Na Molimo o u Bilelitse ho tsa Khotso?

“Empa ekare ha ea sa lumelang a hlala ea lumetseng, a mo hlale; moen’ a rōna oa monna, kapa oa mosali, ha a tlangoa litabeng tse joalo; empa Molimo o re bilelitse ho tsa khotso.”—1 BA-KORINTHE 7:15.

 1. Ka Mangolo, lenyalo le lokela ho talingoa joang?

HA HO mohla Jehova a kileng a rera hore lenyalo le lokela ho isa karohanong kapa tlhalanong ea masetla-pelo. Lenyalo le ne le lokela ho ba tlamahano ea “nama e le ’ngoe” e tšoarellang e fellang ka thabo, khatholoho, le khotso. (Genese 2:24; Ruthe 1:9) Ka kakaretso, Mangolo a eletsa batho ba nyalaneng hore ba lule hammoho, le haeba molekane e mong e le Mokreste ’me e mong e se molumeli. (1 Ba-Korinthe 7:12-16) Ho feta moo, litšebelisano tsa bolotsana tse fellang ka ho khaola litlamo tsa lenyalo li etsa hore motho a ikarabelle ka boitšoaro ba hae ho Molimo, o ‘hloileng hlalo.’—Malakia 2:13-16.

 2. Bakreste ba talima karohano le tlhalano joang?

² Ho se phethahale ha botho le mabaka a mang ka linako tse ling li ile tsa isa karohanong kapa tlhalanong esita le har’a bahlanka ba kolobelitsoeng ba Molimo. Leha ho le joalo, ka lebaka la tlhompho e phahameng eo Bakreste ba nang le eona bakeng sa lenyalo, hangata mehato ena e nkoa feela kamorao ho boiteko ba ho phehella ho boloka manyalo hammoho. Ntlheng ena, Molimo ka booona o beile mohlala o phahameng ka ho fetisisa. Joaloka “monna” oa Iseraele ea boholo-holo, ka makholo a lilemo o ile oa mamella manganga, bofetoheli, le bofebe ba moea tse neng li etsoa ke batho ba oona. (Esaia 54:1-5; Jeremia 3:14-17; Hosea 1:10, 11; 3:1-5) Ebile feela kamor’a hore ba be boemong boo ho bona ba neng ba ke ke ba hlola ba loka Jehova a ileng a ba lahla joaloka sechaba.—Mattheu 23:37, 38.

 3. (a). Ke ka mabaka afe a lumelloang ke Mangolo Mokreste a ka arohanang le molekane oa lenyalo? (b) Tlhalano ea Mangolo e lumelloa tlas’a maemo afe?

³ Ka linako tse ling, baholo ba phutheho ba atameloa ke balumeli-’moho le bona ba lakatsang ho thusoa ka mathata a tebileng a lenyalo. Baholo ha baa fuoa matla a ho bolella mang kapa mang hore a tlohele kapa a hlale molekane oa lenyalo, empa ba ka supa seo Lentsoe la Molimo le se bolelang ka litaba tsena. Joalokaha ho bontšitsoe sehloohong se fetileng, Bibele e lumella karohano tabeng ea ho se hlokomele lelapa ka boomo, chapo e feteletseng, kapa ho beoa kotsing ho feletseng moeeng. Hape ho hlokomelehile hore tlhalo ea Mangolo ka monyetla oa ho kena lenyalong hape kamoso le molekane e mong e ka ba teng feela haeba molekane e mong a entse “bohlola,” bo akarelletsang mefuta e mengata ea likamano tsa botona le botšehali tsa boitšoaro bo bobe. (Mattheu 19:9, TLP) Ke habohlokoa hore karohano kapa tlhalano e se ke ea e-ba qeto e etsoang pele ho lipuisano, kaha ho ka ’na ha khoneha ho tsosolosa khotso ea lenyalo, ’me le bona bofebe kapa mefuta e meng ea bohlola li ka tšoareloa ke molekane oa lenyalo ea seng molato.—Mattheu 5:31, 32; bapisa Hosea 3:1-3.

 4. (a) Ka bokhutšoanyane akaretsa seo Pauluse a se boleletseng Bakreste ba lenyalong ho 1 Ba-Korinthe 7:10-16. (b) Ke neng ho ka thoeng: ‘Molimo o u bilelitse ho tsa khotso’?

