Ho sa Tsotellehe Liteko, Khomarela Tumelo ea Hao!

“Ho nkeng e le thabo feela, barab’eso, ha le thulana le liteko tse sa tšoaneng.”—JAKOBO 1:2.

 1. Batho ba Jehova ba mo sebeletsa ka tumelo le ka ‘thabo ea pelo’ ho sa tsotellehe eng?

BATHO ba Jehova ba sebeletsa e le Lipaki tsa hae tse nang le tumelo ho eena le ‘thabo ea pelo.’ (Deuteronoma 28:47; Esaia 43:10) Ba etsa sena le hoja ba hlaseloa ke liteko tse ngata. Ho sa tsotellehe mathata a bona, ba fumana matšeliso mantsoeng ana: “Ho nkeng e le thabo feela, barab’eso, ha le thulana le liteko tse sa tšoaneng, joalokaha le hlile le tseba hore tšobotsi ena e lekiloeng ea tumelo ea lōna e hlahisa mamello.”—Jakobo 1:2, 3.

 2. Ke’ng se tsejoang ka mongoli oa lengolo la Jakobo?

² Polelo eo e ile ea ngoloa ke morutuoa Jakobo, ngoan’abo Jesu Kreste ka ’mè oa bona, hoo e ka bang ka 62 C.E. (Mareka 6:3) Jakobo e ne e le moholo phuthehong ea Jerusalema. Ha e le hantle, eena, Kefase (Petrose) le Johanne ‘ba ne ba bonahala e le litšiea’—batšehetsi ba phutheho ba matla, ba tiileng. (Bagalata 2:9) Ha taba ea lebollo e ne e tlisoa ho “baapostola le banna ba baholo” hoo e ka bang ka 49 C.E., Jakobo o ile a etsa tlhahiso e utloahalang e thehiloeng Mangolong e ileng ea sebelisoa ke sehlopha seo se busang sa lekholong la pele la lilemo.—Liketso 15:6-29.

 3. Mathata a mang ao Bakreste ba lekholong la pele la lilemo ba neng ba talimane le ’ona ke afe, ’me re ka fumana molemo o moholohali joang lengolong la Jakobo?

³ Joaloka molisa oa moea ea amehileng, Jakobo o ne a ‘tseba ponahalo ea mohlape.’ (Liproverbia 27:23) O ile a hlokomela hore ka nako eo Bakreste ba ne ba talimane le liteko tse matla. Ho ne ho hlokahala hore monahano oa ba bang o lokisoe, hobane ba ne ba rata barui ka tsela e nang le khethollo. Ho ba bangata, borapeli e ne e le tloaelo feela tjee. Ba bang ba ne ba baka kotsi ka maleme a bona a sa laoleheng. Moea oa lefatše o ne o e-ba le liphello tse senyang, ’me ba bang ba ne ba fela pelo ebile ba sa rapele kamehla. Ha e le hantle, Bakreste ba itseng ba ne ba kula moeeng. Lengolo la Jakobo le sebetsana le litaba tse joalo ka tsela e hahang, ’me keletso ea hae ea sebetsa kajeno joalokaha e ne e sebetsa lekholong la pele la lilemo C.E. Re tla rua molemo o moholo haeba re nka lengolo lena e le le ngoletsoeng rōna ka ho toba.a

Ha re Thulana le Liteko

 4. Re lokela ho talima liteko joang?

⁴ Jakobo o re bontša kamoo re lokelang ho talima liteko kateng. (Jakobo 1:1-4) A sa re letho ka kamano ea hae ea nama le Mora oa Molimo, ka boikokobetso o ipitsa “lekhoba la Molimo le la Morena Jesu Kreste.” Jakobo o ngolla “meloko e leshome le metso e ’meli” ea Iseraele ea moea e “hasa-hasaneng,” qalong ka lebaka la mahloriso. (Liketso 8:1; 11:19; Bagalata 6:16; 1 Petrose 1:1) Joaloka Bakreste, le rōna rea hlorisoa, ’me re “thulana le liteko tse sa tšoaneng.” Empa haeba re hopola hore ha re mamella liteko tumelo ea rōna ea matlafala, re tla ‘ho nka e le thabo feela’ ha li re hlahela. Haeba re lula re tšepahala ho Molimo nakong ea liteko, sena se tla re tlisetsa thabo e tšoarellang.

