Lithapelo Tsa Hao li Senola Eng ka Uena?

“Uena Ea Utloang thapelo, batho ba nama eohle ba tla tla ho uena.”—PES. 65:2.

1, 2. Ke hobane’ng ha bahlanka ba Jehova ba ka mo rapela ka kholiseho?

LE KA mohla Jehova ha a iphapanyetse likōpo tse matla tsa bahlanka ba hae ba tšepahalang. Re ka kholiseha hore oa re utloa. Esita leha Lipaki Tsa Jehova tse limilione li ne li ka rapela Molimo ka nako e le ’ngoe, ha ho le e ’ngoe ea tsona e neng e ka mo ‘fihlela a phathahane haholo.’

² Kaha mopesaleme Davida o ne a kholisehile hore Molimo o utloile likōpo tsa hae tse tiileng, o ile a bina a re: “Uena Ea Utloang thapelo, batho ba nama eohle ba tla tla ho uena.” (Pes. 65:2) Lithapelo tsa Davida li ile tsa arajoa hobane e ne e le morapeli ea tšepahalang oa Jehova. Re lokela ho ipotsa: ‘Na lithapeli tsa ka li bontša hore ke tšepa Jehova le hore borapeli bo hloekileng ke ntho ea bohlokoa eo ke amehileng ka eona? Lithapelo tsa ka li senola eng ka ’na?’

Rapela Jehova ka Boikokobetso

3, 4. (a) Re lokela ho ba le maikutlo afe ha re rapela Molimo? (b) Re lokela ho etsa’ng ha re khathatsoa ke ‘menahano e hlokisang botsitso’ ka lebaka la sebe se seholo?

³ Haeba re batla hore Molimo a arabe lithapelo tsa rōna, re lokela ho mo rapela ka boikokobetso. (Pes. 138:6) Re lokela ho kōpa Jehova hore a re hlahlobe, joalokaha Davida a ile kōpa ha a ne a re: “Mpatlisise ka hohle, Molimo, ’me u tsebe pelo ea ka. Ntlhahlobe, ’me u tsebe menahano ea ka e ntlhokisang botsitso, u bone hore na ho na le tsela leha e le efe e bohloko ka ho ’na, u ntsamaise tseleng ea nako e sa lekanyetsoang.” (Pes. 139:23, 24) A re se keng ra rapela feela empa re lumelle Molimo hore a re hlahlobe re be re sebelise keletso ea Lentsoe la hae. Jehova a ka re tsamaisa “tseleng ea nako e sa lekanyetsoang,” a re thusa hore re hahamalle tsela e isang bophelong bo sa feleng.

⁴ Re lokela ho etsa joang haeba re tšoenngoa ke ‘menahano e hlokisang botsitso’ hobane re entse sebe se seholo? (Bala Pesaleme ea 32:1-5.) Ho leka ho hatella letsoalo le molato ho ka re fokolisa feela joalokaha sefate se felloa ke mongobo lehlabula ha ho chesa haholo. Davida o ile a felloa ke thabo ka lebaka la sebe sa hae ’me ho ka etsahala hore ebe o ile a kula. Empa o ile a imoloha haholo ka mor’a hore a ipolele ho Molimo! Nahana feela hore na Davida o ile a thaba hakaakang ha a utloa hore ‘bofetoheli ba hae bo tšoaretsoe’ le hore Jehova o mo lebaletse. Ho ipolela sebe ho Molimo ho ka imolla motho, ’me thuso ea baholo ba Bakreste le eona e tla thusa hore mofosi a tsosolose kamano ea hae le Jehova.—Liprov. 28:13; Jak. 5:13-16.

Etsa Thapeli ho Molimo U be U mo Lebohe

 5. Ho etsa thapeli ho Jehova ho bolela’ng?

⁵ Haeba re tšoenyehile haholo ka lebaka leha e le lefe, re lokela ho sebelisa keletso ea Pauluse e reng: “Le se ke la tšoenyeha ka letho, empa nthong e ’ngoe le e ’ngoe ka thapelo le thapeli hammoho le liteboho likōpo tsa lōna tse matla li ke li tsebisoe Molimo.” (Bafil. 4:6) “Ho etsa thapeli” ho bolela “ho etsa kōpo e tiileng ka boikokobetso.” Haholo-holo ha re le kotsing kapa re tobane le mahloriso, re lokela ho etsa thapeli ho Jehova hore a re thuse a be a re tataise.

