Phehella “Khalalelo ka ho Tšaba Molimo”

HA E bontša hore Jehova Molimo ke eena ea halalelang ka ho fetisisa, Bibele e re: “Oa halalela, oa halalela, oa halalela Jehova.” (Esa. 6:3; Tšen. 4:8) Mantsoe a Seheberu le a Segerike a bolelang “khalalelo” a fana ka moelelo oa bohloeki kapa bohloeki litabeng tsa bolumeli, ho se silafatsoe. Khalalelo ea Molimo e bolela ho phethahala ha hae boitšoarong, hoo a ho nkang e le habohlokoa.

Na Molimo ea halalelang Jehova, o ne a ke ke a lebella hore ba mo rapelang le bona ba halalele, ke hore, ba hloeke ’meleng, boitšoarong le moeeng? Bibele e bolela ka ho hlaka hore Jehova o batla hore batho ba hae ba halalele. Ho 1 Petrose 1:16 rea bala: “Le halalele, hobane kea halalela.” Na batho ba sa phethahalang ba ka hla ba etsisa khalalelo ea Jehova? E, empa eseng ka tsela e phethahetseng. Molimo a ka re nka re halalela haeba re mo rapela re hloekile moeeng re bile re e-na le kamano e haufi le eena.

Joale, re ka ipoloka re hloekile joang lefatšeng le sa hloekang boitšoarong? Re lokela ho qoba mekhoa efe? Ho ka ’na ha hlokahala hore re etse liphetoho life lipuong le boitšoarong? A re ke re boneng hore na re ka ithuta eng tabeng ena ho seo Molimo a neng a hloka hore Bajuda ba neng ba tloha Babylona ba khutlela naheng ea habo bona ka 537 B.C.E. ba se etse.

‘Ho Tla ba le Tsela ea Khalalelo’

Jehova o ile a bolela esale hore batho ba hae ba neng ba le botlamuoeng Babylona ba ne ba tla khutlela naheng ea habo bona. Boprofeta ba tsosoloso bo ile ba ba tiisetsa ho re: “Ka sebele ho tla ba le tsela e khōlō moo, tsela ka boeona; e tla bitsoa Tsela ea Khalalelo.” (Esa. 35:8a) Mantsoe ana a bontša hore Jehova ha aa ka a etsa hore Bajuda ba khutlele ha habo bona feela, empa o ile a boela a ba tiisetsa hore o tla ba sireletsa tseleng.

Jehova o ile a etsa hore ho be le “Tsela ea Khalalelo” bakeng sa bahlanka ba hae ba mehleng ea kajeno ba lefatšeng, e ba ntšang Babylona e Moholo, ’Muso oa lefatše oa bolumeli ba bohata. Ka 1919 o ile a lokolla Bakreste ba tlotsitsoeng bokhobeng ba moea ba bolumeli ba bohata, ’me butle-butle ba tlosa lithuto tsohle tsa bohata borapeling ba bona. Phutheho ea barapeli ba Jehova kajeno ke sebaka se hloekileng, le se khutsitseng moo re ka rapelang Jehova ’me ra ba le le kamano e nang le khotso le eena le ho phelisana ka khotso le batho ba bang.

Ba “mohlatsoana” oa Bakreste ba tlotsitsoeng le “bongata bo boholo” ba “linku tse ling” bo ntseng bo eketseha ba khethile ho tsamaea tseleng ea khalalelo ’me ba mema ba bang hore ba ikopanye le bona. (Luka 12:32; Tšen. 7:9; Joh. 10:16) “Tsela ea Khalalelo” e fumanoa ke bohle ba ikemiselitseng ho ‘hlahisa ’mele ea bona e le sehlabelo se phelang, se halalelang, se amohelehang ho Molimo.’—Bar. 12:1.

