Bonahatsa Boikutlo ba Kelello ba Kreste

“E se eka Molimo ea fanang ka mamello le matšeliso a ka le neha hore har’a lōna le be le boikutlo ba kelello bo tšoanang le boo Kreste Jesu a neng a e-na le bona.”—BAROMA 15:5.

 1. Bophelo ba motho bo ka angoa joang ke boikutlo ba hae?

BOIKUTLO bo etsa phapang e khōlō bophelong. Boikutlo ba ho ba ea sa tsotelleng kapa ea khothetseng, boikutlo bo botle kapa bo bobe, ba ho ba mabifi kapa ba ho sebelisana le ba bang, ba ho belaela kapa ba ho leboha bo ka susumetsa ka matla hore na motho o sebetsana joang le maemo le hore na batho ba bang ba mo tšoara joang. Ha motho a e-na le boikutlo bo botle, a ka thaba esita leha ho nyolosetsa. Ho motho ea nang le boikutlo bo bobe, ha ho letho le bonahalang le lokile, esita le haeba—ntle ho leeme—bophelo bo le botle.

 2. Motho o ithuta boikutlo joang?

² Boikutlo—bo botle kapa bo bobe—bo ka ithutoa. Ha e le hantle, bo tlameha ho ithutoa. Ha Collier’s Encyclopedia e bua ka ngoana oa lesea ea sa tsoa belehoa, e re: “Boikutlo leha e le bofe boo a tla qetella a e-na le bona o tlameha ho bo sebeletsa kapa ho ithuta bona, ka tsela e batlang e tšoana leha a tlameha ho sebeletsa kapa ho ithuta puo kapa tsebo ea mofuta leha e le ofe.” Re ithuta boikutlo joang? Le hoja e le lintho tse ngata tse tlatsetsang, tikoloho le setsoalle li na le tšusumetso e matla. Encyclopedia e sa tsoa boleloa e re: “Joalokaha eka ke ka mokhoa oa mohlolo, re ithuta ho nka kapa ho amohela boikutlo ba bao re tloaelaneng le bona haufi.” Lilemong tse fetileng tse likete, Bibele e boletse ntho e batlang e tšoana, e re: “Ea tsamaeang le batho ba bohlale o tla hlalefa, empa ea bang le litšebelisano le ba hlokang kelello lintho li tla mo tsamaela hampe.”—Liproverbia 13:20, NW; 1 Bakorinthe 15:33.

Mohlala oa Boikutlo bo Loketseng

 3. Ke mang ea neng a beha mohlala ka boikutlo ba hae, ’me re ka mo etsisa joang?

³ Joaloka linthong tse ling tsohle, le tabeng ea boikutlo, Jesu Kreste o behile mohlala o motle ka ho fetisisa. O itse: “Ke le behetse mohlala, e le hore, feela joalokaha ke entse ho lōna, le ka etsa ka ho tšoanang.” (Johanne 13:15) Hore re tšoane le Jesu, re lokela ho qala ka ho ithuta ka eena.a Re ithuta bophelo ba Jesu ka boikemisetso ba ho etsa seo moapostola Petrose a ileng a se buella ha a re: “Le bitselitsoe tsela ena, hobane esita le Kreste o ile a utloa bohloko bakeng sa lōna, a le siela mohlala hore le latele mehato ea hae haufi-ufi.” (1 Petrose 2:21) Pakane ea rōna ke ho tšoana le Jesu ka hohle kamoo ho ka khonehang. Seo se akarelletsa ho hlaolela boikutlo ba hae ba kelello.

4, 5. Ke tšobotsi efe ea boikutlo ba kelello ba Jesu e totobatsoang ho Baroma 15:1-3, ’me Bakreste ba ka mo etsisa joang?

