Khaolo ea Leshome le Motso o Mong
“Le ’ne le Batle ’Muso Pele”
1. (a) Ke hobane’ng ha Jesu a ile a phehella bamameli ba hae hore ba batle ’Muso pele? (b) Re lokela ho ipotsa potso efe?
LILEMONG tse fetang 1 900 tse fetileng, puong e neng e le Galilea, Jesu o ile a phehella bamameli ba hae: “Joale, le ’ne le batle ’muso pele le ho loka ha [Molimo].” Empa ke hobane’ng ha ho ne ho potlakile hakaalo? Na nako ea hore Kreste a fuoe matla a ’Muso e ne e se hōle ka makholo-kholo a lilemo? E, empa ’Muso oa Bomesia e ne e le mokhoa oo ka oona Jehova a neng a tla tlosa qoso bobusing ba hae le ho phethahatsa morero oa hae o moholo ka lefatše. Mang le mang eo ka sebele a ananelang bohlokoa ba lintho tseo o tla etelletsa ’Muso pele bophelong ba hae. Haeba ho bile joalo lekholong la pele la lilemo, hakaakang kajeno, ha e le moo Kreste a behiloe teroneng e le Morena! Kahoo potso ke ena, Na tsela eo ke phelang ka eona e bontša hore ke batla ’Muso oa Molimo pele?—Matheu 6:33.
2. Ka kakaretso batho ba phehella lintho life ka cheseho?
2 Ha e le hantle, kajeno batho ba limilione ho pholletsa le lefatše ba batla ’Muso pele. Ba bontša ho tšehetsa ha bona puso ea ’Muso ka ho likolohisa bophelo ba bona ho etseng thato ea Jehova, kaha ba inehetse ho eena. Ka lehlakoreng le leng, boholo ba batho bo thahasella ho batla lintho tse tloaelehileng. Batho ba phehella chelete, matlotlo le menyaka tse rekoang ke chelete. Kapa ba ikitlaetsa ka matla ho ntšetsa pele mesebetsi ea bona. Tsela eo ba phelang ka eona e bontša hore ba tšoarehile ka mabaka a bona, ka lintho tse bonahalang le ka menyaka. Ba beha Molimo sebakeng sa bobeli, le teng haeba ba lumela ho eena.—Matheu 6:31, 32.
3. (a) Jesu o khothalelitse barutuoa ba hae ho batla matlotlo a mofuta ofe, hona hobane’ng? (b) Ke hobane’ng ha ho sa hlokahale hore re amehe haholo ka lintho tse bonahalang?
3 Leha ho le joalo, Jesu o ile a fa barutuoa ba hae keletso ena: “Khaotsang ho ipolokela matlotlo lefatšeng,” kaha ha ho na matlotlo a joalo a lulang ka ho sa feleng. “Ho e-na le hoo,” o ile a re, “le ipolokele matlotlo leholimong” ka ho sebeletsa Jehova. Jesu o ile a phehella balateli ba hae hore ba boloke mahlo a bona ‘a talimme nģa e le ’ngoe’ ka ho lebisa tlhokomelo le matla a bona ho etseng thato ea Molimo. O ile a re ho bona: “Le ke ke la ba makhoba a Molimo le a Maruo.” Empa ho thoe’ng ka lintho tse bonahalang tse hlokahalang—lijo, liaparo le matlo? Jesu o ile a eletsa, “Khaotsang ho tšoenyeha.” A ba hlokomelisa ka linonyana—Molimo oa li fepa. Jesu o ile a khothalletsa balateli ba hae ho ithuta ka lipalesa—Molimo oa li apesa. Na batho bao e leng bahlanka ba Jehova ba bohlale hase ba bohlokoa ho feta leha e le efe ho tsee? Jesu o ile a re: “Joale, le ’ne le batle ’muso pele le ho loka ha hae, ’me lintho tsena tse ling tsohle [tse hlokahalang] le tla li ekeletsoa.” (Matheu 6:19-34) Na liketso tsa hao li bontša hore u lumela seo?
