Ho Sebeletsa Mokhatlo oa Jehova ka Botšepehi

“Ho ea tšepahalang ua tšepahala.”—2 SAMUELE 22:26, BPN.

 1, 2. Mehlala e meng ea botšepehi ke efe eo rōna bohle re ka ’nang ra e bona ka phuthehong?

PHIRIMANENG e ’ngoe moholo o lokisetsa puo bakeng sa seboka sa Bokreste. A ka rata ho khaotsa ’me a phomole; ho e-na le hoo, o tsoela pele ho sebetsa, a batla mehlala ea Mangolo le lipapiso tse tla finyella lipelo le ho khothatsa mohlape. Mantsiboeeng a seboka seo, batsoali ba khathetseng phuthehong eona eo ba ka thabela ho ba lapeng mantsiboeeng ao; ho e-na le hoo, ka mamello ba lokisa bana ba bona ’me ba ea sebokeng. Ka mor’a seboka, sehlopha sa Bakreste se bua ka puo ea moholo enoa. Morali’abo rōna e mong o ba tekong ea ho bolela hore mora eo oabo rōna o kile a mo utloisa bohloko; ho e-na le hoo, o bua ka cheseho ka ntlha e ’ngoe eo a ileng a e hlahisa. Na u bona ntlha e tšoanang ho pholletsa le liketsahalo tsee tse latellanang?

² Ntlha eo ke botšepehi. Moholo o ikitlaelletsa ho sebeletsa mohlape oa Molimo ka botšepehi; batsoali ba kopanela libokeng tsa phutheho ka botšepehi; morali’abo rōna o tšehetsa baholo ka botšepehi. (Baheberu 10:24, 25; 13:17; 1 Petrose 5:2) E, likarolong tsohle tsa bophelo, re bona batho ba Molimo ba ikemisetsa ho sebeletsa mokhatlo o hlophisitsoeng oa Jehova ka botšepehi.

 3. Ke hobane’ng ha e le habohlokoa hakaale hore re lule re tšepahala mokhatlong oa Jehova o hlophisitsoeng oa lefatšeng?

³ Ha Jehova a sheba lefatše lena le senyehileng, o bona botšepehi bo bonyenyane haholo. (Mikea 7:2, NW) E tlameha ebe pelo ea hae e thaba hakaakang ha a bona botšepehi ba batho ba hae! E, botšepehi ba hao boa mo nyakallisa. Leha ho le joalo, bo halefisa Satane, lerabele la pele, ’me bo paka hore o leshano. (Liproverbia 27:11; Johanne 8:44) Lula u lebeletse hore Satane o tla leka ho fokolisa botšepehi ba hao ho Jehova le ho mokhatlo oa Hae o hlophisitsoeng oa lefatšeng. A re hlahlobeng litsela tse ling tseo ka tsona Satane a etsang sena. Ka tsela eo re ka bona hamolemonyana kamoo re ka lulang re tšepahala ho fihlela qetellong.—2 Bakorinthe 2:11.

Ho Lebisa Tlhokomelo Mefokolong ho ka Senya Botšepehi

 4. (a) Ke hobane’ng ha ho le bonolo ho ba le pono e fosahetseng ka ba nang le matla a ho laela? (b) Ke joang Kora a ileng a ipaka a sa tšepahale mokhatlong o hlophisitsoeng oa Jehova?

