Pono ea Bibele
Na Mekete Eohle ea Bolumeli e Khahlisa Molimo?
Palo ea ba tšepahalang, ba 20 000, e keteka ’Misa o khethehileng lebaleng la toropo. Ha tšebeletso e fela, mokoloko oa qala. Letšoele la barapeli joale le eketseha ho fihla ho batho ba 60 000, ba fetang literateng ba latela setšoantšo sa Nossa Senhora Aparecida, mosireletsi oa “mohalaleli” oa Brazil. Motšehare o moholo, lerata le leholo le utloahala haufi le sehalalelo ha ba etetseng tempeleng ba qalisa pontšo e khahlisang ea khanya e etsoang ka litlelabore.
MEKETE e joalo ea bolumeli le mekoloko ea eona e tloaelehile linaheng tse ngata. Empa se susumeletsang matšoele ho kopanela mekolokong ke eng? Neano le boinehelo ke lintho tse peli tsa motheo tse susumetsang Mak’hatholike, Mabuddha, le malumeli a mang. Ho phaella moo, joaloka nakong e fetileng, boithabiso e ka ba lebaka la bohlokoa. The World Book Encyclopedia e bolela hore mehleng e mahareng “mekete e mengata ea bolumeli e ne e hatisa boithabiso. E ne e lumella batho ho lebala mathata a bophelo ba bona a letsatsi le letsatsi.” Hangata boemo boa tšoana le kajeno. Ka mohlala, Salvador, Brazil, e tsejoa haholo ka mekete ea eona e tummeng ea bolumeli, e kopanyang lintho tse patiloeng le boithabiso meketeng e fapa-fapaneng le mekete e lerata e finyellang tlhōrō ea mokete oa boithabiso. Leha ho le joalo, le hoja mekoloko e meng ea bolumeli e ka ba mekete, e meng ke tšebeletso e hlophisitsoeng ea bolumeli.
Moshebelli e mong o hlokomela mokoloko o tloaelehileng Brazil: “Ho ba neng ba tsamaea maloka le setšoantšo le baprista, ba ’maloa ba ne ba bina sefela ha ba bang ba ne ba latela ba khutsitse. Empa ho neng ho bonahala haholo e ne e le ho teba monahanong, kapa ho fapana le hoo e leng ho hlomoha, joalokaha eka letšoele le ne le le lepatong.” Hape Lúcio, ea tsoang karolong ea leboea ea Brazil, o re: “Joalokaha le ’na nkile ka etsa, batho ba batla ka ho tsieleha pheko kapa tharollo ea mathata a lelapa kapa a chelete. Hangata boinehelo ho mosireletsi oa ‘mohalaleli’ ho akarelletsa ho aka setšoantšo, ho hloa methati ka mangole, kapa ho tsamaea sebaka se selelele ka lejoe hloohong.”
Mahlabelo a joalo ao motho a iketsang oona a ka bonahala a sa tloaeleha ho motho ea sa lumelang. Leha ho le joalo, ba nkang karolo ba ikutloa hore ba khahlisa Molimo. Empa na ho joalo? Bibele e re thusa ho bona haeba mekete e joalo le mekoloko ea eona e thabisa Molimo kapa che.
Na Molimo oa e Amohela?
Histori e re bolella hore Iseraele ea boholo-holo e ne e keteka mekete ea selemo le selemo le e etsoang ka mor’a nako e itseng ka thabo. Mekete e joalo e ne e hlompha Jehova Molimo. (Deuteronoma 16:14, 15) Mabapi le mekete ea Bibele, The Illustrated Bible Dictionary e re: “Thabo e neng e bontšoa e ne e tsoa pelong. Tlamo ea bolumeli e ne e lumellana le ho thabela lintho tse lefatšeng tse neng li nkoa e le limpho tse tsoang ho Molimo.” Ho sa tsotellehe mekete ea bolumeli, baprista le batho ba Iseraele ba ile ba hlokomoloha bomoea ba bona. (Esaia 1:15-17; Mattheu 23:23) Leha ho le joalo, potso joale ke hore, Na mekoloko ea bolumeli e ne e le karolo ea Bokreste lekholong la pele la lilemo?
Le hoja Jesu Kreste a ile a keteka mekete e itseng ea Bajode, Jesu leha e le baapostola ba hae ha baa ka ba qala mekoloko ea bolumeli. The Encyclopædia Britannica e re: “Mekoloko e bonahala e ile ea qala ho tuma kapele ka mor’a hore Bokreste bo hlokomeloe e le bolumeli ba ’muso oa Constantine lekholong la bone la lilemo.” ’Me The World Book Encyclopedia e re: “Mekete ea kereke [le mekoloko ea eona] e ile ea nka meetlo e mengata ea bohetene, e e neha litlhaloso tse ncha.”