⁴ Ho ba le boikutlo ba kelello ba Kreste Jesu ho akarelletsa eng? Khaolo ea 15 ea lengolo la Pauluse le eang ho Baroma e re thusa ho araba potso eo. Litemaneng tse seng kae tsa pele tsa khaolo ena, Pauluse o bua ka tšoaneleho e hlahelletseng ea Jesu ha a re: “Leha ho le joalo, rōna ba matla re tšoanela ho jara mefokolo ea ba seng matla, ’me re se ke ra ba ba ikhahlisang. E mong le e mong oa rōna a a khahlise moahelani oa hae ho se leng molemo bakeng sa ho mo haha. Etsoe le eena Kreste ha aa ka a ikhahlisa; empa feela joalokaha ho ngoliloe: ‘Linyeliso tsa ba neng ba u nyelisa li nkoetse holimo.’”—Baroma 15:1-3.

⁵ Ha Bakreste ba etsisa boikutlo ba Jesu, ba khothalletsoa hore e be ba loketseng ho sebeletsa litlhoko tsa ba bang ka boikokobetso ho e-na le ho batla ho ikhahlisa ba le bang. Ka sebele, ho ithaopela ho sebeletsa ba bang ka boikokobetso joalo ke tšobotsi ea “ba matla.” Jesu, ea neng a le matla ho feta motho leha e le ofe ea kileng a phela, o itlhalositse tjena: “Mora oa motho [o] ile a tla, eseng ho tla sebeletsoa, empa ho tla sebeletsa le ho fana ka soule ea hae ho ba thekollo e le phapanyetsano bakeng sa ba bangata.” (Matheu 20:28) Re le Bakreste, ka mokhoa o tšoanang re batla ho hahamalla ho sebeletsa ba bang, ho akarelletsa le “ba seng matla.”

 6. Ke ka tsela efe re ka etsisang boitšoaro ba Jesu ha a ne a hanyetsoa le ho rohakoa?

⁶ Tšobotsi e ’ngoe e ntle eo Jesu a ileng a e bonahatsa ke mokhoa oo a neng a nahana ka oona le ho etsa lintho ka oona o neng o le motle kamehla. Ha ho mohla a ileng a lumella boikutlo bo bobe ba ba bang hore bo susumetse boikutlo ba hae bo botle ka ho sebeletsa Molimo; le rōna ha rea tšoanela ho lumella seo. Ha Jesu a ne a rohakoa le ho hlorisoa ka lebaka la ho rapela Molimo ka botšepehi, ka mamello o ile a tiisetsa a sa belaele. O ne a tseba hore ea lekang ho khahlisa moahisani oa hae “ho se leng molemo bakeng sa ho mo haha” a ka lebella khanyetso e tsoang lefatšeng le sa lumelang le le sa utloisiseng.

 7. Jesu o ile a bonahatsa mamello joang, ’me ke hobane’ng ha re lokela ho mo etsisa?

⁷ Jesu o ne a bontša boikutlo bo loketseng ka litsela tse ling. Ha ho mohla a neng a bontša hore o fella Jehova pelo empa ka mamello o ne a emela hore merero ea Hae e phethahale. (Pesaleme ea 110:1; Matheu 24:36; Liketso 2:32-36; Baheberu 10:12, 13) Ho feta moo, Jesu o ne a sa felle balateli ba hae pelo. O ile a re ho bona: “Le ithute ho ’na”; kaha o ne a le “maikutlo a bonolo,” thuto ea hae e ne e haha e bile e khatholla. Hape kaha o ne a “ikokobelitse pelong,” ho ne ho se mohla a ikakasang kapa a ikhohomosang. (Matheu 11:29) Pauluse o re khothalletsa ho etsisa litšobotsi tsena tsa boikutlo ba Jesu ha a re: “Bolokang boikutlo bona ba kelello ho lōna bo neng bo le teng le ho Kreste Jesu, eo, le hoja a ne a le teng ka sebōpeho sa Molimo, a sa kang a nahana ho inkela ka mahahapa, e leng, hore o lokela ho lekana le Molimo. Che, empa o ile a ikhokhotha ’me a nka sebōpeho sa lekhoba ’me ea e-ba ea tšoanang le batho.”—Bafilippi 2:5-7.

8, 9. (a) Ke hobane’ng ha re tlameha ho sebeletsa ho hlaolela boikutlo bo se nang boithati? (b) Ke hobane’ng ha re sa lokela ho nyahama haeba re sa finyelle mohlala oo Jesu a o siileng, ’me Pauluse e ne e le mohlala o motle joang ntlheng ee?