⁴ Ha mor’abo rōna a le boemong ba boikarabelo, liphoso tsa hae li ka bonahala habonolo haholoanyane. Ho bonolo hakaakang ho bua hampe ka ‘lehlokoa le ka leihlong la mor’abo rōna, empa re sa nahane ka likapa tse ka mahlong a rōna’! (Matheu 7:1-5) Leha ho le joalo, ho lula u nahana ka liphoso ho ka tsoala ho se tšepahale. Ka mohlala, nahana ka phapang pakeng tsa Kora le Davida. Kora o ne a jere boikarabelo bo bongata, ’me mohlomong o ne a ile a tšepahala ka lilemo tse ngata, empa o ile a rata ho hlahella. O ile a halefisoa ke matla a ho laela a Moshe le Arone, barab’abo ka malapa. Le hoja Moshe e ne e le motho ea ikokobelitseng ka ho fetisisa, kamoo ho bonahalang kateng Kora o ile a qala ho mo talima ka mokhoa o nyatsa-nyatsang. E ka ’na eaba o ile a bona liphoso ho Moshe. Leha ho le joalo, liphoso tseo ha lia ka tsa lokafatsa ho se tšepahale ha Kora mokhatlong o hlophisitsoeng oa Jehova. O ile a timetsoa har’a phutheho.—Numere 12:3; 16:11, 31-33.

 5. Ke hobane’ng ha ho ka etsahala hore ebe Davida o ile a ikutloa a le tekong ea ho fetohela Saule?

⁵ Ka lehlakoreng le leng, Davida o ile a sebeletsa ka tlas’a taolo ea Morena Saule. Saule eo e kileng ea e-ba morena ea molemo, ha e le hantle o ne a se a le khopo. Ho ne ho hlokahala hore Davida a be le tumelo, mamello esita le masene hore a pholohe litlhaselo tsa Saule ea mōna. Empa, ha Davida a e-ba le monyetla oa ho iphetetsa, o ile a re ho ne ‘ho sa utloahale, ponong ea Jehova,’ hore a etse ketso e bontšang ho se tšepahale khahlanong le eo Jehova a neng a mo tlotsitse.—1 Samuele 26:11, NW.

 6. Esita leha re hlokomela mefokolo le liphoso ho baholo, ke’ng seo le ka mohla re sa lokelang ho se etsa?

⁶ Ha ba bang ba etellang pele har’a rōna ho bonahala ba etsa phoso kahlolong, ba bua mantsoe a sa thabiseng, kapa ba bonahala ba le leeme, na re tla belaela ka bona, mohlomong re tlatsetse moeeng oa ho tšoaea liphoso ka phuthehong? Na re tla khaotsa ho ea libokeng tsa Bokreste e le pontšo ea ho hanyetsa? Le hanyenyane ka sebele! Joaloka Davida, le ka mohla re ke ke ra lumella liphoso tsa e mong ho re susumelletsa ho se tšepahale ho Jehova le ho mokhatlo oa hae o hlophisitsoeng!—Pesaleme ea 119:165.

 7. Mekhoa e meng e mebe e ileng ea hlaha mabapi le tempele e neng e le Jerusalema ke efe, hona Jesu o ile a ikutloa joang ka see?

⁷ Mohlala o moholo ka ho fetisisa oa motho ea tšepahalang ke Jesu Kreste, ea hlalositsoeng ka tsela ea boprofeta e le oa Jehova “ea tšepahalang.” (Pesaleme ea 16:10, NW) Tšebeliso e mpe ea tempele e Jerusalema e tlameha ebe e ile ea etsa hore botšepehi e be phephetso. Jesu o ne a tseba hore mosebetsi oa moprista ea phahameng le mahlabelo li ne li tšoantšetsa tšebeletso ea hae le lefu la hae la sehlabelo, ’me o ne a tseba hore na ke habohlokoa hakae hore batho ba ithute linthong tsena. Ka hona o ne a tletse khalefo ea ho loka ha a ne a bona hore tempele e fetohile “lehaha la masholu.” Ka matla ao a a filoeng ke Molimo, o ile a nka bohato ba ho e hloekisa ka makhetlo a mabeli.a—Matheu 21:12, 13; Johanne 2:15-17.

 8. (a) Jesu o ile a bontša botšepehi joang tokisetsong ea tempele? (b) Re ka bontša joang hore re ananela ho rapela Jehova le mokhatlo oa hae o hlophisitsoeng o hloekileng?

