Utloang ba Etelletseng Pele
“Utloang ba etelletseng pele har’a lōna ’me le ikokobetse, hobane ba lebela meea ea lōna joaloka ba tla ikarabella.”—BA-HEBERU 13:17, “NW”.
1. Re fumana molemo joang mosebetsing oa balebeli ba Bakreste?
JEHOVA o fane ka balebeli bakeng sa mokhatlo oa hae o hlophisitsoeng ‘nakong ena ea bofelo.’ (Daniele 12:4) Ba etella pele ho hlokomela batho ba seka linku, ’me tsamaiso ea bona ea khatholla. (Esaia 32:1, 2) Ho feta moo, bolebeli bo lerato ba baholo ba tšoarang mohlape oa Molimo ka mosa bo sebeletsa e le tšireletso khahlanong le Satane le tsamaiso ena e khopo ea lintho.—Liketso 20:28-30; 1 Petrose 5:8; 1 Johanne 5:19.
2. Ba bang ba ne ba talima moapostola Pauluse joang, empa ke boikutlo bofe bo loketseng mabapi le baholo?
2 Empa u talima baholo joang? Ka pelong ea hao, na u re: ‘Le ka mohla nke ke ka ea ho moholo e mong phuthehong ena haeba ke e-na le bothata, hobane ha ho lea mong oa bona eo ke mo tšepang’? Haeba eo ke tsela eo u ikutloang ka eona, na e be u fetelletsa mefokolo ea bona? Korinthe ea boholo-holo, ba bang ba ne ba re ka moapostola Pauluse: “Ruri mangolo a hae a boima, a matla; empa ha a le teng ka seqō ke likobo feela, le puo ea hae ea nyeliseha.” Empa, Molimo o ile oa abela Pauluse tšebeletso ’me oa mo sebelisa e le “moapostola ho lichaba.” (2 Ba-Korinthe 10:10, TLP; Ba-Roma 11:13, NW; 1 Timothea 1:12) Ka hona, ho tšeptjoa hore u ikutloa joaloka khaitseli ea ileng a re: “Re na le sehlopha sa baholo se molemo ka ho fetisisa lefatšeng. Ba teng hona mona ho thusa ha ho hlokahala.”
Ke Hobane’ng ha re Lokela ho ba Utloa?
3. Hore Morena a tle a be le moea oo re o bontšang, re lokela ho talima balisa ba tlaasana ba Bakreste joang?
3 Kaha balisa ba tlaasana ba Bakreste ba fanoe ke Molisa e Moholo, Jehova Molimo, u nahana hore o batla re ba talime joang? Ka sebele, Molimo o lebelletse hore re latele tataiso e theiloeng Bibeleng e fumanoang ka balebeli ba lerato tlas’a tsamaiso ea Sehlopha se Busang sa Lipaki tsa Jehova. Joale ‘Morena o tla ba le moea oo re o bontšang,’ re tla thabela khotso, ’me re tla hahoa moeeng.—2 Timothea 4:22, NW; bapisa le Liketso 9:31; 15:23-32.
4. Re le batho ka bomong re ka sebelisa Ba-Heberu 13:7 (NW) joang?
4 Pauluse o ile a phehella: “Hopolang ba etelletseng pele har’a lōna, ba buileng lentsoe la Molimo ho lōna, ’me ha le ntse le nahanisisa kamoo boitšoaro ba bona bo felletseng kateng le etsise tumelo ea bona.” (Ba-Heberu 13:7, NW) Har’a Bakreste ba pele, baapostola e ne e le bona ba ka sehloohong ba etelletseng pele. Kajeno, re ka nka mehlala ho ba etsang Sehlopha se Busang sa Lipaki tsa Jehova, balebeli ba bang ba tlotsitsoeng, le banna ba “bongata bo boholo ba batho” ba etelletseng pele har’a rōna. (Tšenolo 7:9) Le hoja re sa phehelloe hore re etsise mantsoe a bona, tsela eo ba emang ka eona, kapa litšobotsi tse ling tsa botho, re lokela hore re khone ho etsa hore boitšoaro ba rōna bo felle hantle ka ho etsisa tumelo ea bona.