⁸ Ho bonolo ho bolela hore re batla ho sebeletsa ba bang le hore re batla ho etelletsa pele litlhoko tsa bona. Empa tlhahlobo e tšepahalang ea boikutlo ba rōna ba kelello e ka senola hore lipelo tsa rōna ha lia sekamela moo ka ho feletseng. Hobane’ng? Taba ea pele, hobane re futsitse litšobotsi tsa boithati ho Adama le Eva; taba ea bobeli, hobane re phela lefatšeng le khothalletsang boithati. (Baefese 4:17, 18) Hangata ho sebeletsa ho ba le boikutlo boo e seng ba boithati ho bolela ho hlaolela mokhoa oa ho nahana o fapaneng le botho ba rōna bo sa phethahalang. Seo se hloka boikemisetso le boiteko.

⁹ Ho se phethahale ha rōna ho totobetseng, ho fapaneng ka ho toba le mohlala o phethahetseng oo Jesu a re sietseng oona, ka linako tse ling ho ka re nyahamisa. Re ka ba ra belaela hore na ho ba le boikutlo ba kelello bo tšoanang le boo Jesu a neng a e-na le bona ke ntho e ka etsahalang e le kannete. Empa hlokomela mantsoe a khothatsang a Pauluse: “Kea tseba hore ho ’na, ke hore, nameng ea ka, ha ho lule letho le molemo; kaha matla a ho lakatsa a teng ho ’na, empa matla a ho hlahisa se setle ha a eo. Etsoe molemo oo ke o lakatsang ha ke o etse, empa bobe boo ke sa bo lakatseng ke bona boo ke tloaetseng ho bo etsa. Ka sebele ke thabela molao oa Molimo ho ea ka motho eo ke leng eena ka hare, empa lithong tsa ka ke bona molao o mong o loanang khahlanong le molao oa kelello ea ka le o nkisang ke holehiloe molaong oa sebe o lithong tsa ka.” (Baroma 7:18, 19, 22, 23) Ke ’nete hore ho se phethahale ha Pauluse ho ne ho mo sitisa khafetsa ho phetha thato ea Molimo kamoo a neng a lakatsa kateng, empa boikutlo ba hae—tsela eo a neng a nahana ka eona le ho ikutloa ka eona ka Jehova le molao oa Hae—e ne e beha mohlala. Le ea rōna e ka ba joalo.

Ho Lokisa Boikutlo bo Fosahetseng

10. Pauluse o ile a khothalletsa Bafilippi hore ba hlaolele boikutlo bofe ba kelello?

¹⁰ Na ho ka etsahala hore ebe ho hlokahala hore ba bang ba lokise boikutlo bo fosahetseng? E. Sena ka ho totobetseng e ne e le ’nete ka Bakreste ba bang lekholong la pele la lilemo. Lengolong la hae le eang ho Bafilippi, Pauluse o buile ka ho ba le boikutlo bo botle. O ngotse: ‘Eseng hore ke se ke amohetse [bophelo ba leholimo ka tsoho ea pejana] kapa ke se ke entsoe ea phethahetseng, empa ke phehella ho bona haeba le ’na nka boela ka tšoara seo le ’na ke se tšoaretsoeng ke Kreste Jesu. Barab’eso, ha ke inke ke se ke o tšoere; empa ho na le ntho e le ’ngoe ka oona: Ha ke lebala lintho tse ka morao le ho hahamalla linthong tse ka pele, ke phehella pakaneng bakeng sa moputso oa pitso ea holimo ea Molimo ka Kreste Jesu. Joale, ho ea ka hore na ke ba bangata hakae ba rōna ba hōlileng ka ho feletseng, a re beng le boikutlo bona ba kelello.’—Bafilippi 3:12-15.

11, 12. Jehova o re senolela boikutlo ba kelello bo loketseng ka litsela life?

