“Le Iponahatse le e-na Le Teboho”
“Khotso ea Kreste a e ke e laole lipelo tsa lōna . . . ’Me le iponahatse le e-na le teboho.”—BA-KOLOSSE 3:15, NW.
1. Bakreste ba tlameha ho itebela khahlanong le eng lefatšeng lee le hlokang teboho?
LEKHOLO lena la bo20 la lilemo le tletseng likhathatso le fihlile boemong boo ho bona batho ba bangata ba seng ba lebetse hore na ba ka bontša teboho joang. Mantsoe a ananelang “ka kōpo” le “kea leboha” a ntse a utloahala seoelo ha selemo se seng le se seng se ntse se feta. Ho hloka teboho ho se ho fetohile karolo ea “moea,” moea oa boikhabi o busang batho ba lefatše lena. (Ba-Efese 2:1, 2, NW) Le hoja Bakreste ‘e se ba lefatše,’ ba tlameha ho phela ho lona hafeela tsamaiso ea lintho ea hona joale e ntse e le teng. (Johanne 17:11, 16) Kahona, ba tlameha ho hlokomela hore moea ona oa ho hloka teboho o se ke oa ba hahlamela, oa etsa hore teboho ea bona e fokotsehe.
2. (a) Litsela tse ling tseo ka tsona bahlanka ba Jehova ba ka senolang teboho ho eena ke life? (b) Ho hlokoa eng ntle le lipolelo tsa molomo tsa ho leboha?
2 Hangata ho ananela molemo oa Molimo ho ka ’na ha senoloa ha re buisana le balumeli ’moho le rōna. Mohlomong Bakreste ba bangata ba inehetseng ba leboha Ntate oa bona oa leholimo, Jehova, bakeng sa molemo oa hae ka makhetlo a ’maloa ka letsatsi, ba etsa joalo thapelong ea botho. Teboho e boetse e senoloa lithapelong tsa phutheho le ha ho binoa lipina tsa ’Muso libokeng tsa Bokreste. Ke ’nete hore ha ho bapisoa ho batla ho le bonolo ho senola teboho ka lipolelo. Leha ho le joalo, moapostola Pauluse o kile a khothaletsa banab’abo ba Kolosse hore ba se bolele feela hore baa leboha empa hape ba bonahatse kapa ba pake teboho ea bona bophelong ba bona ba letsatsi le letsatsi. O ngotse: “Khotso ea Kreste a e ke e laole lipelo tsa lōna, hobane lōna, ha e le hantle, le ne le e bitselitsoe ’meleng o le mong. ’Me le iponahatse le e-na le teboho.”—Ba-Kolosse 3:15, NW.
Lebaka le Leholo la ho ba le Teboho
3. Ke hobane’ng ha kaofela re lokela ho leboha Molimo?
3 E mong le e mong ea phelang o na le lebaka le leholo la ho ba le teboho. Lebaka la sehlooho ke ho thabela bophelo ka bohona, hobane ntho e ’ngoe le e ’ngoe eo re nang le eona kapa eo re e rerang ho e etsa hang-hang e fetoha e se nang thuso haeba re lahleheloa ke bophelo ba rōna. Mopesaleme Davida o ile a phehella batho bohle hore ba hopole hore “seliba sa bophelo se ho uena [Jehova Molimo].” (Pesaleme ea 36:9) Hape moapostola Pauluse o ile a hopotsa banna ba Athene ’nete e tšoanang e lulang e le teng ka ho sa feleng ha a bua a le Areopago. (Liketso 17:28) E, ho phela ka bohona feela ke lebaka le leholo la ho ba le teboho. Hape kananelo ea rōna ea hōla ha re hopola matla a ho etsa lintho ao Molimo o re neileng ’ona—matla a ho latsoa, ho ama, ho fofonela, ho bona, le ho utloa—e le hore re ka thabela bophelo le botle ba pōpo bo re potileng.
4. Ke eng e tla re lebela hore re se nke mahlohonolo a bophelo e le lefeela?
4 Empa ba bangata ba nka lintho tsena tse molemo e le lefeela. Ke feela ha ba se ba hloka matla a itseng a ho etsa lintho, a kang a ho bona kapa ho utloa, batho ba bangata ba hlokomelang mahlohonolo ao ba hlōlehileng ho a ananela ha ba ntse ba phela hantle ’meleng. Kamehla ho hlokahala hore Bakreste ba inehetseng ba be seli hore ba se oele ho hlokeng kananelo ho tšoanang. Ba tlameha ho sebetsa ka thata ho boloka boikutlo ba ho ba le teboho bo tšoanang le bo bontšitsoeng ke mopesaleme ea itseng: “Jehova, Molimo oa ka, e kholo hakakang palo ea mehlolo le ea merero eo u re etselitseng eona! Ha ho ea ka e lokolisang pel’a hao; leha ke rata ho e bolela le ho e bala, e be e fete palo.”—Pesaleme ea 40:5.
