Na U Tšepahala Linthong Tsohle?
“Motho ea tšepahalang ho se senyenyane o tšepahala le ho se seholo.”—LUKA 16:10.
1. Tsela e ’ngoe eo Jehova a tšepahalang ka eona ke efe?
NA U kile ua bona se etsahalang ka moriti oa sefate ha letsatsi le ntse le tsamaea? O tsamaea o hōla o bile o nyenyefala hape oa reteleha. Hangata boiteko ba batho le litšepiso tsa bona ha lia tsitsa joaloka moriti. Ka lehlakoreng le leng, Jehova Molimo, ha a fetohe le nako. Morutuoa Jakobo o mo bitsa “Ntate oa maseli a leholimo,” ’me o re “ho eena ha ho phetoho ea ho reteleha ha moriti.” (Jakobo 1:17) Esita le linthong tse nyenyane haholo Jehova oa tšepahala ebile ha a fetohe. Ke “Molimo oa botšepehi.”—Deuteronoma 32:4.
2. (a) Ke hobane’ng ha re lokela ho itlhahloba ho bona hore na rea tšepahala? (b) Ke lipotso life tse amanang le botšepehi tseo re tla li tšohla?
2 Molimo o talima ho tšepahala ha barapeli ba hae joang? O na le maikutlo a tšoanang le a Davida ea ileng a re ka bona: “Mahlo a ka a holim’a ba tšepahalang ba lefatše, e le hore ba ka lula le ’na. Ea tsamaeang ka tsela e se nang molato, ke eena ea tla ntšebeletsa.” (Pesaleme ea 101:6) Ka sebele Jehova o thabisoa ke botšepehi ba bahlanka ba hae. Hoa utloahala hore ebe moapostola Pauluse o ile a ngola a re: “Se batloang ho batsamaisi ke hore motho a fumanoe a tšepahala.” (1 Bakorinthe 4:2) Ho tšepahala ho akarelletsa eng? Bophelong ke lintlha life tseo re tšoanelang ho tšepahala ho tsona? Melemo ea ho ‘tsamaea ka tsela e se nang molato’ ke efe?
Seo ho Tšepahala ho se Bolelang
3. Ke eng se bontšang hore na rea tšepahala?
3 Baheberu 3:5 e re: “Moshe e le mohlanka o ile a tšepahala.” Ke eng se ileng sa etsa hore moprofeta Moshe a tšepahale? Ha ho ne ho hahoa tabernakele leha e ne e hlongoa, “Moshe [o ile] a etsa ho ea ka sohle seo Jehova a neng a mo laetse sona. A fela a etsa joalo.” (Exoda 40:16) Re barapeli ba Jehova, ’me re bontša botšepehi ka ho mo sebeletsa ka tlhompho. Ka sebele sena se akarelletsa hore kamehla re tšepahale ho Jehova ha re ntse re le litekong tse boima kapa tse matla haholo. Leha ho le joalo, ho hlōla liteko tse khōlō hase lona lebaka feela le bontšang hore rea tšepahala. Jesu o itse: “Motho ea tšepahalang ho se senyenyane o tšepahala le ho se seholo, ’me motho ea sa lokang ho se senyenyane ha aa loka le ho se seholo.” (Luka 16:10) Re lokela ho tšepahala kamehla le linthong tse bonahalang li le nyenyane.
4, 5. Ho tšepahala ha rōna ho “se senyenyane” ho senola eng?
4 Ho tšepahala ho “se senyenyane” letsatsi ka leng ke ntho ea bohlokoa ka mabaka a mabeli. La pele, ho senola maikutlo a rōna ka bobusi ba Jehova. Nahana ka teko ea botšepehi e ileng ea beheloa batho ba babeli ba pele, e leng Adama le Eva. Ho hang oo e ne e se molao o thata. Ha ba ntse ba ja lijo tsa mefuta-futa ka serapeng sa Edene, ba ne ba mpa ba sa lokela ho ja litholoana tsa sefate se leng seng feela—e leng “sefate sa tsebo ea botle le bobe.” (Genese 2:16, 17) Hoja batho bao ba babeli ba pele ba ile ba tšepahala ’me ba mamela taelo eo e bonolo, seo se ka be se bontšitse hore ba tšehetsa bobusi ba Jehova. Ha re latela litaelo tsa Jehova bophelong ba rōna ba letsatsi le letsatsi re bontša hore re tšehetsa bobusi ba Jehova.