5. Lefatšeng kajeno, boikarabelo bo ka sehloohong ba ho hlokomela phutheho ea Bokreste bo fuoe bo-mang, ’me ba tšoaneloa ke eng?
5 Lefatšeng kajeno, boikarabelo ba sehlooho ba ho hlokomela litlhokahalo tsa rōna tsa moea bo fuoe “mohlanka ea khabane, ea bohlale.” Sehlopha se Busang seo e leng moemeli oa hae se etella pele ’me se hokahanya mosebetsi oa ho bolela ka ’Muso lefatšeng ka bophara. (Mattheu 24:14, 45-47) Baholo bana ba khethiloeng ke moea ke bona bao ka ho khethehileng ba ka talingoang e le babusi ba moea, hobane Ba-Heberu 13:7 e ka fetoleloa tjena: “Le hopole ba busang . . . lōna.” (Kingdom Interlinear) Kaha ho na le liphutheho tse fetang 60 000 le baboleli ba ’Muso ba ka holimo ho 3 500 000, baholo ba 12 ba bōpang Sehlopha se Busang ba na le ‘ho hongata hoo ba lokelang ho ho etsa mosebetsing oa Morena.’ (1 Ba-Korinthe 15:58, NW) Ka baka la kabelo eo ba e fuoeng ke Molimo, ba tšoaneloa ke tšebelisano-’moho ea rōna e felletseng, joalokaha sehlopha se busang sa lekholong la pele la lilemo se ne se fumana tšebelisano-’moho ea Bakreste ba pele.—Liketso 15:1, 2.
6. Lintho tse ling tse etsoang ke baholo molemong oa batho ba Jehova ke life?
6 Balebeli ba khethiloe ke moea hore ba hlokomele litlhokahalo tsa moea tsa phutheho. (Liketso 20:28) Ba seli ho bona hore molaetsa oa ’Muso oa boleloa tšimong ea phutheho ka ’ngoe. Banna bana ba nang le litšoaneleho tsa Mangolo ba boetse ba fana ka tataiso ea moea ka mokhoa o lerato. Baa khothatsa, baa tšelisa, ’me ba pakela baena le bo-khaitseli ba bona ba moea, ka sepheo sa hore bana ba ’ne ba tsamaee ka mokhoa o tšoanelang Molimo. (1 Ba-Thessalonika 2:7, 8, 11, 12) Esita le ha motho e mong a nka mohato o fosahetseng pele a o hlokomela, banna bana ba batla ho mo busetsa tseleng “ka moea o mosa.”—Ba-Galata 6:1.
7. Pauluse o ile a fana ka keletso efe ho Ba-Heberu 13:17 (NW)?
7 Lipelo tsa rōna li susumetseha hore li sebelisane hammoho le balebeli ba lerato joalo. Sena se loketse, joalokaha Pauluse a ngotse: “Utloang ba etelletseng pele har’a lōna ’me le ikokobetse, hobane ba lebela meea ea lōna joaloka ba tla ikarabella; hore ba ke ba etse sena ka thabo eseng ka ho tletleba, hobane sena se ne se tla ba kotsi ho lōna.” (Ba-Heberu 13:17, NW) Re lokela ho utloisisa keletso ee joang?
8, 9. (a) Ka baka la Ba-Heberu 13:17 (NW), ke hobane’ng ha re lokela ho utloa ba etelletseng pele? (b) Ho utloa le ho ikokobetsa ha rōna ho ka ba le liphello life tse ntle?
