Lentsoe la Jehova Lea Phela
Lintlha-khōlō Tsa Mangolo a Eang ho Bathesalonika le ho Timothea
PHUTHEHO e ncha ea Thesalonika e thulane le khanyetso ho tloha ha e ne e thehoa nakong eo moapostola Pauluse a neng a etetse sebakeng seo. Kahoo, ha Timothea eo e ka ’nang eaba o ne a le lilemong tsa bo20 a khutla Thesalonika ’me a fana ka tlaleho e ntle, Pauluse o susumelletseha hore a ngolle Bathesalonika lengolo leo a ba babatsang le ho ba khothatsa ka lona. Lengolo leo, leo e ka ’nang eaba le ngotsoe qetellong ea 50 C.E., ke la pele la mangolo a Pauluse a bululetsoeng. Kapele ka mor’a moo, o ngolla Bakreste ba Thesalonika lengolo la bobeli. Lekhetlong lena, o lokisa maikutlo a fosahetseng ao ba bang ba neng ba e-na le ’ona ’me o khothalletsa barab’abo rōna ho ema ba tiile tumelong.
Hoo e ka bang lilemo tse leshome hamorao, Pauluse o Macedonia ha Timothea a le Efese. Pauluse o ngolla Timothea o mo khothalletsa hore a lule Efese ’me a thuse bara le baralib’abo rōna hore ba tsoele pele ba e-na le kamano e ntle le Jehova ho sa tsotellehe tšusumetso ea mesuoe ea bohata ka hare ho phutheho. Pauluse o ngolla Timothea lengolo la hae la bobeli nakong eo ho hlorisoa ha Bakreste ho neng ho tota, ka mor’a hore mollo o senye Roma ka 64 C.E. Ke lengolo la hae la ho qetela le bululetsoeng. Khothatso le keletso e mangolong ana a Pauluse a mane e ka re tsoela molemo kajeno.—Baheb. 4:12.
‘LULANG LE FALIMEHILE’
Pauluse o babatsa Bathesalonika ka ‘mosebetsi oa bona o tšepahalang, mosebetsi oa bona o lerato le mamello ea bona.’ O ba bolella hore ke ‘tšepo ea hae le thabo le moqhaka oa thabo e khaphatsehang.’—1 Bathes. 1:3; 2:19.
Ka mor’a ho khothatsa Bakreste ba Thesalonika hore ba tšelisane ka tšepo ea tsoho, Pauluse o re: “Letsatsi la Jehova le tla hantle feela joaloka lesholu bosiu.” O ba eletsa hore ba ‘lule ba falimehile’ le hore ba lule ba hlaphohetsoe likelellong.—1 Bathes. 4:16-18; 5:2, 6.
Lipotso Tsa Mangolo Lia Arajoa:
4:15-17—Ke bo-mang ba ‘nkeloang marung ho ea kopana le Morena moeeng,’ hona see se etsahala joang? Bana ke Bakreste ba tlotsitsoeng ba ntseng ba phela nakong ea ho ba teng ha Kreste matleng a ’Muso. Ba “kopana le Morena” Jesu sebakeng se sa bonahaleng sa leholimo. Leha ho le joalo, e le hore sena se etsahale, ba lokela ho shoa pele ’me ba tsosoe e le libōpuoa tsa moea. (Bar. 6:3-5; 1 Bakor. 15:35, 44) Ho ba teng ha Kreste ho se ho qalile, kahoo Bakreste ba tlotsitsoeng ba shoang kajeno ha ba lule ba shoele. Baa ‘nkoa,’ kapa ba tsosoa ka ho panya ha leihlo.—1 Bakor. 15:51, 52.
5:23—Pauluse o ne a bolela’ng ha a ne a rapella hore ‘boikutlo le moea le ’mele ea barab’abo li bolokoe’? Pauluse o ne a bua ka boikutlo, moea le ’mele tsa phutheho ea Bokreste e le sehlopha, ’me e ne e akarelletsa Bakreste ba tlotsitsoeng ka moea ba Thesalonika. Ho e-na le ho re feela a rapelle hore phutheho e bolokoe, o rapella hore “boikutlo” ba eona bo bolokoe. O ile a boela a rapella “moea” oa eona, bophelo ba eona kapa ho ba teng ha eona le “’mele” oa eona—e leng Bakreste ba tlotsitsoeng e le sehlopha. (1 Bakor. 12:12, 13) Kahoo, thapelo ena e totobatsa hore Pauluse o ne a tsotella phutheho haholo.
Seo re Ithutang Sona:
1:3, 7; 2:13; 4:1-12; 5:15. Tsela e atlehang ea ho fana ka keletso ke ho babatsa motho le ho mo khothalletsa hore a tsoele pele a ntlafatsa seo a se etsang.
4:1, 9, 10. Barapeli ba Jehova ba lokela ho ’na ba hatela pele moeeng.
5:1-3, 8, 20, 21. Ha letsatsi la Jehova le ntse le atamela, re lokela ho ‘lula re hlaphohetsoe likelellong ’me re apare tšireletso ea sefuba ea tumelo le lerato ’me re roale tšepo ea poloko e le helmete.’ Ho feta moo, re lokela ho ela hloko haholo Lentsoe la Molimo la boprofeta, e leng Bibele.
