Ho Ananela “Limpho Tseo e Leng Banna”

‘Le be le tlhompho ho ba sebetsang ka thata har’a lōna . . . le ba nahanele ka lerato ho feta kamoo ho tloaelehileng ka lebaka la mosebetsi oa bona.’—1 BATHESALONIKA 5:12, 13.

 1. Ho latela Liketso 20:35, ho fana ho na le matla afe? Fana ka mohlala.

“HO NA le thabo e eketsehileng ho faneng ho feta e teng ho amoheleng.” (Liketso 20:35) Na u ka hopola hore na u qeteletse neng ho latsoa bonnete ba mantsoe ao a Jesu? Mohlomong e ne e le mpho eo u e fileng e mong eo u mo ratang haholo. U ne u e khethile ka hloko, hobane u ne u batla ntho eo moratuoa oa hao a neng a tla e nka e le ea bohlokoa. Thabo e sefahlehong sa moratuoa oa hao—e ile ea thabisa pelo ea hao hakaakang! Ha ho e-na le sepheo se nepahetseng, ho fana ke pontšo ea lerato, ’me ho bontša lerato ho na le matla a ho re tlisetsa thabo.

2, 3. (a) Ke hobane’ng ha ho ka boleloa hore ha ho na motho ea thabileng ho feta Jehova, ’me tokisetso ea “limpho tseo e leng banna” e ka thabisa pelo ea hae joang? (b) Re ne re ke ke ra rata ho etsa eng ka mpho e tsoang ho Molimo?

² Ka lebaka leo, ke mang ea ka thabang ho feta Jehova, Mofani oa “mpho e ’ngoe le e ’ngoe e molemo”? (Jakobo 1:17; 1 Timothea 1:11) Mpho e ’ngoe le e ’ngoe eo a fanang ka eona e susumetsoa ke lerato. (1 Johanne 4:8) Ka sebele seo ke ’nete tabeng ea mpho eo Molimo a e fileng phutheho ka Kreste—e leng “limpho tseo e leng banna.” (Baefese 4:8) Tokisetso ea hore baholo ba hlokomele mohlape ke pontšo ea lerato la Molimo le tebileng ho batho ba hae. Banna bana ba khethoa ka hloko—ba lokela ho finyella litšoaneleho tsa Mangolo. (1 Timothea 3:1-7; Tite 1:5-9) Baa tseba hore ba lokela ho “tšoara mohlape ka bonolo,” hobane joale linku li tla ba le lebaka la ho ikutloa li e-na le kananelo bakeng sa balisa ba joalo ba lerato. (Liketso 20:29; Pesaleme ea 100:3) Ha Jehova a bona hore linku tsa hae li na le lipelo tse tletseng kananelo e joalo, ka sebele pelo ea hae e lokela ho thaba!—Liproverbia 27:11.

³ Ka sebele re ne re ke ke ra rata ho nyenyefatsa bohlokoa ba mpho e tsoang ho Molimo; leha e le hona ho hloka teboho bakeng sa limpho tsa hae. Kahoo, ho hlaha lipotso tse peli: Baholo ba lokela ho talima karolo ea bona joang ka phuthehong? ’Me mohlape kaofela o ka bontša joang hore o ananela “limpho tseo e leng banna”?

‘Re Basebetsi-’moho’

4, 5. (a) Pauluse o tšoantša phutheho le eng, ’me ke hobane’ng ha papiso ee e loketse? (b) Papiso ea Pauluse e bontša eng ka tsela eo re lokelang ho talimana le ho tšoarana ka eona?

⁴ Jehova o file “limpho tseo e leng banna” matla a itseng a ho laela ka phuthehong. Ka sebele, baholo ha ba batle ho sebelisa matla a bona a ho laela hampe, empa baa tseba hore ho bonolo haholo ho etsa seo kaha ke batho ba sa phethahalang. Joale, ba lokela ho italima joang ha ba bapisoa le mohlape kaofela? Nahana ka papiso e sebelisitsoeng ke moapostola Pauluse. Pauluse o ile a ngola ka mor’a ho bua ka lebaka leo ka lona ho fanoeng ka “limpho tseo e leng banna,” a re: “Ka lerato a re hōleng linthong tsohle ho ea ho eo e leng hlooho, Kreste. Ho tsoa ho eena ’mele oohle, ka ho ba o kopantsoeng hammoho ka tumellano le ka ho etsoa hore o sebelisane ka lenonyello le leng le le leng le fanang ka se hlokahalang, ho ea ka tšebetso ea setho se seng le se seng ka tekanyo e loketseng, o sebeletsa khōlo ea ’mele bakeng sa ho ikaha ha oona ka lerato.” (Baefese 4:15, 16) Ka hona, Pauluse o tšoantša phutheho le ’mele oa motho, a akarellelitse baholo le litho tse ling. Ke hobane’ng ha papiso ee e loketse?