5. Ho sa tsotellehe mahlohonolo a eketsehileng ao Iseraele e neng e a filoe ke Jehova, ba ile ba phehella tsela efe e soabisang?
5 Pesaleme ea bo106 ka mokhoa oa thothokiso e fana ka kakaretso ea liketso tse matla tseo Jehova a li etselitseng batho ba hae, Baiseraele. Litšebelisano tsa Molimo le bona li ne li ekelletsa holim’a molemo oa bophelo oo o sitsang batho ka oona le mahlohonolo a tloaelehileng a bophelo ao o sitsang batho ka kakaretso ka ’ona. Leha ho le joalo, ho sa tsotellehe melemo ena, mopesaleme o bontša hore Baiseraele ha baa ka ba tsoela pele ho bontša kananelo bakeng sa mahlohonolo a bona a ikhethang. Temana ea 13 e bolela hore: “Empa ba phakisa ba lebala liketso tsa hae, ha ba ka ba tšepa merero ea hae.” Che, hase ho feta ha nako ho neng ho fokolitse. teboho ea bona butle-butle, e le hore mashome a lilemo hamorao ba se hlole ba hopola seo Molimo o neng o ba etselitse sona. Ho e-na le hoo, ba phakisa ba lebala—libeke feela kamor’a mehlolo e totobetseng eo Jehova a neng a ba etselitse eona Leoatleng le Lefubelu. (Exoda 16:1-3) Ka masoabi, liketsahalo tse neng li tla etsahala kamoso tsa bontša hore ho hloka teboho ho ne ho fetohile mokhoa o tloaelehileng oa bophelo ba bona.
Kamoo ho ka Bontšoang Teboho
6. Ke hobane’ng ha tlhokahalo ea boshome e ne e se thata?
6 Ka mokhoa o qaqileng, Jehova a hlakisa litsela tse tharo tse tobileng tseo ka tsona Baiseraele ba neng ba lokela ho bontša kananelo ea ’nete bakeng sa molemo oa hae. E ’ngoe e ne e le ho boloka tlhokahalo ea boshome ka ho nea Jehova karolo ea leshome ea tsohle tse hlahisoang ke masimo a bona le mehlape ea bona. (Levitike 27:30-32) Sena se ne se ke ke sa e-ba thata, hobane Jehova o ne a ikarabella bakeng sa letsatsi, mobu o nonneng, pula, le mohlolo oa khōlo. Kahoo, ho fa baprista karolo ea leshome sehalalelong sa Jehova e ne e le tšenolo ea sebele ea teboho ho Jehova ka boeena.
7. (a) Ho ne ho e-na le phapang efe e khōlō pakeng tsa boshome le ho ntšetsa Jehova menehelo? (b) See se ile sa nea Baiseraele monyetla oa hore ba senole eng ka bona?
7 Tlhokahalo e ’ngoe e ne e le ho ntšetsa Molimo menehelo eo ho eona tekanyo eo motho a neng a e ntša e neng e reroa ke boikutlo ba pelo ba Moiseraele ka mong. Le hoja ho ne ho se tekanyo e beiloeng, menehelo eo e ne e lokela ho ba ea lilopotsiea—lijo-thōllo tsa pele, veine ea pele, le boea ba pele ba mehlape. (Numere 15:17-21; Deuteronoma 18:4) Ho feta moo, Jehova a totobatsa hore batho ba hae ‘ba ne ba sa lokela ho fana ka ho tsila-tsila’ le hore ba ne ba lokela ho fana ka “tse ntle ka ho fetisisa litholoaneng tse butsoitseng pele.” (Exoda 22:29, NW; 23:19, NW) Sena se ne se nea Baiseraele menyetla ea ho bonahatsa kananelo ea bona ho Jehova ka tsela e bonahalang. Ba ne ba ka senola hore na teboho ea bona e tebile hakae ka tekanyo ea menehelo ea bona. Na ba ne ba tla nehelana ka lekala le le leng feela la morara? Kapa lipelo tse fanang li ne li tla ba susumetsa hore ba fane ka merara e tletseng serōtō? Kahona, motho ka mong kapa lelapa ka leng o ne a ka paka teboho ea hae a sa qobelloe.
