“Le Rekiloe ka Theko”

“Le rekiloe ka theko e phahameng. Ka baka leo, tlotlisang Molimo ka ’mele ea lōna.”—1 BA-KORINTHE 6:20, “BPN.”

1, 2. (a) Ke eng se ileng sa bula litsela tsa ho ‘ntšoa lefung’? (b) Ho ile ha hlokahala hore ho etsoe eng ho etsa hore sehlabelo sa Kreste e be se sebetsang molaong, ’me hoo ho ne ho tšoantšetsoa ke eng?

MOPESALEME o ile a re: “Molimo ho rōna ke Molimo o bolokang; Jehova Morena o tseba ho ntša lefung.” (Pesaleme ea 68:20) Sehlabelo sa Jesu Kreste se ile sa bula tsela eo. Empa e le hore sehlabelo seo e ka ba se sebetsang molaong, Kreste o ile a lokela ho itlhahisa ka boeena ka pel’a Molimo.

² Sena se ile sa tšoantšetsoa Letsatsing la Phekolo ea Libe ha moprista ea phahameng a ne a kena ka Sehalalelisisong. (Levitike 16:12-15) Moapostola Pauluse o ile a ngola: “Empa Kreste, moprista e moholo . . . o kene hang feela sehalalelisisong, e seng ka mali a liphooko le a manamane, empa e leng ka mali a hae a sebele, ’me a etsa topollo e sa feleng. Hobane Kreste ha a ka a kena sehalalelong se entsoeng ka matsoho, e leng setšoantšo feela sa sa sebele; empa o kene leholimong la sebele, a tle a hlahe joale pel’a sefahleho sa Molimo, sebakeng sa rōna.”—Ba-Heberu 9:11, 12, 24.

Matla ao Mali a Nang le Oona

 3. (a) Barapeli ba Jehova ba talima mali joang, hona hobane’ng? (b) Ke eng se bontšang hore mali a na le matla a molao a ho phekola libe?

³ Mali a Kreste a phetha karolo efe polokehong ea rōna? Ho tloha mehleng ea Noe, barapeli ba ’nete ba ’nile ba talima mali a halalela. (Genese 9:4-6) Mali a phetha karolo ea bohlokoa tšebetsong ea bophelo, hobane Bibele e re “sephefumolohi [kapa bophelo] sa nama se maling.” (Levitike 17:11, NW) Kahoo Molao oa Moshe o ne o laela hore ha ho etsoa sehlabelo ka phoofolo, mali a eona a tšolloe ka pel’a Jehova. Ka linako tse ling mali a ne a boetse a behoa manakeng a aletare. Ka ho hlakileng, matla a sehlabelo sa phoofolo a ho phekola libe a ne a le maling a eona. (Levitike 8:15; 9:9) “Ho ea ka Molao e batla e le tsohle tse hloekisoang ka mali, ’me libe li ke ke tsa tšoareloa ha mali a sa tšolohe.”—Ba-Heberu 9:22, BPN.

 4. (a) Thibelo ea Molimo ea hore ho se ke ha sebelisoa mali e ile ea phetha morero ofe? (b) Ke eng hoo e neng e le habohlokoa mabapi le tsela eo Jesu a ileng a bolaoa ka eona?

