Khaolo ea 3
Linotlolo Tse Peli Tse Lebisang Lenyalong le Tšoarellang
1, 2. (a) Lenyalo le ne le reretsoe ho tšoarella halelele hakae? (b) See se ka etsahala joang?
HA Molimo a ne a kopanya monna oa pele le mosali oa pele ka lenyalo, ho ne ho se na pontšo ea hore kopano eo e ne e tla ba ea nakoana feela. Adama le Eva ba ne ba lokela ho ba ’moho bophelo bohle. (Genese 2:24) Tekanyetso ea Molimo bakeng sa lenyalo le hlomphehang ke ho kopanya motho a le mong e motona le a le mong e motšehali. Ke boitšoaro ba botona le botšehali bo feteletseng feela ka lehlakoreng la molekane e mong kapa ka bobeli bo fanang ka motheo oa Mangolo bakeng sa tlhalo e nang le monyetla oa ho kena lenyalong hape.—Matheu 5:32.
2 Na ho ka etsahala hore batho ba babeli ba phele hammoho ka thabo ka nako e telele e sa feleng? E, ’me Bibele e khetholla lintlha kapa linotlolo tsa bohlokoa tse peli, tse thusang hore sena se etsahale. Haeba bobeli monna le mosali ba li sebelisa, ba tla notlolla monyako o kenang thabong le mahlohonolong a mangata. Linotlolo tsee ke life?
SENOTLOLO SA PELE
3. Balekane ba lenyalo ba lokela ho hlaolela mefuta efe e meraro ea lerato?
3 Senotlolo sa pele ke lerato. Ho thahasellisang ke hore ho na le mefuta e sa tšoaneng ea lerato e khetholloang ka Bibeleng. Le leng ke kameho e mofuthu ea botho ho e mong, mofuta oa lerato le teng pakeng tsa metsoalle e haufi. (Johanne 11:3) Le leng ke lerato le hōlang pakeng tsa litho tsa lelapa. (Baroma 12:10) La boraro ke lerato leo motho a bang le lona ho setho se seng sa bong bo fapaneng. (Liproverbia 5:15-20) Ka ho hlakileng, mefuta ena kaofela e lokela ho hlaoleloa ke monna le mosali. Empa ho na le mofuta oa bone oa lerato, oa bohlokoa haholoanyane ho feta e meng.
4. Mofuta oa bone oa lerato ke ofe?
4 Ka puo ea pele ea Mangolo a Segerike a Bokreste, lentsoe bakeng sa mofuta ona oa bone oa lerato ke a·gaʹpe. Lentsoe leo le sebelisitsoe ho 1 Johanne 4:8, moo re bolelloang hore: “Molimo ke lerato.” Ka sebele, “rea rata, hobane [Molimo] o ile a re rata pele.” (1 Johanne 4:19) Mokreste o hlaolela lerato le joalo pele ho Jehova Molimo ebe ho latela batho-’moho le eena. (Mareka 12:29-31) Lentsoe a·gaʹpe le boetse le sebelisoa ho Baefese 5:2, e reng: “Le tsoele pele ho tsamaea leratong, feela joalokaha Kreste le eena a ile a le rata ’me a nehelana ka eena ka boeena bakeng sa lōna.” Jesu o ile a bolela hore mofuta ona oa lerato o ne o tla khetholla balateli ba hae ba ’nete: “Ka sena bohle ba tla tseba hore le barutuoa ba ka, haeba le e-na le lerato [a·gaʹpe] har’a lōna.” (Johanne 13:35) Hape, hlokomela tšebeliso ea a·gaʹpe ho 1 Bakorinthe 13:13: “Ho sala tumelo, tšepo, lerato, tsena tse tharo; empa e khōlō ka ho fetisisa ho tsena ke lerato [a·gaʹpe].”
5, 6. (a) Ke hobane’ng ha lerato le feta tumelo le tšepo? (b) Ke mabaka afe a tlang ho etsa hore lerato le thuse hore lenyalo le tšoarelle?
