“Bonang! Enoa ke Molimo oa Rōna”

Taba e tšohloang lihloohong tsena tse peli tse ithutoang e thehiloe bukeng ea Atamela ho Jehova, e ileng ea lokolloa likopanong tsa setereke tse neng li tšoeroe lefatšeng lohle ka 2002/03.—Bona sehlooho se reng “E Tlositse Lenyora la Ka,” se leqepheng la 20.

“Bonang! Enoa ke Molimo oa rōna. Re mo tšepile, ’me o tla re pholosa. Enoa ke Jehova.”—ESAIA 25:9.

1, 2. (a) Jehova o ne a bitsa mopatriareka Abrahama eng ea hae, ’me see se ka ’na sa etsa hore re ipotse eng? (b) Bibele e re tiisetsa joang hore bohle ba ka ba le kamano e haufi le Molimo?

“MOTSOALLE oa ka.” Jehova, ’Mōpi oa leholimo le lefatše o ne a bitsa mopatriareka Abrahama joalo. (Esaia 41:8) Nahana ka motho feela tjee e e-ba motsoalle oa Morena ’Musi oa bokahohle! U ka ’na ua ipotsa, ‘Na ho ka khoneha hore ke be haufi le Molimo?’

² Bibele e re tiisetsa hore bohle ba ka ba le kamano e haufi le Molimo. Abrahama o ile a thabela katamelano e joalo hobane o ile a “beha tumelo ho Jehova.” (Jakobo 2:23) Kajeno le teng, Jehova “O na le kamano e haufi-ufi le ba lokileng.” (Liproverbia 3:32) Ho Jakobo 4:8, Bibele ea re phehella e re: “Atamelang ho Molimo, ’me o tla atamela ho lōna.” Ho hlakile hore haeba re nka khato ea ho atamela ho Jehova, ka sebele le eena o tla re atamela. Empa na mantsoe aa a bululetsoeng a bolela hore ke rōna batho ba baetsalibe, ba sa phethahalang, ba nkang khato pele? E seng joalo. Re na le kamano ena e haufi le Jehova hobane feela Molimo oa rōna ea lerato a nkile mehato e ’meli ea bohlokoa.—Pesaleme ea 25:14.

 3. Jehova o nkile mehato efe e ’meli ho re nolofalletsa ho ba metsoalle ea hae?

³ Mohato oa pele e bile hore Jehova a lokisetse hore Jesu a ‘fane ka moea oa hae hore e be thekollo e le phapanyetsano bakeng sa ba bangata.’ (Matheu 20:28) Sehlabelo seo sa thekollo se etsa hore re khone ho ba haufi le Molimo. Bibele e re: “Ha e le rōna, rea rata, hobane o ile a re rata pele.” (1 Johanne 4:19) E, kaha Molimo “o ile a re rata pele,” o ralile motheo oa hore re be metsoalle ea hae. Oa bobeli e bile hore Jehova a itšenole ho rōna. Maqhama leha e le afe a botsoalle ao re a thehang le motho, a itšetlehile ka ho tseba motho eo hantle, ho khahloa ke litšobotsi tsa hae tse ikhethang le ho li ananela. Nahana hore na sena se bolela’ng. Haeba Jehova e ne e le Molimo oa sephiri, ea ke keng a tsejoa, le ka mohla re ne re ke ke ra ba haufi le eena. Empa, ho e-na le ho ipata, Jehova o batla hore re mo tsebe. (Esaia 45:19) Lentsoeng la hae, e leng Bibele, o itšenola ka mantsoe ao re ka a utloisisang—e leng bopaki ba hore oa re rata ebile o batla hore re mo tsebe le ho mo rata e le Ntate oa rōna oa leholimo.