⁵ ’Mele oa motho o entsoe ka litho tse ngata tse sa tšoaneng empa o na le hlooho e le ’ngoe feela. Leha ho le joalo, ha ho letho ’meleng—ebang ke mosifa, ebang ke mothapo—le se nang thuso. Setho se seng le se seng ke sa bohlokoa ’me se tlatsetsa ho hong bophelong bo botle ba ’mele oohle le botleng ba oona. Ka ho tšoanang, phutheho e entsoe ka litho tse ngata tse fapaneng, empa setho ka seng—ebang se secha kapa se tsofetse, se matla kapa sea fokola—se ka tlatsetsa ho hong bophelong bo botle le botleng ba phutheho. (1 Bakorinthe 12:14-26) Ha ho hlokahale hore ho be le ea ikutloang hore hase oa bohlokoa hoo a sa tsotelleheng. Ka lehlakoreng le leng, ha ho na ea lokelang ho ikutloa a phahame, hobane kaofela ha rōna—balisa le linku ka ho tšoanang—re karolo ea ’mele, ’me ho na le hlooho e le ’ngoe feela, e leng Kreste. Kahoo, Pauluse o etsa setšoantšo se thobang sa lerato, tlhokomelo le tlhompho tseo re lokelang ho ba le tsona e mong ho e mong. Ho hlokomela sena ho thusa baholo ho ba le pono ea boikokobetso, e leka-lekaneng ka karolo ea bona ka phuthehong.

 6. Le hoja a ne a e-na le matla a ho laela a boapostola, Pauluse o ile a bontša moea oa boikokobetso joang?

⁶ “Limpho [tsena] tseo e leng banna” ha li batle ho laola bophelo ba barapeli-’moho le tsona kapa tumelo ea bona. Pauluse, le hoja a ne a e-na le matla a ho laela a boapostola, ka boikokobetso o ile a bolella Bakorinthe: “Eseng hore re benghali holim’a tumelo ea lōna, empa re basebetsi-’moho bakeng sa thabo ea lōna, kaha ke ka tumelo ea lōna le emeng.” (2 Bakorinthe 1:24) Pauluse o ne a sa rate ho laola tumelo ea barab’abo le tsela ea bona ea bophelo. Ka sebele, ha aa ka a bona ho hlokahala hore a etse joalo, hobane o ile a bontša hore o na le tšepo ea hore e se e ntse e le banna le basali ba tšepahalang ba leng mokhatlong o hlophisitsoeng oa Jehova hobane ba ne ba batla ho etsa se nepahetseng. Kahoo, ha a bua ka eena ka boeena le Timothea molekane oa hae mosebetsing oa ho tsamaea, ha e le hantle Pauluse o ne a re: ‘Ke mosebetsi oa rōna ho sebetsa le lōna ho sebeletsa Molimo ka thabo.’ (2 Bakorinthe 1:1) Ke moea oa boikokobetso bo bokaakang!

 7. Baholo ba ikokobelitseng ba hlokomela eng ka karolo ea bona ka phuthehong, ’me ba na le tšepo efe ho basebetsi-’moho le bona?

⁷ Kajeno “limpho tseo e leng banna” li na le mosebetsi o tšoanang. Ke ‘basebetsi-’moho bakeng sa thabo ea rōna.’ Baholo ba ikokobelitseng ba hlokomela hore ha baa lokela ho etsa qeto ea hore na ba bang ba ka khona ho etsa mosebetsi o mokae tšebeletsong ea Molimo. Baa tseba hore le hoja ba ka khothatsa ba bang ho atolosa kapa ho ntlafatsa tšebeletso ea bona, tšebeletso e etsetsoang Molimo e lokela ho tloha pelong e ratang. (Bapisa le 2 Bakorinthe 9:7.) Ba kholisehile hore ha basebetsi-’moho le bona ba thabile, ba tla etsa sohle seo ba ka se khonang. Kahoo, ho thusa barab’abo bona ho ‘sebeletsa Jehova ka thabo,’ ke takatso ea bona e tlohang pelong.—Pesaleme ea 100:2, NW.