5 Ke eng e etsang hore lerato lee la a·gaʹpe le be leholoanyane ho feta tumelo le tšepo? Le laoloa ke melao-motheo—melao-motheo e nepahetseng—e fumanoang Lentsoeng la Molimo. (Pesaleme ea 119:105) Ke kameho e se nang boithati bakeng sa ho etsetsa ba bang se nepahetseng le se molemo mahlong a Molimo, ho sa tsotellehe hore na ea e amohelang ho bonahala e mo loketse kapa che. Lerato le joalo le nolofalletsa balekane ba lenyalo ho latela keletso ea Bibele: “Tsoelang pele le mamellana le ho tšoarelana ka bolokolohi haeba leha e le mang a e-na le sesosa sa pelaelo khahlanong le e mong. Esita le joalokaha Jehova a ile a le tšoarela ka bolokolohi, le etse joalo le lōna.” (Bakolose 3:13) Balekane ba lenyalo ba ratanang ba lokela ho ba le “lerato [a·gaʹpe] le matla haholo e mong ho e mong,” le ho le hlaolela, “hobane lerato le koahela libe tse ngata haholo.” (1 Petrose 4:8) Hlokomela hore lerato le koahela liphoso. Ha le li tlose, kaha ha ho motho ea sa phethahalang ea ke keng a hloka phoso.—Pesaleme ea 130:3, 4; Jakobo 3:2.
6 Ha banyalani ba hlaolela lerato le joalo ho Molimo le ho e mong ho e mong, lenyalo la bona le tla tšoarella ’me e be le thabileng, hobane “lerato ha le fele le ka mohla.” (1 Bakorinthe 13:8) Lerato ke “tlamo e phethahetseng ea kopano.” (Bakolose 3:14) Haeba u lenyalong, uena le molekane oa hao le ka hlaolela mofuta oo oa lerato joang? Balang Lentsoe la Molimo hammoho, ’me le bue ka lona. Ithuteng mohlala oa Jesu oa lerato ’me le leke ho mo etsisa, ho nahana le ho nka bohato joaloka eena. Ho phaella moo, kopanelang libokeng tsa Bokreste, moo ho rutoang Lentsoe la Molimo. ’Me le rapelle thuso ea Molimo hore le hōlise mofuta ona o phahameng oa lerato, oo e leng tholoana ea moea o halalelang oa Molimo.—Liproverbia 3:5, 6; Johanne 17:3; Bagalata 5:22; Baheberu 10:24, 25.
SENOTLOLO SA BOBELI
7. Tlhompho ke eng, hona ke mang ea lokelang ho bontša tlhompho lenyalong?
7 Haeba batho ba babeli ba nyalaneng ba hlile ba ratana, hape ba tla boetse ba hlomphane, ’me tlhompho ke senotlolo sa bobeli se lebisang lenyalong le thabileng. Tlhompho e hlalosoa e le “ho nahanela ba bang, ho ba tlōtla.” Lentsoe la Molimo le eletsa Bakreste bohle, ho akarelletsa banna le basali: “Ho bontšeng tlhompho e mong ho e mong etellang pele.” (Baroma 12:10) Moapostola Petrose o ile a ngola: “Lōna banna, le tsoele pele ho lula le [basali ba lōna] ka mokhoa o tšoanang ho ea ka tsebo, le ba abela tlhompho joaloka sejana se fokolang haholoanyane, se setšehali.” (1 Petrose 3:7) Mosali o eletsoa hore a be “le tlhompho e tebileng ho monna oa hae.” (Baefese 5:33) Haeba u batla ho hlompha motho e mong, u ba mosa ho motho eo, u hlompha seriti sa motho eo le maikutlo a hae a boletsoeng ka ho hlaka, ’me u lula u loketse ho phethahatsa kōpo leha e le efe e utloahalang e etsoang ho uena.
8-10. Ke ka litsela life tlhompho e tlang ho thusa ho etsa hore kopano ea lenyalo e be e tsitsitseng le e thabileng?
8 Ba lakatsang ho thabela lenyalo le thabileng ba bontša balekane ba bona tlhompho ka hore ebe ba “behile leihlo, eseng thahasellong ea botho litabeng tsa [bona] feela, empa hape le thahasellong ea botho ho tsa [balekane ba bona].” (Bafilippi 2:4) Ha ba ipatlele se molemo ho bona feela—e leng hoo e neng e tla ba boithati. Ho e-na le hoo, ba boetse ba nahanela balekane ba bona se molemohali. Ka sebele, ba nka seo e le ntho ea pele.
