Ho se Hlole re Iphelela

“[Kreste] o ile a shoela bohle e le hore ba phelang ba se ke ba hlola ba iphelela.”—2 BAKORINTHE 5:15.

 1, 2. Ke taelo efe ea Mangolo e ileng ea susumelletsa balateli ba Jesu ba lekholong la pele la lilemo ho hlōla boithati?

E NE e le bosiu ba ho qetela Jesu a le lefatšeng. Ho ne ho setse lihora tse seng kae feela pele a nehelana ka bophelo ba hae molemong oa bohle ba neng ba tla bontša tumelo ho eena. Bosiung boo, Jesu o ile a bolella baapostola ba hae ba tšepahalang lintho tse ngata tsa bohlokoa. E ’ngoe ea tsona e ne e le taelo e amanang le tšobotsi e neng e tla ba letšoao le khethollang balateli ba hae. O ile a re: “Ke le fa taelo e ncha, hore le ratane; le lōna le ratane feela joalokaha ke le ratile. Bohle ba tla tseba ka sena hore le barutuoa ba ka, haeba le e-na le lerato har’a lōna.”—Johanne 13:34, 35.

² Bakreste ba ’nete ba lokela ho bontšana lerato la boitelo le ho etelletsa litlhoko tsa balumeli-’moho le bona ka pele ho tsa bona. Ha baa lokela ho tsilatsila esita le tabeng ea ho ‘nehelana ka meea ea bona molemong oa metsoalle ea bona.’ (Johanne 15:13) Bakreste ba pele ba ile ba arabela joang taelong ee e ncha? Bukeng ea hae e tummeng e bitsoang Apology, Tertullian, e leng mongoli oa lekholong la bobeli la lilemo, o ile a qotsa batho ba bang ba ileng ba re ka Bakreste: ‘Bonang kamoo ba ratanang kateng; le kamoo ba ikemiselitseng le ho shoelana kateng.’

 3, 4. (a) Ke hobane’ng ha re lokela ho loantša boithati? (b) Ho tla tšohloa eng sehloohong see?

³ Le rōna re lokela ho ‘tsoela pele re jarelana meroalo, kahoo re phethahatse molao oa Kreste.’ (Bagalata 6:2) Leha ho le joalo, boithati ke e ’ngoe ea litšitiso tse khōlōhali tse etsang hore re se ke ra mamela molao oa Kreste le ho ‘rata Jehova Molimo oa rōna ka lipelo tsa rōna tsohle le ka moea oa rōna oohle le ka likelello tsa rōna tsohle le ho rata moahelani oa rōna joalokaha re ithata.’ (Matheu 22:37-39) Kaha ha rea phethahala, re na le tšekamelo ea ho ba baikhabi. Ho phaella moo, ho na le likhatello tsa bophelo ba letsatsi le letsatsi, moea oa tlhōlisano sekolong kapa mosebetsing le ho sokola lintho tse hlokahalang bophelong, ’me sena se etsa hore tšekamelo ena ea tlhaho e be matla. Tšekamelo ena ea boithati ha e fokotsehe. Moapostola Pauluse o ile a lemosa: “Matsatsing a ho qetela . . . batho e tla ba baikhabi ka ho feletseng.”—2 Timothea 3:1, 2, Phillips.

⁴ Ho elella karolong ea ho qetela ea tšebeletso ea hae ea lefatšeng, Jesu o ile a fa barutuoa ba hae mehato e meraro e neng e tla ba thusa ho hlōla boithati. E ne e le efe, hona re ka rua molemo joang litaelong tsa hae?

Pheko ea Sebele!

 5. Jesu o ile a tsebisa barutuoa ba hae eng ha a ntse a bolela Galilea leboea, hona ke hobane’ng ha seo se ile sa ba ferekanya?