6, 7. Ke hobane’ng ha re lokela ho akarelletsa le liteboho lithapelong tsa rōna?

⁶ Leha ho le joalo, haeba re ne re rapela feela ha ho e-na le ntho eo re e hlokang, seo se ne se tla senola hore na re rapela ka sepheo sefe? Pauluse o ile a re re lokela ho tsebisa Molimo likōpo tsa rōna tse matla “hammoho le liteboho.” Ka sebele re na le lebaka la ho leboha joaloka Davida, ea ileng a re: “Jehova, boholo le matla le botle le bokhabane bo hlomphehang le ho hlompheha ke tsa hao; kaha ntho e ’ngoe le e ’ngoe e maholimong le e lefatšeng ke ea hao. ’Muso ke oa hao, Jehova, uena Eo hape u iphahamisang u le hlooho ka holim’a tsohle. . . . Molimo oa rōna, rea u leboha ’me re rorisa lebitso la hao le letle.”—1 Likron. 29:11-13.

⁷ Jesu o ile a leboha Molimo ka lijo a ba a mo leboha ka bohobe le veine tse ileng tsa sebelisoa Lijong Tsa Shoalane Tsa Morena. (Mat. 15:36; Mar. 14:22, 23) Ntle ho ho leboha ka tsela e tšoanang, re lokela ho ‘leboha Jehova’ ka “mesebetsi ea hae e hlollang ho bara ba batho,” ka “liqeto tsa [hae] tsa boahloli tse lokileng” le ka lentsoe la hae, kapa molaetsa oa hae, oo hona joale o fumanoang ka Bibeleng.—Pes. 107:15; 119:62, 105.

Rapella Batho ba Bang

8, 9. Ke hobane’ng ha re lokela ho rapella Bakreste-’moho le rōna?

⁸ Ha ho pelaelo hore rea ithapella, empa lithapelo tsa rōna li lokela ho akarelletsa batho ba bang—esita le Bakreste bao re sa ba tsebeng ka mabitso. Le hoja ho ka etsahala hore ebe moapostola Pauluse o ne a sa tsebe balumeli bohle ba Kolose, o ile a ngola a re: “Re leboha Molimo Ntate oa Morena oa rōna Jesu Kreste kamehla ha re le rapella, kaha re ile ra utloa ka tumelo ea lōna mabapi le Kreste Jesu le lerato leo le nang le lona bakeng sa bahalaleli bohle.” (Bakol. 1:3, 4) Pauluse o ile a boela a rapella le Bakreste ba Thesalonika. (2 Bathes. 1:11, 12) Lithapelo tsa mofuta oo li senola hore na re batho ba mofuta ofe le hore na re nka bara le barali babo rōna joang.

⁹ Lithapelo tseo re li etsetsang Bakreste ba tlotsitsoeng le metsoalle ea bona ea “linku tse ling,” li bontša hore re amehile ka mokhatlo oa Molimo. (Joh. 10:16) Pauluse o ile a kōpa barapeli-’moho le eena hore ba rapele e le hore ‘a ka fuoa bokhoni ba ho bua e le hore a tsebahatse sephiri se halalelang sa litaba tse molemo.’ (Baef. 6:17-20) Na rōna ka borōna re rapella Bakreste ba bang ka tsela eo?

10. Ho rapella batho ba bang ho ka re ama joang?

¹⁰ Ho rapella batho ba bang ho ka ’na ha fetola maikutlo a rōna ka bona. Haeba re sa ratisise motho ea itseng empa re mo rapella, sena se ka ’na sa fetola maikutlo a rōna ka eena. (1 Joh. 4:20, 21) Lithapelo tsa mofuta ona lia matlafatsa ebile li etsa hore re be bonngoeng le barab’abo rōna. Ho feta moo, lithapelo tse joalo li bontša hore re na le lerato le tšoanang le la Kreste. (Joh. 13:34, 35) Tšobotsi eo ke karolo ea tholoana ea moea oa Molimo. Na rōna ka bomong re rapella moea o halalelang, re kōpa Jehova hore a re thuse hore re bontše tholoana ea oona ea lerato, thabo, khotso, tiisetso, mosa, molemo, tumelo, bonolo le boitšoaro? (Luka 11:13; Bagal. 5:22, 23) Haeba re etsa joalo, mantsoe a rōna le liketso tsa rōna li tla bontša hore re tsamaea ka moea ebile re phela ka oona.—Bala Bagalata 5:16, 25.