U se ke Ua Lumela Hore ’Nete ea ’Muso e Bipetsoe
4. Haeba motho a amehile haholo ka lintho tse bonahalang, phello e ka ’na ea e-ba efe?
4 Ke ho loketseng ho ameha ka ho ba le lintho tse bonahalang tse lekaneng tse hlokoang ke motho ka mong le lelapa la hae. Leha ho le joalo, haeba motho a amehile ka ho feteletseng ka lintho tse bonahalang, liphello li ka ba kotsi. Le hoja a ka bolela hore o lumela ’Musong, haeba ho tla lintho tse ling pele pelong ea hae, ’nete ea ’Muso e tla bipetsoa. (Matheu 13:18-22) Ka mohlala, ka lekhetlo le leng ’musi e mong e mocha oa morui o ile a botsa Jesu: “Ke etse’ng hore ke rue bophelo bo sa feleng?” O ne a phela ka boitšoaro bo botle ’me a tšoere ba bang hantle, empa o ne a amehile haholo ka matlotlo a hae a bonahalang. O ne a sitoa ho arohana le ’ona e le hore e be molateli oa Kreste. Kahoo o ile a lahla monyetla o neng o ka etsa hore a be le Kreste ’Musong oa leholimo. Ka lekhetlo leo Jesu o ile a re: “E tla ba ntho e thata hakaakang bakeng sa ba nang le chelete ho kena ’musong oa Molimo!”—Mareka 10:17-23.
5. (a) Pauluse o ile a khothalletsa Timothea ho khotsofalla eng, hona hobane’ng? (b) Satane o sebelisa “lerato la chelete” e le leraba le senyang joang?
5 Lilemo hamorao, moapostola Pauluse o ile a ngolla Timothea, eo ka nako eo a neng a le Efese, eo e neng e le setsi se ruileng sa khoebo. Pauluse o ile a mo hopotsa: “Ha rea tlisa letho lefatšeng, leha e le hore re ka tloha le letho. Kahoo, ha re e-na le lintho tsa ho iphelisa le liaparo le tšireletso, re tla li khotsofalla.” Ho loketse hore motho a sebetse hore a itlhokomele le ho hlokomela lelapa la hae ka “lintho tsa ho iphelisa le liaparo.” Empa Pauluse o ile a lemosa: “Ba ikemiselitseng ho rua ba oela molekong le lerabeng le litakatsong tse ngata tse se nang kelello le tse kotsi, tse lihelang batho timetsong le tšenyehong.” Satane o mano. A ka ’na a qala ka ho eka motho ka lintho tse nyenyane. Hona ho ka ’na ha lateloa ke khatello e khōloanyane, mohlomong monyetla oa ho phahamisoa mosebetsing kapa mosebetsi o lefang haholo empa o batla nako e neng e boloketsoe litaba tsa moea. Ntle leha re itebetse, “lerato la chelete” le ka bipetsa lithahasello tsa bohlokoa haholo tsa ’Muso. Pauluse o ile a beha taba tjena: “Ka ho hahamalla lerato lena ba bang ba khelositsoe tumelong ’me ba itlhabile hohle ka bohloko bo boholo.”—1 Timothea 6:7-10.
6. (a) E le hore re qobe ho tšoasoa ke lerato la lintho tse bonahalang, re tlameha ho etsa eng? (b) Re ka ba le tšepo efe ha re talima boemo ba moruo oa lefatše kajeno?