 5. Liteko tsa rōna li ka ’na tsa akarelletsa eng, ’me ho etsahala’ng ha re li mamella ka katleho?

⁵ Liteko tsa rōna li akarelletsa mahlomola a tloaelehileng molokong oa batho. Ka mohlala, re ka hlaseloa ke ho kula. Hona joale Molimo ha a etse liphekolo tsa mohlolo, empa o araba lithapelo tsa rōna bakeng sa bohlale le matla a hlokahalang bakeng sa ho sebetsana le ho kula. (Pesaleme ea 41:1-3) Hape re utloa bohloko ka lebaka la ho loka re le Lipaki tsa Jehova tse hlorisoang. (2 Timothea 3:12; 1 Petrose 3:14) Ha re mamella liteko tse joalo ka katleho, tumelo ea rōna e bonahala e le ea sebele, e ba eo ‘tšobotsi ea eona e lekiloeng.’ ’Me ha tumelo ea rōna e hlōla, “e hlahisa mamello.” Tumelo e matlafalitsoeng ka liteko e tla re thusa ho mamella liteko tsa nako e tlang.

 6. ‘Mosebetsi oa mamello e ba o feletseng’ joang, ’me re ka nka mehato efe e sebetsang ha re le tlas’a teko?

⁶ Jakobo o re: “Empa mamello mosebetsi oa eona a e be o feletseng.” Haeba re lumella teko ho tsoela pele re sa leke ho e felisa kapele ka mekhoa eo e seng ea Mangolo, mamello e tla etsa “mosebetsi” oa ho re etsa ba feletseng joaloka Bakreste, re sa haelloe tumelong. Ka sebele, haeba teko e senola bofokoli bo itseng, re lokela ho batla thuso ea Jehova hore re bo hlōle. Ho thoe’ng haeba teko e le moleko oa ho kopanela boitšoarong bo bobe ba likamano tsa botona le botšehali? A re rapeleng mabapi le bothata boo ebe re sebetsa tumellanong le lithapelo tsa rōna. Ho ka ’na ha hlokahala hore re fetole mosebetsi oa rōna kapa re nke mehato e meng hore re boloke botšepehi ho Molimo.—Genese 39:7-9; 1 Bakorinthe 10:13.

Ho Kōpa Bohlale

 7. Re ka thusoa joang hore re sebetsane le liteko?

⁷ Jakobo o re bontša seo re ka se etsang haeba re sa tsebe mokhoa oa ho sebetsana le teko e itseng. (Jakobo 1:5-8) Jehova a ke ke a re nyatsa ha re hloka bohlale ’me re bo rapella ka tumelo. O tla re thusa ho talima teko ka ho loketseng le ho e mamella. Balumeli-’moho le rōna ba ka ’na ba lebisa tlhokomelo ea rōna Mangolong kapa ra a hlokomela ha re ithuta Bibele. Liketsahalo tse bileng teng ka tataiso ea Molimo li ka ’na tsa re nolofalletsa ho bona seo re lokelang ho se etsa. Re ka ’na ra tataisoa ke moea oa Molimo. (Luka 11:13) Hore re thabele melemo e joalo, re lokela ho tloaela ho khomarela Molimo le batho ba hae.—Liproverbia 18:1.

 8. Ke hobane’ng ha ea belaelang a ke ke a amohela letho ho Jehova?

⁸ Jehova o re fa bohlale ba ho sebetsana le liteko ka katleho haeba re ‘ntse re tsoela pele ho kōpa ka tumelo, re sa belaele ho hang.’ Ea belaelang “o joaloka leqhubu la leoatle le khannoang ke moea le le fefoleloang koana le koana” ka mokhoa o ke keng oa tsejoa esale pele. Haeba re ne re sa tsitsa joalo moeeng, ‘re se ke ra nahana hore re tla amohela ntho leha e le efe ho Jehova.’ A re se keng ra ba ba “hlōlehang ho etsa qeto” le ba “sa tsitsang” thapelong kapa ka litsela tse ling. Ho e-na le hoo, a re beng le tumelo ho Jehova, Mohloli oa bohlale.—Liproverbia 3:5, 6.