⁵ Jesu o ne a bolela haufi le Cesarea Filipi e Galilea leboea. Ho ka etsahala hore ebe sebaka sena se khutsitseng, se hlollang ka botle se ne se bonahala se loketse haholoanyane bakeng sa ho ikhotsofatsa eseng bakeng sa ho itima lintho tsohle. Leha ho le joalo, ha Jesu a le moo o ile a qala ho tsebisa barutuoa ba hae hore “o tla ea Jerusalema le ho utloisoa bohloko linthong tse ngata ke banna ba baholo le baprista ba ka sehloohong le bangoli, le ho bolaoa, ’me a tsosoe ka letsatsi la boraro.” (Matheu 16:21) E tlameha ebe boitsebiso bona bo bocha bo ile ba ferekanya barutuoa ba Jesu hakaakang, kaha ho fihlela ka nako eo ba ne ba lebeletse hore Moeta-pele oa bona a hlome ’Muso oa hae lefatšeng!—Luka 19:11; Liketso 1:6.

 6. Ke hobane’ng ha Jesu a ile a khalemela Petrose ka matla?

⁶ Kapele-pele Petrose o ile a “nkela [Jesu] ka thōko ’me [a] qala ho mo khalemela ka matla, [a] re: ‘Ikhauhele, Morena; ho hang u ke ke ua ba le qetello ena.’” Jesu o ile a arabela joang? “Ha a furalla, a re ho Petrose: ‘Suthela ka mor’a ka, Satane! U khopiso ho ’na, hobane u nahana menahano ea batho, eseng ea Molimo.’” Maikutlo a batho bana ba babeli a ne a fapane hakaakang! Jesu o ile a ithaopela ho amohela tsela ea boitelo eo Molimo a neng a mo abetse eona—e neng e tla fella ka hore likhoeli tse seng kae hamorao a shoele thupeng ea tlhokofatso. Petrose o ile a buella tsela e se nang mathata. A re: “Ikhauhele, Morena.” Ha ho pelaelo hore Petrose o ne a bua sena ka sepheo se setle. Leha ho le joalo, Jesu o ile a mo khalemela ka matla hobane ka nako eo Petrose o ile a lumella Satane hore a mo susumetse. Petrose o ne a nahana “menahano ea batho, eseng ea Molimo.”—Matheu 16:22, 23.

 7. Joalokaha ho tlalehiloe ho Matheu 16:24, Jesu o ile a re balateli ba hae ba etse joang?

⁷ Kajeno motho a ka utloa mantsoe a tšoanang le a Petrose ho Jesu. Hangata lefatše le khothalletsa motho hore ‘a se ke a itšotla’ kapa ‘a ipaballe.’ Empa, Jesu o ile a buella ho ba le boikutlo bo fapaneng le boo ka ho feletseng. O ile a re ho barutuoa ba hae: “Haeba mang kapa mang a batla ho ntšala morao, a ke a itatole ’me a nke thupa ea hae ea tlhokofatso a ntatele a sa khaotse.” (Matheu 16:24) The New Interpreter’s Bible e re: “Mantsoe ana ha a meme batho ba ka ntle hore e be barutuoa, empa a mema ba seng ba arabetse pitsong ea Kreste hore ba nahane ka ho teba ka se boleloang ke ho ba morutuoa.” Joalokaha ho boletsoe lengolong lena, balumeli ba lokela ho nka mehato e meraro eo Jesu a e thathamisitseng. A re ke re hlahlobe mohato ka mong.

 8. Hlalosa hore na ho itatola ho bolela’ng.

⁸ Oa pele, re lokela ho itatola. Lentsoe la Segerike bakeng sa “ho itatola” le bolela ho ikemisetsa ho hana litakatso tsa boithati kapa ho se ipatlele se molemo re le bang. Ho itatola hase feela taba ea ho itima menate e itseng ka linako tse ling; ebile ha ho bolele ho itšoara ka thata-thata kapa ho intša kotsi. Ha re sa le ‘ba rōna’ ka kutloisiso ea hore re ithaopela ho nehela bophelo bohle ba rōna le lintho tsohle tsa rōna ho Jehova. (1 Bakorinthe 6:19, 20) Ho e-na le ho ba baikhabi, bophelo ba rōna bo laoloa ke Molimo. Ho itatola ho bolela ho ikemisetsa ho etsa thato ea Molimo, le hoja seo se ka ’na sa e-ba khahlanong le litšekamelo tsa rōna tsa ho se phethahale. Re bontša hore re fa Molimo boinehelo bo khethehileng feela ka ho inehela ho eena le ka ho kolobetsoa. Ebe joale re loanela ho phelela boinehelo ba rōna bophelong bohle ba rōna.

