Ho Thusa Basali ba Bahlolohali Litekong Tsa Bona
TABA e ’ngoe e tummeng e mabapi le basali ba bahlolohali ke tlaleho ea Bibele ea Ruthe le matsal’ae Naomi. Basali bana ka bobeli e ne e le bahlolohali. Leha ho le joalo, Naomi o ile a shoelloa ke monna hammoho le bara ba babeli, bao e mong oa bona e neng e le monna oa Ruthe. Kaha ba ne ba lula sechabeng sa balemi se neng se itšetlehile haholo ka banna, ruri boemo ba bona bo ne bo le bohloko.—Ruthe 1:1-5, 20, 21.
Leha ho le joalo, Ruthe, ngoetsi ea Naomi, e ne e le motsoalle le motšelisi oa hae ea ikhethang, ea ileng a hana ho arohana le eena. Ha nako e ntse e feta, Ruthe o ile a ba “molemo [ho Naomi] ho feta bara ba supileng”—eseng feela ka lebaka la lerato la hae le tebileng ho Naomi empa hape ka lebaka la lerato la hae ho Molimo. (Ruthe 4:15) Ha Naomi a ne a eletsa Ruthe hore a khutlele lapeng habo le metsoalleng ea hae ea Bamoabe, Ruthe o ile a araba ka polelo e amang maikutlo ka ho fetisisa e bontšang botšepehi e kileng ea tlalehoa: “Ke tla ea moo u eang teng, ’me ke tla hlola bosiu moo u hlolang bosiu teng. Batho ba heno e tla ba batho ba heso, ’me Molimo oa hao e tla ba Molimo oa ka. Ke tla shoela moo u shoelang teng, ’me ke hona moo ke tla pateloa teng. E se eka Jehova a ka nketsa joalo ’me a ekelletsa ho seo haeba ntho leha e le efe haese lefu e ka hlahisa karohano pakeng tsa ka le uena.”—Ruthe 1:16, 17.
Jehova Molimo o ile a hlokomela boikutlo ba Ruthe. O ile a hlohonolofatsa lelapa le lenyenyane la Naomi le Ruthe, ’me qetellong Ruthe a nyaloa ke Boaze oa Moiseraele. Ngoana oa bona, eo e ileng ea e-ba moholo-holo oa Jesu Kreste, o ile a hlokomeloa ke Naomi joalokaha eka ke mora oa hae. Histori ena ke mohlala oa kamoo Jehova ka lerato a hlokomelang basali ba bahlolohali ba mo atamelang le ba mo tšepang. Ho feta moo, Bibele e re bolella hore o nka hore ba thusang basali ba bahlolohali ka lerato litekong tsa bona ke ba bohlokoa. Ka hona, kajeno re ka thusa basali ba bahlolohali ba ka har’a rōna joang?—Ruthe 4:13, 16-22; Pesaleme ea 68:5.
Thuso e Tobileng, Empa e se e Hatellang
Ha motho a ithaopela ho thusa mohlolohali, ho molemo ka ho fetisisa ho hlakisa taba le ho e toba empa a se ke a mo hatella. Qoba lipolelo tse sa hlakang tse kang, “U mpolelle haeba ho e-na le seo u se hlokang.” Seo se ne se tla tšoana le ho re, ‘U futhumale ’me u khore’ ho motho ea hatsetseng le ea lapileng ebe ha u etse letho ho mo thusa. (Jakobo 2:16) Batho ba bangata ha ba kōpe thuso ha ba hloka ntho e itseng; ho e-na le hoo, ba shoella holimo. Hore re thuse ba joalo ho hlokahala hore re be le temoho re be re hlokomele seo ba se hlokang. Ka lehlakoreng le leng, ho hatella—ho laola bophelo ba mosali oa mohlolohali—ho ka ’na ha fella ka hore a utloe bohloko kapa le hohlane. Kahoo, Bibele e hatisa hore ho hlokahala hore re be ba itekanetseng litšebelisanong tsa rōna le ba bang. Ha e re khothalletsa ho thahasella batho re se na boithati, e re hopotsa hore re se ke ra ba bo-ntšunya-khare.—Bafilipi 2:4; 1 Petrose 4:15.
Ruthe o ile a bontša hore o na le maikutlo a joalo a itekanetseng mabapi le Naomi. Le hoja Ruthe a ne a khomaretse ’m’ae matsale ka botšepehi, o ne a sa mo hatelle kapa hona ho mo laola. O ne a nka bohato ka bohlale, joaloka tabeng ea ho fumanela eena le Naomi lijo, empa o ne a boetse a latela litaelo tsa Naomi.—Ruthe 2:2, 22, 23; 3:1-6.