 4. Re tla ikutloa joang ka Jehova ha re ntse re tseba litšobotsi tsa hae hamolemo?

⁴ Na u kile ua bona ngoana e monyenyane a supisa metsoalle ea hae ntate oa hae ’me ka thabo e tsoang pelong le ka ho ikotla sefuba a re, “Ke ntate oa ka eno”? Barapeli ba Molimo ba na le mabaka ’ohle a ho ikutloa ka tsela eo ka Jehova. Bibele e bolela esale pele nako eo ka eona batho ba tšepahalang ba tlang ho hooa ba re: “Bonang! Enoa ke Molimo oa rōna.” (Esaia 25:8, 9) Ha re utloisisa litšobotsi tsa Jehova ka ho eketsehileng, re tla ba le boikutlo bo matla haholoanyane ba hore re na le Ntate ea atamelaneng le rōna ka ho fetisisa le Motsoalle oa rōna oa hlooho ea khomo. E, ho utloisisa litšobotsi tsa Jehova ho re fa mabaka a mangata a hore re mo atamele haholoanyane. Kahoo, a re hlahlobeng kamoo Bibele e senolang litšobotsi tsa Jehova tse ka sehloohong—e leng matla, toka, bohlale le lerato. Sehloohong sena, re tla tšohla litšobotsi tsa pele tse tharo.

“O Phahame Matleng”

 5. Ke hobane’ng ha ho loketse hore ebe Jehova ke eena feela ea bitsoang “ea Matla ’Ohle,” hona o sebelisa matla a hae a hlollang joang?

⁵ Jehova “o phahame matleng.” (Jobo 37:23) Jeremia 10:6 e re: “Ha ho ea tšoanang le uena ka tsela leha e le efe, Jehova. U moholo, ’me lebitso la hao le leholo ka matla.” Ho fapana le sebōpuoa leha e le sefe, Jehova o na le matla a se nang moeli. Ke ka lebaka lena e leng eena feela ea bitsoang “ea Matla ’Ohle.” (Tšenolo 15:3) Jehova o sebelisa matla a hae a hlollang ho bōpa, ho timetsa, ho sireletsa le ho tsosolosa. Ak’u nahane ka mehlala e ’meli feela—matla a hae a ho bōpa le matla a hae a ho sireletsa.

6, 7. Letsatsi le matla hakae, ’me see se paka ’nete efe ea bohlokoa?

⁶ Ha u eme ka ntle letsatsing le khanyang la lehlabula, u utloa’ng letlalong la hao? U utloa mofuthu oa letsatsi. Ha e le hantle, u utloa liphello tsa matla a Jehova a ho bōpa. Letsatsi le matla hakae? Mocheso oa letsatsi, khubung ea lona, e ka ba likhato tse 15 000 000 tsa Celsius. Haeba u ne u ka nka phatsanyana ea khubu ea letsatsi e lekanang le hloohoana ea nalete, ’me ua e beha mona lefatšeng, u ne u ke ke ua ema u sireletsehile le hoja u emelletse lik’hilomithara tse ka bang 140 hōle le mohloli oo o monyenyane oa mocheso! Ka motsotsoana o mong le o mong, letsatsi le ntša matla a lekanang le a ho qhoma ha libomo tsa nyutlelie tse limilione tse makholo. Leha ho le joalo, lefatše le potoloha sebōpi seo se hlollang sa mocheso oa matla a nyutlelie le le hōle ka ho lekaneng. Haeba le ne le le haufi haholo, metsi a teng lefatšeng e ne e tla ba mouoane; haeba le ne le le hōle haholo, a ne a tla fetoha leqhoa kaofela ha ’ona. Boemo leha e le bofe maemong ao a feteletseng bo ne bo tla etsa hore lefatše la rōna le hloke bophelo.

⁷ Batho ba bangata ha ba iphe nako ea ho nahanisisa ka bohlokoa ba letsatsi, le hoja bophelo ba bona bo itšetlehile ka lona. Kahoo, ha ba utloisise seo letsatsi le ka re rutang sona. Pesaleme ea 74:16 e re ka Jehova: “U ile ua lokisa mohloli oa leseli, esita le letsatsi.” E, letsatsi le tlotlisa Jehova, “Moetsi oa leholimo le lefatše.” (Pesaleme ea 146:6) Leha ho le joalo, ke se seng feela sa lihloliloeng tse ngata tse re rutang ka boholo ba matla a Jehova. Ha re ntse re ithuta ka ho eketsehileng ka matla a Jehova a ho bōpa, re ba le tšabo e nang le tlhompho e tebileng le ho feta.

