Jehova o Fana ka ‘Moea o Halalelang ho ba mo Kōpang’
“Haeba lōna, le hoja le le khopo, le tseba ho fa bana ba lōna limpho tse ntle, Ntate ea leholimong o tla fana ka moea o halalelang hakaakang ho ba mo kōpang!”—LUKA 11:13.
1. Ka ho khetheha re hloka thuso ea moea o halalelang neng?
‘NKE ke ka mamella teko ena ka bonna. Nka e mamella feela ka thuso ea moea o halalelang!’ Na u kile ua bua mantsoe a joalo a tsoang botebong ba pelo? Bakreste ba bangata ba kile ba a bua. Mohlomong u ile ua a bua ka mor’a ho tseba hore u tšoeroe ke lefu le tšabehang. Kapa e ka ’na eaba u ile ua a bua joalo ha molekane oa hao oa lenyalo oa bophelo bohle a ne a robala lefung. Kapa mohlomong ke ha thabo eo u neng u e-na le eona e ne e fela ka lebaka la ho sithabela maikutlo. Linakong tseo ka tsona ho neng ho le thata bophelong, mohlomong u ile ua elelloa hore u phonyohile hobane feela moea o halalelang oa Jehova o u file “matla a fetang se tloaelehileng.”—2 Bakorinthe 4:7-9; Pesaleme ea 40:1, 2.
2. (a) Bakreste ba ’nete ba tobana le mathata afe? (b) Sehloohong see re tla tšohla lipotso life?
2 Bakreste ba ’nete ba lokela ho sebetsana le khatello le khanyetso e ntseng e e-hloa mekoalaba lefatšeng la kajeno la batho ba sa tšabeng Molimo. (1 Johanne 5:19) Ho feta moo, balateli ba Kreste ba hlaseloa ke Satane Diabolose ka boeena, ea loanang ea khumamela le “ba bolokang litaelo tsa Molimo ’me ba e-na le mosebetsi oa ho paka ka Jesu.” (Tšenolo 12:12, 17) Kahoo, ha ho makatse hore ebe re hloka ho tšehetsoa ke moea oa Molimo hona joale ho feta leha e le neng pele. Re ka etsa’ng ho tiisa hore re lula re fumana moea o halalelang oa Molimo ka bongata? Hona ke hobane’ng ha re ka kholiseha hore ka sebele Jehova o ikemiselitse ho re fa matla a hlokahalang ha re hlaheloa ke liteko? Lipapiso tse peli tsa Jesu li araba lipotso tsena.
Qophella Thapelong
3, 4. Jesu o ile a pheta papiso efe, hona o ile a bontša joang hore e amana le thapelo?
3 Ka nako e ’ngoe morutuoa e mong oa Jesu o ile a mo kōpa: “Morena, re rute ho rapela.” (Luka 11:1) Ha Jesu a araba, o ile a phetela barutuoa ba hae lipapiso tse peli tse amanang. Ea pele e mabapi le monna ea amohetseng moeti, ’me ea bobeli e mabapi le ntate ea mamelang mora oa hae. A re ke re hlahlobeng papiso ka ’ngoe ho tsena tse peli.
4 Jesu o ile a re: “Ke mang ho lōna ea nang le motsoalle ea tla ea ho eena har’a mp’a bosiu ’me a re ho eena, ‘Motsoalle, nkalime mahobe a mararo, hobane motsoalle oa ka o sa tsoa tla ho ’na a le leetong ’me ha ke na letho leo nka le behang ka pel’a hae’? Eo ea ka hare ha a araba a re, ‘Khaotsa ho nkhathatsa. Monyako o se o notletsoe, ’me bana ba ka ba banyenyane ba na le ’na liphateng; nke ke ka tsoha ’me ka u fa letho.’ Kea le bolella, Le hoja a ke ke a tsoha le ho mo fa letho kahobane e le motsoalle oa hae, ka sebele ka lebaka la ho qophella ha hae ho sebete o tla tsoha ’me a mo fe lintho tseo a li hlokang.” Eaba Jesu o hlalosa hore na papiso ena e sebetsa joang tabeng ea thapelo ha a re: “Ka lebaka leo ke re ho lōna, Le ’ne le kōpe, ’me le tla fuoa; le ’ne le batle, ’me le tla fumana; le ’ne le kokote, ’me le tla buleloa. Etsoe e mong le e mong ea kōpang oa amohela, ’me e mong le e mong ea batlang oa fumana, ’me e mong le e mong ea kokotang o tla buleloa.”—Luka 11:5-10.
