Thekollo e Phahamisa ho Loka ha Molimo
KA MOR’A hore Adama le Eva ba fetohele Molimo, Jehova o ile a bolela morero oa hae oa ho hlahisa Peō e neng e tla longoa serethe. (Genese 3:15) Sena se ile sa phethahala ha lira tsa Molimo li ne li bolaela Jesu Kreste thupeng ea tlhokofatso. (Bagalata 3:13, 16) Jesu o ne a se na sebe kaha o ne a emotsoe ka mohlolo ka pōpelong ea moroetsana ka matla a moea o halalelang. Ka hona, mali a hae a tšolotsoeng a ne a ka sebelisetsoa ho lefa thekollo e lokollang batho ba futsitseng sebe le lefu ho Adama.—Baroma 5:12, 19.
Ha ho letho le ka thibelang Molimo ea matla ’ohle, Jehova hore a phethahatse morero oa hae. Kaha kamehla Jehova o phethahatsa seo a se rerileng, ka mor’a hore motho a oele sebeng, mahlong a Jehova ho ne ho tšoana le ha thekollo e se e lefiloe ’me o ne a ka sebetsana le batho ba nang le tumelo ea hore o tla phethahatsa litšepiso tsa hae. Sena se ile sa etsa hore litloholo tsa Adama tsa baetsalibe tse kang Enoke, Noe le Abrahama li khone ho tsamaea le Molimo li be li fetohe metsoalle ea hae, empa Molimo a sa silafatse khalalelo ea hae.—Genese 5:24; 6:9; Jakobo 2:23.
Batho ba bang ba neng ba e-na le tumelo ho Jehova ba ile ba etsa libe tse tebileng. Mohlala o mong ke Morena Davida. U ka ’na ua ipotsa ua re, ‘Ke hobane’ng ha Jehova a ile a tsoela pele ho hlohonolofatsa Morena Davida ka mor’a hore a etse bofebe le Bathe-sheba ’me ka mor’a moo a etse hore monna oa hae Uria a bolaoe?’ Taba ea bohlokoa e ne e le hore Davida o ile a bontša pako ea sebele le tumelo. (2 Samuele 11:1-17; 12:1-14) Ka lebaka la sehlabelo sa Jesu Kreste sa nakong e tlang, Molimo o ne a ka tšoarela libe tsa Davida ea bakileng ’me leha ho le joalo a lule a ntse a tšoareletse tokeng ea Hae le ho lokeng ha Hae. (Pesaleme ea 32:1, 2) E le ho paka seo, Bibele e hlalosa ketso e babatsehang e finyeletsoeng ke thekollo ea Jesu, e leng ea “hore a bonahatse ho loka ha [Molimo], hobane a ne a tšoarela libe tse etsahetseng nakong e fetileng” le “nakong ena ea hona joale.”—Baroma 3:25, 26.
Ka sebele moloko oa batho o fumana melemo e meholo ka lebaka la bohlokoa ba mali a Jesu. Ka lebaka la thekollo, batho ba baetsalibe ba bontšang pako ba ka thabela ho ba le kamano e haufi le Molimo. Ho phaella moo, thekollo e bulela bafu tsela ea hore ba tle ba tsosetsoe lefatšeng le lecha la Molimo. Har’a bona ho tla ba le bahlanka ba tšepahalang ba Molimo ba shoeleng pele Jesu a lefa thekollo, hammoho le ba bangata ba ichoeletseng ba se na tsebo ebile ba sa rapele Molimo. Bibele e re: “Ho tla ba le tsoho ea ba lokileng le ba sa lokang.” (Liketso 24:15) Ka lebaka la thekollo, nakong eo Jehova o tla fa batho bohle ba mamelang bophelo bo sa feleng. (Johanne 3:36) Jesu ka boeena o ile a hlalosa a re: “Molimo o ratile lefatše haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.” (Johanne 3:16) Moloko oa batho o tla fumana melemo ena eohle ka lebaka la tokisetso ea Molimo ea sehlabelo sa thekollo.
Leha ho le joalo, taba e ikhethang ka thekollo hase melemo eo re e fumanang ka lebaka la eona. Habohlokoa le ho feta ke seo thekollo ea Kreste e se finyellang mabapi le lebitso la Jehova. E paka hore Jehova ke Molimo ea nang le toka e phethahetseng ea ka sebetsanang le batho ba baetsalibe ’me leha ho le joalo a lule a hloekile ebile a halalela. Haeba Molimo a ne a sa ka a rera ho lokisetsa hore thekollo e be teng, ha ho setloholo sa Adama se ka beng se khonne ho tsamaea le Jehova kapa ho ba motsoalle oa hae, esita le Enoke, Noe le Abrahama. Mopesaleme o ile a lemoha sena ’me a ngola: “Haeba u ne u talima liphoso, Jah, Jehova, ke mang ea neng a ka ema?” (Pesaleme ea 130:3) Re lokela ho leboha Jehova hakaakang ka hore ebe o rometse Mora oa hae ea ratoang lefatšeng! Hape re lokela ho leboha Jesu hakaakang ka hore ebe o ile a ithaopela ho fana ka bophelo ba hae e le thekollo molemong oa rōna!—Mareka 10:45.