Iketsetse Lipakane Tseo U ka li Finyellang, U Tle U Thabe

“KE HLŌTSOE hape!” U buile mantsoe a kang ao ka makhetlo a mangata hakae e le hobane u ile ua hlōleha ho phetha seo u neng u rerile ho se etsa? ’Mè e mocha oa Mokreste a ka ’na a bua mantsoe ao hobane a ikutloa a imetsoe ka lebaka la lesea la hae le batlang hore a le hlokomele ka nako eohle ebile o ferekanngoa ke hore o sitoa ho ela hloko litaba tse amanang haholoanyane le borapeli. Mokreste e mong a ka ’na a ikhalala ka lebaka la tsela eo a hōlisitsoeng ka eona eaba o nahana hore seo a se etsang ka phuthehong ha ho mohla se lekaneng. Paki e hōlileng e ka ’na ea nyahama hobane e sa khone ho kopanela ka botlalo mesebetsing ea Bokreste eo e neng e thabela ho e etsa ha e ne e sa le mahlahahlaha ebile e sa khona ho ea koana le koana. Christiane eo boemo ba lelapa bo mo thibelang ho ikitlaetsa kamoo a neng a ka lakatsa kateng tšebeletsong ea Jehova, o re, “Ka linako tse ling, kea lla ha ho behoa puo e khothalletsang tšebeletso ea bopula-maliboho.”

Ke sefe seo re ka se etsang ha re e-ba le maikutlo a joalo? Bakreste ba bang ba khonne joang hore ba be le maikutlo a loketseng ka maemo a bona? Melemo ea ho ba le maikutlo a loketseng ka lintho tseo re li lebeletseng ke efe?

E-ba le Kahlolo e Molemo

Moapostola Pauluse o re bolella hore na re ka lula re thabile joang ha a re: “Kamehla thabang Moreneng. Ke tla boela ke re, Le thabe! Ho ba le kahlolo e molemo ha lōna ho ke ho tsejoe ke batho bohle. Morena o haufi.” (Bafil. 4:4, 5) E le hore re thabe re be re khotsofale ha re sebeletsa Molimo, re lokela ho ba le kahlolo e molemo mabapi le lintho tseo re li lebeletseng re shebile bokhoni ba rōna le maemo a rōna. Haeba re loanela ho finyella lipakane tse sa bontšeng ho ba le kahlolo e molemo ho sa tsotellehe hore na ho hlokahala eng hore re li finyelle, re ikimetsa ho sa hlokahale. Ka lehlakoreng le leng, re lokela ho ba hlokolosi hore re se ke ra iqenehela haholo, re se ke ra sebelisa seo re nahanang hore ke bofokoli ba rōna e le lebaka la hore re khoehlise ho feta kamoo ho hlokahalang kateng tšebeletsong ea Bokreste.

Ho sa tsotellehe hore na maemo a rōna ke afe, Jehova o lebeletse hore re mo fe se molemohali—e leng tšebeletso e etsoang ka moea oohle le ka pelo eohle. (Bakol. 3:23, 24) Haeba re ne re ke ke ra fa Jehova se molemohali, re ne re tla be re sa phelele boinehelo ba rōna ho eena. (Bar. 12:1) Ho phaella moo, re ne re tla itima khotsofalo e khōlō, thabo ea sebele le litlhohonolofatso tse ling tse ngata tse tlisoang ke tšebeletso e etsoang ka moea oohle.​—Liprov. 10:22.

