‘Tsoelang Pele ho Lokisoa’

“NA U kholisehile hore ha re na ho hlōleha ho fihla ho sona?” Moeti e mong ea palameng sekepe o ile a lebisa potso eo ea hae ho moqhobi oa pele oa sekepe. Ha sekepe sena se senyenyane se tsokotseha ’me se akhotsoa ke maqhubu a maholo a Kapa a tummeng hampe a Atlantic Boroa, ho eena ho ne ho bonahala hore e ne e tla ba mohlolo haeba ba ne ba ka fihla sebakeng se senyenyane se kang letheba ’mapeng seo ba neng ba e-ea ho sona.

Kahoo, moqhobi enoa oa pele o ile a ’mitsetsa karolong ea sekepe eo baqhobi ba emang ho eona ’me a hlalosa mosebetsi oa litšepe tse tsamaisang sekepe—li-gyro compass, tšepe e bontšang ha sekepe se seng se e-tla, litšepe tse amohelang melaetsa ea boitsebiso bo bolelang sebaka seo sekepe se leng ho sona, esita le tšepe e tloaelehileng e lekanyang bohōle ba sona le lefatše. Le hoja litlhaloso tsa botsebi li ne li batla li phahametse kutloisiso ea hae, o ile a ba a utloisisa molao-motheo oa tsamaiso ea sekepe: mokhoa oa ho lokisa tsela eo se e nkileng. A thusoa ke kere e tsamaisang sekepe, molaoli oa sekepe o ne a ka hlōla litšusumetso tse matla tsa metsi a leoatle le moea ka ho etsa litokiso nako le nako. Ka ntle ho litokiso tse joalo, ba ne ba tla hlōleha ho fihla sebakeng seo ba eang ho sona ka lik’hilomithara tse ngata.

Bakreste ba tšoana le likepe tse leoatleng la batho. Pakane ea rōna ke hore re tle re ‘fihleloe ke eena [Jehova] re e-na le khotso, re se na letheba le sekoli.’ (2 Petrose 3:14) Empa joaloka sekepe, ho na le matla—a ka hare le a ka ntle—a atisang ho re tlosa tseleng e nepahetseng. Kahoo, mantsoe a moapostola Pauluse ho Bakorinthe ke a loketseng hakaakang: “Re rapella sena, hore le lokisoe. . . . Tsoelang pele ho . . . lokisoa.”—2 Ba-Korinthe 13:9, 11, NW.

Seo Tokiso e se Akarelletsang

Lentsoe la Segerike le fetoletsoeng mona e le “lokisa” le bolela ho tlisa ntho e ’ngoe “boemong bo nepahetseng.” (Bona mongolo o botlaaseng ba leqephe ho Reference Bible.) Litemaneng tse ling tsa Bibele, le sebelisetsoa ho hlalosa ho tsosolosetsa ntho e ’ngoe boemong bo nepahetseng. Ka mohlala, ho Mattheu 4:21, lentsoe le tšoanang le sebelisitsoe ho hlalosa “ho lokisa” matlooa. (Kingdom Interlinear) Kahoo, ho lokisoa ha Bakreste ho bolela eng?

Nahana ka Bakreste ba Korinthe bao Pauluse a neng a ba ngolla. Lengolong leo a neng a ba ngoletse lona pele, Pauluse o ile a supa maemo a mangata a sa nepahalang a neng a le teng ka phuthehong: mekha, ho tlohella boitšoaro bo bobe ba botona le botšehali, linyeoe pakeng tsa baena, ho se hlomphe Sejo sa Morena sa Mantsiboea, esita le liboka tse se nang taolo. (1 Ba-Korinthe 1:10-13; 5:1; 6:1; 11:20, 21; 14:26-33) Kahoo Bakorinthe ba ne ba hloka ho “lokisa” boemo moo, ke hore, ho bo tlisa “boemong bo nepahetseng” ka melao-motheo ea Molimo.

Lengolo la bobeli la Pauluse le eang ho bona le bontša hore ba ile ba etsa sona seo. (2 Ba-Korinthe 7:11) Leha ho le joalo, Pauluse o ne a tseba hore likhatello tse hlahang lefatšeng, tse hlahang ho Satane, le tse hlahang tšekamelong ea bona ea nama li ne li tla tsoela pele ho ba ntšetsa ka thōko ho tsela e nepahetseng nako le nako. Kahoo, ka ho loketseng o ile a ba eletsa hore ba ‘tsoele pele ho lokisoa.’

