Kamohelo e Mofuthu ea Baeti ea Bokreste Lefatšeng le Arohaneng
“Ka hona, rōna, re tlas’a tlamo ea ho amohela batho ba joalo ka kamohelo e mofuthu ea baeti, e le hore re ka ba basebetsi-’moho ’neteng.”—3 JOHANNE 8.
1. ’Mōpi o file moloko oa batho limpho life tse lakatsehang ka ho fetisisa?
“HA HO se ka bang molemo ho motho tlas’a letsatsi, ha e se ho ja le ho noa le ho itumela; ke seo a se sietsoeng bakeng sa mokhathala oa hae oa matsatsi ’ohle a ho phela ha hae, ao Molimo o mo neileng ’ona tlas’a letsatsi.” (Moeklesia 8:15) Ka mantsoe ao ’mokelli oa Moheberu oa boholo-holo o re bolella hore hase feela hore Jehova Molimo o batla hore pōpo ea hae e motho e nyakalle le ho thaba empa hape o fana ka se tla e thabisa. Ho theosa le histori ea motho takatso e le ’ngoe e tloaelehileng har’a batho hohle ho bonahala eka ke ho ithabisa le ho ba le nako e monate.
2. (a) Moloko oa batho o sebelisitse hampe joang seo Jehova a o reretseng sona? (b) Phello ke efe?
2 Kajeno re phela sechabeng se phelelang menyaka seo ho sona batho ba amehileng ka ho feletseng ka ho phehella menyaka le linako tse monate. Batho ba bangata ba fetohile “baithati, . . . ba ratang menyaka ho e-na le ba ratang Molimo,” joalokaha Bibele e boletse esale pele. (2 Timothea 3:1-4) Ho hlakile hore sena ke ho khopamisoa ho hlakileng ha seo Jehova Molimo a se rerileng. Ha ho phehella linako tse monate ka bohona ho fetoha pakane e ka sehloohong kapa ha ho ikhotsofatsa e e-ba eona feela pakane, ha ho be le khotsofalo ea sebele, ’me ‘tsohle e ba lefeela le mosebetsi o nyopileng.’ (Moeklesia 1:14; 2:11) Ka lebaka leo, lefatše le tletse batho ba hlonameng le ba ferekaneng, e leng seo, ka lehlakoreng le leng se lebisang mathateng a mangata a sechaba. (Liproverbia 18:1) Batho baa belaellana ’me ba arohane ka merabe, bochaba le moruo.
3. Re ka fumana thabo le khotsofalo ea ’nete joang?
3 Lintho li ne li tla fapana hakaakang haeba batho ba ne ba ile ba etsisa tsela ea Jehova ea ho sebetsana le ba bang—ho ba mosa, ho fana ka seatla se bulehileng, ho amohela baeti ka mofuthu! O ile a etsa hore ho hlake hore lekunutu la thabo ea ’nete ha le ho lekeng ho khotsofatsa litakatso tsa rōna. Ho e-na le hoo, senotlolo ke sena: “Ho na le thabo e eketsehileng ho faneng ho feta e teng ho amoheleng.” (Liketso 20:35) Ho fumana thabo ea ’nete le khotsofalo, re tlameha ho hlōla mekoallo le likarohano tse ka ’nang tsa re khina. ’Me re tlameha ho finyella ba sebeletsang Jehova hammoho le rōna. Ho hlokahala hore re ele hloko keletso ena: “Ka hona, rōna, re tlas’a tlamo ea ho amohela batho ba joalo ka kamohelo e mofuthu ea baeti, e le hore re ka ba basebetsi-’moho ’neteng.” (3 Johanne 8) Ho amohela ba tšoanelehang ka mofuthu boeting, ho isa bohōleng boo maemo a rōna a re lumellang, ho molemo ka litsela tse peli—ho tlisetsa bafani le ba fanang molemo. Joale, ke bo-mang ba leng har’a ba tšoanelehang bao re lokelang ho ba ‘amohela ka kamohelo e mofuthu ea baeti’?