11. Ke hobane’ng ha u ka re ho loketse hore re kōpe batho ba bang hore ba re rapelle?

¹¹ Haeba re tseba hore bana ba rōna ba lekeha hore ba kopitse ha ba ngola tlhahlobo sekolong, re lokela ho ba rapella re be re sebelise Mangolo hore re ba thuse e le hore ba etse lintho ka botšepehi le hore ba se ke ba etsa letho le phoso. Pauluse o ile a re ho Bakreste ba Korinthe: “Re rapela Molimo hore le se ke la etsa letho le fosahetseng.” (2 Bakor. 13:7) Lithapelo tsa mofuta oo tse etsoang ka boikokobetso, li khahlisa Jehova li bile li re hlahisa hantle. (Bala Liproverbia 15:8.) Re ka kōpa batho ba bang hore ba re rapelle, feela joalokaha moapostola Pauluse le eena a ile a kōpa hore a rapelloe. O ile a ngola a re: “Tsoelang pele ho re rapella, kaha re tšepa hore re na le matsoalo a tšepahalang, kaha re lakatsa ho itšoara ka botšepehi linthong tsohle.”—Baheb. 13:18.

Lithapelo Tsa Rōna li Bolela ho Hongata ka Rōna

12. Lintho tse ka sehloohong tseo re lokelang ho li rapella ke life?

¹² Na lithapelo tsa rōna li bolela hore re Lipaki Tsa Jehova tse thabileng le tse chesehang? Na taba e ka sehloohong lithapeling tsa rōna ke ho lumellana le thato ea Molimo, boboleli ba molaetsa oa ’Muso, ho tlosoa ha qoso bobusing ba Jehova le ho halaletsoa ha lebitso la hae? Lintho tsena ke tsona tse ka sehloohong tseo re lokelang ho li rapella, joalokaha ho bontšitsoe thapelong ea Jesu ea mohlala, e qalang ka mantsoe a reng: “Ntat’a rōna ea maholimong, lebitso la hao le ke le halaletsoe. ’Muso oa hao o ke o tle. Thato ea hao e ke e etsahale lefatšeng, joalokaha e etsahala leholimong.”—Mat. 6:9, 10.

13, 14. Lithapelo tsa rōna li senola eng ka rōna?

¹³ Lithapelo tsa rōna ho Molimo li senola sepheo sa rōna, lithahasello tsa rōna le litakatso tsa rōna. Jehova oa tseba hore na re batho ba mofuta ofe. Liproverbia 17:3 e re: “Pitsa ea ho hloekisa ke bakeng sa silevera ’me sebōpi ke bakeng sa khauta, empa Jehova ke eena ea hlahlobang lipelo.” Molimo o bona se ka lipelong tsa rōna. (1 Sam. 16:7) Oa tseba hore na re ikutloa joang ka liboka tsa rōna, tšebeletso ea rōna le bara le barali babo rōna ba Bakreste. Jehova oa bona hore na re ikutloa joang ka ‘barab’abo’ Kreste. (Mat. 25:40) Oa tseba hore na re hlile re lakatsa seo re se rapellang kapa re mpa re bua mantsoe feela. Jesu o ile a re: “Ha u rapela, u se ke ua pheta-pheta lintho tse tšoanang, feela joalokaha batho ba lichaba ba etsa, kaha [ka phoso] ba nahana hore ba tla utluoa ka lebaka la ho sebelisa mantsoe a mangata.”—Mat. 6:7.