8. (a) Ke melemo efe e ’meli eo tokisetso ea ho khoahlapisa e neng e fana ka eona? (b) Bohle ba neng ba ameha tokisetsong ea ho khoahlapisa ba ne ba ka paka hore baa fana ba bile ba na le teboho joang?
8 Tsela ea boraro e tobileng ea ho bontša teboho e ne e amana le tokisetso ea Molimo ea ho khoahlapisa. Nakong ea kotulo, likarolo tse ling li ne li lokela ho siuoa li sa kotuloa bakeng sa ba hlokang. Sena ha sea ka sa ba ruta feela kutloelo-bohloko le ho nahanela bafumanehi empa se ne se boetse se tiisa hore ba ne ba sa phele feela ka ho neoa lintho ba sa etse boiteko leha e le bofe, ntho e senyang botho bo botle. (Levitike 19:9, 10) Ho ne ho sa boleloa hore na ba hlokang ba ne ba tšoanela ho sieloa ho hokae. Empa haeba balemi ba Baiseraele ba ne ba bonahatsa moea oa ho fana, ka hore ba siee lijo tse ngata mahlakoreng a masimo a bona kahona ba bonahatsa mohau ho bafumanehi, ba ne ba tla be ba tlotlisa Molimo. (Liproverbia 14:31) Ho ne ho siuoe ho bona hore ba rere hore na ba ka siea kotipana ea sebaka se sa kotuloang kapa ba siea sebaka se seholo se sa kotuloa. Empa Molimo o ne o fane ka litaelo tse matla mabapi le ho fana ka ho laela hore lihlopha leha e le life tseo motho a neng a sa li bona tšimong le litholoana leha e le life tse setseng sefateng kapa morareng li lokela ho sieloa ba khoahlapisang. (Deuteronoma 24:19-22) Ka lehlakoreng le leng, ba khoahlapisang ba ne ba ka paka teboho ea bona ho Jehova bakeng sa tokisetso ena ka ho ntšetsa sebaka sa hae sa borapeli karolo ea leshome ea tseo ba li khoahlapisitseng.
Ho Fana ho Tsoang Pelong
9. Ke hobane’ng ha ba neng ba bontša boikutlo ba boikhabi ba ne ba hlile ba intša kotsi?
9 Haeba Baiseraele ba ne ba etsa menehelo e meholo, tlhohonolofatso ea Jehova e ne e tla ba holim’a matlo a bona. (Bapisa Ezekiele 44:30; Malakia 3:10.) Leha ho le joalo, ho sa tsotellehe hore na ba ne ba fumana chai e ngata hakae, hangata ba ne ba hlōleha ho ntša menehelo. Joale Molimo oa sebelisa likhopotso ka marena kapa baprofeta ho tsosolosa teboho ea bona. Ha e le hantle, Baiseraele ba baikhabi ke bona ba neng ba lahleheloa, hobane Jehova o ne a ke ke a hlohonolofatsa ba sa faneng ka menehelo e amanang le borapeli ba hae kapa e eang ho bafumanehi.
10. (a) Liphello tse thabisang tsa likhopotso tsa Morena Ezekiase ka teboho e ne e le life? (b) Na maemo aa a ile a tšoarella nako e telele?
10 Ka lekhetlo le leng, likhopotso tsa Morena Ezekiase tsa fella ka mokete oa thabo oa matsatsi a 14 Jerusalema. Batho ba ile ba tsosolosoa moeeng. Pele, ba ile ba senya lintho tsohle tse amanang le borapeli ba litšoantšo ’me ba ‘fana ka lintho tse etsang litha .... Ezekiase le mahosana ba ea bona litha, ’me ba boka Jehova le sechaba sa hae sa Iseraele.’ (2 Likronike 30:1, 21-23; 31:1, 6-8) Leha ho le joalo, ka masoabi, kamor’a ho tsosolosoa ho joalo ho neng ho etsoa nako le nako, batho ba oela ho hlokeng teboho. Qetellong, mamello ea Molimo ea fela, ’me oa lumella hore batho ba oona ba isoe khōlehong Babylona. Motse oa bona le tempele ea bona e ntle tsa senngoa. (2 Likronike 36:17-21) Kamor’a tsosoloso maemo a qetella a le mabe hoo Jehova a ileng a tšoantša ho timana ha bona le ho mo utsoetsa, ho mo senyetsa.—Malakia 3:8, NW.
