Le se ke la Tela ho Etsa se Setle
MOAPOSTOLA PETROSE o ile a re khothatsa tjena: “Bolokang boitšoaro ba lōna bo le botle har’a lichaba.” (1 Petrose 2:12) Lentsoe la Segerike le fetoletsoeng e le “se setle” ka linako tse ling le ka hlalosa ntho e “khahlehang, e babatsehang, e hlomphehang, e khabane.” Matsatsing ana, ho ka ’na ha bonahala e le ntho e sa utloahaleng ho lebella hore batho ka kakaretso ba itšoare ka tsela e babatsehang kapa e hlomphehang. Leha ho le joalo, kajeno batho ba Jehova ka kakaretso ba ’nile ba latela keletso ena ea Petrose ka katleho. Ha e le hantle ba tsejoa lefatšeng lohle ka boitšoaro ba bona bo botle.
Ruri sena sea thahasellisa ha re nahana ka matšoenyeho ao re talimaneng le ’ona ‘linakong tsena tse mahlonoko tseo ho leng thata ho sebetsana le tsona.’ (2 Timothea 3:1) Liteko ke lijo tsa rōna tsa letsatsi le letsatsi, ’me tseleng ea bophelo ea Mokreste, khanyetso ke ntho e tloaelehileng. Ho feta moo, le hoja liteko tse ling li nka nako e khutšoanyane, tse ling tsona li hana ho fela, ebile lia tōta. Leha ho le joalo, moapostola Pauluse o ile a re khothatsa tjena: “A re se keng ra tela ho etsa se setle, kaha ka nako e loketseng re tla kotula haeba re sa khathale.” (Bagalata 6:9) Potso feela ke hore, na hoa khoneha ho etsa—le ho tsoela pele re etsa se setle har’a liteko tse sithabetsang hakaale le bora bo sa feleng?
Thuso ea ho Etsa se Setle
Ho hlakile hore ho ba ba “babatsehang, ba hlomphehang, ba khabane” ho ama motho oa ka hare, e leng tšobotsi ea pelo. Kahoo, ho boloka boitšoaro bo le botle har’a liteko le mathata hase ketso ea ho nkeha maikutlo, empa ho hlahisoa ke ho latela le ho sebelisa melao-motheo ea Bibele letsatsi le letsatsi likarolong tsohle tsa bophelo. Ke lintho life tse ka re thusang ntlheng ee? Nahana ka lintlha tse latelang.
E-ba le boikutlo ba kelello ba Kreste. Ho hlokahala boikokobetso e le hore motho a mamelle se ka ’nang sa bonahala e le ho hloka toka. Ho thata hore motho ea inahanang ho tlōla a mamelle tšoaro e mpe. Leha ho le joalo, Jesu “o ile a ikokobetsa ’me a mamela ho isa lefung.” (Bafilipi 2:5, 8) Ka ho mo etsisa, re ke ke ra ‘khathala eaba re felloa ke matla’ tšebeletsong ea rōna e halalelang. (Baheberu 12:2, 3) Itloaetse ho mamela u ikokobelitse ka hore ka boithatelo u sebelisane le ba etellang pele phuthehong ea heno. (Baheberu 13:17) Ithute ho talima ba bang ba u “phahametse,” ka ho beha lithahasello tsa bona ka pel’a tsa hao.—Bafilipi 2:3, 4.
Hopola hore Jehova oa u rata. Re lokela ho kholiseha hore Jehova “o teng le hore e ba moputsi oa ba mo batlang ka tieo.” (Baheberu 11:6) O amehile haholo ka rōna ’me o batla hore re fumane bophelo bo sa feleng. (1 Timothea 2:4; 1 Petrose 5:7) Ho se lebale hore ha ho letho le ka felisang lerato leo Molimo a re ratang ka lona, ho tla re thusa hore re se ke ra tela ho etsa se setle ha re lekoa.—Baroma 8:38, 39.
Tšepa Jehova ka ho feletseng. Ke habohlokoa ho tšepa Jehova, haholo ha liteko li bonahala li sa fele kapa li beha bophelo ba rōna kotsing. Re tlameha ho ba le tšepo e feletseng ea hore Jehova a ke ke a lumella teko leha e le efe e ‘fetang seo re ka se jarang,’ le hore ka linako tsohle o tla re ‘bulela tsela ea ho tsoa.’ (1 Bakorinthe 10:13) Haeba re tšepile Jehova, re ka ba sebete esita leha re bona lefu ka mahlo.—2 Bakorinthe 1:8, 9.
Phehella thapelong. Thapelo e tsoang botebong ba pelo ke ea bohlokoa. (Baroma 12:12) Thapelo e tebileng ke e ’ngoe ea litsela tseo ka tsona re ka atamelang ho Jehova. (Jakobo 4:8) Ka liphihlelo tsa rōna, rea ithuta hore “ho sa tsotellehe hore na ke eng eo re e kōpang . . . oa re utloa.” (1 Johanne 5:14) Haeba Jehova a lumella teko hore e tsoele pele e le ho nonya botšepehi ba rōna, rōna re rapella hore a re thuse hore re mamelle. (Luka 22:41-43) Thapelo e re ruta hore ha ho mohla re leng bang, le hore haeba Jehova a le ka lehlakoreng la rōna re tla lula re le bahlōli.—Baroma 8:31, 37.
Mesebetsi e Molemo—Ke ‘Lebaka la Thoriso le Tlhompho’
Khafetsa Bakreste bohle ba ba le ‘mesarelo ka lebaka la liteko tse sa tšoaneng.’ Leha ho le joalo, ha rea lokela ho “tela ho etsa se setle.” Ha u sithabetse, matlafatsoa ke ho tseba hore qetellong botšepehi ba hao e tla ba “lebaka la thoriso le khanya le tlhompho.” (1 Petrose 1:6, 7) Sebelisa hamolemo likofuto tsohle tsa moea tse tsoang ho Jehova e le hore u matlafatse tumelo ea hao. Ha u hloka batho ba ka u elang hloko, e-ea ho balisa, mesuoe le baeletsi ka phuthehong ea Bokreste. (Liketso 20:28) E-ba teng kamehla libokeng tsohle tsa phutheho tse ‘re susumelletsang leratong le mesebetsing e metle.’ (Baheberu 10:24) Lenaneo la ’malo oa Bibele oa letsatsi le letsatsi le thuto ea botho li tla u thusa hore u lule u hlaphohetsoe u bile u le matla moeeng; ho kopanela kamehla tšebeletsong ea Bokreste ho ka ba le liphello tse tšoanang.—Pesaleme ea 1:1-3; Matheu 24:14.
Ha u ntse u latsoa lerato le tlhokomelo ea Jehova haholoanyane, joale takatso ea hao ea ho etsa “mesebetsi e metle” le eona e tla hōla. (Tite 2:14) Hopola hore “ea mameletseng ho isa bofelong ke eena ea tla pholoha.” (Matheu 24:13) Joale, ikemisetse hore ‘u se ke ua tela ho etsa se setle’!
[Ntlha e Qolotsoeng e leqepheng la 29]
Re tlameha ho ba le tšepo e feletseng ea hore Jehova a ke ke a lumella teko leha e le efe e ‘fetang seo re ka se jarang,’ le hore ka linako tsohle o tla re ‘bulela tsela ea ho tsoa’
[Litšoantšo tse leqepheng la 30]
Ho ba maphathaphathe mesebetsing ea puso ea Molimo ho ka re lokisetsa ho tobana le liteko