Sekolo sa Gileade—Lilemo Tse 60 Tsa ho Koetlisa Baromuoa
“KA LEBAKA la thuto ea rōna e matla ea Bibele, re ile ra atamela haholoanyane ho Jehova ’me ra ithuta ho eketsehileng ka mokhatlo oa hae o hlophisitsoeng. Sena se ile sa re hlomella ho phela linaheng tse ling.” Ke kamoo seithuti se ileng sa abeloa lengolo sehlopheng sa pele, se ileng sa hlalosa hore na se ithutile eng Sekolong sa Bibele sa Gileade sa Watchtower. Ho tloha ha se khakoloa lilemong tse 60 tse fetileng, Sekolo sa Gileade se ’nile sa romela baromuoa linaheng tse ling. Ka la 8 March, 2003, sehlopha sa bo114 se ile sa abeloa mangolo Setsing sa Thupelo sa Watchtower se Patterson, New York. Ba 6 404 ba neng ba bokane ka holong le libakeng tse hokahantsoeng ka thelevishene ba ile ba mamela ka hloko lenaneo le neng le kopanyelletsa lipuo, lipuisano le puisano ea sehlopha.
Theodore Jaracz, setho sa Sehlopha se Busang, e ne e le molula-setulo. Mantsoe a hae a selelekela a ile a totobatsa hore bamameli ba tsoa lichabeng tse fapaneng kaha ho ne ho e-na le baeti ba tsoang Asia, Caribbean, Amerika Bohareng le Amerika Boroa le Europe. Mor’abo rōna Jaracz o ne a thehile puo ea hae ho 2 Timothea 4:5, ’me o ile a totobatsa mosebetsi o ka sehloohong oa moromuoa ea koetlisitsoeng Gileade—e leng oa ho “etsa mosebetsi oa moevangeli.” Baromuoa ba pakela ’nete ka ho ruta batho Bibele.
Liithuti li Fuoa Thupelo ea ho Qetela
Ho qala letoto la lipuo tse khutšoanyane, John Larson, eo e leng setho sa Komiti ea Lekala ea United States, o ile a tšohla sehlooho se matlafatsang tumelo se reng, “Haeba Molimo a Eme le Rōna, ke Mang ea Tla ba Khahlanong le Rōna?” (Baroma 8:31) O ile a hlalosa lebaka la Mangolo leo ka lona liithuti li lokelang ho tšepa ka ho feletseng matla a Jehova ho li thusa ho hlōla tšitiso leha e le efe eo li ka ’nang tsa tobana le eona likabelong tsa tsona. A sebelisa Baroma 8:38, 39, Mor’abo rōna Larson o ile a khothatsa liithuti, a re: “Emang hanyenyane ’me le nahane ka matla ao Molimo a a sebelisang molemong oa lōna, ’me le hopole hore ha ho letho le ka etsang hore Jehova a se ke a le thahasella.”
Sebui se latelang e ne e le Guy Pierce, eo e leng setho sa Sehlopha se Busang. O ile a khetha sehlooho se reng, “Bolokang Mahlo a Lōna a Thabile!” (Luka 10:23) O ile a hlalosa hore thabo ea ’nete e akarelletsa ho tseba Jehova le ho utloisisa morero oa hae oa ka ho sa feleng esita le ho bona ho phethahala ha boprofeta ba Bibele. Hohle moo li eang, liithuti li ka lula li thabile e le kannete ka ho boloka mahlo a tsona a thabile. Mor’abo rōna Pierce o ile a khothalletsa ba abeloang mangolo hore ba thuise ka botebo ka molemo oa Jehova ’me ba boloke likelello tsa bona le lipelo tsa bona li tsepame ho etseng thato ea Hae. (Pesaleme ea 77:12) Ka ho lula ba e-na le boikutlo bo nepahetseng, ba abetsoeng mangolo ba ka hlōla mathata leha e le afe a ka ba hlahelang.
