Lula U E-na le “Lerato Leo U Neng U E-na le Lona Pele”
“U ’ne u tšoare ka tieo seo u nang le sona.”—TŠEN. 3:11.
1, 2. U ile ua ikutloa joang ha u hlokomela hore seo u ithutang sona ka Jehova ke ’nete?
NA U sa hopola ha u ne u qala ho ithuta ka bophelo bo babatsehang boo Jehova a bo tšepisang batho ba mamelang? Haeba u ne u le bolumeling bo bong pele, u ile ua ikutloa joang ha motho e mong a u hlalosetsa ka Mangolo hore na morero oa Molimo ke ofe kapa ha a u hlakisetsa lithuto tseo u neng u sa li utloisise? Mohlomong u ile ua hlokomela hore seo u neng u se rutiloe mabapi le Molimo e ne e se ’nete. E tlameha ebe u thabile haholo ha e le mona u se u tseba ’nete! Haeba u hōlisitsoe ke batsoali ba Bakreste, na u sa hopola hore na u ile ua ikutloa joang ha u hlokomela hore seo u ithutang sona ka Jehova ke ’nete ’me u etsa qeto ea ho phela ka tsela e lumellanang le sona?—Bar. 12:2.
2 Boholo ba barab’eno ba moea ba tla u bolella hore ba ile ba nyakalla haholo, ba ikutloa ba le haufi-ufi le Jehova ’me ba ananela hore ebe o ba huletse ho eena. (Joh. 6:44) Thabo ea bona e ile ea ba susumelletsa hore ba kopanele mesebetsing ea Bokreste. Ba ne ba thabile hoo ba neng ba batla ho bolella motho e mong le e mong hore na ba ikutloa joang. Na le uena u kile ua ba boemong bo joalo?
3. Ke boemo bofe bo neng bo le teng phuthehong ea Efese ha Jesu a ne a e romela molaetsa?
3 Ha Jesu a ne a romela molaetsa phuthehong ea Bakreste ba lekholong la pele la lilemo ea Efese, o ile a bua ka “lerato leo u neng u e-na le lona pele.” Baefese ba ne ba e-na le litšobotsi tse ngata tse ntle, empa lerato leo ba neng ba rata Jehova ka lona pele le ne le se le folile. Kahoo, Jesu o ile a re ho bona: “Ke tseba liketso tsa hao, le mosebetsi le mamello ea hao, le hore ha u mamelle batho ba babe, le hore u leka ba reng ke baapostola, empa e se bona, ’me u ile ua ba fumana e le ba leshano. Hape u bontša mamello, ’me u jere boima ka lebaka la lebitso la ka ’me ha ua khathala. Leha ho le joalo, ke na le hona khahlanong le uena, hore u tlohetse lerato leo u neng u e-na le lona pele.”—Tšen. 2:2-4.
4. Ke hobane’ng ha molaetsa oo Jesu a ileng a o romella Baefese e le oa bohlokoa kajeno?
4 Keletso eo Jesu a ileng a e fa Baefese le liphutheho tse ling tseo a ileng a li ngolla bukeng ea Tšenolo e bile e loketseng ka lebaka la maemo a ileng a e-ba teng ka nakoana ho tloha ka 1914 ho ea pele har’a Bakreste ba tlotsitsoeng. (Tšen. 1:10) Leha ho le joalo, esita le hona joale ho ka etsahala hore Bakreste ba bang ba felloe ke ‘lerato leo ba neng ba rata Jehova le ’nete ka lona pele.’ Ka lebaka leo, a re hlahlobeng hore na ha re ikhopotsa lintho tseo re fetileng ho tsona re bile re thuisa ka tsona, re ka etsa joang hore re lule re e-na le lerato le cheseho tseo re neng re e-na le tsona pele mabapi le Molimo le ’nete re be re li nchafatse le ho li matlafatsa.
Ke Eng se U Kholisitseng Hore Seo U Ithutileng Sona ke ’Nete?
5, 6. (a) Ke eng eo Mokreste e mong le e mong a lokelang ho kholiseha ka eona? (b) Ke eng se ileng sa u kholisa hore seo Lipaki Tsa Jehova li se rutang ke ’nete? (c) Ke eng e ka thusang motho ho tsosolosa lerato leo a neng a e-na le lona pele?
