Khaolo ea 11

“Ha ho Mohla Motho e Mong a Kileng a Bua Tjena”

1, 2. (a) Ke hobane’ng ha balaoli ba neng ba rometsoe ho ea tšoara Jesu ba ile ba khutla ba le joalo? (b) Ke’ng se neng se etsa hore Jesu e be mosuoe ea ikhethang?

BAFARISI baa loloma ke bohale. Jesu o ka tempeleng, o ruta ka Ntate oa hae. Bamameli ba hae ha ba lumellane; ba bangata ba lumela ho Jesu, ha ba bang bona ba batla hore a tšoaroe. Baeta-pele ba bolumeli ba se ba sitoa ho ithiba ke bohale, ba romela balaoli ho ea tšoara Jesu. Empa balaoli bao ba khutla ba le joalo. Baprista ba ka sehloohong le Bafarisi baa ba botsa: “Ke hobane’ng ha le sa ka la mo tlisa?” Balaoli ba araba ka ho re: “Ha ho mohla motho e mong a kileng a bua tjena.” Ba ne ba khahliloe ke seo Jesu a se rutang hoo ba sitiloeng ho mo tšoara.a—Johanne 7:45, 46.

² Hase balaoli bao feela ba ileng ba khahloa ke seo Jesu a neng a se ruta. Batho ba ne ba phutheha ka bongata ho tla mo mamela ha a ruta. (Mareka 3:7, 9; 4:1; Luka 5:1-3) Ke’ng se neng se etsa hore Jesu e be mosuoe ea ikhethang joalo? Joalokaha re bone Khaolong ea 8, o ne a rata linnete tseo a li rutang a bile a rata batho bao a ba rutang. O ne a boetse a tseba ho sebelisa mekhoa ea ho ruta. A re hlahlobeng mekhoa e meraro e atlehang eo a neng a e sebelisa ’me re bone hore na re ka e etsisa joang.

O ne a Ruta ka Tsela e Bonolo

3, 4. (a) Ke hobane’ng ha Jesu a ne a sebelisa mantsoe a bonolo ha a ruta? (b) Thuto ea Thabeng ke mohlala oa tsela e bonolo eo Jesu a neng a ruta ka eona joang?

³ Na u ka inahanela hore na Jesu o ne a e-na le mantsoe a mangata hakae ao a neng a ka a sebelisa? Empa ha ho mohla a neng a sebelisa mantsoe a thatafallang bamameli ba hae ha a ruta, bao ba bangata ba bona e neng e le “batho ba sa rutehang le ba tloaelehileng.” (Liketso 4:13) O ne a nahanela mefokolo ea bona, ho se mohla a ba imetsang ka boitsebiso bo bongata haholo. (Johanne 16:12) O ne a sebelisa mantsoe a bonolo, empa a fetisa linnete tsa bohlokoa.

⁴ Nka ka mohlala Thuto ea Thabeng e tlalehiloeng ho Matheu 5:3–7:27. Thutong ena, Jesu o ile a fana ka keletso e matla e fihlang khubung ea taba. Ha e na likhopolo kapa lipolelo tse rarahaneng. Ha e le hantle, ha ho na lentsoe le ka thatafallang esita le ngoana e monyenyane! Kahoo ha ho makatse hore ebe ha Jesu a qeta, bongata—boo mohlomong bo neng bo akarelletsa lihoai, balisa le batšoasi ba litlhapi—“bo ile ba hlolloa ke tsela ea hae ea ho ruta.”—Matheu 7:28.

