Na U Tla Bonahatsa Khanya ea Molimo?
“Re bonahatsa khanya ea Jehova joaloka liipone.”—2 BAKORINTHE 3:18.
1. Moshe o ile a bona’ng, hona ho ile ha etsahala’ng ka mor’a moo?
ENE e le e ’ngoe ea lipono tse hlollang ka ho fetisisa tseo motho leha e le ofe a neng a kile a li bona. Moshe o ne a le mong to! holimo Thabeng ea Sinai ha kōpo ea hae e sa tloaelehang e arabeloa. O ile a lumelloa ho bona ntho eo ho neng ho se motho ea kileng a e bona—e leng khanya ea Jehova. Ho hlakile hore Moshe ha aa ka a bona Jehova ka ho toba. Ponahalo ea Molimo e khanya haholo hoo ho seng motho ea ka mo bonang ’me leha ho le joalo a phela. Ho e-na le hoo, Jehova o ile a sireletsa Moshe ka “seatla” sa hae ho fihlela A fetile. ’Me ho hlakile hore o ne a sebelisa lengeloi leo e neng e le moemeli oa hae. Joale Jehova o ile a lumella Moshe ho bona mesaletsa ea ponahatso ena ea khanya ea Molimo. Jehova o ile a boela a bua le Moshe ka lengeloi. Bibele e hlalosa se ileng sa etsahala ka mor’a moo tjena: “Joale eitse ha Moshe a theoha Thabeng ea Sinai . . . letlalo la sefahleho sa hae [la] ntša mahlaseli ka lebaka la hore o ne a buile le [Jehova].”—Exoda 33:18–34:7, 29.
2. Moapostola Pauluse o ile a ngola eng mabapi le khanya eo Bakreste ba e bonahatsang?
2 Ak’u ipone u e-na le Moshe thabeng eo. E ne e tla ba ho thabisang hakaakang ho bona khanya e hlollang ea Ea Matla ’Ohle le ho mamela seo a se buang! E ne e tla ba tlotla e kaakang ho theoha Thabeng ea Sinai u e-na le Moshe, mokena-lipakeng oa selekane sa Molao! Leha ho le joalo, na u ne u tseba hore ka litsela tse itseng Bakreste ba ’nete ba bonahatsa khanya ea Molimo ho feta kamoo Moshe a ileng a e bonahatsa kateng? ’Nete ena e susumetsang motho ho nahana ka ho teba e fumanoa lengolong le ngotsoeng ke moapostola Pauluse. O ile a ngola hore Bakreste ba tlotsitsoeng ba “bonahatsa khanya ea Jehova joaloka liipone.” (2 Bakorinthe 3:7, 8, 18) Re ka ’na ra re Bakreste ba nang le tšepo ea ho phela lefatšeng le bona ba bonahatsa khanya ea Molimo.
Kamoo Bakreste ba Bonahatsang Khanya ea Molimo Kateng
3. Ho tlile joang hore re tsebe Jehova ka tsela eo Moshe a neng a sa mo tsebe ka eona?
3 Ebe ke joang re ka khonang ho bonahatsa khanya ea Molimo? Rōna ha rea bona Jehova le ho mo utloa ka tsela eo Moshe a ileng a mo bona le ho mo utloa ka eona. Leha ho le joalo, re tseba Jehova ka litsela tseo Moshe a neng a sa mo tsebe ka tsona. Jesu o ile a hlaha e le Mesia lilemo tse ka bang 1 500 hoba Moshe a shoe. Ka lebaka leo, Moshe o ne a ke ke a tseba hore na Molao o ne o tla phethahala joang ho Jesu, ea ileng a shoa e le hore a lopolle batho khatellong e bohloko ea sebe le lefu. (Baroma 5:20, 21; Bagalata 3:19) Ho feta moo, Moshe o ne a se na kutloisiso e feletseng ea morero oa Jehova o hlollang, o amanang le ’Muso oa Bomesia le Paradeise ea lefatšeng eo o tla e tlisa. Ka hona rōna re bona khanya ea Jehova, eseng ka mahlo a sebele, empa ka mahlo a tumelo e thehiloeng lithutong tsa Bibele. Ho feta moo, ha rea utloa lentsoe la Jehova ka lengeloi, empa re le utloile ka Bibele, haholo-holo ka Likosepele, tse hlalosang ka bokhabane lithuto tsa Jesu le tšebeletso ea hae.
4. (a) Bakreste ba tlotsitsoeng ba bonahatsa khanya ea Molimo joang? (b) Ba nang le tšepo ea ho phela lefatšeng ba bonahatsa khanya ea Molimo ka litsela life?
