Mofani oa “Mpho e ’Ngoe le e ’Ngoe e Ntle”
“Ka lekhetlo le leng ke ile ka bitsoa ke moruti oa kereke ea Reformed. O ne a batla ho tseba hore na ke tsamaisa kereke ea ka joang. Ke ile ka re ho eena: . . . ‘Ha re lefe meputso; ha ho na ntho e ka tletlebisang batho. Ha ho mohla re nkang koleke.’ O ile a botsa: ‘Le fumana chelete joang?’ Ke ile ka araba, ‘Dr.——, hona joale ha nka u bolella ’nete e pala u ke ke ua ba ua kholoa. Ha batho ba thahasella tsela ena, ha ba bone poleiti ea koleke e fetisoa. Empa baa bona hore ho na le litšenyehelo. Baa ipotsa, “Holo ena e ja chelete. . . . Ke joang nka etsang monehelo oa ho thusa morerong oo?”’ O ile a ncheba joalokaha eka o nahana sena, ‘U nahana hore ke eng—sethoto?’ Ke ile ka re, ‘Joale, Dr.——, ke u bolella ’nete e se nang motsoako. . . . Ha motho a fumana tlhohonolofatso ’me a e-na le lintho tse itseng tse bonahalang, o batla ho li sebelisetsa Morena. Ha a se na hona, ke hobane’ng ha re ka mo emella hore a ntše ho itseng?’”
—Charles T. Russell, mopresidente oa pele oa Mokhatlo oa Watch Tower, “The Watch Tower,” July 15, 1915.
REA fana hobane Jehova Molimo a re file pele. Ho fana ha hae ho ile ha qala khale ka pōpo—pōpo ea hae ea pele, “Mora oa oona ea tsoetsoeng a ’notši.” (Johanne 3:16) A susumetsoa ke lerato, o ile a fa ba bang mpho ea bophelo.
Mora oa Molimo, Jesu Kreste, ke mpho e khōlō ka ho fetisisa ea Jehova ho rōna. Empa Mor’a Molimo ka boeena, hase qetello ea ho fana ha Molimo. ‘Mohau oa Molimo o re atetseng’ moapostola Pauluse o o bitsa “neo ea [Jehova] e se nang ho boleloa.” (2 Ba-Korinthe 9:14, 15) Ka ho totobetseng mpho ena e kenyeletsa kakaretso ea melemo eohle le liketso tsa mosa o lerato tseo Molimo a fanang ka tsona ho batho ba hae ka Jesu. Mosa o joalo o sa tšoanelang o hlolla hoo o phahametseng matla a motho a ho hlalosa lintho kapa ho li bonahatsa. Leha ho le joalo, ho sa na le litšobotsi tse ling tsa ho fana ha Molimo.
Khale, morena e mong ka bohlale le ka boikokobetso o ile a amohela hore lintho tsohle tse molemo tseo a neng a fana ka tsona e le limpho ha e le hantle e ne e le tsa Jehova. O ile a re: “Hobane tsohle tse maholimong le lefatšeng ke tsa hao. Borena le bona ke ba hao, Jehova, ’me u phahametse tsohle u le morena. . . . Hobane ’na ke’ng, ’me sechaba sa ka ke’ng, hore re tle re tsebe ho u ntšetsa ntho tsa rōna joalo ka ho rata? Athe tsohle li tsoa ho uena, ’me ke letsoho la hao le re fileng seo re u neang sona.”—1 Likronike 29:11-14.
Mohlala oa Molimo
Jakobo, morutuoa oa Jesu Kreste, o ne a tseba hore Jehova Molimo ke mohloli oa ntho efe kapa efe eo ka hohle e leng molemo ka ho feletseng. Ke limpho tse phethahetseng feela tse tsoang ho eena. Jakobo o ile a ngola: “Mpho e ’ngoe le e ’ngoe e ntle, leha e le neo e ’ngoe le e ’ngoe e phethehileng, e tsoa holimo, e theoha ho Ntat’a maseli, eo ho seng tika-tiko ho eena, leha e le seriti sa ho fetoha.”—Jakobo 1:17.