9 Tlhompho e tla thusa balekane ba lenyalo hore ba amohele ho se tšoane ha maikutlo. Hase ntho e utloahalang ho lebella hore batho ba babeli ba be le maikutlo a tšoanang nthong e ’ngoe le e ’ngoe. Ntho eo e ka bang ea bohlokoa ho monna e ka ’na ea se ke ea e-ba ea bohlokoa ho mosali, ’me seo mosali a se ratang e ka ’na ea se ke ea e-ba seo monna a se ratang. Empa e mong le e mong o lokela ho hlompha maikutlo le likhetho tsa e mong, hafeela tsena li le ka hare ho meeli ea melao ea Jehova le melao-motheo ea hae. (1 Petrose 2:16; bapisa le Filemone 14.) Ho feta moo, e mong le e mong o lokela ho hlompha seriti sa e mong ka ho se mo etse ntho e nyenyefatsoang ka mesoaso, ebang ke phatlalatsa kapa lekunutung.
10 E, lerato ho Molimo le ho ratana hammoho le ho hlomphana ke linotlolo tse peli tsa bohlokoa lenyalong le atlehileng. Li ka sebelisoa joang libakeng tse ling tsa bohlokoahali bophelong ba lenyalo?
BOHLOOHO BO KANG BA KRESTE
11. Ho ea ka Mangolo, hlooho ke mang lenyalong?
11 Bibele e re bolella hore monna o bōpiloe a e-na le litšobotsi tse neng li tla mo etsa hlooho e atlehileng ea lelapa. E le hlooho, monna o ne a tla ikarabella ka pel’a Jehova bakeng sa bophelo ba moea le ba nama ba mosali oa hae le bana ba hae. O ne a tla lokela ho etsa liqeto tse itekanetseng tse bonahatsang thato ea Jehova ’me e be mohlala o motle oa boitšoaro ba bomolimo. “Basali a ba ipehe tlas’a banna ba bona joaloka ho Morena, hobane monna ke hlooho ea mosali oa hae joalokaha Kreste le eena e le hlooho ea phutheho.” (Baefese 5:22, 23) Leha ho le joalo, Bibele e bolela hore monna le eena o na le hlooho, Ea nang le matla a ho laela holim’a hae. Moapostola Pauluse o ile a ngola: “Ke batla hore le tsebe hore hlooho ea monna e mong le e mong ke Kreste; hape hlooho ea mosali ke monna; hape hlooho ea Kreste ke Molimo.” (1 Bakorinthe 11:3) Monna ea bohlale o ithuta ho sebelisa bohlooho ka ho etsisa hlooho ea hae, Kreste Jesu.
12. Jesu o ile a beha mohlala ofe o motle oa ho bontša boikokobetso le ho sebelisa bohlooho?
12 Jesu le eena o na le hlooho, Jehova, ’me o ikokobeletsa Eena ka nepo. Jesu o ile a re: “Ke batla, eseng thato ea ka, empa thato ea ea nthomileng.” (Johanne 5:30) Ke mohlala o babatsehang hakaakang! Jesu ke “letsibolo la pōpo eohle.” (Bakolose 1:15) E ile ea e-ba Mesia. O ne a lokela ho ba Hlooho ea phutheho ea Bakreste ba tlotsitsoeng le ho ba Morena ea khethiloeng oa ’Muso oa Molimo, ka holim’a mangeloi ’ohle. (Bafilippi 2:9-11; Baheberu 1:4) Ho sa tsotellehe boemo bo joalo bo phahameng le litebello tse joalo tse phahameng, monna enoa Jesu o ne a se bohale, a tenyetseha kapa e se ea batlang ho fetang se lebeletsoeng. E ne e se mohatelli, ea hopotsang barutuoa ba hae khafetsa hore ba lokela ho mo utloa. Jesu o ne a le lerato a bile a e-na le kutloelo-bohloko, haholo-holo ho ba hateletsoeng. O ile a re: “Tloong ho ’na, lōna bohle ba sehlang le ba imetsoeng, ’me ka sebele ke tla le khatholla. Jarang joko ea ka ’me le ithute ho ’na, kaha ke na le maikutlo a bonolo ’me ke ikokobelitse pelong, ’me le tla fumanela lisoule tsa lōna khatholoho. Etsoe joko ea ka e mosa le mojaro oa ka o bobebe.” (Matheu 11:28-30) E ne e le ntho e thabisang ho ba moo a leng teng.
