Lulang le Tiile Tumelong!
Lintlha tse Khōlō ho Tsoa ho Petrose oa Pele
LIPAKI TSA JEHOVA li talimana le liteko tse fapa-fapaneng, kapa liteko tsa tumelo ea tsona. Linaheng tse ling, mosebetsi oa tsona oa ho bolela ka ’Muso o etsoa li talimane le mahloriso a maholo. Satane Diabolose ke eena ea ikarabellang ka lintho tsena le ka boiteko bo bong ba ho senya kamano ea tsona le Molimo. Empa a ke ke a atleha, hobane Jehova o matlafatsa bahlanka ba hae—e, o ba tiisa tumelong.
Moapostola Petrose o ile a fuoa tokelo ea ho ‘tiisa baena ba hae’ ba neng ba “hlomohile ke meleko e mengata.” (Luka 22:32; 1 Petrose 1:6, 7) O entse joalo lengolong la hae la pele, le ngotsoeng hoo e ka bang ka 62-64 C.E., ho tsoa Babylona. Ho lona Petrose o elelitse, a tšelisa, le ho khothatsa Bakreste ba Bajode le ba Balichaba, a ba thusa ho emela liphutuhelo tsa Satane le ho lula ba “tiile tumelong.” (1 Petrose 1:1, 2; 5:8, 9, NW) Hona joale kaha nako ea Diabolose e khutšoanyane le litlhaselo tsa hae li le matla haholo, kannete batho ba Jehova ba ka rua molemo mantsoeng a Petrose a bululetsoeng.
Boitšoaro bo Theiloeng Melao-motheong ea Bomolimo
Ho sa tsotellehe hore na tšepo ea rōna ke ea leholimong kapa ea lefatšeng, e lokela ho re thusa ho mamella liteko le ho etsa lintho ka tsela ea bomolimo. (1:1–2:12) Tšepo ea lefa la leholimo e etsa hore batlotsuoa ba thabe ha ba talimane le liteko, tseo ha e le hantle li hloekisang tumelo ea bona. Joaloka ntlo ea moea e ahuoeng motheong oa Kreste, ba nehelana ka mahlabelo a moea a amohelehang ho Molimo ’me ba itšoara ka mokhoa o lokileng o Mo tlisetsang khanya.
Litšebelisano tsohle tsa rōna le batho ba bang li lokela ho busoa ke melao ea bomolimo. (2:13–3:12) Petrose o bontšitse hore re lokela ho ikokobeletsa babusi ba batho. Bahlanka ba matlo ba ne ba lokela ho ikokobeletsa benghali ba bona ’me basali ba ikokobeletse banna ba bona. Boitšoaro ba bomolimo ba basali ba Bakreste bo ka hapela monna ea sa lumelang tumelong ea ’nete. ’Me monna ea lumetseng o lokela hore ‘a nehe mosali oa hae tlhompho kaha mosali ke pitsa e fokolang.’ Bakreste bohle ba lokela ho bontša ho utloelana bohloko, ba be le kameho ea boena, ba etse ho lokileng, ’me ba phehelle khotso.
Mamello e Tlisa Litlhohonolofatso
Ho mamella ho utloisoa bohloko ha Bakreste ba ’nete ka botšepehi ho tla fella ka litlhohonolofatso. (3:13–4:19) Haeba re utloisoa bohloko ka baka la ho loka, re lokela ho thaba. Ho feta moo, kaha Kreste o utloisitsoe bohloko nameng ho re isa ho Molimo, ha rea lokela ho hlola re phela ho ea ka litakatso tsa nama. Haeba re mamella liteko ka botšepehi, re tla kopanela ka thabo e khōlō ho senoloeng ha Jesu. Ho jara thohako ka baka la lebitso la Kreste, kapa joaloka barutuoa ba hae, ho lokela ho re etsa hore re thabe hobane ho paka hore re na le moea oa Jehova. Joale ha re utloisoa bohloko tumellanong le thato ea Molimo, ha re ithoriseng ka eena ’me re tsoele pele ho etsa hantle.
Joaloka Bakreste, ho hlokahala hore re etse mesebetsi ea rōna ka botšepehi ’me re ikokobetse ka tlas’a letsoho le matla la Molimo. (5:1-14) Baholo ba tlameha ho alosa mohlape oa Molimo ka ho rata, ’me kaofela ha rōna re lokela ho lahlela matšoenyeho a rōna ho Jehova, re elelloa hore e hlile oa re hlokomela. Re boetse re lokela hore re se nke lehlakore la Diabolose ’me le ka mohla re se ke ra felloa ke tšepo, hobane baena ba rōna ba utloisoa bohloko joaloka rōna. Ka mehla re hopole hore Jehova Molimo o tla re tiisa ’me o tla etsa hore re khone ho lula re tiile tumelong.
[Lebokose/Setšoantšo se leqepheng la 30]
Boitlhopho ba Basali: Ha a eletsa basali ba Bakreste, Petrose o itse: “Ho hlopheha ha lōna e se ke ea e-ba ho kantle, e leng moriri o foriloeng, kapa likhabiso tsa gauda, kapa liaparo tsa ho khaba; empa le hlophise motho ea ka sephiring, e leng oa pelo, ka khabo e sa senyeheng ea moea o mosa, o bonolo; hlopheho eo hase le ho rateha ho Molimo.” (1 Petrose 3:3, 4) Lekholong la pele la lilemo C.E., basali ba bahetene hangata ba ne ba e-na le mekhoa e khabileng ea ho lokisa meriri, ba loha meriri ea bona e melelele ka litaele tse hapang tlhokomelo ea batho ’me ba kenya mekhabiso ea gauda meriring ea bona e foriloeng. Mohlomong, ba bangata ba ne ba etsa joalo hore ba bonoe ke batho—e leng ntho e sa lokelang Bakreste. (1 Timothea 2:9, 10) Leha ho le joalo, ha se boitlhopho bohle bo sa lokang, hobane Petrose o kopanyelletsa “liaparo tsa ho khaba”—ho hlakile hore lia hlokahala. Mabenyane le oona a ne a sebelisoa ke bahlanka ba Molimo mehleng ea boholo-holo. (Genese 24:53; Exoda 3:22; 2 Samuele 1:24; Jeremia 2:32; Luka 15:22) Leha ho le joalo, mosali oa Mokreste ka bohlale o qoba mekhabiso e fetelletseng le moaparo o khabisitsoeng haholo ’me o lokela ho ba hlokolosi hore litlolo leha e le life tseo a li sebelisang a li sebelise ka mokhoa o itekanetseng. Ntlha eo keletso ea boapostola e e phahamisang ke hore ha aa lokela ho ameha haholo ka boitlhopho bo ka ntle, empa a amehe haholo ka boitlhopho bo ka hare. E le hore a ka ba motle e le ka ’nete, o lokela ho apara ka mokhoa o bontšang boikokobetso, ’me a be le boikutlo ba motho ea tšabang Molimo.—Liproverbia 31:30; Mikea 6:8.
[Tlhaloso ea Moo Setšoantšo se Nkiloeng Teng]
Israel Department of Antiquities and Museums; Israel Museum/David Harris