⁴ Ka hona, ha ho makatse hore tlas’a Molao, ho ne ho fanoa ka kotlo ea lefu bakeng sa tšebeliso efe kapa efe e mpe ea mali! (Levitike 17:10) Kaofela ha rōna rea tseba hore ha motsoako o itseng o fumaneha ka seoelo, kapa tšebeliso ea oona e lekanyelitsoe ka thata, bohlokoa ba oona boa phahama. Thibelo ea Jehova ea hore mali a se ke a sebelisoa e ne e fana ka tiiso ea hore a talingoa e le a bohlokoa, a le molemo, eseng a talingoe e le ntho ea bohlokoa bo tloaelehileng. (Liketso 15:29; Ba-Heberu 10:29) Sena se ne se lumellana le morero o phahameng oo mali a Kreste a neng a tla o phetha. Ka ho loketseng, o ile a shoa ka mokhoa o ileng oa etsa hore mali a hae a tšolohe. Ka hona, ho ile ha hlaka hore hase feela hore Kreste o ile a etsa sehlabelo ka ’mele oa hae empa hore o ile a tšolla sephefumolohi sa hae, a etsa sehlabelo ka bophelo ba hae e le motho ea phethahetseng! (Esaia 53:12) Kreste ha aa ka a lahleheloa ke tokelo ea molao ea bophelo boo ka baka la ho se phethahale, kahoo mali a hae a tšollotsoeng e ne e le a bohlokoa bo phahameng ’me a ne a ka hlahisoa ka pel’a Molimo bakeng sa phekolo ea libe tsa batho.

 5. (a) Kreste o ile a isa eng leholimong, hona hobane’ng? (b) Ho ile ha bonahala joang hore Molimo o amohetse sehlabelo sa Kreste?

⁵ Kreste o ne a ke ke a isa mali a hae a sebele leholimong. (1 Ba-Korinthe 15:50) Ho fapana le hoo, o ile a isa ho neng ho tšoantšetsoa ke mali ao: bohlokoa ba molao ba bophelo ba hae ba botho bo phethahetseng bo entsoeng sehlabelo. A se a le ka pel’a sefahleho sa Molimo, o ne a ka fana ka bophelo boo ka molao e le topollo bakeng sa batho ba baetsalibe. Ho amohela ha Jehova sehlabelo seo ho ile ha bonahala ka Pentekonta ea 33 C.E., ha moea o halalelang o ne o tšolleloa holim’a barutuoa ba 120 Jerusalema. (Liketso 2:1-4) Joale, kamoo ho ka boleloang ka teng, Kreste o ile a reka moloko oa batho hore e be oa hae. (Ba-Galata 3:13; 4:5; 2 Petrose 2:1) Ka hona, melemo ea topollo e ne e ka tšolohela ho batho.

Ba Pele ba Ruang Molemo Topollong

 6. Molimo o entse litokisetso life bakeng sa ho sebelisoa ha melemo ea topollo ea Kreste?

⁶ Leha ho le joalo, sena se ne se sa bolele hore batho ba ne ba tla fuoa phetheho ea ’mele ka ho panya ha leihlo, hobane ntle le hore sebōpeho sa motho sa boetsalibe se hlōloe, phetheho ea ’mele e ke ke ea fumaneha. (Ba-Roma 7:18-24) Boetsalibe bo ne bo tla hlōloa joang hona bo ne bo tla hlōloa neng? Pele Molimo o ile oa lokisetsa hore ba 144 000 bao e leng ‘baprista ba leholimo ba Molimo oa rōna ba buse e le marena holim’a lefatše’ hammoho le Kreste Jesu. (Tšenolo 5:9, 10; 7:4; 14:1-3) Ka bona melemo ea topollo e tla tšolleloa holim’a batho butle-butle ka nako ea lilemo tse sekete.—1 Ba-Korinthe 15:24-26; Tšenolo 21:3, 4.

 7. (a) Selekane se secha ke eng, ke bo-mang bao e leng karolo ea sona, hona se phetha morero ofe? (b) Ke hobane’ng ha ho ile ha hlokahala hore ho be le lefu ho etsa hore selekane se secha se fumanehe, ’me mali a Kreste a phetha karolo efe?