⁴ Joalokaha re hlokometse sehloohong se fetileng, moapostola Pauluse o ile a phehella Bakreste ba nyalaneng hore ba se ke ba tlohela balekane ba bona. (1 Ba-Korinthe 7:10-16) Ka lebaka la mantsoe a Pauluse, haeba molekane ea sa lumelang a ikhethela ho lula le molekane oa hae oa lenyalo oa Mokreste, ea lumetseng o lokela ho leka ho mo thusa moeeng. (1 Petrose 3:1-4) Ho sokoloha ha hae ho ne ho tla etsa ho hongata hore lelapa e be sebaka sa khatholoho le khotso. Empa, haeba ea sa lumelang a hanyetsa ka matla tumelo ea molekane oa hae ea lumelang hoo a ikhethelang ho arohana le eena, e be Mokreste a ka etsa eng? Haeba ea lumelang a ne a ka leka ho mo qobella hore a lule, ea sa lumelang o ne a ka ’na a etsa hore boemo e be bo boima hoo Mokreste a neng a tla hlokisoa khotso ka ho feletseng. Ka hona molemong oa khotso, molumeli a ka tlohela ea sa lumelang a ikela. (Mattheu 5:9) Ke feela ha molekane oa lenyalo ea sa lumelang a tloha ho ka thoeng: ‘Molimo o u bilelitse ho tsa khotso.’ Mantsoe ana a ke ke a sebelisoa ka nepo ho lokafatsa karohano ea balekane ba babeli ba Bakreste ka mabaka ao e seng a Mangolo kapa ka mabaka a bosaoana.

 5. Ke lipotso life tseo ho hlokahalang hore joale re nahane ka tsona?

⁵ Karohano e ’ngoe le e ’ngoe kapa tlhalano e ’ngoe le e ’ngoe e na le mabaka a eona, ’me ha ho “molao” o akaretsang mabaka ’ohle. Mokreste ea arohaneng kapa ea hlalaneng le molekane oa hae a ka ’na a thulana le mathata afe? Ho ka etsoa eng ka ’ona? Hona ba bang ba ka thusa joang?

Litlhoko tsa Maikutlo kapa tsa Likamano tsa Botona le Botšehali

 6. Mabapi le mathata, ho ka thoe’ng ka karohano le tlhalano?

⁶ Karohano kapa tlhalano e lumelloang ke Mangolo e tla lokisa mathata a itseng. Empa mehato e joalo hangata e fella ka ho felisa mathata a itseng ha ho mengoa a mang a itseng. Ka mohlala, Mokreste e mong ea hlalaneng le molekane oa hae o itse: “Ke sitoa ho ithiba ho leboha Jehova hore joale ke na le khotso. ” Empa o ile a lumela: “Ha ho bonolo ho hōlisa bana u le motsoali a le mong. Le hona ka linako tse ling motho o hlora haholo le ho tepella haholo. Le tabeng ea likamano tsa botona le botšehali ha ho bonolo. Motho o tlameha ho fetohela bophelong bo fapaneng ho hang.”a

 7. Ke hobane’ng ha Mokreste a lokela ho nahana ka hloko ka liphello tsa karohano le tlhalano?

⁷ Ka lebaka leo, haeba Mokreste a e-na le boikhethelo o lokela ho nahana ka hloko ka liphello tse ka ’nang tsa hlahisoa ke karohano kapa tlhalano. Ka mohlala, nahana ka litlhoko tsa maikutlo, mohlomong takatso ea mosali bakeng sa molekane oa motho e motona. (Bapisa Genese 3:16.) Mosali ea hlalaneng le molekane oa hae a ka ’na a ba le tšepo e matla ea ho nyaloa hape. Ba bang ba lakatsa ho lokoloha lenyalong le ba sotlang, empa na ba loketse ho amohela ’nete ea hore ho ka ’na ha se be le monyetla oa ho nyaloa hape?

 8. (a) Ka lebaka la 1 Ba-Korinthe 7:11, balekane ba Bakreste ba arohaneng ba lokela ho nahana eng ka thapelo? (b) Ke litlhoko life tse sa lokelang ho nkoa habobebe ha ho nahanoa ka karohano kapa tlhalano?