¹⁴ Ha re rapela, lipolelo tsa rōna le tsona li senola hore na re itšetlehile hakae ka Molimo. Davida o ile a re: “[Jehova] u bile setšabelo sa ka, tora e matla ka pel’a sera. Ke tla ba moeti tenteng ea hao ho isa linakong tse sa lekanyetsoang; ke tla tšabela tšireletsong ea mapheo a hao.” (Pes. 61:3, 4) Ha Molimo a ‘ala tente ea hae holim’a rōna’ ka tsela ea tšoantšetso, oa re sireletsa ebile oa re hlokomela. (Tšen. 7:15) Ha tumelo ea rōna e lekoa, ho tšelisa hakaakang ho rapela Jehova re kholisehile hore o ‘ka lehlakoreng la rōna’!—Bala Pesaleme ea 118:5-9.

15, 16. Thapelo e ka re thusa hore re lemohe eng mabapi le takatso ea rōna ea ho hahamalla boikarabelo bo eketsehileng?

¹⁵ Ha re rapela Jehova ka botšepehi mabapi le sepheo sa rōna, sena se ka re thusa hore re lemohe sepheo sa rōna sa ’nete. Ka mohlala, na tjantjello eo re nang le eona ea ho sebeletsa re le balebeli har’a batho ba Molimo e tsoaloa ke hobane ka boikokobetso re batla ho ba thusa le ho etsa sohle seo re ka se khonang mosebetsing oa boboleli le oa phutheho? Kapa mohlomong ke hobane re batla ho ba le “sebaka sa pele” kapa ke hobane re bile re lakatsa ho “rena ka thata” holim’a ba bang? Lintho ha lia lokela ho ba ka tsela eo har’a batho ba Jehova. (Bala 3 Johanne 9, 10; Luka 22:24-27.) Haeba re e-na le litakatso tse fosahetseng, ho rapela Jehova Molimo ka botšepehi ho ka li pepesa ’me ha re thusa hore re fetohe pele li teba.

¹⁶ Basali ba Bakreste ba ka ba le takatso e matla ea hore banna ba bona ba sebeletse e le bahlanka ba sebeletsang ’me mohlomong qetellong e be balebeli, kapa baholo. Barali bana babo rōna ba ka sebetsa tumellanong le maikutlo ao ba a bolelang ha ba rapela boinotšing ka hore ba loanele ho itšoara ka tsela e behang mohlala. Sena ke sa bohlokoa, hobane tsela eo monna a nkoang ka eona ka phuthehong, e angoa ke lipuo le liketso tsa lelapa la hae.

Ho Rapella ba Bang Phatlalatsa

17. Ke hobane’ng ha ho hlokahala hore re be moo ho nang le khutso ha re rapela boinotšing?

¹⁷ Jesu o ne a atisa ho tloha har’a matšoele e le hore a e’o rapela Ntate oa hae boinotšing. (Mat. 14:13; Luka 5:16; 6:12) Le rōna re hloka ho ba boinotšing ka tsela e tšoanang. Ha re rapela re khobile matšoafo moo ho nang le khutso, ho ka etsahala hore re etse liqeto tse thabisang Jehova le tse tla re thusa hore re lule re le matla borapeling ba rōna. Leha ho le joalo, Jesu o ne a boetse a rapela phatlalatsa, ’me ho loketse hore re nahane hore na sena se ka etsoa joang ka mokhoa o nepahetseng.

18. Ke lintlha life tseo barab’abo rōna ba lokelang ho li hopola ha ba rapella phutheho phatlalatsa?

¹⁸ Libokeng tsa rōna, banna ba tšepahalang ba rapella phutheho phatlalatsa. (1 Tim. 2:8) Qetellong ea thapelo, balumeli-’moho le bona ba lokela ho nolofalloa hore ba re “amen,” e bolelang “ha ho be joalo.” Leha ho le joalo, e le hore ba etse seo, ba lokela ho lumellana le se builoeng. Ha ho letho le tšosang kapa le bontšang ho se nahanele thapelong ea mohlala ea Jesu. (Luka 11:2-4) Ho feta moo, ha aa ka a lokolisa litlhoko tsohle kapa mathata ’ohle a motho e mong le e mong ea neng a mo mametse. Ho ka ba molemo hore re rapelle lintho tseo re tšoenyehileng ka tsona boinotšing, eseng phatlalatsa. Ho feta moo, ha re rapella sehlopha, ha rea lokela ho kenyelletsa litaba tsa lekunutu.