Ba Ruileng le ba Futsanehileng ba ka Thaba

 9. Ke hobane’ng ha re e-na le lebaka la ho thaba re le barapeli ba Jehova?

⁹ Esita le haeba bofutsana ke e ’ngoe ea liteko tsa rōna, a re hopoleng hore Bakreste ba ruileng le ba futsanehileng ba ka thaba. (Jakobo 1:9-11) Pele e e-ba balateli ba Jesu, batlotsuoa ba bangata ba ne ba e-na le lintho tse bonahalang tse fokolang ’me lefatše le ne le ba nyelisa. (1 Bakorinthe 1:26) Empa ba ne ba ka thabela ‘ho phahamisetsoa’ boemong ba ho ba majalefa a ’Muso. (Baroma 8:16, 17) Ho fapana le hoo, barui ba kileng ba hlomphuoa baa “kokobetsoa” ha e se e le balateli ba Kreste ka lebaka la ho nyelisoa ke lefatše. (Johanne 7:47-52; 12:42, 43) Leha ho le joalo, re le bahlanka ba Jehova kaofela ha rōna re ka thaba hobane leruo la lefatše le boemo bo phahameng hase letho ha li bapisoa le maruo a moea ao re a thabelang. ’Me re leboha hakaakang hore ebe ho ikhohomosa ka lebaka la boemo bo itseng sechabeng ha ho na sebaka har’a rōna!—Liproverbia 10:22; Liketso 10:34, 35.

10. Mokreste o lokela ho talima leruo la lintho tse bonahalang joang?

¹⁰ Jakobo o re thusa ho bona hore bophelo ba rōna ha boa itšetleha ka leruo le lintho tsa lefatše tseo re li finyellang. Joalokaha botle ba palesa bo ke ke ba e thibela ho shoa ‘mochesong o bataolang’ oa letsatsi, le leruo la morui le ke ke la lelefatsa bophelo ba hae. (Pesaleme ea 49:6-9; Matheu 6:27) A ka ’na a shoa a ntse a phehella ‘litsela tsa hae tsa bophelo,’ mohlomong a le khoebong. Kahoo, ntho ea bohlokoa ke ho “ruela ho Molimo” le ho etsa sohle seo re ka se khonang ho ntšetsa lithahasello tsa ’Muso pele.—Luka 12:13-21; Matheu 6:33; 1 Timothea 6:17-19.

Ho Thaba ba Mamellang Teko

11. Ba khomarelang tumelo ea bona ha ba talimane le liteko ba na le litebello life?

¹¹ Ebang re ruile kapa re futsanehile, re ka thaba hafeela re mamella liteko tsa rōna. (Jakobo 1:12-15) Haeba re mamella liteko tumelo ea rōna e sa ameha, re ka boleloa re le ba thabileng, hobane ho etsa se nepahetseng mahlong a Molimo ho tlisa thabo. Ka ho khomarela tumelo ea bona ho isa lefung, Bakreste ba tsoetsoeng ka moea ba amohela “moqhaka oa bophelo,” e leng ho se shoe maholimong. (Tšenolo 2:10; 1 Bakorinthe 15:50) Haeba re na le tšepo ea lefatšeng ’me re boloka tumelo ea rōna ho Molimo, re ka lebella bophelo bo sa feleng lefatšeng la paradeise. (Luka 23:43; Baroma 6:23) Jehova o molemo hakaakang ho bohle ba sebelisang tumelo ho eena!

12. Ha re thulana le mahlomola, ke hobane’ng ha re sa lokela ho re: “Ke ntse ke lekoa ke Molimo”?

¹² Na ho ka etsahala hore Jehova a re leke ka mahlomola? Che, ha rea lokela ho re: “Ke ntse ke lekoa ke Molimo.” Jehova ha a leke ho re susumelletsa ho etsa sebe empa ntle ho pelaelo o tla re thusa ’me a re fe matla a hlokahalang bakeng sa ho mamella liteko haeba re lula re tiile tumelong. (Bafilippi 4:13) Molimo oa halalela, ka hona ha a re kenye maemong a neng a ka fokolisa matla a rōna a ho hanela liketso tse mpe. Haeba re ikenya boemong bo bontšang ho se tšabe Molimo ’me re etsa sebe se itseng, ha rea lokela ho mo beha molato, “etsoe Molimo a ke ke a lekoa ka lintho tse mpe leha e le hore eena ka boeena o leka leha e le mang ka tsona.” Le hoja Jehova a ka lumella teko hore e re laee molemong oa rōna, ha a re leke ka sepheo se sebe. (Baheberu 12:7-11) Satane a ka ’na a re leka hore re etse bobe, empa Molimo a ka re lokolla ho eo ea khopo.—Matheu 6:13.