Bakreste ha ba tlas’a tlamo ea ho kopanela meketeng le mekolokong e joalo ea bolumeli. Ha moapostola Pauluse a lebisa meketeng e neng e hlokoa ke Molao oa Molimo ho Iseraele ea boholo-holo, o ile a ngola: “Motho a se ke a le nyatsa tabeng ea ho ja le ea ho noa, leha e le tabeng ea mekete, le ea likhoeli tse ncha, le ea Lisabbatha, tseo e leng seriti sa tse tlang ho tla, empa ’mele oa tsona ke Kreste.” (Ba-Kolosse 2:16, 17) Bakreste ba Kolosse ba ne ba sa lokela ho lumella motho ho ba nyatsa ka boemo ba bona pel’a Molimo motheong oa ho hlokomela mekete ea Molao oa Moshe.
Ntho e Molemo ho Feta Mekoloko
Hore Bakolosse ba kopanye tumelo ea bona ea Bokreste le mekete e ne e tla ba ho khutlela morao tumelong ea bona. Ho beha mabaka ha Pauluse e ne e le hona, Ke hobane’ng ha ho lateloa ntho eo e leng feela seriti sa ’nete? ’Nete ea sebele e ho Kreste. Ka hona, ho tšoarella seriting sa boprofeta ke ho pata bomoea ba sebele boo lintho tseo li neng li supa ho tsona. Hobane’ng? Hobane joalokaha Pauluse a boletse, “’mele oa tsona ke Kreste.” Ka hona, mekete e joalo ea bolumeli ea kajeno hase karolo ea borapeli ba ’nete ba Bokreste.
Ka hona, ha ho sa hlokahala hore Bakreste ba etse meetlo e nang le qaleho ea bomolimo, ’me ka sebele ba lokela ho qoba mekete e qalileng boheteneng, e ka ’nang ea akarelletsa ho sebelisoa ha litšoantšo le mekete e lerata. (Pesaleme ea 115:4-8) Moapostola Pauluse o ile a lemosa: “Se sikareng joko e le ’ngoe le ba sa lumelang; hobane kopano ke efe ea ho loka le bokhopo? Kapa leseli le na le kopano efe le lefifi? Kreste o na le selekane sefe le Beliale?” (2 Ba-Korinthe 6:14, 15) Ka mantsoe a mang, haeba re batla ho khahlisa Molimo, re ke ke ra kopanya borapeli ba ’nete le ba bohata. Re ka hlokomoloha thato ea Molimo joang ’me re tsoele pele ho mo khahlisa?—Mattheu 7:21.
Che, Molimo ha a amohele mekete ea bolumeli ea bohetene le mekoloko ea eona. Ha e le hantle, e tla felisoa hammoho le meetlo eohle e hlomphollang Jehova, joalokaha ho boletsoe esale pele Lentsoeng la Molimo. Ho Tšenolo 18:21, 22, bolumeli ba bohata le liketso tsa bona bo hokahanngoa le motse oa bohetene oa Babylona. Ea baleha: “Eaba lengeloi le matla le nka lejoe le ka ka leloala le leholo, la le akhela leoatleng, la re: Ho tla akheloa joalo ka matla Babylona, motse o moholo, ’me ha a sa tla hlola a fumanoa. ’Me mantsoe a ba tilinyang liharepa, le a ba letsang lithomō, le a ba liphala, le a ba literompeta, ha a sa tla hlola a utloahala ha hao.” Ha u hlokomela hore mekete ea bolumeli ba Babylona ha e khahlise Molimo, u tla etsa’ng?
Ak’u nahane u le leetong u ea sebakeng sa bohlokoa ’me u lahlehetsoe ke tsela ea hao. Haeba motho e mong a u bontša ka mosa kamoo u ka fihlang ka teng sebakeng seo ka ho sireletseha, na u ne u ke ke ua leboha haholo ka ho fumana tsela e nepahetseng? Ka ho tšoanang, kaha re se re ithutile kamoo Molimo a talimang mekoloko ea bolumeli, ke hobane’ng ha u sa shebe ka ho eketsehileng Lentsoeng la hae ho bona se mo thabisang? Ho sebelisa seo u ithutang sona ho tsoa Bibeleng se ka tlatsetsa setsoalleng se setle le Molimo—e leng ho phahametseng haholo ho hlokomela mekete ea bolumeli le mekoloko.—Johanne 17:3.
[Tlhaloso ea Moo Setšoantšo se Nkiloeng Teng e leqepheng la 20]
Dutch Easter procession, Harper’s, 19th century