Lentsoe le fetoletsoeng e le “kahlolo e molemo” ka Bibeleng le na le mohopolo oa ho nahanela. Moelelo oa lona oa sebele ke “ho tenyetseha.” (Jak. 3:17) Lentsoe lena le boetse le fetisa moelelo oa ho se itšoare ka thata haholo. Ka lebaka leo, haeba re e-na le kahlolo e molemo, re tla khona ho sheba maemo a rōna ka tsela e loketseng. Na ke ntho e thata ho etsa joalo? Ho ba bang ho thata, le hoja ba ka tseba ho nahanela ba bang. Ka mohlala, haeba motsoalle oa rōna oa hlooho ea khomo a ne a bontša hore o kenoe ke mokhathala ka lebaka la ho ipolaisa mosebetsi, na re ne re sa tl’o leka ho mo thusa hore a bone bohlale ba ho etsa liphetoho tse itseng bophelong ba hae? Ka ho tšoanang, re lokela ho ithuta ho lemoha matšoao a ka ’nang a re bolella hore re se re etsa lintho tse ka holimo ho matla a rōna.​—Liprov. 11:17.

Ho ka ba thata haholo hore re be le maikutlo a loketseng ka bofokoli ba rōna haeba re hōlisitsoe ke batsoali ba sa khotsofatsoeng habonolo. Batho ba bang ba ’nile ba ikutloa hore bongoaneng ba bona ba ne ba tlameha ho ikitlaetsa haholo kapa ba lule ba ipabola kamehla e le hore batsoali ba bona ba ba rate. Haeba re hōtse joalo, re ka ’na ra ba le maikutlo a fosahetseng ka tsela eo Jehova a re talimang ka eona. Jehova oa re rata hobane re mo sebeletsa ka lipelo tsohle tsa rōna. Lentsoe la Molimo le re tiisetsa hore Jehova “o tseba sebōpeho sa rōna hantle, oa hopola hore re lerōle.” (Pes. 103:14) O tseba bofokoli ba rōna ’me oa re rata ha re mo sebeletsa ka cheseho ho sa tsotellehe bofokoli boo. Ho hopola hore Molimo oa rōna hase monghali ea thata ho tla re thusa hore re se ke ra lebella ho etsa seo re ke keng ra se khona, re lemohe bofokoli ba rōna.​—Mik. 6:8.

Leha ho le joalo, batho ba bang ba ntse ba thatafalloa ke ho ba le maikutlo a joalo a loketseng. Haeba ho joalo ka uena, ke hobane’ng ha u sa kōpe Mokreste ea nang le boiphihlelo ea u tsebang hantle hore a u thuse? (Liprov. 27:9) Ka mohlala, na u batla ho ba pula-maliboho oa kamehla? Eo ke pakane e babatsehang! Na u na le bothata ba ho finyella pakane eo? Mohlomong u hloka thuso ea hore u nolofatse mokhoa oa hao oa bophelo. Kapa motsoalle oa hao oa Mokreste eo u mo tšepang a ka ’na a buisana le uena ka hore na ebe ho ba pula-maliboho oa kamehla e ka ba pakane e u loketseng hona joale kapa che, ka lebaka la boikarabelo ba hao bo bongata ba lelapa. A ka ’na a u thusa ho bona hore na ebe u ka finyella mesebetsi ena e eketsehileng eo u batlang ho e etsa kapa hore na u ka etsa liphetoho life tse tla u thusa hore u etse ho eketsehileng. Monna le eena o boemong bo botle ba ho thusa mosali oa hae hore a etse lintho tse lekaneng bokhoni ba hae. Ka mohlala, a ka ’na a etsa tlhahiso ea hore a phomole pele a qala ho eketsa mosebetsi oa hae khoeling e ncha. Sena se ka ’na sa mo fa matla ’me sa mo thusa hore a lule a thabile tšebeletsong.

Batla Lintho Tseo U ka Khonang ho li Etsa

Botsofali kapa ho kula li ka ’na tsa re sitisa ho etsa lintho tse ling tšebeletsong ea Jehova. Haeba u motsoali, u ka ’na ua ba le maikutlo a hore ha u rue molemo o mokaalo thutong ea botho kapa libokeng tsa Bokreste kahobane u qeta nako ea hao e ngata le matla u hlokomela bana ba banyenyane. Leha ho le joalo, na ho ka etsahala hore ebe ka linako tse ling ho nahana haholo ka lintho tseo u sitoang ho li etsa ho ka u sitisa ho bona seo u ntseng u ka se finyella?