13. Ho ka etsahala eng haeba re sa leleke takatso e fosahetseng?

¹³ Ho hlokahala hore re be ba rapelang kamehla hobane boemo bo itseng bo ka lebisa takatsong e fosahetseng e ka re susumelletsang ho etsa sebe. Jakobo o re: “E mong le e mong o lekoa ke ho huloa le ho ekoa ke takatso ea hae.” Re ke ke ra beha Molimo molato bakeng sa sebe sa rōna haeba re lumeletse lipelo tsa rōna ho lohotha takatso ea boetsalibe. Haeba re sa leleke takatso e fosahetseng, ‘ea emara,’ ea hōla ka pelong, ’me e “tsoala sebe.” Ha sebe se phethehile, se “hlahisa lefu.” Ho totobetse hore ho hlokahala hore re lebele lipelo tsa rōna ’me re hanele litšekamelo tsa boetsalibe. (Liproverbia 4:23) Kaine o ile a lemosoa hore sebe se ne se tla tloha se mo hlōla, empa ha aa ka a se hanela. (Genese 4:4-8) Ka hona he, ho thoe’ng haeba re qala ho phehella tsela eo e seng ea Mangolo? Ka sebele re lokela ho leboha haeba baholo ba Bakreste ba leka ho re khutlisetsa tseleng e le hore re se ke ra siteloa Molimo.—Bagalata 6:1.

Molimo—Mohloli oa Lintho Tse Molemo

14. Ke ka kutloisiso efe ho ka boleloang hore limpho tsa Molimo li ‘phethahetse’?

¹⁴ Re lokela ho hopola hore Jehova ke Mohloli oa lintho tse molemo, eseng oa liteko. (Jakobo 1:16-18) Jakobo o bua le balumeli-’moho le eena e le “barab’eso ba ratoang” ’me o bontša hore Molimo ke Mofani oa ‘mpho e ’ngoe le e ’ngoe e molemo le neo e phethahetseng.’ Limpho tsa Jehova tsa moea le tsa nama li ‘phethahetse,’ kapa li feletse, ha li haelloe ke letho. Li tsoa “holimo,” sebakeng seo Molimo a lulang ho sona maholimong. (1 Marena 8:39) Jehova ke “Ntate oa maseli a leholimo”—letsatsi, khoeli le linaleli. O boetse o re fa leseli la moea le ’nete. (Pesaleme ea 43:3; Jeremia 31:35; 2 Bakorinthe 4:6) Ho fapana le letsatsi le etsang hore meriti e fetohe ha le ntse le tsamaea ’me le e-ba boemong bo holimo-limo motšehare o moholo feela, Molimo o boemong bo phahameng ka ho fetisisa ka linako tsohle tabeng ea ho fana ka se molemo. Ka sebele o tla re hlomella bakeng sa ho talimana le liteko haeba re sebelisa ka ho feletseng litokisetso tsa hae tsa moea tse fanoang ka Lentsoe la hae le “lekhoba le tšepahalang le le masene.”—Matheu 24:45.

15. E ’ngoe ea limpho tsa Jehova tse molemohali ke efe?

¹⁵ E ’ngoe ea limpho tsa Molimo tse ntlehali ke efe? Ho tsoaloa ha bara ba moea ka moea o halalelang, ba sebetsang tumellanong le litaba tse molemo, kapa “lentsoe la ’nete.” Ba tsoaloang ka moea ke “litholoana tse itseng tsa pele,” tse khethiloeng har’a moloko oa batho hore e be “’muso le baprista.” (Tšenolo 5:10; Baefese 1:13, 14) E ka ’na eaba Jakobo o ne a ntse a nahana ka litholoana tsa pele tsa harese tse ileng tsa nyeheloa ka la 16 Nisane, e leng letsatsi leo Jesu a ileng a tsoha ka lona, le ka ho nyeheloa ha mahobe a mabeli a koro ka letsatsi la Pentekonta, ha ho ne ho tšolloa moea o halalelang. (Levitike 23:4-11, 15-17) Tabeng eo, Jesu e ne e tla ba litholoana tsa pele ’me majalefa hammoho le eena e ne e tla ba “litholoana tse itseng tsa pele.” Ho thoe’ng haeba re na le tšepo ea lefatšeng? Ha e le hantle, ho lula re nahana ka eona ho tla re thusa ho khomarela tumelo ea rōna ho Mofani oa “mpho e ’ngoe le e ’ngoe e molemo,” ea entseng hore ho be le bophelo bo sa feleng tlas’a puso ea ’Muso.