5. Papiso ee ea monna ea leqoophe e re ruta eng mabapi le boikutlo ba rōna ha re rapela?
5 Papiso ena e hlakileng ea monna ea leqoophe e bontša hore na re lokela ho ba le boikutlo bofe ha re rapela. Hlokomela hore Jesu o re monna eo o atleha ho fumana seo a se hlokang “ka lebaka la ho qophella ha hae ho sebete.” (Luka 11:8) Poleloana e reng ‘ho qophella ho sebete’ e hlaha hang feela ka Bibeleng. E fetoletsoe ho tsoa lentsoeng la Segerike leo ka ho toba le bolelang “ho se hlajoe ke lihlong.” Hangata poleloana e reng ho se hlajoe ke lihlong e bolela mokhoa o mobe. Leha ho le joalo, ha motho a bontša ho se hlajoe ke lihlong kapa ho qophella ka mabaka a utloahalang, e ka ba tšobotsi e babatsehang. Motho ea neng a amohetse moeti papisong ena o ne a le joalo. Ho hang ha a hlajoe ke lihlong ka ho qophella ho kōpa seo a se hlokang. Kaha Jesu o bua ka motho enoa ea amohetseng moeti e le mohlala oa rōna, le rōna re lokela ho qophella thapelong. Jehova o batla hore ‘re ’ne re kōpe, re ’ne re batle, re ’ne re kokote.’ Tumellanong le seo o tla “fana ka moea o halalelang . . . ho ba mo kōpang.”
6. Mehleng ea Jesu, batho ba ne ba talima ho amohela baeti ka mofuthu joang?
6 Jesu ha a re bolelle tsela eo re lokelang ho rapela ka eona feela—e leng ka ho qophella ho sebete—empa hape o re bolella hore na ke hobane’ng ha re lokela ho etsa joalo. E le hore re utloisise thuto ena ka ho hlaka, re lokela ho utloisisa hore na ba neng ba mametse papiso ea Jesu ea monna ea leqoophe ea amohetseng moeti ba ne ba ikutloa joang ka ho amohela baeti ka mofuthu. Ho na le litlaleho tse ngata ka Mangolong tse bontšang hore batho ba mehleng ea Bibele, haholo-holo bahlanka ba Molimo, ba ne ba talima ho hlokomela baeti e le ntho ea bohlokoa hakae. (Genese 18:2-5; Baheberu 13:2) Ho hlōleha ho amohela baeti ka mofuthu e ne e le mahlabisa-lihlong. (Luka 7:36-38, 44-46) Re nahanne ka seo, a re ke re hlahlobeng pale ea Jesu hape.
7. Ke hobane’ng ha monna ea amohetseng moeti papisong ea Jesu a sa hlajoe ke lihlong ho tsosa motsoalle oa hae?
7 Har’a mpa ea bosiu monna eo o amohela moeti. O ikutloa a tlamehile ho ngoathela moeti oa hae empa ‘ha a na letho leo a ka le behang ka pel’a hae.’ Ho ea ka eena, boemo bona ke ba tšohanyetso! Joang kapa joang o lokela ho fumana bohobe. Kahoo o ea ho motsoalle oa hae ebile ha a hlajoe ke lihlong ho mo tsosa. Oa ipiletsa, “Motsoalle, nkalime mahobe a mararo.” O mo qophella ho fihlela a fumane seo a se hlokang. Ke hafeela a ka tla a e-na le mahobe ao, moo ho ka thoeng o amohetse moeti eo ka mofuthu.
Ha re o Hloka Haholo—Re Tla o Kōpa Haholo
8. Ke eng e tla re susumelletsa ho qophella thapelong ha re kōpa moea o halalelang?
8 Papiso ee e bontša eng mabapi le lebaka leo ka lona re qophellang thapelong? Monna eo o ile a ’na a kōpa bohobe hobane o ne a nka hore ho ba le mahobe ao ho ne ho hlile ho hlokahala e le hore a ka phetha boikarabelo ba hae ba ho amohela moeti. (Esaia 58:5-7) O ne a tla be a hlōlehile ho phetha boikarabelo ba hae haeba a ne a se na bohobe. Ka ho tšoanang, kaha le rōna rea elelloa hore ruri ke habohlokoa ho ba le moea o halalelang oa Molimo e le hore re ka phetha tšebeletso eo rōna re le Bakreste ba ’nete re e etsang, re lula re rapela Molimo, re mo kōpa hore a re fe moea oo. (Zakaria 4:6) Haeba re se na moea oo, re tla hlōleha ho phetha boikarabelo ba rōna. (Matheu 26:41) Na ua bona hore na re ka etsa qeto efe ea bohlokoa mabapi le papiso ee? Haeba re nka moea oa Molimo e le ntho ea bohlokoa ka ho fetisisa eo re e hlokang, re tla hle re qophelle ha re o kōpa.