“LE EME LE TIILE”
Ba bang ka phuthehong ba sotha seo Pauluse a se boletseng lengolong la hae la pele, ’me kamoo ho bonahalang kateng, ba hanyetsa taba ea hore “ho ba teng ha Morena” ho haufi. Pauluse o lokisa boikutlo ba bona ka ho bolela se lokelang ho ‘tla pele.’—2 Bathes. 2:1-3.
Pauluse oa eletsa: “Le eme le tiile ’me le tsoele pele le tšoareletse lineanong tseo le ileng la li rutoa.” O ba fa litaelo tsa hore ba ‘tlohe ho mor’abo rōna e mong le e mong ea tsamaeang ka mokhoa o sa laoleheng.’—2 Bathes. 2:15; 3:6.
Lipotso Tsa Mangolo Lia Arajoa:
2:3, 8—“Motho ea sa eeng ka molao” ke mang, hona o tla felisoa joang? “Motho” enoa ea entsoeng ka likarolo tse ngata ke sehlopha sa baruti ba Bokreste-’mōtoana. Ea filoeng matla a ho phatlalatsa likahlolo tsa Molimo khahlanong le batho ba khopo le ho fana ka litaelo tsa hore li phethahatsoe ke “Lentsoe”—’Muelli ea ka Sehloohong oa Molimo, e leng Jesu Kreste. (Joh. 1:1) Kahoo, ho ka boleloa hore Jesu o tla felisa motho ea sa eeng ka molao “ka moea [e leng matla a sebetsang] oa molomo oa hae.”
2:13, 14—Bakreste ba tlotsitsoeng ba ‘khethetsoe poloko ho tloha tšimolohong’ joang? E le sehlopha, Bakreste ba tlotsitsoeng ba ile ba khethoa esale pele ha Jehova a ne a rera hore peō ea mosali e tla khoba Satane hlooho. (Gen. 3:15) Jehova o ile a boela a bolela seo ho neng ho hlokahala hore ba se etse, a bolela le mosebetsi oo ba neng ba tla o etsa le hore na ba ne ba tla lekoa joang. Kahoo, o ile a ba bitsetsa ‘kabelo ena.’
Seo re Ithutang Sona:
1:6-9. Jehova oa khetha ha a liha likahlolo tsa hae.
3:8-12. Ha rea lokela ho sebelisa taba ea hore letsatsi la Jehova le haufi e le lebaka la hore re qobe ho sebetsa e le hore re fumane lintho tseo re li hlokang ha re ntse re etsa mosebetsi oa boboleli. Ho se sebetse ho ka etsa hore re be botsoa ha ba ha re susumeletsa hore re ‘itšunya-tšunye litabeng tsa batho ba bang.’—1 Pet. 4:15.
“U LEBELE SE BEHILOENG TLHOKOMELONG EA HAO”
Pauluse o laela Timothea hore a ‘tsoele pele a loana ntoa e ntle; a e-na le tumelo le letsoalo le letle.’ Moapostola Pauluse o thathamisa litšoaneleho tseo banna ba khethiloeng ka phuthehong ba lokelang ho ba le tsona. Pauluse o boetse o laela Timothea hore a “hane lipale tsa bohata tse silafatsang se halalelang.”—1 Tim. 1:18, 19; 3:1-10, 12, 13; 4:7.
Pauluse oa ngola o re: “U se ke ua nyatsa monna e moholo ka matla.” O phehella Timothea: “U lebele se behiloeng tlhokomelong ea hao, u furalle lipuo tsa lefeela tse silafatsang se halalelang le likhanyetsano tsa seo ka bohata se bitsoang ‘tsebo.’”—1 Tim. 5:1; 6:20.
Lipotso Tsa Mangolo Lia Arajoa:
1:18; 4:14—Ke ‘lipolelo life tse boletsoeng esale pele’ tse ileng tsa buuoa ka Timothea? E ka ’na eaba e ne e le boprofeta bo itseng bo neng bo le mabapi le karolo eo Timothea a neng a tla e phetha ka moso ka phuthehong ea Bokreste, boo Pauluse a ileng a bululeloa hore a fane ka bona ha a ne a etetse Lystra leetong la hae la bobeli la boromuoa. (Lik. 16:1, 2) Ba ipapisitse le ‘lipolelo tsena tse boletsoeng esale pele,’ banna ba baholo ba phutheho ba ile ba “beha matsoho” holim’a Timothea e mocha, ba mo khethela mosebetsi o khethehileng.
2:15—Mosali o “sireletsoa ka ho tsoala bana” joang? Ho ba le bana, ho ba hlokomela le ho hlokomela lelapa ho ka ‘sireletsa’ mosali hore a se ke a hloka mosebetsi eaba e e-ba ‘mosebi le ea kena-kenanang le litaba tsa batho ba bang.’—1 Tim. 5:11-15.