 5. Fana ka mehlala ea mantsoe a bonolo a builoeng ke Jesu empa a fetisa moelelo o matla oa seo a se rutang.

⁵ Jesu o ne a atisa ho sebelisa lipoleloana tse bonolo, tse fetisang moelelo o matla ha a ruta. Ka tsela eo, o ne a hatisa molaetsa oa seo a se rutang likelellong le lipelong tsa bamameli ba hae mehleng eo ea khale pele ho hatisoa libuka. Ak’u nahane ka mehlala ena e seng mekae: “Khaotsang ho ahlola e le hore le se ke la ahloloa.” “Batho ba phelang hantle ha ba hloke ngaka, empa ba kulang baa e hloka.” “Moea o na le tabatabelo, empa nama ea fokola.” “Lefang Cesare lintho tsa Cesare, empa le lefe Molimo lintho tsa Molimo.” “Ho fana ho tlisa thabo e khōlō ho feta ho amohela.”b (Matheu 7:1; 9:12; 26:41; Mareka 12:17; Liketso 20:35) Mantsoe ao a ntse a hopoleha le kajeno le hoja ho se ho fetile lilemo tse ka bang 2 000 a builoe.

6, 7. (a) E le hore re rute ka tsela e bonolo, ke hobane’ng ha ho hlokahala hore re sebelise puo e utloisisehang? (b) Re ka etsa’ng ho qoba ho imetsa seithuti sa Bibele ka boitsebiso bo bongata haholo?

⁶ Re ka ruta ka tsela e bonolo joang? Ho hlokahala hore re sebelise puo e bonolo eo batho ba bangata ba ka e utloisisang habonolo. Linnete tsa motheo tse Lentsoeng la Molimo ha li thata. Jehova o senoletse ba tšepahalang le ba lipelo li ikokobelitseng merero ea hae. (1 Bakorinthe 1:26-28) Mantsoe a bonolo a khethiloeng ka hloko a ka atleha ho fetisa linnete tse Lentsoeng la Molimo.

⁷ E le hore re rute ka tsela e bonolo, re lokela ho ba hlokolosi ho qoba ho imetsa seithuti sa Bibele ka boitsebiso bo bongata haholo. Kahoo, ha ho hlokahale hore re hlalose ntlha e ’ngoe le e ’ngoe ha re khanna thuto ea Bibele; kapa re akaretse boitsebiso bo bongata ka nako e khutšoanyane joalokaha eka taba ea hore na re se re qetile maqephe a makae ke eona eo e hlileng e leng ea bohlokoa. Ho e-na le hoo, ke bohlale ho khanna thuto ho latela boemo ba seithuti le hore na se tšoara kapele hakae. Pakane ea rōna ke ho thusa seithuti hore e be molateli oa Kreste le morapeli oa Jehova. E le hore re finyelle seo, re lokela ho fa seithuti nako e lekaneng hore se utloisise seo se ithutang sona. Ke eona feela tsela e tla etsa hore ’nete ea Bibele e tebe pelong ’me e se susumelletse ho sebelisa seo se ithutileng sona.—Baroma 12:2.

O ne a Botsa Lipotso Tse Loketseng

8, 9. (a) Ke hobane’ng ha Jesu a ne a botsa lipotso? (b) Jesu o ile a botsa Petrose lipotso joang ho mo thusa hore a fihlele qeto e nepahetseng tabeng ea ho lefa lekhetho la tempele?

⁸ Jesu o ne a botsa lipotso ka tsela ikhethang, esita le ha ho ne ho ka mo nka nako e khutšoanyane hore a bolelle motho eo a buisanang le eena taba eo a buang ka eona. Joale ke hobane’ng ha a ne a botsa lipotso? Ka linako tse ling, o ne a botsa lipotso tse fatang maikutlo ho senola sepheo sa bahanyetsi ba hae, ka ho etsa joalo a ba khutsisa. (Matheu 21:23-27; 22:41-46) Empa maemong a mangata, o ne a botsa barutuoa ba hae lipotso ho etsa hore ba itlhalose le ho ba susumelletsa ho nahana, le ho ba koetlisa tseleng eo ba nahanang ka eona. Kahoo o ne a botsa lipotso tse kang, “Le nahana joang?” le “Na u lumela see?” (Matheu 18:12; Johanne 11:26) Jesu o ile a finyella barutuoa ba hae lipelo le ho ba ama maikutlo ka ho ba botsa lipotso. Nahana ka mohlala ona.

