Lipotso Tse Tsoang ho Babali
Na ho nepahetse ho bolela hore toka ea Jehova e bebofatsoa ke mohau?
Le hoja polelo ena e ’nile ea sebelisoa, ho molemo ho e qoba hobane e fana ka maikutlo a hore mohau oa Jehova o nolofatsa kapa o khina toka ea hae, joalokaha eka mohau o phahametse tšobotsi e thata ea toka. Sena ha sea nepahala.
Lentsoe la Seheberu le fetoletsoeng e le “toka” ho Phetolelo ea Lefatše le Lecha, le ka boetse la bolela “kahlolo.” Toka e amana haufi-ufi le ho loka. Leha ho le joalo, hangata toka e na le moelelo oa molao. Empa ha ho joalo ka ho loka. Ke ’nete hore toka ea Jehova e ka akarelletsa ho fana ka kotlo e tšoanelang, empa e ka boela ea akarelletsa poloko ea bohle ba tšoanelehang. (Genese 18:20-32; Esaia 56:1; Malakia 4:2) Ka lebaka leo, toka ea Jehova ha ea lokela ho nkoa joalokaha eka e thata kapa joalokaha eka e lokela ho nolofatsoa.
Lentsoe la Seheberu bakeng sa “mohau” le ka bolela ho qoba ho liha kahlolo. Le ka boela la bolela ho bontša qenehelo ka liketso, ho imolla ea hlokang.—Deuteronoma 10:18; Luka 10:29-37.
Jehova ke Molimo oa toka le mohau. (Exoda 34:6, 7; Deuteronoma 32:4; Pesaleme ea 145:9) Toka ea hae le mohau oa hae ka bobeli li phethahetse ebile lia sebelisana. (Pesaleme ea 116:5; Hosea 2:19) Litšobotsi tsena ka bobeli lia leka-lekana kapa lia tlatsana. Kahoo, haeba re ne re ka re toka ea Jehova e bebofatsoa ke mohau oa hae, re ne re tla tlameha ho boela re re mohau oa hae o bebofatsoa ke toka ea hae.
Esaia o ile a profeta: “Jehova o tla lebella hore a le bontše mohau, ka hona o tla ema hore a le bontše mohau. Etsoe Jehova ke Molimo oa kahlolo [“toka,” The New English Bible].” (Esaia 30:18) Mona Esaia o bontša hore toka ea Jehova e susumetsa liketso tsa mohau ho e-na le hore mohau oa hae o nolofatsa kapa o khina toka ea hae. Jehova o bontša mohau hobane o lokile ebile o lerato.
Ke ’nete, mongoli oa Bibele Jakobo o ile a ngola a re: “Mohau o thaba ka ho fetisisa ka tlhōlo ho feta kahlolo.” (Jakobo 2:13b) Leha ho le joalo, moelelong oa taba Jakobo ha a bue ka Jehova empa ka Bakreste ba bontšang mohau—ka mohlala, ba bontšang mohau ho ba mahlomoleng le ba futsanehileng. (Jakobo 1:27; 2:1-9) Mohlang ho ahloloang bana ba mohau, Jehova o ela hloko boitšoaro ba bona ’me o ba tšoarela ka mohau motheong oa sehlabelo sa Mor’a hae. Kahoo, mohau oa bona o phahamela kahlolo efe kapa efe e bohloko eo mohlomong e neng e ba lokela.—Liproverbia 14:21; Matheu 5:7; 6:12; 7:2.
Ka lebaka leo, ha hoa lokela ho bolela hore toka ea Jehova e bebofatsoa ke mohau ka kutloisiso ea hore toka ea hae e lokela ho nolofatsoa ke mohau. Ho Jehova litšobotsi tsena ka bobeli lia lekana. Li leka-lekana joalokaha li leka-lekanya litšobotsi tse ling tsa Jehova, tse kang lerato le bohlale, ’me le tsona li leka-lekanngoa ke tsona.