Ho Thusa Bohle ho Sebeletsa ka Thabo

 8. Ke ka litsela life tse ling baholo ba ka thusang barab’abo bona ho sebeletsa Jehova ka thabo?

⁸ Baholo, le ka thusa barab’abo lōna joang ho sebeletsa ka thabo? Le ka khothatsa ka mohlala. (1 Petrose 5:3) Etsang hore cheseho ea lōna le thabo tšebeletsong li bonahale, ’me ba bang ba ka khothalletsoa ho etsisa mohlala oa lōna. Babatsang ba bang ka boiteko ba bona ba moea oohle. (Baefese 4:29) Pabatso e mofuthu le ea sebele e thusa ba bang ho ikutloa ba le molemo ba bile ba hlokoa. E khothalletsa linku ho batla ho etsa se molemohali ho sebeletsa Molimo. Qoba ho bapisa ho sa thabiseng. (Bagalata 6:4) Ho bapisa ho joalo hoa nyahamisa ho e-na le ho susumelletsa ba bang ho ntlafatsa. Ntle ho moo, linku tsa Jehova ke batho ba sa tšoaneng—ba leng maemong a sa tšoaneng le ba nang le matla a sa tšoaneng. Joaloka Pauluse, bontša hore u tšepa barab’eno. Lerato “le lumela lintho tsohle,” ka hona, ke hantle ha re lumela hore barab’abo rōna ba rata Molimo ’me ba batla ho mo thabisa. (1 Bakorinthe 13:7) Ha u ‘bontša ba bang tlhompho,’ u ntša se molemohali ho bona. (Baroma 12:10) Tiiseha hore ha linku li khothatsoa li bile li khatholloa, boholo ba tsona li tla etsa sohle seo li se khonang tšebeletsong ea Molimo, ’me li tla fumana thabo tšebeletsong eo.—Matheu 11:28-30.

 9. Hore a sebeletse ka thabo, moholo ka mong o tla thusoa ke pono efe ka baholo-’moho le eena?

⁹ Ho italima ka boikokobetso u le ‘mosebetsi-’moho’ le baholo-’moho le uena ho tla u thusa ho sebeletsa ka thabo le ho ananela limpho tsa bona tse ikhethang. Moholo ka mong o na le lineo tsa hae le litšoaneleho tseo a ka li sebelisang molemong oa phutheho. (1 Petrose 4:10) E mong a ka ba le mpho ea ho ruta. E mong e ka ba mohlophisi ea atlehang. E mong hape e ka ba ea atamelehang ka tsela e ikhethang ka lebaka la mofuthu oa hae le mosa. Taba ke hore, ha ho na moholo ea nang le limpho tsohle ka ho lekana. Na ho ba le mpho e itseng—ka mohlala, mpho ea ho ruta—ho etsa hore moholo e mong a phahamele e mong? Le hanyenyane! (1 Bakorinthe 4:7) Ka lehlakoreng le leng, ha ho hlokahale hore re honohele mpho eo e mong a nang le eona kapa re ikutloe re sa tšoanelehe ha litšoaneleho tsa moholo e mong li etsa hore ba bang ba mo babatse. Hopola, ka bouena u na le limpho tseo Jehova a li bonang ho uena. ’Me a ka u thusa ho hlaolela limpho tseo le ho li sebelisa molemong oa barab’eno.—Bafilippi 4:13.

‘Mamelang ’me le Ipehe Tlaase’

10. Ke hobane’ng ha e le ho loketseng hore re bontše kananelo bakeng sa “limpho tseo e leng banna”?

¹⁰ Ha re fumana mpho e itseng, ke ho loketseng ho bontša kananelo. Bakolose 3:15 e re: “Le iponahatse le le ba lebohang.” Joale, ho thoe’ng ka “limpho tseo e leng banna,” mpho ea bohlokoa eo Jehova a re fileng eona? Ka sebele, ka ho khetheha re leboha Jehova, Mofani oa Limpho ea seatla se bulehileng. Empa ho thoe’ng ka “limpho tseo e leng banna” ka botsona? Re ka bontša joang hore rea li ananela?