Lilemo tse likete tse fetileng, Molevi e mong o ile a bua ka takatso eo a neng a e-na le eona eo ho neng ho ke ke ha etsahala hore a e finyelle. O ne a e-na le tlotla e khethehileng ea ho sebetsa tempeleng ka libeke tse peli selemo le selemo. Leha ho le joalo, o ile a bua ka takatso ea hae e babatsehang ea ho lula kamehla haufi le aletare. (Pes. 84:1-3) Ke eng e ileng ea thusa monna eo ea tšepahalang hore a khotsofale? O ile a hlokomela hore esita le ho qeta letsatsi le le leng feela mabaleng a tempele e ne e le tlotla e khethehileng haholo. (Pes. 84:4, 5, 10) Ka ho tšoanang, ho e-na le ho nahana feela ka lintho tseo re sitoang ho li etsa, re lokela ho leka ho lemoha le ho ananela seo re ka khonang ho se etsa.

Ka mohlala, nahana ka Nerlande, e leng morali’abo rōna oa Mokreste oa Canada. O lula setulong sa likooa ’me o ne a ikutloa hore ha ho letho le lengata leo a neng a ka le etsa tšebeletsong. Leha ho le joalo, o ile a fetola tsela eo a shebang lintho ka eona eaba o nka hore setsi sa mabenkele se haufi le eena, ke tšimo ea hae. O re: “Ke lula setulong sa ka sa likooa haufi le benche e ’ngoe setsing sena sa mabenkele. Ke thabela ho pakela batho ba tlang ’me ba lula bencheng eo hore ba phomole ka nakoana.” Ho kopanela tšebeletsong ena ea bohlokoa ho khotsofatsa Nerlande haholo.

Etsa Liphetoho ha ho Hlokahala

E ka ’na eaba seketsoana se tsamaisoang ka liseile se sesa ka lebelo le leholo ha moea o khapha liseile tsa sona. Leha ho le joalo, ha mosesisi oa sona a thulana la sefefo se matla, o tlameha ho shebisa liseile hosele. Ha a laole sefefo, empa ka ho etsa liphetoho tse itseng, o tla ’ne a tsebe ho laola seketsoana sa hae. Ka tsela e tšoanang, hangata ha re na matla a ho laola maemo a sa jeseng litheohelang a kang lifefo ao re thulanang le ’ona bophelong. Empa re ka laola bophelo ba rōna ho fihlela moo re ka khonang teng ka hore re fetole tsela eo re sebelisang matla a rōna a ’mele, a ho nahana le maikutlo a rōna ka eona. Haeba re nahana ka maemo a rōna a macha, seo se tla re thusa hore re lule re khotsofetse re bile re thabile tšebeletsong ea Molimo.​—Liprov. 11:2.

Nahana ka mehlala ena. Haeba re e-na le matla a fokolang, re ka ’na ra bona ho le molemo hore lihoreng tsa hoseng re qobe ho etsa lintho tse re khathatsang e le hore re be le matla a ho ea libokeng tsa Bokreste mantsiboea. Sena se tla re thusa hore re rue molemo ka botlalo ha re kopane le Bakreste-’moho le rōna. Kapa haeba ’mè a sitoa ho kopanela mosebetsing oa ho bolela ka ntlo le ntlo hobane ngoana oa hae a kula, a ka ’na a fumana ho le molemo hore a kōpe morali e mong oabo oa Mokreste hore a tle lelapeng la hae e le hore ba kopanele mosebetsing oa ho paka ka thelefono ha ngoana a ntse a robetse.

Ho thoe’ng haeba maemo a hao a sa u lumelle hore u ithute esale pele sohle seo ho tla buisanoa ka sona libokeng tsa phutheho? U ka etsa qeto ea hore na u ka khona ho lokisetsa hakae ebe u lokisetsa seo hantle kahohle kamoo u ka khonang. Ka ho etsa liphetoho lipakaneng tseo re nang le tsona hona joale, re ka lula re le mafolofolo ebile re thabile.