E-ba ‘Mophethi oa Lentsoe’

16. Ke hobane’ng ha re lokela ho ‘potlaka mabapi le ho utloa empa re liehe mabapi le ho bua le khalefo’?

¹⁶ Ebang hona joale re thulana le liteko tsa tumelo ea rōna kapa che, re lokela ho ba “baphethi ba lentsoe.” (Jakobo 1:19-25) Ho hlokahala hore re ‘potlake mabapi le ho utloa’ lentsoe la Molimo, re be baphethi ba lona ba mamelang. (Johanne 8:47) Ka lehlakoreng le leng, a re beng ba “liehang mabapi le ho bua,” re be hlokolosi mabapi le seo re se buang. (Liproverbia 15:28; 16:23) Ho ka etsahala hore ebe Jakobo o re phehella hore re se potlakele ho re liteko tsa rōna li tsoa ho Molimo. Hape re eletsoa ho ba ba “liehang mabapi le khalefo; kaha khalefo ea motho ha e hlahise ho loka ha Molimo.” Haeba re halefisoa ke seo motho e mong a se buang, a re beng ba “liehang” ho nka bohato e le hore re qobe karabo e tletseng boiphetetso. (Baefese 4:26, 27) Moea oa khalefo o ka ’nang oa re bakela mathata ’me ea e-ba teko ho ba bang o ke ke oa hlahisa seo tumelo ho Molimo oa rōna ea lokileng e se hlokang ho rōna. Ntle le moo, haeba re “na le temoho e ngata,” re tla ba ba “liehang mabapi le khalefo,” ’me bara le barali babo rōna ba tla huleloa ho rōna.—Liproverbia 14:29, NW.

17. Ho finyelloa eng ka ho tlosa bobe pelong le kelellong?

¹⁷ Ka sebele re batla ho lokoloha ‘litšileng tsohle’—nthong e ’ngoe le e ’ngoe e manyala ho Molimo le e susumelletsang khalefong. Ho feta moo, re lokela ho ‘lahla ntho eo e ngata haholo, bobe.’ Kaofela ha rōna re lokela ho tlosa ho se hloeke leha e le hofe ha nama kapa ha moea bophelong ba rōna. (2 Bakorinthe 7:1; 1 Petrose 1:14-16; 1 Johanne 1:9) Ho tlosa bobe pelong le kelellong ho ile ha re thusa hore re “amohele ka bonolo ho hlongoa ha lentsoe” la ’nete. (Liketso 17:11, 12) Ho sa tsotellehe hore na ke nako e telele hakae re le Bakreste, re lokela ho tsoela pele ho etsa hore ’nete e eketsehileng ea Mangolo e hlongoe ka ho rōna. Hobane’ng? Hobane ka moea oa Molimo, lentsoe le hlonngoeng le hlahisa “botho bo bocha” bo lebisang polokong.—Baefese 4:20-24.

18. Motho eo e leng moutloi feela oa lentsoe o fapana joang le eo e boetseng e leng mophethi oa lona?

¹⁸ Re bontša joang hore lentsoe ke motataisi oa rōna? Ka ho ba “baphethi ba lentsoe [ba mamelang], eseng bautloi feela.” (Luka 11:28) “Baphethi” ba na le tumelo e hlahisang mesebetsi e joaloka tšebetso e chesehang tšebeletsong ea Bokreste le ho ba teng kamehla libokeng tsa batho ba Molimo. (Baroma 10:14, 15; Baheberu 10:24, 25) Moutloi feela tjee oa lentsoe “o joaloka motho ea shebang sefahleho sa hae sa tlhaho ka seiponeng.” Oa icheba, ebe oa tsamaea ’me o lebala seo e ka ’nang eaba sea hlokahala bakeng sa ho lokisa chebahalo ea hae. Re le “baphethi ba lentsoe,” re ithuta ‘molao o phethahetseng’ oa Molimo ka hloko le ho o mamela, o akarelletsang ntho e ’ngoe le e ’ngoe eo a e hlokang ho rōna. Kahoo tokoloho eo re e thabelang e fapane haholo le ho ba lekhoba la sebe le lefu, hobane e lebisa bophelong. Ka hona a re ‘phehelleng molaong o phethahetseng,’ kamehla re o hlahlobisise le ho o mamela. ’Me ak’u nahane! Re le ‘baetsi ba mosebetsi, eseng bautloi ba lebalang,’ re na le thabo e tlisoang ke ho amoheloa ke Molimo.—Pesaleme ea 19:7-11.