6 Ka lebaka la lerato la ’nete ho mor’abo oa Mokreste, Pauluse o ile a phehella Timothea: “U balehele lintho tsena” le ho re, “Loana ntoa e ntle ea tumelo.” (1 Timothea 6:11, 12) Boiteko ba sebele boa hlokahala hore re tle re qobe ho hoholoa ke tsela ea bophelo ea lintho tse bonahalang ea lefatše le re potolohileng. Empa haeba re ikitlaetsa tumellanong le tumelo ea rōna, Jehova a ke ke a re lahla le ka mohla. Ho sa tsotellehe litheko tse ntseng li phahama le ho hloka mosebetsi ho tletseng hohle, Jehova o tla tiisa hore re fumana seo re hlileng re se hlokang. Pauluse o ile a ngola: “Mokhoa oa lōna oa bophelo e ke e be o se nang lerato la chelete, ha le ntse le khotsofaletse lintho tse teng. Etsoe [Molimo] o itse: ‘Ho hang nke ke ka u tlohela kapa ka u furalla.’ E le hore re ka ba sebete ’me ra re: ‘Jehova ke mothusi oa ka; nke ke ka tšaba. Motho a ka nketsa’ng?’” (Baheberu 13:5, 6) Le Morena Davida o ile a ngola: “Nkile ka ba mohlankana, ke se ke tsofetse, leha ho le joalo ha ke e-s’o bone mang kapa mang ea lokileng a tloheloa ka ho feletseng, kapa bana ba hae ba batla bohobe.”—Pesaleme ea 37:25.
Barutuoa ba Pele ba Beha Mohlala
7. Jesu o ile a fa barutuoa ba hae litaelo life mabapi le ho bolela, hona ke hobane’ng ha li ne li loketse?
7 Hoba Jesu a koetlise baapostola ba hae hantle, o ile a ba romela Iseraele ho ea bolela litaba tse molemo le ho phatlalatsa: “’Muso oa maholimo o atametse.” E ne e le molaetsa o thabisang hakaakang! Jesu Kreste, Morena oa Bomesia, o ne a le har’a bona. Kaha baapostola ba ne ba inehetse tšebeletsong ea Molimo, Jesu o ile a ba phehella hore ba tšepe hore Molimo o tla ba hlokomela. Kahoo o ile a re: “Le se ke la nka letho bakeng sa leeto, leha e le lere kapa mokotla oa lijo, kapa bohobe kapa chelete ea silevera; kapa liaparo tse peli tsa ka tlaase. Empa kae kapa kae moo le kenang lapeng, le lule moo ’me le tlohe.” (Matheu 10:5-10; Luka 9:1-6) Jehova o ne a tla etsa bonnete ba hore ba fumana seo ba se hlokang matsohong a Baiseraele ba habo bona, ba neng ba tloaetse ho amohela basele.
8. (a) Ke hobane’ng ha Jesu a ile a fana ka litaelo tse ling tse ncha tsa ho bolela pejana ho lefu la hae? (b) Ke eng e neng e ntse e lokela ho tla pele bophelong ba balateli ba Jesu?
8 Hamorao, pejana ho lefu la hae, Jesu o ile a hlokomelisa baapostola ba hae ka ’nete ea hore nakong e tlang ba ne ba tla sebetsa tlas’a maemo a fetohileng. Ka lebaka la hore ba boholong ba ne ba hanyetsa tšebetso ea bona, ho ne ho ka ’na ha e-ba thata hore ba amoheloe Iseraele. Hape, ba ne ba tla tloha ba isa molaetsa oa ’Muso linaheng tsa Balichaba. Joale ba ne ba tla lokela ho nka “sepache” le “mokotla oa lijo.” Leha ho le joalo, ba ne ba lokela hore ba ’ne ba batle ’Muso oa Jehova pele le ho loka ha hae, ba kholisehile hore Molimo o tla hlohonolofatsa boiteko ba bona ba hore ba fumane lijo le liaparo tse hlokahalang.—Luka 22:35-37.
9. Pauluse o ile a beha ’Muso pele joang bophelong ba hae ha a ntse a hlokomela lintho tseo a li hlokang nameng, hona o ile a fana ka keletso efe tabeng ee?