8, 9. (a) Ke mantsoe afe a monate a tšoantšetso a re bontšang hore Jehova o rata ho sireletsa le ho hlokomela barapeli ba hae? (b) Molisa oa mehleng ea Bibele o ne a sireletsa linku tsa hae joang, ’me see se re ruta eng ka Molisa oa rōna e Moholo?

⁸ Jehova o boetse o sebelisa matla a hae a maholo ho sireletsa bahlanka ba hae le ho ba hlokomela. Bibele e sebelisa lipapiso tse ling tse hlakileng tse amang maikutlo ho hlalosa litšepiso tsa Jehova tsa ho sireletsa. Ka mohlala, hlokomela Esaia 40:11. Mona Jehova o itšoantša le molisa, ’me batho ba hae o ba tšoantša le linku. Rea bala: “O tla alosa mohlape oa hae joaloka molisa. O tla bokella likonyana ka letsoho la hae; o tla li beha sefubeng. Tse anyesang o tla li tsamaisa ka tlhokomelo.” Na ka mahlo a kelello u bona boemo boo bo hlalosoang temaneng ee?

⁹ Ke liphoofolo tse seng kae tse se nang matla a ho itšireletsa joaloka linku. Molisa oa mehleng ea Bibele o ne a lokela ho ba sebete e le hore a sireletse linku tsa hae ho liphiri, libere le litau. (1 Samuele 17:34-36; Johanne 10:10-13) Empa ka linako tse ling ho sireletsa le ho hlokomela linku ho ne ho hloka mosa. Ka mohlala, ha nku e ne e tsoalla hōle le lesaka, molisa o ne a tla sireletsa joang konyana eo e qetang ho tsoaloa e sitoang ho itšireletsa? Mohlomong ka matsatsi a se makae o ne a tla e beha “sefubeng” sa hae—mamenong a seaparo sa hae sa ka holimo. Ho ne ho tla joang hore konyana e be sefubeng sa molisa? Konyana e ne e ka ’na ea ikatametsa ho molisa, esita le ho ikhohla ka eena maotong. Leha ho le joalo, ke molisa ea neng a lokela ho inama, a nke konyana ’me a e behe moo ho sireletsehileng sefubeng sa hae. Ee ke papiso e lerato hakaakang e bontšang boikemisetso ba Molisa oa rōna e Moholo ba ho sireletsa le ho hlokomela bahlanka ba hae!

10. Jehova o re sireletsa joang kajeno, ’me ke hobane’ng ha tšireletso eo e le ea bohlokoa ka ho khethehileng?

¹⁰ Jehova ha aa fella feela ka ho tšepisa hore o tla re sireletsa. Mehleng ea Bibele, o ile a bonahatsa ka litsela tsa mohlolo hore o khona “ho lopolla batho ba boinehelo ba bomolimo tekong.” (2 Petrose 2:9) Kajeno teng o etsa joang? Rea tseba hore ha a sebelise matla a hae ho re sireletsa litlokotsing tsohle hona joale. Leha ho le joalo, o re fa ho hong habohlokoa le ho feta—e leng tšireletso ea moea. Molimo oa rōna ea lerato o re sireletsa kotsing ea moea ka ho re hlomella ka seo re se hlokang e le hore re mamelle liteko ’me re boloke kamano ea rōna le eena. Ka mohlala, Luka 11:13 e re: “Haeba lōna, le hoja le le khopo, le tseba ho fa bana ba lōna limpho tse ntle, Ntate ea leholimong o tla fana ka moea o halalelang hakaakang ho ba mo kōpang!” Matla ao a maholo ka ho fetisisa a ka etsa hore re hlōle liteko tsohle tse ka re hlahelang, kapa mathata. (2 Bakorinthe 4:7) Ka hona, Jehova o sebeletsa ho boloka bophelo ba rōna, eseng feela ka lilengoana tse seng kae empa ka ho sa feleng. Ha re nahana ka seo, ka sebele re ka talima mahlomola leha e le afe ao re ka bang le ’ona tsamaisong ena e le “a motsotsoana ’me a le bobebe.” (2 Bakorinthe 4:17) Na see ha se re hulele ho Molimo ea sebelisang matla a hae ka lerato joalo molemong oa rōna?