11. Ke molao-motheo ofe oo re ithutileng oona historing ea Iseraele o ka tsoelang Bakreste ba phelang mehleng ena molemo?
11 Re ka ithuta molao-motheo ofe historing ea Baiseraele ea ho tsamaea ba ntse ba kheloha? Ona: Ha feela teboho e sa ntsane e le matla ka lipelong tsa bona, ka thabo ba ne ba paka sena ka ho fa Jehova “litha.” Empa ha ba lebala teboho eo kapa e fokotseha, ho fana ka lintho tse bonahalang ho thabisang ho bonahala ho ne ho khaotsa. Na kajeno Bakreste ba inehetseng ba ka bontša boikutlo bo bobe joalo? E, hobane ho se phethahale ha botho ho sa ntsane ho re khomaretse. Re thabile hakaakang hore e be Molimo o tlalehile litšebelisano tsa oona le Iseraele e le hore rōna, ba phelang qetellong ea tsamaiso ena ea lintho, re ka ithuta ’me ra rua molemo ho tsona!—Ba-Roma 15:4; 1 Ba-Korinthe 10:11.
12. (a) Batho ba Jehova kajeno ba boemong bo tšoanang le ba Baiseraele joang? (b) Ho hlokahala hore re ipotse lipotso life?
12 Joaloka Baiseraele, kajeno batho ba Jehova ba na le mabaka a mangata a ho ba le teboho. Le rōna re fumana mahlohonolo a mangata ho feta a thabeloang ke batho ba habo rōna. Ha e le hantle, re tseba ho hongata haholo ka merero ea Jehova ho feta hoo batho ba Iseraele ba neng ba ho tseba. Re ithutile kamoo ka boithatelo Molimo o ileng oa etsa Mora oa oona sehlabelo, ’me re hlokomela mahlohonolo ao sena se tlang ho a tlisetsa bao Molimo o ba amohelang. Hape kajeno re na le tokelo ea ho ba ka paradeiseng ea moea, hobane ho tloha ka 1919, Jehova o bōpetse batho ba hae naha e khōlō ea moea. E, Lipaki tsa Jehova li na le mabaka a mangata a eketsehileng a ho ba le teboho. Kahoo ho hlokahala hore re ipotse: Teboho ea rōna ho Molimo e tebile hakae? Hona ke joang re ka iponahatsang re e-na le teboho lekholong lee la bo20 la lilemo?
Lintho tse Tšoanang Mehleng ea Kajeno
13, 14. Le hoja Bakreste ba se tlas’a Molao oa Moshe, na ho na le ho tšoana ho ka fumanoang molaong oa boshome?
13 Bakreste ha ba tlas’a Molao oa Moshe o neng o hlakisa hore na teboho ho Molimo e ne e tšoanela ho pakoa joang. (Ba-Galata 3:24, 25) “Sehlabelo” sa rōna sa thoriso ho Jehova ke “tholoana ea melomo e bolelang lebitso la hae.” (Ba-Heberu 13:15) Joale, ena ke tsela ea sehlooho eo ka eona Bakreste ba inehetseng ba ka bonahatsang teboho ho Molimo. Empa ho na le lintho tse tšoanang tse thahasellisang tse ka fumanoang melaong ea boshome, ea menehelo le ea ho khoahlapisa.
14 Boshome bo ne bo bolela ho fana ka tekanyo e tobileng ea karolo ea leshome—’me ho ne ho se boikhethelo ho sena. Ka ho tšoanang, kajeno ho na le litaelo tse tobileng tse tlamang bahlanka bohle ba Jehova, tseo hape ho seng boikhethelo ho tsona. Re lokela ho kopana ’moho kamehla, hape re tlameha ho bolela pontšeng litaba tse molemo tsa ’Muso oa Jehova le ho thusa ba bang ho fetoha barutuoa ba Kreste.—Ba-Heberu 10:24, 25; Mattheu 24:14; 28:19, 20.
15. Mehleng ea kajeno ke lintho life tse bontšang lipelo tse fanang tse tšoanang le tse neng li senoloa ke menehelo le litokisetso tsa ho khoahlapisa Iseraeleng ea boholo-holo?