4 Le hoja Bakreste ba sa bonahatse khanya ea Molimo ka mahlaseli a khanyang lifahlehong tsa bona, ka sebele lifahleho tsa bona lia khanya ha ba ntse ba bolella ba bang ka botho bo babatsehang ba Jehova le ka merero ea hae. Moprofeta Esaia o ile a bolela esale pele hore mehleng ea rōna, ‘ka sebele [batho ba Molimo] ba ne ba tla bolela khanya ea [Jehova] har’a lichaba.’ (Esaia 66:19) Ho phaella moo, ho 2 Bakorinthe 4:1, 2, rea bala: “Kaha re na le bosebeletsi bona . . . , re hlobohile lintho tsa sekhukhu tseo re lokelang ho ba lihlong ka tsona, re sa tsamaee ka mano, leha e le ho tsoaka lentsoe la Molimo, empa ka ho bonahatsa ’nete re ipuella letsoalong la motho e mong le e mong mahlong a Molimo.” Pauluse o ne a bua ka ho khetheha ka Bakreste ba tlotsitsoeng, bao e leng “basebeletsi ba selekane se secha.” (2 Bakorinthe 3:6) Empa tšebeletso ea bona e amme batho ba bangata haholo ba nang le tšepo ea ho phela ka ho sa feleng lefatšeng. Tšebeletso ea lihlopha tsena ka bobeli e akarelletsa ho bonahatsa khanya ea Jehova eseng feela ka seo li se rutang empa hape le ka tsela eo li phelang ka eona. Ke boikarabelo ba rōna ebile ke tlotla ho bonahatsa khanya ea Molimo Ea Phahameng ka ho Fetisisa!
5. Nala ea rōna ea moea ke bopaki ba eng?
5 Joalokaha Jesu a boletse esale pele, kajeno litaba tse molemo tse khanyang tsa ’Muso oa Molimo li ntse li boleloa lefatšeng lohle leo ho ahiloeng ho lona. (Matheu 24:14) Batho ba tsoang lichabeng tsohle, melokong eohle, merabeng le malemeng ’ohle ba amohetse litaba tse molemo ka mafolofolo ’me ba fetotse bophelo ba bona e le hore ba etse thato ea Molimo. (Baroma 12:2; Tšenolo 7:9) Ho tšoana le Bakreste ba pele, ba ke ke ba khaotsa ho bua ka lintho tseo ba li boneng le tseo ba li utloileng. (Liketso 4:20) Kajeno, batho ba fetang limilione tse tšeletseng, ba bonahatsa khanya ea Molimo ho feta leha e le neng historing ea batho. Na u har’a bona? Nala ea moea ea batho ba Molimo ke bopaki bo kholisang ba hore Jehova oa ba hlohonolofatsa ebile oa ba sireletsa. Re ka bona ka ho hlaka hore re na le moea oa Jehova hobane ho na le makhotla a matla a reretsoeng ho re hlasela. A re boneng hore na hantle-ntle ke hobane’ng ha re e-na le moea oa Jehova.
Batho ba Molimo ba ke ke ba Khutsisoa
6. Ke hobane’ng ha ho hlokahala tumelo le sebete e le hore re emele Jehova?
6 A re nke hore u ne u bitselitsoe khotla ho tla paka khahlanong le senokoane se khopo. Ua tseba hore senokoane sena se sebetsa le sehlopha se matla le hore se tla sebelisa ntho e ’ngoe le e ’ngoe ho u thibela hore u se ke ua se hlahatsa. Ho paka khahlanong le senokoane se joalo ho ne ho tla u hloka hore u be sebete ’me u kholisehe hore ba boholong ba tla u sireletsa ho sona. Re boemong bo tšoanang. Ha re paka ka Jehova le ka merero ea hae, re paka khahlanong le Satane Diabolose, re mo hlahatsa e le ’molai le raleshano ea khelosang lefatše lohle leo ho ahiloeng ho lona. (Johanne 8:44; Tšenolo 12:9) Ho emela Jehova le ho hanyetsa Diabolose ho hloka tumelo le sebete.
