Mosa o sa Tšoanelang oa Molimo—U Se Ke Ua Lahleheloa ke Morero oa Oona!

SETHO se seng sa kereke se boletse, “ho bua ka bolumeli . . . ka sebele ke mosebetsi oa moruti.” (Mongolo o tšekaletseng ke oa rōna.) Ba bang ba lumetse, “Ha ho bapisoa ke Bakreste ba fokolang ba etsang boiteko ba ho abelana tumelo ea bona le ba bang.” (Mongolo o tšekaletseng ke oa rōna.) Lipolelo tse joalo ka ho hlaka li tiisa hore bakeng sa boholo ba ba eang kerekeng kajeno, Bokreste bo bolela ho honyenyane ho feta tumelo e se nang thuso ho Molimo le ho Kreste joaloka Messia.

Pono ea hao ke efe? Barutuoa ba Jesu ba ile ba abelana tumelo ea bona le ba bang. (Luka 8:1) Na Bakreste kajeno ba lokela ho etsa se tšoanang? Kapa haeba Molimo ha a sa hloka Bakreste ba amohelehang ho ba baboleli ba evangeli, o lebeletse hore ba etse eng? Na Molimo o na le morero bakeng sa Bakreste kajeno? E! ’Me ka baka lena, temoso ea moapostola Pauluse ho Bakreste ba Korinthe hore e se be ‘ba amohelang mosa o sa tšoanelang oa Molimo e be ba lahleheloa ke morero oa oona’ e na le seo e se bolelang ho rōna. (2 Ba-Korinthe 6:1, NW) A re boneng lebaka.

Morero oa Molimo oa Tsebahatsoa

Joaloka Pauluse, Bakreste ba Korinthe ba ne ba amohetse sehlabelo sa topollo sa Jesu Kreste. Ka baka la tumelo ea bona tokisetsong ena, Jehova a ba bolela ba lokile. Ho amohela ha bona linnete tsa Messia tseo ba li amohetseng ka tšebeletso ea Pauluse ho ile ha ba lokolla bokhobeng ba mesebetsi ea bohata, ea bohetene, le e silafetseng eo Korinthe ea boholo-holo e neng e tumme hampe ka eona. Ho bona, mosa o sa tšoanelang oa Jehova o ne o bolela topollo ea bona. Leha ho le joalo, na mosa o joalo o sa tšoanelang e ne e le oa lefeela?

Le hanyenyane. Ho e-na le hoo, Jehova o ile a ba lopolla ka morero o tšoanang le oa ha a ne a lopolla Pauluse lineanong tseo e seng tsa Mangolo tsa bo-ntat’ae. Pauluse ka boeena o totobatsa morero oo: “Eo ke entsoeng mohlanka oa eona, ka neo ea [mosa o sa tšoanelang, NW] oa Molimo, oo ke o neiloeng . . . Oa hore ke bolele har’a ba-lichaba monono o sa fihleloeng oa Kreste.” (Ba-Efese 3:7, 8; bapisa Ba-Galata 1:15, 16.) E, morero oa mosa o sa tšoanelang oa Molimo e ne e le hore bahlanka ba hae ba lokela ho nka borapeli ba ’nete—ba phahamise lebitso la Jehova le ho le tsebahatsa tšebeletsong ea Bokreste, joalokaha ho entse Pauluse.—Ba-Roma 10:10.

Leha ho le joalo, ha Pauluse a ngola lengolo la hae la pele le eang ho Bakorinthe, ho ne ho totobetse hore ba bangata ba bona ba ne ba lahlehetsoe ke morero oa mosa o sa tšoanelang oa Molimo. Ka tsela efe? Ho e-na le ho tsoelapele ka mofuta oa borapeli bo hloekileng le bo amohelehang mahlong a Molimo, ba ne ba lumelletse litšusumetso tse silafetseng tsa batho ba Korinthe ho fifatsa likelello tsa bona. Likhang le bohlola li ne li le teng har’a bona. (1 Ba-Korinthe 1:11; 5:1, 2) Boholo ba ba neng ba kopanela le phutheho ba ile ba lokisa maemo a bona ka baka la keletso ea Pauluse. Ho sa tsotellehe hoo, Pauluse o ne a sa batle hore ba boele ba khoptjoe hape tšebeletsong ea Bokreste. Ho feta moo, o ile a boela a ba hopotsa hamorao hore ‘ba se amohele mosa o sa tšoanelang oa Molimo ’me ba lahleheloa ke morero oa oona.’—2 Ba-Korinthe 6:1.