“Jehova o Rata Toka”

11, 12. (a) Ke hobane’ng ha toka ea Jehova e re hulela ho eena? (b) Davida o ile a etsa qeto efe ka toka ea Jehova, ’me mantsoe aa a bululetsoeng a ka re tšelisa joang?

¹¹ Jehova o etsa se nepahetseng le se lokileng, ’me o se etsa kamehla, a sa ee ka tšobotsi. Toka ea Molimo hase tšobotsi e se nang boikutlo e etsang hore re mo tšabe, empa ke tšobotsi e etsang hore re mo rate, e re hulelang ho Jehova. Bibele e hlalosa ka ho hlaka kamoo tšobotsi ena e bontšang ho ba le kutloelo-bohloko kateng. Kahoo, a re hlahlobeng litsela tse tharo tseo Jehova a sebelisang toka ea hae ka tsona.

¹² Ea pele, toka ea Jehova e mo susumelletsa ho bontša botšepehi ho bahlanka ba hae. Mopesaleme Davida o ile a ananela bohlokoa ba tšobotsi ena ea toka ea Jehova. Davida o ile a etsa qeto efe ka phihlelo ea hae le ka ho ithuta ha hae litsela tsa Molimo? O ile a re: “Jehova o rata toka, a ke ke a tlohela ba tšepahalang ba hae. Ka sebele ba tla lebeloa ho isa nakong e sa lekanyetsoang.” (Pesaleme ea 37:28) Ee ke tšepiso e tšelisang hakaakang! Le ka mohla Molimo oa rōna a ke ke a lahla ba tšepahalang ho eena. Ka hona re ka itšetleha ka botsoalle ba hae le ka tlhokomelo ea hae e lerato. Toka ea hae e tiisa sena!—Liproverbia 2:7, 8.

13. Molao oo Jehova a neng a o file Baiseraele o ile oa totobatsa ho ameha ha hae ka ba bothateng joang?

¹³ Ea bobeli, toka ea Molimo e ela hloko litlhoko tsa ba mahlomoleng. Ho ameha ha Jehova ka ba bothateng ho totobatsoa ke Molao oo a ileng a o fa Baiseraele. Ka mohlala, Molao o ne o entse litokisetso ho tiisa hore ho hlokomeloa likhutsana le bahlolohali. (Deuteronoma 24:17-21) Ka ho tseba hore na bophelo bo ka ba thata hakae malapeng a joalo, Jehova ka boeena e ile ea e-ba ntate oa bona oa Moahloli le Mosireletsi. (Deuteronoma 10:17, 18) O ile a lemosa Baiseraele hore haeba ba hlasela basali le bana ba se nang mokhoa oa ho itšireletsa, o tla utloa mohoo oa bona. Joalokaha ho tlalehiloe ho Exoda 22:22-24, o ile a re: “Ruri bohale ba ka bo tla tuka.” Le hoja bohale e se e ’ngoe ea litšobotsi tsa Molimo tse hlaheletseng, liketso tsa ka boomo tsa ho hloka toka li qholotsa khalefo ea hae e lokileng, haholo-holo ha ho hatakeloa ba sitoang ho itšireletsa.—Pesaleme ea 103:6.

14. Ke bopaki bofe bo ikhethang ka ho fetisisa ba ho hloka leeme ha Jehova?

¹⁴ Ea boraro, ho Deuteronoma 10:17, Bibele e re tiisetsa hore Jehova ha a ‘tšoare le ea mong ka leeme leha e le ho amohela tjotjo.’ Ho fapana le batho ba bangata ba nang le matla kapa tšusumetso, Jehova ha a thetsoe ke maruo a lintho tse bonahalang kapa ponahalo ea ka ntle. Ha a na khethollo kapa ho ea ka tšobotsi. Bopaki bo ikhethang ba ho hloka leeme ha hae ke bona: Monyetla oa ho ba barapeli ba hae ba ’nete, ba lebeletseng ho phela ka ho sa feleng, ha oa lekanyetsoa ho batho ba itseng feela ba phahameng sechabeng. Ho e-na le hoo, Liketso 10:34, 35 e re: “Molimo ha a leeme, empa sechabeng se seng le se seng motho ea mo tšabang le ea sebetsang ho loka oa amoheleha ho eena.” Tebello ena e bulehetse bohle ho sa tsotellehe boemo ba bona sechabeng, ’mala oa bona oa letlalo, kapa naha eo ba phelang ho eona. Na ee hase eona toka ea sebele? Ka sebele, ho utloisisa toka ea Jehova ka ho pharaletseng ho re hulela ho eena!

