Ke Eng e ka re Thusang ho Ema re Tiile Tumelong?
1 Ho tloha ha re qala ho kopanela le mokhatlo o hlophisitsoeng oa Jehova, tsoelo-pele ea rōna ea moea e ’nile ea ipaka ho ba mohloli oa thabo ho rōna! Leha ho le joalo, e le hore re lule re ‘metse ka metso, re hahuoe le ho tsitsisoa tumelong,’ ho hlokahala khōlo e tsoelang pele ea moea. (Bakol. 2:6, 7) Le hoja ba bangata ba atlehile moeeng, ba bang ba hoholehile ka lebaka la ho hlōleha ‘ho ema ba tiile tumelong.’ (1 Bakor. 16:13) Re ka thibela sena hore se se ke sa re etsahalla. Joang?
2 Tšebeletso e sa Khaotseng ea Moea: E-ba le kemiso e ntle ea moea ka har’a mokhatlo o hlophisitsoeng oa Jehova. Mona litlhoko tsa rōna tsa moea li hlokomeloa hantle haholo. Liboka tsa phutheho, likopano tse nyenyane le tse khōlō li re susumelletsa ho hōla haholoanyane moeeng le ho ba ba tsitsitseng, hafeela re e-ba teng ho tsona kamehla ho ea rua molemo. (Baheb. 10:24, 25) Kemiso ea kamehla ea ho bala Bibele, limakasine tsa Molula-Qhooa le Tsoha! le libuka tse tšohlang lijo tse tiileng tsa Lentsoe la Molimo e tla etsa hore metso ea rōna ea moea e tebe haholo hape e be matla. (Baheb. 5:14) Ho ipehela lipakane tsa moea le ho ikitlaelletsa ho li finyella le hona ho tla tlisa melemo e sa feleng.—Bafil. 3:16.
3 Ho Thusoa ke ba Hōlileng: Leka ho atoloha hore u tloaelane le ba hōlileng moeeng ka phuthehong. Tseba baholo, kaha ke bona ba ka sehloohong ba ka re matlafatsang. (1 Bathes. 2:11, 12) Amohela keletso leha e le efe kapa litlhahiso tseo ba ka ’nang ba fana ka tsona. (Baef. 4:11-16) Bahlanka ba sebeletsang le bona ba thahasella ho thusa ba bang hore ba lule ba tiile tumelong, kahoo talima ho bara bana babo rōna bakeng sa khothatso.
4 Na u hloka thuso tšebeletsong? Bua le baholo, ’me u kōpe thuso. Mohlomong u ka kopanyelletsoa lenaneong la Bo-pula-maliboho ba Thusa ba Bang. Na u sa tsoa kolobetsoa? Ho ithuta buka ea Tšebeletso ea Rōna le ho sebelisa seo e se fupereng ho tla susumetsa tsoelo-pele e lebisang khōlong ea moea. Na u motsoali? Tsoela pele u matlafatsa bomoea ba bana ba hao.—Baef. 6:4.
5 Ka ho mela ka metso le ho tsitsisoa tumelong, re thabela kamano e haufi-ufi le Jehova le kamano e mofuthu le barab’abo rōna. Sena se re nolofalletsa ho ema re tiile khahlanong le litlhaselo tsa Satane, ’me se matlafatsa tšepo ea rōna ea bokamoso bo sa feleng.—1 Pet. 5:9, 10.