang Biomimicry—Innovation Inspired by Nature e re: “Lintho tse phelang li entse ntho e ’ngoe le e ’ngoe eo re batlang ho e etsa, li sa qete libeso tse rafshoang, li sa silafatse lefatše, kapa hona ho beha bokamoso ba tsona kotsing.” Ka sebele boo ke bohlale bo tsotehang!

10. Ke hobane’ng ha e le ho sa utloahaleng ho latola hore ho na le Moqapi e Moholo? Bontša.

¹⁰ Ebang u sheba holimo maholimong a tletseng linaleli kapa pōpong e tlaase mona lefatšeng, ho na le bopaki bo hlakileng ba hore ’Mōpi o teng. (Jeremia 10:12) Re lokela ho lumellana ka pelo eohle le libōpuoa tsa leholimong ha li hooa li re: “Jehova, Molimo oa rōna, ua tšoaneleha ho amohela khanya le tlhompho le matla, hobane u bōpile lintho tsohle.” (Tšenolo 4:11) Leha ho le joalo, bo-rasaense ba bangata ba hlōleha ho bona ka ‘mahlo a lipelo tsa bona’ bopaki ba hore ’Mōpi o teng, le hoja ba ka ’na ba tsota boqapi ba lintho tseo ba li bonang ka mahlo a sebele. (Baefese 1:18) Re ka tšoantša sena ka tsela ena: Ho khahloa ke botle le boqapi ba tlhaho le ho hana hore ho na le Moqapi e Moholo ke ho sa utloahaleng feela joaloka ho khahloa ke setšoantšo se setle se pentiloeng ’me ka nako e tšoanang motho a hana hore ho na le motho ea pentileng setšoantšo seo se tsotehang leseleng le se nang letho. Ha ho makatse hore ebe ho thoe ba hanang ho lumela ho Molimo ‘ha ba na boikemelo’!

“Batataisi ba Foufetseng” ba Khelosa ba Bangata

11, 12. Thuto ea ho rereloa qetello esale pele e thehiloe khopolo-tabeng efe, hona ke’ng se bontšang hore thuto ee ha e tlotlise Molimo?

¹¹ Balumeli ba bangata ba lumela ka tieo hore borapeli ba bona bo tlotlisa Molimo. (Baroma 10:2, 3) Leha ho le joalo, bolumeli ka kakaretso ke karolo e ’ngoe ea sechaba e hlileng e sitisitseng batho ba bangata hore ba tlotlise Molimo. Ka tsela efe? A re hlahlobeng litsela tse peli.

¹² Ea pele, malumeli a tlosa khanya ho Molimo ka ho ruta lithuto tsa bohata. Nka ka mohlala thuto ea ho rereloa qetello esale pele. Thuto ena e thehiloe khopolo-tabeng ea hore kaha Molimo o na le matla a ho tseba bokamoso, e tlameha ebe o tseba qetello ea ntho e ’ngoe le e ’ngoe esale pele. Ka hona thuto ea ho rereloa qetello esale pele e fana ka maikutlo a hore ke khale Molimo a entse qeto ka se tla etsahalla motho e mong le e mong nakong e tlang—ebang ke se setle kapa se sebe. Ho ea ka khopolo ena, Molimo o lokela ho jarisoa molato ka mahlomola ’ohle a etsahalang kajeno lefatšeng le bokhopo bohle bo teng. Ka sebele ha e tlotlise Molimo ha e mo beha molato oo ka nepo e leng oa Sera sa hae se ka sehloohong, e leng Satane, eo Bibele e mo bitsang “’musi oa lefatše”!—Johanne 14:30; 1 Johanne 5:19.

