Ke Hobane’ng ha Kaofela re Lokela ho Rorisa Molimo?

HALLELUJA! Lentsoe lena le tsebahala haholo ho ba bangata ba kenang kereke Bokreste-’mōtoaneng. Ba bang ba bona ba le hoeletsa litšebeletsong tsa bona tsa Sontaha. Leha ho le joalo, ke ba bakae ba tsebang hore na lentsoe lee le hlile le bolela’ng? Ha e le hantle, ke lentsoe la Seheberu bakeng sa “Rorisang Jah!” Ke thoriso e etsoang ka thabo, e hlakileng haholo ea ’Mōpi, eo lebitso la hae e leng Jehova.a

Lentsoe “Halleluja” le hlaha hangata ka Bibeleng. Hobane’ng? Hobane ho na le mabaka a mangata haholo a ho rorisa Molimo. Jah (Jehova) ke ’Mōpi le ’Moloki oa bokahohleng bo boholohali. (Pesaleme ea 147:4, 5; 148:3-6) O ile a simolla kamano e pakeng tsa lintho tse phelang le tikoloho e etsang hore bophelo bo be teng lefatšeng. (Pesaleme ea 147:8, 9; 148:7-10) ’Me o thahasella moloko oa batho ka ho khethehileng. Haeba re etsa thato ea hae, oa re hlohonolofatsa le ho re tšehetsa bophelong bona ’me o re neha tšepo e tiileng ea bophelo bo bileng bo leng molemonyana, bo tla tla. (Pesaleme ea 148:11-14) Ke Jah (Jehova) ea ileng a bululela mantsoe ana: “Ba lokileng ba tla ja lefa la lefatše, ’me ba tla hlola ho lona ka ho sa feleng.”—Pesaleme ea 37:29.

Kahoo, khothatso ena e lebisoa ho bohle: “Halleluja!” “Rorisang Jah!” (Pesaleme ea 104:35, NW; bona le mongolo o botlaaseng ba leqephe.) Leha ho le joalo, ka masoabi, hase e mong le e mong ea ikutloang hore a ka arabela. Kajeno, batho ba utloa bohloko. Ba bangata ba lapile, baa kula kapa ba hateletsoe. Ba bangata ba mamella mesarelo e mengata ka lebaka la tšebeliso e mpe ea lithethefatsi kapa tahi kapa liphello tsa boitšoaro ba bona bo bobe kapa borabele. Na ho na le lebaka leha e le lefe leo ka lona ba joalo ba lokelang ho rorisa Molimo?

‘Ke Jehova Feela ea Neng a ka Mpha Tšepo’

E, le teng. Jehova a sa khethe, o memela e mong le e mong ho mo tseba, ho ithuta ho etsa thato ea hae, le ho thabela litlhohonolofatso tse etsang hore batho ba batle ho mo rorisa. ’Me ba bangata baa arabela. Ka mohlala, nka Adriana oa Guatemala. Ha Adriana a ne a le lilemo li supileng, ’mè oa hae o ile a shoa. Nakoana ka mor’a moo ntate oa hae o ile a tloha lapeng. Ha a ne a le lilemo li leshome, o ile a qala ho etsa mosebetsi oa boipheliso. Kaha ’mè oa hae o ne a ile a mo bolella hore a sebeletse Molimo le kereke, Adriana o ile a kopanela le lihlopha tse sa tšoaneng tsa Mak’hatholike, empa ha a le lilemo li 12, o ile a felloa ke thahasello ’me ea e-ba setho sa kenke ea seterateng. O ile a qala ho tsuba, ho sebelisa lithethefatsi le ho utsoa. Ke hobane’ng ha ho ne ho hlokahala hore ngoanana e monyenyane joalo a batle ho rorisa Molimo?

Morali’abo Adriana o ile a qala ho ithuta Bibele le Lipaki tsa Jehova, empa Adriana o ne a mo tšeha. Eaba ’mangoane oa bona oa shoa. Lepatong la ’mangoane oa hae, Adriana o ile a khathatsoa ke lipotso tse tšoenyang. ’Mangoane oa hae o ne a ile hokae? Na o ne a le leholimong? Na o ne a ile liheleng tsa mollo? E ne e le ntho e ferekanyang haholo, ’me Adriana o ile a ea tlung ea thapelo setšeng sa mabitla ho ea rapella thuso, a sebelisa lebitso la Molimo Jehova, joalokaha morali’abo a ne a mo rutile.

Kapele o ile a ithuta Bibele le Lipaki tsa Jehova a bile a kopanela libokeng tsa tsona tsa Bokreste. Sena se ile sa mo fa pono e ncha ka ho feletseng ea bophelo, ’me ka sebete o ile a khaotsa ho ba setho sa likenke tsa seterateng. Hona joale Adriana a le bohareng ba lilemo tsa bo-20, o re: “Ke ho rata Jehova feela ho entseng hore ke tlohele mokhoa o mobe joalo oa bophelo. Ke Jehova feela ka mohau oa hae o moholo ea neng a ka mpha tšepo ea bophelo bo sa feleng.” Ho sa tsotellehe hore na bophelo ba hae bo bile boima hakae qalong, Adriana o na le mabaka a matle haholo a ho rorisa Molimo.