9, 10. (a) Etsa papiso ea hore na ke hobane’ng ha re lokela ho qophella ha re kōpa Molimo hore a re fe moea oa hae. (b) Ke potso efe eo re lokelang ho ipotsa eona, hona hobane’ng?
9 Hore u utloisise thuto ea papiso ena ho latela maemo a mehleng ea kajeno a bophelo, ak’u nahane ha e mong oa litho tsa lelapa a ka kula har’a mp’a bosiu. Na u ne u tla tsosa ngaka hore e tl’o u thusa? U ke ke ua e tsosa haeba mokuli a lla ka boloetsenyana bo ka iphollang. Empa, haeba a tšoaroe ke lefu la pelo, u ke ke ua hlajoa ke lihlong ho bitsa ngaka. Hobane’ng? Hobane bona ke boemo ba tšohanyetso. Ua hlokomela hore ruri ho hlokahala thuso ea motho ea nang le boiphihlelo. Mokuli eo a ka shoa haeba u sa kōpe thuso. Ka ho tšoanang, ho joalokaha eka Bakreste ba ’nete ba tobana le maemo a joalo a tšohanyetso ka linako tsohle. Ha e le hantle, Satane o solla joaloka “tau e purumang,” e lekang ho re harola. (1 Petrose 5:8) E le hore re lule re phetse moeeng, ka sebele ho hlokahala thuso ea moea oa Molimo. Ho se kōpe Molimo hore a re thuse ho ka re bolaea. Kahoo re qophella ka sebete ho kōpa Molimo hore a re fe moea oa hae o halalelang. (Baefese 3:14-16) Ke ka ho etsa joalo feela re ka lulang re e-na le matla a hlokahalang a ho ‘mamella ho fihlela bofelong.’—Matheu 10:22; 24:13.
10 Kahoo, ke habohlokoa hore ka linako tse ling re ke re eme ’me re ipotse, ‘Bonneteng, ke qophella hakae lithapelong tsa ka?’ Hopola hore ha re utloisisa ka botlalo hore re hloka thuso ea Molimo, re tla hle re qophelle ha re kōpa moea o halalelang lithapelong tsa rōna.
Ke Eng e re Susumelletsang ho Rapela ka Sebete?
11. Jesu o ile a bontša joang hore papiso ea ntate le mor’a hae e amana le thapelo?
11 Papiso ea Jesu ea motho ea leqoophe ea nang le moeti e hatisa boikutlo ba ea rapelang kapa molumeli. Papiso e latelang e bontša boikutlo ba Jehova Molimo, ea utloang lithapelo. Jesu o ile a botsa: “Ka sebele, ke ntate ofe har’a lōna eo, haeba mora oa hae a kōpa tlhapi, mohlomong a ka mo nehang noha ho e-na le tlhapi? Kapa haeba a boetse a kōpa lehe, a tla mo neha phepheng?” Jesu o ile a tsoela pele ho bontša hore na papiso eo e amana le eng ha a re: “Ka hona, haeba lōna, le hoja le le khopo, le tseba ho fa bana ba lōna limpho tse ntle, Ntate ea leholimong o tla fana ka moea o halalelang hakaakang ho ba mo kōpang!”—Luka 11:11-13.
12. Papiso ea Jesu ea ntate ea mamelang kōpo ea mora oa hae e bontša joang hore Jehova o ikemiselitse ho arabela lithapelo tsa rōna?
12 Jesu o ile a sebelisa papiso ena ea ntate ea arabelang kōpo ea mor’a e le ha a hlakisa hore na Jehova o ikutloa joang ka ba mo rapelang. (Luka 10:22) Ntlha ea pele, hlokomela phapang pakeng tsa lipapiso tsena tse peli. Ho fapana le monna oa papisong ea pele ea neng a le leqe ho thusa ea kōpang thuso, Jehova o joaloka motsoali ea tsotellang, ea labalabelang ho thusa ngoana oa hae ea kōpang thuso. (Pesaleme ea 50:15) Ho feta moo, ha Jesu a re behela mabaka a bontšang hore Jehova o ikemiselitse ho re thusa, o bapisa ntate oa lefatšeng le Ntate ea phahameng oa leholimo. O re haeba ntate oa lefatšeng, le hoja a “le khopo” ka lebaka la boetsalibe boo a bo futsitseng, a fa mor’a hae mpho e ntle, ruri re lokela ho lebella hore kaha Ntate oa rōna oa leholimo o molemo, o tla fa barapeli ba hae moea o halalelang!—Jakobo 1:17.