⁹ Ketsahalong e ’ngoe, babokelli ba lekhetho ba ile ba botsa Petrose hore na Jesu o lefa lekhetho la tempele na.c Petrose o ile a araba le pele a nahana, a re “E.” Hamorao Jesu o ile a behelana mabaka le eena, a re: “U nahana joang, Simone? Marena a lefatše a amohela lekhetho la thepa kapa lekhetho la hlooho ho bo-mang? Ho bara ba ’ona kapa ho basele?” Petrose a re: “Ho basele.” Jesu a re: “Joale, ka sebele, bara ba lokolohile lekhethong.” (Matheu 17:24-27) Ha ho pelaelo hore Petrose o ile a hlakeloa ke ntlha ka lebaka la lipotso tseo, kaha ho ne ho tsebahala hore ba boreneng bona ha ba lefe lekhetho. Kahoo, kaha Jesu ke Mora ea tsoetsoeng a ’notši oa Morena oa leholimo ea rapeloang tempeleng moo, o ne a sa tlameha ho lefa lekhetho. Hlokomela hore ho e-na le hore a bolelle Petrose ntlha ka ho toba, Jesu o ile a mo botsa lipotso ka bohlale ho mo thusa hore a fihlele qeto e nepahetseng, mohlomong a be a elelloe hore le nakong e tlang ho hlokahala hore a nahanisise taba pele a arabela.

10. Re ka botsa lipotso ka tsela e atlehang joang ha re le tšebeletsong?

¹⁰ Re ka botsa lipotso ka tsela e atlehang joang ha re le tšebeletsong? Ha re paka ka ntlo le ntlo, re ka botsa lipotso ho tsosa thahasello, mohlomong e le ho qalisa moqoqo oa litaba tse molemo. Ka mohlala, haeba re fumana motho ea seng a hōlile, re ka ’na ra botsa ka tlhompho, ra re, “Lefatše la kajeno le fapane joang le la mehleng ea lōna?” Ha re se re utloile karabo, re ka ’na ra boela ra botsa, “U nahana hore ke’ng se ka etsoang e le hore lefatše lee e be sebaka se khathollang seo batho ba ka phelang ho sona?” (Matheu 6:9, 10) Haeba re fumana ’mè ea nang le bana ba banyenyane, re ka ’na ra botsa, “Na u kile ua ipotsa hore na lefatše lee le tla be le le joang ha bana ba hao ba se ba hōlile?” (Pesaleme ea 37:10, 11) Ka ho ba ba falimehileng ha re kena malapeng, re ka khona ho botsa potso e lumellanang le seo mong’a ntlo a se thahasellang.

11. Re ka botsa lipotso ka tsela e atlehang joang ha re khanna lithuto tsa Bibele?

¹¹ Re ka botsa lipotso ka tsela e atlehang joang ha re khanna lithuto tsa Bibele? Ho botsa lipotso tse nahanisisitsoeng hantle ho ka re thusa ho fata seithuti maikutlo. (Liproverbia 20:5) Ka mohlala, a re nke hore re ithuta khaolo e buang ka “Ho Phela ka Tsela e Khahlisang Molimo” bukeng ea Ha e le Hantle ke Eng Seo Bibele e se Rutang?d Khaolo eo e bua ka tsela eo ka eona Molimo a talimang lintho tse kang boitšoaro bo bobe ba ho kopanela liphate, botahoa le ho bua leshano. Tsela eo seithuti se arabang ka eona e ka ’na ea bontša hore se utloisisa seo Bibele e se rutang, empa na se lumellana le seo se ithutang sona? Re ka ’na ra se botsa, “Na u bona eka tsela eo Molimo a talimang taba ee ka eona ea utloahala?” Re ka ’na ra boela ra re, “U ka sebelisa boitsebiso boo joang bophelong ba hao?” Empa u hopole hore re lokela ho bua le seithuti ka tsela e nang le tlhompho, e se sielang seriti. Ha re batle ho botsa lipotso tse tla se hlabisa lihlong ho sa hlokahale.—Liproverbia 12:18.