3:16—Sephiri se halalelang sa boinehelo ba bomolimo ke eng? Ka nako e telele ho ne ho sa tsebahale hore na batho ba ka hlompha bobusi ba Jehova ka ho phethahetseng kapa che. Jesu o ile a fana ka karabo ha a lula a tšepahala ho Molimo ka ho phethahetseng ho fihlela lefung.
6:15, 16—Mantsoe aa a lebisitsoe ho Jehova Molimo kapa ho Jesu Kreste? Mantsoe ana a lebisitsoe ho motho eo a hlalosang ponahalo ea hae, e leng Jesu Kreste. (1 Tim. 6:14) Ha a bapisoa le batho ba busang e le marena le likhosi, Jesu ke eena “feela ’Musi ea Matla a Maholo,” ’me ke eena feela ea nang le ho se shoe. (Dan. 7:14; Bar. 6:9) Haesale a nyolohela maholimong a sa bonahaleng, ha ho motho lefatšeng “ea ka mo bonang” ka mahlo a nama.
Seo re Ithutang Sona:
4:15. Ho sa tsotellehe hore na re sa tsoa ba Bakreste kapa ke khale re le bona, re lokela ho ikitlaelletsa ho tsoela pele le ho lula re hatela pele moeeng.
6:2. Haeba re hiriloe ke molumeli-’moho le rōna, ho e-na le hore re nke monyetla ka hoo, re lokela ho mo sebeletsa ka boikemisetso le ho feta motho ea ka ntle ho phutheho.
“U BOLELE LENTSOE, U BE HO LONA KA HO PHEHELLA”
E le hore a hlomelle Timothea bakeng sa linako tse thata tse larileng ka pele, Pauluse oa ngola: “Molimo ha aa re fa moea oa bokoala, empa o re file moea oa matla le oa lerato le oa ho hlaphoheloa kelellong.” Timothea oa eletsoa: “Lekhoba la Morena ha ho hlokahale hore le loane, empa ho hlokahala hore le be bonolo ho bohle, le tšoanelehele ho ruta.”—2 Tim. 1:7; 2:24.
Pauluse o eletsa Timothea o re: “U tsoele pele linthong tseo u ileng ua ithuta tsona le tseo u ileng ua susumelletsoa hore u li lumele.” Lithuto tsa bakoenehi li ne li ata, kahoo moapostola o eletsa molebeli e monyenyane: “U bolele lentsoe, u be ho lona ka ho phehella . . . , u khalemele, u nyatse ka matla, u eletse.”—2 Tim. 3:14; 4:2.
Lipotso Tsa Mangolo Lia Arajoa:
1:13—“Mohlala oa mantsoe a phelisang hantle” ke eng? “Mantsoe a phelisang hantle” ke mantsoe a “Morena oa rōna Jesu Kreste”—e leng lithuto tsa ’nete tsa Bokreste. (1 Tim. 6:3) Seo Jesu a neng a se ruta le seo a neng a se etsa se ne se le tumellanong le Lentsoe la Molimo, kahoo ho ka etsahala hore ebe poleloana e reng “mantsoe a phelisang hantle” e ka boela ea bolela lithuto tsohle tsa Bibele. Lithuto tsena li ka re thusa hore re bone hore na ke sefe seo Jehova a hlokang hore re se etse. Re tsoela pele re latela mohlala ona ka ho etsa seo re ithutileng sona Bibeleng.
4:13—“Matlalo a ho ngolla” e ne e le eng? Tlhaloso e reng “matlalo a ho ngolla” e bolela ntho ea ho ngolla e entsoeng ka letlalo le suiloeng. Ho ka etsahala hore ebe Pauluse o ne a batla likarolo tsa Mangolo a Seheberu e le hore a ka ithuta ’ona ha a le chankaneng Roma. E ka ’na eaba meqolo e meng e ne e le ea loli empa e meng e le ea letlalo.
Seo re Ithutang Sona:
1:5; 3:15. Lebaka le ka sehloohong le ileng la etsa hore Timothea a be le tumelo ho Kreste Jesu, e leng tumelo e neng e susumetsa ntho e ’ngoe le e ’ngoe eo Timothea a neng a e etsa, e ne e le thuto ea Mangolo eo a ileng a e fumana lapeng habo a sa le monyenyane. Ke habohlokoa hakaakang hore batsoali ba nahanisise ka hloko hore na ba phethahatsa boikarabelo bona joang ho Molimo le ho bana ba bona!
1:16-18. Ha balumeli-’moho le rōna ba thulana le liteko, ba hlorisoa, kapa ba kenngoa chankaneng, a re ba rapelleng re be re etse sohle seo re ka se khonang ho ba thusa.—Liprov. 3:27; 1 Bathes. 5:25.
2:22. Bakreste, haholo-holo bacha, ha baa lokela ho tšoareha haholo ka ho koetlisa ’mele, lipapali, ’mino, boithabiso, mesebetsi ea ho itlosa bolutu, ho hahlaula, meqoqo e se nang morero le lintho tse kang tseo, hoo ba ka bang le nako e fokolang bakeng sa lintho tsa moea.
[Setšoantšo se leqepheng la 31]
Mangolong a halalelang ao Pauluse a a ngotseng ke lefe leo a le ngotseng qetellong?