 9. (a) Ha Jesu a ne a le lefatšeng, thupa ea tlhokofatso e ne e tšoantšetsa eng? (b) Re nka thupa ea rōna ea tlhokofatso joang?

⁹ Mohato oa bobeli ke hore re lokela ho nka thupa ea rōna ea tlhokofatso. Lekholong la pele la lilemo, thupa ea tlhokofatso e ne e tšoantšetsa mahlomola, lihlong le lefu. Ka tloaelo, ke batlōli ba molao feela ba neng ba bolaeloa thupeng ea tlhokofatso kapa bao litopo tsa bona li neng li fanyehoa thupeng. Ka ho cho joalo, Jesu o ne a bontša hore Mokreste o lokela ho ikemisetsa ho amohela mahloriso, ho khesoa, kapa esita le lefu, kaha hase karolo ea lefatše. (Johanne 15:18-20) Litekanyetso tsa rōna tsa Bokreste lia re khetholla, kahoo lefatše le ka ’na la ‘re nyefola.’ (1 Petrose 4:4) Sena se ka etsahala sekolong, mosebetsing, kapa esita le ka lapeng. (Luka 9:23) Leha ho le joalo, re ikemiselitse ho mamella ho khesoa ke lefatše kahobane ha re sa iphelela. Jesu o itse: “Ho thaba lōna ha batho ba le nyelisa ’me ba le hlorisa ’me ka leshano ba bua ntho ea mofuta o mong le o mong e khopo ka lōna ka lebaka la ka. Thabang ’me le tlōle ke thabo, kaha moputso oa lōna o moholo maholimong.” (Matheu 5:11, 12) Ka sebele, ho amoheloa ke Molimo ke eona ntho ea bohlokoa ka ho fetisisa.

10. Ho latela Jesu re sa khaotse ho akarelletsa eng?

¹⁰ Oa boraro, Jesu Kreste o itse re lokela ho mo latela re sa khaotse. Ho ea ka An Expository Dictionary of New Testament Words, ea W. E. Vine, ho latela ho bolela ho ba motsoalle—“ea tsamaeang ka tsela e tšoanang.” Johanne oa Pele 2:6 e re: “Ea reng o lula bonngoeng le [Molimo] o tlamehile hore a tsoele pele ho tsamaea feela joalokaha eo [e leng, Kreste] a ile a tsamaea.” Jesu o ne a tsamaea joang? Lerato la Jesu bakeng sa Ntat’ae oa leholimo le bakeng sa barutuoa ba hae ha lea ka la lumella boithati. Pauluse o ile a ngola a re: “Kreste ha aa ka a ikhahlisa.” (Baroma 15:3) Esita leha a ne a lapile kapa a khathetse, Jesu o ne a etelletsa litlhoko tsa batho ba bang pele ho tsa hae. (Mareka 6:31-34) Hape Jesu o ile a ikitlaetsa mosebetsing oa ho bolela ka ’Muso le oa ho ruta. Na ha rea lokela ho mo etsisa ha ka cheseho re ntse re phetha thōmo ea rōna ea ho ‘etsa batho ba lichaba tsohle barutuoa, le ho ba ruta ho boloka lintho tsohle tseo Jesu a li laetseng’? (Matheu 28:19, 20) Ho sohle seo a neng a se etsa, Kreste o ile a re siela mohlala, ’me re lokela ho ‘latela mehato ea hae haufi-ufi.’—1 Petrose 2:21.

11. Ke hobane’ng ha e le habohlokoa hore re itatole, re nke thupa ea rōna ea tlhokofatso, ’me re latele Jesu Kreste re sa khaotse?