O ne a Fana ka Mabaka a Matla

12-14. (a) Jesu o ile a sebelisa tsebo ea hae joang ea ho beha mabaka a utloahalang? (b) Jesu o ile a beha mabaka afe a matla a utloahalang ha Bafarisi ba re matla a hae a tsoa ho Satane?

¹² Ka kelello ea hae e phethahetseng, Jesu o ne a tseba ho behelana mabaka le ba bang ka tsela e ikhethang. Ka linako tse ling, o ne a fana ka mabaka a matla a utloahalang ho hanyetsa liqoso tsa bohata tsa bahanyetsi ba hae. Maemong a mangata, o ne a fana ka mabaka a kholisang ha a ruta balateli ba hae lithuto tsa bohlokoa. A re hlahlobeng mehlala e meng ea seo.

¹³ Ha Jesu a qeta ho folisa monna ea neng a e-na le modemona, eo e neng e le sefofu ebile e le semumu, Bafarisi ba ile ba mo qosa ka ho re: “Motho enoa ha a leleke bademona haese ka Beelzebube [Satane], ’musi oa bademona.” Ka ho bua joalo ba ile ba bontša hore ho ne ho hlokahala matla a phahametseng tlhaho ho leleka bademona. Empa ba ne ba re matla a Jesu a tsoa ho Satane. Qoso ea bona e ne e le ea bohata ebile e sa utloahale. Jesu o ile a senola monahano oa bona o sothehileng, a re: “’Muso o mong le o mong o arohaneng o fetoha lesupi, le motse o mong le o mong kapa ntlo e arohaneng e ke ke ea ema. Ka tsela e tšoanang, haeba Satane a leleka Satane, o arohane; joale, ’muso oa hae o tla ema joang?” (Matheu 12:22-26) Ha e le hantle, Jesu o ne a re: “Haeba ke lehlahana la Satane, ke qhaqha mesebetsi ea Satane, joale Satane o tla be a itoantša ’me haufinyane o tla oa.” Ke joang ba neng ba ka hanyetsa lebaka le utloahalang joalo?

¹⁴ Jesu o ne a e-s’o qete ho behelana mabaka le bona. Kaha o ne a tseba hore barutuoa ba bang ba Bafarisi le bona ba kile ba leleka bademona, o ile a ba botsa potso e bonolo empa e le matla: “Haeba ke leleka bademona ka Beelzebube, bara [kapa, barutuoa] ba lōna ba ba leleka ka mang?” (Matheu 12:27) Ha e le hantle, Jesu o ne a tšetleha lebaka le reng: “Haeba ke leleka bademona ka matla a tsoang ho Satane, e tlameha ebe barutuoa ba lōna le bona ba ne ba sebelisa matla ao.” Bafarisi ba ne ba tla re’ng? Ba ne ba ke ke ba lumela hore barutuoa ba bona ba ne ba sebelisa matla a Satane. Ka tsela eo, Jesu o ile a totobatsa monahano oa bona o fosahetseng ka hore a ba qobelle ho etsa qeto e ba kukunelang. Na hase ho hlasimollang esita le ho bala feela kamoo Jesu a ileng a behelana mabaka le bona kateng? Joale ak’u nahane ka bongata bo ileng ba ikutloela ha Jesu a bua, kaha ha ho pelaelo hore boteng ba hae le molumo oa lentsoe la hae li ile tsa hatisa le ho feta seo a neng a se bua.

15-17. Fana ka mohlala oa kamoo Jesu a ileng a sebelisa lentsoe “hakaakang” ha a beha mabaka ha a ruta linnete tse thobang pelo ka Ntate oa hae.