5 Motho e mong le e mong ea inehelang ho Jehova o lokela hore pele a ‘ipakele’ seo e leng “thato ea Molimo e molemo le e amohelehang le e phethahetseng.” (Bar. 12:1, 2) Har’a tse ling, seo se akarelletsa ho ithuta ’nete ea Bibele. Se kholisang motho e mong hore seo Lipaki Tsa Jehova li se rutang ke ’nete se ka ’na sa fapana le se kholisang motho e mong. Ba bang baa hopola hore se ileng sa fetola bophelo ba bona e bile ha ba bona lebitso la Molimo ka Bibeleng kapa ba utloisisa hore na ha e le hantle bafu ba boemong bofe. (Pes. 83:18; Moek. 9:5, 10) Ba bang ba ile ba khahloa ke lerato le teng har’a batho ba Jehova. (Joh. 13:34, 35) Ba bang bona ba ile ba nahanisisa ka se boleloang ke ho se be karolo ea lefatše. Ba ile ba etsa qeto ea hore Bakreste ba ’nete ha baa lokela ho itšunya-tšunya liqhoebeshanong tsa lipolotiki kapa lintoeng tsa sechaba leha e le sefe.—Esa. 2:4; Joh. 6:15; 17:14-16.
6 Ho nahanisisa ka lintlha tsena le tse ling ke hona ho ileng ha etsa hore ba bangata ba qale ho rata Molimo. Ak’u eme hanyenyane u nahane hore na uena ke eng se ileng sa u kholisa hore seo u ithutileng sona ke ’nete. Maemo a hao a fapane le a batho ba bang ebile u na le litšobotsi tse u khethollang ho ba bang, kahoo e ka ’na eaba mabaka a motheo a etsang hore u rate Jehova u be u lumele litšepiso tsa hae a fapane le a batho ba bang. Mohlomong le kajeno u ntse u utloa mabaka ao a utloahala joaloka ha u ne u qala ho ithuta ’ona. ’Nete ha ea fetoha. Kahoo, ho ikhopotsa lintlha tseo le hore na u ne u ikutloa joang ho ka tsosolosa lerato leo u neng u rata ’nete ka lona pele ha ba ha le nchafatsa.—Bala Pesaleme ea 119:151, 152; 143:5.
Matlafatsa Lerato Leo U Neng U E-na le Lona Pele
7. Ke hobane’ng ha re lokela ho matlafatsa lerato leo re neng re rata ’nete ka lona pele, hona re ka le matlafatsa joang?
7 Mohlomong ho na le lintho tse ngata tse fetohileng bophelong ba hao ho tloha ha u inehela ho Jehova. Lerato leo u neng u rata ’nete ka lona pele e ne e le la bohlokoa, empa ha nako e ntse e ea, ho ile ha hlokahala hore u be le lerato le tebileng haholoanyane e le hore u khone ho hlōla maemo a macha a lekang tumelo ea hao. Leha ho le joalo, Jehova o ile a u matlafatsa. (1 Bakor. 10:13) Kahoo, lintho tseo u fetileng ho tsona ho theosa le lilemo le tsona li u tsoetse molemo o moholo. Li u thusitse hore u matlafatse lerato leo u neng u e-na le lona pele, ebile ke tsela e ’ngoe eo ka eona u ka ipakelang thato ea Molimo e molemo le e amohelehang.—Josh. 23:14; Pes. 34:8.
8. Jehova o ile a itsebahatsa joang ho Moshe, hona Baiseraele ba ile ba tseba Molimo ka tsela e qaqileng le ho feta joang?
8 Ka mohlala, nahana ka boemo boo Baiseraele ba ileng ba iphumana ba le ho bona ha Jehova a ba bolella hore o rerile ho ba lopolla bokhobeng Egepeta. Ha Molimo a itsebahatsa ho Moshe, o ile a re: “Ke tla ba seo ke tla ba sona.” (Ex. 3:7, 8, 13, 14) Ha e le hantle, Jehova o ne a re o tla phetha karolo leha e le efe eo ho hlokahalang hore a e phethe hore a lopolle batho ba hae. Linthong tse ileng tsa etsahala ka mor’a moo esita le moo ho neng ho hlokahala, Jehova o ile a bontša Baiseraele litšobotsi tse sa tšoaneng tsa botho ba hae—a bontša hore ke Ea Matla ’Ohle, ke Moahloli, Moeta-pele, Molopolli, Mohlabani ebile ke Mofani.—Ex. 12:12; 13:21; 14:24-31; 16:4; Neh. 9:9-15.