Ka sebele, se hlokahalang se ka ’na sa fapana haholo ho ea ka batho. Sandra, eo ho buuoeng ka eena pejana, o re: “Ke ne ke e-na le seo ke neng ke se hloka ha ke tsielehile—metsoalle e ratehang le e lerato e neng e mpotolohile.” Ka lehlakoreng le leng, Elaine, eo ho buuoeng ka eena pejana, o ne a batla ho ba mong. Ka lebaka leo, ho ba ea thusang ho bolela ho ba le temoho le ho khetholla lipakeng tsa ho hlompha boinotši ba motho e mong le ho ba teng ho mo thusa ha a u hloka.
Thuso ea Lelapa
Lelapa le mofuthu le le lerato, haeba le le teng, le ka etsa ho hongata ho kholisa mosali oa mohlolohali hore o tla khona ho sebetsana le boemo ba hae ka katleho. Le hoja litho tse ling tsa lelapa li ka ’na tsa khona ho ithaopela ho thusa haholoanyane ho feta tse ling, bohle ba ka kenya letsoho. “Haeba mohlolohali leha e le ofe a e-na le bana kapa litloholo, bana ba ke ba ithute pele ho tloaela ho sebelisa boinehelo ba bomolimo ho ba ntlo ea bona le ho ’na ba lefa puseletso e loketseng ho batsoali le batsoali ba batsoali ba bona, kaha hona hoa khahlisa mahlong a Molimo.”—1 Timothea 5:4.
Maemong a mangata, ho ka ’na ha se ke ha hlokeha thuso ea chelete kapa “puseletso.” Basali ba bang ba bahlolohali ba na le chelete e lekaneng bakeng sa seo ba se hlokang ’me ba bang baa tšoaneleha hore ’muso o ba fumantše thuso ea chelete, e fumanehang linaheng tse ling. Empa moo basali ba bahlolohali ba hlokang, litho tsa lelapa li lokela ho thusa. Haeba mosali oa mohlolohali a se na beng ka eena ba haufi ba ka ithaopelang ho mo thusa kapa eba beng ka eena ba joalo ha ba khone ho thusa, Mangolo a khothalletsa balumeli-’moho le eena ho mo thusa: “Mofuta oa borapeli o hloekileng le o sa silafalang ponong ea Molimo le Ntate oa rōna ke ona: ho hlokomela likhutsana le bahlolohali matšoenyehong a bona.”—Jakobo 1:27.
Ba sebelisang melao-motheo ena ea Bibele ka sebele ba “hlompha bahlolohali.” (1 Timothea 5:3) Ha e le hantle, ho hlompha motho ho bolela ho mo tlotla. Batho ba bontšoang tlhompho ba ikutloa hore baa ananeloa, ba nkoa e le ba bohlokoa ebile ba e-na le seriti. Ha ba na boikutlo ba hore ba bang ba ba thusa feela hobane ba tlameha ho etsa joalo. Le hoja Ruthe ka boeena e ne e le mohlolohali ka nako e itseng, o ile a hlompha Naomi e le kannete ka hore ka boikemisetso le ka ho rata a tiisehe hore o lokisetsa Naomi seo a se hlokang ’meleng le maikutlong. Ha e le hantle, boitšoaro ba Ruthe bo ile ba etsa hore a be le botumo bo botle kapele, hoo monna ea neng a tla mo nyala a ileng a re ho eena: “E mong le e mong motseng oa batho ba heso oa hlokomela hore u mosali ea khabane ka ho fetisisa.” (Ruthe 3:11, NW, mongolo o botlaaseng ba leqephe) Ka nako e tšoanang, lerato la Naomi ho Molimo, botho ba hae ba ho se batle ntho li hana ho fela le kananelo ea hae e tebileng bakeng sa boiteko ba Ruthe ba ho mo etsetsa lintho, ha ho pelaelo hore li ile tsa etsa hore Ruthe a mo thuse ka thabo. Naomi ke mohlala o motle hakaakang ho basali ba bahlolohali kajeno!
Atamela Haufi le Molimo
Ho hlakile hore litho tsa lelapa le metsoalle li ke ke tsa koala sekheo se siiloeng ke lefu la molekane. Ka lebaka lena ke habohlokoa hore motho ea shoetsoeng ka ho khetheha a atamele haufi le “Ntate oa mehauhelo e bonolo le Molimo oa matšeliso ’ohle, ea re tšelisang matšoenyehong ’ohle a rōna.” (2 Bakorinthe 1:3, 4) Nahana ka mohlala oa Anna, mohlolohali ea khothetseng ea neng a le lilemo li 84 nakong ea tsoalo ea Jesu.
Ha monna oa Anna a e-shoa ka mor’a lilemo tse supileng ba nyalane, o ile a batla matšeliso ho Jehova. “Le ka mohla [o ne] a sa hlokoe tempeleng, a etsa tšebeletso e halalelang bosiu le motšehare ka ho itima lijo le lithapeli.” (Luka 2:36, 37) Na Jehova o ile a nka khato ka boinehelo ba bomolimo ba Anna? E! O ile a bontša lerato la hae ho eena ka tsela e khethehileng haholo ka ho mo lumella ho bona ngoana ea neng a tla hōla ho fihlela e e-ba Mopholosi oa lefatše. See se ile sa thabisa le ho tšelisa Anna hakaakang! Ho hlakile hore o ile a iponela ’nete ea Pesaleme ea 37:4 ha e re: “U ithabele ka ho phethehileng ho Jehova, o tla u fa tseo pelo ea hao e li kōpang.”