⁷ Ho finyella seo, ba 144 000 bao e leng marena le baprista “ba lopolotsoe har’a batho.” (Tšenolo 14:4, BPN) Sena se finyelloa ka “selekane se secha.” Selekane sena ke tumellano pakeng tsa Jehova Molimo le Iseraele ea moea ea Molimo ea hore litho tsa eona li sebeletse e le marena le baprista. (Jeremia 31:31-34; Ba-Galata 6:16; Ba-Heberu 8:6-13; 1 Petrose 2:9) Leha ho le joalo, ho ka khoneha joang hore ho be le selekane pakeng tsa Molimo le motho ea sa phethahalang? Pauluse oa hlalosa: “Moo testamente [“selekane,” NW] e leng teng [pakeng tsa Molimo le motho ea sa phethahalang], e ka khona lefu la moreri oa eona le pakoe. Etsoe taba tsa testamente [“selekane,” NW] li na le ho etsahala ha mong a eona a shoele; empa moreri oa eona ha a sa le teng, ha ho etsoe letho ka eona.”—Ba-Heberu 9:16, 17.

8, 9. Topollo e amana joang le selekane se secha?

⁸ Ka hona, sehlabelo sa topollo ke motheo oa selekane se secha, seo Jesu e leng ’Muelli oa sona. Pauluse o ngotse: “Molimo o mong feela, le ’Muelli mahareng a Molimo le batho o mong, e leng Jesu Kreste motho, ea ineetseng ho ba topollo ea bohle. Ke boo bopaki bo beiloeng mehleng ea teng.” (1 Timothea 2:5, 6) Mantsoe ao a sebetsa haholo-holo ho ba 144 000, bao ho entsoeng selekane se secha le bona.

⁹ Ha Molimo o ne o etsa selekane le Iseraele ea nama, ka molao ha sea ka sa qala ho sebetsa ho fihlela ha ho tšolloa mali a phoofolo ha ho etsoa sehlabelo. (Ba-Heberu 9:18-21) Ka ho tšoanang, e le hore selekane se secha e ka ba se sebetsang, ho ile ha hlokahala hore Kreste a tšolle ‘mali a selekane.’ (Mattheu 26:28; Luka 22:20) Molimo o sebelisa molemo oa mali a Jesu ho ba kenngoang selekaneng se secha, o ba fa ho loka ha botho ka molao, athe Kreste eena o sebeletsa e le Moprista ea Phahameng ebile e le “’muelli oa selekane se secha.” (Ba-Heberu 9:15; Ba-Roma 3:24; 8:1, 2) Ka hona Molimo o ka ba kenya selekaneng se secha hore e be marena le baprista leholimong! Jesu o ba thusa ho boloka boemo bo hloekileng pel’a Molimo e le ’Muelli le Moprista ea Phahameng oa bona.—Ba-Heberu 2:16; 1 Johanne 2:1, 2.

Ho Bokella Lintho tse Lefatšeng

10, 11. (a) Ke joang topollo e sa felleng ho Bakreste ba tlotsitsoeng feela? (b) Bongata bo boholo ba batho ke bo-mang, hona bo boemong bo joang pel’a Molimo?

¹⁰ Na ke Bakreste ba tlotsitsoeng feela ba ka fumanang tokollo e tlisoang ke topollo, tšoarelo ea libe tsa bona? Che, Molimo o busetsa lintho tse ling tsohle ho oona ka ho bōpa khotso ka mali a tšollotsoeng thupeng ea tlhokofatso, joalokaha Ba-Kolosse 1:14, 20 e bontša. Sena se akarelletsa lintho tse maholimong (ba 144 000) hammoho le lintho tse lefatšeng. Lintho tse lefatšeng ke batho ba mocheng oa ho fumana bophelo bo sa feleng lefatšeng, ba tla thabela bophelo bo phethahetseng Paradeiseng lefatšeng. Haholo-holo ho tloha ka 1935 ho ’nile ha etsoa boiteko bo kopanetsoeng ba ho bokella batho bana. Tšenolo 7:9-17 e ba hlalosa e le “bongata bo boholo ba batho” bo fumaneng poloko ka baka la Molimo le la Konyana. Ho sa ntse ho hlokahala hore ba pholohe ‘mahlomola a maholo’ ’me ba ‘tataisoe ho ea lilibeng tsa metsi a bophelo,’ kaha Tšenolo 20:5 e bontša hore ba joalo ba tla phela ka ho felletseng, ba be le bophelo ba botho bo phethahetseng, qetellong ea Puso ea Lilemo tse Sekete ea Kreste. Ba tlang ho feta tekong ea ho qetela ka nako eo ba le boemong ba bona bo phethahetseng ba botho ba tla boleloa ba lokile bakeng sa bophelo bo sa feleng lefatšeng.—Tšenolo 20:7, 8.