⁸ Ho ntse ho le joalo, Jesu o ne a tšehetsa tokisetso ea tempele ka botšepehi. Ho tloha bongoaneng, o ne a e-ea meketeng tempeleng ’me o ne a atisa ho ruta moo. O ne a bile a lefa lekhetho la tempele—le hoja a ne a hlile a sa tlameha ho etsa joalo. (Matheu 17:24-27) Jesu o ile a babatsa mohlolohali oa mofutsana ka ho akhela “sohle seo a neng a e-na le sona” ka letlōleng la polokelo ea matlotlo. Kapele ka mor’a moo, Jehova o ile a lahla tempele eo ka ho sa feleng. Empa ho fihlela ka nako eo, Jesu o ile a tšepahala ho eona. (Mareka 12:41-44; Matheu 23:38) Mokhatlo o hlophisitsoeng oa Molimo oa lefatšeng kajeno o phahametse hōle tsamaiso ea Sejuda le tempele ea eona. Ke ’nete hore ha oa phethahala; ke ka lebaka leo liphetoho li etsoang ka linako tse ling. Empa ha oa tlala tšenyeho, leha e le hona hore Jehova Molimo o haufi le ho o nkela sebaka ka o mocha. Le ka mohla re se lumelle ho se phethahale leha e le hofe hoo re ho hlokomelang ka har’a oona hore ho re halefise kapa ho re susumelletse ho ba le moea oa ho tšoaea liphoso kapa oa ho belaela. Ho e-na le hoo, a re etsiseng botšepehi ba Jesu Kreste.—1 Petrose 2:21.

Mefokolo ea Rōna

 9, 10. (a) Tsamaiso ea Satane ea lintho e sebelisa mefokolo ea rōna hampe joang e le hore e ka re hohella boitšoarong bo bontšang ho se tšepahale? (b) Motho ea entseng sebe se tebileng o lokela ho etsa’ng?

⁹ Satane o boetse o leka ho ntšetsa pele ho se tšepahale ka ho sebelisa mefokolo ea rōna hampe. Tsamaiso ea hae ea lintho e nka monyetla ka mefokolo ea rōna, ho re hohela ho etsa se fosahetseng mahlong a Jehova. Ka masoabi, selemo se seng le se seng ba likete ba inehela boitšoarong bo bobe. Ba bang ba mpefatsa ho se tšepahale hona ka ho phela bophelo bo habeli, ba tsoela pele tseleng ea boitšoaro bo bobe ha ba ntse ba etsa eka e ntse e le Bakreste ba tšepahalang. Mosali e mong e mocha ha a arabela lihloohong tse mabapi le taba ena letotong la “Bacha Baa Botsa . . .” makasineng ea Tsoha!, o ile a ngola: “Lihlooho tsena e ne e le pale ea bophelo ba ka.” Ka lekunutung, o ne a hlaoletse setsoalle le bacha ba neng ba sa rate Jehova. Phello e bile efe? Oa ngola: “Bophelo ba ka bo ile ba senyeha, ’me ke ile ka ameha boitšoarong bo bobe ’me ka tlameha ho khalemeloa. Kamano ea ka le Jehova e ne e senyehile, ’me batsoali ba ka le baholo ba ne ba se ba sa ntšepe.”b

¹⁰ Mosali enoa e mocha o ile a fumana thuso ho baholo ’me a khutlela tšebeletsong e bontšang botšepehi ho Jehova. Leha ho le joalo, ho utloisa bohloko hore ebe ba bangata ba thulana le liphello tse mpe haholo, ’me ba bang le ka mohla ha ba khutlele ka phuthehong. Ho molemo hakaakang ho tšepahala le ho hanela moleko lefatšeng lee le khopo! Ela hloko litemoso tse tsoang limakasineng tsa Molula-Qhooa le Tsoha! mabapi le litaba tse kang botsoalle ba lefatše le boithabiso bo litšila. E se eka ho ke ke ha e-ba le mohla u tla oela boitšoarong bo bontšang ho se tšepahale. Empa haeba u oela, le ka mohla u se ke ua ikhakanya. (Pesaleme ea 26:4) Ho e-na le hoo, fumana thuso. Ke seo batsoali ba Bakreste le baholo ba leng teng ka lebaka la sona.—Jakobo 5:14.