13, 14. Monna ea lerato o tla sebelisa bohlooho ba hae joang, a etsisa Jesu?
13 Monna ea lakatsang bophelo ba lelapa bo thabileng o etsa hantle ho nahana ka litšobotsi tse ntle tsa Jesu. Monna ea molemo ha a bohale ’me ha a hatelle, a sebelisa bohlooho ba hae e le molamu oa ho khahlapetsa mosali oa hae. Ho e-na le hoo, oa mo rata ebile oa mo hlompha. Haeba Jesu a ne a “ikokobelitse pelong,” monna o na le lebaka le leholoanyane la ho etsa joalo hobane, ho fapana le Jesu, eena o etsa liphoso. Ha a li etsa, o batla hore mosali oa hae a utloisise. Ka hona, monna ea ikokobelitseng o lumela liphoso tsa hae, le hoja mantsoe, “Ke soabile; u ne u nepile,” ho ka ’na ha e-ba thata ho a bua. Mosali o tla ho fumana ho le bonolo ho hlompha bohlooho ba monna ea inyenyefatsang le ea ikokobetsang ho feta ba ea ikhohomosang le ea manganga. Ka lehlakoreng le leng, mosali ea hlomphang le eena o ikōpela tšoarelo ha a fositse.
14 Molimo o bōpile mosali a e-na le litšobotsi tse ntle tseo a ka li sebelisang ho tlatsetseng lenyalong le thabileng. Monna ea bohlale o tla hlokomela sena ’me a ke ke a mo khina. Basali ba bangata ba na le tšekamelo ea ho ba le kutloelo-bohloko le ho ameha maikutlo kapele haholoanyane, e leng litšoaneleho tse hlokahalang bakeng sa ho hlokomela lelapa le ho hōlisa likamano tsa batho. Hangata, mosali ke setsebi tabeng ea ho etsa hore lehae e be sebaka se thabisang ho phela ho sona. “Mosali ea khabane” ea hlalositsoeng ho Liproverbia khaolo ea 31 o ne a e-na le litšoaneleho tse ngata tse hlollang le litalenta tse babatsehang, ’me lelapa la hae le ne le rua molemo ka botlalo ho tsona. Hobane’ng? Hobane pelo ea monna oa hae ‘e ne e mo tšepa.’—Liproverbia 31:10, 11.
15. Monna a ka bontša lerato le tlhompho tse kang tsa Kreste ho mosali oa hae joang?
15 Meetlong e meng, matla a ho laela a monna a hatisoa haholo, hoo le ho mo botsa potso feela ho nkoang e le ho hloka hlompho. A ka ’na a tšoara mosali oa hae joalokaha eka ke lekhoba. Tšebeliso e joalo e fosahetseng ea bohlooho e fella ka kamano e mpe e seng le mosali oa hae feela empa hape le Molimo. (Bapisa le 1 Johanne 4:20, 21.) Ka lehlakoreng le leng, banna ba bang ba hlokomoloha ho etella pele ’me ba lumella basali ba bona hore ba buse ka lapeng. Monna ea ikokobeletsang Kreste ka nepo ha a tlatlape mosali oa hae kapa ho mo amoha seriti. Ho e-na le hoo, o etsisa lerato la boitelo la Jesu ’me o etsa joalokaha Pauluse a elelitse: “Banna, le tsoele pele le rata basali ba lōna, feela joalokaha Kreste le eena a ile a rata phutheho ’me a nehelana ka eena ka boeena bakeng sa eona.” (Baefese 5:25) Kreste Jesu o ne a rata balateli ba hae hoo a ileng a ba shoela. Monna ea molemo o tla leka ho etsisa boikutlo boo bo se nang boithati, a batla se molemo ho mosali oa hae, ho e-na le ho ba ea batlang ho fetang se lebeletsoeng ho eena. Ha monna a ikokobeletsa Kreste ’me a bonahatsa lerato le kang la Kreste le tlhompho, mosali oa hae o tla susumelletseha ho ikokobelletsa eena.—Baefese 5:28, 29, 33.
