Na U sa Hopola?
Na u ile ua ananela ho bala litokollo tsa morao-rao tsa Molula-Qhooa? Bona hore na u ka tseba ho araba lipotso tse latelang:
◻ Ke motheo ofe oo balisa ba moea ba nang le ’ona oa ho nka khato ea ho ikopanya le ba bang ba khaotsoeng ho bona hore na ba ka susumelletsoa ho baka?
Esita le nakong ea ha Baiseraele ba ne ba le kholehong ’me ba e-s’o bake, Jehova, joaloka molisa, o ile a nka khato ea ho ba batla, a romela baprofeta ba hae ho bona. Balisa ba Bakreste ba thahasella ho thusa leha e le mang ea bakang ea ka tšoanang le nku e lahlehileng. (Bapisa le Luka 15:4-7.)—4/15, maqephe 21-3.
◻ Setšoantšo sa Jesu sa mora ea lehlasoa se bontša joang hore na maikutlo a rōna le liketso e lokela ho ba life ha motho ea itseng a khutlisetsoa ka har’a phutheho ea Bokreste? (Luka 15:22-32)
Pakane ea rōna e tlameha ho ba ho etsisa ntate, ea ileng a bontša ho thaba ho khutleng ha mora oa hae ea lehlasoa. Kahoo re lokela ho buisana le moena ea khutliselitsoeng ka bolokolohi ’me re mo khothalletse hore ho tloha joale ho ea pele a tsoele pele ’neteng.—4/15, leqephe 25.
◻ Motho a ka nka mehato efe e sebetsang ea ho itšireletsa ho qoba ho hlaseloa ke tlōlo ea molao?
Ka mehla ha ho khoneha, qoba ho ba ka ntle libakeng tse kotsi nakong ea bosiu. Pata mabenyane a hao, ’me u kenye lintho tse kang lik’hamera ka har’a mokotlana oa liphahlo. E-ba hlokolosi ka ho tsamaella lintšing tsa tsela e ka thōko ho ’mila, haholo-holo haeba u nkile briefcase kapa mokotlana. (Bona Liproverbia 3:21-23.)—5/1, maqephe 5-6.
◻ Ke hobane’ng ha boprofeta bo ho Sofonia 2:3 bo re: “Ekaba [“mohlomong,” BPN] le ka tšoha le patoa letsatsing la bohale ba Jehova”?
Ho pholohela bophelong ho itšetlehile ka botšepehi le mamello. (Mattheu 24:13) Kahoo, ke ba iphaphathang le litekanyetso tse lokileng tsa Molimo feela ’me ba tsoela pele ho bua puo e hloekileng ba tla patoa letsatsing la bohale ba Jehova. (Sofonia 2:1, 2)—5/1, leqephe 14.
◻ Ho etelletsa Molimo pele bophelong ba lelapa ho akarelletsa eng?
Batsoali le bana ba tlameha ho rapela Jehova ’me ba finyelle litekanyetso tsa hae joalokaha li behiloe ka Bibeleng.—5/15, leqephe 5.
◻ Ke hobane’ng ha Jehova a sa ka a otla baetsalibe hang-hang?
Lebaka le leng ke hore lebitso la Molimo le tlameha ho tsebahatsoa lefatšeng lohle. (Bapisa le Ba-Roma 9:17.) Le leng ke ho lumella nako ea hore ho rarolloe litseko tsa bobusi ba Molimo le botšepehi ba batho, tse ileng tsa hlahisoa ke bofetoheli Edene. Hape, mamello ea Molimo e fa batho ba etsang liphoso monyetla oa ho baka le ho lokisa litsela tsa bona. (2 Petrose 3:9)—5/15, maqephe 11-12.
◻ Ke lintlha life tse pakang hore Bibele e tsoa mohloling o nang le matla a phahametseng a batho?
Bibele e ile ea ngoloa ke lingoli tse ka bang 40 tse sa tšoaneng, tse neng li tsoa likarolong tsohle tsa bophelo ’me li phetse nakong e ka holimo ho lilemo tse 1 600; empa lingoli tsena kaofela li ile tsa latela sehlooho se le seng sa motheo. Ho lumellana hona ho ka har’a Bibele ho ne ho ke ke ha e-ba teng haeba ho ne ho tlohelletsoe hore ho etsahale ka mohlolo kapa ka tataiso ea motho.—6/1, leqephe 5.
◻ Ke khato efe e makatsang le mosebetsi o sa tloaelehang, tse boletsoeng esale pele ho Esaia 28:21, tseo Jehova a tlang ho li phetha mehleng ea rōna?
Temoso e ho Tšenolo 17:16 e bontša hore barati ba Babylona e Moholo ba lipolotiki ba tla e fetohela ka letsatsi le leng. Ka lebaka leo, Bokreste-’mōtoana bo tla felisoa ka ho felletseng hammoho le malumeli ’ohle a mang a bohata. Ena e tla ba khato ea Jehova e makatsang le mosebetsi oa hae o sa tloaelehang oa mehleng ea rōna.—6/1, leqephe 22-3.
◻ Ke eng seo basali ba Bakreste ba lokelang ho se hopola mabapi le ho sebelisoa ha mabenyane le makeup?
