Pono ea Bibele

Ho Bolela’ng ho ba Hlooho ea Lelapa?

HO LATELA Bibele, “hlooho ea mosali ke monna.” (1 Bakorinthe 11:3; Baefese 5:23) Empa ba bangata ba ipolelang hore ba hlompha Bibele ba na le maikutlo a hore molao-motheo ona oa bohlooho ba monna hase feela hore o siiloe ke nako, empa hape o kotsi. Banyalani ba bang ba hlalositse: “Thuto ea hore basali ba lokela ho ‘ikokobetsa ba sa khanane’ [ho banna ba bona], ha e feteletsoa, e ka lebisa ho hlekefetsoeng, ’meleng le maikutlong.” Ka bomalimabe ho sebelisoa ha bohlooho hampe ho jele setsi ebile ho atile. Mongoli e mong o re: “Ho shapa mosali ho nkoa e le karolo ea boitšoaro bo amohelehang linaheng tse ngata—tokelo ea ho ba monna e thoholetsoang ka lipina, lithothokiso le machatong.”

Ba bang ba fana ka maikutlo a hore molao-motheo oa Bibele oa bohlooho o entse hore ho be le liketso tsena tse sehlōhō. Na thuto ea Bibele ea bohlooho e nyenyefatsa basali ’me e khothalletsa pefo ka lapeng? Hantle-ntle ho bolela eng ho ba hlooho ea lelapa?a

Bohlooho Hase Bompoli

Bohlooho ba Bibele ke tokisetso e lerato ’me ho hang ha bo tšoane le bompoli. Ho hlokomoloha bolaoli bo behiloeng ke Molimo ke hona ho ileng ha fella ka hore hangata banna ba hatelle basali ka sehlōhō. (Genese 3:16) Ka mor’a bophelo serapeng sa Edene, hangata banna ba ’nile ba sebelisa matla a bona hampe, ba tlatlapa ba bang ka mabifi, ho akarelletsoa basali le bana.

Leha ho le joalo, eo ha e e-s’o ka e e-ba karolo ea morero oa Molimo. Jehova o nyonya ba sebelisang matla a bona hampe. O ile a nyatsa banna ba Iseraele ba neng ba ‘sebetsana le basali ba bona ka bolotsana.’ (Malakia 2:13-16) Ho feta moo, Molimo o re “ka sebele moea oa Hae o hloile mang kapa mang ea ratang pefo.” (Pesaleme ea 11:5) Kahoo batho ba otlang basali le bahlekefetsi ba bang ho hang ba ke ke ba sebelisa Bibele ho lokafatsa liketso tsa bona tse mabifi.

Bohlooho bo Loketseng bo Akarelletsa Eng?

Bohlooho ke tokisetso ea motheo eo Molimo a e sebelisang ho boloka taolo bokahohleng bohle. Motho e mong le e mong o ikarabella ho e mong, ntle le Molimo. Banna ba tlas’a Kreste, bana ba tlas’a batsoali ba bona, ’me Bakreste bohle ba tlas’a mebuso. Esita le Jesu o tlas’a Molimo.—Baroma 13:1; 1 Bakorinthe 11:3; 15:28; Baefese 6:1.

Ho ikokobelletsa boeta-pele hoa hlokahala bakeng sa ho ba le sechaba se laolehileng le se tsitsitseng. Ka ho tšoanang, ho ikokobelletsa hlooho ea lelapa hoa hlokahala bakeng sa ho haha lelapa le tiileng, le thabileng le le nang le khotso. Ho ba sieo ha monna kapa ntate ka lapeng ha ho fetole ’nete ena. Malapeng a joalo ’mè ke eena eo e bang hlooho. Ha batsoali ka bobeli ba le sieo, ngoana e moholo kapa mong ka bona a ka nka bohlooho ba lelapa. Mabakeng ’ohle, litho tsa lelapa li rua molemo ha li bontša tlhompho e loketseng ho ea filoeng matla a ho etella pele.