¹⁵ Jesu o ne a boetse a fana ka mabaka a utloahalang le a kholisang ha a ne a ruta linnete tse khothatsang le tse thobang pelo ka Ntate oa hae. O ne a atisa ho sebelisa lentsoe “hakaakang” ha a fana ka mabaka—a thusa bamameli ba hae ho haha tumelo e matla ka ’nete eo ba e tsebang. Ho beha mabaka ka tsela ena ea ho bapisa maemo ho ka hatisa taba le ho feta. A re hlahlobeng mehlala e ’meli feela ea seo.

¹⁶ Ha a arabela barutuoa ba hae ba neng ba mo kōpa hore a ba rute ho rapela, Jesu o ile a hlalosa hore batsoali ba sa phethahalang ba batho ba ikemiselitse ‘ho fa bana ba bona limpho tse ntle.’ A ntan’o phetha ka ho re: “Haeba lōna, le hoja le le khopo, le tseba ho fa bana ba lōna limpho tse ntle, Ntate ea leholimong o tla fana ka moea o halalelang hakaakang ho ba mo kōpang!” (Luka 11:1-13) Jesu o hlalosa taba ena ka ho e bapisa le e ’ngoe. Haeba batsoali ba sa phethahalang ba batho ba fa bana ba bona seo ba se hlokang, hakaakang ka Ntate oa rōna ea phethahetseng oa leholimo ea lokileng ka hohle-hohle, ka sebele o tla fa barapeli ba hae ba tšepahalang moea o halalelang ha ba mo atamela ka thapelo!

¹⁷ Jesu o ile a beha mabaka ka tsela e tšoanang ha a ne a fana ka keletso tabeng ea ho sebetsana le matšoenyeho. O ile a re: “Makhoaba ha a jale peō leha e le ho kotula, ’me ha a na moliko kapa ntlo ea polokelo, leha ho le joalo Molimo oa a fepa. Le ba bohlokoa hakaakang ho feta linonyana? Lemohang kamoo likhahla li hōlang kateng; ha li sehle leha e le ho ohla . . . Joale, haeba Molimo a apesa joalo limela tse naheng tseo kajeno li leng teng ’me hosasane li lahleloa ka ontong, ho e-na le hoo o tla le apesa hakaakang, lōna ba nang le tumelo e nyenyane!” (Luka 12:24, 27, 28) Haeba Jehova a hlokomela linonyana le lipalesa, o tla hlokomela hakaakang batho ba mo ratang le ba mo rapelang! Ha ho pelaelo hore Jesu o ile a ama bamameli ba hae lipelo ka ho ba fa mabaka ka tsela eo.

18, 19. Re ka ’na ra behelana mabaka joang le motho ea reng ha a lumele ho Molimo eo a e-song ho mo bone?

¹⁸ Ha re le tšebeletsong, re batla ho fana ka mabaka a utloahalang ha re hanyetsa lithuto tsa bohata. Re boetse re batla ho fana ka mabaka a kholisang ha re ruta linnete tse khothatsang ka Jehova. (Liketso 19:8; 28:23, 24) Na ebe re lokela ho ithuta ho fana ka mabaka a rarahaneng? Che. Seo re ithutang sona mohlaleng oa Jesu ke hore ho atlehang ka ho fetisisa ke ho hlalosa mabaka a utloahalang ka tsela e bonolo.