5 Lebaka la bobeli, boitšoaro ba rōna “ho se senyenyane” bo susumetsa seo re tla se etsa “le ho se seholo,” ke hore, ha re thulana le lintho tse khōlō bophelong. Ntlheng ena, nahana ka se ileng sa etsahalla Daniele le metsoalle ea hae e meraro ea Baheberu—Hanania, Mishaele le Azaria. Ba ile ba isoa kholehong Babylona ka 617 B.C.E. Mohlomong bone ba bona ba ne ba le lilemong tsa bocha ha ba behoa ka lekhotleng la Morena Nebukadnezare. Ha ba le moo ba ile ba ‘abeloa kabelo ea letsatsi le letsatsi ea limenyemenye tsa morena le ea veine ea hae e nooang, esita le ho ba fepa ka lilemo tse tharo, e le hore bofelong ba tsona ba ka ema ka pel’a morena.’—Daniele 1:3-5.
6. Daniele le metsoalle ea hae e meraro ea Baheberu ba ile ba tobana le teko efe lehaeng la borena la Babylona?
6 Leha ho le joalo, lijo tsa morena oa Babylona li ile tsa bakela bacha bana ba bane ba Baheberu bothata. Mohlomong limenyemenye tsa morena li ne li akarelletsa lijo tse neng li haneloa ke Molao oa Moshe. (Deuteronoma 14:3-20) Ho ka etsahala hore ebe liphoofolo tse neng li hlabiloe li ne li sa ntšoa mali hantle, ’me ho ja nama e joalo e ne e tla ba ho tlōla Molao oa Molimo. (Deuteronoma 12:23-25) Hape, ho ka etsahala hore ebe lijo tseo li ne li nyehetsoe melimo ea litšoantšo, joalokaha eo e ne e le tloaelo ea barapeli ba Bababylona pele ba ja sejo se kopaneloang.
7. Ho mamela ha Daniele le metsoalle ea hae e meraro ho ile ha bontša eng?
7 Ha ho pelaelo hore lelapeng la morena oa Babylona melao ea lijo e ne e se ea bohlokoa. Leha ho le joalo, Daniele le metsoalle ea hae ba ne ba entse qeto ka lipelong tsa bona hore ba ke ke ba itšilafatsa ka ho ja lijo tse haneloang ke Molao oo Molimo a neng a o file Baiseraele. Taba ena e ne e ama botšepehi ba bona ho Molimo. Kahoo, ba ile ba kōpa ho feptjoa meroho le metsi, ’me ba ile ba li nehoa. (Daniele 1:9-14) Kajeno batho ba bang ba ka ’na ba bona seo bahlankana bao ba bane ba ileng ba se etsa e se sa bohlokoa. Leha ho le joalo, hore ebe ba ile ba mamela Molimo ho ile ha bontša hore na ba tšehetsa lehlakore lefe tsekong ea bobusi ba Jehova.
8. (a) Baheberu ba bararo ba ile ba tobana le teko efe e boima ea botšepehi? (b) Phello ea teko eo e ile ea e-ba efe, ’me see se bontša eng?
8 Metsoalle e meraro ea Daniele e ile ea hlōla teko e khōloanyane hobane e ile ea tšepahala ho seo mohlomong motho a neng a ka nka hore hase sa bohlokoa hakaalo. Ak’u phetle khaolo ea 3 ea buka ea Bibele ea Daniele, ebe u ipalla kamoo Baheberu bana ba bararo ba ileng ba tobana le kahlolo ea lefu kateng ka lebaka la ho hana ho rapela setšoantšo sa khauta seo Morena Nebukadnezare a neng a se emisitse. Ha ba tlisoa ka pel’a morena, ka sebete ba ile ba bua tjena ka boikemisetso ba bona: “Haeba ho ka ba joalo, Molimo oa rōna eo re mo sebeletsang o tla khona ho re pholosa. O tla re pholosa sebōping se tukang sa mollo le letsohong la hao, morena. Empa haeba ho se joalo, u tsebe, morena, hore melimo ea hao hase eona eo re e sebeletsang, ’me setšoantšo sa khauta seo u se emisitseng re ke ke ra se rapela.” (Daniele 3:17, 18) Na Jehova o ile a ba pholosa? Balebeli ba ileng ba lahlela bahlankana bana ka sebōping sa mollo ba ile ba shoa, empa Baheberu bao ba bararo ba tšepahalang ba ile ba tsoa ba phela—lebatama la sebōpi le sa ba tlabola ho hang! Kaha ba ne ba tšepahala kamehla, sena se ile sa ba lokisetsa ho tšepahala tekong eo e boima. Na see ha se bontše hore ho tšepahala linthong tse nyenyane ke habohlokoa?