Ka mor’a moo sehlopha se ile sa bolelloa mantsoe a khothatsang a karohano ke barupeli ba babeli ho barupeli ba neng ba li ruta letsatsi le letsatsi. Sehloohong sa puo ea hae, Lawrence Bowen o ile a botsa potso e reng, “Na U Batla Thoriso?” Batho ba bangata ba nahana hore thoriso e bolela feela tlotliso, tlhompho le tlotla tse eang ho bona ka bobona. Leha ho le joalo, mopesaleme Asafe o ile a qala ho utloisisa thoriso ea sebele—e leng letlotlo la bohlokoahali la ho ba le kamano e hlomphehang le Jehova. (Pesaleme ea 73:24, 25) Liithuti tse abeloang mangolo li ile tsa khothalletsoa ho lula li e-na le kamano e haufi le Jehova ka ho tsoela pele li ithuta Bibele ka botebo. Mangeloi “a lakatsa ho nyarela” boitsebisong bo amang ho phethahala ha morero oa Jehova ka Kreste. (1 Petrose 1:12) A batla ho ithuta lintho tse ngata kamoo ho ka khonehang ka Ntate oa ’ona e le hore a tle a bonahatse khanya ea hae. Ka mor’a moo Mor’abo rōna Bowen o ile a khothalletsa liithuti hore li rorise Jehova likabelong tsa tsona tsa boromuoa ka ho thusa ba bang hore ba fumane letlotlo la bohlokoa ka ho fetisisa.
Mongolisi oa sekolo, Wallace Liverance, o ile a phetha letoto la lipuo tseo ka sehlooho se reng, “Bua Bohlale ba Molimo Sephiring se Halalelang.” (1 Bakorinthe 2:7) Bohlale ba Molimo boo moapostola Pauluse a ileng a bua ka bona tšebeletsong ea hae ea boromuoa ke eng? Ke mokhoa o bohlale le o matla oo Jehova a o sebelisang ho tlisa khotso le bonngoe hohle. Motheo oa bohlale bona ke Jesu. Ho e-na le ho bolela molaetsa oa hore na melao-motheo ea Bibele e ka rarolla mathata a sechaba joang, Pauluse o ile a thusa batho ho bona kamoo Molimo a tlang ho felisa liphello tsa sebe sa Adama kateng. (Baefese 3:8, 9) Mor’abo rōna Liverance o ile a khothatsa bamameli, a re: “Sebelisang tokelo ea lōna ea tšebeletso joaloka Pauluse, ea ileng a nka kabelo ea hae ea boromuoa e le monyetla oa ho thusa batho ho bona kamoo Jehova a tlang ho phethahatsa morero oa hae kateng.”
Ka mor’a moo, Mark Noumair, morupeli e mong oa Gileade, o ile a etella pele puisano e mafolofolo le liithuti tse ’maloa sehlopheng seo. Sehlooho se reng “Ho Ithuta Lentsoe la Molimo ho Hlahisa Basebeletsi ba Chesehang” se ile sa totobatsa mantsoe a Pauluse ho Baroma 10:10. Liithuti li ile tsa pheta liphihlelo tse ngata tsa tšimo tseo li bileng le tsona ha li ntse li le sekolong. Liphihlelo tsa tsona li ile tsa bontša hore ha re ithuta le ho thuisa ka Lentsoe la Molimo, lintho tse babatsehang mabapi le Jehova Molimo le ’Muso oa hae li tla tlala ka lipelong tsa rōna ’me re tla li bolella ba bang. Ka likhoeli tse hlano tseo liithuti li li qetileng Setsing sa Thupelo sa Watchtower, li ile tsa qala lithuto tse 30 tsa lehae tsa Bibele le batho ba thahasellang ba leng tšimong e sebetsoang khafetsa ke liphutheho tse haufi.
Bao e Leng Khale ba li Bona ba Fana ka Keletso
Ha liithuti li ntse li le sekolong, li ile tsa rua molemo ka ho kopana le litho tsa lelapa la Bethele la United States. Litho tse peli tsa lekala e leng Robert Ciranko le Robert P. Johnson li ile tsa buisana le bahlanka ba ’maloa ba sebelelitseng Jehova ka botšepehi ka nako e telele, ho kopanyelletsa le balebeli ba tsamaeang bao ka nako eo ba neng ba koetlisoa ka ho khethehileng Setsing sa Thupelo sa Watchtower. Bohle bao ho neng ho buisanoa le bona ba ne ba abetsoe mangolo Gileade ’me e kile ea e-ba baromuoa. Liithuti le malapa abo tsona le metsoalle ba ile ba khothala ha ba utloa mantsoe a bohlale a tsoang ho banna bana ba moea ba nang le phihlelo.