Tlhokahalo ea ho Lokisoa Kajeno

Kajeno Lipaki tsa Jehova li tlameha ho tsoela pele ho ’na li lokisoa ka mokhoa o tšoanang. Satane Diabolose oa re “loantša,” o sebetsa ka matla a maholo ho senya botšepehi ba rōna. (Tšenolo 12:17; Ba-Efese 6:12) Hape re pota-potiloe ke tsamaiso ea lintho ea lefatše lohle e sebetsang “ho latela ’musi oa matla a moea.” E ka ’na eaba batho bao re sebetsang le bona le bao re kenang sekolo le bona ke ba ‘itšoereng ka tsela e lumellanang le litakatso tsa nama ea bona, ba etsa lintho tse ratoang ke nama.’ (Ba-Efese 2:2, 3, NW) Hape re loana ntoa e sa khaotseng le litšekamelo tsa rōna tse futsitsoeng tsa boetsalibe. (Ba-Roma 7:18-25) Ka ntle le hore re lokisoe nako le nako, re ne re ka sutumeletsoa ka thōko ho tsela e nepahetseng habonolo.

Phihlelo ea moapostola Petrose e hlakisa sena hantle. Ka mor’a ho tsebahatsa Jesu ka nepo e le “Kreste, Mor’a Molimo o phelang,” Petrose o ile a babatsoa ka mantsoe ana: “U lehlohonolo, Simone, mor’a Jona; hobane hase nama le mali a u koaholletseng hoo, empa e le Ntate ea maholimong.” (Mattheu 16:16, 17) Ka ho hlakileng, monahano oa Petrose o ne o le tseleng e nepahetseng. Empa, ka mor’a hore ho fete nakoana e akaretsoang ke litemana tse tšeletseng tse latelang, Jesu o ile a lokela ho mo khalemela ka matla! Ha a utloa hore Kreste o ne a tla ‘utloisoa bohloko bo boholo . . . ’me a bolaoe,’ Petrose o ile a phehella Jesu: “Morena, u ikutloele bohloko: tse joalo li ke ke tsa u hlahela.” Ka potlako Jesu o ile a arabela: “Tloha ho ’na, Satane, u khopiso ho ’na, hobane ha u utloe tsa Molimo, u utloa tsa batho feela.”—Mattheu 16:21-23.

Petrose o ne a nahanne ka pono ea nama. Mehopolo ea hae le boikutlo li ne li hloka ho lokisoa. Na ha ho etsahale ho tšoanang ho rōna bohle nako le nako? Na ha re atise ho bona lintho ka pono ea rōna ho e-na le ho li bona ka pono ea Molimo? Kahoo, nako le nako re hloka ho lokisoa. Joaloka sekepe se leoatleng, ka linako tse ling litokiso tse joalo e ka ’na ea e-ba tse nyenyane, tse batlang li sa hlokomelehe. Empa li ka ’na tsa bolela phapang pakeng tsa ho fihla moo re eang le ho robeheloa ke sekepe sa moea. Ka sebele, tokiso e nyenyane hona joale e ka ’na ea re qobisa ho etsa litokiso tse khōlō—mohlomong tse bohloko—hamorao.

Litekanyetso tsa Molimo

Haeba lisebelisoa tse tsamaisang sekepe li sa lekanyetsoa ka mokhoa o nepahetseng, ho ke ke ha etsoa litokiso tse nepahetseng tsa tsela. Ka ho tšoanang, hore re tle re boloke bophelo ba rōna tseleng e nepahetseng, re hloka tataiso e nepahetseng ea Lentsoe la Molimo, Bibele. “Mangolo ’ohle a ngotsoe ka tšusumetso ea Moea oa Molimo, ’me a na le thuso ea ho ruta, ea ho nyatsa, ea ho busetsa batho tseleng ea ho loka.” (2 Timothea 3:16, BPN) Lentsoe leo le bululetsoeng le hlakisa litekanyetso tsa Molimo tsa boitšoaro le tsa monahano. Ho le bala ka mehla ke habohlokoa bakeng sa ho latela “mehlaleng ea ho loka.”—Pesaleme ea 23:3.

Tataiso e eketsehileng e hlaha ho sehlopha sa “mohlanka ea khabane, ea bohlale” sa Bakreste ba tlotsitsoeng. Bana ba ’nile ba thusoa ke moea oa Jehova ho utloisisa thato ea hae ka mokhoa o tsoelang pele. (Mattheu 24:45-47; Liproverbia 4:18) Kahoo, ha tataiso e hlaha ho mokhatlo o hlophisitsoeng oa Jehova, ka bohlale re ka ikokobeletsa eona, re tseba ka ho felletseng hore thato ea Jehova e tla re lebisa feela tseleng e tla re tsoela molemo oa ka ho sa feleng.—Esaia 48:17, NW.

Leha ho le joalo, ka linako tse ling re hloka thuso ea botho hore re lule tseleng e nepahetseng. Ho Ba-Galata 6:1 (NW) Pauluse o ile a khothatsa ka matla: “Banab’eso, esita le hoja motho a nka bohato bo bong bo fosahetseng pele a bo hlokomela, lōna ba nang le litšoaneleho tsa moea, lekang ho lokisa motho ea joalo ka moea o bonolo.” Baholo le bahlanka ba sebeletsang ke ba bang ba ba nang le litšoaneleho tse joalo tsa moea. Hangata ba tla re bontša ka ho toba karolo e itseng eo ho hlokahalang hore re etse litokiso ho eona.