¹¹ Mantsoe a Pauluse a bontša hore leha e le mang eo, ha e se e le Mokreste, a sa utloeng hore ho hatela pele hoa hlokahala, o na le boikutlo bo fosahetseng. O hlōtsoe ho ba le boikutlo ba kelello ba Kreste. (Baheberu 4:11; 2 Petrose 1:10; 3:14) Na ha ho sa na tšepo ka motho ea joalo? Le hanyenyane. Molimo a ka re thusa ho fetola boikutlo ba rōna haeba re hlile re batla ho bo fetola. Pauluse o tsoela pele ka ho re: “Haeba likelello tsa lōna li sekametse hosele tabeng leha e le efe, Molimo o tla le senolela boikutlo bo ka holimo.”—Bafilippi 3:15.

¹² Leha ho le joalo, haeba re lakatsa hore Jehova a re senolele boikutlo bo loketseng, re lokela ho phetha karolo ea rōna. Ho ithuta Lentsoe la Molimo ka khothalo ka thuso ea lingoliloeng tsa Bokreste tse lokiselitsoeng ke “lekhoba le tšepahalang le le masene” ho tla nolofaletsa bao ‘likelello tsa bona li sekametseng hosele’ ho hlaolela boikutlo bo loketseng. (Matheu 24:45) Baholo ba Bakreste, ba khethiloeng ke moea o halalelang “ho lisa phutheho ea Molimo,” ba tla thabela ho thusa. (Liketso 20:28) Re leboha hakaakang hore Jehova o nahanela bofokoli ba rōna ’me o re thusa ka lerato! A re amoheleng thuso eo.

Ho Ithuta ho ba Bang

13. Re ithuta eng ka boikutlo bo loketseng tlalehong ea Bibele ea Jobo?

¹³ Ho Baroma khaolo ea 15, Pauluse o re bontša hore ho nahanisisa ka mehlala ea se etsahetseng ho ka re thusa ho lokisa boikutlo ba rōna. Oa ngola: “Lintho tsohle tse ileng tsa ngoloa nakong e fetileng li ile tsa ngolloa taeo ea rōna, e le hore ka mamello ea rōna le ka matšeliso a tsoang Mangolong re ka ba le tšepo.” (Baroma 15:4) Linakong tse fetileng ho ile ha hlokahala hore bahlanka ba bang ba tšepahalang ba Jehova ba lokise litšobotsi tse itseng tsa boikutlo ba bona. Ka mohlala, ka kakaretso Jobo o ne a e-na le boikutlo bo botle. Ha ho mohla a kileng a phara Jehova ka bobe, ’me ha ho nako eo ka eona a kileng a lumella bohloko hore bo sisinye tšepo ea hae ho Molimo. (Jobo 1:8, 21, 22) Empa o ne a e-na le tšekamelo ea ho itokafatsa. Jehova o ile a laela Elihu ho thusa Jobo hore a lokise tšekamelo ena. Ho e-na le ho ikutloa a nyelisitsoe, ka boikokobetso Jobo o ile a lumela hore ho hlokahala hore a fetole boikutlo ’me kapele feela a qala ho bo fetola.—Jobo 42:1-6.

14. Re ka tšoana joang le Jobo haeba re eletsoa mabapi le boikutlo ba rōna?

¹⁴ Na re ne re tla itšoara joaloka Jobo haeba Mokreste-’moho le rōna a ne a ka re bolella ka mosa hore re bontša boikutlo bo fosahetseng? Joaloka Jobo, e se eka le ka mohla re ke ke ra “bea molato ho Molimo.” (Jobo 1:22) Haeba re utloa bohloko re se na molato, e se eka re ke ke ra belaela kapa ra beha Jehova molato ka mathata a rōna. E se eka re ka qoba ho itokafatsa, re hopole hore ho sa tsotellehe hore na re na le litokelo life tšebeletsong ea Jehova, re ntse re le “makhoba a se nang molemo.”—Luka 17:10.

15. (a) Balateli ba bang ba Jesu ba ile ba bontša boikutlo bofe bo fosahetseng? (b) Petrose o ile a bontša boikutlo bo botle joang?