¹¹ Ke habohlokoa hore re itatole, re nke thupa ea rōna ea tlhokofatso, ’me re latele ’Mehi-mohlala oa rōna re sa khaotse. Haeba re etsa joalo re loantša boithati—e leng tšitiso e khōlō e re thibelang ho bontša lerato la boitelo. Hape, Jesu o ile a re: “Mang kapa mang ea batlang ho pholosa moea oa hae o tla lahleheloa ke oona; empa mang kapa mang ea lahleheloang ke moea oa hae ka lebaka la ka o tla o fumana. Etsoe ho tla ba le molemo ofe ha motho a rua lefatše lohle empa a lahleheloa ke moea oa hae? kapa motho o tla fana ka eng e le phapanyetsano bakeng sa moea oa hae?”—Matheu 16:25, 26.

Re ke ke ra Sebeletsa Benghali ba Babeli

12, 13. (a) ’Musi e mocha ea neng a kōpa keletso ho Jesu o ne a amehile ka eng? (b) Jesu o ile a fa mohlankana eo keletso efe, hona hobane’ng?

¹² Likhoeli tse itseng ka mor’a hore Jesu a hatise bohlokoa ba hore barutuoa ba hae ba itatole, mohlankana e mong e mocha ea ruileng o ile a tla ho eena eaba o re: “Mosuoe, ke etse molemo ofe e le hore ke fumane bophelo bo sa feleng?” Jesu o ile a mo bolella hore a “boloke litaelo [a] sa khaotse,” eaba o qotsa tse ling tsa tsona. Mohlankana eo o ile a re: “Ke bolokile tsena tsohle.” Kamoo ho bonahalang kateng monna enoa o ne a tšepahala ’me a entse sohle seo a ka se khonang ho boloka litaelo tsa Molao. Kahoo o ile a botsa: “Ke sa ntse ke haelloa ke eng?” Ha a arabela, Jesu o ile a fa mohlankana enoa memo e khethehileng, a re: “Haeba u batla ho phethahala [“ho ba ea feletseng,” New American Standard Bible], e-ea u rekise lintho tsa hao u fe mafutsana ’me u tla ba le letlotlo leholimong, u tle ’me u be molateli oa ka.”—Matheu 19:16-21.

¹³ Jesu o ile a bona hore haeba mohlankana enoa a batla ho sebeletsa Jehova ka moea oohle, o ne a lokela ho tlosa tšitiso e khōlō bophelong ba hae—maruo a hae a lintho tse bonahalang. Morutuoa oa ’nete oa Kreste a ke ke a sebeletsa benghali ba babeli. E ‘ke ke ea e-ba lekhoba la Molimo le la Maruo.’ (Matheu 6:24) O lokela ho ba le ‘leihlo le talimang nģa e le ’ngoe’ le tsepameng linthong tsa moea. (Matheu 6:22) Ho hloka boitelo hore motho a khaohane le lintho tsa hae le ho li fa mafutsana. Jesu o ile a fa ’musi enoa e mocha monyetla o babatsehang oa ho bokella letlotlo leholimong ho fapana le lintho tse bonahalang—e leng letlotlo le neng le tla bolela bophelo bo sa feleng bakeng sa hae ’me seo se ne se tla fella ka tebello ea hore qetellong a buse le Kreste leholimong. Mohlankana enoa o ne a sa itokisetsa ho itatola. “[O ile] a tloha a saretsoe, kaha o ne a e-na le matlotlo a mangata.” (Matheu 19:22) Leha ho le joalo, balateli ba bang ba Jesu bona ba ile ba arabela ka tsela e fapaneng.

14. Batšoasi ba bane ba litlhapi ba ile ba arabela joang ha Jesu a ba mema hore ba mo latele?

¹⁴ Lilemo tse ka bang tse peli pejana, Jesu o ne a ile a fetisetsa memo e tšoanang ho batšoasi ba bane ba litlhapi e leng Petrose, Andrease, Jakobo le Johanne. Ka nako eo, ba babeli ba bona ba ne ba ntse ba tšoasa litlhapi, ’me ba bang ba babeli ba ne ba tšoarehile ka ho lokisa matlooa a bona. Jesu o ile a re ho bona: “Ntšaleng morao, ’me ke tla le etsa batšoasi ba batho.” Qetellong bone ba bona ba ile ba tlohela khoebo ea bona ea ho tšoasa litlhapi eaba ba latela Jesu bophelo bohle ba bona.—Matheu 4:18-22.

