Bacha Baa Botsa . . .

Thapelo e ka Nthusa Joang?

“Ke thusitsoe ke thapelo hore ke khutlele tseleng e nepahetseng.”—Brad.a

BACHA ba bangata baa rapela—mohlomong hangata ho feta kamoo u nahanang kateng. Lipatlisiso tse Ileng tsa Etsoa ho Bacha ba Lilemo li 13 ho ea ho 17 United States li bontšitse hore karolo ea 56 lekholong ea bona e rapela pele ho lijo tsa motšehare. Lipatlisiso tse entsoeng ho bacha ba hōlileng li bontšitse hore karolo ea 62 lekholong ea bona e rapela letsatsi le leng le le leng.

Leha ho le joalo, ho bacha ba bangata thapelo e mpa e le tloaelo feela e se nang moelelo. Ke bacha ba fokolang ka palo ba nang le seo Bibele e reng ke ‘tsebo e nepahetseng ea Molimo.’ (Bakolose 1:9, 10) Ka lebaka leo, Molimo ha a phethe karolo e khōlō bophelong ba bona. Lipatlisisong tse ling ho ile ha botsoa bacha ba ka tlaase ho lilemo tse 20 hore na le ka mohla ba kile ba rapela Molimo pele ba etsa liqeto tsa bohlokoa. Ngoanana e mong o ile a arabela: “Kamehla ke rapela Molimo hore a nthuse hore ke khethe tsela e nepahetseng bophelong.” Leha ho le joalo, o ile a lumela: “Hona joale ha ke hopole qeto leha e le efe.” Kahoo, ha ho makatse hore ebe bacha ba bangata ba haelloa ke tšepo ea hore thapelo e na le matla leha e le afe kapa hore e tla ba tsoela molemo!

Leha ho le joalo, joaloka Brad, eo ho builoeng ka eena qalong, bacha ba likete ba utloile matla a thapelo. Le uena u ka a utloa! Sehlooho se fetileng se bontšitse lebaka leo ka lona re ka kholisehang hore Molimo o tla utloa lithapelo tsa rōna.b Joale potso ke ena, Thapelo e ka u thusa joang? Ntho ea pele, a re ke re hlahlobisiseng hore na Molimo o araba lithapelo tsa rōna joang.

Kamoo Molimo a Arabelang Lithapelo Kateng

Mehleng ea Bibele lithapelo tsa banna ba bang ba tšepahalang li ne li arabeloa ka ho toba—haesita le ka tsela ea mohlolo. Ka mohlala, ka mor’a hore Morena Ezekiase a tsebe hore o kulela lefu, o ile a etsa thapeli ho Molimo bakeng sa topollo. Molimo o ile a arabela: “Ke utloile thapelo ea hao. Ke bone meokho ea hao. Bona! kea u folisa.” (2 Marena 20:1-6) Ka tsela e tšoanang banna le basali ba bang ba tšabang Molimo ba ile ba bona ho kenella ha Molimo.—1 Samuele 1:1-20; Daniele 10:2-12; Liketso 4:24-31; 10:1-7.

Leha ho le joalo, esita le mehleng ea Bibele, ho hang ho kenella ha Molimo e ne e se ntho e tloaelehileng. Ka kakaretso, Molimo o ne a arabela lithapelo tsa bahlanka ba hae, eseng ka tsela ea mohlolo, empa ka ho ba thusa hore ba ka “tlala tsebo e nepahetseng ea thato ea hae ka bohlale bohle le kutloisiso ea moea.” (Bakolose 1:9, 10) E, Molimo o ne a thusa batho ba hae ka ho ba matlafatsa moeeng le boitšoarong—a ba sitsa ka bohlale le tsebo e le hore ba ka etsa liqeto tse bohlale. Ha Bakreste ba ne ba le boemong bo thata, Molimo o ne a sa tlose bothata boo ka pel’a bona. Ho e-na le hoo, o ne a ba fa “matla a fetang se tloaelehileng” e le hore ba ka tiisetsa!—2 Bakorinthe 4:7; 2 Timothea 4:17.

Ka ho tšoanang kajeno, mohlomong karabelo ea thapelo ea hao e ke ke ea e-ba ntho e ’ngoe e hapang tlhokomelo. Empa joalokaha a ile a etsa nakong e fetileng, Molimo a ka u fa moea oa hae o halalelang le ho u matlafatsa hore u sebetsane le boemo bo bong le bo bong boo u talimanang le bona. (Bagalata 5:22, 23) Ho etsa mohlala, a re ke re talime litsela tse ’nè tse tobileng tseo thapelo e ka u thusang ho tsona.