9 Moapostola Pauluse e bile mohlala o motle oa motho ea ileng a sebelisa keletso ea Jesu. Pauluse o ne a thehile bophelo ba hae tšebeletsong. (Liketso 20:24, 25) Ha a ne a e-ea sebakeng se seng ho ea bolela o ne a itlhokomela ka seo a se hlokang nameng ka ho etsa litente. O ne a sa lebelle hore ba bang ba mo hlokomele. (Liketso 18:1-4; 1 Bathesalonika 2:9) Leha ho le joalo, o ne a thaba ha a amoheloa ka mofuthu le ha ba bang ba mo fa limpho ho bontša lerato la bona. (Liketso 16:15, 34; Bafilipi 4:15-17) Pauluse o ile a khothalletsa Bakreste hore ba se ke ba hlokomoloha boikarabelo ba bona ba malapa ha ba bolela, empa ho e-na le hoo ba leka-lekanye boikarabelo ba bona bo sa tšoaneng. O ile a ba eletsa hore ba sebetse, ba rate malapa a bona le hore ba arolelane le ba bang. (Baefese 4:28; 2 Bathesalonika 3:7-12) O ile a ba khothalletsa hore ba tšepe Molimo eseng matlotlo a bonahalang le hore ba sebelise bophelo ba bona ka tsela e bontšang hore ba hlile ba utloisisa hore na lintho tsa bohlokoa haholo bophelong ke life. Tumellanong le thuto ea Jesu, hoo ho ne ho bolela ho batla ’Muso oa Molimo pele le ho loka ha hae.—Bafilipi 1:9-11.
Beha ’Muso Pele Bophelong ba Hao
10. Ho batla ’Muso pele ho bolela eng?
10 Re kopanela litaba tse molemo tsa ’Muso le ba bang ho isa bohōleng bofe? Ka karolo e itseng hoo ho itšetlehile ka maemo a rōna le ka botebo ba kananelo ea rōna. Hopola hore Jesu ha aa ka a re, ‘Le batle ’Muso ha ho se letho le leng leo le ka le etsang.’ Ka ho tseba bohlokoa ba ’Muso, o ile a hlalosa thato ea Ntat’ae, a re: “Le batle ’muso oa hae le sa khaotse.” (Luka 12:31) Le hoja boholo ba rōna re fumana ho hlokahala hore re sebetse e le hore re itlhokomele ka seo re se hlokang le ba malapa a rōna, haeba re e-na le tumelo, bophelo ba rōna bo tla likoloha mosebetsing oa ’Muso oo Molimo a re fileng oona. Le teng re tla hlokomela boikarabelo ba malapa a rōna.—1 Timothea 5:8.
11. (a) Jesu o ile a bontša joang hore hase bohle ba tla khona ho etsa ho lekanang ho haseng molaetsa oa ’Muso? (b) Ke mabaka afe a amanang le hore na motho a ka etsa ho hongata hakae?
11 Ba bang ho rōna re khona ho nehela nako e fetang ea ba bang boboleling ba litaba tse molemo tsa ’Muso. Empa papisong ea hae ea mefuta ea mobu e sa tšoaneng, Jesu o ile a bontša hore bohle bao lipelo tsa bona li tšoanang le mobu o motle ba tla beha litholoana. Ba tla beha hakae? Maemo a batho ha a tšoane. Lilemo, bophelo le boikarabelo ba lelapa ke a mang a mabaka a amehang. Empa ha batho ba hlile ba ananela litaba tse molemo tsa ’Muso, ho ka finyelloa ho hongata.—Matheu 13:23.
12. Ke pakane efe e molemo ea moea eo ka ho khetheha bacha ba khothalletsoang ho e nahana?
12 Ho hotle ho ba le lipakane tse tla re thusa ho atolosa ho kopanela ha rōna tšebeletsong ea ’Muso. Bacha ba lokela ho nahana ka botebo ka mohlala o babatsehang oa Mokreste e mocha Timothea ea chesehang. (Bafilipi 2:19-22) Ke eng e ka bang molemo ho feta hore ba kenele tšebeletso ea nako e tletseng ha ba qeta sekolong? Batho ba baholo le bona ba tla rua molemo ka ho ipehela lipakane tse ntle tsa moea.
13. (a) Ke mang ea etsang qeto hore na rōna ka borōna re ka etsa’ng tšebeletsong ea ’Muso? (b) Haeba kannete re batla ’Muso pele, re paka eng?