13. Ke hobane’ng ha e le booatla ho nahana hore Molimo a ka sitoa ho laola matla a hae a ho tseba bokamoso? Bontša.

¹³ Thuto ea ho rereloa qetello esale pele hase ea Mangolo ’me e etselletsa Molimo. E kopanya seo a ka khonang ho se etsa le seo a hlileng a se etsang. ’Nete ea hore Molimo a ka tseba esale pele se tlang ho etsahala e boletsoe ka ho hlaka ka Bibeleng. (Esaia 46:9, 10) Leha ho le joalo, ke ho sa utloahaleng ho nahana hore a ka sitoa ho laola matla a hae a ho tseba bokamoso kapa hore ke eena ea ikarabellang ka ntho e ’ngoe le e ’ngoe e etsahalang. Ka mohlala: Ha re nke hore u na le matla a maholo. Na u ne u tla batla ho phahamisa ntho e ’ngoe le e ’ngoe e boima eo u e bonang? U ne u ke ke! Ka ho tšoanang, ho ba le matla a ho tseba bokamoso ha ho qobelle Molimo hore a tsebe ntho e ’ngoe le e ’ngoe esale pele kapa hore a rere qetello ea eona esale pele. Oa khetha ha a sebelisa matla a hae a ho tseba lintho esale pele.c Ka ho hlakileng, lithuto tsena tsa bohata, ho akarelletsa ea ho rereloa qetello esale pele, ha li tlotlise Molimo.

14. Likereke li hlompholotse Molimo ka tsela efe?

¹⁴ Tsela ea bobeli eo likereke li hlomphollang Molimo ka eona ke ka boitšoaro ba litho tsa tsona. Bakreste ba lebeletsoe hore ba latele lithuto tsa Jesu. Har’a tse ling, Jesu o ile a ruta balateli ba hae hore ba “ratane” le hore ba lule ‘e se karolo ea lefatše.’ (Johanne 15:12; 17:14-16) Ho thoe’ng ka baruti ba Bokreste-’mōtoana? Na ba hlile ba latetse lithuto tsee?

15. (a) Baruti ba na le tlaleho efe ha ho tluoa tabeng ea ho kenella lintoeng tsa lichaba? (b) Boitšoaro ba baruti bo amme ba limilione joang?

¹⁵ Nahana ka tlaleho eo baruti ba iketselitseng eona ha re tla tabeng ea ntoa. Ba ’nile ba tšehetsa lintoa tse ngata tsa lichaba, ba li lumella, esita le ho li etella pele. Ba ’nile ba hlohonolofatsa masole le ho lokafatsa ho bolaoa ha batho. Sena se etsa hore re ipotse, ‘Na baruti baa ho na le mohla ba kileng ba nahana hore bo-mphato ba bona ka lehlakoreng le leng le bona ba etsa se tšoanang?’ (Bona lebokose le reng “Molimo o ka Lehlakoreng la Bo-mang?”) Baruti ha ba tlotlise Molimo ha ba re oa ba tšehetsa lintoeng tse tletseng tšollo ea mali; ebile ha ba mo tlotlise ha ba re litekanyetso tsa Bibele li siiloe ke nako ’me ba khothalletsa boitšoaro bo litšila ba ho kopanela liphate ka tsela leha e le efe. Ruri ba re hopotsa baeta-pele ba bolumeli bao Jesu a ileng a re ke “ba etsang tlōlo ea molao” le “batataisi ba foufetseng”! (Matheu 7:15-23; 15:14) Boitšoaro ba baruti bo entse hore lerato la ba limilione ho Molimo le tape.—Matheu 24:12.

Ke Bo-mang ba Tlotlisang Molimo e le Kannete?

16. Ke hobane’ng ha re lokela ho hlahloba Bibele e le hore re arabe potso ea hore na ke bo-mang ba tlotlisang Molimo e le kannete?

¹⁶ Haeba ka kakaretso batho ba hlaheletseng le ba nang le tšusumetso lefatšeng ba hlōtsoe ho tlotlisa Molimo, joale ke bo-mang ba mo tlotlisang e le kannete? E le hore re arabe potso eo, re lokela ho hlahloba Bibele. Etsoe, Molimo o na le tokelo ea ho bolela tsela eo a lokelang ho tlotlisoa ka eona le ho beha melao ka Lentsoeng la hae, e leng Bibele. (Esaia 42:8) A re hlahlobeng litsela tse tharo tseo Molimo a ka tlotlisoang ka tsona, ntlheng ka ’ngoe re tšohla potso ea hore na ke bo-mang ba mo tlotlisang e le kannete kajeno.

17. Jehova o ile a bontša joang hore ho tlotlisoa ha lebitso la hae ke karolo ea bohlokoa ea thato ea hae, hona ke bo-mang kajeno ba rorisang lebitso la Molimo lefatšeng ka bophara?