15 Hape, hopola menehelo le litokisetso tsa ho khoahlapisa. Ho ne ho sa beoa litekanyo tse tobileng. Ka ho tšoanang, Mangolo ha aa beha tekanyo e tobileng ea nako eo Paki ka ’ngoe ea Jehova e tšoanelang ho e qeta tšebeletsong e halalelang. Tekanyo ea nako eo motho a nehelanang ka eona ho ithuteng Lentsoe la Molimo le ho bolelleng ba bang li siuoe bakeng sa tšusumetso ea pelo e fanang, e senang boikhabi. Ka ho tšoanang, hore na ho etsoa menehelo e mekae ea lintho tse bonahalang bakeng sa ho ntšetsa pele lithahasello tsa ’Muso le hona ho siuoe hore ho reroe ke pelo ea motho ka mong. Ho teba ha teboho ho tla rera hore na mohlanka oa Molimo kajeno o tla tlisa “litha” kapa ho lekaneng feela hore a ’ne a tsoelle. (2 Likronike 31:6) Leha ho le joalo, joaloka ntlheng ea Iseraele, ha bopaki ba teboho ea motho bo le boholo, mahlohonolo ao a a fumanang ho Molimo a ba mangata haholoanyane.
Litsela tsa ho Bonahatsa Teboho
16-18. Ke ka litsela life tse tobileng Bakreste ba inehetseng ba ka iponahatsang ba e-na le teboho?
16 E ’ngoe ea litsela tse tobileng ka ho fetisisa tsa ho paka teboho ho Jehova ke ea ho kenela tšebeletso ea nako e tletseng. Na teboho ea hao e khōlō ho lekana hore pelo ea hao e be le takatso eo? Ho ’nile ha hlokomeloa hore haeba motho e tla ba pula-maliboho ea atlehang ho hlokahala hore pele a be le takatso ea ho sebeletsa ’me joale a be le maemo a nepahetseng. Ha teboho e le matla, takatso e susumetsang ea ho sebeletsa Molimo ka botlalo haholoanyane ea hōla ka pelong e ananelang. Na eo ke tsela eo u ikutloang ka eona? Esita le haeba maemo ao u leng ho ’ona hona joale a u sitisa ho kopanela tšebeletsong ea nako e tletseng, sena ha sea tšoanela ho folisa moea oa bopula-maliboho. U ka tšehetsa bo-pula-maliboho ’me ua ba khothatsa ka pelo eohle.
17 Haeba u sitoa ho bula maliboho hona joale, na u ka ba pula-maliboho ea thusang nako le nako? Ho na le linako tse khethehileng selemo ka seng tseo ka tsona phutheho ea Bokreste e khothaletsang boiteko bo bongata ho feta bo tloaelehileng mosebetsing oa boboleli. Ka mohlala, likhoeli tsa lehlabula, ke nako e ntlehali ho ba bangata, ’me ka Mphalane ho ba le tšebetso e eketsehileng e amanang le phutuho ea ho fumana lipeeletso tsa limakasine. Mabapi le nako e eketsehileng ea tšebeletso e halalelang, molao-motheo oa hore teboho e hlahisa ho fana haholo o ipaka e le ’nete.
18 Tsela e ’ngoe e tobileng ea ho bonahatsa teboho ke ea ho tšehetsa lenaneo la kaho la puso ea Molimo le ntseng le tsoela pele ho pota lefatše. Linaheng tse ngata, ho hahoa Liholo tsa ’Muso tse ncha, ’me liholo tse teng li atolosoa ka baka la ho tlala haholo. Ho hahoa Liholo tse ncha tsa Likopano, ’me ho atolosoa Mahae a Bethele le lifektheri. Ho tšehetsa mananeo ana a kaho ka matsoho kapa ka lichelete—ke tsela e sebetsang hakaakang ea ho paka teboho ho Jehova!
Mohlala o Motle oa Mohlolohali ea Hlokang
19. Ke eng e u khahlang ka ho fetisisa ka mohlolohali ea hlokang ea neng a le tempeleng?
19 Mohlala oa Bibele o tsebahalang oa ho bonahatsa teboho ka ho fana haholo ka lintho tse bonahalang ke oa mohlolohali ea hlalositsoeng ke Jesu. (Luka 21:1-4) E tlameha e be o ne a hlokomela hore licheletana tsa hae tse peli tsa tšepe tse neng li ka reka ntho e fokolang feela li ne li tla etsa phapang e nyenyane bakeng sa ho hlokomela tempele le ba sebeletsang moo ka lintho tse bonahalang. Empa ha aa ka a talima tempele le baprista ba sebeletsang ho eona ’me a re ka pelong: ‘Ba phela hamolemo haholo ho feta kamoo ke phelang kateng ’me ba na le mohaho o motle haholo ho feta ntlo ea ka ea bofutsana.’ Ke ’nete hore tempele e ne e le mabenyane haholo e bile e le ntle. “E khabisitsoe ka majoe a matle le ka likabelo.” (Luka 21:5) Empa seo ha sea ka sa sitisa mohlolohali eo ho etsa monehelo. O ne a batla ho iponahatsa a e-na le teboho ho Jehova, e seng ho batho ba neng ba sebeletsa tempeleng.