7. Satane o na le tšusumetso e matla hakae, hona o leka ho etsa’ng?
7 Ho hlakile hore Jehova ke Ea Phahameng ka ho Fetisisa. Matla a hae a feta a Satane hōle. Re ka kholiseha hore Jehova o na le matla a ho re sireletsa ha re ntse re mo sebeletsa ka botšepehi ebile o labalabela ho re sireletsa. (2 Likronike 16:9) Leha ho le joalo, Satane o busa bademona le lefatše la moloko oa batho le ikarotseng ho Molimo. (Matheu 12:24, 26; Johanne 14:30) Kaha Satane o thibeletsoe lefatšeng, ebile o “halefile haholo,” ka mabifi o hanyetsa bahlanka ba Jehova o bile o sebelisa lefatše la hae ho leka ho koala melomo ea bohle ba bolelang litaba tse molemo. (Tšenolo 12:7-9, 12, 17) O etsa see joang? Bonyane ka litsela tse tharo.
8, 9. Satane o sebelisa lerato le fosahetseng joang, hona ke hobane’ng ha re lokela ho khetha metsoalle ea rōna ka hloko?
8 Tsela e ’ngoe eo Satane a lekang ho re khelosa ka eona ke ka matšoenyeho a bophelo. Matsatsing ana a ho qetela batho ba rata chelete, ke baithati ebile ba rata menyaka. Ha ba rate Molimo. (2 Timothea 3:1-4) Batho ba bangata ‘ha ba ele hloko’ litaba tse molemo tseo re ba tlisetsang tsona hobane ba tšoarehile mesebetsing ea bophelo ba letsatsi le letsatsi. Ha ba thahaselle ho ithuta ’nete ea Bibele. (Matheu 24:37-39) Boikutlo bona bo ka re tšoaetsa, bo ka etsa hore re se natse lintho tsa moea. Haeba re itumella hore re rate lintho tse bonahalang le menyaka ea bophelo, lerato la rōna ho Molimo le tla fola.—Matheu 24:12.
9 Ka lebaka lena, Bakreste ba khetha metsoalle ea bona ka hloko. Morena Solomone o ile a ngola a re: “Ea tsamaeang le batho ba bohlale o tla hlalefa, empa ea bang le litšebelisano le ba hlokang kelello lintho li tla mo tsamaela hampe.” (Liproverbia 13:20) E se eka re ka ‘tsamaea’ le batho ba bonahatsang khanya ea Molimo. Ka sebele ho etsa joalo hoa thabisa! Ha re ntse re bokana hammoho le bara le baralib’abo rōna ba moea libokeng tsa rōna le maemong a mang, lerato la bona, tumelo ea bona, thabo ea bona le bohlale ba bona lia re khothatsa. Botsoalle bo joalo bo molemo bo matlafatsa boikemisetso ba rōna ba ho tiisetsa tšebeletsong ea rōna.
10. Satane o ’nile a sebelisa litšomo ka litsela life khahlanong le ba bonahatsang khanya ea Molimo?
10 Tsela ea bobeli eo Satane a e sebelisang ho leka ho thibela Bakreste bohle ho bonahatsa khanya ea Molimo ke litšomo. Leqheka lena ha lea lokela ho re makatsa. Ha Jesu Kreste a ntse a etsa mosebetsi oa hae lefatšeng, o ile a songoa—a tšehoa, a nyefoloa, a nyelisoa a ba a tšoeloa ka mathe. (Mareka 5:40; Luka 16:14; 18:32) Bakreste ba pele le bona ba ile ba songoa. (Liketso 2:13; 17:32) Bahlanka ba Jehova ba mehleng ea kajeno ba hlekefetsoa ka tsela e tšoanang. Ha e le hantle moapostola Petrose o itse ba ne ba tla bitsoa “baprofeta ba bohata.” Petrose o ile a bolela esale pele a re: “Matsatsing a ho qetela ho tla tla basomi ka ho soma ha bona, ba tsoela pele ho ea ka litakatso tsa bona ba re: ‘Ho kae ho ba teng hoo ho tšepisitsoeng ha hae? Ka sebele, . . . lintho tsohle li tsoela pele hantle feela joaloka ho tloha tšimolohong ea pōpo.’” (2 Petrose 3:3, 4) Batho ba Molimo ba songoa ka hore ha ba kheme le linako. Batho ba nka melao ea boitšoaro ea Bibele e le e siiloeng ke nako. Ba bangata ba nka molaetsa oo re o bolelang e le booatla. (1 Bakorinthe 1:18, 19) Joaloka Bakreste, re ka ’na ra songoa sekolong, mosebetsing ’me ka linako tse ling ra songoa esita le ka lapeng. Re sa nyahamisoa ke seo, re tsoela pele ho bonahatsa khanya ea Molimo ka boboleli ba rōna, ’me joaloka Jesu, rea tseba hore Lentsoe la Molimo ke ’nete.—Johanne 17:17.