BOIKOKOBETSO BA BOSALI
16. Mosali o lokela ho bonahatsa litšoaneleho life kamanong ea hae le monna oa hae?
16 Nakoana ka mor’a hore Adama a bōptjoe, “Jehova Molimo a tsoela pele ho re: ‘Ha ho hotle hore monna a lule a le mong. Ke tla mo etsetsa mothusi, e le motlatsi oa hae.’” (Genese 2:18, NW) Molimo o ile a bōpa Eva e le “motlatsi,” e seng eo a qothisanang lehlokoa le e mong. Lenyalo le ne le sa lokela ho ba joaloka sekepe se nang le batsamaisi ba babeli ba qothisanang lehlokoa. Monna o ne a lokela ho sebelisa bohlooho ka lerato, ’me mosali o ne a lokela ho bonahatsa lerato, tlhompho le ho ikokobetsa ka boithatelo.
17, 18. Ke ka litsela life mosali e ka bang mothusi oa sebele ho monna oa hae?
17 Leha ho le joalo, mosali ea molemo hase feela ea ikokobetsang. O leka ho ba mothusi oa sebele, ea tšehetsang monna oa hae liqetong tseo a li etsang. Ho hlakile hore ho ba bonolo haholoanyane ho eena ha a lumellana le liqeto tsa monna. Empa esita leha a sa lumellane le tsona, tšehetso ea hae e ka thusa hore qeto ea monna e be le phello e atlehileng.
18 Mosali a ka thusa monna oa hae hore e be hlooho e molemo ka litsela tse ling. A ka bontša kananelo bakeng sa boiteko ba monna ha a etella pele, ho e-na le ho mo nyatsa-nyatsa kapa a mo etsa hore a ikutloe hore a ke ke a mo khotsofatsa le ka mohla. Ha a sebetsana le monna oa hae ka tsela e ntle, o lokela ho hopola hore ‘moea o thōtseng le o bonolo ke oa bohlokoa haholo mahlong a Molimo,’ e seng feela mahlong a monna oa hae. (1 Petrose 3:3, 4; Bakolose 3:12) Ho thoe’ng haeba monna e se molumeli? Hore na ke eena kapa che, Mangolo a khothaletsa basali hore “ba rate banna ba bona, ba rate bana ba bona, e be ba hlaphohetsoeng kelellong, ba hloekileng, basebetsi malapeng, ba molemo, ba ipehang tlas’a banna ba bona, e le hore ho se ke ha buuoa ka ho nyefola ka lentsoe la Molimo.” (Tite 2:4, 5) Haeba ho hlahella litaba tsa letsoalo, monna ea sa lumelang ho ka etsahala hore a hlomphe boemo ba mosali oa hae haeba taba e behoa “ka maikutlo a bonolo le tlhompho e tebileng.” Banna ba bang ba sa lumelang ba ’nile ba “haptjoa ka ntle ho lentsoe ka boitšoaro ba basali ba bona, kahobane e bile lipaki tse boneng ka mahlo tsa boitšoaro [ba bona] bo hloekileng hammoho le tlhompho e tebileng.”—1 Petrose 3:1, 2, 15; 1 Bakorinthe 7:13-16.
19. Ho thoe’ng haeba monna a kōpa mosali oa hae hore a tlōle molao oa Molimo?
19 Ho thoe’ng haeba monna a kōpa mosali oa hae hore a etse ntho e thibetsoeng ke Molimo? Haeba hoo ho etsahala, o tlameha ho hopola hore Molimo ke ’Musi oa hae ea ka sehloohong. O nka seo baapostola ba ileng ba se etsa e le mohlala ha ba ne ba kōptjoa ke ba nang le matla a ho laela hore ba tlōle molao oa Molimo. Liketso 5:29 ea pheta: “Petrose le baapostola ba bang ba araba ba re: ‘Re lokela ho mamela Molimo e le ’musi ho e-na le batho.’”