20. Ke joang re ka bontšang boikutlo bo ratehang bo bontšitsoeng ke mohlolohali eo ea hlokang?
20 Kajeno batho ba Jehova ba ka ithuta ho hong mohlaleng ona. Joaloka mohlolohali ea hlokang, baa tseba hore menehelo ea bona, e-bang e meholo kapa e menyenyane, e neoa Molimo. Hape tšepo ea bona e matlafatsoa ke ho tseba hore mokhatlo o hlophisitsoeng oa lefatšeng oa Jehova o hahiloe ka tsela eo ka eona ho seng motho ea ka fumanang phaello ea chelete. Mehaho ea Mokhatlo e hahetsoe le ho sebelisetsoa ho hlomella batho ba sebetsang ka thata ho fumana Libibele le lithuso tsa ho ithuta Bibele tsa boleng bo phahameng ka ho fetisisa le ho phetha lithahasello tsa ’Muso. Sena se fapane ka mokhoa o makatsang le tšebeliso e hlabisang lihlong ea chelete e fanoeng e le monehelo e sa tsoa tlalehoa mabapi le baevangeli ba bang ba thelevishineng.
Likhopotso tsa ho ba le Teboho ke tsa Bohlokoa
21, 22. Likhopotso tse mosa tsa hore re iponahatse re e-na le teboho li lokela ho tsosa tšusumetso efe ka lipelong tse ananelang?
21 Ho ne ho hlokahala hore Baiseraele ba hopotsoe kamehla tlamo ea bona mabapi le Jehova, haholo-holo ka tlhokahalo ea ho paka hore ba na le moea oa teboho. Ka kakaretso, ha ba ne ba hlokomelisoa litaba tsena, teboho e ne e tsosolosoa lipelong tsa bona, ’me sena se ne se fella ka ho fetang lipolelo feela tsa ho senola kananelo ea bona e lebohang. Ba ne ba utloisisa ho fa Jehova “litha” tsa se behoang ke masimo a bona hore li sebelisetsoe ntlo ea hae ea borapeli.
22 Kahoo e se eka bao ba “Iseraele oa Molimo” oa kajeno le ‘bongata bo boholo’ ba metsoalle ea bona ba ka ikutloa ka tsela e tšoanang. (Ba-Galata 6:16; Tšenolo 7:9) E se eka lipelo tsa bona tse tletseng teboho li ka ba susumelletsa ho fana ka “litha” tsa thoriso ho Jehova. Joale kannete ba ka re: “Re iponahatsa re e-na le teboho ho Molimo oa rōna o fanang le o lerato, Jehova.”
Na U Sa Hopola?
◻ Ke hobane’ng ha kamehla ho hlokahala hore Bakreste ba hlahlobe hore na teboho ea bona e khōlō hakae?
◻ Ke hobane’ng ha kamehla batho ba Jehova ba ’nile ba ba le lebaka le eketsehileng la ho ba le teboho?
◻ Ke ka litsela life tse tobileng Baiseraele ba neng ba ka bontša teboho ea bona ho Jehova?
◻ Joaloka Baiseraele, ke lintho life tse tobileng tseo re ka li etsang ho senola teboho ea rōna?
◻ Re ka ithuta eng ho mohlolohali ea hlokang ea neng a le tempeleng?
[Setšoantšo se leqepheng la 7]
Baiseraele ba bonahalitse teboho ka ho ntša boshome le lilopotsia le ka ho lokisetsa bafumanehi hore ba khoahlapise masimong a bona
[Setšoantšo se leqepheng la 8]
Mopesaleme o ile a leboha Jehova ka mesebetsi ea Hae e babatsehang le likhopolo tsa hae mabapi le batho ba Hae
[Litšoantšo tse leqepheng la 10]
Kajeno Lipaki tsa Jehova li bonahatsa teboho ka ho kopanela tšebeletsong ea tšimo le mananeong a kaho a puso ea Molimo, hammoho le ho etsa limpho tsa lintho tse bonahalang