11. Ke hobane’ng ha e ne e tla ba phoso ho italima re le ba babe hoo re hlokang tšepo, ’me ke mohlala ofe oa Bibele o ka re thusang ho lokisa pono ea rōna?

¹¹ Mefokolo ea rōna e ka ’na ea re ntša kotsi ka tsela e ’ngoe. Ba bang ba etsang ketso e itseng e bontšang ho se tšepahale ba khaotsa ho leka ho thabisa Jehova. Hopola, Davida o ile a etsa libe tse tebileng haholo. Empa, nako e telele ka mor’a lefu la hae, Jehova o ile a mo hopola e le mohlanka ea tšepahalang. (Baheberu 11:32; 12:1) Hobane’ng? Hobane le ka mohla ha aa ka a khaotsa ho leka ho thabisa Jehova. Liproverbia 24:16 e re: “Ea lokileng, leha a ka oa hasupa, o tla boela a tsohe.” Ka sebele, haeba re boela re oela libeng tse fokolang—e, khafetsa—ka lebaka la bofokoli bo itseng boo re loanang le bona, ho ka etsahala hore re ’ne re be ba lokileng mahlong a Jehova haeba re tsoela pele ho ‘tsoha’—ke hore, ka tieo re baka ’me re qalisa bocha tseleng ea tšebeletso e bontšang botšepehi.—Bapisa le 2 Bakorinthe 2:7.

Hlokomela Mefuta e Poteletseng ea ho se Tšepahale!

12. Tabeng ea Bafarisi, pono ea ho se feto-fetohe le maemo, ea ho khomarela molao, e ne e ka lebisa ho se tšepahaleng joang?

¹² Ho se tšepahale ho boetse ho tla ka litsela tse poteletseng haholoanyane. Ho ka ba ha ikhakanya ka sebōpeho sa botšepehi! Ka mohlala, Bafarisi ba mehleng ea Jesu mohlomong ba ne ba nahana hore ho totobetse hore baa tšepahala.c Empa ba ile ba hlōleha ho bona phapang pakeng tsa ho tšepahala le ho ba ea khomarelang melao e entsoeng ke batho a sa tenyetsehe, hobane ba ne ba sa feto-fetohe le maemo ’me ba tšoaea-tšoaea liphoso ka ho hloka kutloelo-bohloko. (Bapisa le Moeklesia 7:16.) Tabeng ena ba ne ba hlile ba sa tšepahale—ho batho bao e neng e lokela ebe ba ne ba ba sebeletsa, morerong oa Molao oo ba neng ba bolela hore baa o ruta, le ho Jehova ka boeena. Ho fapana le seo, Jesu o ne a tšepahala morerong oa Molao, o neng o thehiloe leratong. Kahoo o ne a haha le ho khothatsa batho, hantle feela joalokaha boprofeta bo mabapi le Mesia bo ne bo boletse esale pele.—Esaia 42:3; 50:4; 61:1, 2.

13. (a) Batsoali ba Bakreste ba ka ’na ba se tšepahale joang? (b) Ke hobane’ng ha batsoali ba lokela ho qoba ho ba bohale ka ho tlōlisang, ho tšoaea-tšoaea liphoso kapa ho ba le maikutlo a fosahetseng ha ba laea bana ba bona?