Ho Tšepahala Tabeng ea “Maruo a sa Lokang”
9. Litemana tse potolohileng mantsoe a Jesu a ngotsoeng ho Luka 16:10 li re’ng?
9 Pele Jesu a bolela molao-motheo oa hore motho ea tšepahalang linthong tse bonahalang li le nyenyane o boetse o tšepahala le litabeng tsa bohlokoa, o ile a eletsa bamameli ba hae a re: “Iketsetseng metsoalle ka maruo a sa lokang, e le hore, ha a fela, ba ka le amohela libakeng tsa bolulo tse sa feleng.” Ka mor’a moo o ile a bua ka ho tšepahala ho se senyenyane. Eaba Jesu o re: “Ka hona, haeba le sa tšepahala maruong a sa lokang, ke mang ea tla beha sa ’nete tlhokomelong ea lōna? . . . Ha ho mohlanka oa ntlo eo e ka bang lekhoba la benghali ba babeli; kaha, o tla hloea e mong ’me a rate e mong, kapa o tla khomarela e mong ’me a nyelise e mong. Le ke ke la ba makhoba a Molimo le a maruo.”—Luka 16:9-13.
10. Re ka bontša joang hore re sebelisa ‘maruo a rōna a sa lokang’ ka botšepehi?
10 Ho latela litemana tse potolohileng Luka 16:10, tšebeliso ea pele ea mantsoe a Jesu e amana le “maruo a sa lokang,” e leng lintho tsa rōna tse bonahalang kapa matlotlo a rōna. A bitsoa a sa lokang hobane maruo a bonahalang—haholo-holo chelete—a laoloa ke batho ba baetsalibe. Ho feta moo, takatso ea ho rua e ka etsisa motho liketso tse sa lokang. Re bontša botšepehi ka ho ba bohlale tseleng eo re sebelisang lintho tsa rōna tse bonahalang ka eona. Ho e-na le ho li sebelisetsa merero ea boithati, re batla ho li sebelisetsa ho ntšetsa pele lintho tse amanang le ’Muso le ho thusa ba hlokang. Ha re tšepahala ka tsela ena, re etsa setsoalle le Jehova Molimo le Jesu Kreste, e leng beng ba ‘libaka tsa bolulo tse sa feleng.’ Ba tla re amohela libakeng tsena, ’me ba re fe bophelo bo sa feleng leholimong kapa lefatšeng la Paradeise.
11. Ke hobane’ng ha re sa lokela ho tsilatsila ho hlalosetsa beng ba matlo hore re amohela menehelo bakeng sa mosebetsi oa lefatše lohle o etsoang ke Lipaki Tsa Jehova?
11 Hape, nahana hore na re neha batho bao re ba fang Libibele le lingoliloeng tse thehiloeng Bibeleng eng ha re bolela molaetsa oa ’Muso ’me re ba hlalosetsa hore re amohela menehelo bakeng sa mosebetsi oa lefatše lohle o etsoang ke batho ba Jehova. Na ha re ba nehe monyetla oa hore ba sebelise matlotlo a bona a bonahalang ka bohlale? Le hoja tšebeliso ea pele ea Luka 16:10 e amana le tšebeliso ea matlotlo a bonahalang, molao-motheo o boletsoeng ho eona o boetse o sebetsa lintlheng tse ling bophelong.
Botšepehi ke Ntho ea Bohlokoa
12, 13. Re ka bontša botšepehi linthong life?