11. (a) Re ka bontša kananelo ea rōna joang bakeng sa “limpho tseo e leng banna”? (b) Lipoleloana ‘le mamele’ le “le ipehe tlaase” li bolela’ng?

¹¹ Re ka bontša kananelo ea rōna bakeng sa “limpho tseo e leng banna” ka ho potlakela ho ela hloko keletso ea tsona le liqeto tsa tsona tse thehiloeng Bibeleng. Bibele ea re eletsa: “Mamelang ba etellang pele har’a lōna ’me le ipehe tlaase, kaha ba lula ba lebetse lisoule tsa lōna joaloka ba tla fana ka tlaleho; e le hore ba ka etsa sena ka thabo eseng ka ho feheloa, kaha sena se ne se tla ba kotsi ho lōna.” (Baheberu 13:17) Hlokomela hore ha rea lokela ‘ho mamela’ feela, empa re lokela le ‘ho ipeha tlaase’ ho ba etellang pele. Lentsoe la Segerike bakeng sa “le ipehe tlaase,” ka ho toba le bolela “le be ba inehelang tlas’a.” Ha setsebi sa Bibele R. C. H. Lenski se hlalosa lipoleloana ‘le mamele’ le “le ipehe tlaase,” se re: “Motho o mamela ha a lumellana le seo a bolelloang hore a se etse, a kholisehile hore se nepahetse le hore se molemo; motho o inehela . . . ha a e-na le maikutlo a fapaneng.” Ha re utloisisa re bile re lumellana le tataiso ea ba etellang pele, ho ka ba bonolo hore re ba mamele. Empa ho thoe’ng haeba re sa utloisise lebaka la qeto e itseng?

12. Ke hobane’ng ha re lokela ho ipeha tlaase, kapa ho inehela, esita leha re sa utloisise ka ho feletseng lebaka la qeto e itseng?

¹² Mona ke moo ho ka ’nang ha hlokahala hore re ipehe tlaase, kapa re inehele. Hobane’ng? Taba ea pele, ho hlokahala hore re be le tšepo ea hore banna bana ba tšoanelehang moeeng ba amehile haholo ka se molemong oa rōna. Etsoe, ba tseba hantle hore ba lokela ho nehelana ka tlaleho ho Jehova bakeng sa linku tse behiloeng tlhokomelong ea bona. (Jakobo 3:1) Ho phaella moo, ke hantle ha re hopola hore e ka ’na eaba ha re tsebe lintlha tsohle tsa lekunutu tse ileng tsa lebisa qetong e thehiloeng tsebong.—Liproverbia 18:13.

13. Re ka thusoa ke eng hore re ipehe tlaase mabapi le liqeto tsa boahloli tsa baholo?

¹³ Ho thoe’ng ka ho ipeha tlaase mabapi le liqeto tsa boahloli? Ke ’nete hore ho ka ’na ha se ke ha e-ba bonolo, haholo-holo haeba ho entsoe qeto ea ho khaola motho eo re mo ratang—mong ka rōna kapa motsoalle ea haufi. Le mona, ho molemo ho inehela kahlolong ea “limpho tseo e leng banna.” Ba boemong bo fetang ba rōna ba ho se nkehe maikutlo, ’me e ka ’na eaba ba tseba haholoanyane ka liketsahalo tse amehang. Hangata liqeto tse joalo li utloisa bara bana babo rōna bohloko bo otlang pelo; ho ‘ahlolela Jehova’ ke boikarabelo bo tebileng. (2 Likronike 19:6) Ba leka ka hohle ho ba mohau, hobane ba hlokomela hore Molimo o “itokiselitse ho tšoarela.” (Pesaleme ea 86:5) Empa hape ba lokela ho boloka phutheho e hloekile, ’me Bibele e laela hore ba khaole bafosi ba sa bakeng. (1 Bakorinthe 5:11-13) Maemong a mangata mofosi ka boeena o amohela qeto. E ka ’na eaba taeo eo ke sona seo a se hlokang hore a hlaphoheloe. Haeba rōna, baratuoa ba hae, re ipeha tlaase mabapi le qeto eo, ka tsela eo, re tla be re mo thusa ho rua molemo taeong eo.—Baheberu 12:11.