“Hlokomela Likhutsana le Bahlolohali”
4. Ho bonoa phetoho efe likamanong tsa lelapa esita le har’a ba bang ba batho ba Jehova?
4 Malapa a tsitsitseng le manyalo a thabileng ha a fumanehe habonolo kajeno. Tekanyo ea tlhalo e ntseng e phahama le lenane le ntseng le eketseha la bo-’mè ba sa nyaloang ho pota lefatše li fetotse ka ho tebileng lelapa le tloaelehileng. Ka lebaka leo, ba bangata ba fetohileng Lipaki tsa Jehova lilemong tsa morao tjena ba tsoa malapeng a qhalaneng. Ba hlalane le balekane ba bona ba lenyalo kapa ba arohane le bona kapa ba lula malapeng a motsoali a le mong. Ho phaella moo, joalokaha Jesu a boletse esale pele, ’nete eo a e rutileng e feletse ka likarohano malapeng a mangata.—Matheu 10:34-37; Luka 12:51-53.
5. Jesu o boletse eng eo e ka bang mohloli oa khothatso ho ba leng malapeng a arohaneng?
5 Ho bona ba bacha ’neteng ba emela ’nete ka tieo ho futhumatsa lipelo tsa rōna, ’me re atisa ho ba tšelisa ka tšepiso ea Jesu e khothatsang: “Kannete ke re ho lōna, Ha ho le ea mong ea siileng ntlo kapa barab’abo kapa baralib’abo kapa ’mè kapa ntate kapa bana kapa masimo ka lebaka la ka le ka lebaka la litaba tse molemo ea se nang ho fumana halekholo hona joale nakong ena, matlo le barab’abo le baralib’abo le bo-’mè le bana le masimo, hammoho le mahloriso, ’me tsamaisong ea lintho e tlang bophelo bo sa feleng.”—Mareka 10:29, 30.
6. Re ka ba ‘barab’abo, baralib’abo, bo-’mè le bana’ ba “likhutsana le bahlolohali” ba har’a rōna joang?
6 Leha ho le joalo, ‘bara le barali bana babo motho le bo-’mè le bana’ ke bo-mang? Ho bona feela batho ba bangata Holong ea ’Muso, hangata ba 100 kapa ho feta, ba ipitsang bara le barali babo rōna ha ho etse hore ho itlise hore motho a ikutloe hore bana ke barab’abo, baralib’abo, bo-’mè le bana ba hae. Nahana ka ntlha ena: Morutuoa Jakobo o re hopotsa hore, e le hore borapeli ba rōna bo ka amoheleha ho Jehova, re tlameha ‘ho hlokomela likhutsana le bahlolohali matšoenyehong a bona le hore re ipoloke re se na letheba lefatšeng.’ (Jakobo 1:27) Seo se bolela hore re tlameha hore re se lumelle litšekamelo tsa lefatše tsa ho ikhohomosa ka lebaka la ho rua le la ho ba boemong bo phahameng sechabeng bo etse hore re se qenehele “likhutsana le bahlolohali” ba joalo. Ho e-na le hoo, re tlameha ho nka bohato ba pele ho ba bontša botsoalle le ho ba amohela boeting ka mofuthu.
7. (a) Morero oa sebele oa ho amohela “likhutsana le bahlolohali” ka mofuthu boeting ke ofe? (b) Ke bo-mang hape ba ka khonang ho kopanela ho bontšeng kamohelo e mofuthu ea baeti ea Bokreste?
7 Ho amohela “likhutsana le bahlolohali” ka mofuthu boeting hase kamehla ho akarelletsang ho ba fa seo e ka ’nang eaba baa se hloka linthong tse bonahalang. Malapa a motsoali a le mong kapa a arohaneng bolumeling hase hakaalo hore aa hloka licheleteng. Leha ho le joalo, botsoalle bo molemo, tikoloho ea lelapa, bolekane ba batho ba lilemo tse sa tšoaneng le ho kopanela lintho tsa moea tse molemo—tsena ke litšobotsi tsa bophelo tsa bohlokoa. Kahoo, ho hopola hore hase boholo ba ketsahalo, empa ke moea oa lerato le bonngoe tseo e leng tsa bohlokoa, ho hotle hakaakang hore ebe, ka linako tse ling, esita le “likhutsana le bahlolohali” ba ka kopanela ho amoheleng Bakreste-’moho le bona ka mofuthu boeting!—Bapisa le 1 Marena 17:8-16.
