Sebetsa le Jehova Letsatsi le Letsatsi

 1. Re sebetsa le Jehova ka litsela life?

JEHOVA o ne a batla hore batho ba phethahetseng ba sebetse ’moho le eena ho phethahatsa merero ea hae. Le hoja re sa phethahala, re ntse re ka atleha ho sebetsa ’moho le Jehova haeba feela re tšepahala. Mohlala, re ba “basebetsi-’moho le Molimo” ha re bua le batho ka Bibele le ho ba etsa barutuoa. (1 Bakor. 3:5-9) Nahana hore na ho thabisa hakaakang ho sebetsa ’moho le ’Mopi oa lefatše le leholimo mosebetsing oo a o nkang o le bohlokoa. Empa ho bua le batho ka Bibele le ho ba etsa barutuoa ha se tsona feela litsela tsa ho sebetsa ’moho le Jehova. Sehloohong sena re tla bua ka litsela tse ling tseo ka tsona re ka sebetsang ’moho le Jehova. Re ka sebetsa le Jehova ka ho thusa ba malapa a rona le Bakreste-’moho le rona, ka ho amohela baeti le ho eketsa nako eo re e qetang re mo sebeletsa.—Bakol. 3:23.

 2. Ke hobane’ng ha e se bohlale ho bapisa mosebetsi oa rona le oa batho ba bang?

² Ha re ntse re hlahloba sehlooho sena, leka hore u se ke oa ipapisa le batho ba bang. Maemo a rona ha a tšoane ebile ha re lekane ka lilemo. Kahoo, re se ke ra lebella hore re ka sebeletsa Jehova ka mokhoa o tšoanang le batho ba bang. Moapostola Pauluse o ile a re: “E mong le e mong a ke a leke seo mosebetsi oa hae o leng sona, joale o tla ba le sesosa sa thabo e khaphatsehang mabapi le eena a le mong, eseng ka ho ipapisa le motho e mong.”—Bagal. 6:4.

 3. Ha motho a hlokomela lelapa la hae o bontša joang hore o sebetsa ’moho le Jehova?

³ Jehova o lebeletse hore bahlanka ba hae ba hlokomele ba malapa a bona. Mohlala, haeba u ’mè ea nang le ngoana e monyenyane kapa u hlokomela batsoali ba hao ba kulang, u ka lokela ho sebetsa e le hore u tle u ba thuse ka lintho tseo ba li hlokang. Lentsoe la Molimo le re: “Haeba leha e le mang a sa lokisetse hore ho be le lintho tse hlokahalang bakeng sa bao e leng ba hae, ’me haholo-holo bakeng sa litho tsa lelapa la hae, o latotse tumelo ’me o mobe ho feta motho ea se nang tumelo.” (1 Tim. 5:8) Haeba u e-na le boikarabelo bo joalo, e ka ’na eaba ha u be le nako e lekaneng ea ho etsa lintho tse tla u thusa ho matlafatsa setsoalle sa hao le Jehova. Empa ha oa lokela ho nyahama. Jehova oa thaba ha u hlokomela lelapa la hao.—1 Bakor. 10:31.

 4. Batsoali ba ka bontša joang hore ba sebetsa ’moho le Jehova, hona melemo e ka ba efe?

⁴ Batsoali ba sebetsa ’moho le Jehova ha ba thusa bana ba bona hore ba be le sepheo sa ho mo sebeletsa. Batsoali ba ileng ba etsa joalo baa thaba ha ba bona bana ba bona ba itella ho sebeletsa Jehova. Ba bang e ba baromuoa, bo-pula-maliboho ba sebetsang moo ho hlokehang bahoeletsi ha ba bang ba ea Bethele. Kaha ba hole le hae, hangata ha ba be ’moho le ba malapa a habo bona. Leha ho le joalo, batsoali ba ratang Jehova ba khothalletsa bana ba bona hore ba ’ne ba tsoele pele. Hobane’ng? Baa thaba ebile baa khotsofala kaha bana ba bona ba khethile hore ho sebeletsa Jehova e be eona ntho e tlang pele bophelong ba bona. (3 Joh. 4) Mohlomong batsoali ba bangata ba ikutloa joaloka Anna ea ileng a re o “alimane” ka mora oa hae ho Jehova. Ba nka e le tlotla e kholo ho sebetsa le Jehova ka tsela ena. Ba khotsofalletse hore ebe bana ba bona ba sebeletsa Jehova ka tsela eo.—1 Sam. 1:28.