⁸ Pauluse o ile a ngola: “Leha . . . a se a mo hlalile, a itulele, a se ke a nyaloa; kapa a boelane le monna oa hae.” (1 Ba-Korinthe 7:11) Ka boiteko bo itseng, ho ka ’na ha e-ba le monyetla bakeng sa mosali ho ‘khutlelana’ le monna oa hae kapa ‘ho boelana le’ eena. Haeba balekane ba Bakreste ba arohana, ba lokela ho nahana ka botebo le ka thapelo ka ho boelana. Ho feta moo, ha baa lokela ho hlokomoloha ’nete ea hore litšusumetso tsa botona le botšehali li ka baka kotsi. Molimo o ka ba talima joang haeba ho hlōleha ha bona ho boelana ho fella ka ho oela boitšoarong bo bobe? Se bontšang kotsi ea sena ke phihlelo ea mosali e mong ea kolobelitsoeng. Kamor’a hore a hlale, o ile a qala ho laetsana le monna oa lefatše, nakoana kamorao ho moo a ima, ’me a khaoloa. Le hoja hamorao a ile a khutlisetsoa [phuthehong], phihlelo ea hae e hatisa bohlokoa ba ho ba hlokolosi le ho itšetleha ka thapelo ka Jehova ho qoba ho “siteloa Molimo.” (Genese 39:7-12) Hape ho totobetse hore litlhoko tsa maikutlo le tsa likamano tsa botona le botšehali ha lia lokela ho nkoa habobebe ha batho ba qala ho nahana ka ho arohana kapa ho hlalana.

Ho Hlora ho ka Fokotsoa

 9. Re ka thusa Bakreste ba arohaneng kapa ba hlalaneng joang hore ba loantše ho hlora?

⁹ Haeba karohano kapa tlhalano e ke ke ea qobjoa, balekane ba tla tlameha ho talimana le mathata ao hoo ho tlang ho a hlahisa. Ka mohlala, ho hlora ke bothata bo tebileng ba Bakreste ba bang ba arohaneng kapa ba hlalaneng. Ba bang ba ka etsa eng ka see? Ha e le hantle, baholo ba phutheho le ba bang ba ka bontša thahasello ea moea ho batho ba joalo, ba batla ho ba khothatsa. (Bapisa 1 Ba-Thessalonika 5:14.) Har’a lintho tse ling, nako le nako re ka mema batho bana le bana ba bona hore ba tle malapeng a rōna bakeng sa sejo se itekanetseng le moqoqo o hahang le malapa a rōna. Ha ho hlokahale hore ho etsoe mokete oa lijo tse ngata, hobane, “ho ja meroho feela moo lerato le leng teng, ho monate ho e-na le ho ja khomo e nonneng, moo ho nang le hloeano.” (Liproverbia 15:17) Nako eo ea mantsiboea e ka ’na ea akarelletsa ho pheta liphihlelo tse ileng tsa thabeloa tšebeletsong kapa ea akarelletsa thuto ea sehlopha ho lokisetsa seboka sa Bokreste.

10, 11. (a) Mokreste ea arohaneng kapa ea hlalaneng le molekane oa hae a ka thusoa ka tsela efe hape? (b) Ho na le lebaka lefe la ho ba hlokolosi?

¹⁰ Hore lelapa la lōna le be tšebeletsong ea tšimo le motsoali ea hlalaneng kapa ea arohaneng le molekane oa hae le bana ba hae, le hona ho ka thusa hore ba loantše ho hlora. Ha e le hantle, ba bang ba ke ke ba nka sebaka sa motsoali ea sieo, empa mosali e mong oa Mokreste ea hlalaneng le molekane oa hae o itse: “Mathata a ho hōlisa bana ba ka monna a le sieo ka tlung a fokotsehile haholo ka thuso ea baholo le bahlanka ka phuthehong ba ileng ba leka ho koala sekheo ka litsela tse molemo.”

¹¹ Leha ho le joalo, ho na le lebaka la ho ba hlokolosi. Khaitseli e mong o ile a lumela: “Kaha mora oa ka ha a na ntat’ae, moena e mong ka mosa o ile a mo thahasella haholo. . . . Ka qala ho bona kamoo a leng mosa a bileng a fanang kateng ho mora oa ka ’me litakatso tse fosahetseng tsa qala ho hōla ka hare ho ’na. Ho ne ho tšoana hantle le ha Davida a lakatsa ho hong hoo e neng e se ha hae.” (2 Samuele 11:1-4) Le hoja likamano tse mpe tsa botona le botšehali li sa ka tsa e-ba teng, mosali enoa o ile a soabela menahano ea hae le liketso tsa hae tse bontšang lerato le fosahetseng, a batla tšoarelo ea Jehova ’me a qhala setsoalle le moena enoa. Hona ho bontša hantle hakaakang bohlokoa ba ho hana litakatso tse fosahetseng le ‘ho tšaba tsohle tse tšoanang le bobe’!—1 Ba-Thessalonika 5:22; Ba-Galata 5:24.