¹¹ Leha ho le joalo, ka tsela ea ho lokisetsa se tlang, bongata bo boholo ba batho bo se bo ntse bo “hlatsoitse liaparo tse telele tsa bona, [bo] li soeufalitse maling a Konyana.” (Tšenolo 7:14) Kreste ha a sebeletse e le ’Muelli oa selekane se secha molemong oa bona, leha ho le joalo bo rua molemo selekaneng sena ka mosebetsi oa ’Muso oa Molimo. Leha ho le joalo, Kreste o ntse a sebeletsa e le Moprista ea Phahameng molemong oa bona, eo Jehova a ka sebelisang topollo ka eena joalokaha a se a ntse a e sebelisa ho isa bohōleng ba hore bo boleloe bo lokile e le metsoalle ea Molimo hona joale. (Bapisa le Jakobo 2:23.) Nakong ea Lilemo tse Sekete, butle-butle bo tla ‘holloa bohlankeng ba tšenyeho, [ho fihlela ha qetellong] bo ba tokollong ea khanya ea bana ba Molimo.’—Ba-Roma 8:21.

12. Molimo o ile oa sebelisana le banna ba tšepahalang ba mehleng ea pele ho Bokreste joang?

¹² Mabapi le boemo ba bona le Molimo, ho ka ’na ha bonahala eka ba bongata bo boholo ba fapane hanyenyane le barapeli ba pele ho Bokreste. Leha ho le joalo, Molimo o ile oa sebelisana le barapeli bana o hopotse ka tokisetso ea topollo ea nakong e tlang. (Ba-Roma 3:25, 26) Ba ne ba fumana tšoarelo ea libe tsa bona ka tsela ea nakoana feela. (Pesaleme ea 32:1, 2) Ho fapana le ho ba lopolla ka ho felletseng ‘letsoalong la libe,’ mahlabelo a liphoofolo a ne a ‘hopotsa batho libe.’—Ba-Heberu 10:1-3.

13. Re na le melemo efe e fetang ea bahlanka ba Molimo ba pele ho Bokreste?

¹³ Kajeno ha ho joalo ka Bakreste ba ’nete. Ba rapela motheong oa topollo e lefuoeng! Ba ‘atamela terone ea mosa o sa tšoanelang ka bolokolohi ba puo’ ka Moprista oa bona ea Phahameng. (Ba-Heberu 4:14-16, NW) Ho busetsoa ho Molimo hase ketsahalo feela e sa ntsaneng e lebelletsoe empa ke ntho ea sebele e seng e ntse e etsahala hona joale! (2 Ba-Korinthe 5:20) Ha ba etsa phoso, ba ka fumana tšoarelo ea sebele. (Ba-Efese 1:7) Ka sebele ba ba le letsoalo le hloekisitsoeng. (Ba-Heberu 9:9; 10:22; 1 Petrose 3:21) Mahlohonolo ana ke tlhase feela ea tokoloho e khanyang ea bana ba Molimo eo bahlanka ba Jehova ba tla e thabela nakong e tlang!

Botebo ba Bohlale le Lerato la Molimo

14, 15. Topollo e totobatsa bohlale bo ke keng ba lekanngoa ba Jehova joang, hammoho le ho loka ha hae le lerato la oona?