‘Le ba Nahanele ho Feta Kamoo ho Tloaelehileng’

14, 15. (a) Ho latela 1 Bathesalonika 5:12, 13, ke hobane’ng ha re lokela ho nahanela baholo? (b) Ke hobane’ng ha ho ka boleloa hore baholo ba ‘sebetsa ka thata har’a rōna’?

¹⁴ Hape re ka bontša hore re ananela “limpho tseo e leng banna” ka ho li nahanela. Ha Pauluse a ngolla phutheho ea Thesalonika, o ile a eletsa litho tsa eona: “Le be le tlhompho ho ba sebetsang ka thata har’a lōna le ba le okametseng Moreneng le ba le eletsang; le ho ba nahanela ka lerato ho feta kamoo ho tloaelehileng ka lebaka la mosebetsi oa bona.” (1 Bathesalonika 5:12, 13) ‘Ho sebetsa ka thata’—na ha ho hlalose se etsoang ke baholo ba inehetseng bao ntle ho boithati ba itellang rōna? Ka nakoana nahana ka moroalo o boima oo bara bana babo rōna ba ratehang ba o jereng.

¹⁵ Maemong a mangata ke banna ba malapa ba lokelang ho sebetsa mesebetsi ea boipheliso e le hore ba phelise malapa a bona. (1 Timothea 5:8) Haeba moholo a e-na le bana, bana ba hloka nako le tlhokomelo ea ntat’a bona. Mohlomong ho hlokahala hore a ba thuse ka mosebetsi oa bona oa sekolo, esita le ho ba lokisetsa nako ea ho sebelisa matla a bona a bocha boithabisong bo hahang. (Moeklesia 3:1, 4) Habohlokoa haholo, o hlokomela litlhoko tsa moea tsa lelapa la hae, kamehla o khanna thuto ea Bibele ea lelapa, o sebetsa le bona tšebeletsong ea tšimo, le ho ba isa libokeng tsa Bokreste. (Deuteronoma 6:4-7; Baefese 6:4) A re se keng ra lebala hore ka holimo ho boikarabelo bona, boo boholo ba rōna re bo tloaetseng, baholo ba na le mesebetsi e eketsehileng: ho lokisetsa likarolo tse itseng tsa liboka, ho etsa maeto a bolisa, ho hlokomela boiketlo ba moea ba phutheho, ’me ha ho hlokahala, ho sebetsana le linyeoe tsa boahloli. Ba bang ba na le boikarabelo bo eketsehileng likopanong tsa potoloho, likopanong tsa setereke, kahong ea Liholo tsa ’Muso le Likomiting tsa Bohokahanyi le Lipetlele. Ka sebele, bara bana babo rōna ba ‘sebetsa ka thata’!

16. Hlalosa litsela tseo ka tsona re ka bontšang hore re nahanela baholo.

¹⁶ Re ka bontša joang hore rea ba nahanela? Maele a Bibele a re: “Lentsoe le buuoang ka nako ea lona e nepahetseng le molemo hakaakang!” (Liproverbia 15:23; 25:11, NW) Ka hona, mantsoe a kananelo ea sebele le khothatso a ka ba bontša hore ha re nke mosebetsi oa bona o boima habobebe. Hape, re lokela ho ba le kahlolo e molemo ho seo re se lebellang ho bona. Ka lehlakoreng le leng, re lokela ho ikutloa re lokolohile ho ba atamela bakeng sa thuso. Ho ka ’na ha e-ba le linako tseo ka tsona ‘lipelo tsa rōna li utloang bohloko’ ’me re hloka khothatso ea Mangolo, tataiso kapa keletso e tsoang ho ba “tšoanelehelang ho ruta” Lentsoe la Molimo. (Pesaleme ea 55:4, NW; 1 Timothea 3:2) Ka nako eona eo, ho hlokahala hore re hopole hore ho na le nako e itseng feela eo moholo a ka re fang eona, hobane a ke ke a hlokomoloha litlhoko tsa lelapa la hae kapa tsa ba bang ka phuthehong. Bara bana babo rōna ba sebetsang ka thata ha re ba ‘utloela bohloko,’ re ke ke ra ba batla se ka holimo ho matla a bona. (1 Petrose 3:8) Ho e-na le hoo, a re ananeleng nako efe kapa efe le tlhokomelo tseo ba ka re fang tsona ka tsela e bontšang kahlolo e molemo.—Bafilippi 4:5.

17, 18. Basali ba bangata bao banna ba bona e leng baholo ba itela ka litsela life, ’me re ka bontša joang hore ha re nke barali baa babo rōna ba tšepahalang habobebe?

