Lipotso Tse Tsoang ho Babali
Kaha Jehova o ikemiselitse ho tšoarela libe ka boleng ba sehlabelo sa thekollo, ke hobane’ng ha ho hlokahala hore Bakreste ba ipolele ho banna ba hōlileng ka phuthehong?
Joalokaha ho ka bonoa tabeng ea Davida le Bathe-sheba, Jehova o ile a tšoarela Davida sebe sa hae, le hoja e ne e le se tebileng, ka lebaka la pako ea Davida e se nang boikaketsi. Ha moprofeta Nathane a mo atamela, Davida o ile a ipolela pepenene: “Ke sitetsoe Jehova.”—2 Samuele 12:13.
Leha ho le joalo, Jehova o amohela ho ipolela ha moetsalibe ho se nang boikaketsi ebile oa mo tšoarela empa hape o boetse o etsa litokisetso tse lerato tsa ho thusa ea fositseng hore a hatele pele ho hlaphoheloeng moeeng. Tabeng ea Davida, thuso e ile ea hlaha ka moprofeta Nathane. Kajeno, liphuthehong tsa Bokreste, ho na le banna ba hōlileng moeeng, kapa baholo. Morutuoa Jakobo oa hlalosa: “Na ho na le mang kapa mang ea kulang [moeeng] har’a lōna? A ke a bitsetse banna ba baholo ba phutheho ho eena, ’me ba mo rapelle, ba mo tlotse ka oli ka lebitso la Jehova. Thapelo ea tumelo e tla etsa hore ea sa ikutloeng hantle a fole, ’me Jehova o tla mo tsosa. Hape, haeba a entse libe, o tla tšoareloa.”—Jakobo 5:14, 15.
Baholo ba nang le phihlelo e ka ba thuso e khōlō ho khutsisa bohloko ba pelo bo utluoang ke moetsalibe ea ikoahlaeang. Ba leka ho etsisa Jehova ha ba sebelisana le eena. Le hoja taeo e matla e ka ’na ea tšoaneleha, ba qoba ho ba ba sa utloeleng bohloko. Ho e-na le hoo, ka kutloelo-bohloko ba hlahloba litlhoko tsa kapele tsa motho eo. Ha ba fele pelo ho leka ho khutlisetsa mohopolo oa mofosi tseleng, ba sebelisa Lentsoe la Molimo. (Bagalata 6:1) Esita le haeba motho a sa itlhahise hore a bolele sebe sa hae, a ka susumelletsoa ho baka ha a atameloa ke baholo, joalokaha Davida a ile a baka ha a atameloa ke Nathane. Kahoo tšehetso eo baholo ba fanang ka eona e tla thusa mofosi hore a qobe kotsi ea ho pheta sebe se tšoanang le liphello tse tebileng tsa ho ba moetsalibe ea satalalitseng molala.—Baheberu 10:26-31.
Ka sebele ha ho bonolo hore motho a bolelle ba bang liketso tse mo hlabisang lihlong le ho kōpa tšoarelo. Ho hloka sebete. Leha ho le joalo, ka nakoana ak’u nahane ka hore na ho ba joang ha motho a sa ipolele. Monna e mong ea ileng a hlōleha ho senolela baholo ba phutheho sebe sa hae se tebileng o re: “Ho ne ho e-na le lehlaba le bohloko le neng le sa fele pelong ea ka. Ke ile ka eketsa boiteko ba ka mosebetsing oa boboleli, empa boikutlo ba ho ikoahlaea ha boa ka ba fela.” O ile a nahana hore ho ipolela ho Molimo ka thapelo ho ne ho lekane, empa ka ho hlakileng ho ne ho se joalo, hobane o ile a ikutloa a tšoana le kamoo Morena Davida a neng a ikutloa kateng. (Pesaleme ea 51:8, 11) Ho molemo hakaakang ho amohela thuso e lerato eo Jehova a fanang ka eona ka baholo!