9, 10. Ke boemo ba mofuta ofe bo ka thusang motho hore a tsebe Molimo, hona ke hobane’ng ha ho le hotle ho hopola lintho tse joalo?
9 Boemo ba hao bo fapane le ba Baiseraele ba boholo-holo. Leha ho le joalo, mohlomong ho na le lintho tse kileng tsa etsahala bophelong ba hao tse ileng tsa u kholisa hore Molimo o amehile ka uena, e leng se ileng sa matlafatsa tumelo ea hao. Mohlomong Jehova o ile a bontša ka tsela e ’ngoe e itseng hore ke Mofani, Motšelisi kapa Mosuoe. (Bala Esaia 30:20b, 21.) Kapa mohlomong u ile ua bona ka ho hlaka hore o arabetse thapelo ea hao. E ka ’na eaba u ne u tobane le bothata bo itseng, eaba Mokreste-’moho le uena oa u thusa. Kapa mohlomong ha u ntse u ithuta boinotšing u ile ua fumana mangolo a ka u thusang.
10 Haeba u ka phetela ba bang lintho tse joalo, mohlomong ba ke ke ba bona letho le ikhethang. Etsoe lintho tseo e ne e se mohlolo. Empa ho uena ke tsa bohlokoa. E, Jehova e bile seo ho hlokahalang hore a be sona molemong oa hao. Nahana ka lilemo tseo u li qetileng u le ’neteng. Na u sa hopola makhetlo ao ka ’ona u ileng ua utloa hore Jehova o hlile oa u tsotella? Haeba ho joalo, ho hopola liketsahalo tseo le kamoo u ileng ua ikutloa kateng ho ka etsa hore u boele u ikutloe u rata Jehova ka tsela eo u neng u mo rata ka eona ka nako eo. Ananela lintho tseo tsohle. Thuisa ka tsona. Li paka hore Jehova o hlile o amehile ka uena ’me ha ho motho ea ka fetolang maikutlo a hao ntlheng eo.
Itlhahlobe
11, 12. Haeba lerato leo Mokreste a ratang ’nete ka lona le se le folile, e ka ’na eaba seo se bakoa ke eng, hona Jesu o ile a fana ka keletso efe?
11 Haeba u utloa u se u sa rate Molimo le ’nete joaloka pele, sena ha se bakoe ke hore ho na le ntho e fetohileng ho Molimo. Le ka mohla Jehova ha a fetohe. (Mal. 3:6; Jak. 1:17) O ne a amehile ka uena nakong eo, le hona joale o ntse a amehile ka uena joaloka pele. Kahoo haeba ho e-na le phetoho kamanong ea hao le Jehova, ebe bothata bo hokae? Na ebe u utloa ho e-na le se u hateletseng maikutlo ’me u tšoenyehile haholo ka litaba tsa bophelo? E ka ’na eaba nakong e fetileng u ne u rapela ka tieo, u khothaletse ho ithuta, u tloaetse ho thuisa. Na ebe u ne u cheseha haholo tšebeletsong ea tšimo u bile u e-ba teng kamehla libokeng tsa phutheho ho feta kamoo u etsang kateng hona joale?—2 Bakor. 13:5.
12 Mohlomong ha u hlokomele liphetoho tsena tse bileng teng bophelong ba hao, empa haeba ua li hlokomela, li bakiloe ke eng? Na ebe ho ameha ka mabaka a utloahalang a kang ho phelisa lelapa la hao, ho hlokomela bophelo ba hao ba ’mele, kapa lintho tse joalo, li entse hore u se ke ua hlokomela hore letsatsi la Jehova le se le le haufi? Jesu o ile a re ho baapostola ba hae: “Ikeleng hloko hore le ka mohla lipelo tsa lōna li se ke tsa imeloa ke ho ja ho tlōla le ho noa haholo le matšoenyeho a bophelo, ’me ka tšohanyetso letsatsi leo la e-ba holim’a lōna hang-hang joaloka leraba. Etsoe le tla tla holim’a bohle ba lulang holim’a lefatše lohle. Joale, le lule le falimehile ka nako eohle le etsa thapeli e le hore le ka atleha ho phonyoha lintho tsena tsohle tse reretsoeng hore li etsahale.”—Luka 21:34-36.