¹⁵ Lekholong la pele la lilemo, ba bang ba ileng ba mamela Jesu ba ile ba bonahatsa boikutlo bo sa lokelang. Ketsahalong e ’ngoe, Jesu o ile a bua ho hong ho neng ho le thata ho utloisisoa. Ha ba arabela, “ba bangata ho barutuoa ba hae, ha ba utloa sena, ba re: ‘Puo ena ea tšosa; ke mang ea ka e mamelang?’” Ho totobetse hore ba neng ba bua ka tsela ena ba ne ba e-na le boikutlo bo fosahetseng. Boikutlo ba bona bo fosahetseng bo ile ba ba etsa hore ba khaotse ho mamela Jesu. Tlaleho e re: “Ka lebaka la sena ba bangata ho barutuoa ba hae ba tloha ho ea linthong tse ka morao ’me ba ne ba se ba sa tsamaee le eena.” Na kaofela ba ne ba e-na le boikutlo bo fosahetseng? Che. Tlaleho ha e tsoela pele, e re: “Ka hona Jesu a re ho ba leshome le metso e ’meli: ‘Le lōna ha le batle ho tsamaea, na lea batla?’ Simone Petrose a mo araba: ‘Morena, re tla tloha re ee ho mang?’” Ha e le hantle, Petrose o ile a ikaraba a re: “Ke uena ea nang le lipolelo tsa bophelo bo sa feleng.” (Johanne 6:60, 66-68) Ke boikutlo bo botle hakaakang! Ha re talimane le litlhaloso kapa lintlafatso tsa kutloisiso ea Mangolo tseo ka lekhetlo la pele ho ka etsahalang hore ho be thata hore re li amohele, na ho ke ke ha e-ba hotle ho bonahatsa boikutlo bo ileng ba bontšoa ke Petrose? E ka ba bothoto bo bokaakang ho khaotsa ho sebeletsa Jehova kapa ho bua ka tsela e hananang le “mohlala oa mantsoe a phelisang hantle” hobane feela qalong ho le thata ho utloisisa lintho tse ling tse itseng!—2 Timothea 1:13.

16. Ke boikutlo bofe bo tšosang bo ileng ba bonahatsoa ke baeta-pele ba bolumeli ba Bajuda ba mehleng ea Jesu?

¹⁶ Baeta-pele ba bolumeli ba Bajuda ba lekholong la pele la lilemo ba ile ba hlōleha ho bonahatsa boikutlo ba kelello boo Jesu a neng a e-na le bona. Boikemisetso bo tiileng ba bona ba ho se mamele Jesu bo ile ba bonahala ha a tsosa Lazaro bafung. Ho mang le mang ea nang le boikutlo bo nepahetseng, mohlolo oo e ne e tla ba bopaki bo feletseng ba hore Jesu o ne a rometsoe ke Molimo. Leha ho le joalo, rea bala: “Ka lebaka leo baprista ba ka sehloohong le Bafarisi ba bokella Sanhedrine hammoho ’me ba qala ho re: ‘Re tla etsa joang, hobane monna enoa o etsa lipontšo tse ngata? Haeba re mo tlohela ka tsela ena, bohle ba tla beha tumelo ho eena, ’me Baroma ba tla tla ’me ba nke ka bobeli sebaka sa rōna le sechaba sa rōna.’” Ba ne ba tla rarolla bothata boo joang? “Ho tloha letsatsing leo ho ea pele ba eletsana ho mo bolaea.” Ntle ho ho rera bolotsana ba ho bolaea Jesu, ba ile ba batla ho senya bopaki bo bonoang ba hore o ne a etsa mehlolo. “Baprista ba ka sehloohong joale ba eletsana ho bolaea le Lazaro.” (Johanne 11:47, 48, 53; 12:9-11) E ka ba ho hobe hakaakang haeba re ne re ka hlaolela boikutlo bo joalo eaba re khopisoa kapa re halefisoa ke lintho tseo re hlileng re lokelang ho li thabela! E, ’me ho kotsi hakaakang!

Ho Etsisa Boikutlo bo Botle ba Kreste

17. (a) Daniele o ile a bontša boikutlo ba ho hloka tšabo tlas’a maemo afe? (b) Jesu o ile a iponahatsa a le sebete joang?