13. Re ka kholiseha ka eng ha re rapela Jehova?
13 Re ithuta eng? Re ka kholiseha hore ha re kōpa moea o halalelang ho Ntat’a rōna oa leholimo, ka sebele o ikemiselitse ho re fa seo re se kōpang. (1 Johanne 5:14) Haeba khafetsa re rapela Jehova, le ka mohla, ho ke ke ha e-ba joalokaha eka o re: “Khaotsa ho nkhathatsa. Monyako o se o notletsoe.” (Luka 11:7) Ho e-na le hoo, Jesu o ile a re: “Le ’ne le kōpe, ’me le tla fuoa; le ’ne le batle, ’me le tla fumana; le ’ne le kokote, ’me le tla buleloa.” (Luka 11:9, 10) Ka sebele, Jehova “o tla re araba letsatsing leo re hooang ka lona.”—Pesaleme ea 20:9; 145:18.
14. (a) Batho ba bang ba hlaheloang ke liteko ba na le maikutlo afe a fosahetseng? (b) Ha re hlaheloa ke liteko, ke hobane’ng ha re lokela ho rapela Jehova ka kholiseho?
14 Papiso ea Jesu ea ntate ea tsotellang ngoana oa hae e boetse e hatisa hore molemo oa Jehova o moholo ho feta molemo oo motsoali leha e le ofe oa lefatšeng a ka o bontšang. Kahoo, ha ho le ea mong oa rōna ea lokelang ho nka hore liteko tse re hlahelang e tlameha ebe ke pontšo ea hore ha rea thabisa Molimo. Sera sa rōna se seholo Satane, ke sona se batlang hore re ikutloe joalo. (Jobo 4:1, 7, 8; Johanne 8:44) Ha ho na mabaka a Mangolo a hore re be le maikutlo a joalo a ho ikahlola. Jehova ha a re leke “ka lintho tse mpe.” (Jakobo 1:13.) Ha a re fe teko e tšoanang le noha kapa e tšoanang le phepheng. Ntate oa rōna oa leholimo o fana ka “lintho tse molemo . . . ho ba mo kōpang.” (Matheu 7:11; Luka 11:13) Ruri ha re hlile re utloisisa hore Jehova o molemo ebile o ikemiselitse ho re thusa, seo se tla hle se re susumelletse ho mo rapela ka kholiseho. Ha re etsa joalo, le rōna re tla khona ho bua mantsoe a tšoanang le a mopesaleme ea ileng a re: “Kannete Molimo o utloile; o etse hloko lentsoe la thapelo ea ka.”—Pesaleme ea 10:17; 66:19.
Kamoo Moea o Halalelang e Leng Mothusi oa Rōna
15. (a) Jesu o ile a tšepisa eng mabapi le moea o halalelang? (b) Moea o halalelang o re thusa ka tsela efe e ’ngoe?
15 Nakoana pele ho lefu la hae, Jesu o ile a pheta tšepiso eo a neng a e entse lipapisong tsa hae. Ha a bua ka moea o halalelang, o ile a re ho baapostola ba hae: “Ke tla kōpa Ntate ’me o tla le fa mothusi e mong hore a be le lōna ka ho sa feleng.” (Johanne 14:16) Kahoo, Jesu o ile a tšepisa hore mothusi kapa moea o halalelang, o ne o tla ba le balateli ba hae ba nakong e tlang, ho akarelletsa le ba mehleng ea rōna. Ke tsela efe e ’ngoe e ikhethang eo ka eona moea oo o re tšehetsang kajeno? Moea o halalelang o re thusa ho mamella liteko tse sa tšoaneng. Joang? Moapostola Pauluse, eo ka ho toba a ileng a hlaheloa ke liteko, o ile a hlalosa lengolong le eang ho Bakreste ba Korinthe kamoo moea oa Molimo o ileng oa mo thusa kateng. Ka bokhutšoanyane feela a re hlahlobeng seo a ileng a se ngola.