15. Paki e ’ngoe ea Jehova ea mehleng ea kajeno e ile ea itela ka tsela efe e le hore e latele Jesu?

¹⁵ Kajeno Bakreste ba bangata ba etsisitse mohlala oa batšoasi bao ba bane ba litlhapi ho e-na le ho etsisa mohlala oa ’musi e mocha ea ruileng. Ba tetse maruo le monyetla o itseng lefatšeng lena e le hore ba sebeletse Jehova. Deborah o re: “Ha ke le lilemo li 22, ke ile ka tlameha ho etsa qeto e bohlokoa.” Oa hlalosa: “Ke ne ke ithutile Bibele ka likhoeli tse ka bang tse tšeletseng, ’me ke ne ke batla ho nehela bophelo ba ka ho Jehova, empa lelapa leso le ne le nkhanyetsa haholo. E ne e le lelapa le hafang ka nkatana, ’me le ne le nahana hore ho ba ha ka Paki ho ne ho tla le tlisetsa sekhobo sechabeng. Le ile la mpha lihora tse 24 hore ke khethe hore na ke batla’ng—bophelo bo mabothobotho kapa ’nete. Haeba ke ne ke sa khaohane le Lipaki ka hohle-hohle, lelapa leso le ne le tla ntima lefa leha e le lefe. Jehova o ile a nthusa ho etsa qeto e nepahetseng a ba a mpha matla a ho tsoela pele ka eona. Ke qetile lilemo tse 42 ke le tšebeletsong ea nako e tletseng, ’me ho hang ha ke ikoahlaee. Ka ho hana mokhoa oa bophelo oa boithati le oa ho rata menate, ke ile ka phema bophelo ba ho hloka morero le thabo boo ke bonang ba lelapa leso ba bo phela. Ke e-na le monna oa ka, ke thusitse batho ba fetang lekholo ho ithuta ’nete. Bana bana ba moea ke ba bohlokoa haholo ho ’na ho feta maruo leha e le afe a lintho tse bonahalang.” Lipaki Tsa Jehova tse ling tse limilione le tsona li ikutloa ka tsela e tšoanang. Ho thoe’ng ka uena?

16. Re ka bontša joang hore ha re sa iphelela?

¹⁶ Takatso ea ho se hlole li iphelela e susumelelitse Lipaki Tsa Jehova tse likete ho sebeletsa e le bo-pula-maliboho, kapa baboleli ba ’Muso ba nako e tletseng. Ba bang bao maemo a bona a sa ba lumelleng ho kopanela tšebeletsong ea nako e tletseng, ba hlaolela moea oa bopula-maliboho ’me ba tšehetsa mosebetsi oa ho bolela ka ’Muso ka hohle kamoo ba ka khonang kateng. Batsoali ba bontša moea o tšoanang ha ba sebelisa boholo ba nako ea bona ba bile ba tela lintho tseo ba li ratang e le hore ba koetlise bana ba bona moeeng. Ka tsela e itseng, kaofela ha rōna re ka bontša hore lintho tse amanang le ’Muso li tla pele bophelong ba rōna.—Matheu 6:33.

Ke Lerato la Mang le re Qobellang?