¹⁴ Topollo ke mpho e babatsehang hakaakang e tsoang ho Jehova! E ka utloisisoa habonolo, empa e tebile ka ho lekaneng hore e kenye tšabo ho batho ba bohlale ka ho fetisisa. Ho hlahloba ha rōna kamoo topollo e sebetsang ka teng e bile ho okola ka holimo feela. Leha ho le joalo, re khotsa joaloka moapostola Pauluse: “A boliba ba monono, le ba bohlale, le ba tsebo ea Molimo! Likahlolo tsa oona ha li hlalohanngoe hakakang! Litsela tsa oona ha li na ho fihleloa hakakang!” (Ba-Roma 11:33) Bohlale ba Jehova bo bonahala ka hore o ile a khona ho pholosa batho le ho tlosa qoso bobusing ba hae. Ka topollo, ‘ho loka ha Molimo ho hlahile . . . Molimo o behile Kreste hore e be pheko ho ba lumelang maling a hae.’—Ba-Roma 3:21-26.

¹⁵ Ho ke ke ha thoe Molimo o entse phoso ka ho tšoarela libe tse ileng tsa etsoa ke barapeli ba pele ho Bokreste nakong e fetileng. Ho phaella moo, ho ke ke ha thoe Jehova o entse phoso ka ho bolela batlotsuoa ba lokile e le bara ba hae kapa bongata bo boholo ba batho e le metsoalle ea hae. (Ba-Roma 8:33) Ka tahlehelo e khōlō ho oona, Molimo o ’nile oa ipapisa le molao ka ho phethahetseng, kapa oa bontša ho loka, litšebelisanong tsa oona le ba bang, oa hanyetsa ka ho felletseng leshano la Satane la hore Jehova ke ’musi ea hlokang toka! Lerato le se nang boithati la Molimo ho libōpuoa tsa oona le lona ka ho tšoanang le bonahalitsoe ntle ho pelaelo.—Ba-Roma 5:8-11.

16. (a) Topollo e lokiselitse hore ho rarolloe tseko ea botšepehi ba bahlanka ba Molimo ka tsela efe? (b) Topollo e re fa motheo oa tumelo lefatšeng le lecha le tlang la ho loka joang?

¹⁶ Tsela eo topollo e ileng ea fanoa ka eona le eona e ile ea rarolla litseko tse neng li amana le botšepehi ba bahlanka ba Molimo. Kutlo ea Jesu feela e ile ea finyella seo. (Liproverbia 27:11; Ba-Roma 5:18, 19) Empa ho hong ho ekelletsang moo ke tsela ea bophelo ea Bakreste ba 144 000, ba lulang ba tšepahala ho fihlela lefung ho sa tsotellehe khanyetso ea Satane! (Tšenolo 2:10) Topollo e etsa hore ho be bonolo hore bana ba fumane bophelo ba ho se shoe e le moputso oa bona—bophelo bo ke keng ba felisoa! (1 Ba-Korinthe 15:53; Ba-Heberu 7:16) Sena se etsa hore tlhaloso ea Satane ea hore bahlanka ba Molimo ha ba tšepahale e be e sa utloahaleng! Topollo e boetse e re file motheo o tiileng oa ho ba le tumelo litšepisong tsa Molimo. Re ka bona moralo oa poloko o “theiloeng ka molao” ka sehlabelo sa topollo. (Ba-Heberu 8:6, NW) Ka hona ho fanoe ka tiiso ea hore lefatše le lecha la ho loka le tla tla!—Ba-Heberu 6:16-19.

U se ke ua Lahleheloa ke Morero oa Eona

17. (a) Ba bang ba bontša joang hore ba lahlehetsoe ke morero oa topollo? (b) Ke eng se ka re susumelletsang ho lula re hloekile boitšoarong?