Mohlala Oa Boholo-holo

Boemo bo kang bona bo ne bo ile ba hlaha makholo a lilemo pele. Selemo selemong sa 537 B.C.E., Jehova Molimo o ile a lokolla sechaba sa hae se khethiloeng sa Iseraele botlamuoeng ba Babylona ka Morena oa Persia Cyruse. Morero oa topollo ea bona o ile oa hlakisoa ke Cyruse ka boeena taelong e latelang: “Har’a lōna mang le mang eo e leng motho oa sechaba sa hae, Molimo oa hae o ke o be le eena, ’me a nyolohele Jerusalema naheng ea Juda, ’me a hahe ntlo ea Jehova, Molimo oa Iseraele.”—Esdrase 1:1-3.

E, e ne e le nako e loketseng ea Jehova ea ho khutlisetsa borapeli ba ’nete lefatšeng la Juda. Ka baka la mosa o sa tšoanelang oa Jehova, Bajode bao ba khutlileng ba ne ba e-na le monyetla oa ho tsosolosa tempele ea hae Jerusalema. Ba amohetse phephetso, batlamuoa ba khutlileng ba hla ba tsitsa naheng ea habo bona ’me ba qalisa mosebetsi oa tsosoloso tempeleng.—Esdrase 1:5-11.

Leha ho le joalo, ka nako e khutšoanyane, sechaba sena sa Bajode ba khutlileng sa lumella khanyetso e tsoang kantle ho kena-kenana le mosebetsi oa bona. Ho e-na le ho boloka ka tieo likelellong tsa bona morero oa topollo ea bona, ba qala ho re: “Nako ha e e-so ho tle; hase nako eo ntlo ea Jehova e ka hahuoang ka eona!” (Haggai 1:2) Ka baka leo, mosebetsi oa tsosoloso o ile oa tlohelloa ka ho feletseng ka lilemo tse ka bang 16.

Ka nako e tšoanang, ba ne ba tšoarehile ke ho lelekisa lintho tsa boithati, ba etsa boiteko bo boholoanyane linthong tse bonahalang, boiketlo ba nama, ho feta ho tsosolosa ntlo e halalelang ea Jehova. (Haggai 1:3-9) Ho Haggai 1:4 rea bala: “Hleka ho lōna ke nako ea ho lula matlung a lōna a manehiloeng ka liplanka, athe ntlo ena ke lesupi?” Ntlo ea Jehova ea borapeli e ne e lutse e le “lesupi,” e setse feela ka moralo, ha Bajode ba ne ba phela matlong a bona a ruletsoeng hantle ka marako a ’ona a khabisitsoeng hantle ka lepolanka le letle.

Ka baprofeta ba hae Haggai le Zakaria, Jehova a hopotsa Bajode ka morero oa topollo ea bona, ’me qetellong mosebetsi oa kaho o ile oa phethoa. Leha ho le joalo, mang le mang ea neng a tsoelapele ho bea maruo a bonahalang boemong bo phahameng ho feta tokelo ea ho bona hore borapeli ba ’nete bo khutlisetsoa Jerusalema, ka ho hlakileng o ne a lahlehetsoe ke morero oa mosa o sa tšoanelang oa Molimo.

Morero oa Topollo ea Rōna

Re ka ithuta eng kajeno mohlaleng oa Bajode ba ileng ba khutlisoa ka 537 B.C.E. le ho Bakreste ba Korinthe ba mehleng ea Pauluse? Joaloka bahlanka ba inehetseng ba Jehova Molimo, le rōna re latsoitse topollo. Ka mosa oa hae o sa tšoanelang, ha re sa tlameletsoe lithutong tsa bohata le lineanong tsa Babylona e Moholo kapa bokhopong ba tsamaiso ena ea khale ea lintho. (Johanne 8:32; 2 Ba-Korinthe 4:4-6) Topollo e joalo, ha esita le bolokolohi boo e bo tlisang, e re nolofaletsa monyetla oa ho bontša Molimo kananelo ea rōna bakeng sa lerato la hae ho rōna. (1 Johanne 4:9) Joang?

Ka hore re se lahleheloe ke morero oa mosa o sa tšoanelang oa Molimo. Hoa tšoana feela joaloka ha ho ne ho le joalo ka bahlanka bao ba pele ba Jehova, hore re lokela ho nka borapeli ba ’nete. Kajeno, joaloka mehleng ea Pauluse, sena se bolela hore re lokela “ho bolela har’a balichaba litaba tse molemo tsa . . . Kreste.” (Ba-Efese 3:8, NW) Ka baka leo, bohle ba amohelang mosa o sa tšoanelang oa Molimo ba tlameha ho nka karolo tšebeletsong ea Bokreste. Sena se bolela hore re le bahlanka ba inehetseng ba Jehova Molimo, re na le boikarabelo ba ho totobaletsa ba bang ’nete, ho hōlisa le ho rorisa lebitso la Molimo, le ho mo sebeletsa ka borapeli bo hloekileng le bo halalelang.—Mattheu 28:19, 20; Ba-Heberu 13:15; Jakobo 1:27.