Boemo bo bong bo lahlisang tšepo le ho feta ke bo tlalehong e tsoang Ukraine. Monna e mong o lula teronkong o letetse kahlolo ea lefu. Na oa iqenehela? O tepeletse maikutlo? Che, o boemong bo fapaneng le boo ka ho feletseng. Kaha Lipaki tsa Jehova li sa tsoa buisana le eena ’me o fumane tsebo e itseng ka Jehova, o ile a li kōpa hore li buisane le ’mè oa hae. Joale oa li ngolla hobane o utloile hore li phethahalitse kōpo ea hae. O re: “Ke leboha hore ebe le ile la etela ’Mè. E bile litaba tse thabisang ka ho fetisisa tseo ke li fumaneng selemong sena sa ho feta.”

Ha a bua ka eena le bao a lulang le bona ka seleng bao a ba paketseng, oa ngola: “Hona joale re na le tumelo ho Molimo ’me re leka ho sebetsa tumellanong le tumelo ea rōna.” O phetha lengolo la hae: “Kea leboha hore ebe le re thusitse ho ithuta seo lerato le leng sona le ho ba le tumelo. Haeba nka tsoela pele ho phela, le ’na ke tla le thusa. Ke leboha Molimo hore ebe le teng le hore ebe le thusa ba bang ho rata Molimo le ho lumela ho eena.” Monna enoa o entse boipiletso mabapi le kahlolo ea hae ea lefu. Empa ebang oa bolaoa kapa o qeta lilemo tse ngata a le teronkong, ho hlakile hore o na le lebaka la ho rorisa Molimo.

‘Le Hoja ke Foufetse, Kea Bona’

Joale, nahana ka moroetsana ea sehlahlo ea foufalang ka tšohanyetso. Seo ke se ileng sa etsahalla Gloria, ea lulang Argentina. Ka tšohanyetso Gloria o ile a foufala ha a ne a le lilemo li 19, ’me ha aa ka a hlola a bona hape. Ha a le lilemo li 29 e ile ea e-ba nyatsi ea monna e mong ’me kapele a ima. Joale o ile a ikutloa hore bophelo ba hae bo na le morero. Empa ha ngoana oa hae a e-shoa, o ile a qala ho botsa lipotso. O ile a ipotsa, ‘Ke hobane’ng ha see se nketsahalla? Ke entse’ng? Na ruri Molimo o teng?’

Mothating ona, Lipaki tsa Jehova tse peli li ile tsa tla ha hae. O ile a qala ho ithuta Bibele le ho ithuta ka tšepiso ea eona ea hore lefatšeng le lecha lifofu li tla boela li bone. (Esaia 35:5) Ke tebello e hlollang hakaakang bakeng sa Gloria! O ne a thabile haholo, haholo-holo ha monna oa hae a lumela ho ngolisa lenyalo la bona ka molao. Joale monna oa hae o ile a hlaheloa ke kotsi ’me a holofala, a lula setulong sa likooa ka linako tsohle. Kajeno mosali enoa ea foufetseng o tlameha ho sebetsa ka thata ho fumana litlhoko tsa bophelo. Ho phaella moo, o etsa mosebetsi oohle oa lelapa, esita le oa ho hlokomela monna oa hae. Ho ntse ho le joalo, Gloria o rorisa Jehova! Ka thuso ea bara le barali babo ba Bakreste, o ithuta Bibele ea Braille, ’me o khothatsoa haholo ke liboka tsa Bokreste Holong ea ’Muso. O re: “Ho thata ho hlalosa, empa le hoja ke foufetse, ho joalokaha eka kea bona.”

Ka linako tse ling batho baa hlorisoa ha ba rorisa Molimo. Mosali e mong oa Croatia o ile a thaba ha a ithuta ka Molimo, empa monna oa hae o ne a hanyetsa tumelo eo a neng a sa tsoa e fumana ’me a mo lahla, a nka morali oa bona ea nang le selemo a hlahile. A setse lepala-paleng, a lahliloe ke monna le lelapa, a se na lehae, mosebetsi esita le ngoana, o ne a sithabetse qalong. Empa lerato la hae bakeng sa Molimo le ile la mo boloka, le hoja a ne a behetsoe meeli bakeng sa ho kopana le morali oa hae ho fihlela ngoana enoa a hōla. Mosali enoa o ne a fumane ‘perela ea theko e phahameng’ ’me o ne a ke ke a e tlohela. (Matheu 13:45, 46) O ile a boloka thabo ea hae joang ho pholletsa le linako tsee tse thata? O re: “Thabo ke tholoana ea moea oa Molimo. E ka hlaoleloa ho sa itšetlehoa ka maemo a ka ntle, hantle feela joalokaha limela li ka hōlela ka har’a sekhurumetsi sa limela ho sa tsotellehe hore na boemo ba leholimo bo joang ka ntle.”