¹⁷ Hore motho a rue molemo topollong, ho hlokahala hore a fumane tsebo, a bontše tumelo, ’me a phele ka litekanyetso tsa Bibele. (Johanne 3:16; 17:3) Leha ho le joalo, ha ho bapisoa ke ba fokolang feela ba ikemiselitseng ho etsa joalo. (Mattheu 7:13, 14) Esita le har’a Bakreste ba ’nete, ba bang ba ka ’na ba “amohela mosa o sa tšoanelang oa Molimo ’me [ba] lahleheloa ke morero oa oona.” (2 Ba-Korinthe 6:1, NW) Ka mohlala, ho theosa le lilemo ba likete-kete ba ’nile ba khaoloa ka baka la boitšoaro bo bobe ba botona le botšehali. Hoo ke ho soabisang hakaakang haholo-holo ka baka la seo Jehova le Kreste ba re etselitseng sona! Na kananelo bakeng sa topollo ha ea lokela ho susumelletsa motho hore a qobe ho ‘lebala phekolo ea libe tsa hae tsa pele’? (2 Petrose 1:9) Ka hona, ka nepo Pauluse o hopotsa Bakreste: “Le rekiloe ka theko e phahameng. Ka baka leo, tlotlisang Molimo ka ’mele ea lōna.” (1 Ba-Korinthe 6:20, BPN) Ho hopola sena ho re susumetsa ka matla hore re lule re hloekile boitšoarong!—1 Petrose 1:14-19.

18. Mokreste ea oelang sebeng se tebileng a ka ’na a rua molemo joang topollong?

¹⁸ Ho thoe’ng haeba motho a se a ntse a oetse sebeng se tebileng? O lokela ho sebelisa hamolemo tšoarelo eo topollo e entseng hore e fumanehe, a fumane thuso ho balebeli ba lerato. (Jakobo 5:14, 15) Esita leha ho hlokahala taeo e matla, Mokreste ea bakileng ha aa lokela ho nyahamisoa ke khalemelo e joalo. (Ba-Heberu 12:5) Re na le tiisetso ena ea Bibele e babatsehang: “Ha re ipolela libe tsa rōna, Molimo oa tšepeha, o lokile, hore o re tšoarele libe ’me o re hlatsoe bokhopo bohle.”—1 Johanne 1:9.

19. Mokreste a ka ba le pono efe ka boitšoaro ba hae bo fosahetseng ba pele a ithuta ’nete?

¹⁹ Ka linako tse ling Bakreste ba nyahama ntle ho tšoanelo ka baka la boitšoaro bo fosahetseng ba nakong e fetileng. Moena e mong ea nyahameng o ile a ngola: “Pele ’na le mosali oa ka re kena ’neteng, re ile ra tšoaroa ke lefu le bitsoang herpes lithong tsa botona le botšehali. Ka linako tse ling re ikutloa re sa hloeka, joalokaha eka ha re ‘tšoanelehe’ ho ba ka hare ho mokhatlo o hlophisitsoeng oa Jehova o hloekileng.” Bonneteng, esita le ka mor’a hore ba bang ba fetohe Bakreste, ba ka ’na ba kotula bohloko bo itseng ka baka la liphoso tseo ba li entseng nakong e fetileng. (Ba-Galata 6:7) Ho ntse ho le joalo, ha ho na lebaka la hore motho a ikutloe a sa hloeka mahlong a Jehova haeba a bakile. “Mali a Kreste” a ka khona ho ‘hlatsoa matsoalo a rōna mesebetsing e shoeleng.’—Ba-Heberu 9:14.

20. Ho ba le tumelo topollong ho ka imolla Mokreste joang hore a se ikutloe a le molato ka ho sa hlokahaleng?

²⁰ E, ho ba le tumelo topollong ho ka re imolla meroalo e sa hlokahaleng ea ho ikutloa re le molato. Khaitseli e mong e mocha o ile a lumela: “E se e le lilemo tse fetang 11 joale ke ntse ke loantša tloaelo e litšila ea ho pholla litho tsa botšehali. Lekhatheng le leng ke ile ka batla ke furalla phutheho, ke ikutloa hore Jehova a ke ke a batla hore motho ea nyonyehang joalo a silafatse phutheho ea hae.” Leha ho le joalo, re tlameha ho hopola hore Jehova o “molemo ’me o itokiselitse ho tšoarela” hafeela re loantša ho sa lokang ka hlokolosi, re sa inehele ho hona!—Pesaleme ea 86:5.

