Mosebetsi oa Boithaopo o Nang le Melemo e Tšoarellang

JESU KRESTE o ne a etsa liketso tse ntle kamehla bakeng sa ba hlokang. Ka mohlala, o ile a fepa ba lapileng le ho folisa ba kulang. (Matheu 14:14-21) Leha ho le joalo, o ile a etelletsa pele mosebetsi ofe haholo? Se etsahetseng qalong ea tšebeletso ea Jesu se fana ka karabo. Se tlalehiloe khaolong ea pele ea Kosepele ea Mareka.

Ha Jesu a ne a le Kapernauma, haufi le Leoatle la Galilea, o ile a isoa lapeng ha Simone, kapa Petrose. Teng “mohoehali oa Simone o ne a robetse a kula a tšoeroe ke feberu,” ’me Jesu o ile a mo folisa. (Mareka 1:29-31) Hamorao, letšoele la batho “ba bangata ba neng ba tšoeroe ke maloetse a sa tšoaneng” le ile la qala ho khobokana monyako oa ntlo ea Petrose, ’me le bona Jesu a ba folisa. (Mareka 1:32-34) Joale ea e-ba bosiu ’me bohle ba robala.

Hoseng ho hlahlamang, “ho sa ntse ho le lefifi,” Jesu a tsoha ka lenyele ’me a tsoa ka tlung ho ea “sebakeng se thōko” moo a ileng a “qala ho rapela.” Ka mor’a nakoana barutuoa le bona ba tsoha, ba sheba ka ntle ’me ba bona letšoele la batho le letile monyako. Ba ne ba tla etsa joang? Jesu o ne a le sieo! Ka potlako Petrose le ba nang le eena ba ile ba batla Jesu ’me ba re: “Bohle baa u batla.” (Mareka 1:35-37; Luka 4:42) Ha e le hantle ho bonahala hore ba ne ba re ho Jesu: ‘U etsa’ng moo? U atlehile haholo bosiung ba maobane ha u ne u phekola ba kulang. Le kajeno u sa letetsoe ke monyetla o moholo!’

Empa joale hlokomela karabo ea Jesu: “A re eeng sebakeng se seng sesele, litoropong tse haufi tsa metsana, e le hore nka bolela le moo.” Karabo ena ke ea bohlokoa. Jesu ha aa ka a khutlela ntlong ea Petrose ho ea phekola ba bang. O ile a hlalosa lebaka la seo ha a re: “Ke tsoile ka morero ona [oa ho bolela].” (Mareka 1:38, 39; Luka 4:43) Jesu o ne a bolella barutuoa ba hae eng? Ho etsa liketso tse molemo e ne e le habohlokoa ho eena, empa ho bolela le ho ruta lentsoe la Molimo e ne e le thōmo ea Jesu e ka sehloohong.—Mareka 1:14.

Kaha Bibele e khothalletsa Bakreste hore ba “latele mehato ea [Jesu] haufi-ufi,” Bakreste ba ’nete kajeno ba na le tataiso e hlakileng tabeng ea hore na ke mosebetsi ofe oa boithaopo o lokelang ho nka sebaka sa pele. (1 Petrose 2:21) Joaloka Jesu, ba thusa batho ba hlokang—joalokaha lihlooho tse etellang sena pele li bontšitse. Ba boetse ba beha mosebetsi oa ho ruta molaetsa oa Bibele oa litaba tse molemo tsa ’Muso oa Molimo ka pele ho lintho tsohle, joaloka Jesu.a (Matheu 5:14-16; 24:14; 28:19,20) Leha ho le joalo, ke hobane’ng ha ho ithaopela ho ruta batho molaetsa oa Bibele ho tlameha ho tla pele ho mesebetsi e meng ea boithaopo?

Lebaka le Mokhoa o Etsang Hore Thuto ea Bibele e Hlahise Phapang

Maele a Asia a opa khomo lenaka. A re: “Haeba u etsa litokisetso tsa selemo, jala peō. Haeba u etsa litokisetso tsa lilemo tse leshome, lema lifate. Haeba u etsa litokisetso tsa lilemo tse lekholo, ruta batho.” Ka sebele, ha ho tluoa tabeng ea ho fana ka tharollo e tla tšoarella nako e telele, thuto ea hlokahala hobane e thusa motho hore a khone ho etsa liqeto tse tla ntlafatsa bophelo ba hae. Ke lona lebaka le etsang hore ebe baithaopi ba limilione tse tšeletseng ba nakoana le ba kamehla ba sebelisa nako ea bona, matla a bona le lichelete tsa bona ho fana ka thuto e sa lefelloeng ea Bibele sechabeng. Lenaneo lena la boithaopo le pakiloeng ka nako e telele hore lea sebetsa la Lipaki tsa Jehova le na le tšusumetso ho batho lefatšeng lohle. Joang?