 5. Ke lintho life tseo u ka li etsang ho thusa Bakreste-’moho le uena? (Sheba setšoantšo se qalong.)

⁵ Haeba ha u na boikarabelo ba ho hlokomela lelapa, mohlomong u ka ithaopela ho thusa Bakreste-’moho le uena ba kulang, ba holileng kapa ba hlokang thuso leha e le efe. U ka boela oa sheba batho ba hlokang thuso phuthehong ea heno. Haeba ho e-na le morali’abo rona ea hlokomelang motsoali oa hae ea holileng, mohlomong u ka ithaopela ho mo thusa. Kapa mohlomong u ka ithaopela ho thusa batho ba bang ka ho ba isa libokeng, oa ba ela shopong, oa ba isa sepetlele ha ba il’o bona motho ea kulang kapa ho ba phethela mabaka a mang. Ha u etsa joalo, mohlomong ke tsela eo Jehova a tla beng a araba thapelo ea motho e mong ka eona.—Bala 1 Bakorinthe 10:24.

 6. Ho amohela baeti ho bolela’ng?

⁶ Batho ba sebetsang ’moho le Jehova ba tsebahala ka ho amohela baeti. Mangolong a Segerike lentsoe “ho amohela baeti” le bolela ho ba mosa ho batho bao re sa ba tsebeng. (Baheb. 13:2) Ka Bibeleng ho na le litemana tse re rutang hore re amohele baeti. (Gen. 18:1-5) Re lokela ho batla litsela tsa ho thusa batho ba bang ka linako tsohle esita le bao e seng Bakreste-’moho le rona.—Bagal. 6:10.

 7. Ke hobane’ng ha ho le bohlokoa hore u amohele batho ba tšebeletsong ea nako e tletseng?

⁷ U ka boela oa sebetsa le Molimo ka hore u amohele batho ba tšebeletsong ea nako e tletseng. (Bala 3 Johanne 5, 8.) Ha u etsa joalo, uena le bona le ka “khothatsana.” (Bar. 1:11, 12) Nahana ka Olaf. O hopola hore ha a sa le monyenyane, phuthehong ea habo ho ne ho se motho ea amohelang molebeli oa potoloho oa lesoha. Olaf o ile a kopa batsoali ba hae bao e seng Lipaki hore ba amohele mopotolohi eo. Ba ile ba lumela empa ba re Olaf eena o tla robala sofeng hobane ha ho na bethe e ’ngoe. O ile a etsa joalo ’me ha aa a ka a ikoahlaea. O re: “Re ile ra ba le beke e monate haholo. ’Na le eena re ne re khothatsana ha re ntse re ja lijo tsa hoseng. Kaha o ile a nkhothatsa haholo, taba eo e ile ea ntšusumelletsa hore ke kenele tšebeletso ea nako e tletseng.” Olaf o se a e-na le lilemo tse 40 e le moromuoa linaheng tse fapaneng.

 8. Ho ba mosa ho batho ho na le melemo efe?

⁸ Ho na le litsela tsa ho bontša batho bao re sa ba tsebeng hore rea ba rata le ha qalong ba sa ananele. Mohlala o mong o motle oa ho fana ke ona, morali’abo rona e mong ea lulang Spain o ne a ithuta Bibele le ’mè Yesica ea tlohang naheng ea Ecuador. Ka letsatsi le leng o ile a hlokomela hore ’mè Yesica o ntse a lla. Morali’abo rona o ile a mo botsa hore na molato ke’ng. ’Mè Yesica o ile a re pele a fallela Spain o ne a futsanehile hoo ka letsatsi le leng a neng a se na lijo. Ntho eo a neng a ka e fa morali oa hae e ne e le metsi feela. O ile a leka ho koeetsa morali oa hae a bile a ntse a rapela. Hamorao baralib’abo rona ba babeli ba ile ba mo etela empa ha aa ka a ba mosa ho bona. O ile a ba a tabola sengoliloeng seo ba ileng ba mo fa sona. O ile a re: “Ke eona ntho eo nka e jesang ngoan’aka ee?” Baralib’abo rona ba ile ba leka ho mo tšelisa empa ’mè Yesica ha aa ka a ba mamela. Hamorao ba ile ba mo tlisetsa lijo ka basekete ’me ba li siea monyako. Tsela eo baralib’abo rona ba neng ba le mosa ka eona e ile ea etsa hore ’mè Yesica a ikutloe a soabile haholo ha a nahana hore mohlomong e ne e le tsela eo Molimo a arabang thapelo ea hae ka eona. Empa hona joale o ikemiselitse ho sebeletsa Jehova.—Moek. 11:1, 6.