¹³ Bakreste ba nang le tekanyo e itseng ea matla a ho laela ba rua molemo haholo mohlaleng oa Jesu tabeng ena. Ka mohlala, batsoali ba tšepahalang baa tseba hore ba tlameha ho laea bana ba bona. (Liproverbia 13:24) Empa ba tiisa hore ha ba khentše bana ba bona ka taeo e sa thabiseng e etsoang ka bohale kapa ka ho ba rorothela. Bana ba ikutloang hore le ka mohla ba ke ke ba thabisa batsoali ba bona kapa ba ikutloang hore borapeli ba batsoali ba bona bo bonahala feela bo etsa hore batsoali ba bona e be ba nyatsang le ba tšoaeang liphoso ba ka ’na ba nyahama ’me, phelloea e-ba ho ikhula tumelong ea ’nete.—Bakolose 3:21.

14. Balisa ba Bakreste ba ka ’na ba ipaka ba tšepahala joang mohlapeng oo ba o sebeletsang?

¹⁴ Ka ho tšoanang, baholo ba Bakreste le balebeli ba tsamaeang ba lebisa tlhokomelo mathateng le likotsing tseo mohlape o talimaneng le tsona. E le balisa ba tšepahalang, ba fana ka keletso ha e hlokahala, ba qala ka ho tiisa hore ba na le boitsebiso bohle ’me ka hloko ba etsa hore motheo oa seo ba se buang e be Bibele le lingoliloeng tsa Mokhatlo. (Pesaleme ea 119:105; Liproverbia 18:13) Hape baa tseba hore linku li tšepetse ho bona bakeng sa ho ahuoa le ho feptjoa moeeng. Ka hona ba batla ho etsisa Jesu Kreste, Molisa ea Molemo. Ka botšepehi ba sebeletsa linku beke le beke libokeng tsa Bokreste—ba sa li nyahamise empa, ho e-na le hoo, ba li haha le ho matlafatsa tumelo ea tsona.—Matheu 20:28; Baefese 4:11, 12; Baheberu 13:20, 21.

15. Ba bang lekholong la pele la lilemo ba bontšitse joang hore ba ne ba behile botšepehi ba bona hosele?

¹⁵ Mofuta o mong o poteletseng oa ho se tšepahale ke botšepehi bo behiloeng hosele. Botšepehi ba ’nete ka kutloisiso ea Bibele ha bo re lumelle ho etelletsa botšepehi nthong leha e le efe ka pel’a botšepehi ba rōna ho Jehova Molimo. Bajuda ba bangata lekholong la pele la lilemo ba ne ba khomaretse Molao oa Moshe le tsamaiso ea lintho ea Sejuda ka tieo. Empa nako ea Jehova e ne e tlile ea ho tlosa tlhohonolofatso ea hae sechabeng seo sa marabele ho e isa sechabeng sa Iseraele oa moea. Ke ba seng bakae feela ha ho bapisoa ba neng ba tšepahala ho Jehova le ba ileng ba ikamahanya le phetoho ena ea bohlokoa. Esita le har’a Bakreste ba ’nete, balumeli ba bang ba Bajuda ba ile ba tsitlella ho boela morao “linthong tse fokolang le tse futsanehileng tsa motheo” tsa Molao oa Moshe, tse neng li phethahalitsoe ho Kreste.—Bagalata 4:9; 5:6-12; Bafilippi 3:2, 3.

16. Bahlanka ba Jehova ba tšepahalang ba arabela joang liphetohong?

¹⁶ Ho fapana le seo, batho ba Jehova mehleng ea kajeno ba ipakile ba tšepahala ho pholletsa le linako tsa phetoho. Ha leseli la ’nete e senotsoeng le tsoela pele ho khanya, liphetoho lia etsoa. (Liproverbia 4:18) Morao tjena, “lekhoba le tšepahalang le le masene” le re thusitse ho ntlafatsa kutloisiso ea rōna ea lentsoe “moloko” le sebelisitsoeng ho Matheu 24:34 le ea nako e behiloeng ea kahlolo ea “linku” le “lipōli” e boletsoeng ho Matheu 25:31-46, hammoho le pono ea rōna mabapi le mefuta e itseng ea tšebeletso ea ’muso. (Matheu 24:45) Ha ho pelaelo hore bakoenehi ba bang ba ka be ba ile ba thaba hoja Lipaki tsa Jehova tse ngata li ne li ile tsa khomarela ka tieo kutloisiso ea pele ea litaba tse joalo ’me tsa hana ho tsoela pele. Ha hoa etsahala letho le joalo. Hobane’ng? Batho ba Jehova baa tšepahala.