19. Re lokela ho itšoara joang ha ho rapeloa phatlalatsa?

¹⁹ Ha re rapelloa phatlalatsa, re lokela ho bontša hore re ‘tšaba Molimo.’ (1 Pet. 2:17) Ho ka ’na ha e-ba le nako e loketseng le sebaka se loketseng bakeng sa liketso tse itseng tse sa lokelang sebokeng sa Bokreste. (Moek. 3:1) Ka mohlala, a re re motho e mong o batla hore bohle ba sehlopheng ba hakane kapa ba tšoarane ka matsoho ha ho rapeloa phatlalatsa. Sena se ka ’na sa khopisa kapa sa sitisa ba bang, ho akarelletsa le baeti bao e seng balumeli-’moho le rōna. Banyalani ba bang ba ka ’na ba tšoarana ka matsoho ka tsela e sa hapeng tlhokomelo, empa haeba ba hakana ha ho rapeloa phatlalatsa, batho ba ka ’nang ba bona ketsahalo eo, ba ka ’na ba khopeha. Ba ka ’na ba nahana kapa ba ba le maikutlo a hore banyalani bao ba inahanetse ka lerato la bona eseng ka ho hlompha Jehova. Kaha re hlompha Molimo ka botebo, a re ‘etseng lintho tsohle bakeng sa thoriso ea hae’ ’me re qobe boitšoaro bo ka etsang hore mang kapa mang a ferekane, a tšohe kapa a khopehe.—1 Bakor. 10:31, 32; 2 Bakor. 6:3.

Se ka Rapelloang

20. U ka hlalosa Baroma 8:26, 27 joang?

²⁰ Ho ka ’na ha etsahala hore ka linako tse ling re se ke ra tseba seo re lokelang ho se rapella lithapelong tseo re li etsang boinotšing. Pauluse o ile a ngola a re: “Ha re tsebe bothata ba seo re lokelang ho se rapella joalokaha ho hlokahala hore re rapele, empa moea [o halalelang] o re kōpela ka tieo ka lipōbōli tse sa buuoeng. Empa leha ho le joalo [Molimo] ea phenyang lipelo oa tseba hore na sepheo sa moea ke sefe.” (Bar. 8:26, 27) Jehova o entse hore ho ngoloe lithapelo tse ngata ka Mangolong. O amohela likōpo tsena tse matla tse bululetsoeng joalokaha eka ke tsa rōna ’me kahoo oa li phethahatsa. Molimo oa re tseba ’me o boetse o tseba le se boleloang ke lintho tseo a ileng a etsa hore moea oa hae o li bue ka bangoli ba Bibele. Jehova o araba lithapeli tsa rōna ha moea o re “kōpela ka tieo,” kapa o re buella. Empa ha re ntse re tsoela pele tsebong ea Lentsoe la Molimo, ho ka ’na ha e-ba bonolo ho tseba seo re lokelang ho se rapella.

21. Sehloohong se latelang re tla tšohla eng?

²¹ Joalokaha re hlokometse, lithapelo tsa rōna li senola hore na re batho ba mofuta ofe. Ka mohlala, li ka ’na tsa bontša hore na re na le kamano e haufi hakae le Jehova le hore na re tseba Lentsoe la hae hantle hakae. (Jak. 4:8) Sehloohong se latelang, re tla hlahloba lithapelo tse ling le lipolelo tse amanang le thapelo, tse ngotsoeng ka Bibeleng. Ebe tlhahlobo eo ea Mangolo e ka ’na ea ama tsela eo re rapelang Jehova ka eona joang?

U ka Araba Joang?

• Re lokela ho rapela Jehova ka maikutlo afe?

• Ke hobane’ng ha re lokela ho rapella balumeli-’moho le rōna?

• Lithapelo tsa rōna li ka ’na tsa bontša eng ka rōna le ka sepheo sa rōna?

• Re lokela ho itšoara joang ha ho rapeloa phatlalatsa?

[Litšoantšo tse leqepheng la 4]

Na kamehla u rorisa Jehova ebile ua mo leboha?

[Litšoantšo tse leqepheng la 6]

Tsela eo re itšoarang ka eona ha ho rapeloa e lokela ho tlotlisa Jehova kamehla