Lipotso Tse Tsoang ho Babali
Lengolong la hae le eang ho Baheberu, moapostola Pauluse o ile a bua ka “peho ea matsoho.” Na o ne a bua ka ho khethoa ha baholo kapa o ne a bua ka ntho e ’ngoe e fapaneng?—Baheb. 6:2.
Ha ho na lebaka la hore re tsitlelle maikutlong a itseng, empa ho ka etsahala hore ebe Pauluse o ne a bua ka peho ea matsoho e le hore ho fanoe ka limpho tsa moea.
Ke ’nete hore Bibele e bua ka peho ea matsoho mabapi le ho khetheloa mesebetsi e itseng ea puso ea Molimo. Moshe o ile a ‘beha letsoho la hae holim’a’ Joshua ha a ne a mo khetha hore e be mohlahlami oa hae. (Deut. 34:9) Ka phuthehong ea Bokreste, banna ba bang ba tšoanelehang ba ne ba khethoa ka ho behoa matsoho. (Lik. 6:6; 1 Tim. 4:14) Pauluse o ile a lemosa hore ho se ke ha behoa matsoho ka potlako holim’a monna leha e le ofe.—1 Tim. 5:22.
Leha ho le joalo, Pauluse o ile a khothalletsa Bakreste ba Baheberu hore ba ‘hatele pele ka matla khōlong’ kaha joale ba ne ba tlohetse “thuto ea mathomo.” Joale o ile a thathamisa “pako mesebetsing e shoeleng, le tumelo ho Molimo, thuto ea likolobetso le peho ea matsoho.” (Baheb. 6:1, 2) Na ho khethoa ha baholo e ne e ka ba feela ntho ea mathomo eo Bakreste ba neng ba lokela ho hatela pele ka matla ho eona? Che. Ho ba moholo oa phutheho ke pakane eo barab’abo rōna ba hōlileng moeeng ba lokelang ho e hahamalla ’me ka mor’a moo ba e ananele.—1 Tim. 3:1.
Empa peho ea matsoho e ne e sebelisetsoa lebaka le leng hape. Lekholong la pele la lilemo, Jehova o ile a lahla Baiseraele ba tlhaho hore e se ke ea hlola e e-ba batho ba hae, eaba o khetha Iseraele ea moea, e leng phutheho ea Bakreste ba tlotsitsoeng. (Mat. 21:43; Lik. 15:14; Bagal. 6:16) Limpho tsa moea tsa mohlolo tse kang ho bua ka maleme, li ile tsa fana ka bopaki ba phetoho eo. (1 Bakor. 12:4-11) Ha Korneliase le ba ntlo ea hae e ne e e-ba balumeli, batho bana ba bacha ba ile ba amohela moea o halalelang, o ileng oa bonahala ka ho bua ha bona “maleme.”—Lik. 10:44-46.
Ka linako tse ling, limpho tsa mohlolo li ne li fanoa ka peho ea matsoho. Ha Filipi a ne a phatlalatsa litaba tse molemo Samaria, ba bangata ba ile ba kolobetsoa. Sehlopha se busang se ile sa romela moapostola Petrose le moapostola Johanne sebakeng seo. Hobane’ng? Rea bala: “Joale [Petrose le Johanne] ba qala ho beha matsoho holim’a [batho ba neng ba sa tsoa kolobetsoa], ’me ba qala ho amohela moea o halalelang.” E tlameha ebe seo se bolela hore ba ile ba amohela limpho tsa moea, e leng bokhoni boo batho ba neng ba ka bo bona. Re tseba sena hobane Simone, eo pele a neng a sebelisa tsebo ea boselamose, o ile a bona tsela ena eo moea o neng o sebetsa ka eona eaba ka meharo o leka ho reka tsebo ea hore ha a beha ba bang matsoho, ba fumane moea o halalelang e le hore ba tsebe ho etsa mehlolo. (Lik. 8:5-20) Hamorao, batho ba 12 ba ile ba kolobetsoa Efese. Rea bala: “Ha Pauluse a beha matsoho holim’a bona, moea o halalelang oa theohela holim’a bona, ’me ba qala ho bua maleme le ho profeta.”—Lik. 19:1-7; bapisa le 2 Timothea 1:6.
Kahoo, kamoo ho bonahalang kateng, ho Baheberu 6:2, Pauluse o ne a bua ka ho behoa ha matsoho bakeng sa ho fana ka limpho tsa moea ho balumeli ba bacha.