Talima ka ’Nģane ho Lintho Tseo U li Bonang!
PONO e ntle ea mahlo ke tlhohonolofatso. Ha e le hantle, batho ba bangata ba bolela hore ke lintho tse seng kae feela tseo ba nang le tsona tse bohlokoa ho feta pono. Leha ho le joalo, ho Bakreste, ho na le mofuta o mong oa pono oo moapostola Pauluse a buileng ka oona o le bohlokoa ho feta pono e ntle ea mahlo. Pauluse o ile a ngola: “Re fela re sa talime tse bonahalang, re mpa re talima tse sa bonahaleng.” (2 Ba-Korinthe 4:18) Ka sebele e tlameha hore ebe ke mofuta o ikhethang haholo oa pono o nolofaletsang motho ho bona lintho tse sa bonahaleng! Re ka ’na ra o bitsa pono e nchocho ea moea.
Ke Hobane’ng ha e Hlokahala?
Bakreste ba lekholong la pele la lilemo ba ne ba hlile ba hloka pono ea mofuta ona ea moea. Ba ne ba phetha tšebeletso ea bona ea Bokreste tlas’a mathata a mangata. Pauluse o e beha ka tsela ena: “Re hlomohile ka nģa tsohle, empa ha re tsielehe ruri; re bothateng bo boholo, empa ha re tele; rea hlorisoa, empa ha re lahloe; re liheloa fatše, empa ha re timele.”—2 Ba-Korinthe 4:8, 9.
Ho sa tsotellehe maemo a joalo, barutuoa ba tšepahalang ba ile ba ema ba tiile. Ka tumelo e tiileng ho Molimo, ba ne ba ka bua joaloka Pauluse: “Ka baka leo, ha re tepelle; empa leha motho oa rōna oa kantle a ntse a senyeha, motho oa kahare, eena, o ntse a nchafala ka letsatsi le letsatsi.” Leha ho le joalo, ke eng e neng e tlisa nchafalo ee ea letsatsi le letsatsi? Pauluse o ile a tsoela pele ho re: “Hobane hlomoho e chatsi ea rōna, ea motsotso ona, e ntse e re sebelletsa letlotlo la khanya le tlōlisang, le sa feleng; ha re fela re sa talime tse bonahalang, re mpa re talima tse sa bonahaleng; hobane tse bonahalang ke tsa mehla ena feela; empa tse sa bonahaleng ha li ka ke tsa e-ba le bofelo.”—2 Ba-Korinthe 4:16-18.
Pauluse o ne a khothaletsa baena ba hae ba moea ho se lumelle mathata, litšitiso, litlhoriso—matšoenyeho a mofuta ofe kapa ofe—ho fifatsa pono ea bona ea moputso o khanyang o neng o beiloe ka pel’a bona. Ba ne ba lokela ho talima ka ’nģane ho maemo a bona a hona joale, ba lule ba tsepamisitse mahlo a bona phellong e thabisang ea tsela ea Bokreste. Hoo ke hona ho ba thusitseng hore letsatsi le letsatsi ba nchafatse boikemisetso ba bona ba ho hatela pele ka ntoeng. Ka ho tšoanang le Bakreste kajeno ba hloka ho ba le pono e ntle joalo ea moea.
Talima Matšoenyeho a Teng Hona Joale e le a Motsotsoana!
Re rata kapa re sa rate, letsatsi le letsatsi re bona lintho tseo re neng re ke ke ra thabela ho li bona. Ha re icheba seiponeng re hlokomela ka ho hlaka matheba a sa rateheng le likoli ’meleng ea rōna, tse supang ho se phethahale ’meleng. Ha re icheba seiponeng sa Lentsoe la Molimo, re bona liphoso le likoli tsa moea, ho rōna le ho ba bang. (Jakobo 1:22-25) ’Me ha re sheba likoranta tsa letsatsi le letsatsi kapa thelevishene, ho hlahella litlaleho tsa leeme, lihlōhō le litlokotsi tse re utloisang bohloko.
Satane a ka rata ha re felloa ke tšepo ka lebaka la lintho tseo re li bonang kapa re kheloha ’me re qala ho thekesela tumelong. Re ka thibela joang hore see se se re etsahalle? Re tlameha ho latela mohlala o beiloeng ke Jesu Kreste, joalokaha moapostola Petrose a elelitse ha a ne a re: “Hape, ke seo le bilelitsoeng sona; hobane Kreste le eena o utloisitsoe bohloko bakeng sa lōna, a le siela mehlala, le tle le hate moo a hatileng teng.” (1 Petrose 2:21) Tšobotsing e ’ngoe le e ’ngoe ea bophelo ba Bokreste, Jesu e ne e le mohlala o phethahetseng.