12. Motho a ka fokotsa ho hlora ha hae ka ho nka khato efe e sebetsang?

¹² Ho hlora ho ka fokotsoa ka ho etsetsa batho ba bang lintho. Khaitseli e mong eo litlamo tsa hae tsa lenyalo li neng li khaohile o ile a re: “Haeba u tšoarehile ho hahamalla lintho tse itseng ’me u thusa ba bang, ha ho na sebaka sa ho iqenehela le ho hlora.” ‘Ho hahamalla lintho tse ling’ ho joalo ho etsoang ke motho ea arohaneng kapa ea hlalaneng le molekane oa hae ho ka ’na ha akarelletsa hore a meme lelapa le leng hore le mo etele ha hae mantsiboeeng a mang bakeng sa setsoalle se hahang moeeng. Haeba ho bonahala hona ho ke ke ha etsahala ka mabaka a lichelete kapa a mang, u ka ’na ua etela le ho khothatsa ba kulang kapa ba bang. Mohlomong hape u ka khona ho thusa ba hōlileng ka ho ba rekela kapa ka mesebetsi e fapa-fapaneng. Itele ka litsela tse joalo, ’me u tla ba le bopaki bo eketsehileng ba hore “ho nea ke leseho le fetisang la ho fuoa.”—Liketso 20:35.

13. Thuso e ’ngoe ea ho hlōla ho hlora ke efe?

¹³ Thuso e ’ngoe ea ho hlōla ho hlora ke hore ka mehla u etse boikhathatso ba ho kopanela le balumeli-’moho le uena mosebetsing oa ho bolela ka ’Muso. Khaitseli e mong o ile a lumela, “Ka linako tse ling, ke ikutloa ke hlorela ho ba le monna, empa ka tšebetso ea ka e eketsehileng ea tšimo le bolokolohi bo bocha ba ho kopanela le baena le bo-khaitseli, linako tse tjena li tla seoelo ’me li nka nako e khutšoanyane haholo.” Ho paka ka mehla ka ntlo le ntlo ho ka ’na ha isa maetong a ho boela le lithutong tsa mahae tsa Bibele le batho ba thahasellang, bao ba bang ba bona ba ka ’nang ba fetoha bahlanka ba inehetseng ba Jehova. Ha e le hantle, ho hlōla ho hlora hase lona lebaka la hore re kopanele tšebeletsong, empa e ka ’na ea e-ba lebaka le leng la mosebetsi ona o thabisang le o hlohonolofetseng.—Liproverbia 10:22.

14. Ke mesebetsi efe e lokelang ho ba le phello e molemo ho Bakreste ba arohaneng kapa ba hlalaneng le balekane ba bona?

¹⁴ Batho bohle ba Jehova ba ka rua molemo moeeng ka ho kopanela tšebeletsong, ba nka karolo libokeng tsa Bokreste, le ka ‘ho batla ’muso pele.’ (Mattheu 6:33) Kaha mesebetsi ena e hahang e na le phello e ntle ho bahlanka ba Jehova ka kakaretso, lintho tse joalo li ka haha le bona Bakreste ba arohaneng kapa ba hlalaneng le balekane ba bona. Che, mesebetsi ena e ke ke ea rarolla mathata ’ohle a bona, empa e lokela ho ntlafatsa pono ea bona.