¹⁷ Ho thoe’ng ka basali ba baholo? Na le bona ha ho hlokahale hore re ba nahanele? Etsoe, ba arolelana banna ba bona le phutheho. Hangata sena se hloka hore ba itele. Ka linako tse ling, nako ea mantsiboea eo baholo ba neng ba lokela hore ebe ba na le malapa a bona ka eona, ke eo ba hlokomelang litaba tsa phutheho ka eona. Liphuthehong tse ngata basali ba Bakreste ba tšepahalang ba ikemisetsa ho itela ka tsela eo e le hore banna ba bona ba ka hlokomela linku tsa Jehova.—Bapisa le 2 Bakorinthe 12:15.

¹⁸ Re ka bontša joang hore ha re nke barali baa babo rōna ba tšepahalang ba Bakreste habobebe? Ka sebele, ke ka hore re se ke ra batla se phahametseng matla a banna ba bona. Empa le rōna a re se keng ra lebala matla a mantsoe a bonolo a kananelo. Liproverbia 16:24 e re: “Puo tse ntle ke lekheha la linotši, li monate moeeng oa motho, li matlafatsa masapo a hae.” Nahana ka phihlelo ena. Ka mor’a seboka sa Bokreste, banyalani ba bang ba ile ba atamela moholo ’me ba kōpa ho bua le eena ka mora oa bona e mocha lilemong. Ha moholo a ntse a bua le banyalani bana, mosali oa hae o ne a letile ka mamello. Ka mor’a moo, ’mè oa mocha enoa o ile a atamela mosali oa moholo ’me a re: “Ke rata ho u leboha ka nako eo monna oa hao a e nkileng a thusa lelapa la ka.” Mantsoe ao a bonolo, a monate a kananelo ka sebele a ile a ama pelo ea mosali eo oa moholo.

19. (a) Baholo e le sehlopha ba finyella lipakane life ka botšepehi? (b) Kaofela ha rōna re lokela ho ikemisetsa ho etsa’ng?

¹⁹ Tokisetso ea baholo ea ho lisa linku ke e ’ngoe ea ‘limpho tse molemo’ tsa Jehova. (Jakobo 1:17) Che, banna bana ha baa phethahala; joaloka rōna kaofela, ba etsa liphoso. (1 Marena 8:46) Empa, e le sehlopha, baholo ka liphuthehong lefatšeng lohle ka botšepehi ba finyella lipakane tseo Jehova a neng a ba nahanetse tsona—e leng, ho khutlisetsa tseleng, ho haha, ho kopanya le ho sireletsa mohlape. E se eka moholo ka mong a ka etsa qeto e tiileng ea ho tsoela pele ho hlokomela linku tsa Jehova ka bonolo, ka tsela eo a ipaka e le mpho kapa tlhohonolofatso ho barab’abo. ’Me e se eka kaofela ha rōna re ka ikemisetsa ho bontša kananelo ea rōna bakeng sa “limpho tseo e leng banna” ka ho li mamela le ho ipeha ka tlaase ho tsona le ka ho li nahanela ka lebaka la mosebetsi oa tsona o boima. Re ka leboha hakaakang hore ebe Jehova ka lerato o re file banna bao ha e le hantle ba reng ho linku tsa hae: ‘Ke mosebetsi oa rōna ho le thusa ho sebeletsa Molimo ka thabo’!

U ne U Tla Arabela Joang?

◻ Ke hobane’ng ha e le ho loketseng ho bapisa phutheho le ’mele?

◻ Baholo ba ka thusa barab’abo bona joang ho sebeletsa Jehova ka thabo?

◻ Ke hobane’ng ha re sa lokela ho ikokobelletsa ba etellang pele feela empa hape re lokela ho ipeha tlaas’a bona?

◻ Re ka bontša ka litsela life hore re nahanela baholo?

[Setšoantšo se leqepheng la 16]

Baholo, babatsang ba bang ka boiteko ba bona ba moea oohle

[Setšoantšo se leqepheng la 17]

Ka mohlala oa bona o bontšang cheseho tšebeletsong, baholo ba ka thusa litho tsa malapa le ba bang ho sebeletsa ka thabo

[Litšoantšo tse leqepheng la 18]

Re ananela baholo ba rōna ba sebetsang ka thata!