Ha a supa Jesu e le mohlala oa rōna, ka ho khetheha Petrose o buile ka hore Jesu o ile a utloa bohloko. Ka sebele, Jesu o ile a utloa bohloko bo boholo ha a le lefatšeng. Joaloka “motlatsi” oa Jehova ea neng a le teng pōpong ea moloko oa batho, o tseba hantle seo Molimo a neng a se reretse batho. (Liproverbia 8:30, 31) Empa joale o ile a iponela ka boeena seo sebe le ho se phethahale li neng li ba entse sona. Letsatsi le letsatsi o ne a bona ’me a tlameha ho sebetsana le ho se phethahale le mefokolo ea batho. Seo e tlameha ebe se ne se mo tšoenya haholo.—Mattheu 9:36; Mareka 6:34.
Ntle ho matšoenyeho a ba bang, Jesu o boetse o bone a hae ka boeena. (Ba-Heberu 5:7, 8) Empa ka pono e phethahetseng ea moea, o ile a talima ka ’nģane ho ’ona a sheba moputsong oa ho phahamisetsoa bophelong ba ho se shoe ka lebaka la tsela ea hae ea botšepehi. E le Morena oa Bomessia ka nako eo, o ne a tla ba le tokelo ea ho ntša moloko oa batho o mahlomoleng boemong ba ho se hloeke a o khutlisetse phethehong eo Jehova a neng a e rerile tšimolohong. Ho lula a beile mohopolo oa hae litebellong tsa bokamoso tse sa bonahaleng ho ile ha mo thusa ho boloka thabo tšebeletsong ea bomolimo ho sa tsotellehe matšoenyeho ao a neng a a bona letsatsi le letsatsi. Hamorao Pauluse o ile a ngola: “Ka lebaka la thabo e neng e behiloe ka pel’a hae o ile a mamella thupa ea tlhokofatso, a sa natse lihlong, ’me o lutse ka letsohong le letona la terone ea Molimo.”—Ba-Heberu 12:2, NW.
Le ka mohla Jesu ha aa ka a lumella hore maemo a thata le a tšoenyang a mo nyahamise, a mo khelose, kapa a mo thekelise tumelong. Joaloka barutuoa ba hae, re tšoanela ho latela haufi-ufi mohlala oa hae o ikhethang.—Mattheu 16:24.
Beha Mohopolo Linthong Tse sa Feleng Tse sa Bonahaleng!
Ha a bua ka se nolofalelitseng Jesu ho tiisetsa, Pauluse o boetse o hlalosa tsela eo re lokelang ho e nka ha a ngola: “’Me a re matheng ka mamello peisong e behiloeng ka pel’a rōna, ha re ntse re talimile ka hloko Moemeli ea ka Sehloohong le Mophethahatsi oa tumelo ea rōna, Jesu.” (Ba-Heberu 12:1, 2, NW) E, ho matha tseleng ea Bokreste ka katleho le ka thabo, re tšoanela ho talima ka ’nģane ho lintho tse ka pel’a rōna hona joale. Empa ke joang re ka ‘talimang ka hloko’ ho Jesu, ’me hoo ho tla re etsetsa eng?
Ka mohlala, ka 1914, Jesu o ile a beoa setulong e le Morena oa ’Muso oa Molimo, ’me o busa a le leholimong. Ho hlakile hore sena sohle ha se bonahale mahlong a rōna a nama. Empa, haeba re “talimile ka hloko” ho Jesu, pono ea rōna ea moea e tla re thusa ho bona hore hona joale o se a le boemong ba ho nka khato ea ho felisa tsamaiso e teng hona joale ea lintho e khopo le ho lelekela Satane le lekhotla la hae la bademona litlamong tsa ho se sebetse. Ha re ntse re talimile pele haholoanyane, pono ea rōna ea moea e tla re senolela lefatše le lecha le babatsehang leo ho lona ‘lefu le sa tl’o hlola le e-ba teng; ’me ho sa tl’o ba le masoabi, leha e le ho bokolla, kapa bohloko; hobane tsa pele li fetile.’—Tšenolo 19:11-16; 20:1-3; 21:4.