Kahoo, ntlha ea bohlokoa hase ho hana molao-motheo oa bohlooho, ho e-na le hoo, ke ho ithuta ho sebelisa le ho talima bohlooho ka tsela e nepahetseng. Moapostola Pauluse o khothatsa banna ba Bakreste hore e be lihlooho tsa malapa a bona “joalokaha Kreste le eena e le hlooho ea phutheho.” (Baefese 5:21-23) Kahoo Pauluse o supa tsela eo Kreste a ileng a sebetsana ka eona le phutheho e le tekanyetso e phethahetseng ea bohlooho. Kreste o ile a beha mohlala ofe?

Le hoja e le Mesia ebile e le Morena oa ka moso, Jesu o ne a e-na le matla a tsoang ho Molimo ka boeena ’me o ne a le bohlale haholo a bile a e-na le phihlelo bophelong ho feta barutuoa ba hae, hape o ne a e-na le lerato, a le mofuthu a bile a e-na le kutloelo-bohloko. Ha ho mohla a neng a le thata, a sa tenyetsehe, kapa a batla ho fetang se lebeletsoeng. O ne a sa hatelle le ha e le hore kamehla a ’ne a hopotse e mong le e mong hore e ne e le Mora oa Molimo. Jesu o ne a ikokobelitse, a le pelo e robehileng. Ka lebaka leo, ‘joko ea hae e ne e le mosa le mojaro oa hae o le bobebe.’ (Matheu 11:28-30) Ka hona, o ne a atameleha ’me a bulehetse maikutlo a batho ba bang. Ha e le hantle, Pauluse o re Jesu o ne a rata phutheho hoo a ileng “a inehela bakeng sa eona.”—Baefese 5:25.

Motho a ka Etsisa Bohlooho ba Jesu Joang?

Lihlooho tsa malapa li ka etsisa litšoaneleho tsa Kreste joang? Hlooho e nang le boikarabelo e bontša ho ameha ka bophelo ba lelapa la eona ’meleng le moeeng. E iteletse ho fana ka nako e loketseng le tlhokomelo linthong tseo ba li hlokang e le motho ka mong hape e le sehlopha. Lintho tseo molekane oa hae le bana ba li thahasellang li tla pele ho tsa hae.b (1 Bakorinthe 10:24; Bafilipi 2:4) Ka ho sebelisa melao-motheo ea Bibele le lithuto tsa eona bophelong ba hae ba letsatsi le letsatsi, monna o hapa tlhompho le tšehetso ea mosali oa hae le bana. Tlas’a bohlooho ba hae bo lerato, boiteko ba bona ba ho sebetsana ka katleho le mathata leha e le afe bo ka atleha. Kahoo, ka ho sebelisa bohlooho ba hae ka tsela ea Mangolo, monna o haha lelapa le thabileng, le sebetsang ho tlotlisa le ho rorisa Molimo.

Hlooho e bohlale e boetse e ea ikokobetsa. Ha ho hlokahala, e tla ikōpela tšoarelo habonolo, le hoja e ka ’na ea ho fumana ho le thata ho lumela hore e ne e fositse. Bibele e bolela hore “ha baeletsi ba le bangata ho na le poloko.” (Liproverbia 24:6) E, boikokobetso bo tla boetse bo susumelletsa hlooho ea lelapa ho mamela le hore e utloisise ho batla maikutlo a mosali le bana ha ho loketse. Ka ho etsisa Jesu, hlooho ea Mokreste e tla etsa bonnete ba hore bohlooho ba eona ha bo tlise thabo le tšireletseho feela lelapeng la eona empa bo tla boela bo tlisa tlhompho le ho rorisa Moqapi oa malapa, Jehova Molimo.—Baefese 3:14, 15.

[Mongolo o botlaaseng ba leqephe]

[Setšoantšo se leqepheng la 26]

Monna ea nahanelang o nahanela maikutlo a mosali oa hae le bana