“Letsatsi la Morena”

“KA PULULELO ke ile ka ba letsatsing la Morena.” (Tšenolo 1:10, NW) Ho boletse moapostola ea hōlileng Johanne, ea tšoantšitsoeng ka holimo, khaolong ea pele ea buka ea Bibele ea Tšenolo. Mantsoe a hae a re thusa ho fumana nako ea phethahatso ea lipono tse hlollang tseo a tsoelang pele ho li hlalosa.

Leha ho le joalo, hase bohle ba lumellanang le ho fetoleloa hona ha Tšenolo 1:10. (NW) Ka mohlala, mofetoleli oa Bibele Jörg Zink o e fetolela tjena: “Ke ile ka tlala moea o halalelang—e ne e le ka Sontaha.” Leha ho le joalo, liphetolelo tse ngata tsa Bibele li fetolela poleloana ea Segerike teiʹ ky·ri·a·keiʹ he·meʹrai e le “letsatsi la Morena.” Empa mongolong o botlaaseng ba leqephe liphetolelo tse ngata li bolela hore poleloana eo e bolela Sontaha. Na see se nepahetse?

Buka ea litšupiso ea K’hatholike, Herders Bibelkommentar ea Sejeremane, e hlalosa mabaka a susumetsang khopolo ena ha e re: “Mona [ho Tšenolo 1:10] ha ho buuoe ka Letsatsi la Kahlolo ea ho Qetela, leo ka ho tšoanang le tsejoang e le ‘Letsatsi la Morena’, empa ho buuoa ka letsatsi le tobileng la beke. Bakreste ba pele ba ile ba qala ho keteka letsatsi le qalang beke e le letsatsi la litšebeletso tsa bona tsa bohlokoa tsa kereke ho tloha khale bohareng ba lekholo la pele la lilemo. (Liketso 20:7; 1 Ba-Kor. 16:2)” Leha ho le joalo, ha ho moo mangolo a mabeli a qotsitsoeng ke buka eo ea litšupiso a pakang hore Bakreste ba lekholong la pele la lilemo ba ne ba nka letsatsi le qalang beke e le “letsatsi la litšebeletso tsa bona tsa bohlokoa tsa kereke.”

Temana ea pele, Liketso 20:7, e tlaleha feela hore Pauluse, metsoalle ea hae eo a neng a tsamaea le eona, le Bakreste ba tsoang Troase ba ile ba bokana hammoho lijong ka letsatsi le qalang beke. Kaha Pauluse o ne a tla tsamaea letsatsing le hlahlamang ’me o ne a ke ke a ba bona ka nako e teletsana, o ile a nka monyetla ka ketsahalo eo hore a bue le bona halelele.

Temana ea bobeli, 1 Ba-Korinthe 16:2, e ne e khothalletsa Bakreste ba Korinthe hore ba behelle chelete ka thōko “ka tsatsi le qalang veke” e le hore ba ka ba le seo ba ka nehelanang ka sona ho ba hlokang ba Judea. Setsebi Adolf Deissmann o hlahisa hore e ka ’na eaba letsatsi lena e ne e le leo ba lefshoang ka lona. Keletso ea Pauluse e ne e le e sebetsang, kaha chelete e ne e ka fela har’a beke.

Ha ho kae kapa kae ka Bibeleng moo ho boleloang hore Bakreste ba mehleng ea baapostola ba ne ba nka letsatsi le qalang beke, leo hona joale le bitsoang Sontaha, e le letsatsi le tšoanang le sabbatha ea Bakreste, letsatsi leo ka ho khetheha le behelletsoeng ka thōko bakeng sa hore ba kopane ka mehla bakeng sa borapeli. E bile feela ka mor’a lefu la baapostola moo Sontaha se ileng sa nkoa ka tsela ena ’me sa bitsoa “letsatsi la Morena.” Ena e ne e le karolo ea bokoenehi bo boletsoeng esale pele ke Jesu le baapostola ka bobona.—Mattheu 13:36-43; Liketso 20:29, 30; 1 Johanne 2:18.

Joale, “letsatsi la Morena” ke eng? Taba e potolohileng Tšenolo 1:10 e supa Jesu e le Morena eo letsatsi leo e leng la hae. Lentsoe la Molimo le tsebahatsa lipolelo tse kang “letsatsing la Morena oa rōna Jesu Kreste” e le nako ea kahlolo ea moloko oa batho le ho tsosolosoa ha Paradeise.—1 Ba-Korinthe 1:8; 15:24-26; Ba-Filippi 1:6, 10; 2:16.

Kahoo, Hans Bruns, phetolelong ea hae e nang le tlhaloso, Das Neue Testament (Testamente e Ncha), o nepile ha a re: “Ba bang ba bolela hore mona o [Johanne] bua ka Sontaha, empa ho ka etsahala hore o bua ka Letsatsi la Morena le khanyang, leo tlhaloso eohle ea hae e latelang e leng ea lona.” W. E. Vine o re: “‘Letsatsi la Morena’ . . . ke Letsatsi la kahlolo ea Hae e bonahatsoang holim’a lefatše.” Lexikon zur Bibel (Buka e hlalosang mantsoe ea Bibele) ea Fritz Rienecker e bolela hore ka ho hlakileng “letsatsi la Morena” le bolela “letsatsi la kahlolo.”

Kutloisiso e nepahetseng ea polelo “letsatsi la Morena” e re thusa ho utloisisa buka eohle ea Tšenolo. Ho feta moo, bopaki ke hore letsatsi leo le se le qalile. Joale, ho bohlokoa hakaakang hore re ‘utloe mantsoe a boprofeta ba Tšenolo ’me re boloke lintho tse ngotsoeng ho eona’!—Tšenolo 1:3, 19.

[Setšoantšo se leqepheng la 27]

Tlhaloso e hlakileng le e nakong ea temana ka ’ngoe ea buka ea Tšenolo e fanoe bukeng ea “Tšenolo—Tlhōrō ea Eona e Hlollang ka Botle e Haufi!” Thuso ena e hlollang ea ho ithuta Bibele e fumaneha ka lipuo tse 33