‘O! Botebo ba Bohlale ba Molimo!’

15. Bohlale ke eng, ’me Jehova o bo bontša joang?

¹⁵ Moapostola Pauluse o ile a susumelletseha ho tsota joalokaha ho tlalehiloe ho Baroma 11:33 a re: “O! botebo ba . . . bohlale le tsebo ea Molimo!” Ka sebele, ha re ntse re nahanisisa ka litšobotsi tse sa tšoaneng tsa bohlale ba Jehova, re tlala tšabo e nang le tlhompho. Leha ho le joalo, ebe re ka hlalosa tšobotsi ee joang? Bohlale bo kopanya tsebo, temoho le kutloisiso hore ho hlahe liphello tse lakatsehang. A sebelisa tsebo ea hae e pharaletseng le kutloisiso ea hae a tebileng, kamehla Jehova o etsa liqeto tse molemo ka ho fetisisa, o li phethahatsa ka tsela e molemo ka ho fetisisa.

16, 17. Lihloliloeng tsa Jehova li paka bohlale bo boholo ba hae joang? Fana ka mohlala.

¹⁶ Tse ling tsa lintho tse pakang ka ho toba bohlale bo boholo ba Jehova ke life? Pesaleme ea 104:24 e re: “Jehova, mesebetsi ea hao e mengata hakaakang! Kaofela ha eona u e entse ka bohlale. Lefatše le tletse lihlahisoa tsa hao.” Ha e le hantle ha re ntse re ithuta ka ho eketsehileng ka lintho tseo Jehova a li entseng, re hlolloa ke bohlale ba hae le ho feta. Bo-rasaense ba ithutile ho hongata pōpong ea Jehova! Ho bile ho na le lefapha la botsebi, le bitsoang biomimetics, le lekang ho etsisa boqapi bo fumanoang linthong tsa tlhaho.

¹⁷ Ka mohlala, e ka ’na eaba u kile ua sheba tepo ea sekho ka ho hlolloa. Ka sebele e qapiloe ka mokhoa o hlollang. Tepo e bonahalang e tetema e batla e le matla ho feta tšepe, e tiile ho feta likhoele tsa seaparo se thibelang likulo. Hantle-ntle e matla hakae? Ak’u nahane tepo ea sekho e hōlisitsoe ho fihlela e lekana le letlooa le sebelisoang seketsoaneng sa ho tšoasa litlhapi. Tepo eo e ne e tla ba matla hoo e ka emisang sefofane sa baeti se ntse se fofa! Ka sebele, Jehova o entse lintho tseo kaofela “ka bohlale.”

18. Bohlale ba Jehova bo bonahala joang tabeng ea ho sebelisa batho hore ba ngole Lentsoe la hae, Bibele?

¹⁸ Bopaki bo matla ka ho fetisisa ba bohlale ba Jehova bo ka fumanoa ka Lentsoeng la hae, Bibele. Ka sebele keletso e bohlale e fumanoang maqepheng a eona e bontša tsela e molemo ka ho fetisisa ea ho phela. (Esaia 48:17) Empa bohlale ba Jehova boo ho seng bo ka bapisoang le bona bo ka boela ba bonoa tseleng eo Bibele e ileng ea ngoloa ka eona. Joang? Ka bohlale ba hae, Jehova o ile a khetha ho sebelisa batho hore ba ngole Lentsoe la hae. Haeba a ne a ile a sebelisa mangeloi ho ngola Lentsoe lena le bululetsoeng, na Bibele e ne e tla ’ne e ipiletse ka tsela e tšoanang? Ke ’nete hore mangeloi a ne a ka hlalosa Jehova ho ea ka pono ea ’ona e phahameng le ho hlalosa boinehelo ba ’ona ho eena. Empa na re ne re tla khona ho utloisisa pono ea libōpuoa tseo tsa moea tse phethahetseng, tse re phahametseng hōle ka tsebo, ka phihlelo le ka matla?—Baheberu 2:6, 7.