Molimo o Sebetsa ka Bakreste-’moho le Rōna
Elaine o re: “Ke bile le lehlaba ka nako e telele ka mor’a lefu la David, e ne eka thipa e likoloha likhopong tsa ka. Ke ne ke nahana hore ke tšilo e sa sebetseng hantle. Ka letsatsi le leng le ile la e-ba bohloko hoo ke ileng ka nahana hore ke tlameha ho ea ngakeng. Morali’eso oa moea eo e neng e bile e le motsoalle ea nang le temoho o ile a etsa tlhahiso ea hore e ka ’na eaba ke kulisoa ke ho sareloa ’me a nkhothalletsa ho kōpa thuso le matšeliso ho Jehova. Ke ile ka sebelisa keletso ea hae hona hoo eaba ke etsa thapelo e tlohang botebong ba pelo ke khutsitse, ka kōpa hore Jehova a ’matlafatse ho sareloeng ha ka. O ile a ho etsa!” Elaine o ile a qala ho ikutloa eka oa fola, ’me kapele ka mor’a moo esita le lehlaba la hae le ile la nyamela.
Ka ho khetheha baholo ba phutheho ba ka iketsa metsoalle ka tsela e mosa ho basali ba bahlolohali ba saretsoeng. Ka hore kamehla ba fane ka thuso ea moea le matšeliso ka tsela e masene le e bontšang temoho, baholo ba ka ba thusa ho ba haufi le Jehova ho sa tsotellehe liteko tsa bona. Ha ho hlokahala, baholo ba ka boela ba thusa ho lokisetsa thuso ea lintho tse bonahalang. Baholo ba joalo ba nang le kutloelo-bohloko le temoho ka sebele e ba “sebaka sa ho ipatela moea.”—Esaia 32:2; Liketso 6:1-3.
Matšeliso a Kamehla a Tsoang ho Morena e Mocha oa Lefatše
Motho eo Anna ea hōlileng a ileng a thabela ho mo bona lilemong tse ka bang likete tse peli tse fetileng hona joale ke Morena oa Bomesia oa ’Muso oa Molimo oa leholimo. ’Muso ona o tla tloha o felisa lisosa tsohle tsa masoabi, ho akarelletsa le lefu. Tabeng ena, Tšenolo 21:3, 4 e re: “Bonang! Tente ea Molimo e ho moloko oa batho . . . O tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.” Na u eleletsoe hore temana ee e bua ka “moloko oa batho”? E, batho ba tla lokolloa lefung le linthong tseo le li bakang e leng ho siama le ho bokolla.
Empa ho na le litaba tse molemo le ho feta! Bibele e boetse e tšepisa tsoho ea bafu. “Hora ea tla eo ka eona bohle ba mabitleng a khopotso ba tla utloa lentsoe la hae [Jesu] ’me ba tsoe.” (Johanne 5:28, 29) Joaloka Lazaro, eo Jesu a ileng a mo tsosa bafung, ba tla tsoa e le batho ba nama, eseng libōpuoa tsa moea. (Johanne 11:43, 44) Ba ‘etsang lintho tse molemo’ ka mor’a moo, ho tla etsoa hore ba phethahale ’me ba tla ba tlas’a tlhokomelo ea Jehova ea botsoali ha a ntse a ‘fuparolla seatla sa hae a khotsofatsa takatso ea ntho e ’ngoe le e ’ngoe e phelang.’—Pesaleme ea 145:16.
Ba shoetsoeng ke baratuoa, ’me ba lumela tšepong ena e tiileng, ba e fumana e le mohloli oa matšeliso a maholo. (1 Bathesalonika 4:13) Ka hona, haeba u mosali oa mohlolohali, u hle u ‘rapele u sa phetse,’ u rapelle matšeliso le thuso tseo u li hlokang letsatsi le letsatsi e le hore u jare maima a mefuta e sa tšoaneng. (1 Bathesalonika 5:17; 1 Petrose 5:7) U nke nako e itseng letsatsi le letsatsi u bala Lentsoe la Molimo e le hore u ka tšelisoa ke mehopolo ea Molimo. Haeba u etsa lintho tsena, u tla bona hore ho sa tsotellehe liteko tsohle le liphephetso tseo u talimanang le tsona joaloka mosali oa mohlolohali, ka sebele Jehova a ka u thusa ho fumana khotso.
[Ntlha e Qolotsoeng e leqepheng la 5]
Ho ba ea thusang ho bolela ho khetholla lipakeng tsa ho hlompha boinotši ba motho e mong le ho ba teng ha a u hloka
[Setšoantšo se leqepheng la 7]
Molimo o ile a hlohonolofatsa Anna mohlolohali ea hōlileng