13 Ho e-na le ho nyatsa bao re nahanang hore ba ka etsa ho eketsehileng, re lokela ho susumetsoa ke tumelo hore re intlafatse e le hore re ka sebeletsa Molimo ka ho feletseng ho latela maemo a rōna. (Baroma 14:10-12; Bagalata 6:4, 5) Joalokaha ho bontšitsoe tabeng ea Jobo, Satane o pheha khang ea hore ntho eo re e thahasellang haholo ke matlotlo a rōna a bonahalang, boiketlo ba rōna le ho atleha ha rōna, le hore sepheo sa rōna ha re sebeletsa Molimo ke sa boithati. Empa haeba kannete re batla ’Muso pele, re ba le seabo ho pakeng hore Diabolose o leshano ka ho feletseng. Re fana ka bopaki ba hore ho tlang pele bophelong ba rōna ke ho sebeletsa Molimo. Kahoo, ka lipolelo le ka liketso, re paka lerato la rōna le tebileng ho Jehova, ho tšehetsa ha rōna bobusi ba hae ka botšepehi le lerato la rōna ho batho ba bang.—Jobo 1:9-11; 2:4, 5; Liproverbia 27:11.
14. (a) Ke hobane’ng ha kemiso ea tšebeletso ea tšimo e le molemo? (b) Lipaki tse ngata li kopanela tšebeletsong ea ’Muso ho fihlela kae?
14 Kemiso e ka re thusa ho finyella ho fetang hoo re ka ho phethang ntle ho eona. Jehova ka boeena o ‘behile nako’ bakeng sa ho phetha morero oa hae. (Exoda 9:5; Mareka 1:15) Haeba ho ka etsahala, ho molemo ho kopanela tšebeletsong ea tšimo hang ka beke kapa ka makhetlo a ’maloa ka nako e itseng e behiloeng. Lipaki tsa Jehova tse likete tse mashome lefatšeng lohle li ingolisitse e le bo-pula-maliboho ba thusang ’me li sebetsa lihora tse peli kapa ho feta ka letsatsi, li bolela litaba tse molemo. Tse ling tse likete tse makholo li sebeletsa e le bo-pula-maliboho ba kamehla, li sebetsa lihora tse ka bang peli le halofo kapa tse tharo ka letsatsi li phatlalatsa molaetsa oa ’Muso. Bo-pula-maliboho ba khethehileng le baromuoa ba sebetsa nako e ngata le ho feta tšebeletsong ea ’Muso. Re ka batla le menyetla ea ho kopanela tšepo ea ’Muso ka tsela e sa reroang le mang kapa mang ea tla mamela. (Johanne 4:7-15) Takatso ea rōna e lokela hore e be ho ba le karolo e tletseng mosebetsing oo kamoo maemo a rōna a re lumellang kateng, hobane Jesu o ile a bolela esale pele: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.”—Matheu 24:14; Baefese 5:15-17.
15. Mabapi le tšebeletso ea rōna, ke hobane’ng ha u nahana hore keletso e ho 1 Bakorinthe 15:58 e nakong?
15 Li kopane, likarolong tsohle tsa lefatše, ho sa tsotellehe hore na li phela sechabeng sefe, Lipaki tsa Jehova li kopanela tokelong ena ea tšebeletso. Ka botsona li sebelisa keletso ena e bululetsoeng ea Bibele: “Le be ba tiileng, ba sa sutheng, kamehla le e-na le ho hongata hoo le ka ho etsang mosebetsing oa Morena, le tseba hore mosebetsi oa lōna hase oa lefeela mabapi le Morena.”—1 Bakorinthe 15:58.
Tlhahlobo
• Ha Jesu a ne a re “le ’ne le batle ’muso pele,” o ne a bontša hore ke eng e lokelang ho behoa sebakeng sa bobeli?
• Re lokela ho ba le pono efe mabapi le ho hlokomela seo re se hlokang nameng le malapa a rōna? Molimo o tla re thusa joang?
• Re ka kopanela litšobotsing life tsa tšebeletso ea ’Muso?
[Setšoantšo se leqepheng la 107]
Naheng e ’ngoe le e ’ngoe, Lipaki tsa Jehova kajeno li bolela litaba tse molemo pele bofelo bo fihla