Ho ka ’na ha hlokahala boiteko le boikemisetso hore re etse liphetoho lipakaneng tsa rōna. Serge le Agnès, e leng banyalani ba bang ba Fora, ba ile ba lokela ho etsa phetoho e khōlō ho seo ba neng ba rerile ho se etsa. Serge o re: “Ha re fumana hore Agnès o ne a imile, tšepo ea rōna ea ho ba baromuoa e ile ea fela.” Serge, eo hona joale e leng ntate oa banana ba babeli ba thabileng, o hlalosa kamoo eena le mosali oa hae ba ileng ba iketsetsa pakane e ncha. O re: “Kaha ha re khone ho ea sebetsa linaheng tse ling, re ile ra etsa qeto ea hore re be ‘baromuoa’ hona naheng ea habo rōna. Re ile ra kopanela le sehlopha sa puo esele.” Na ba ile ba rua molemo ka ho iketsetsa pakane ee e ncha? Serge o re: “Re ikutloa re e-na le thuso e khōlō ka phuthehong.”

Odile, e leng morali’abo rōna oa Mokreste oa Fora ea leng lilemong tsa bo-70 ’me a tšoeroe ke lefu la masapo le manonyeletso mangoleng, o sitoa ho ema nako e telele. O ne a nyahame hobane boloetse ba hae bo ne bo mo thibela ho kopanela mosebetsing oa ho bolela ka ntlo le ntlo. Leha ho le joalo, ha aa ka a tela. O ile a fetola seo a neng a se etsa ka hore a kopanele mosebetsing oa ho paka ka thelefono. O re: “Ho bonolo ebile ke ho thabela ho feta kamoo ke neng ke lebeletse kateng!” Mokhoa ona oa ho bolela o ile oa tsosolosa cheseho ea hae tšebeletsong.

Ho Iketsetsa Lipakane Tseo U ka li Finyellang ho na le Melemo

Ho ba le maikutlo a loketseng ka seo re ka khonang ho se etsa ho tla re qobisa masoabi a mangata. Ka ho iketsetsa lipakane tse loketseng, re ba le boikutlo ba hore re finyelletse ho hong ho sa tsotellehe bofokoli ba rōna. Kahoo re thabela seo re ka khonang ho se etsa, le haeba se le senyenyane.​—Bagal. 6:4.

Ha re ntse re loanela ho ba le maikutlo a loketseng ka seo re lebeletseng hore re se etse, re tla nahanela Bakreste-’moho le rōna haholoanyane. Ha re hlokomela moo ba fokolang teng, kamehla re tla ananela seo ba re etsetsang sona. Ka ho bontša hore re ananela thuso efe kapa efe eo re e fuoang, re thusa hore ho be le moea oa tšebelisano le kutloisisano. (1 Pet. 3:8) Hopola hore joaloka Ntate ea lerato, ha ho mohla Jehova a batlang hore re etse seo re ke keng ra tseba ho se etsa. Ha re e-na le maikutlo a loketseng ka bokhoni ba rōna le maemo a rōna re bile re iketsetsa lipakane tseo re ka li finyellang, lintho tseo re li etsang tse amanang le borapeli ba Jehova, li tla re khotsofatsa le ho re thabisa haholo.

[Ntlha e Qolotsoeng e leqepheng la 29]

E le hore re thabe re be re khotsofale ha re sebeletsa Molimo, re lokela ho ba le kahlolo e molemo mabapi le lintho tseo re li lebeletseng re shebile bokhoni ba rōna le maemo a rōna

[Setšoantšo se leqepheng la 30]

Nerlande o thabela ho etsa seo a ka se khonang tšebeletsong

[Setšoantšo se leqepheng la 31]

Ithute ho “shebisa liseile hosele”

[Tlhaloso ea Moo Setšoantšo se Nkiloeng Teng]

© Wave Royalty Free/age fotostock

[Setšoantšo se leqepheng la 32]

Serge le Agnès ba ile ba rua molemo ka ho iketsetsa lipakane tse ncha