17. Ke joang baratuoa ba ka ’nang ba beha botšepehi ba rōna tekong ka linako tse ling?

¹⁷ Leha ho le joalo, taba ea botšepehi bo behiloeng hosele e ka ’na ea re ama ka ho toba. Ha motsoalle ea ratoang kapa esita le setho sa lelapa se khetha tsela e tlōlang melao-motheo ea Bibele, re ka ’na ra ikutloa hore botšepehi ba rōna boa aroha. Ka tlhaho, re ikutloa re tšepahala ho litho tsa lelapa. Empa le ka mohla ha rea lokela ho etelletsa botšepehi ba rōna ho tsona ka pel’a botšepehi ba rōna ho Jehova! (Bapisa le 1 Samuele 23:16-18.) Re ke ke ra thusa bafosi ho pata sebe se tebileng leha e le hona ho ba ka lehlakoreng la bona khahlanong le baholo ba lekang ho ‘ba khutlisetsa tseleng ka moea o bonolo.’ (Bagalata 6:1) Ho etsa joalo e ne e tla ba ho se tšepahale ho Jehova, ho mokhatlo oa hae o hlophisitsoeng le ho moratuoa. Etsoe, ho thibela moetsalibe ho fumana taeo eo a e hlokang, ha e le hantle ke ho thibela pontšo ea lerato la Jehova hore e atolosetsoe ho eena. (Baheberu 12:5-7) Hape hopola hore “maqeba a etsoang ke moratuoa aa tšepahala.” (Liproverbia 27:6, NW) Keletso e tobileng, e lerato e thehiloeng Lentsoeng la Molimo e ka ’na ea tlosa moratuoa ea entseng phoso seriti, empa e ka ’na ea ipaka e le e pholosang bophelo qetellong!

Botšepehi Boa Tiisetsa Mahlorisong

18, 19. (a) Akabe o ne a batla eng ho Nabothe, ’me ke hobane’ng ha Nabothe a ile a hana? (b) Na botšepehi ba Nabothe bo ne bo tšoaneloa ke seo a ileng a bo lefella ka sona? Hlalosa.

¹⁸ Ka linako tse ling Satane o hlasela botšepehi ba rōna ka ho toba. Nahana ka taba ea Nabothe. Ha Morena Akabe a ne a mo qobella ho rekisa tšimo ea hae ea morara, o ile a araba: “Ka Jehova, ha nka ke ka u nea lefa la bo-ntate.” (1 Marena 21:3) Nabothe o ne a se manganga; o ne a tšepahala. Molao oa Moshe o ne o laela hore ho se be Moiseraele ea rekisetsang lefa la setša ruri. (Levitike 25:23-28) Ka sebele Nabothe o ne a tseba hore morena enoa ea mabifi o ne a ka etsa hore a bolaoe, hobane Akabe o ne a se a ntse a lumeletse mosali oa hae Jezebele hore a bolaee baprofeta ba Jehova ba bangata! Empa Nabothe o ile a ema a tiile.—1 Marena 18:4.

¹⁹ Ka linako tse ling botšepehi bo qobella hore re bo lefelle. Jezebele, ka thuso ea “banna ba se nang molemo,” o ile a tsoakelletsa Nabothe ka bopaki ba bohata e le hore a ka fumanoa a le molato oa tlōlo ea molao eo a sa kang a e etsa. Ka lebaka leo, eena le bara ba hae ba ile ba ahloleloa lefu. (1 Marena 21:7-16, NW; 2 Marena 9:26) Na seo se bolela hore botšepehi ba Nabothe bo ne bo fosahetse? Che! Nabothe o har’a banna le basali ba bangata ba tšepahalang ba ‘phelang’ mohopolong oa Jehova hona joale, ba robetseng ka ho sireletsehileng ka lebitleng ho fihlela nakong ea tsoho.—Luka 20:38; Liketso 24:15.