8 Pauluse o re phehella hore re utloe ba re busang moeeng. Re lokela ho ‘ikokobetsa,’ ho ipeha tlas’a balisa bana ba tlaasana. Hobane’ng? Hobane ‘ba lebela meea ea rōna,’ kapa bophelo ba batho ba inehetseng ho Molimo. Ba “lebela” joang? Mona ketso ea lekhathe la joale ea Segerike a·gru·pneʹo ha e le hantle e bolela hore baholo “ba tela boroko.” Sena se re hopotsa molisa ea lutseng a le mong ea telang boroko hore a sireletse mohlape oa hae likotsing tse ka hlahang bosiu. Ka linako tse ling baholo ba qeta masiu ba sa robale ka thapelo ba amehile ka mohlape oa Molimo kapa ba fana ka thuso ea moea ho balumeli ’moho. Re lokela ho ananela tšebeletso ea bona e tšepahalang hakaakang! Ruri ha re batle ho tšoana le “batho ba hlokang borapeli” ba mehleng ea Juda ba neng ‘ba nyefola ba beiloeng boholong, ’me ba nyelisa ba khanyang,’ baholo ba Bakreste ba tlotsitsoeng bao khanya, kapa tlhompho, eo ba e fuoeng ke Molimo e behiloeng holim’a bona.—Juda 3, 4, 8.
9 Jehova o ne a tla halefa haeba re ka hlōleha ho utloa le ho ikokobeletsa balebeli ba Bakreste. Hape sena se ne se tla ipaka se le boima ho bona ’me se ne se tla re ntša kotsi moeeng. Haeba re ne re ka hloka tšebelisano-’moho, baholo ba ne ba ka ’na ba hlokomela boikarabelo ba bona ka ho tletleba, mohlomong ka moea oa ho nyahama o neng o ka fella ka ho lahleheloa ke thabo mesebetsing ea rōna ea Bokreste. Empa ho utloa le ho ikokobetsa ha rōna ho phahamisa boitšoaro ba bomolimo ’me ho matlafatsa tumelo ea rōna. ‘Morena o na le moea oo re o bontšang,’ ’me thabo ea khaphatseha moeeng o joalo oa tšebelisano-’moho, khotso, le bonngoe.—2 Timothea 4:22, NW; Pesaleme ea 133:1.
10. Ho latela 1 Timothea 5:17, ke hobane’ng ha ba lisang hantle ba tšoaneloa ke tlhompho?
10 Ho utloa ha rōna baholo ba phutheho le ho ikokobeletsa bona ha ho bolele hore re khahlisa batho. Hoo ho ne ho tla be ho le khahlanong le Mangolo, hobane bahlanka ba Bakreste ba lekholong la pele la lilemo ba ile ba bolelloa hore ba utloe benghali ba bona, ‘ba se ke ba ba sebeletsa feela ha ba ba talimile, joale ka hoja ba rata ho khahlisa batho, e mpe e be ka pelo e khabane, ka ho tšaba Molimo.’ (Ba-Kolosse 3:22; Ba-Efese 6:5, 6) Balebeli ‘ba lisang hantle le ba sebetsang ka thata polelong le thutong’ ba tšoaneloa ke tlhompho haholo-holo hobane thuto ea bona e theiloe Lentsoeng la Molimo. Joalokaha Pauluse a ngotse: “Baholo ba lisang hantle ba ke ba baloe hoba ba tšoaneloa ke hlompho e fetisisang, haholo ba sebetsang polelong le thutong. Hobane Lengolo le re: U se ke ua thiba molomo oa khomo ha e pola. Hape le re: Ea sebetsang o tšoaneloa ke moputso oa hae.”—1 Timothea 5:17, 18.
11. “Hlompho e fetisisang” e ka tla ho moholo joang, empa o tlameha ho qoba eng?