13. Jakobo o ile a tšoantša Lentsoe la Molimo le eng?
13 Mongoli oa Bibele ea bululetsoeng Jakobo o ile a khothalletsa balumeli-’moho le eena hore ba itlhahlobe ka botšepehi ba sebelisa Lentsoe la Molimo. Jakobo o ile a re: “Le be baphethi ba lentsoe, eseng bautloi feela, le ithetsa ka monahano oa bohata. Etsoe haeba leha e le mang e le moutloi oa lentsoe, ’me e se mophethi, o joaloka motho ea talimang sefahleho sa hae sa tlhaho ka seiponeng. Kaha oa icheba, ebe oa tloha ’me kapele-pele o lebala hore na ke motho oa mofuta ofe. Empa ea nyarelang ka molaong o phethahetseng oa tokoloho le ea phehellang ho oona, motho enoa, kahobane e se moutloi ea lebalang, empa e le moetsi oa mosebetsi, o tla thaba ho o etseng ha hae.”—Jak. 1:22-25.
14, 15. (a) Bibele e ka u thusa ho ntlafatsa bomoea ba hao joang? (b) U ka nahanisisa ka lipotso life?
14 Motho a ka sebelisa seipone ho etsa bonnete ba hore o shebahala hantle. Ka mohlala, haeba monna a bona hore thae ea hae e sothehile, a ka e lokisa. Haeba mosali a bona hore moriri oa hae ha oa kameha hantle, a ka o lokisa. Ka ho tšoanang, Mangolo a re thusa hore re itlhahlobe. Haeba re ipapisa le seo Bibele e reng re lokela ho ba sona, joale re tla be re e sebelisa e le seipone. Empa ho ne ho tla thusa’ng ho icheba ka seiponeng haeba re sa lokise phoso eo re e bonang? Ho molemo hore re nke bohato ka seo re se bonang “molaong o phethahetseng” oa Molimo, re be “baphethi” ba oona. Kahoo, motho leha e le ofe ea hlokomelang hore lerato leo a neng a rata Jehova le ’nete ka lona pele le se le folile, o lokela ho ipotsa lipotso tsena: ‘Ke likhatello life tseo ke tobanang le tsona bophelong, hona ke etsa joang ha ke thulana le tsona? Ke ile ka etsa joang nakong e fetileng? Na ho na le letho le fetohileng?’ Haeba ka mor’a ho itlhahloba ka tsela eo u hlokomela mefokolo e itseng, u se ke ua iphapanyetsa eona. U se ke ua qeaqea ho etsa liphetoho haeba ho hlokahala.—Baheb. 12:12, 13.
15 Ho thuisa ka tsela e joalo ho ka boela ha u thusa hore u ipehele lipakane tsa ho hōla moeeng tseo u tla khona ho li finyella. Moapostola Pauluse o ile a fa mosebetsi-’moho le eena Timothea keletso e neng e tla mo thusa ho ntlafatsa tšebeletso ea hae. Pauluse o ile a re ho mohlankana eo: “Nahanisisa ka lintho tsena; u ikakhele ka setotsoana ho tsona, e le hore tsoelo-pele ea hao e ka bonahala ho batho bohle.” Le rōna ho ka ba molemo hore ka tataiso ea Lentsoe la Molimo re nahanisise hore na re ka hatela pele ka tsela efe.—1 Tim. 4:15.