Esita le tabeng ea ho fana ka limpho, Jakobo o ile a bona kamoo Molimo a fapaneng le batho ka teng. Batho ba ka fana ka limpho tse ntle empa ha ba etse joalo ka mehla. Limpho tsena li ka ’na tsa hlaha ka lebaka la morero oa boithati, kapa li ka sebelisetsoa ho leka motho ho etsa ntho e ’ngoe e fosahetseng. Ho Jehova ha ho na phetoho; ha a fetohe. Kahoo, limpho tsa hae ha li fetohe. Ka mehla li hloekile. Ka mehla li phahamisa boiketlo le thabo ea moloko oa batho. Ka mehla li fanoa ka mosa ’me lia thusa, le ka mohla ha li senye.
Sepheo sa ho Fana ka Limpho
Mehleng ea Jakobo, baeta-pele ba tummeng ba bolumeli ba ne ba fana ka limpho feela hore ba bonoe ke batho. Ba ne ba fana ka sepheo se fosahetseng. Ka ho laba-labela ho rorisoa ke batho, ba ile ba sekisetsa litekanyetso tsa bona tse lokileng. Leha ho le joalo, Bakreste ba ne ba lokela ho fapana. Jesu o ile a ba eletsa: “Ha u etsa thuso, u se ke ua letsa terompeta pel’a hao, joalo ka ha ho etsoa ke baikaketsi ka masinagogeng le literateng, ba tle ba rorisoe ke batho. Ka ’nete kea le bolella, ke re: Ba se ba nkile moputso oa bona. Empa uena, ha u etsa thuso, letsoho la hao le letšehali le se ke la tseba se etsoang ke le letona la hao, hore thuso ea hao e be sephiring; ’me Ntat’ao ea bonang sephiring, o tla u putsa.”—Mattheu 6:2-4.
Lebaka la Mokreste la ho fana ka limpho ke ho thusa ba bang ho finyella tlhoko e itseng kapa ho ba thabisa kapa ho phahamisa borapeli ba ’nete. Hase ka lebaka la ho iphumanela thoriso. Ebile, mahlo a Jehova a ka finyella tlaase botebong ba lipelo tsa rōna. A ka bona sepheo sa sebele se susumetsang ho fana ha rōna ka limpho.
Lipaki tsa Jehova li ikemisetsa ho latela mohlala oa Jehova le Mora oa hae ka ho fana ka limpho. Li fana ka seo li nang le sona. Li na le litaba tse molemo tsa ’Muso, ’me li fana ka tsona molemong oa ba bang. Lia tseba hore Liproverbia 3:9 e re: “Tlotlisa Jehova ka moruo oa hao, le ka lilopotsiea tsa tsohle tse u atetseng.” Ka lebaka la hobane ofisi e ’ngoe le e ’ngoe ea lekala, phutheho, le batho ka bomong, ka tieo ba batla ho etsa monehelo bakeng sa boiketlo ba batho bohle, baena bohle baa matlafatsoa moeeng ’me baa atleha. Leruo la lintho tse bonahalang ha le atlehise moeeng, empa katleho ea moea e tlisa katleho ea lintho tse bonahalang tse lekaneng bakeng sa litlhoko tsa mosebetsi oa Jehova.
Litsela tsa ho Kopanela
Ho na le litsela tse ngata tseo e mong le e mong a ka ntšang monehelo ho tšehetsa litaba tse molemo. Tsela e ’ngoe ke mabapi le Liholo tsa ’Muso. Litho tsohle tsa phutheho li sebelisa Holo ea ’Muso. Ho na le ea faneng ka chelete ea hore e hahuoe kapa e hiroe, bakeng sa mabone, taolo ea mocheso le mohatsela, le hore e bolokoe e le boemong bo botle. Kaha hoa hlokahala hore e mong le e mong a tšehetse phutheho, mabokose a menehelo a teng Holong ea ’Muso, ’me menehelo ea boithaopo e fumanoang e sebelisetsoa ho lefella litšenyehelo tsa phutheho. Ha ho e-na le e salang, ho ka etsoa menehelo e eang lekaleng le haufi la Watch Tower, ho itšetlehiloe ka qeto ea phutheho.