PUISANO E NTLE
20. Ke karolo efe ea bohlokoa moo lerato le tlhompho li hlokahalang?
20 Lerato le tlhompho ke tsa bohlokoa karolong e ’ngoe ea lenyalo—puisano. Monna ea lerato o tla qoqa le mosali oa hae ka mesebetsi ea mosali, mathata a hae le maikutlo a hae litabeng tse sa tšoaneng. Mosali o hloka sena. Monna ea iphang nako ea ho buisana le mosali oa hae ’me a hlile a mamela seo a se buang o bontša lerato la hae le tlhompho ho eena. (Jakobo 1:19) Basali ba bang ba belaela ka hore banna ba bona ba qeta nako e fokolang haholo ba qoqa le bona. Hoo hoa soabisa. Ke ’nete, linakong tsena tse maphatha-phathe, banna ba ka ’na ba sebetsa lihora tse telele ba le sieo hae, ’me maemo a moruo a ka ’na a fella ka hore le basali ba bang ba sebetse. Empa banyalani ho hlokahala ba ipolokele nako. Ho seng joalo, e mong le e mong a ka ’na a iketsetsa lintho ka ntle ho thuso ea e mong. Ho ka lebisa mathateng a tebileng haeba ba ikutloa ba qobelleha ho batla setsoalle se nang le kutloelo-bohloko kantle ho tokisetso ea lenyalo.
21. Puo e loketseng e tla thusa ho boloka lenyalo le thabileng joang?
21 Tsela eo basali le banna ba buisanang ka eona ke ea bohlokoa. “Puo tse ntle . . . li monate moeeng oa motho, li matlafatsa masapo a hae.” (Liproverbia 16:24) Ho sa natsoe hore na molekane e mong ke molumeli kapa che, keletso ea Bibele ea sebetsa: “Seo le se buang ka mehla a e be se nang le mosa, se nōkiloeng ka letsoai,” ke hore, se hlabosang. (Bakolose 4:6) Ha e mong a ile a thatafalloa ke lintho letsatsing leo, mantsoe a seng makae a mosa, a kutloelo-bohloko a tsoang ho molekane oa motho a ka etsa ho hoholo. “Polelo e builoeng ka motsotso o tšoanelehang, e joalo ka liapole tsa khauta pitsaneng ea silefera.” (Liproverbia 25:11) Molumo oa lentsoe le khetho ea mantsoe ke tsa bohlokoa haholo. Ka mohlala, ka mokhoa o bontšang ho halefa, o batlang ho fetang se lebeletsoeng, e mong a ka ’na a bolella e mong: “Koala lemati leno!” Empa mantsoe aa ke a “nōkiloeng ka letsoai” hakae, a builoeng ka lentsoe le bonolo le le utloisisang, “Na u ka koala lemati leo, ka kōpo?”
22. Ho hlokahala hore banyalani ba be le boitšoaro bofe e le hore ba ka boloka puisano e ntle?
22 Puisano e ntle ea tsoella ha ho e-na le mantsoe a builoeng ka bonolo, chebahalo e mosa le boitšisinyo ba ’mele, mosa, kutloisiso le bonolo. Ka ho sebetsa ka thata ho boloka puisano e ntle, monna le mosali ba tla ikutloa ba lokolohile ho tsebahatsa seo ba se hlokang, ’me e ka ba mohloli oa matšeliso le thuso e mong ho e mong linakong tsa ho sareloa le ho hatelleha kelellong. Lentsoe la Molimo lea khothaletsa: “Le bue ka mokhoa o tšelisang le lisoule tse tepeletseng maikutlo.” (1 Bathesalonika 5:14) Ho tla ba le linako tseo monna a tlang ho nyahama le linako tseo e tlang ho ba mosali. Ba ka ‘bua ka mokhoa o tšelisang,’ ba hahana.—Baroma 15:2.
23, 24. Lerato le tlhompho li tla thusa joang ha ho e-na le ho se lumellane? Fana ka mohlala.