Ha batho ba thusoa hore ba utloisise le ho latela keletso ea Bibele e sebetsang, ba hlomelloa hamolemo bakeng sa ho sebetsana le mathata a bophelo. Ba fumana matla a hlokahalang hore ba hlōle mekhoa e kotsi. Mocha e mong oa Brazil, Nelson, o hatisa bohlokoa bo bong ba thuto ea Bibele: “Esale ke qala ho ithuta Bibele le Lipaki tsa Jehova, ke lula ke thabile hobane ke se ke e-na le morero bophelong.” (Moeklesia 12:13) Ba bang ba sa tsoa ithuta Lentsoe la Molimo ba makholo a likete—ba bacha le ba hōlileng—ba lumellana le maikutlo a Nelson. Ntle le ho thusa liithuti ho fumana morero o khotsofatsang oa bophelo, molaetsa oa ’Muso oa Molimo o fana ka tšepo e khothatsang ea bokamoso—e leng tšepo e etsang hore bophelo e be ba bohlokoa le tlas’a maemo a thata ka ho fetisisa. (1 Timothea 4:8)—Bona lebokose le reng “Kamoo ’Muso oa Molimo o Tla Tlisa Phetoho Kateng.”

Ka ho fana ka thuto ea Bibele, Lipaki tsa Jehova li etsa mosebetsi oa boithaopo o nang le melemo e tšoarellang halelele. Halelele hakae? Lentsoe la Molimo le re: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.” (Johanne 17:3) Ak’u nahane u se u kopanela lenaneong le nang le melemo ea ka ho sa feleng—oo ke mofuta oa tšebeletso ea boithaopo oo ka sebele o tlisang phetoho! Na oo hase mofuta oa lenaneo leo u ka ratang ho ithuta ho eketsehileng ka lona? Haeba ho joalo, ikopanye le Lipaki tsa Jehova tse sebakeng sa heno. Ho etsa sena e tla ba mohato oo u ke keng ua ikoahlaela oona.

[Mongolo o botlaaseng ba leqephe]

[Ntlha e Qolotsoeng e leqepheng la 21]

“Haeba u etsa litokisetso tsa selemo, jala peō. Haeba u etsa litokisetso tsa lilemo tse leshome, lema lifate. Haeba u etsa litokisetso tsa lilemo tse lekholo, ruta batho”

[Lebokose/Litšoantšo tse leqepheng la 20]

O Fana ka Thuso le Tšepo

Nadine ea lilemo li 43, eo e leng mooki oa Lefora eo ka ho khetheha a ithutetseng mafu a libakeng tse chesang tse mongobo, ke e mong oa baithaopi ba ’nileng ba sebetsa Afrika Bohareng. Puisanong eo a bileng le eona haufinyane, o buile tjena: “Batho baa mpotsa hore na ke hobane’ng ha ke etsa sena. Kea lumela hore Molimo o teng, ke rata batho ’me ke batla ho itella bona. Hape ho ba e mong oa Lipaki tsa Jehova ho ntšusumelletsa hore ke fane ka phekolo hammoho le tšepo ho ba mahlomoleng.” Hona Afrika moo Nadine a etsang mosebetsi oa boithaopo teng, o arotse nako ea hae hore a thuse lefapheng la liphallelo a be a kopanele mosebetsing oa thuto ea Bibele o etsoang ke Lipaki tse ling tsa moo.

[Litšoantšo]

Nadine, Afrika

[Lebokose le leqepheng la 22]

Kamoo ’Muso oa Molimo o Tla Tlisa Phetoho Kateng

Ka kōpo bala mangolo ana Bibeleng ea hao ’me u bone kamoo Molimo a tšepisang ho khotsofatsa litlhoko tsa motho maemong a latelang:

Bophelo bo Botle “O tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”—Tšenolo 21:4; Esaia 33:24; 35:5, 6.

Thuto “Li ke ke tsa ntša kotsi leha e le efe kapa tsa baka tšenyo leha e le efe thabeng eohle ea ka e halalelang; hobane ka sebele lefatše le tla tlala tsebo ea Jehova joalokaha metsi a koahetse leoatle.”—Esaia 11:9; Habakuke 2:14.

Mosebetsi “Ka sebele ba tla haha matlo ’me ba lule ho ’ona; ka sebele ba tla lema lirapa tsa morara ’me ba je litholoana tsa tsona. Ba ke ke ba haha ’me e mong a lule teng; ba ke ke ba lema ’me e mong a je. . . . Ba ke ke ba sehlela lefeela.”—Esaia 65:21-23.

Lijo “Ka sebele lefatše le tla fana ka lihlahisoa tsa lona; Molimo, Molimo oa rōna, o tla re hlohonolofatsa.”—Pesaleme ea 67:6; 72:16; Esaia 25:6.

Maemo a Bophelo “Jehova o robile molamu oa ba khopo . . . Lefatše lohle le phomotse, ha le khathatsoe.”—Esaia 14:5, 7.

Toka “Bonang! Morena o tla busa ka ho loka; ha e le likhosana, li tla busa e le likhosana ka toka.”—Esaia 11:3-5; 32:1, 2.