Thapelo e Phetha Karolo ea Bohlokoa

15. Thapelo e ka nka karolo efe bophelong ba ba lokelang ho itloaetsa bosooa hape?

¹⁵ Khaitseli e mong oa Mokreste ea ileng a lokela ho itloaetsa bosooa hape o ile a thusoa ke “ho tšoareha tšebeletsong ea tšimo . . . le ho etela ba kulang, ba hōlileng, le ba khathetseng.” Empa o ile a eketsa: “Neng le neng ha ke ikutloa ke hlorile, ke etela ba bang ’me ke rapella matla, ke tseba hore Satane o tšoarehile haholo.” E, thapelo e tlohang botebong ba pelo ke ea bohlokoa haeba ho tla bolokoa botšepehi ho Molimo. Lithapelo tsa Bakreste ba arohaneng kapa ba hlalaneng le balekane ba bona li ka akarelletsa likōpo bakeng sa moea oa Molimo le tholoana ea ’ona ea boitšoaro e le hore litšusumetso tsa botona le botšehali li ka bolokoa taolong. (Luka 11:13; Ba-Galata 5:22, 23; Ba-Kolosse 3:5, 6) Ho feta moo, kaha ho etsa liqeto tse kileng tsa etsoa ke monna ho ka ’na ha baka mathata bakeng sa basali ba bang ba arohaneng kapa ba hlalaneng le balekane ba bona, mohlomong ho ka hlokahala hore le bona ba rapelle thuso ea Molimo hore ba etse liqeto tse bohlale litabeng le hore ba loane ka katleho le liteko tse fapa-fapaneng.—Jakobo 1:2-8.

16. Mabapi le ho arohana kapa ho hlalana, ho ka thoe’ng ka boikutlo ba ho ba molato?

¹⁶ Boikutlo ba ho ba molato bo ka ’na ba ipaka e le teko. Mokreste e mong o ile a lumela: “Ho ikutloa molato hoo u ho utloang nakong ea tlhalo, le haeba e se uena ea molato, ho ka ba boima haholo.” Ha e le hantle, boikutlo ba ho ba molato ke bo nang le lebaka haeba karohano kapa tlhalano e bile teng ka lebaka le sa utloahaleng hobane e mong a ile a hana ho phethahatsa litlamo tsa lenyalo. (1 Ba-Korinthe 7:3-5) Empa haeba karohano kapa tlhalano e bile teng ka lebaka la Mangolo kamor’a ho nahanoa ka thapelo, e ka ba ho loketseng ho rapella thuso ea Jehova ho hlōla boikutlo bo sa lokelang ba ho ba molato. Ho ka ’na ha eketsoa hore baholo ba phutheho ba lokela ho ba hlokolosi ho fana ka keletso e theiloeng Bibeleng le hore ba se ke ba sekamisa keletso ea bona ka tsela eo Mokreste a ka etsoang hore a ikutloe a le molato ka ho fumana kapa ka ho lumella karohano kapa tlhalo e lumelloang ke Bibele.

Ho Alosoa ke “Khotso ea Molimo”

17. Ke eng e ka thusang Bakreste bohle hore e be ba thabileng le ba tsitsitseng lefatšeng lee le khathatsehileng?

¹⁷ Bakreste ba arohaneng kapa ba hlalaneng hangata ba na le mathata a ikhethang. Empa, ho isa tekanyong e itseng, “lihloreho li le ling le tsena li ntse li hlahela banab’abo [rōna] ba lefatšeng.” (1 Petrose 5:6-11) Ka mohlala, tlhoriso e ama bohle ba sebeletsang Jehova, ’me Bakreste ba bangata ba thulana le mathata a lichelete kapa a bophelo, masoabi, meleko, le tse joalo. Ka lebaka leo, joaloka lipaki tse ling sa Jehova, ho hlokahala hore Mokreste ea arohaneng kapa ea hlalaneng le molekane oa hae a finyelle litlhokahalo tsa moea ka thuto ea Bibele, ho ba teng ka mehla libokeng, tšebeletso e mafolo-folo ea tšimo, le bophelo bo feletseng ba tšebeletso e halalelang, le ho rapela kamehla e le hore re lule haufi le Jehova. (Mattheu 5:3) Ho hlōleha ho etsa joalo ho ne ho tla senya bomoea ba Mokreste ofe kapa ofe, ha ‘ho batla ’muso pele’ ho nea paki e ’ngoe le e ’ngoe e tšepahalang ea Jehova tekanyo e hlokomelehang ea thabo le botsitso lefatšeng lena le khathatsehileng.