9, 10. (a) Ke maemong afe moo Baiseraele ba neng ba lokela ho ithaopa? (b) Ke mesebetsi efe eo barab’abo rona ba e etsang?

⁹ Maemong a mang, Baiseraele ba ne ba lokela ho ithaopa ha ho ne ho hlokeha hore ba thuse. (Ex. 36:2; 1 Likron. 29:5; Neh. 11:2) Mehleng ena u ka ithaopela ho tela nako ea hao, lintho tseo u nang le tsona hammoho le litsebo tsa hao bakeng sa ho thusa bara le barali babo rona. Ha u etsa joalo, u tla thaba haholo ebile Jehova o tla u hlohonolofatsa.

¹⁰ Bibele e khothalletsa barab’abo rona hore ba sebetse ’moho le Jehova ka hore e be baholo le bahlanka ba sebeletsang. (1 Tim. 3:1, 8, 9; 1 Pet. 5:2, 3) Bohle ba etsang joalo ba bontša hore ba batla ho thusa Bakreste-’moho le bona ka litlhoko tsa bona le hore ba be le kamano e ntle le Jehova. (Lik. 6:1-4) Mohlomong baholo ba ka u kopa hore u be mohlokomeli, u sebetse lefapheng la lingoliloeng, u abe masimo kapa u hlokomele Holo ea ’Muso. Batho bohle ba etsang mesebetsi ena ba thabile haholo.

11. Morali e mong oa bo rona o ile a fumana molemo ofe ka ho ithaopela ho thusa mokhatlo oa Jehova?

¹¹ Batho bohle ba ithaopelang ho thusa mokhatlo oa Jehova ba ba le metsoalle. Mohlala, Morali’abo rona Margie o na le lilemo tse 18 a etsa mosebetsi oa ho haha Liholo Tsa ’Muso. Ka lilemo tse ’maloa o ’nile a ruta baralib’abo rona ba ntseng ba le bacha ho etsa mosebetsi. O hlokometse hore ha a etsa joalo, o khothatsana le Bakreste-’moho le eena hore ba tsoele pele ho sebeletsa Jehova. (Bar. 1:12) Metsoalle eo Margie a bileng le eona ha a ntse a haha Liholo Tsa ’Muso, e mo khothatsa haholo ha ho nyolosetsa. Na u kile oa ithaopela ho haha Liholo Tsa ’Muso? Ho sa tsotellehe hore na u tseba mosebetsi kapa che, u ka ithaopela ho o etsa.

12. U ka etsa’ng hore u thuse nakong ea likoluoa?

¹² Ha ho hlaha likoluoa, re na le menyetla ea ho thusa batho ba bang ka litsela tse ngata. Mohlala, re ka fana ka chelete ho thusa batho ba anngoeng ke likoluoa. (Joh. 13:34, 35; Lik. 11:27-30) Re ka boela ra thusa ka hore re hloekise le ho lokisa matlo le thepa e senyehileng. Morali’abo rona Gabriela oa Poland eo ntlo ea hae e ileng ea senngoa ke likhohola, o ile a thaba haholo ha a bona bara le barali babo rona ba phuthehong e haufi le moo a lulang ba etsa tsoho la monna. O re: “Ha ke batle ho bua ka lintho tse ntahlehetseng kaha ha li bohlokoa hakaalo. Ho e-na le hoo, ke batla ho bua ka lintho tseo ke li fumaneng. Ntho ena e nketsahaletseng e nthutile hore ha ho ntho e thabisang joaloka ho ba ka har’a lelapa la Jehova.” Batho ba bangata ba ileng ba thusoa ka mor’a hore ho hlahe likoluoa ba re ba ikutloa ba khotsofetse haholo. Hape, bohle ba sebetsang ’moho le Jehova ho thusa nakong ea likoluoa, le bona ba thabile ebile ba khotsofetse.—Bala Liketso 20:35; 2 Bakorinthe 9:6, 7.