Ho ka etsoa menehelo e eang lekaleng la Mokhatlo bakeng sa koetliso le ho tšehetsa baromuoa le bo-pula-maliboho ba khethehileng ba leng likarolong tsa lefatše moo litaba tse molemo li e-song ho finyelle baahi ka kakaretso. Litšenyehelo tse ling katolosong ea litaba tse molemo li mabapi le mosebetsi oa balebeli ba tsamaeang. Moapostola Pauluse, ea ileng a beha mohlala mosebetsing oa ho tsamaea lekholong la pele la lilemo, o ile a babatsa phutheho ea Filippi: “Le nthometse hang le habeli seo ke neng ke se hloka.” (Ba-Filippi 4:14-16) Ntle ho litšenyehelo tsa litšobotsi tsena tsa tšebeletso ea nako e tletseng, tseo makala ’ohle a nang le tsona, ho boetse ho na le ho hlokomeloa ha mahae a Bethele le ba lulang le ho sebetsa teng. Ho ngoloa le ho hatisoa ha libuka tse nang le molaetsa o monate oa litaba tse molemo ka sebele ke litokelo tse tsoang ho Molimo, empa ho abjoa ha lingoliloeng tseo ho boetse hoa hlokahala, ’me seo se kopanyeletsa litšenyehelo. Ho boetse ho na le litšenyehelo tsa likopano tsa potoloho le tsa setereke, ho sa boleloe letho ka linyeoe tsa makhotla tse lokelang ho loanoa bakeng sa ho ‘sireletsa le ho theha ka molao litaba tse molemo.’—Ba-Filippi 1:7, NW.
Nako e qetoang boboleling ba litaba tse molemo ke mosebeletsi e mong le e mong oa Jehova ke ea boithatelo, ’me hoa tšoana le ho fana ka menehelo ea lintho tse bonahalang. Ho behella chelete e tla sebelisoa ka thōko ha ka mehla bakeng sa ho tšehetsa katoloso ea borapeli ba ’nete ho khothaletsoa ke moapostola Pauluse: “Ha e le lithuso tse bokelleloang bahalaleli, . . . ka tsatsi le qalang veke, e mong le e mong oa lōna a bee kathōko ha hae see a ka se bokellang.”—1 Ba-Korinthe 16:1, 2.
Ha motho a etsa monehelo, hase ka mehla a tsebang hore na o tla sebelisoa joang, empa o bona liphello katolosong ea boboleli ba ’Muso. Litlaleho tse ho 1993 Yearbook of Jehovah’s Witnesses li bontša hore litaba tse molemo tsa ’Muso li boleloa linaheng le lihleke-hlekeng tsa leoatle tse fetang 200 ke basebeletsi ba Bakreste ba fetang 4 500 000. Litlaleho tsena lia khothatsa. Ka hona mpho e ’ngoe le e ’ngoe, ho sa tsotellehe boholo ba eona, ea thusa katolosong ea litaba tse molemo lefatšeng ka bophara.
Mosebetsi ona o tšehetsoa ka lichelete ke ho fana ho kopanetsoeng ha bohle. Ba bang ba khona ho fana ka ho eketsehileng, e leng ho thusang mosebetsi oa boboleli haholoanyane. Ba bang ba fana hanyenyane. Empa ba etsang menehelo e fokolang ha baa lokela ho hlajoa ke lihlong kapa ba be le boikutlo ba hore karolo ea bona hase ea bohlokoa. Ka sebele Jehova ha a ikutloe ka tsela eo. Jesu o ile a hlakisa sena hantle ha a ne a bontša kamoo Jehova a ananelang chelete e fokolang ea mohlolohali. “A bona le mosali oa mohlolohali ea fumanehileng a nokela licheletana tse peli. A re: Ka ’nete ke re ho lōna: Mohlolohali eo ea fumanehileng, o noketse ho feta ba bang bohle; hobane bao kaofela ba noketse likabelong tsa Molimo, ba nkile ho tlalloeng ha bona; kanthe enoa seo a se noketseng o se nkile bofumanehing ba hae, o noketse hohle hoo a neng a phela ka hona.”—Luka 21:2-4.