¹⁷ Tsela ea pele ke hore re ka tlotlisa Molimo ka ho rorisa lebitso la hae. Taba ea hore ho rorisa lebitso la Molimo ke karolo ea bohlokoa ea thato ea Molimo e totobatsoa ke seo Jehova a ileng a se bolella Jesu. Matsatsi a se makae pele a e-shoa, Jesu o ile a rapela a re: “Ntate, tlotlisa lebitso la hao.” Eaba lentsoe lea arabela: “Ke le tlotlisitse ’me ke tla boela ke le tlotlise.” (Johanne 12:28) Ha ho pelaelo hore ea neng a bua ke Jehova ka ho toba. Karabo ea hae e bontša ka ho hlaka hore o nka ho tlotlisoa ha lebitso la hae e le habohlokoa. Joale ke bo-mang ba tlotlisang Jehova kajeno ka ho tsebahatsa lebitso la hae le ho le rorisa lefatšeng? Ke Lipaki Tsa Jehova, ’me li le tlotlisa linaheng tse 235!—Pesaleme ea 86:11, 12.

18. Re ka khetholla ba rapelang Molimo ka “’nete” joang, hona ke sehlopha sefe se ’nileng sa ruta ’nete ea Bibele ka lilemo tse fetang lekholo?

¹⁸ Tsela ea bobeli ke hore re ka tlotlisa Molimo ka ho ruta ’nete e mabapi le eena. Jesu o ile a re barapeli ba ’nete ba ne ba tla “rapela [Molimo] ka . . . ’nete.” (Johanne 4:24) Re ka khetholla ba rapelang Molimo ka “’nete” joang? Ba lokela ho lahla lithuto tsa bolumeli tse sa thehoang Bibeleng le tse hlalosang Molimo le thato ea hae hampe. Ho e-na le hoo, ba lokela ho ruta linnete tse hloekileng tsa Lentsoe la Molimo, ho akarelletsa tse latelang: Jehova ke Molimo ea Phahameng ka ho Fetisisa, ’me ke eena a ’notši ea lokeloang ke boemo bona bo khanyang (Pesaleme ea 83:18); Jesu ke Mora oa Molimo ’me o khethiloe hore e be ’Musi ’Musong oa Molimo oa Bomesia (1 Bakorinthe 15:27, 28); ’Muso oa Molimo o tla halaletsa lebitso la Jehova ’me o phethahatse morero oa hae ka lefatše le batho ba ho lona (Matheu 6:9, 10); litaba tse molemo tse mabapi le ’Muso ona li lokela ho boleloa lefatšeng lohle. (Matheu 24:14) Ke sehlopha se le seng feela—e leng Lipaki Tsa Jehova—se ’nileng sa ruta linnete tsena tsa bohlokoa ka botšepehi ka lilemo tse fetang lekholo!

19, 20. (a) Ke hobane’ng ha boitšoaro bo botle ba Mokreste bo ka ’na ba tlotlisa Molimo? (b) Ke lipotso life tse ka re thusang ho khetholla bao kajeno ba tlotlisang Molimo ka ho boloka boitšoaro bo botle?

¹⁹ Tsela ea boraro ke hore re ka tlotlisa Molimo ka ho phela tumellanong le melao ea hae. Moapostola Petrose o ile a ngola a re: “Bolokang boitšoaro ba lōna bo le botle har’a lichaba, e le hore, nthong eo ho eona li le buang hampe joaloka baetsi ba bobe, ka lebaka la mesebetsi ea lōna e metle eo tsona e leng lipaki tsa eona tse boneng ka mahlo li ka tlotlisa Molimo letsatsing la ho hlahloba ha hae.” (1 Petrose 2:12) Boitšoaro ba Mokreste bo senola tumelo ea hae. Ha bashebelli ba hlokomela seo—ke hore ha ba bona hore boitšoaro bo botle ba Mokreste bo hlahisoa ke tumelo ea hae—seo se tlotlisa Molimo.