13. Fana ka mohlala o bontšang hore ho ithaopela ho thusa batho ba bang ho ka matlafatsa kamano ea rona le Jehova.

¹³ Morali’abo rona Stephanie le bahoeletsi ba bang ba thabela ho sebetsa ’moho le Jehova ka ho thusa Lipaki tse balehetseng Amerika ho fumana matlo le thepa. Morali’abo rona Stephanie o re: “Re susumetsoa ke tsela eo ba thabang ka eona le eo ba ananelang ho ba karolo ea mokhatlo oohle oa barab’abo rona. Le hoja ba malapa ao re a thusitseng ba re leboha, ha e le hantle ke bona ba re thusitseng. Kaha bara le barali babo rona ba na le tumelo, ba momahane, baa ratana ebile ba tšepa Jehova, re ikutloa re rata Jehova le ho feta ’me re ananela ho ba ka hare ho mokhatlo oa hae.”

14, 15. (a) Moprofeta Esaia o ne a ikutloa joang ka ho sebeletsa Jehova? (b) Re ka etsisa Esaia joang?

¹⁴ Na u ka rata ho sebetsa le Jehova haholoanyane? Mohlomong u ka ithaopela ho sebetsa moo ho hlokehang bahoeletsi. Ha se hore re lokela ho fallela hole le hae e le hore re sebeletse Jehova empa ho na le bao maemo a bona a ba lumellang hore ba falle. Ba ikutloa joaloka moprofeta Esaia. Ha Jehova a re: “Ke tla roma mang, ’me ke mang ea tla ea bakeng sa rōna?” Esaia o ile a mo araba a re: “Ke ’na enoa! Roma ’na.” (Esa. 6:8) Le rona re lokela ho ikemisetsa ho etsisa Esaia ka hore re thuse mokhatlo oa Jehova. U ka kenya letsoho joang?

¹⁵ Ha Jesu a bua ka mosebetsi oa ho bua le batho ka Bibele le ho ba etsa barutuoa o ile a re: “Kotulo e khōlō, empa basebetsi ha ba bakae. Ka hona, le kōpe Mong’a kotulo hore a romele basebetsi kotulong ea hae.” (Mat. 9:37, 38) Mohlomong u ka ba pula-maliboho e le hore u sebetse moo ho hlokehang bahoeletsi. Kapa u ka thusa motho e mong ho etsa joalo. Bara le barali babo rona ba bangata ba re tsela ea ho bontša hore re rata Jehova le moahelani ke hore re sebetse re le bo-pula-maliboho moo ho hlokehang bahoeletsi. Na ho na le litsela tse ling tseo ka tsona re ka eketsang nako eo re e qetang re sebeletsa Jehova? Re tla thaba haeba re etsa joalo.

16, 17. Ke lintho life tseo u ka li etsang e le hore u sebetse le mokhatlo oa Jehova?

¹⁶ Mohlomong ka nakoana kapa ka matsatsi a itseng bekeng, u ka ithaopela ho sebeletsa Bethele kapa oa thusa ka ho etsa mosebetsi oa ho haha le ho lokisa mehaho ea mokhatlo. Re lokela ho etsa mosebetsi o mong le o mong oo Jehova a re fang oona kaha nako le nako ho lula ho hlokeha batho ba ka thusang. Taba ena e bolela hore re lokela ho etsa mosebetsi ofe kapa ofe oo re o fuoang esita le haeba re e-na le boiphihlelo le litsebo mosebetsing o fapaneng. Jehova oa thaba ha re itella eena ka hore re thuse moo ho hlokehang basebetsi ba eketsehileng.—Pes. 110:3.

¹⁷ Na u ka thabela ho rupeloa haholoanyane e le hore u sebeletse Jehova ka hohle kamoo u ka khonang? Haeba ho joalo, mohlomong u ka thabela ho ea Sekolong sa Baevangeli ba ’Muso. Sekolong seo bara le barali babo rona ba tšebeletsong ea nako e tletseng ba rupelloa ho thusa hohle moo mokhatlo o ba hlokang teng. Batho bohle ba tlatsang liforomo tsa ho ea sekolong seo, ba lokela ho ikemisetsa ho ea hohle moo ba isoang teng. Na u ikemiselitse ho sebeletsa Jehova ka tsela eo?—1 Bakor. 9:23.

18. Melemo ea ho sebetsa le Jehova letsatsi le letsatsi ke efe?

¹⁸ Kaha re bahlanka ba Jehova re susumelletseha ho fana, ho rata batho le ho ba mosa ho bona. Re lokela ho bontša hore rea ba tsotella letsatsi le letsatsi. Ha re etsa joalo, re tla thaba ebile re tla ba le khotso. (Bagal. 5:22, 23) Ho sa tsotellehe maemo a hao, u ka thaba ha u etsisa Jehova ka hore u fane le ka hore u sebetse ’moho le eena.—Liprov. 3:9, 10.