17. Ke eng e re susumelletsang ho itela?

¹⁷ Ho bontša lerato la boitelo ha ho bonolo. Empa nahana hore na re qobelloa ke eng. Pauluse o ile a ngola a re: “Lerato leo Kreste a nang le lona lea re qobella, hobane sena ke seo re se ahlotseng, hore motho a le mong o ile a shoela bohle . . . O ile a shoela bohle e le hore ba phelang ba se ke ba hlola ba iphelela, empa ba phelele ea ileng a ba shoela ’me a tsosoa.” (2 Bakorinthe 5:14, 15) Lerato la Kreste ke lona le re qobellang hore re se ke ra hlola re iphelela. Eo ke tšusumetso e matla hakaakang! Kaha Kreste o re shoetse, na ha re ikutloe re e-na le boikarabelo ba ho mo phelela? Ka sebele, ho ananela lerato le tebileng leo Molimo le Kreste ba re bontšitseng lona ho ile ha re qobella hore re nehele bophelo ba rōna ho Molimo le ho ba barutuoa ba Kreste.—Johanne 3:16; 1 Johanne 4:10, 11.

18. Ke hobane’ng ha bophelo ba boitelo e le ba bohlokoa?

¹⁸ Na ho se hlole re iphelela ke habohlokoa? Ka mor’a hore ’musi e mocha ea ruileng a hane memo ea Kreste a be a tsamaee, Petrose o ile a re ho Jesu: “Bona! Re siile lintho tsohle ’me ra u latela; re tla fumana eng?” (Matheu 19:27) Petrose le baapostola ba bang ba ne ba itatotse e le kannete. Moputso oa bona e ne e tla ba eng? Pele Jesu o ile a bua ka tokelo eo ba neng ba tla e fumana ea ho busa le eena leholimong. (Matheu 19:28) Ketsahalong e tšoanang, Jesu o ile a bua ka litlhohonolofatso tseo e mong le e mong oa balateli ba hae a neng a tla li fumana. O itse: “Ha ho ea siileng ntlo kapa barab’abo kapa baralib’abo kapa ’mè kapa ntate kapa bana kapa masimo ka lebaka la ka le ka lebaka la litaba tse molemo ea ke keng a fumana halekholo hona joale nakong ena . . . ’me tsamaisong ea lintho e tlang a fumane bophelo bo sa feleng.” (Mareka 10:29, 30) Re fumana lintho tse ngata ho feta tseo re li tetseng. Na bo-ntate ba rōna ba moea, bo-’mè, barab’abo rōna, baralib’abo rōna le bana hase ba bohlokoahali ho feta ntho leha e le efe eo re e tetseng ka lebaka la ’Muso? Ke mang ea bileng le bophelo bo khotsofatsang haholo—na ke Petrose kapa ’musi e mocha ea ruileng?

19. (a) Thabo ea sebele e itšetlehile ka eng? (b) Re tla tšohla eng sehloohong se latelang?

¹⁹ Ka mantsoe le ka liketso tsa hae, Jesu o ile a bontša hore thabo ha e tlisoe ke boithati, empa e tlisoa ke ho fana le ho sebeletsa ba bang. (Matheu 20:28; Liketso 20:35) Ha re se re sa hlole re iphelela empa re latela Kreste re sa khaotse, re khotsofalla bophelo hona joale ebile re na le tebello ea bophelo bo sa feleng nakong e tlang. Ke ’nete hore, ha re itatola, Jehova o fetoha Mong’a rōna. Ka hona re fetoha makhoba a Molimo. Ke hobane’ng ha bokhoba boo e le bo thabisang? Bo ama liqeto tseo re li etsang bophelong joang? Lipotso tsena li tla tšohloa sehloohong se latelang.

Na U sa Hopola?

• Ke hobane’ng ha re lokela ho loantša litšekamelo tsa rōna tsa boithati?

• Ke eng se boleloang ke ho itatola, ho nka lithupa tsa rōna tsa tlhokofatso le ho latela Jesu re sa khaotse?

• Ke eng e re susumelletsang hore re se hlole re iphelela?

• Ke hobane’ng ha bophelo ba boitelo e le ba bohlokoa?

[Setšoantšo se leqepheng la 11]

“Ikhauhele, Morena”

[Setšoantšo se leqepheng la 13]

Ke eng e ileng ea thibela ’musi e mocha hore a se ke a latela Jesu?

[Litšoantšo tse leqepheng la 15]

Lerato le tlama Lipaki Tsa Jehova hore li sebeletse e le baboleli ba chesehang ba ’Muso