12 Moapostola Pauluse o ile a ngola a re: “Re tšepa hore re na le matsoalo a tšepahalang, kaha re lakatsa ho itšoara ka botšepehi linthong tsohle.” (Baheberu 13:18) Ha ho pelaelo hore ‘lintho tsohle’ li akarelletsa litaba tsohle tse amanang le tšebeliso ea chelete. Re lefa likoloto tsa rōna le makhetho a rōna kapele le ka botšepehi. Hobane’ng? Re etsa joalo ka lebaka la matsoalo a rōna ’me haholo-holo hobane re rata Molimo ebile re mamela litaelo tsa hae. (Baroma 13:5, 6) Re etsa’ng ha re thola ntho eo e seng ea rōna? Re batla ho e tholisa mong’a eona. Ka sebele sena e ba bopaki bo botle haholo ha re hlalosa se re susumelelitseng ho mo tholisa thepa eo ea hae!
13 Ho tšepahala linthong tsohle ho akarelletsa botšepehi moo re sebetsang teng. Mekhoa ea ho sebetsa e bontšang botšepehi e totobatsa hore na re emela Molimo oa mofuta ofe. Ha re ‘utsoe’ nako ka ho ba botsoa. Ho e-na le hoo, re sebetsa ka thata, joalokaha eka re sebeletsa Jehova. (Baefese 4:28; Bakolose 3:23) Ho hakanngoa hore naheng e ’ngoe ea Europe, mosebetsi a le mong ho ba bararo ea kōpang lengolo la ngaka le mo lumellang ho ba sieo mosebetsing, o etsa joalo ka bolotsana. Bahlanka ba ’nete ba Molimo ha ba lohe mano a hore ba se ke ba ea mosebetsing. Ka linako tse ling, Lipaki Tsa Jehova lia phahamisoa mesebetsing hobane bahiri ba tsona ba hlokomela hore lia tšepahala ebile li sebetsa ka thata.—Liproverbia 10:4.
Botšepehi Tšebeletsong ea Rōna ea Bokreste
14, 15. Ke litsela life tse ling tseo ka tsona re ka bontšang hore rea tšepahala tšebeletsong ea Bokreste?
14 Re bontša botšepehi joang tšebeletsong e behiloeng liatleng tsa rōna? Bibele e re: “A re nyeheleng kamehla ho Molimo sehlabelo sa thoriso, ke hore, litholoana tsa melomo e bolelang lebitso la hae phatlalatsa.” (Baheberu 13:15) Tsela e ka sehloohong ea ho tšepahala tšebeletsong ea tšimo ke ho kopanela ho eona kamehla. Ebe ke eng e ka etsang hore khoeli e fete re sa pake ka Jehova le morero oa hae? Ha re kopanela kamehla mosebetsing oa boboleli, seo se boetse se re thusa ho ntlafatsa bokhoni ba rōna le katleho ea rōna.
15 Tsela e ’ngoe e ntle ea ho bontša botšepehi tšebeletsong ea tšimo ke ho sebelisa litlhahiso tse fumanoang Molula-Qhooeng le Tšebeletsong ea Rōna ea ’Muso. Ha re lokisetsa le ha re sebelisa linehelano tse khothalelitsoeng kapa tse ling tse loketseng, na ha re behe haholo tšebeletsong ea rōna? Ha re kopana le motho ea thahasellang molaetsa oa ’Muso, na re potlakela ho hōlisa thahasello eo? Ho thoe’ng ka lithuto tsa mahae tsa Bibele tseo re ka ’nang ra li qala le batho ba thahasellang? Na re li khanna kamehla le ka botšepehi? Ho tšepahala tšebeletsong ho ka etsa hore rōna hammoho le ba re mamelang re fumane bophelo.—1 Timothea 4:15, 16.
Ho Lula re Ikarotse Lefatšeng
16, 17. Re ka bontša ka litsela life hore re ikarotse lefatšeng?