Boiteko bo Hlokahalang

Ha ho bonolo ka mehla ho etsa liphetoho tse hlokahalang bophelong ba rōna. Hape, nahana ka Petrose. A tsoetsoe e le Mojode, Petrose o ile a hōla a e-na le pono e fosahetseng e neng e atile ka batho ba merabe e meng. Joalokaha a ile a bolella Molichaba Kornele: “Lea tseba hobane motho oa mo-Jode ha a lumelloe ho kopana le mo-lichaba.” Leha ho le joalo, ka mor’a ho hlokomela hore thato ea Molimo e ne e le hore a arolelane ’nete ea Bokreste le monna enoa le lelapa la hae, Petrose o ile a fihlela qeto ea ho re: “Ke lemoha ka ’nete hore Molimo ha o ee ka tšobotsi ea batho. Empa har’a lichaba tsohle, ea o tšabang, le ea etsang ho lokileng, ke eena ea o khahlisang.”—Liketso 10:28, 34, 35.

Petrose o ile a etsa phetoho e makatsang monahanong oa hae le boikutlong ba hae mabapi le merabe e meng! Empa hoa bonahala hore ho ne ho hlokahala hore a ’ne a tsoele pele ho lokisoa ntlheng ena, hobane lilemo tse seng kae hamorao, Petrose o ile a inehela tlas’a khatello ea metsoalle ’me a qala ho khesa balumeli ba Balichaba. Moapostola Pauluse o ile a tlameha ho mo khalemela, a sebelisa mantsoe a matla ho mo thusa ho lokisa monahano oa hae ka ho eketsehileng!—Ba-Galata 2:11-14.

Ka ho tšoanang kajeno, e ka ’na eaba Mokreste o hōletse tikolohong e nang le khethollo ea morabe. Ka mor’a ho tla ’neteng, kelellong ea hae a ka ’na a lumela hore Molimo ha o ee ka tšobotsi empa a ’na a tšoarella maikutlong a leeme la morabe. Le hoja a sa bontše bora ho batho ba morabe o mong, ho ka ’na ha itlela habonolo feela hore a hopole hore ba na le litšobotsi tse sa lakatseheng ka baka la litšobotsi tsa morabe tseo ba li futsitseng. A ka ’na a leka mamello ea bona ka mesoaso e buang ka morabe oa bona kapa lipolelo tseo ka mehla li lebisang tlhokomelo morabeng, kapa liphapang tsa morabe. A ka ba a hana keletso ea moea e tsoang ho Mokreste oa habo eo, ka lebaka la ho se rutehe kapa ho ba boemong bo tlaase sechabeng, a hlōlehang ho hlalosa maikutlo a hae ka mokhoa o itseng. Ka ho hlakileng, ho tla hlokahala boiteko ba sebele hore motho ea joalo a lokise monahano oa hae hore o lumellane le monahano oa Jehova!a

Empa e-bang taba ke leeme la morabe, lintho tse bonahalang, ho kopanela libokeng tsa botsoalle sekolong le mosebetsing, kapa tlhokahalo ea ho ba teng libokeng tsa Bokreste, re tlameha ho arabela tataisong e fanoang ka Lentsoe la Molimo le mokhatlo oa oona o hlophisitsoeng. Ho se be mohla re ikutloang hore keletso ea bohlokoa ea Mangolo ha e sebetse ho rōna e be rea e hlokomoloha. Hopola seo Baiseraele ba sa tšepahaleng ba ileng ba se bua: “Tsela ea Jehova ha ea loka hantle.” Na hase rōna ba tlamehang ho fetohela litseleng tsa Jehova?—Ezekiele 18:25, NW.

Re thabela hore Jehova o re bontša thahasello e mofuthu tseleng eo re tsamaeang ka eona ka pel’a hae, o fana ka tokiso ka mehla bakeng sa batho ba hae. Ho joalokaha Esaia a ile a profeta: “Litsebe tsa hao li tla utloa lentsoe ka [mor’a] hao, le reng: Tsela ke eona ena, tsamaeang ho eona, e se re la ea ka ho le letona, kapa ka ho le letšehali.” Ha e le rōna, e se eka re ka potlakela ho utloa tataiso e joalo e lerato e tsoang ho Jehova ’me re ‘lule re itokiselitse ho utloa.’ (Esaia 30:21; Jakobo 3:17, NW) E, a re tsoeleng pele ho lokisoa e le hore tsela ea rōna e tle e re lebise pakaneng ea bophelo bo sa feleng kamohelong ea Molimo!

[Mongolo o botlaaseng ba leqephe]