21. Topollo e lokela ho ama pono ea rōna joang ka batho ba re khopisang?

²¹ Hape topollo e lokela ho ama tsela eo re sebelisanang le ba bang ka eona. Ka mohlala, u itšoara joang ha Mokreste-’moho a u khopisa? Na ka bolokolohi u bontša ho tšoarela ho kang ha Kreste? (Luka 17:3, 4) Na u ‘utloela ba bang bohloko ka mosa, u tšoarela ba bang ka bolokolohi joalokaha Molimo le oona o u tšoaretse ka bolokolohi ka Kreste’? (Ba-Efese 4:32, NW) Kapa na u ba le tšekamelo ea ho koetla likhopiso kapa ho hōlisa lehloeo? Ka sebele, ho etsa joalo e ne e ka ba ho lahleheloa ke morero oa topollo.—Mattheu 6:15.

22, 23. (a) Topollo e lokela ho ba le phello efe lipakaneng tsa rōna le mokhoeng oa rōna oa bophelo? (b) Bakreste bohle ba lokela ho ba le boikemisetso bofe mabapi le topollo?

²² Qetellong, kananelo ea rōna ka topollo e lokela ho ba le phello e tebileng lipakaneng tsa rōna le mokhoeng oa rōna oa bophelo. Pauluse o itse: “Le rekiloe ka theko; le se ke la fetoha baruoa ba batho.” (1 Ba-Korinthe 7:23) Na bophelo ba hao bo sa ntse bo theiloe litlhokong tsa lelapa—ntlo, mosebetsi, lijo, le liaparo? Kapa na u batla ’Muso pele, u bontša tumelo tšepisong ea Molimo ea ho u hlokomela? (Mattheu 6:25-33) Na mohlomong u sebeletsa mohiri oa hao empa u hlōleha ho fana ka sebaka se lekaneng bakeng sa mesebetsi ea puso ea Molimo? Hopola, Kreste ‘o itelletse rōna a tle a re hlatsoe, a tle a iketsetse ka rōna sechaba seo e leng sa hae ka sebele, se chesehelang mesebetsi e metle.’—Tite 2:14; 2 Ba-Korinthe 5:15.

²³ “Liteboho li ea ho Molimo ka Jesu Kreste” bakeng sa mpho ena e phahameng—ea topollo! (Ba-Roma 7:25, NW) E se eka le ka mohla re ke ke ra lahleheloa ke morero oa topollo empa re e lumelle hore e be le tšusumetso ea sebele bophelong ba rōna. Ka monahano, ka mantsoe, le ka liketso, e se eka ka mehla re ka tlotlisa Molimo, re ntse re hopola ka teboho hore re rekiloe ka theko.

Lipotso tsa Tlhahlobo

◻ Ke hobane’ng ha mali a nkoa a halalela, ’me mali a Kreste a ile a hlahisoa ka pel’a Jehova leholimong joang?

◻ Mali a Kreste a ile a phetha karolo efe bakeng sa ho thea selekane se secha?

◻ Topollo e ruisa batlotsuoa le bongata bo boholo ba batho molemo joang?

◻ Re ka bontša joang hore ha rea lahleheloa ke morero oa topollo?

[Setšoantšo se leqepheng la 16]

Matla a sehlabelo sa phoofolo a ho phekola libe a maling a eona

[Setšoantšo se leqepheng la 17]

Motho ea ananelang tšoarelo ea Molimo o ikemiselitse ho tšoarela ba bang