Na ho na le Basele Har’a Rōna?
8. Ho bonoa phetoho efe liphuthehong tsa Lipaki tsa Jehova tse ngata?
8 Re phela nakong ea ha batho ba bangata ba falla. World Press Review e re: “Batho ba fetang limilione tse 100 ho pota lefatše ba lula linaheng tseo e seng baahi ba tsona, ’me ba limilione li 23 ba ile ba qobelloa ho tloha ha habo bona.” Phello e tobileng ea sena e ’nile ea e-ba hore libakeng tse ngata, haholo-holo metseng e meholoanyane, liphutheho tsa batho ba Jehova tseo litho tsa tsona e kileng ea e-ba tsa morabe o le mong kapa tsa sechaba se le seng hona joale li na le batho ba tsoang likarolong tse sa tšoaneng tsa lefatše. Mohlomong sena sea etsahala sebakeng seo u leng ho sona. Leha ho le joalo, re lokela ho talima “bajaki” baa le “basele” joang, kamoo lefatše le ka ’nang la ba bitsa kateng, bao puo, litloaelo le mekhoa ea bophelo tsa bona li ka ’nang tsa fapana le tsa rōna?
9. Re ka tšoasoa ke leraba lefe mabapi le pono ea rōna ka “bajaki” le “basele” ba kenang ka phuthehong ea Bokreste?
9 Habonolo feela, re tlameha ho se lumelle litšekamelo leha e le life tsa tšabo e feteletseng ea basele ho etsa hore re ikutloe hore re tšoaneleha haholoanyane bakeng sa tokelo ea ho tseba ’nete ho feta ba tsoang naheng esele kapa eo ho thoeng ke ea bohetene; leha e le hore re lokela ho ikutloa joalokaha eka bana ba sa tsoa fihla ba kena-kenana le tšebeliso ea Holo ea ’Muso kapa thepa e ’ngoe. Moapostola Pauluse o ile a tlameha ho hopotsa Bakreste ba bang ba Bajuda ba lekholong la pele la lilemo, ba neng ba koetlile maikutlo a joalo, hore ha e le hantle ha ho motho ea neng a tšoaneleha; e ne e le feela mosa oa Molimo o sa tšoanelang o ileng oa etsa hore ho be bonolo hore mang kapa mang a pholohe. (Baroma 3:9-12, 23, 24) Re tlameha ho thabela hore ebe mosa oa Molimo o sa tšoanelang hona joale o finyella batho ba bangata hakana bao ka tsela ena kapa eane ba neng ba amohiloe monyetla oa ho utloa litaba tse molemo. (1 Timothea 2:4) Re ka bontša joang hore lerato la rōna bakeng sa bona ha le na boikaketsi?
10. Re ka bontša joang hore re amohela “basele” ba har’a rōna ka mofuthu boeting ka ntle ho boikaketsi?
10 Re ka latela keletso ea Pauluse: “Amohelanang ka mofuthu, feela joalokaha Kreste le eena a ile a re amohela ka mofuthu, ka tebello ea khanya ho Molimo.” (Baroma 15:7) Kaha rea lemoha hore batho ba tsoang linaheng kapa limelong tse ling hangata ke ba hlokang, re lokela ho ba mosa ho bona le ho ameha ka bona ha ho le matleng a rōna ho etsa joalo. Re lokela ho ba amohela har’a rōna, re tšoare e mong le e mong oa bona ‘joalo ka ha re etsa ea tsoaletsoeng ha habo rōna,’ ’me ‘re mo rate joalo ka ha re ithata.’ (Levitike 19:34) Sena se ka ’na sa se be bonolo, empa re tla atleha haeba re hopola keletso ena: “Le khaotse ho ba ka sebōpeho sa tsamaiso ena ea lintho, empa le fetohe ka ho nchafatsa likelello tsa lōna, e le hore le ka ipakela e le lōna thato ea Molimo e molemo le e amohelehang le e phethahetseng.”—Baroma 12:2.