16. Ke kotsi efe eo u lokelang ho e ela hloko ha u itlhahloba ka tataiso ea Mangolo?
16 Hlokomela hore ha u itlhahlobisisa ka botšepehi, joang kapa joang u tla fumana hore u na le mefokolo e itseng. Sena se ka ’na sa u nyahamisa, empa u se ke ua se lumella hore se u nyahamise. Etsoe sepheo sa ho itlhahloba ke hore u hlokomele moo u lokelang ho ntlafatsa teng. Ho totobetse hore Satane o batla hore Mokreste a ikutloe a se na thuso ka lebaka la mefokolo ea hae. Ha e le hantle, ho ’nile ha phehoa khang ea hore Molimo ha a natse boiteko bohle ba rōna ba ho mo sebeletsa. (Jobo 15:15, 16; 22:3) Lena ke leshano leo Jesu a ileng a le hanyetsa ka hohle-hohle; Molimo o nka e mong le e mong oa rōna e le oa bohlokoa. (Bala Matheu 10:29-31.) Ho e-na le hore ho u nyahamise, ho elelloa mefokolo ea hao ho lokela ho etsa hore u ikokobetse u be u ikemisetse ho ntlafatsa ka thuso ea Jehova. (2 Bakor. 12:7-10) Haeba ka lebaka la bokuli kapa botsofali u se u sa khone ho etsa lintho tse ling, ipehele lipakane tseo u tla khona ho li finyella, empa u se ke ua nyahama kapa ua tlohela lerato la hao hore le fole.
Re na le Lintho Tse Ngata Tseo re Lokelang ho li Ananela
17, 18. U ka rua melemo efe ha u matlafatsa lerato leo u neng u e-na le lona pele?
17 U ka rua melemo e meholo ha u ka tsoela pele ho matlafatsa lerato leo u neng u e-na le lona pele. U ka chorisa tsebo ea hao ka Molimo ua ba ua ananela tataiso ea hae e lerato haholoanyane. (Bala Liproverbia 2:1-9; 3:5, 6.) Mopesaleme o ile a re: ‘Ho boloka [liqeto tsa boahloli tsa Jehova] ho na le moputso o moholo. . . . Khopotso ea Jehova ea tšepahala, e hlalefisa ea se nang phihlelo.’ Ho feta moo, “ho thaba ba se nang molato litseleng tsa bona, ba tsamaeang molaong oa Jehova.”—Pes. 19:7, 11; 119:1.
18 Ntle ho pelaelo u tla lumela hore ho na le lintho tse ngata tseo u lokelang ho li ananela. Ua utloisisa hore na lintho tse etsahalang lefatšeng kajeno li bakoa ke eng. Litokisetso tsohle tseo Molimo a li fang batho ba hae kajeno li u tsoela molemo. Ha ho pelaelo hore u boetse u ananela hore ebe Jehova o u huletse ka phuthehong ea hae ea lefatše lohle ebile o u file tlotla ea hore u be e mong oa Lipaki tsa hae. Ananela seo u nang le sona! Ha u ka thathamisa lintho tseo kaofela, u ke ke ua qeta ho li bala. Ha ho potang hore haeba nako le nako u nahanisisa ka seo u nang le sona, seo se tla u thusa hore u latele keletso e reng: “U ’ne u tšoare ka tieo seo u nang le sona.”—Tšen. 3:11.
19. Ntle le ho thuisa ka kamano ea hao le Molimo, ho hlokahala’ng hore u lule u le matla moeeng?
19 Ntho e ’ngoe e ka u thusang hore u tšoare ka tieo seo u nang le sona ke ho thuisa kamoo tumelo ea hao e ’nileng ea matlafala kateng ho theosa le lilemo. Nako le nako makasine ena e ’nile ea re lemosa ka lintho tse ling tse hlokahalang hore re lule re le matla moeeng. Tse ling tsa tsona ke thapelo, ho ba teng kamehla libokeng tsa Bokreste le ho ba le karolo ho tsona, le ho kopanela ka cheseho mosebetsing oa boboleli. Lintho tsena li ka u thusa hore u ’ne u tsosolose lerato leo u neng u e-na le lona pele, u le nchafatse u be u le matlafatse.—Baef. 5:10; 1 Pet. 3:15; Juda 20, 21.
U ne U Tla Araba Joang?
• Mabaka a ileng a etsa hore u rate Jehova a ka u khothatsa joang hona joale?
• Ho nahanisisa ka lintho tseo u fetileng ho tsona ho theosa le lilemo ho ka etsa hore u kholisehe ka eng?
• Ke hobane’ng ha u lokela ho itlhahloba hore na u rata Molimo hakae?
[Setšoantšo se leqepheng la 23]
Ke eng e ileng ea u khahla ka ’nete ea ba ea u kholisa hore u e amohele?
[Setšoantšo se leqepheng la 25]
Na u bona ho e-na le moo u lokelang ho etsa liphetoho teng?