Bibele ha e hanele ho sebelisoa ha lithuso tse joalo tsa botle. (Exoda 32:2, 3; Esthere 2:7, 12, 15) Empa ho hlompheha ho lokela ho hlahella. Mosali a ka ’na a etsisa mekhoa ea lefatše habonolo, ka ho sebelisa lipstick, phofshoana e tlotsoang marameng, kapa eye shadow ho tlōlisa, joalokaha Jezebele a ne a etsa. (2 Marena 9:30) Ho lokela ho hlokomeloa hore litlolo li se tlotsoe haholo le mabenyane a sebelisitsoeng a se bonahale haholo.—6/1, maqephe 30-1.
◻ Baiseraele ba ile ba pholoha “maloetse ’ohle a mabe a Egepeta” a neng a atile mehleng ea pele joang? (Deuteronoma 7:15, NW)
Ho bonahala ba pholohile maloetse a joalo haholo-holo ka lebaka la ho boloka mekhoa ea boipaballo ba ’mele e tsoetseng pele e neng e laetsoe selekaneng sa Molao.—6/15, leqephe 4.
◻ Ke hobane’ng ha Molimo o laetse batho hore ba se ke ba ja mali? (Genese 9:3, 4; Levitike 17:10, 11; Liketso 15:22-29)
Bophelo ke mpho e tsoang ho Molimo ’me bophelo ba motho bo itšetlehile ka mokeli-keli o bolokang bophelo o bitsoang mali. (Pesaleme ea 36:9) Ka ho hlompha mali joaloka a khethehileng, batho ba bontša hore ba itšetlehile ka Molimo bakeng sa bophelo. Kahoo, lebaka le leholo la taelo ea Molimo mabapi le mali e ne e se hore ho ja mali ho ka etsa hore ba se ke ba phela hantle ’meleng, empa e ne e le hore mali ke ntho e khethehileng ho Molimo.—6/15, maqephe 8-9.
◻ Ke joang batsoali ba Bakreste le bacha ba ka tiisang monyetla oa hore ho hana tšelo ea mali ha bana ho tla hlomphuoa?
Le hoja ka molao mocha oa Mokreste e se motho e moholo, o lokela ho nolofalloa ho hlalosa ka ho hlaka le ka ho tiea hore na khanyetso ea hae e matla ea bolumeli ke efe mabapi le tšelo ea mali. Batsoali ba ka ba le mananeo a boikoetliso le bana ba bona e le hore bana bana ba ka rua tsebo ea ho hlalosa litumelo tsa bona.—6/15, leqephe 18.
◻ Ke joang basali ba ileng ba hlohonolofatsoa haholo nakong ea tšebeletso ea Jesu ea lefatšeng?
Jesu o ile a qala mosebetsi o tlisang matšeliso, tšepo, le boemo bo bocha bo hlomphehang bakeng sa basali ba merabe eohle. O ile a ruta basali linnete tse tebileng tsa moea. (Johanne 4:7, 24-26) Nakong ea tšebeletso ea hae, o ile a amohela ho sebeletsoa ke basali ha a ntse a tsamaea hohle ka har’a naha. (Mareka 15:40, 41)—7/1, maqephe 14-15.
◻ Ke mahlale afe a Jesu a ho ruta ao batsoali ba a fumaneng a sebetsa baneng ba bona?
Batsoali ba etsa hantle ho sebelisa litšoantšo ho etsa hore linnete tsa Bokreste li ipiletse lipelong tsa bana ba bona ba banyenyane, ’me ba ka sebelisa lipotso tse nahanisisitsoeng hantle ho lemoha hore na bana ba bona ba baholoanyane ba hlile ba nahana eng. (Bapisa le Mattheu 17:24-27.)—7/1, leqephe 26.
◻ Ke hobane’ng ha re lokela ho phehella mosa o lerato?
Tšoaneleho ea mosa o lerato e eketsa lerato la rōna ho Molimo le ho ba bang. E hōlisa moea oa rōna oa ho amohela baeti ’me e etsa hore re be ba nahanelang haholoanyane. E tiisa litlamo ka har’a lelapa le ka har’a phutheho ea Bokreste. Ka holim’a tsohle, mosa o lerato o tlotlisa Jehova.—7/15, leqephe 22.
◻ Ke hobane’ng ha ho ka ’na ha etsahala hore Mokreste a khelosoe tabeng ea botsoalle? (1 Ba-Korinthe 15:33)
Motho a ka bonahala a na le botsoalle ’me a khahleha empa haeba a sa kopanele kamehong ea Mokreste ka tšebeletso ea Jehova kapa esita le ho lumela Bibeleng, ke motsoalle e mobe. Hobane’ng? Hobane bophelo ba hae bo thehiloe melao-motheong e fapaneng, ’me lintho tse leng bohlokoa ho Mokreste li ka ’na tsa se be le bohlokoa ba letho ho eena.—7/15, leqephe 23.
◻ Ke hobane’ng ha Letsatsi la Kahlolo e le nako ea tšepo?
Letsatsi la Kahlolo ke nako ea lilemo tse sekete. Le tla etelloa pele ke Molimo ka booona le Mora oa oona, Kreste Jesu, ea khethiloeng ke Molimo ho sebetsa joaloka Moahloli. Ena e tla ba nako ea ho khutlisetsa bophelo bo phethahetseng ba botho ho moloko oa batho boo Adama a ileng a bo lahla bakeng sa litloholo tsa hae. (1 Ba-Korinthe 15:21, 22)—8/1, maqephe 5-7.