16. E ka ’na eaba boemo ba rōna bo tšoana le ba Pauluse joang?
16 Ntlha ea pele, Pauluse o ile a bolella balumeli-’moho le eena ka bolokolohi hore o ne a sebetsana le teko ea mofuta o itseng, eo a reng ke “moutloa nameng.” Eaba o re: “Ke ile ka kōpa Morena [Jehova] ka tieo ka makhetlo a mararo mabapi le sena e le hore o ka tloha ho ’na.” (2 Bakorinthe 12:7, 8) Le hoja Pauluse a ile a kōpa Molimo hore a tlose mahlomola a hae, a ile a lula a le teng. Mohlomong kajeno u tobane le boemo bo tšoanang. E ka ’na eaba joaloka Pauluse u ile ua qophella ho rapela u bile u kholisehile, u kōpa Jehova hore a tlose teko eo. Leha ho le joalo, ho sa tsotellehe likōpo tsa hao tse tiileng, u sa ntse u e-na le bothata boo. Na see se bolela hore Jehova ha aa araba lithapelo tsa hao le hore moea oa hae ha o u thuse? Le hanyenyane! (Pesaleme ea 10:1, 17) Hlokomela hore na moapostola Pauluse o ile a phaella ka ho re’ng.
17. Jehova o ile a araba lithapelo tsa Pauluse joang?
17 Ha Molimo a araba lithapelo tsa Pauluse, o ile a re ho eena: “Mosa oa ka o sa tšoanelang o u lekane; kaha matla a ka a ntse a etsoa a phethahetseng bofokoling.” Pauluse o ile a re: “Ka hona, ho e-na le hoo ka nyakallo e khōlō ke tla ithorisa mabapi le mefokolo ea ka, e le hore matla a Kreste a ka lula holim’a ka joaloka tente.” (2 Bakorinthe 12:9; Pesaleme ea 147:5) Kahoo, ka Kreste, Pauluse o ile a sireletsoa ka tšireletso ea Molimo e matla joalokaha eka ho aliloe tente holim’a hae. Kajeno, Jehova o araba lithapelo tsa rōna ka tsela e tšoanang. Ho joalokaha eka o ala sekhurumetso ho sireletsa bahlanka ba hae.
18. Ke hobane’ng ha re khona ho mamella liteko?
18 Ke ’nete hore tente ha e thibele pula ho na kapa lifefo ho puputla, empa e sireletsa batho ka tsela e itseng linthong tseo. Ka ho tšoanang, tšireletso eo re e fumanang ka “matla a Kreste” ha e thibele hore re se ke ra hlaheloa ke liteko kapa ho hlaseloa ka mathata. Empa e re sireletsa moeeng ha re hlaseloa ke lintho tse kotsi tsa lefatše lena le ha re hlaseloa ke ’musi oa lona, Satane. (Tšenolo 7:9, 15, 16) Kahoo, esita le haeba u loana le teko e itseng ‘e sa tloheng ho uena,’ u ka kholiseha hore Jehova o elelloa mathata a hao ebile o arabetse ha “mohoo oa hao o utloahala.” (Esaia 30:19; 2 Bakorinthe 1:3, 4) Pauluse o ile a ngola tjena: “Molimo oa tšepahala, ’me a ke ke a le tlohela hore le lekoe ho feta seo le ka se jarang, empa hammoho le moleko o tla boela a le bulele tsela ea ho tsoa e le hore le khone ho o mamella.”—1 Bakorinthe 10:13; Bafilipi 4:6, 7.
19. Re ikemiselitse ho etsa’ng, hona hobane’ng?
19 Ke ’nete hore ‘matsatsi a kajeno a ho qetela’ a lefatše lena le sa tšabeng Molimo a tsebahala ka “linako tse mahlonoko tseo ho leng thata ho sebetsana le tsona.” (2 Timothea 3:1) Leha ho le joalo, hase hore bahlanka ba Molimo ba ke ke ba sebetsana le linako tsena. Hobane’ng? Ka lebaka la tšehetso le tšireletso ea moea oa Molimo o halalelang, oo ka ho rata le ka seatla se bulehileng, Jehova a o fang bohle ba mo kōpang oona ka ho qophella le ka kholiseho. Kahoo, e se eka re ka ikemisetsa ho lula re rapella moea o halalelang letsatsi le leng le le leng.—Pesaleme ea 34:6; 1 Johanne 5:14, 15.
U ka Araba Joang?
• Re lokela ho etsa’ng e le hore re fumane moea o halalelang oa Molimo?
• Ke hobane’ng ha re ka kholiseha hore Jehova o tla arabela lithapelo tsa rōna ha re kōpa moea o halalelang?
• Moea o halalelang o re thusa joang hore re mamelle liteko?
[Setšoantšo se leqepheng la 21]
Re ka ithuta eng papisong ea Jesu ea monna ea leqoophe ea nang le moeti?
[Setšoantšo se leqepheng la 22]
Na u qophella thapelong ha u kōpa moea o halalelang?
[Setšoantšo se leqepheng la 23]
Papisong ea Jesu ea ntate ea tsotellang, re ithuta eng ka Jehova?