Keletso ea bona e ne e akarelletsa keletso ena: “Tšoarehang haholo kamoo ho ka khonehang tšebeletsong le phuthehong.” “Le se ke la inkela holimo. Lulang le nahana ka morero oa lōna oa ho ba baromuoa, ’me le nke libaka tseo le sebeletsang ho tsona e le mahae a lōna.” Lintlha tse ling tse molemo tse builoeng li ile tsa bontša kamoo koetliso ea Gileade e hlomellang mosebeletsi kateng bakeng sa mosebetsi o molemo, ho sa tsotellehe hore na o abeloa ho ea hokae. Tse ling tsa tsona ke tsena: “Re ile ra ithuta ho momahana le ho sebetsa ’moho.” “Sekolo se ile sa re thusa ho amohela mekhoa ea lichaba tse ling.” “Re ile ra rutoa mokhoa o mocha oa ho sebelisa Mangolo.”
John E. Barr, eo e seng e le khale e le setho sa Sehlopha se Busang, o ile a fana ka puo ea sehlooho lenaneong lena. Sehlooho sa hae se thehiloeng Mangolong se ne se re, “Molumo oa Bona o Ile oa Kena Lefatšeng Lohle.” (Baroma 10:18) O ile a botsa potso a re, Na kajeno batho ba Molimo ba atlehile ho phetha mosebetsi oo o boima? E, ka sebele! Khale ka 1881, babali ba makasine ea Molula-Qhooa ba ile ba botsoa potso e reng: “Na ua bolela?” Joale Mor’abo rōna Barr o ile a hopotsa bamameli bohle memo e tsebahalang e ileng ea etsoa ka 1922 kopanong ea Cedar Point, Ohio, U.S.A., e neng e re: “Phatlalatsang Morena le ’Muso oa hae!” Ha nako e ntse e feta, cheseho ea bahlanka ba Molimo ba tšepahalang e ile ea ba susumelletsa hore ba bolele linnete tse hlollang tsa ’Muso lichabeng tsohle. Ka ho sebelisa lingoliloeng le ka ho bua, litaba tse molemo li fihlile lipheletsong tsa lefatše leo ho ahiloeng ho lona—’me sena sohle se tlisa tlotla le thoriso ho Jehova. Ha a phetha puo ea hae ka mantsoe a susumetsang maikutlo, Mor’abo rōna Barr o ile a khothatsa liithuti hore li ananele litlhohonolofatso tseo li li fumanang, a re: “Letsatsi le leng le le leng ha le rapela Jehova likabelong tsa lōna, le mo lebohe ho tloha botebong ba lipelo tsa lōna ha le bile le seabo phethahatsong ea mantsoe a reng, ‘Molumo oa bona o ile oa kena lefatšeng lohle.’”
Ka mor’a puo ena, ho ile ha baloa litumeliso, ’me molula-setulo a fa seithuti se seng le se seng diploma. Ka mor’a moo, ka thabo e kopaneng le mesarelo ka hore ebe ba tloha sekolong seo ba se ratang, moemeli oa liithuti o ile a bala qeto e tlohang botebong ba pelo e neng e lebisitsoe ho Sehlopha se Busang le ho lelapa la Bethele, e bontšang hore ba abetsoeng mangolo ba ikemiselitse ho boka Jehova “ho tloha joale ho ea pele le ho isa nakong e sa lekanyetsoang.”—Pesaleme ea 115:18.
Thapelo ea rōna ke hore liithuti tsena tse abetsoeng mangolo li tla tloaela mahae a tsona a macha ’me li thuse hore ho be le khatelo-pele mosebetsing oa lefatšeng ka bophara oa boboleli, feela joalokaha ba tlileng sekolong pele ho bona ba entse joalo ka lilemo tse ka bang 60.
[Lebokose le leqepheng la 23]
LIPALO-PALO TSA SEHLOPHA
Palo ea linaha tseo se li emetseng: 12
Palo ea linaha tseo se abetsoeng ho tsona: 16
Palo ea liithuti: 48
Karolelano ea lilemo: 34,4
Karolelano ea lilemo ’neteng: 17,6
Karolelano ea lilemo tšebeletsong ea nako e tletseng: 13,5
[Setšoantšo se leqepheng la 24]
Sehlopha sa Bo114 sa Sekolo sa Bibele sa Gileade sa Watchtower se Abeloang Mangolo
Lethathamong le ka tlaase, mela e baloa ho tloha ka pele ho ea ka morao, ’me mabitso a thathamisitsoe ho tloha ka letsohong le letšehali ho ea ka ho le letona moleng ka mong.
(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.