19. Ke mehlala efe e bontšang hore ho sebelisoa ha batho hore ba ngole Bibele ho tlatsetsa mofuthung le ho ipiletseng ha eona?

¹⁹ Ho sebelisoa ha batho e le bangoli ho etsa hore Bibele e be mofuthu hape e ipiletse ka tsela e tsotehang. Bangoli ba eona e ne e le batho ba nang le maikutlo a joaloka a rōna. Kaha ba ne ba sa phethahala, ba ile ba tobana le liteko le likhatello tse kang tseo re tobanang le tsona. Maemong a mang ba ne ba ngola maikutlo a bona le mathata a bona. (2 Bakorinthe 12:7-10) Kahoo ba ngotse mantsoe ao ho seng lengeloi le neng le ka a bua. Ka mohlala, nahana ka mantsoe a Davida a tlalehiloeng Pesalemeng ea 51. Ho ea ka sehlooho sa pesaleme ena, Davida o ile a qapa pesaleme ena ka mor’a ho etsa sebe se tebileng. O ile a tšolla pelo ea hae, a bontša ho ikoahlaea ka ho tebileng, ’me a kōpa Molimo hore a mo tšoarele. Temana ea 2 le ea 3 li re: “Ntlhatsoe ka ho phethahetseng phosong ea ka, u ntlhoekise esita le sebeng sa ka. Etsoe ke tseba litlōlo tsa ka, sebe sa ka se ka pel’a ka kamehla.” Hlokomela temana ea 5, e re: “Bona! Ke ile ka tsoalloa phosong ka bohloko ba pelehi, ’mè a nkemolela sebeng.” Temana ea 17 e phaella ka ho re: “Mahlabelo a eang ho Molimo ke moea o robehileng; Molimo, u ke ke ua nyelisa pelo e robehileng le e sithabetseng.” Na u utloa ho sithabela hoo mongoli a ho utloang? E ka ba mang e mong haese feela motho ea sa phethahalang ea ka hlalosang boikutlo bo joalo?

20, 21. (a) Ke hobane’ng ha re ka bolela hore ho sa tsotellehe hore ho ile ha sebelisoa batho hore ba ngole Bibele, e na le bohlale ba Jehova? (b) Ho tla tšohloa eng sehloohong se latelang?

²⁰ Ka ho sebelisa batho ba joalo ba sa phethahalang, Jehova o re file sona seo re hlileng re se hlokang—e leng tlaleho e ‘bululetsoeng ke Molimo’ e ngotsoeng ka tsela eo batho ba ka e utloisisang habonolo. (2 Timothea 3:16) E, bangoli bao ba ne ba tataisoa ke moea o halalelang. Kahoo, ba tlalehile bohlale ba Jehova, eseng ba bona. Bohlale boo bo ka tšeptjoa ka ho feletseng. Bo feta bohlale ba rōna hōle hoo ka lerato Molimo a re phehellang a re: “Tšepa Jehova ka pelo ea hao eohle ’me u se ke ua itšetleha ka kutloisiso ea hao. U mo ele hloko litseleng tsohle tsa hao, ’me o tla otlolla litsela tsa hao.” (Liproverbia 3:5, 6) Ka ho ela hloko keletso eo e bohlale, re atamela haufi le Molimo oa rōna ea bohlale bohle.

²¹ Tšobotsi e ratehang le e ntle ka ho fetisisa ea Jehova ke lerato. Sehloohong se latelang re tla tšohla hore na Jehova o bontšitse lerato joang.

Na Ua Hopola?

• Jehova o nkile mehato efe hore re be metsoalle ea hae e haufi?

• Mehlala e meng ea matla a Jehova a ho bōpa le ho sireletsa ke efe?

• Jehova o sebelisa toka ea hae ka litsela life?

• Bohlale ba Jehova bo bonoa joang ka lihloliloeng tsa hae le ka Bibele?

[Setšoantšo se leqepheng la 10]

Jehova o hlokomela linku tsa Hae ka mosa joaloka molisa ea behang konyana sefubeng

[Setšoantšo se leqepheng la 13]

Bohlale ba Jehova bo bonoa tseleng eo Bibele e ngotsoeng ka eona