20. Tšepo e ka re thusa joang hore re boloke botšepehi ba rōna?

²⁰ Tšepiso eona eo e fana ka kholiseho ho ba tšepahalang ba Jehova kajeno. Rea tseba hore botšepehi ba rōna bo ka ’na ba etsa hore re lahleheloe haholo lefatšeng lena. Jesu Kreste o ile a lefella botšepehi ba hae ka bophelo ba hae, ’me o ile a bolella balateli ba hae hore ba ne ba ke ke ba tšoaroa hamolemo ho mo feta. (Johanne 15:20) Joalokaha tšepo ea hae bakeng sa bokamoso e ile ea mo tšehetsa, le ea rōna e re tšehelitse. (Baheberu 12:2) Kahoo re ka lula re tšepahala ha re talimane le mefuta eohle ea mahloriso.

21. Jehova o tiisetsa ba tšepahalang ba hae lintho life?

²¹ Ka sebele, ba seng bakae ho rōna ba utloa bohloko ba litlhaselo tse tobileng botšepehing ba rōna. Empa ha e le hantle, batho ba Molimo ba ka ’na ba talimana le mahloriso a eketsehileng pele bofelo bo e-tla. Re ka tiiseha joang hore re boloka botšepehi ba rōna? Ka hore re boloke botšepehi ba rōna hona joale. Jehova o re file thōmo e khōlō—ho bolela le ho ruta ka ’Muso oa hae. E se eka ka botšepehi re ka tsoela pele mosebetsing ona oa bohlokoa. (1 Bakorinthe 15:58) Haeba re hanela ho se phethahale ha botho hore ho se ke ha senya botšepehi ba rōna mokhatlong o hlophisitsoeng oa Jehova le haeba re itebela khahlanong le mefuta e joalo e poteletseng ea ho se tšepahale e kang ho tšepahala ho behiloeng hosele, joale re tla ba ba itokisitseng hamolemo haeba botšepehi ba rōna bo ka lekoa ka matla haholoanyane. Leha ho le joalo, kamehla re ka kholiseha hore Jehova a ke ke a hlōleha ho tšepahala ho bahlanka ba hae ba tšepahalang. (2 Samuele 22:26) E, o tla lebela ba hae ba tšepahalang!—Pesaleme ea 97:10.

[Mongolo o botlaaseng ba leqephe]

U ne U Tla Araba Joang?

◻ Ke joang re ka qobang ho lumella mefokolo ea ba bang ho re etsa ba sa tšepahaleng?

◻ Mefokolo ea rōna e ka re lebisa boitšoarong bo bontšang ho se tšepahale ka litsela life?

◻ Ke joang re ka hanelang tšekamelo ea ho beha botšepehi ba rōna hosele?

◻ Ke’ng se tla re thusa ho boloka botšepehi ba rōna esita le linakong tsa mahloriso?

[Lebokose le leqepheng la 9]

Ho Sebeletsa Bethele ka Botšepehi

Moapostola Pauluse o ile a ngola: “Lintho tsohle a li etsahale ka mokhoa o hlomphehang le ka tlhophiso.” (1 Bakorinthe 14:40) Pauluse o ne a tseba hore e le hore phutheho e sebetse, ho ne ho tla hlokahala “tlhophiso.” Ka ho tšoanang kajeno, baholo ba tlameha ho etsa liqeto mabapi le lintho tse ka etsoang, tse kang ho abela litho tsa phutheho libakeng tse fapaneng tseo thuto ea buka e tšoareloang ho tsona, ho lokisetsa liboka tsa tšebeletso ea tšimo le ho hlahloba tšimo ho bona hore ea akaretsoa. Litokisetso tse joalo ka linako tse ling li ka ’na tsa hlahisa liteko tsa botšepehi. Hase litaelo tse bululetsoeng ke Molimo, ’me li ke ke tsa lumellana le khetho ea e mong le e mong.