11 Mantsoe a Pauluse a sa tsoa qotsoa a bontša hore ka nepo thuso ea lintho tse bonahalang e ka fuoa ba hlokomelang lithahasello tsa moea tsa ba bang. Leha ho le joalo, sena ha se bolele hore baholo ba lokela ho amohela moputso, ’me ka sebele “hlompho e fetisisang” hase ntho e ’ngoe eo moholo a ka laelang hore a e fuoe. E ka hlaha ho litho tsa phutheho ka boithaopo, empa le ka mohla ha aa lokela ho sebelisa kabelo ea hae ho fumana matla kapa maruo a bonahalang. Ha aa lokela ho ipatlela khanya kapa ho iketsa motsoalle e moholo oa ba ruileng bakeng sa molemo oa lintho tse bonahalang e be o hlokomoloha ba bang. (Liproverbia 25:27; 29:23; Juda 16) Ho fapana le hoo, molebeli o tlameha ho alosa mohlape oa Molimo ‘ka boithaopo, eseng bakeng sa lerato la phaello ea bolotsana, empa ka cheseho.’—1 Petrose 5:2, NW.
12. Re tla thusoa ho utloa ba etelletseng pele har’a rōna ka ho hopola eng?
12 Re tla thusoa ho utloa le ho hlompha ba etelletseng pele haeba re hopola hore ke Molimo ka booona o faneng ka baholo. (Ba-Efese 4:7-13) Kaha banna bana ba khethiloe ke moea ’me mokhatlo o hlophisitsoeng oa Molimo o sebakeng sa bohlokoahali bophelong ba Lipaki tsa Jehova, ka sebele re batla ho bontša teboho le tlhompho ea rōna bakeng sa litokisetso tsa puso ea Molimo. Ho feta moo, re ka thusa ba bacha ho hlaolela boikutlo bona haeba re beha mohlala o motle oa ho utloa le ho ikokobeletsa ba etelletseng pele har’a rōna.
Ke Hobane’ng ha re Lokela ho Ananela Tšebeletso ea Bona?
13. (a) Ke lipono life tse fapaneng ka ketello-pele tse teng lefatšeng le ka hare ho mokhatlo o hlophisitsoeng oa Molimo? (b) Re na le mabaka afe a utloahalang bakeng sa ho tšepa banna ba etelletseng pele har’a rōna? (c) Ho e-na le ho hōlisa mefokolo ea baholo ba sebetsang ka thata, re lokela ho etsa joang?
13 Lefatšeng, ho na le tšekamelo ea ho hana ketello-pele. Ho joalokaha morupeli e mong a itse: “Ho phahama ha thuto ho ntlafalitse litalenta hoo balateli e seng e le ba nyatsa-nyatsang hoo ho batlang ho se ho le thata ho ba etella pele.” Empa moea oa monahano oa boitaolo ha o eo ka hare ho mokhatlo o hlophisitsoeng oa Molimo, ’me re na le mabaka a utloahalang a ho tšepa banna ba etelletseng pele har’a rōna. Ka mohlala, ke feela ba finyellang litlhokahalo tsa Mangolo ba khetheloang ho ba baholo. (1 Timothea 3:1-7) Ba koetlisetsoa ho ba mosa, lerato, le ho thusa, empa e le ba tiileng ho phahamiseng litekanyetso tse lokileng tsa Jehova. Baholo ba khomarela ’nete ea Mangolo, ‘ba tšoarella ka tieo lentsoeng le tšepahalang, hore ba tle ba khone ho khothatsa ka thuto e phelisang.’ (Tite 1:5-9, NW) Ke ’nete hore ha rea lokela ho hōlisa mefokolo ea bona ea botho, hobane kaofela ha rōna ha rea phethahala. (1 Marena 8:46; Ba-Roma 5:12) Ho e-na le ho ikutloa re ferekane ka baka la mefokolo ea bona le ho nka keletso ea bona habobebe, a re ananeleng ’me re amohele tataiso ea baholo e theiloeng Bibeleng e le e tsoang ho Molimo.