23 Balekane ba lenyalo ba bonahatsang lerato le tlhompho ba ke ke ba sheba ho se lumellane ho hong le ho hong e le phephetso. Ba tla sebetsa ka thata hore ba se ke ba ‘halefelana ka matla.’ (Bakolose 3:19) Ka bobeli ba lokela ho hopola hore “karabo e bonolo e thethefatsa bohale.” (Liproverbia 15:1) E ba hlokolosi hore u se ke ua nyenyefatsa kapa ua nyatsa molekane ea tšollang maikutlo a pelo. Ho e-na le hoo, talima lipolelo tse joalo e le monyetla oa ho fumana temohisiso maikutlong a e mong. Le le hammoho, lekang ho rarolla liphapang ’me le fihlele qeto e lumellanang.
24 Hopola ketsahalo ea ha Sara a ne a buella tharollo bothateng bo itseng ho monna oa hae, Abrahama, ’me e sa lumellane le maikutlo a hae. Empa, Molimo o ile a bolella Abrahama: ‘Polelo tsohle, u mpe u li mamele.’ (Genese 21:9-12) Abrahama o ile a ho etsa, ’me o ile a hlohonolofatsoa. Ka ho tšoanang, haeba mosali a hlahisa ho hong ho fapaneng le hoo monna oa hae a ho nahanneng, bonyane monna o lokela ho mamela. Ka nako e tšoanang, mosali ha aa lokela ho ba ea hatellang moqoqong empa o lokela ho mamela seo monna oa hae a tlang ho se bua. (Liproverbia 25:24) Hore ebe monna kapa mosali o tsitlallela tsela ea hae ka linako tsohle ke ho hloka lerato le ho hloka tlhompho.
25. Puisano e ntle e tla tlatsetsa thabong joang tšobotsing e haufi-ufi ea bophelo ba lenyalo?
25 Puisano e ntle e boetse ke ea bohlokoa tabeng ea ho kopanela likamano tsa botona le botšehali ha balekane. Boithati le ho haelloa ke boitšoaro li ka senya kamano ena e haufi-ufi lenyalong ka mokhoa o tebileng. Puisano e etsoang ka bolokolohi, hammoho le mamello, lia hlokahala. Ha e mong le e mong ka ho hloka boithati a batla hore e mong a be le boiketlo, taba ea likamano tsa botona le botšehali ke ka seoelo e ka bang bothata bo tebileng. Tabeng ena joaloka ho tse ling, “e mong le e mong a a ’ne a batle, eseng se molemo ho eena, empa se molemo ho motho e mong.”—1 Bakorinthe 7:3-5; 10:24.
26. Esita le hoja lenyalo le leng le le leng le tla ba le mathata le manolo, ho mamela Lentsoe la Molimo ho tla thusa balekane ba lenyalong ho fumana thabo joang?
26 Lentsoe la Molimo le fana ka keletso e ntle hakaakang! Ke ’nete hore lenyalo le leng le le leng le tla ba le mathata le manolo. Empa ha banyalani ba ikokobeletsa monahano oa Jehova, joalokaha o senoloa ka Bibeleng, ’me ba theha kamano ea bona leratong le nang le molao-motheo le tlhomphong, ba ka kholiseha hore lenyalo la bona e tla ba le tšoarellang le le thabileng. Kahoo hase feela hore ba tla hlomphana empa hape ba tla hlompha le Moqapi oa lenyalo, Jehova Molimo.
MELAO-MOTHEO EE EA BIBELE E KA THUSA . . . BANYALANI HORE BA THABELE LENYALO LE TŠOARELLANG LE LE THABILENG JOANG?
Bakreste ba ’nete baa ratana.—Johanne 13:35.
Bakreste ba lula ba loketse ho tšoarelana.—Bakolose 3:13.
Ho na le tlhophiso e loketseng ea bohlooho.—1 Bakorinthe 11:3.
Ke habohlokoa ho bua ntho e nepahetseng ka tsela e nepahetseng.—Liproverbia 25:11.
[Setšoantšo se leqepheng la 28]
Ho ratana le ho hlomphana ho lebisa katlehong lenyalong