“Ea sa Hloekang a ke ke a Feta ho Eona”

Ka 537 B.C.E., ho ne ho e-na le ntho ea bohlokoa eo Bajuda ba neng ba khutlela naheng ea habo bona ba neng ba lokela ho e etsa. Esaia 35:8b e re mabapi le ba tšoanelehang ho tsamaea ‘Tseleng ea Khalalelo’: “Ea sa hloekang a ke ke a feta ho eona. E tla ba bakeng sa ea tsamaeang tseleng, ’me ha ho maoatla a tla lelera ho eona.” Kaha morero oa ho khutlela ha Bajuda Jerusalema e ne e le ho tsosolosa borapeli bo hloekileng, batho ba neng ba e-na le sepheo sa boithati, ba neng ba sa hlomphe lintho tse halalelang, kapa ba neng ba sa hloeka moeeng, ba ne ba ke ke ba amoheleha. Ba khutlileng ba ne ba lokela ho boloka melao e phahameng ea Jehova ea boitšoaro. Ba lakatsang ho amoheloa ke Molimo kajeno ba lokela ho boloka molao o tšoanang. Ba lokela ho phehella “khalalelo ka ho tšaba Molimo.” (2 Bakor. 7:1) Joale, ke mekhoa efe e sa hloekang eo re lokelang ho e qoba?

Moapostola Pauluse o ile a ngola: “Mesebetsi ea nama ea bonahala, ’me ke bohlola, ho se hloeke, boitšoaro bo hlephileng.” (Bagal. 5:19) Bohlola bo bolela mekhoa eohle ea ho kopanela liphate e amanang le ho sebelisa litho tsa botona kapa tsa botšehali ka ntle ho tlamo ea lenyalo. Boitšoaro bo hlephileng bo akarelletsa “ho hloka boitšoaro; ho se laolehe; boitšoaro bo hlabisang lihlong; boitšoaro bo litšila.” Ho totobetse hore bohlola le boitšoaro bo hlephileng li khahlanong le khalalelo ea Jehova. Kahoo, ba tsoelang pele ho etsa lintho tse joalo ha ba lumelloe ho ba karolo ea phutheho ea Bokreste kapa baa khaoloa. Ho joalo le ka ba kopanelang liketsong tsa ho se hloeke ho feteletseng, ke hore, “ho se hloeke ha mofuta o mong le o mong ka meharo.”—Baef. 4:19.

“Ho se hloeke” ke poleloana e akarelletsang libe tse ngata haholo. Lentsoe la Segerike bakeng sa poleloana ena le bolela ho se hloeke kapa litšila tsa mofuta ofe kapa ofe—boitšoarong, lipuong le litabeng tsa moea. Le akarelletsa liketso tseo ho se hloeke ha tsona ho e-s’o fihle boemong ba hore li ka nkeloa bohato ba boahloli.a Empa na batho ba etsang liketso tse sa hloekang joalo ba phehella tsela ea khalalelo?

A re re mohlomong ka lekunutu Mokreste o qala ho shebella litšoantšo tse litšila tse tsosang takatso. Hanyane ka hanyane, ha litakatso tse sa hloekang li tsosoa, boikemisetso ba hae ba hore a lule a hloekile ka pel’a Jehova bo tla fokola. E ka ’na eaba boitšoaro ba hae ha bo e-s’o fihle boemong boo ho ka thoeng ke ho se hloeke ho feteletseng, empa ha a tsoele pele a nahana feela ka ‘lintho life kapa life tse hloekileng, tse buuoang hantle, tse khabane le tse lokeloang ke thoriso.’ (Bafil. 4:8) Litšoantšo tse tsosang takatso li litšila ’me joang kapa joang li senya kamano ea motho le Molimo. Ho se hloeke ha mofuta o mong le o mong ha hoa lokela le ho boleloa har’a rōna.—Baef. 5:3.

Nahana ka mohlala o mong. A re re Mokreste o itloaelitse ho pholla litho tsa botona le botšehali ho ikhotsofatsa, ho sa tsotellehe hore na o etsa sena a shebelletse litšoantšo tse litšila tse tsosang takatso kapa che. Le hoja poleloana “ho pholla litho tsa botona le botšehali ho ikhotsofatsa” e sa hlahe ka Bibeleng, na ha hoa totobala hore ke mokhoa o silafatsang motho kelellong le maikutlong? Na ha motho a tsoela pele a itšilafatsa ka tsela ee, see ha se na ho senya kamano ea hae le Jehova hampe ebe se etsa hore e be ea sa hloekang mahlong a Molimo? A re eleng hloko keletso ea moapostola Pauluse ea hore ‘re itlhatsoe litšila tsohle tsa nama le tsa moea’ ’me re “bolaee litho tsa ’mele ea [rōna] tse lefatšeng mabapi le bohlola, ho se hloeke, takatso ea botona kapa ea botšehali, takatso e kotsi, le ho chacheha ka mohono.”—2 Bakor. 7:1; Bakol. 3:5.