14. Ka baka la 1 Timothea 1:12 (TLP), moholo o lokela ho talima tšebeletso eo a e abetsoeng joang?
14 Pauluse, monna ea nang le kananelo, o itse: “Ke leboha ea ’matlafalitseng, e leng Kreste Jesu Morena oa rōna, hobane o nkukile ke le ea tšepahalang, a ba a nkhethela ho ba mosebeletsi oa hae.” (1 Timothea 1:12, TLP) Tšebeletso eo, kapa mosebetsi, e ne e akarelletsa mosebetsi oa ho bolela le oa ho sebeletsa balumeli ’moho. Le hoja molebeli a e-na le kabelo e fanoeng ke moea o halalelang ea ho sebeletsa e le molisa, sena ha sea lokela ho etsa hore a ikutloe a phahametse ba bang, hobane eena ka boeena ke karolo ea mohlape oa Molimo oa batho ba seka linku. (1 Petrose 5:4) Ho e-na le hoo, o lokela ho leboha hore e be Hlooho ea phutheho, Jesu Kreste, o mo nkile a tšoaneleha ho sebeletsa litho tsa mohlape le hore Molimo o mo entse ea tšoanelehang ka ho mo fa tsebo, bohlale, le kutloisiso tse batsi. (2 Ba-Korinthe 3:5) Kaha moholo o na le lebaka la ho leboha bakeng sa litokelo tsa hae tseo a li fuoeng ke Molimo, litho tse ling tsa phutheho li lokela ho ananela tšebeletso ena, kapa mosebetsi.
15. ’Moko-taba oa keletso ea Pauluse e ho 1 Ba-Thessalonika 5:12, 13, (TLP) ke ofe?
15 Lipaki tsa Jehova li tletse teboho ka mokhatlo o hlophisitsoeng oo Molimo o o hahileng mehleng ena ea qetello, ’me kananelo eo e re susumelletsa ho hlompha baholo. Re lokela ho thabela ho sebelisana ka botlalo le litokisetso tseo ba li etsang molemong oa rōna. Pauluse o itse: “Bana beso, rea le kōpa: Hlomphang ba sebetsang ka thata har’a lōna ho le lisa le ho le eletsa lebitsong la Morena. Ka baka la mosebetsi oa bona, le ba hlomphe haholo, le ba rate.” (1 Ba-Thessalonika 5:12, 13, TLP) Ho sebelisa keletso ena ho tlisa thabo le tlhohonolofatso ea Jehova.
Potlakela ho Sebelisa Keletso
16, 17. Baholo ba ka ’na ba fana ka keletso efe mabapi le lenyalo, ’me phello ea ho e latela e ne e tla ba efe?
16 Pauluse o ile a phehella Tite hore ‘a khothatse ’me a khalemele ka matla ’ohle.’ (Tite 2:15) Ka ho tšoanang, kajeno baemeli ba Molimo ba re lebisa melao-motheong le melaong ea Bibele. Ho na le mabaka a utloahalang a ho amohela temoso e phetoang khafetsa ea ho sebelisa keletso le tataiso ea mokhatlo o hlophisitsoeng oa Jehova le baholo ba khethiloeng.
17 Ho etsa mohlala: Baholo ba ka ’na ba phehella Mokreste hore a latele keletso ea Bibele ea ho nyala “feela Moreneng.” (1 Ba-Korinthe 7:39, NW; Deuteronoma 7:3, 4) Ba ka ’na ba bontša hore ho nyalana le motho ea sa kolobetsoang ho ka lebisa mathateng a tebileng, joalokaha Morena Salomone a ile a etsa phoso e tebileng ka ho nka basali ba balichaba, ba ileng ba khelosetsa pelo ea hae melimong ea bohata ’me ba mo tlosa ho Jehova. (1 Marena 11:1-6) Baholo ba ka ’na ba boela ba hlalosa hore Esdrase o ile a laela hore banna ba Bajode ba leleke basali ba bona ba bahedene, ’me Nehemia o ile a re ba nyalang batho ba sa lumelang ba ne ba ‘etsa bobe bo boholo ka ho itšoara ka ho se tšepahale khahlanong le Molimo.’ (Nehemia 13:23-27, NW; Esdrase 10:10-14; bona Molula-Qhooa, September 1, 1982, leqephe 30; November 15, 1986, maqephe 26-30.) Mahlohonolo le khotsofalo ea ho khahlisa Jehova li tlisoa ke ho sebelisa keletso e joalo ea Mangolo e fanoang ke baholo ba lerato.