E ka U Thusa ha U Etsa Liqeto

Karen o ne a intša le mohlankana e mong ea neng a bonahala a e-na le lipakane tse phahameng tsa moea. O re: “Kamehla o ne a mpolella hore o batla ho ba moholo ka phuthehong.” Hoo ho ne ho utloahala e le ntho e ntle. Empa “o ne a bua haholo ka khoebo eo a neng a batla ho e qala le ka lintho tseo a neng a tla khona ho nthekela tsona. Ke ile ka qala ho belaella botšepehi ba hae.” Karen o ile a rapela ka taba ena. “Ke ile ka kōpa Jehova ka tieo hore a ntutubolle mahlo le ho mpontša sohle seo ke lokelang ho se tseba ka eena.”

Ka linako tse ling eona ketso eo ea ho rapela e molemo, hobane thapelo e ka u thusa hore u nahanisise ka lintho tse u amang ho ea ka pono ea Jehova. Empa Karen o ne a boetse a hloka keletso e sebetsang. Na o ne a tla fumana karabelo ea mohlolo? Ak’u nahane ka tlaleho ea Bibele e mabapi le Morena Davida. Ha a utloa hore motsoalle oa hae ea tšeptjoang Akitofele o ne a ntse a eletsa mora oa hae oa lehlabaphio Absalome, Davida o ile a rapela: “Ka kōpo, Jehova, fetola keletso ea Akitofele booatla!” (2 Samuele 15:31) Empa Davida o ile a boela a sebetsa tumellanong le thapelo ea hae. O ile a tšepela motsoalle oa hae Hushai boikarabelo bona: “Joale u nyopise keletso ea Akitofele bakeng sa ka.” (2 Samuele 15:34) Ka tsela e tšoanang, Karen o ile a nka bohato tumellanong le thapelo ea hae ka ho buisana le moholo oa Mokreste ea hōlileng le ea neng a tseba mohlankana oa hae. O ile a hla a bua ntho eo Karen a neng a e tšaba: Mohlankana oa Karen o ne a sa tsoele pele moeeng.

Karen o re: “Boemo bona bo ile ba ntutubolla mahlo ’me ka elelloa matla a thapelo.” Masoabi ke hore mohlankana oa hae o ile a hahamalla maruo ’me a khaotsa ho sebeletsa Molimo. Karen o re: “Haeba ke ne ke nyetsoe ke eena, nka be ke e-tla libokeng tsa Bokreste ke le mong.” Thapelo e ile ea thusa Karen ho etsa qeto e bohlale.

Thapelo e ka U Thusa ho Laola Maikutlo a Hao

Ho Liproverbia 29:11 Bibele e re: “Ea hlokang kelello o hlahatsa moea oohle oa hae, empa ea bohlale o o boloka o khutsitse ho fihlela qetellong.” Bothata ke hore batho ba bangata kajeno ba phela ka tlas’a khatello e matla haholo ea maikutlo ’me hangata ba lahleheloa ke taolo—ka linako tse ling litholoana e ba tse tšabehang. Brian e monyenyane oa hopola: “Ke ne ke e-na le bothata le mosebetsi-’moho le ’na. Ka letsatsi le leng o ile a ’ntšetsa thipa.” U ka be u entse eng? Brian o ile a rapela. O re: “Jehova o ile a nthusa hore ke se ke ka phahamisa matšoafo, ’me ke ile ka bua le mosebetsi-’moho le ’na hore a tlohele thipa eo. O ile a lahlela thipa eo fatše eaba oa tsamaea.” Ho laola maikutlo a hae ho ile ha thibela Brian hore a qobe ho lumella bohale, ’me sena se ile sa pholosa bophelo ba hae.

Hase kamehla u ka iphumanang u tšosoa ka thipa. Empa ho na le maemo a mangata bophelong ao u tla lokela hore u laole maikutlo a hao ho ’ona. Thapelo e ka u thusa hore u lule u khobile matšoafo.

Thapelo e Tla U Thusa ha U le Matšoenyehong

Barbara o hopola hore lilemong tse seng kae tse fetileng o ile a “feta har’a liteko.” O re: “Mosebetsi oa ka, lelapa, metsoalle—ha ho letho le neng le loka. Ke ne ke sa tsebe hore na ke etse’ng.” Ka tloaelo, Barbara o ile a rapella thuso. Empa ho ne ho e-na le bothata. O re: “Ke ne ke sa tsebe seo ke neng ke lokela ho se kōpa ho Jehova. Qetellong ke ile ka kōpa khotso ea kelello. Bosiu bo bong le bo bong ke ne ke kōpa hore a nthuse hore ke se ke ka tšoenyeha ka ntho e ’ngoe le e ’ngoe.”