Bo Akarelletsa se Fetang ho ba Barapeli ba Khomarelang Molao

19, 20. (a) Ho latela Jakobo 1:26, 27, borapeli bo hloekileng bo re hloka eng? (b) Mehlala e meng ea borapeli bo sa silafalang ke efe?

¹⁹ E le hore re ka thabela kamohelo ea bomolimo, ho hlokahala hore re hopole hore borapeli ba ’nete hase ho khomarela molao feela tjee. (Jakobo 1:26, 27) Re ka ’na ra nahana hore re ‘barapeli [ba Jehova ba amohelehang] ba khomaretseng molao,’ empa seo e hlileng e leng sa bohlokoa ke tsela eo a talimang e mong le e mong oa rōna ka eona. (1 Bakorinthe 4:4) Bofokoli bo bong bo tebileng e ka ’na ea e-ba ho hlōleha ho ‘laola leleme.’ Re ne re tla be re ithetsa haeba re nahana hore Molimo o thabisoa ke borapeli ba rōna haeba re etselletsa ba bang, re bua mashano kapa re sebelisa leleme hampe ka litsela tse ling. (Levitike 19:16; Baefese 4:25) Ka sebele, ha re batle hore “mofuta oa borapeli” ba rōna e be oa “lefeela” le o sa amoheloeng ke Molimo ka lebaka leha e le lefe.

²⁰ Le hoja Jakobo a sa bolele karolo e ’ngoe le e ’ngoe ea borapeli bo hloekileng, o bolela hore bo akarelletsa “ho hlokomela likhutsana le bahlolohali matšoenyehong a bona.” (Bagalata 2:10; 6:10; 1 Johanne 3:18) Phutheho ea Bokreste e bontša thahasello e khethehileng tabeng ea ho hlokomela bahlolohali. (Liketso 6:1-6; 1 Timothea 5:8-10) Kaha Molimo ke Mosireletsi oa bahlolohali le likhutsana, a re sebelisaneng le Eena ka ho etsa seo re ka se khonang ho ba thusa moeeng le ka lintho tse bonahalang. (Deuteronoma 10:17, 18) Borapeli bo hloekileng bo boetse bo bolela “hore motho a ipoloke a se na letheba lefatšeng,” e leng mokhatlo oa batho ba sa lokang o rapaletseng matleng a Satane. (Johanne 17:16; 1 Johanne 5:19) Ka lebaka leo a re luleng re lokolohile boitšoarong ba lefatše lena bo bontšang ho se tšabe Molimo e le hore re ka tlotlisa Jehova ’me ra ba ba ka sebelisoang tšebeletsong ea hae.—2 Timothea 2:20-22.

21. Mabapi le lengolo la Jakobo, ke lipotso life tse ling tseo re lokelang ho li hlahloba?

²¹ Keletso ea Jakobo eo re e hlahlobileng ho fihlela mona e lokela ho re thusa ho mamella liteko le ho khomarela tumelo ea rōna. E lokela ho eketsa kananelo ea rōna bakeng sa Mofani ea lerato oa limpho tse molemo. ’Me mantsoe a Jakobo a re thusa ho sebelisa borapeli bo hloekileng. O re hlokomelisa eng hape? Re lokela ho nka mehato efe e tsoelang pele ho paka hore re na le tumelo ea sebele ho Jehova?

[Mongolo o botlaaseng ba leqephe]

U ne U Tla Araba Joang?

◻ Ke’ng se tla re thusa ho mamella liteko?

◻ Ke hobane’ng ha Bakreste ba ka thaba ho sa tsotellehe liteko?

◻ Re ka ba baphethi ba lentsoe joang?

◻ Borapeli bo hloekileng bo akarelletsa eng?

[Setšoantšo se leqepheng la 9]

Ha u le tlas’a teko, sebelisa tumelo matleng a Jehova a ho araba lithapelo

[Setšoantšo se leqepheng la 10]

“Baphethi ba lentsoe” ba bolela ’Muso oa Molimo lefatšeng lohle