18. Ke lipotso life le mehato efe tse hlokang ho nahanoa ka botebo ke balekane ba arohaneng ba Bakreste?

¹⁸ Ho tsitsa ha rōna moeeng ho itšetlehile ka tšebeliso ea botho ea Lentsoe la Molimo. Ka baka leo, haeba u Mokreste ea arohaneng le molekane oa lenyalo eo le eena a inehetseng ho Molimo, na le nkile ka botebo keletso ea Pauluse e ho 1 Ba-Korinthe 7:10-16? Haholo-holo haeba karohano e tsoetse pele ka nako e teletsana, ke hantle ha le ka etsa poelano taba ea thapelo e tiileng. Hape u ka ’na ua ipotsa: Jehova o lebeletse eng ho ’na joaloka motho ea lenyalong? Na balekane ba Bakreste ha baa lokela ho etsa hore bophelo ba bona bo lumellane le litlhokahalo tsa bomolimo bakeng sa ba keneng lenyalong? Na e be ho ka etsahala hore e be ha re fumane tlhohonolofatso ea Jehova ka lebaka la ho hlōleha ho hlompha likano tsa rōna tsa lenyalo? Nahana feela ka molemo o ka ’nang oa finyelloa haeba le ne le ka buisana litaba ka boikokobetso, le rapela ka tieo, le ka ho sebetsa ka bohlale ho sebelisa Lentsoe la Molimo bophelong ba lōna. E ne e ka ba ho hotle hakaakang haeba ka bobeli ba lōna le ka rarolla mathata a lōna a lenyalo ’me la boela la thabela bophelo hammoho lapeng la khatholoho le khotso!

19. Ho ea ka Ba-Filippi 4:6, 7, ke ntho efe ea bohlokoa eo bahlanka bohle ba Jehova ba ka e thabelang?

¹⁹ Bahlanka bohle ba tšepahalang ba Jehova baa hloka e bile ba ka thabela ntho e ’ngoe ea bohlokoa—“khotso ea Molimo, e fetisang kutloisiso eohle.” Joaloka Bakreste, re ka ba le khotso ena ea bohlokoa haeba re ela hloko mantsoe a Pauluse: “Le se ke la belaella letho; empa nthong tsohle seo le se batlang, le ke le se tsebise Molimo ka thapelo le ka kōpo e nang le teboho. ’Me khotso ea Molimo, e fetisang kutloisiso eohle, e tla boloka lipelo tsa lōna le mehopolo ea lōna ho Jesu Kreste.”—Ba-Filippi 4:6, 7.

20. (a) “Khotso ea Molimo” ke eng? (b) Ho sa tsotellehe boemo ba rōna ba lenyalo, re lokela ho etsa eng?

²⁰ Khotso eo ke khutso le boiketlo tse fanoang ke Molimo, le har’a maemo a thata ka ho fetisisa. E tsoa kamanong e haufi le Jehova le tsebong ea hore re etsa se khahlisang mahlong a hae. Ba nang le “khotso ea Molimo” ba lumella moea oa hae hore o ba susumetse, ’me ha ba imeloe ke lipelaelo. Hobane’ng? Hobane baa tseba hore ha ho letho le lumelletsoeng hore le ba etsahalle e se ka tumello ea bomolimo. (Ba-Efese 4:30; bapisa Liketso 11:26.) Ka hona ebang re masooa kapa re lenyalong, re arohane kapa re hlalane, a re ananeleng “khotso ea Molimo.” Hape e se eka re ka ba le tšepo ho tšoana le Davida, ea kileng a bolela: “Ke sekama ka khotso, ke be ke ithoballe ka khotso, hobane, Jehova, ke uena u ’notši ea nkahisang boiketlong.”—Pesaleme ea 4:8.

[Mongolo o botlaaseng ba leqephe]

U ne u ka Arabela Joang?

◻ Ke tlas’a maemo afe ho ka thoeng: ‘Molimo o u bilelitse ho tsa khotso’?

◻ Ho hlora ho ka fokotsoa joang?

◻ Thapelo e Iokela ho phetha karolo efe bophelong ba Mokreste ea hlalaneng kapa ea arohaneng le molekane oa hae?

◻ U ka hlalosa joang “khotso ea Molimo” e alosang lipelo tsa bahlanka ba Jehova ba masooa, ba Ienyalong, ba arohaneng, kapa ba hlalaneng le balekane ba bona?

[Setšoantšo se leqepheng la 29]

Thapelo e ka tlisetsa Bakreste bohle ba tšepahalang “khotso ea Molimo” e tla alosa lipelo tsa bona le mehopolo ea bona