Arolelana le Bahalaleli
11, 12. Ho ile ha nahaneloa bahlanka ba Jehova ba itseng ka tsela efe e khethehileng (a) Iseraeleng ea boholo-holo (b) lekholong la pele la lilemo?
11 Har’a bao ka sebele ba tšoaneloang ke kameho ea rōna le kamohelo e mofuthu ea rōna boeting ke Bakreste ba hōlileng tsebong ba sebetsang ka thata bakeng sa boiketlo ba rōna moeeng. Jehova o ne a entse litokisetso tse khethehileng bakeng sa baprista le Balevi Iseraeleng ea boholo-holo. (Numere 18:25-29) Lekholong la pele la lilemo, Bakreste ba ile ba boela ba khothalletsoa ho hlokomela ba neng ba sebeletsa maemong a khethehileng. Tlaleho e ho 3 Johanne 5-8 e re fa tlhase ea kamano e haufi e lerato e neng e le teng har’a Bakreste ba pele.
12 Moapostola Johanne ea hōlileng lilemong o ile a ananela mosa le kamohelo e mofuthu ea baeti tseo Gaiase a neng a li bontšitse barab’abo ba itseng ba tsamaeang ba neng ba rometsoe ho etela phutheho. Bara bana babo—ho akarelletsa le Demetriase, eo ho bonahalang eka ke eena ea ileng a fetisa lengolo lena—kaofela e ne e le basele kapa bao Gaiase a neng a sa ba tsebe pele. Empa ba ile ba amoheloa ka mofuthu boeting hobane e ne e le “ka lebaka la lebitso la [Molimo] ba ileng ba tsoa.” Johanne o ile a beha taba ka tsela ena: “Ka hona, rōna, re tlas’a tlamo ea ho amohela batho ba joalo ka kamohelo e mofuthu ea baeti, e le hore re ka ba basebetsi-’moho ’neteng.”—3 Johanne 1, 7, 8.
13. Har’a rōna kajeno ke bo-mang bao ka ho khetheha ba tšoaneloang ke ‘ho amoheloa ka kamohelo e mofuthu ea baeti’?
13 Kajeno, ka har’a mokhatlo o hlophisitsoeng oa Jehova, ho na le ba bangata ba ikitlaetsang ka matla molemong oa mokhatlo oohle oa barab’abo rōna. Bana ba akarelletsa balebeli ba tsamaeang, ba sebelisang nako ea bona le matla beke ka mor’a e ’ngoe ho haha liphutheho; baromuoa, ba sieang malapa le metsoalle ho ea bolela linaheng lisele; ba sebeletsang mahaeng a Bethele kapa liofising tsa makala, ba nehelanang ka tšebeletso ea bona ho tšehetsa mosebetsi oa ho bolela lefatšeng ka bophara; le ba leng tšebeletsong ea bopula-maliboho, ba sebelisang boholo ba nako ea bona le matla tšebeletsong ea tšimo. Ha e le hantle, bana bohle ba sebetsa ka thata, e seng bakeng sa tlotla ea botho kapa molemo, empa ka lebaka la lerato la bara ba motho ba Bakreste le bakeng sa Jehova. Re lokela ho ba etsisa ka lebaka la boinehelo ba bona ba moea oohle ’me ba tšoaneloa ke ‘ho amoheloa ka kamohelo e mofuthu ea baeti.’
14. (a) Re ba Bakreste ba molemonyana joang ha re amohela ba tšepahalang ka mofuthu boeting? (b) Ke hobane’ng ha Jesu a ile a re Maria o khethile “karolo e ntle”?