Lefatše lena le busoang ke Satane le lumella boitšoaro bo sa hloekang ebile lea bo khothalletsa. Ho ka ’na ha e-ba thata ho hanela moleko oa ho kopanela boitšoarong bo sa hloekang. Empa Bakreste ba ’nete ha baa lokela ho “tsamaea feela joalokaha lichaba le tsona li tsamaea ho se ruiseng molemo ha likelello tsa tsona.” (Baef. 4:17) Jehova o tla re lumella ho tsoela pele re tsamaea ‘Tseleng ea Khalalelo’ hafeela re qoba boitšoaro bo sa hloekang, ebang ke bo etsoang ka lekunutu kapa che.

“Ho ke ke ha E-ba le Tau Moo”

Ho ka ’na ha hlokahala hore ba bang ba etse liphetoho tse khōlō boitšoarong le lipuong e le hore ba amoheloe ke Molimo ea halalelang, Jehova. Esaia 35:9 e re: “Ho ke ke ha e-ba le tau moo, ’me mofuta o meharo oa libata o ke ke oa tsamaea ho eona,” ke hore, ‘Tseleng ea Khalalelo.’ Ka tsela ea tšoantšetso, batho ba mabifi le ba khahlapetsang ba bang ka liketso le ka lipuo ba bapisoa le libatana. Ho hang ba ke ke ba amoheloa lefatšeng le lecha la Molimo la ho loka. (Esa. 11:6; 65:25) Ka lebaka leo, ke habohlokoa hore ba batlang ho amoheloa ke Molimo ba tlohele mekhoa e joalo ea botho ba bobatana ’me ba phehelle tsela ea khalalelo.

Mangolo aa re eletsa: “Lehloeo le nang le lonya le bohale le khalefo le ho tleroha le puo e nyefolang li ke li tlosoe tsohle ho lōna hammoho le bobe bohle.” (Baef. 4:31) Ho Bakolose 3:8, rea bala: “[Tlosang] kaofela ho lōna, khalefo, bohale, bobe, puo e nyefolang, le puo e nyonyehang melomong ea lōna.” Poleloana e reng “puo e nyefolang” e sebelisitsoeng litemaneng tsena tse peli ha e le hantle e bolela puo e lematsang, e nyelisang, kapa e nyefolang.

Kajeno, puo e utloisang bohloko, e litšila, e se e tloaelehile haholo esita le ka malapeng. Banyalani ba bua mantsoe a hlabang, a sehlōhō, kapa a nyenyefatsang balekane ba bona le bana ba bona. Ho loantšana ka mantsoe ka tsela ena ha hoa lokela ho ba teng malapeng a Bakreste.—1 Bakor. 5:11.

Ho Phehella “Khalalelo ka ho Tšaba Molimo”—Ke Tlhohonolofatso!

Ke tlotla e kaakang ho sebeletsa Molimo ea halalelang, Jehova! (Josh. 24:19) Paradeise ea moea eo Jehova a re kentseng ho eona ke ea bohlokoa haholo. Ka sebele, ho etsa hore boitšoaro ba rōna bo lule ba halalela mahlong a Jehova ke tsela e molemo ka ho fetisisa ea ho phela.

Haufinyane lefatše la Paradeise leo Molimo a le tšepisitseng le tla tla. (Esa. 35:1, 2, 5-7) Ba le labalabelang le ba tsoelang pele ho phehella tsela ea bomolimo ba tla hlohonolofatsoa ka hore ba be teng moo. (Esa. 65:17, 21) Kahoo, a re etseng sohle se matleng a rōna ho tsoela pele re rapela Molimo re hloekile moeeng ’me re lule re e-na le kamano e haufi le eena.

[Mongolo o botlaaseng ba leqephe]

[Setšoantšo se leqepheng la 26]

Ho ne ho hlokahala eng hore Bajuda ba tsamaee ‘Tseleng ea Khalalelo’?

[Setšoantšo se leqepheng la 27]

Litšoantšo tse litšila tse tsosang takatso li senya kamano ea motho le Jehova

[Setšoantšo se leqepheng la 28]

“Ho tleroha le puo e nyefolang li ke li tlosoe tsohle ho lōna”