Finland, litlhahlobo tsa bongaka li ile tsa hlahisa hore Markus ea lilemo li tšeletseng o na le lefu la mesifa le sa phekoleheng. Ka mor’a nakoana o ile a ba setulong sa likooa ka linako tsohle. Lilemo tse seng kae hamorao, ’mè oa hae o ile a mo isa ho Mopentekonta ea neng a tsebahala hohle sebakeng seo ka ho ipolela hore o phekola batho ba kulang. Empa ha hoa ka ha e-ba le phekolo ea mohlolo. Ka hona Markus o ile a felloa ke thahasello ho Molimo ’me a hahamalla lithuto tsa saense le lithuto tse ling tsa lefatše. Joale, hoo e ka bang lilemong tse hlano tse fetileng, mosali e mong ea tsamaeang ka setulo sa likooa a e-na le mohlankana e mong o ile a tla ntlong eo Markus a neng a lula ho eona. E ne e le Lipaki tsa Jehova. Ka nako ena Markus o ne a sa lumele hore Molimo o teng, empa o ne a sa hane ho bua ka bolumeli ’me o ile a ba memela ka tlung.

Hamorao, banyalani ba bang ba ile ba mo etela, ’me thuto ea Bibele e ile ea qalisoa. Qetellong, matla a ’nete ea Bibele a ile a fetola pono ea Markus ea lintho, ’me o ile a elelloa hore ho sa tsotellehe ho holofala ha hae, ruri o ne a e-na le mabaka a ho rorisa Molimo. O ile a re: “Ke thabile haholo hobane ke fumane ’nete le mokhatlo o hlophisitsoeng oo Jehova a o sebelisang. Hona joale bophelo ba ka bo hlophisehile ebile bo na le morero. Nku e ’ngoe e lahlehileng e fumanoe ’me ha e batle ho furalla mohlape oa Jehova!”—Bapisa le Matheu 10:6.

Bohle a ba ke ba ‘Rorise Jah’

Tsena ke liphihlelo tse seng kae feela liphihlelong tse se nang palo tse ka phetoang ho bontša hore kajeno batho, ho sa tsotellehe hore na maemo a bona ke afe, ba ka ba le lebaka la ho rorisa Molimo. Moapostola Pauluse o ile a hlalosa sena ka tsela ena: “Boinehelo ba bomolimo bo molemo bakeng sa lintho tsohle, kaha bo e-na le tšepiso ea bophelo ba hona joale le ea bo tlang ho tla.” (1 Timothea 4:8) Haeba re etsa thato ea Molimo, re tla finyella “tšepiso ea bophelo ba hona joale.” Ho hlakile hore a ke ke a etsa hore mafutsana a rue kapa ba kulang ba phele hantle tsamaisong ena ea lintho. Empa o fana ka moea oa hae ho ba mo sebeletsang e le hore ba fumane thabo le khotsofalo ho sa tsotellehe hore na maemo a bona a ka ntle ke afe. E, esita le ‘bophelong ba hona joale,’ ba kulang, ba hateletsoeng le mafutsana ba ka ba le lebaka la ho rorisa Molimo.

Empa ho thoe’ng ka bophelo “bo tlang ho tla”? Ka sebele, ho nahana ka bona feela ho lokela ho etsa hore re rorise Molimo ka cheseho e khōlōhali! Rea nyakalla ha re nahana ka nako eo ka eona bofutsana bo tla beng bo sa tsejoe; ha ho se ‘ho se moahi ea tla re: “Kea kula”’; le ha Jehova Molimo a ‘tla hlakola meokho eohle mahlong a bona, ’me lefu le ke ke la hlola le e-ba teng, leha e le ho siama kapa ho bokolla kapa bohloko li ke ke tsa hlola li e-ba teng. Lintho tsa pele li se li fetile.’ (Esaia 33:24, NW; Tšenolo 21:3, 4; Pesaleme ea 72:16) U talima litšepiso tsee tse tsoang ho Molimo joang?

Mohlankana e mong oa El Salvador o ile a amohela pampitšana ea Bibele e neng e hlalosa tse ling tsa lintho tsena. O ile a re ho Paki e neng e mo neha eona, “Mofumahali, seo pampitšana ena e se buang ho bonahala ho le thata ho se lumela.” Ba bangata ba arabela ka tsela eo. Empa, tsena ke litšepiso tsa Ea bōpileng bokahohleng, ea qalisitseng potoloho ea tlhaho ea lefatše la rōna, le ea thusang esita le mafutsana le ba kulang ho fumana thabo. Re ka lumela seo a se buang. Mohlankana ea boletsoeng ka holimo o ile a ithuta Bibele le Lipaki tsa Jehova ’me a hlokomela hore sena ke ’nete. Haeba ha u e-s’o etse joalo, re u khothalletsa ho etsa se tšoanang. Joale, e se eka u ka ba teng ha tsamaiso ena ea kajeno ea lintho e fetile, ’me pōpo eohle e kopanela mohoong ona: “Halleluja!” “Rorisang Jah!”—Pesaleme ea 112:1; 135:1, NW.

[Mongolo o botlaaseng ba leqephe]

[Setšoantšo se leqepheng la 5]

E se eka u ka ba teng ha pōpo eohle e kopanela mohoong ona: “Halleluja!”