18. Mabapi le seo Pauluse a se ngotseng ho 1 Ba-Korinthe 5:9-13, re lokela ho itšoara joang haeba setho sa lelapa se khaotsoe?
18 Ho boetse ho loketse ho hlompha liqeto tsa boahloli tsa baholo. Pauluse o ile a bolella Bakreste ba Korinthe hore ba “se ke [ba] kopana le ea ipitsang moena, e leng mofebi, kapa ea lakatsang leruo, leha e le ea rapelang melimo, leha e le moetselletsi, kapa letahoa, kapa lesholu; ea joalo, le ho ja, [ba] se n’o ja le eena.” Ba ne ba lokela ho ‘tlosa e mobe har’a bona.’ (1 Ba-Korinthe 5:9-13) Empa u ne u tla itšoara joang haeba e mong oa beng ka uena a ne a khaotsoe? Le hoja ho ka ’na ha hlokahala hore ho be le kopano e fokolang bakeng sa ho hlokomela litaba tsa lelapa, setsoalle sohle sa moea le mong ka uena ea khaotsoeng se ne se tla lokela ho felisoa. (Bona Molula-Qhooa, April 15, 1988, maqephe 26-31.) Ruri ho tšepahala ho Molimo le mokhatlo oa oona o hlophisitsoeng ho lokela ho re susumelletsa ho hlompha liqeto tsa boahloli tsa balebeli.
19. Re lokela ho etsa joang haeba baholo ba re bontša hore re tsamaea ka tsela e fosahetseng moeeng?
19 Ha ho bonolo ho tšoarella tseleng e tšesaane e isang bophelong. Hore re etse joalo, re tlameha ho latela tataiso e fanoeng Lentsoeng la Molimo le e fanoang ke ba fuoeng boikarabelo ba bolisa ka hare ho mokhatlo oa oona o hlophisitsoeng. (Mattheu 7:13, 14) Haeba re ne re tloha motseng o mong re ea ho o mong re tsamaea ka koloi ’me re thinya sebakeng se fosahetseng, ho ne ho tla hlokahala hore ho nkoe bohato bo bong ho lokisa tsela ea rōna. Ntle le moo, le ka mohla re ne re ke ke ra fihla moo re eang. Ka ho tšoanang, haeba baholo ba re bontša hore re tsamaea ka tsela e fosahetseng moeeng, mohlomong ka ho ratana le motho ea sa lumelang, re lokela ho potlakela ho sebelisa keletso ea bona ea Mangolo. Ena e ne e tla ba tsela e ’ngoe ea ho bontša hore kannete re ‘tšepa Jehova.’—Liproverbia 3:5, 6.
Tlhompho Esita le Linthong Tse Nyenyane
20. Ke ho ipotsa lipotso life ho ka re thusang ho bontša tlhompho bakeng sa tataiso ea baholo esita le litabeng tse nyenyane?
20 Ho hlokahala hore re bontše tlhompho bakeng sa tataiso ea baholo esita le litabeng tse nyenyane. Kahoo re ka ’na ra ipotsa: ‘Na ke sebelisana ’moho le baholo haeba ba re kōpa ho etela ba kulang kapa ho koetlisa ba bacha tšebeletsong ea tšimo? Na ka potlako ke amohela likabelo bakeng sa liboka ’me ke li lokisetsa hantle? Na kea mamela ha baholo ba fana ka tataiso tabeng ea ho boloka litulo likopanong, mokhoa oa rōna oa ho apara, joalo-joalo? Na ke sebelisana ’moho le bona ha ba re kōpa ho thusa ho hloekisa Holo ea ’Muso, ho tlaleha mosebetsi oa rōna oa tšimo kapele, kapa ho fihla libokeng ka nako?’