‘U Se Ke Ua Lahleheloa ke Morero oa Oona’

Na ho bonolo hore leha e le mang oa rōna, joaloka Bakreste bao ba pele, o kotsing ea ‘ho lahleheloa ke morero’ oa mosa o sa tšoanelang oa Molimo? E. Joaloka bona, ba bangata ba rōna, mosebetsing kapa sekolong, ba tlameha ho tsoakana le batho ba sebelisang boitšoaro bo bobe ba botona le botšehali, bosholu, leshano, le ho qhekella, le lintho tse ling tseo e leng manyala ho Jehova Molimo. (1 Ba-Korinthe 6:9, 10; Ba-Galata 5:19-21) Ka hona ke habohlokoa ho qoba ho kopana le batho ba joalo, esere ra qala ho lakatsa se sebe. (1 Ba-Korinthe 15:33) Litloaelano tse joalo li ka ba le phello e thefulang tumelo ea rōna feela. Ka ho loketseng, Pauluse o ile a ngolla Tite: “Hobane mosa o sa tšoanelang oa Molimo o tlisetsang batho ba mefuta eohle poloko, o bonahalitsoe, o re laea hore re hane ho hloka bomolimo le litakatso tsa lefatše le hore re phele ka kelello e hlaphohileng le ho loka le boinehelo ba bomolimo har’a tsamaiso ena ea hona joale ea lintho.”—Tite 2:11, 12, NW.

Ba bang ba ka ’na ba nahana hore ba phetha tšebeletso ea bona ha ba ba teng libokeng Holong ea ’Muso, ba kopanela kamehla ho bolela litaba tse molemo tsa ’Muso oa Molimo, ’me ba sa amehe mokhoeng leha e le ofe oa boitšoaro bo bobe. Leha ho le joalo, ho na le ntlha e ’ngoe eo ho lokeloang ho nahanoa ka eona. Jesu o itse: “Ha ho motho ea ka tsebang ho sebeletsa marena a mabeli.” (Mattheu 6:24) O ne a bolela eng? Hore le hoja re nehelana ka nako ea rōna e itseng ho ntšetsa pele litaba tse molemo, ho bonolo hore thahasello ea rōna e khōlō bophelong e ka ba eona ea ho lelekisa haholoanyane lintho tse bonahalang. Ke ’nete hore re ka ’na ra fumana tebello ea tsamaiso e ncha ea lintho tlas’a Kreste Jesu e ipiletsa kannete, empa ka nako e tšoanang re ka ’na ra batla ho fumana lintho tse molemohali tsa tsamaiso ena ha e sa tšoarelletse. Boikutlo bo joalo bo ka re behella ka thōko ho morero oa sebele oa topollo ea rōna. Na e ne e se bona boikutlo bo tšoanang mabapi le telekiso ea lintho tse bonahalang bo ileng ba khelosa Bajode ba khutlileng hore ba phethahatse morero oa topollo ea bona?

Na mesebetsi ea rōna e bontša hore re lahlehetsoe ke morero oa topollo ea rōna tsamaisong ee ea khale e khopo le bolumeling ba eona ba bohata? Pauluse o ile a bolella Bakorinthe hore “joale ke nako e tšoanelang” ho thusa ba bang ho fumana pholoho. (2 Ba-Korinthe 6:2) Kajeno ho na le ho potlaka ho hoholoanyane haholo mantsoeng a Pauluse ka timetso e atamelang ea tsamaiso ena e khopo e haufi haholo. Ha ho totobetse hore boholo ba ba eang kerekeng kajeno ba ikhethela ho se abelane tumelo ea bona le ba bang, Bakreste ba bontšang lerato la ’nete ho Jehova Molimo ba tla ho nka e le tokelo ho kopanela ka ho tletseng tšebeletsong ea Bokreste eo a ba abetseng eona. Bohle bao ka botšepehi ba bolelang litaba tse molemo nakong ena e tšoanelang ’me ba sebeletsa Jehova ka borapeli bo hloekileng le bo halalelang ba ka etsa joalo ka kholiseho ea hore ha ‘baa amohela mosa o sa tšoanelang oa Molimo eaba ba lahleheloa ke morero oa oona.’—2 Ba-Korinthe 6:1.