Ho sa tsotellehe hore na boemo ba rōna ba lichelete ke bofe, re ka fana ka litsela tse khahlisang Jehova. Mopesaleme o akaretsa hantle hore na re ka fana ka tsela e tlotlisang Morena le Moahloli oa rōna joang. O re: “Busetsang ho Jehova khanya e tšoanelang lebitso la hae; tlisang linyehelo, le kene mabaleng a hae!” (Pesaleme ea 96:8) Ka hona, a re etsiseng mohlala o lerato oa Ntate oa rōna oa leholimo ka ho fana ka limpho re thabile hobane o re file pele.
[Lebokose le leqepheng la 30]
KAMOO BA BANG BA ETSANG MENEHELO MOSEBETSING OA BOBOLELI OA ’MUSO
◻ LIMPHO: Menehelo ea boithatelo ea chelete e ka ’na ea romeloa ka ho toba ho Watch Tower Bible and Tract Society of Pennsylvania, 25 Columbia Heights, Brooklyn, New York 11201, kapa ofising ea lekala ea Mokhatlo e sebakeng sa heno. Mabenyane kapa lintho tse ling tsa bohlokoa le tsona li ka neheloa. Lengolo le lekhutšoaane le bolelang hore lintho tsena ke mpho ea boithatelo le lokela ho tsamaea le menehelo ena.
◻ TOKISETSO EA MENEHELO E FANOANG TLAS’A MAEMO A ITSENG: Chelete e ka fuoa Mokhatlo oa Watch Tower hore o e boloke ho fihlela ha mong’a eona a e-shoa, ka tokisetso ea hore haeba ho hlaha tlhoko ea botho, e tla khutlisetsoa ho ea faneng ka eona.
◻ INSHORENSE: Mokhatlo oa Watch Tower o ka ngolisoa e le mojalefa oa inshorense ea bophelo kapa ea penshene. Mokhatlo o lokela ho tsebisoa ka tokisetso leha e ka ba efe e joalo.
◻ LI-STOCK LE LI-BOND: Li-stock le li-bond li ka ’na tsa fuoa Mokhatlo oa Watch Tower e le monehelo oa boithatelo kapa ka ho etsa tokisetso ea hore chelete eo li e kenyang e ’ne e lefshoe ho mong’a tsona.
◻ LITŠA LE MEHAHO: Litša le mehaho tse ka rekisoang li ka ’na tsa fuoa Mokhatlo oa Watch Tower joaloka mpho ea boithatelo kapa ka tokisetso ea hore mong’a setša a lule ho sona nakong ea bophelo bohle ba hae. Motho ea fang Mokhatlo setša kapa mohaho o lokela ho tsebisa Mokhatlo pele a etsa joalo.
◻ LIKABO TSA LEFA: Thepa kapa chelete e ka ’na ea fuoa Watch Tower Bible and Tract Society of Pennsylvania e le lefa ka lengolo la kabo ea lefa le entsoeng ka molao. Kopi ea lengolo la lefa e lokela ho romeloa ho Mokhatlo.
Bakeng sa boitsebiso bo eketsehileng mabapi le litaba tse joalo, ngolla Treasurer’s Office, Watch Tower Bible and Tract Society of Pennsylvania, Private Bag X2067, Krugersdorp, 1740, kapa ofisi ea lekala ea Mokhatlo e haufi le uena.
[Litšoantšo tse leqepheng la 31]
Kamoo menehelo ea hao e sebelisoang ka teng:
1. Baithaopi ba Bethele
2. Kaho ea liofisi tsa makala
3. Liphallelo libakeng tseo ho bileng le likoluoa
4. Liholo tsa ’Muso
5. Baromuoa