16 Ha Jesu a rapela Molimo, o ile a re ka balateli ba hae: “Ke ba file lentsoe la hao, empa lefatše le ba hloile, hobane hase karolo ea lefatše, feela joalokaha ke se karolo ea lefatše. Ha ke u kōpe hore u ba ntše lefatšeng, empa ke kōpa hore u ba lebele ka lebaka la ea khopo. Hase karolo ea lefatše, feela joalokaha ke se karolo ea lefatše.” (Johanne 17:14-16) Ho ka etsahala hore ebe re batho ba tiileng le ba ikemiselitseng ho ikarola lefatšeng litabeng tse khōlō, tse kang ho se jele paate, matsatsi a phomolo a bolumeli, meetlo le boitšoaro bo bobe. Leha ho le joalo, ho thoe’ng ka lintho tse nyenyane? Na ho ka etsahala hore ebe mekhoa ea lefatše e re susumetsa re sa hlokomele? Ka mohlala, haeba re se hlokolosi, ruri moaparo oa rōna e ka ba o se nang seriti le o sa lokelang! Ho tšepahala ho hloka “boitlhompho le ho hlaphoheloa kelellong.” (1 Timothea 2:9, 10) Ke ’nete hore “ka tsela leha e le efe ha re fane ka sesosa leha e le sefe sa ho khoptjoa, e le hore bosebeletsi ba rōna bo se ke ba fumanoa bo e-na le molato; empa re ipuella ka tsela e ’ngoe le e ’ngoe hore re basebeletsi ba Molimo.”—2 Bakorinthe 6:3, 4.
17 Kaha re rata ho tlotlisa Jehova, re apara ka tsela e nang le seriti ha re e-ea libokeng tsa phutheho. Sena ke seo re se etsang le ha re kopana ka bongata likopanong tsa rōna tse khōlō le tse nyenyane. Ho hlokahala hore re apare ka tsela e tšoanelehang le e bohehang. Sena e ba bopaki ho ba bang ba re shebeletseng. Esita le mangeloi a hlokomela seo re se etsang, joalokaha a ile a hlokomela se neng se etsoa ke Pauluse le metsoalle ea hae ea Bakreste. (1 Bakorinthe 4:9) Ha e le hantle, re lokela ho apara hantle ka linako tsohle. Ho batho ba bang, ho ka bonahala botšepehi tabeng ea ho khetha liaparo e le ntho e nyenyane, empa ho Molimo ke ea bohlokoa.
Melemo ea Botšepehi
18, 19. Ho tšepahala ho fella ka melemo efe?
18 Bakreste ba ’nete ba bitsoa “batsamaisi ba khabane ba mosa o sa tšoanelang oa Molimo o bontšitsoeng ka litsela tse sa tšoaneng.” Ka lebaka leo, ba ‘itšetlehile ka matla ao Molimo a fanang ka ’ona.’ (1 Petrose 4:10, 11) Ho feta moo, joaloka batsamaisi, re filoe boikarabelo ba ho hlokomela seo e seng sa rōna—e leng lipolelo tsa mosa o sa tšoanelang oa Molimo, tse akarelletsang tšebeletso. Ha re ntse re bontša hore re batsamaisi ba khabane, re tšepile matla ao Molimo a fanang ka ’ona, e leng, “matla a fetang se tloaelehileng.” (2 Bakorinthe 4:7) Ka sebele ke thuto e ntle haholo e re thusang ho tobana le teko efe kapa efe e ka hlahang nakong e tlang!
19 Mopesaleme o ile a bina tjena: “Ratang Jehova, lōna bohle ba tšepahalang ba hae. Jehova o sireletsa ba tšepahalang.” (Pesaleme ea 31:23) A re ikemisetseng ho bontša hore rea tšepahala, re kholisehile ka ho feletseng hore Jehova ke “Mopholosi oa batho ba mefuta eohle, haholo-holo oa ba tšepahalang.”—1 Timothea 4:10.
Na U sa Hopola?
• Ke hobane’ng ha re lokela ho ‘tšepahala ho se senyenyane’?
• Re ka bontša botšepehi joang litabeng tse amanang le lichelete le mosebetsi?
• Re ka bontša botšepehi joang tšebeletsong?
• Re ka bontša botšepehi joang tabeng ea ho ikarola lefatšeng?
[Litšoantšo tse leqepheng la 26]
Ea tšepahalang ho se senyenyane, o tla tšepahala le ho se seholo
[Setšoantšo se leqepheng la 29]
‘Itšoare ka botšepehi linthong tsohle’
[Setšoantšo se leqepheng la 29]
Tsela e molemo ea ho bontša botšepehi ke ho lokisetsa hantle bakeng sa tšebeletso ea tšimo
[Setšoantšo se leqepheng la 30]
Apara le ho itlhopha ka tsela e hlomphehang