²⁰ Ke bo-mang kajeno ba tlotlisang Molimo ka ho boloka boitšoaro bo botle? Ke sehlopha sefe sa bolumeli seo mebuso e mengata e ’nileng ea se rorisa ka hore ke baahi ba nang le khotso, ba bolokang molao le ba lefang makhetho? (Baroma 13:1, 3, 6, 7) Ke batho bafe ba tsebahalang lefatšeng ka bophara ka ho ba bonngoeng le balumeli-’moho le bona—bonngoe bo hlōlang liphapang tsa merabe, bochaba le setso? (Pesaleme ea 133:1; Liketso 10:34, 35) Ke sehlopha sefe se tsejoang lefatšeng ka bophara ka ho etsa mosebetsi oa ho ruta Bibele o khothalletsang ho hlompha molao, litekanyetso tsa lelapa le tsa Bibele tsa boitšoaro? Ho na le sehlopha se le seng feela seo boitšoaro ba sona bo botle likarolong tsena le tse ling bo se buellang—ke Lipaki Tsa Jehova!

Na U Tlotlisa Molimo?

21. Ke hobane’ng ha re lokela ho nahana ka hore na rōna ka bomong re tlotlisa Jehova?

²¹ E mong le e mong oa rōna o lokela ho ipotsa, ‘Na ke tlotlisa Jehova?’ Ho ea ka Pesaleme ea 148, boholo ba pōpo bo tlotlisa Molimo. Mangeloi, maholimo a bonahalang, lefatše le liphoofolo tse ho lona—tsohle li rorisa Jehova. (Temana ea 1-10) Ka masoabi batho ba bangata kajeno ha ba mo tlotlise! Ka ho phela ka tsela e tlotlisang Molimo, le uena u lumellana le lintho tse ling tsohle tse bōpiloeng tse rorisang Jehova. (Temana ea 11-13) Ke eona feela tsela e molemo ka ho fetisisa eo u ka phelang ka eona.

22. U rua molemo ka litsela life ha u tlotlisa Jehova, hona u lokela ho etsa qeto efe?

²² U rua molemo ka litsela tse ngata ka ho tlotlisa Jehova. Ka ho bontša tumelo sehlabelong sa Kreste sa thekollo, u boelana le Molimo ’me u thabela kamano e nang le khotso le e putsang le Ntate oa hao oa leholimo. (Baroma 5:10) Ha u ntse u batla mabaka a mang a ho tlotlisa Molimo, u ba le tšepo le kananelo e eketsehileng. (Jeremia 31:12) Joale, u ka khona ho thusa ba bang ho phela bophelo bo thabileng le bo khotsofatsang, ka hona u ka fumana thabo e eketsehileng. (Liketso 20:35) E se eka u ka ba e mong oa ba etsang qeto e tiileng ea ho tlotlisa Molimo—hona joale le ka ho sa feleng!

[Mongolo o botlaaseng ba leqephe]

Na U sa Hopola?

• Ke hobane’ng ha re ka bolela hore bo-rasaense ka kakaretso ha baa thusa batho ho tlotlisa Molimo?

• Likereke li sitisitse batho ho tlotlisa Molimo ka litsela life tse peli?

• Re ka tlotlisa Molimo ka litsela life?

• Ke hobane’ng ha u lokela ho hlahloba hore na uena u tlotlisa Jehova?

[Lebokose le leqepheng la 12]

“Molimo o ka Lehlakoreng la Bo-mang?”

Monna e mong ea neng a le Lebothong la Moeeng la Jeremane nakong ea Ntoa ea II ea Lefatše ’me hamorao ea e-ba e mong oa Lipaki Tsa Jehova o re:

“Ntho e neng e mpherekanya lilemong tseo tsa ntoa . . . e ne e le ho bona hoo e ka bang baruti ba malumeli ’ohle—ba K’hatholike, ba Lutere, ba Episcopal le ba bang—ba hlohonolofatsa lifofane le ba tsamaeang le tsona pele ba tloha ho ea liha liqhomane tsa bona tse bolaeang. Ke ne ke atisa ho ipotsa, ‘Molimo o ka lehlakoreng la bo-mang?’

“Masole a Majeremane a ne a itlama ka mabanta a neng a ngotsoe mantsoe a reng Gott mit uns (Molimo o na le rōna) chasepereng. Empa ke ne ke ipotsa, ‘Ke hobane’ng ha Molimo a ne a ke ke a ba le masole a ka lehlakoreng le leng kaha e ne e le a bolumeli bo le bong a bile a rapela Molimo a le mong?’”

[Setšoantšo se leqepheng la 10]

Lefatšeng ka bophara, Lipaki Tsa Jehova li tlotlisa Molimo e le kannete