KHAOLO EA 55
U ka Thusa Phutheho ea Heno Joang?
Batho ba limilione lefatšeng lohle ba sebeletsa Jehova ba thabile liphuthehong tse likete. Ba ananela thuto le tataiso eo ba e fuoang ’me ba thabela ho tšehetsa phutheho ka litsela tse ngata. Na le uena u ikutloa joalo ka phutheho ea heno?
1. U ka sebelisa matla le nako ea hao joang ho thusa phutheho?
Kaofela ha rona re ka thusa ka phuthehong. Ka mohlala, na phuthehong ea heno ho na le batho ba holileng kapa ba kulang? Na u ka ba thusa hore ba khone ho ea libokeng? Kapa na u ka ba thusa ka lintho tse ling, joaloka ho ba ela mabenkeleng kapa ho ba thusa ka mosebetsi oa ka tlung? (Bala Jakobo 1:27.) Re ka boela ra ithaopela ho hloekisa le ho hlokomela Holo ea rona ea ’Muso. Ha ho na motho ea re qobellang ho etsa lintho tsena. Kaha re rata Molimo le bana ba bo rona, re thusa phutheho “ka ho rata.”—Pesaleme ea 110:3.
Lipaki tse kolobelitsoeng li ka thusa phutheho ka litsela tse ling hape. Bara ba bo rona ba tšoanelehang e ka ba bahlanka ba sebeletsang ’me hamorao ea e-ba baholo. Bara le barali ba bo rona ba ka tšehetsa mosebetsi oa ho ruta batho Bibele ka hore e be bo-pula-maliboho. Lipaki tse ling li ka thusa ka ho haha libaka tsa borapeli kapa ka ho fallela liphuthehong tse hlokang thuso ka litsela tse ling.
2. Re ka sebelisa chelete ea rona kapa lintho tseo re nang le tsona joang ho thusa phutheho?
Re ka “hlompha Jehova ka lintho tsa [rona] tsa bohlokoa.” (Liproverbia 3:9) Re thabela ho nehela ka chelete le ka lintho tse ling e le hore re tšehetse phutheho ea habo rona le mosebetsi oa ho ruta batho Bibele o etsoang lefatšeng lohle. (Bala 2 Bakorinthe 9:7.) Menehelo ea rona e boetse e sebelisetsoa ho thusa ha ho hlahile likoluoa. Batho ba bangata ba khetha ho ‘behella ka thoko ho hong’ hore ba fane ka monehelo kamehla. (Bala 1 Bakorinthe 16:2.) Re ka fana ka chelete re sebelisa mabokose a monehelo a libakeng tsa rona tsa borapeli kapa Inthaneteng ho donate.jw.org. Jehova o re fa monyetla oa ho bontša hore rea mo rata ka tsela eo re khethang ho sebelisa lintho tsa rona tsa bohlokoa ka eona.
ITHUTE LINTLHA TSE LING
Nahana ka litsela tse ling tseo u ka thusang phutheho ka tsona.
3. Re ka sebelisa lintho tsa rona tsa bohlokoa
Jehova le Jesu ba rata batho ba thabelang ho fana. Ka mohlala, Jesu o ile a babatsa mosali oa mohlolohali ea ileng a ntša monehelo le hoja a ne a futsanehile. Bala Luka 21:1-4 ebe le buisana ka lipotso tsena:
Na re lokela ho nehela chelete e ngata e le hore re thabise Jehova?
Jehova le Jesu ba ikutloa joang ha re fana ka monehelo ho tsoa pelong?
E le hore u bone hore na menehelo ea rona e sebelisoa joang, bapala VIDEO. Ka mor’a moo le buisane ka potso e latelang.
Menehelo e sebelisoa joang ho thusa liphutheho lefatšeng lohle?
4. Re ka ithaopela ho thusa
Mehleng ea ha ho ne ho ngoloa Bibele, barapeli ba Jehova ba ne ba sebetsa ka mafolofolo ho hlokomela libaka tsa bona tsa borapeli. Ha baa ka ba fana ka chelete feela. Bala 2 Likronike 34:9-11 ebe le buisana ka potso ena:
Baiseraele bohle ba ile ba etsa’ng ho thusa ho hlokomela ntlo ea Jehova kapa sebaka sa borapeli?
Ho bona hore na Lipaki Tsa Jehova li etsisa mohlala oo o ka Bibeleng joang, bapala VIDEO. Ka mor’a moo le buisane ka lipotso tse latelang.
Ke hobane’ng ha ho le bohlokoa ho etsa hore Holo ea ’Muso ea habo rona e lule e hloekile ebile e le maemong a matle?
U ka thusa ka litsela life tse ling?
5. Bara ba bo rona ba ka sebetsa ka thata hore ba tšoanelehe ho fuoa boikarabelo ka phuthehong
Bibele e khothaletsa banna ba Bakreste hore ba etse sohle seo ba ka se khonang ho thusa phutheho. Ho bona mohlala oa sena, bapala VIDEO. Ka mor’a moo u arabe potso e latelang.
Videong ee, Thabiso o ile a etsa’ng hore a khone ho thusa phutheho haholoanyane?
Bibele ea re bolella hore na bara ba bo rona ba lokela ho etsa’ng hore e be bahlanka ba sebeletsang le baholo. Bala 1 Timothea 3:1-13 ebe le buisana ka lipotso tsena:
Bara ba bo rona ba lokela ho etsa’ng hore e be bahlanka ba sebeletsang le baholo?
Ba malapa a bona ba lokela ho itšoara joang? (Sheba temana ea 4 le 11.)
Ha bara ba bo rona ba leka ho etsa lintho tsena, ba thusa phutheho eohle joang?
MOTHO A KA ’NA A RE: “Lipaki Tsa Jehova li fumana chelete ea ho etsa mosebetsi oa tsona hokae?”
U tla mo araba joang?
KAKARETSO
Jehova o thaba haholo ha re sebelisa nako, matla le lintho tsa rona tsa bohlokoa ho thusa phutheho.
Re Ithutile’ng?
Re ka sebelisa nako le matla a rona joang ho thusa phutheho?
Re ka sebelisa lintho tsa rona tsa bohlokoa joang ho thusa phutheho?
Uena u ka rata ho thusa phutheho joang?
BATLA
Ithute hore na ke hobane’ng ha mehleng ena Molimo a sa lebella hore barapeli ba hae ba ntše karolo ea leshome.
“Ke Eng Seo Bibele e se Buang ka Karolo ea Leshome?” (Sehlooho se websaeteng)
Ho ea ka Bibele mesebetsi e itseng e lokela ho etsoa ke banna ba kolobelitsoeng. Ho tla etsahalaʼng haeba mosali ea kolobelitsoeng a iphumana a lokela ho etsa mesebetsi eo?
“Bohlooho bo Sebetsa Joang ka Phuthehong?” (Molula-Qhooa, February 2021)
Bona kamoo Lipaki tse ling li bontšang sebete kateng ka ho itela hore li isetse barapeli-’moho le tsona libuka le limakasine.
Tsela eo ka Eona Bara ba bo Rona ba Congo ba Fumanang Lingoloa Tsa Bibele (4:25)
Ithute hore na tsela eo mosebetsi oa rona o tšehetsoang ka lichelete e fapane hole joang le ea malumeli a mang.
“Mosebetsi oa Lona o Tšehetsoa Joang ka Lichelete?” (Sehlooho se websaeteng)