Na ka linako tse ling u bona e le phephetso hore u tšepahale litokisetsong tse ling tse molemo tse etsoang ka phuthehong ea Bokreste? Haeba ho joalo, u ka ’na ua fumana hore mohlala oa Bethele o molemo. Lebitso Bethele, e leng lentsoe la Seheberu le bolelang “Ntlo ea Molimo,” le filoe makala ’ohle a 104 a Mokhatlo oa Watch Tower, ho akarelletsa le ntlo-khōlō e United States.d Baithaopi ba lulang mehahong ea Bethele le ba sebetsang teng ba batla hore libaka tsena li bonahatse tlhompho le tšabo ho Jehova. Sena se hloka botšepehi ka lehlakoreng la e mong le e mong.

Hangata baeti ba tlang Bethele ba bua ka tlhophiso le bohloeki tseo ba li bonang moo. Basebetsi ba hlophisehile ba bile ba thabile; puo le mekhoa ea bona esita le ponahalo li bontša matsoalo a Bokreste a koetlisitsoeng ka Bibele a bontšang ho hōla tsebong. Litho tsohle tsa lelapa la Bethele li khomarela litekanyetso tsa Lentsoe la Molimo ka botšepehi.

Ho ekelletsa moo, Sehlopha se Busang se li fa buka ea litaelo eo sehlooho sa eona se reng Dwelling Together in Unity, eo ka mosa e qaqisang litokisetso tse sebetsang tse hlokahalang bakeng sa lelapa le leholo joalo hore le sebetse hamolemo hammoho. (Pesaleme ea 133:1) Ka mohlala, e bua ka bolulo, lijo, bohloeki le boitlhopho le lintho tse kang tseo. Litho tsa lelapa la Bethele li tšehetsa le ho khomarela litokisetso tse joalo ka botšepehi, esita leha ka bomong li ne li ka khetha ho etsa lintho ka tsela e fapaneng. Li talima buka ena ea litaelo e le sehlopha sa lintlha tsa tataiso tse etselitsoeng ho khothalletsa bonngoe le kutloano, eseng qubu ea melao le litaelo tse bontšang ho hloka kutloelo-bohloko. Balebeli baa tšepahala ha ba tšehetsa litaelo tsena tse thehiloeng Bibeleng, ’me ba li sebelisa ka tsela e molemo bakeng sa ho haha le ho khothalletsa lelapa la Bethele ho hahamalla tšebeletso ea Bethele e halalelang.

[Mongolo o botlaaseng ba leqephe]

[Lebokose le leqepheng la 10]

Ea Tšepahalang le ea Khomarelang Molao

Morao koo ka 1916, Encyclopædia of Religion and Ethics e ile ea bontša hore “phapang ena e pakeng tsa ea tšepahalang le ea khomarelang molao e ka fumanoa ka linako tsohle le libakeng tsohle.” E ile ea hlalosa: “Ho na le ea khomarelang molao ea etsang seo a se bolelloang, eo ho seng molao oo a o tlōlang; o khomarela ka botšepehi lentsoe le ngotsoeng. Ho na le ea tšepahalang ea etsang sena empa a ka . . . tšepeloa se eketsehileng, o beha kelello ea hae eohle mosebetsing oa hae, o etsa hore boikutlo ba hae bohle bo lumellane le moelelo oa sebele oa morero o lokelang ho phethoa.” Hamorao, sengoliloeng sona sena se ile sa re: “Ho tšepahala ho feta hōle ho boloka molao. . . . Motho ea tšepahalang o khetholloa ho motho ea bolokang molao ka ho sebeletsa ka pelo eohle le kelello eohle . . . Ha a itumelle ho etsa sebe sa ho etsa ntho e itseng, sa ho hlōleha ho etsa ho itseng, kapa sa ho hloka tsebo.”