Thapelo eo e ile ea mo thusa joang? O re: “Ka mor’a matsatsi a ’maloa, ke ile ka lemoha hore le hoja mathata a ka a ne a e-s’o fele, ke ne ke se ke sa ameha kapa ke sa tšoenyeha ka ’ona joaloka pele.” Bibele ea tšepisa: “Likōpo tsa lōna tse matla li ke li tsebisoe Molimo; ’me khotso ea Molimo e fetang monahano oohle e tla lebela lipelo tsa lōna le matla a lōna a kelello ka Kreste Jesu.”—Bafilipi 4:6, 7.

Thapelo e ka U Thusa ho Atamela Haufi le Molimo

Ak’u nahane ka phihlelo ea mocha e mong ea bitsoang Paul. O re: “Ke ne ke sa tsoa fallela ha beng ka ’na. Bosiung bo bong ke ile ka iphumana ke tepeletse maikutlo haholo. Ke ne ke sa tsoa qeta sekolong se phahameng ’me ke ne ke hlolohetsoe metsoalle eohle ea ka. Mahlo a ka a ile a tlala likeleli ha ke hopola linako tse monate tseo re neng re li thabela hammoho.” E ka ba Paul o ne a tla etsa joang? Ka lekhetlo la pele, o ile a rapela ka matla. O re: “Ke ile ka phetlela Jehova sefuba sa ka ’me ka mo kōpa hore a mphe matla le khotso ea kelello.”

Phello e bile efe? Paul oa hopola: “Hoseng ho hlahlamang, ke ile ka tsoha ke imolohile haholo ho feta leha e le neng bophelong ba ka. Ke ile ka fetoha ho tloha boemong bo utloisang bohloko ba kelello ’me ka ba le ‘khotso ea Molimo e fetang monahano oohle.’” Kaha pelo ea hae e ne e se e kokobetse, Paul o ne a ka sheba lintho ka tsela e nepahetseng ea maikutlo. Leha ho le joalo, kapele o ile a lemoha hore ‘linako tse monate’ tseo ba neng ba ee ba be le tsona ha e le hantle e ne e se linako tse molemo. (Moeklesia 7:10) Ha e le hantle, “metsoalle” eo a neng a e hlolohetsoe hakana e ne e se metsoalle e nang le tšusumetso e molemo ho eena.

Habohlokoa le ho feta, Paul o ile a latsoa tlhokomelo ea Jehova. O ile a latsoa ’nete ea mantsoe a Jakobo 4:8: “Atamelang ho Molimo, ’me o tla atamela ho lōna.” Ho Paul ena e ne e le phetoho e khōlō. O ile a susumelletseha ho beha Jehova ka pele ho ntho e ’ngoe le e ’ngoe bophelong ba hae le ho inehela ho eena.

Buisana le Molimo!

Liphihlelo tsena tse khothatsang li fana ka tiiso ea hore thapelo e ka u thusa. Ka ho hlakileng, sena se etsahala hafeela u batla ho tseba Molimo ka tieo, u hlaolela botsoalle le eena. Ka masoabi, bacha ba bangata ba khaotsa ho etsa joalo. Carissa o hōliselitsoe lelapeng la Bokreste. Empa oa lumela: “Ke nahana hore ke qalile ho utloisisa botsoalle ba rōna bo ikhethang le Jehova ka ho feletseng lilemong tse ’maloa tse fetileng.” Brad, eo ho builoeng ka eena qalong, o hōtse e le Mokreste empa o ile a tlohela borapeli ba ’nete ka lilemo tse ngata. O re: “Ke ile ka khutlela ho Jehova ka mor’a hore ke hlokomele se ntahlehetseng. Joale kea tseba kamoo bophelo bo ka bang sehlōhō kateng le kamoo bo ka bang bolutu kateng kantle le botsoalle boo.”

Leha ho le joalo, u se ke ua emela tlokotsi pele u ka atamela haufi le Molimo. Qala ho buisana le eena hona joale—kamehla! (Luka 11:9-13) ‘Tšollela pelo ea hao ka pel’a hae.’ (Pesaleme ea 62:8) U tla fumana kapele hore e hlile thapelo e ka u thusa!

[Mongolo o botlaaseng ba leqephe]

[Lebokose/Litšoantšo tse leqepheng la 25]

Thapelo e ka U Thusa ho

● Etsa liqeto tse molemo

● Lula u khobile matšoafo ha u le ka tlas’a khatello ea kelello

● Imoloha matšoenyehong

● Atamela haufi le Molimo