21. Ho bontša ha rōna tlhompho ho baholo ho ka ’na ha hopotsa motho mantsoe afe a Jesu?
21 Balebeli ba phutheho ba ananela tšebelisano-’moho ea rōna, ’me e tlisa molemo o moholo. Ha e le hantle, ho bontša ha rōna tlhompho le tšebelisano-’moho esita le litabeng tse nyenyane ho ka ’na ha hopotsa motho mantsoe a Jesu: “Motho ea tšepahalang ho se senyenyane ka ho fetisisa o boetse o tšepahala ho se seholo.” (Luka 16:10, NW) Ruri re batla ho talingoa re le ba tšepahalang.
Tsoela Pele ho Arabela Bolebeling bo Lerato
22. Melemo e meng e tlisoang ke bolebeli bo lerato ba mohlanka ea khabane le baholo ba phutheho ke efe?
22 Melemo e tlisoang ke bolebeli bo lerato ba mohlanka ea khabane le baholo ba phutheho e paka hore tlhohonolofatso e enneng ea Jehova e holim’a mokhatlo oa hae o hlophisitsoeng oa lefatšeng. Ho feta moo, tataiso e hloahloa ea baholo e kopanya matla a bona ’me e phahamisa bonngoe har’a rōna. E boetse e fella ka boiteko bo kopanetsoeng le bo atlehileng ba ho ntšetsa pele lithahasello tsa ’Muso. Ka sebele, phello e ’ngoe ea sebele ea ho arabela ha rōna ka kananelo bolebeling ba ba etelletseng pele ke hore Molimo o hlohonolofatsa mosebetsi oa rōna oa ho bolela le ho etsa barutuoa. (Mattheu 28:19, 20) Tšebelisano-’moho ea rōna le baholo e boetse e re lokisetsa bophelo bo sa feleng tsamaisong e ncha ea lintho.
23. Leseling la 1 Johanne 5:3, re lokela ho susumelletseha ho etsa joang?
23 Kaha re rata Jehova, ho mo utloa hase boikarabelo bo tenang. Moapostola Johanne o ngotse: “Hobane ho rata Molimo, ke ha re boloka litaelo tsa oona, ’me litaelo tsa oona ha li boima.” (1 Johanne 5:3) Bakreste ba tšepahalang ka thabo ba utloa litaelo tsa Jehova ’me ba susumelletseha ho sebelisana ’moho le bao a ba fileng bolebeli ba phutheho. Re leboha hakaakang hore e be re ka hare ho mokhatlo o hlophisitsoeng oa Molimo le ho ba le “limpho tsa banna” tse joalo! (Ba-Efese 4:8, NW) Ka hona, ka kholiseho e felletseng ea hore Molimo o tataisa batho ba oona, ka mehla a re utloeng ba fuoeng tokelo ea ho etella pele har’a Lipaki tsa Jehova.
Litlhaloso Tsa Hao ke Life?
◻ Ke hobane’ng ha re lokela ho utloa ba etelletseng pele har’a rōna?
◻ Re lokela ho ba le boikutlo bofe mabapi le mosebetsi o etsoang ke baholo ba sebetsang ka thata?
◻ Ke hobane’ng ha re lokela ho potlakela ho sebelisa keletso e fanoang ke baholo?
◻ Ke melemo efe e tlisoang ke ho arabela ha rōna ka kananelo bolebeling bo lerato?
Ntlha e Qolotsoeng e leqepheng la 24]
Pauluse o ne a thabela ho bolela litaba tse molemo le ho sebeletsa balumeli ’moho le eena. Joaloka moholo, na u bontša teboho bakeng sa litokelo tsa hao tsa mosebetsi tseo u li fuoeng ke Molimo?
[Setšoantšo se leqepheng la 23]
Na u sebelisana ’moho le baholo ka ho amohela likabelo bakeng sa liboka, ka ho thusa ho hloekisa Holo ea ’Muso, ka ho tlaleha mosebetsi oa hao oa tšimo kapele, le ka litsela tse ling?