11. Satane o ’nile a sebelisa mahloriso joang ha a leka ho khutsisa Bakreste?
11 Leqheka la boraro leo Diabolose a le sebelisang ha a leka ho re khutsisa ke khanyetso kapa mahloriso. Jesu o ile a re ho balateli ba hae: “Batho ba tla nehelana ka lōna matšoenyehong ’me ba tla le bolaea, ’me le tla hlouoa ke lichaba tsohle ka lebaka la lebitso la ka.” (Matheu 24:9) Ka sebele, likarolong tse ngata tsa lefatše re ’nile ra hlorisoa habohloko hobane re le Lipaki Tsa Jehova. Rea tseba hore khale-khale Jehova o ile a bolela hore ho ne ho tla ba le lehloeo, kapa bora pakeng tsa ba sebeletsang Molimo le ba sebeletsang Satane Diabolose. (Genese 3:15) Re boetse rea tseba hore haeba re tšepahala ha re lekoa, re paka hore Jehova o na le tokelo ea ho busa e le morena oa bokahohle. Ho tseba sena ho ka re matlafatsa esita le maemong a thata ka ho fetisisa. Ha ho mahloriso a ka re khutsisang ka ho feletseng haeba re ikemiselitse ho bonahatsa khanya ea Molimo.
12. Ke hobane’ng ha re lokela ho thaba ha re ntse re tšepahala ho sa tsotellehe khanyetso ea Satane?
12 Na u hana ho hoheloa ke lefatše ’me u tšepahala ho sa tsotellehe ho songoa le khanyetso? Joale u na le lebaka la ho thaba. Jesu o ile a tiisetsa bao e neng e tla ba balateli ba hae a re: “Ho thaba lōna ha batho ba le nyelisa ’me ba le hlorisa ’me ka leshano ba bua ntho ea mofuta o mong le o mong e khopo ka lōna ka lebaka la ka. Thabang ’me le tlōle ke thabo, kaha moputso oa lōna o moholo maholimong; etsoe ba ile ba hlorisa baprofeta ka tsela eo pele ho lōna.” (Matheu 5:11, 12) Mamello ea hao e fana ka bopaki ba hore moea o halalelang o matla oa Jehova o holim’a hao, ’me o u fa matla a ho bonahatsa khanya ea hae.—2 Bakorinthe 12:9.
Re Mamella ka Thuso ea Jehova
13. Lebaka le ka sehloohong le etsang hore re mamelle tšebeletsong ea rōna ea Bokreste ke lefe?
13 Lebaka le ka sehloohong le etsang hore re mamelle tšebeletsong ke hobane re rata Jehova ’me re thabela ho bonahatsa khanya ea hae. Batho ba rata ho etsisa batho bao ba ba ratang le bao ba ba hlomphang, ’me ha ho motho ea tšoaneloang ke ho etsisoa ho feta Jehova Molimo. Ka lebaka la lerato la hae le leholo, o ile a romela Mora oa hae lefatšeng hore a pakele ’nete le ho lopolla moloko oa batho ba utloang. (Johanne 3:16; 18:37) Joaloka Molimo, re lakatsa hore batho ba mefuta eohle ba fihle pakong ’me ba bolokehe; ke ka lebaka leo re ba pakelang. (2 Petrose 3:9) Takatso ena, hammoho le boikemisetso ba rōna ba ho etsisa Molimo, li re susumeletsa ho tiisetsa ha re bonahatsa khanya ea hae tšebeletsong ea rōna.
14. Jehova o re matlafatsa joang hore re mamelle tšebeletsong ea rōna?
14 Bonneteng, matla a rōna a ho mamella tšebeletsong ea Bokreste a tsoa ho Jehova. Oa re tšehetsa ebile o re matlafatsa ka moea oa hae, ka mokhatlo oa hae o hlophisitsoeng le ka Lentsoe la hae, Bibele. Jehova ‘o fana ka mamello’ ho bohle ba ikemiselitseng ho bonahatsa khanya ea hae. O araba lithapelo tsa rōna ’me o re fa bohlale ba ho sebetsana le liteko. (Baroma 15:5; Jakobo 1:5) Ho feta moo, Jehova ha a lumelle hore re hlaheloe ke teko leha e le efe eo re ke keng ra khona ho e mamella. Haeba re tšepa Jehova, o tla re bulela monyetla oa hore re tsoele pele ho bonahatsa khanya ea hae.—1 Bakorinthe 10:13.