¹⁹ Ka mohlala, u ka re’ng ha motho e mong a re ha a lumele ho Molimo hobane ha a e-s’o ka a mo bona? Re ka mo fa lebaka la hore ka tlhaho ntho e ’ngoe le e ’ngoe e na le sesosa le phello. Ha re bona phello e itseng, rea tseba hore e tlameha ebe ho na le sesosa sa eona. Re ka ’na ra re: “Haeba u ntse u tsamaea nahathothe eba u fihla ntlong e hahiloeng hantle e nang le lijo tse ngata ka hare (phello), na u ne u sa tl’o lumela habonolo hore ho na le motho ea itseng (sesosa) ea entseng seo? Ka ho tšoanang ha re bona tsela eo lintho tsa tlhaho li bōpiloeng ka eona le kamoo ‘meliko’ ea lefatše e tletseng lijo kateng (phello), na hase ho utloahalang ho etsa qeto ea hore ho na le Motho (Sesosa) ea itseng ea entseng seo? Bibele eona e fana ka lebaka lena: ‘Ntlo e ’ngoe le e ’ngoe e hahoa ke motho ea itseng, empa ea hahileng lintho tsohle ke Molimo.’” (Baheberu 3:4) Ke ’nete hore ho sa tsotellehe hore na re fana ka mabaka a utloahalang hakae, hase bohle ba tla kholoa.—2 Bathesalonika 3:2.

20, 21. (a) Re ka sebelisa lentsoe “hakaakang” joang ha re beha mabaka ho totobatsa litšobotsi tsa Jehova le litsela tsa hae? (b) Re tlil’o tšohla eng khaolong e latelang?

²⁰ Ha re ruta, ebang ke tšebeletsong ea tšimo kapa ke ka phuthehong, le rōna re ka sebelisa lentsoe “hakaakang” ha re fana ka mabaka ho totobatsa litšobotsi tsa Jehova le litsela tsa hae. Ka mohlala, ho bontša hore ha e le hantle thuto ea tlhokofatso ea ka ho sa feleng mollong oa lihele e hlompholla Jehova, re ka ’na ra re: “Na ho na le ntate ea lerato ea ka hlokofatsang ngoana oa hae ka ho beha letsoho la ngoana mollong? E tlameha ebe Ntate oa rōna ea lerato oa leholimo o hloile khopolo eo ea mollo oa lihele hakaakang!” (Jeremia 7:31) E le ho tiisetsa molumeli-’moho le rōna hore Jehova oa mo rata, re ka ’na ra re: “Haeba Jehova o nka le serobele se senyenyane e le sa bohlokoa, joale e tlameha ebe o tsotella barapeli ba hae ba lefatšeng ebile o ba rata hakaakang, ho akarelletsa le uena!” (Matheu 10:29-31) Ho fana ka mabaka a joalo ho ka re thusa ho finyella ba bang lipelo.

²¹ Ka mor’a ho hlahloba mekhoa e meraro feela eo Jesu a neng a ruta ka eona, re khona ho utloisisa hore balaoli bao ba ileng ba hlōleha ho mo tšoara ba ne ba sa feteletse taba ha ba re: “Ha ho mohla motho e mong a kileng a bua tjena.” Khaolong e latelang, re tlil’o tšohla mokhoa o mong oa ho ruta oo e ka ’nang eaba ke oona oo Jesu a neng a tumme ka oona haholo, e leng oa ho sebelisa lipapiso.

[Mongolo o botlaaseng ba leqephe]

U ka Latela Jesu Joang?

● Seo Jesu a se buileng se ka u thusa joang ho khetha mantsoe ha u fana ka lipuo phuthehong?—Matheu 11:25.

● Libui tsa phatlalatsa li ka etsisa Jesu joang tabeng ea ho botsa lipotso tsa mofuta oo?—Matheu 11:7-9.

● U ka sebelisa mokhoa oa ho fetelletsa taba joang ka bohlale ha u ruta?—Matheu 7:3; 19:24.

● Ho tšoana le Jesu, re ka behela ba bang mehlala eo ba ka e etsisang joang ha re ruta?—Johanne 13:5, 14.

[Setšoantšo se leqepheng la 110]

Ruta ka tsela e bonolo

[Setšoantšo se leqepheng la 112]

Botsa lipotso tse lumellanang le seo mong’a ntlo a se thahasellang

[Setšoantšo se leqepheng la 116]

Fana ka mabaka a tla finyella motho pelo