¹⁷ Bahlanka ba Jehova ba lula ba e-na le boikutlo bo botle. Ha lira tsa Daniele li ne li rera bolotsana ba hore ho fetisoe molao o thibelang ho rapela molimo leha e le ofe kapa motho leha e le ofe ntle ho morena ka matsatsi a 30, Daniele o ile a tseba hore sena se kena-kenana le kamano ea hae le Jehova Molimo. Na o ne a tla khaotsa ho rapela Molimo ka matsatsi a 30? Che, ntle ho tšabo o ile a tsoela pele ho rapela Jehova ka makhetlo a mararo ka letsatsi, joalokaha e ne e le tloaelo ea hae. (Daniele 6:6-17) Ka tsela e tšoanang, Jesu ha aa ka a lumella hore lira tsa hae li mo tšose. Ka letsatsi le leng la Sabatha, o ile a kopana le monna ea omeletseng letsoho. Jesu o ne a tseba hore Bajuda ba bangata ba moo ba ne ba sa tl’o thabela ha a phekola motho ka Sabatha. O ile a ba kōpa ka ho toba hore ba ntše maikutlo a bona tabeng ena. Ha ba hana, Jesu o ile a tsoela pele ’me a phekola monna eo. (Mareka 3:1-6) Ha ho mohla Jesu a neng a ikhula ho phethahatseng thōmo ea hae ha a ne a ikutloa hore ho loketse ho etsa joalo.

18. Ke hobane’ng ha ba bang ba re hanyetsa, empa re lokela ho itšoara joang tabeng ea boikutlo ba bona bo bobe?

¹⁸ Kajeno Lipaki tsa Jehova lia hlokomela hore le tsona ha ho mohla li lokelang ho tšosoa ke boikutlo bo ka ’nang ba e-ba teng bo bobe ba bahanyetsi. Ho seng joalo, li tla be li sa bonahatse boikutlo ba kelello ba Jesu. Batho ba bangata ba hanyetsa Lipaki tsa Jehova, ba bang e le hobane ba sa li tsebe hantle ’me ba bang e le hobane ba hloile Lipaki kapa molaetsa oa tsona. Empa le ka mohla re se ke ra lumella boikutlo ba bona ba ho hloka botsoalle hore bo ame boikutlo ba rōna bo botle. Le ka mohla re se ke ra lumella ba bang hore ba laole tsela eo re rapelang ka eona.

19. Re ka bonahatsa joang boikutlo ba kelello bo tšoanang le ba Jesu Kreste?

¹⁹ Kamehla Jesu o ne a bonahatsa boikutlo ba kelello bo botle ho balateli ba hae le litokisetsong tsa Molimo, ho sa tsotellehe hore na ho ne ho le thata hakae ho etsa joalo. (Matheu 23:2, 3) Re lokela ho etsisa mohlala oa hae. Ke ’nete hore barab’abo rōna ha baa phethahala, ’me ho joalo le ka rōna. Empa ke hokae moo re ka fumanang metsoalle e molemo le e tšepahalang kannete ho feta ka mokhatlong oa bara ba motho oa lefatše ka bophara? Jehova ha a e-s’o re fe kutloisiso e feletseng ea Lentsoe le ngotsoeng la hae, empa ke sehlopha sefe sa bolumeli se nang le kutloisiso e khōloanyane? Kamehla re ke rebolokeng boikutlo ba kelello bo nepahetseng, boikutlo ba kelello boo Jesu Kreste a neng a e-na le bona. Ntle ho moo, sena se akarelletsa ho tseba ho letela Jehova, joalokaha re tla tšohla taba ena sehloohong se latelang.

[Mongolo o botlaaseng ba leqephe]

Na U ka Hlalosa?

• Bophelo ba rōna bo angoa joang ke boikutlo ba rōna?

• Hlalosa boikutlo ba kelello ba Jesu Kreste.

• Re ka ithuta’ng ka boikutlo ba Jobo?

• Boikutlo bo nepahetseng boo motho a ka bang le bona har’a khanyetso ke bofe?

[Litšoantšo tse leqepheng la 7]

Mokreste ea nang le boikutlo bo nepahetseng o hahamalla ho thusa ba bang

[Setšoantšo se leqepheng la 9]

Ho ithuta Lentsoe la Molimo ka khothalo ho re thusa ho ba le boikutlo ba kelello ba Kreste