Kahoo, ho e-na le ho nyahamisoa ke matšoenyeho a motsotsoana ao mohlomong re tlamehang ho tobana le ’ona letsatsi le letsatsi, ke hobane’ng ha re sa tsepamise mehopolo ea rōna linthong tse sa feleng? Ka mahlo a tumelo, ke hobane’ng re sa talime ka ’nģane ho ho kula le meharo tse lefatšeng lee le silafetseng ho bona paradeise e tletseng batho ba phelang hantle, ba thabileng le ba tsotellang? Ke hobane’ng ha re sa talime ka ’nģane ho likoli tsa rōna, tsa nama le tsa moea, ’me re ipone re lokolohile ho tsona ka ho sa feleng ka lebaka la se finyeletsoeng ke sehlabelo sa thekollo sa Kreste? Ke hobane’ng ha re sa talime ka ’nģane ho lipolao tse sehlōhō tse bakoang ke lintoa, tlōlo ea molao le pefo ’me re bone ba sa tsoa tsosoa bafung ba rutoa ka khotso le ka ho loka ha Jehova?
Ho phaella moo, ho ‘talima ka hloko’ ho Jesu ho boetse ho akarelletsa ho beha pono ea rōna ea moea ho seo ’Muso, le hoja o sa bonahale, o seng o ntse o se finyella har’a batho ba Molimo lefatšeng: bonngoe, khotso, lerato, kameho e mofuthu ea bara ba motho le nala ea moea. Mosali e mong oa Mokreste, Jeremane, ka mor’a ho bona video ea United by Divine Teaching, o ile a ngola: “Video ena e tla nthusa ka ho eketsehileng ho lula ke ntse ke hopola hore baena le likhaitseli ba bangata ba Bakreste lefatšeng ho pota, ba ntse ba sebeletsa Jehova ka botšepehi ka oona motsotso ona—’me sena ba se etsa ho sa tsotellehe boitšoaro ba batho ka kakaretso. Bonngoe ba rōna ba boena bo bohlokoa hakaakang lefatšeng le tletseng pefo le lehloeo!”
Na le uena, lehlakoreng ho uena u “bona” ho eme Jehova, Jesu, mangeloi a tšepahalang le limilione tsa Bakreste-’moho le uena? Haeba ho joalo, u ke ke ua angoa ka ho feteletseng ke “matšoenyeho a tsamaiso ena ea lintho” a ka u sitisang ka ho u nyahamisa le ho u fetola ea “sa beheng” tšebeletsong ea Bokreste. (Mattheu 13:22, NW) Kahoo ‘talima ka hloko’ ho Jesu ka ho lebisa mahlo a hao a moea ’Musong o hlomiloeng oa Molimo le litlhohonolofatsong tsa oona tsa hona joale le tsa nakong e tlang.
Phela ho Bona Tse sa Bonahaleng!
Ho bona phapang e hlakileng pakeng tsa lefatše le lecha le sa feleng la Molimo le lefatše lena la khale le oang, ho lokela ho re susumeletsa ho itšoara ka tsela eo re tla balelloa har’a ba tšoanelehang ho phela e le hore re bone ka sebele lintho tseo re ka li bonang ka mahlo a tumelo feela hona joale. Letšoele la ba tsositsoeng bafung le tla thatafalloa ke ho lumela seo le tla se bona ha le tsosetsoa bophelong hore le bone lefatše la paradeise le lokileng le le fapaneng hōle le lefatše leo ba le boneng pele ba e-shoa. Nahana feela ka thabo ea rōna ea ha re tla be re phela ho ba lumelisa ’me re ba hlalosetsa ka tseo Molimo a li entseng!—Bapisa le Joele 2:21-27.
E, pono e ntle ea moea e bohlokoa hakaakang, ’me ho bohlokoa hakaakang ho e boloka e ntse e hlakile! Sena re ka se finyela ka ho etsa thuto ea botho ea Bibele kamehla, ho ba teng libokeng tsa Bokreste, ho buisana le ba bang ka tšepo ea rōna e theiloeng Bibeleng, ’me ka holimo ho tsohle, ka ho rapella tataiso ea bomolimo. Sena se tla boloka pono ea rōna ea moea e hlakile ’me e khanya, ho re nolofaletsa ho talima ka ’nģane ho lintho tseo re li bonang!