15. Ke eng e re thusang ho mamella?
15 Ho mamella tšebeletsong ea rōna ke bopaki ba hore re na le moea oa Molimo. Ho tea mohlala: A re re motho e mong o u kōpile hore u tsamaise mofuta o itseng oa bohobe ka ntlo le ntlo, mahala. O u laela hore u etse mosebetsi ona ka chelete ea hao le ka nako ea hao. Ho feta moo, kapele feela u hlokomela hore ke batho ba ’maloa haholo ba hlileng ba batlang bohobe ba hao; ba bang ba bile baa u thibela ha u ntse u leka ho bo tsamaisa. Na u nahana hore u ne u ka tsoela pele u etsa mosebetsi oo khoeli le khoeli, selemo le selemo? Mohlomong u ne u ke ke ua o etsa. Leha ho le joalo, e ka ’na eaba e se e le lilemo-lemo u ikitlaelletsa ho bolela litaba tse molemo ka nako ea hao le ka chelete ea hao. Hobane’ng? Na hase hobane u rata Jehova a bile a sebelisitse moea oa hae hore a hlohonolofatse boiteko ba hao ba ho mamella? Ka sebele ho joalo!
Mosebetsi o Lokelang ho Hopoloa
16. Ho mamella tšebeletsong ea rōna ho bolela’ng ho rōna le ho ba re mamelang?
16 Tšebeletso e amanang le selekane se secha ke mpho eo ho seng e tšoanang le eona. (2 Bakorinthe 4:7) Ka ho tšoanang, tšebeletso ea Bokreste e etsoang ke linku tse ling lefatšeng ka bophara ke letlotlo. Joalokaha Pauluse a ile a ngolla Timothea, “u tla ipholosa ’me u pholose le ba u mamelang,” haeba u ntse u tsoela pele ho mamella tšebeletsong ea hao. (1 Timothea 4:16) Nahana hore na seo se bolela’ng. Litaba tse molemo tseo u li bolelang li fa ba bang monyetla oa ho phela ka ho sa feleng. U ka theha setsoalle se matla le batho bao u ba thusang moeeng. Nahana feela hore na ho tla thabisa hakaakang ho phela ka ho sa feleng Paradeiseng le batho bao u ba thusitseng ho ithuta ka Molimo! Ka sebele le ka mohla ba ke ke ba lebala boiteko boo u bo entseng ba ho ba thusa. Seo e tla ba se khotsofatsang hakaakang!
17. Ke hobane’ng ha mehla ea rōna e le nako e ikhethang historing ea batho?
17 U phela nakong e ikhethang historing ea batho. Litaba tse molemo li ke ke tsa hlola li boleloa hape lefatšeng le ikarotseng ho Molimo. Noe o ile a phela lefatšeng le joalo, ’me o ile a le bona ha le feta. E tlameha ebe o ile a thaba hakaakang ha a tseba hore o ile a etsa thato ea Molimo ka botšepehi ha a ne a haha areka, e ileng ea mo pholosa le lelapa la hae! (Baheberu 11:7) Le uena u ka thaba joaloka eena. Nahana feela hore na u tla ikutloa joang lefatšeng le lecha ha u hopola mosebetsi oo u ileng ua o etsa matsatsing ana a ho qetela, u tseba hore u entse sohle se matleng a hao ho ntšetsa pele lintho tse amanang le ’Muso.
18. Jehova o tiisetsa bahlanka ba hae eng hona o ba khothatsa joang?
18 Kahoo, a re tsoeleng pele ho bonahatsa khanya ea Molimo. Eo ke ntho eo re ke keng ra e lebala ka ho sa feleng. Jehova le eena o hopola mesebetsi ea rōna. Bibele e fana ka khothatso ena: “Molimo hase ea sa lokang hoo a ka lebalang mosebetsi oa lōna le lerato leo le ileng la le bontša bakeng sa lebitso la hae, ka hore le sebelelitse bahalaleli ’me le tsoela pele ho sebeletsa. Empa re lakatsa hore e mong le e mong oa lōna a bontše mafolofolo a tšoanang e le hore a be le kholiseho e feletseng ea tšepo ho fihlela bofelong, e le hore le se ke la noaboloha, empa le be baetsisi ba bao ka tumelo le ho se fele pelo ba ruang litšepiso.”—Baheberu 6:10-12.
Na U ka Hlalosa?
• Bakreste ba bonahatsa khanya ea Molimo joang?
• A mang a maqheka ao Satane a a sebelisang ha a leka ho khutsisa batho ba Molimo ke afe?
• Ke eng e bontšang hore re na le moea oa Molimo?
[Setšoantšo se leqepheng la 15]
Sefahleho sa Moshe se ile sa bonahatsa khanya
[Litšoantšo tse leqepheng la 16, 17]
Re bonahatsa khanya ea Molimo tšebeletsong ea rōna