14 Ha re “amohela batho ba joalo ka kamohelo e mofuthu ea baeti,” moapostola Johanne o ile a bontša hore re “ba basebetsi-’moho ’neteng.” Ka lebaka leo, ka tsela e itseng re fetoha Bakreste ba molemonyana. Sena se etsahala hobane mesebetsi ea Bokreste e akarelletsa ho etsa se molemo ho balumeli-’moho le rōna. (Liproverbia 3:27, 28; 1 Johanne 3:18) Ho na le meputso ka tsela e ’ngoe hape. Ha Maria le Maretha ba ne ba amohela Jesu lapeng labo bona, Maretha o ne a batla ho ba moamoheli oa baeti ea molemo ka ho lokisetsa Jesu “lintho tse ngata.” Maria o ile a bontša hore o amohela baeti ka mofuthu ka tsela e fapaneng. O ile a “lula fatše maotong a Morena ’me a lula a mametse lentsoe la hae,” ’me Jesu o ile a mo babaletsa ho khetha “karolo e ntle.” (Luka 10:38-42) Meqoqo le lipuisano le ba nang le phihlelo ea nako e telele hangata ke lintlha tse khōlō tsa mantsiboea ao ka ’ona re bileng ’moho le bona.—Baroma 1:11, 12.
Liketsahalong Tse Khethehileng
15. Ke liketsahalo life tse khethehileng tse ka ipakang e le linako tse thabisang ho batho ba Jehova?
15 Le hoja Bakreste ba ’nete ba sa latele litloaelo tse atileng kapa ho boloka matsatsi a phomolo a lefatše le mekete, ho na le linako tse ling tseo ka tsona ba bokanang hammoho ho thabela botsoalle ba e mong ho e mong. Ka mohlala, Jesu o ile a ba teng moketeng oa lenyalo Kana ’me a tlatsetsa thabong ea ketsahalo eo ka ho etsa mohlolo oa hae oa pele moo. (Johanne 2:1-11) Ka ho tšoanang, kajeno batho ba Jehova ba ba le linako tse thabisang ba le hammoho liketsahalong tse tšoanang le tseo tse khethehileng, ’me ho keteka ho loketseng le thabo li eketsa ho hongata liketsahalong tse joalo. Leha ho le joalo, ke’ng se loketseng?
16. Re na le lintlha life tse re tataisang mabapi le boitšoaro bo botle esita le liketsahalong tse khethehileng?
16 Thutong ea rōna ea Bibele, re ithuta boitšoaro bo loketseng Bakreste, ’me re phela tumellanong le bona ka linako tsohle. (Baroma 13:12-14; Bagalata 5:19-21; Baefese 5:3-5) Lipokano tsa boithabiso, ebang ke tsa machato kapa tse etsoang ka morero ofe kapa ofe, ha li re nehe bolokolohi ba ho furalla litekanyetso tsa rōna tsa Bokreste kapa ho etsa ntho e itseng eo ka tloaelo re neng re ke ke ra e etsa; leha e le hona hore re tlamehile ho phela tumellanong le litloaelo tsohle tsa naha eo re lulang ho eona. Tse ngata tsa tsona li thehiloe mekhoeng ea bolumeli ba bohata kapa litumela-khoeleng, ’me tse ling li akarelletsa boitšoaro boo ho hlakileng hore ha bo amohelehe ho Bakreste.—1 Petrose 4:3, 4.
17. (a) Ke lintlha life tse bontšang hore mokete oa lechato Kana o ne o hlophisitsoe hantle ’me o laoloa hantle? (b) Ke’ng se bontšang hore Jesu o ile a amohela ketsahalo eo?
17 Ka ho bala Johanne 2:1-11, ha ho thata hore re bone hore ketsahalo eo e ne e le e khōlō le hore ho ne ho e-na le baeti ba bangata haholo. Leha ho le joalo, Jesu le barutuoa ba hae e ne e le baeti ba ‘menngoeng’; ha baa ka ba fihla feela ba sa lebelloa, le hoja ho ka etsahala hore bonyane ba bang ba bona ba ne ba amana le mong’a mokete. Hape rea hlokomela hore ho ne ho e-na le ba “sebeletsang,” hammoho le “motsamaisi,” ba neng ba tla fana ka litaelo tsa hore na batho ba ka fuoa eng kapa ha etsoa eng. Sena sohle se bontša hore ketsahalo ena e ne e hlophisitsoe hantle ebile e laoloa hantle. Tlaleho ena e qetella ka ho bolela hore ka seo a se entseng moketeng, Jesu o ile a “bonahatsa khanya ea hae.” Na a ka be a khethile ho etsa seo ketsahalong eo haeba e ne e le phathi e lerata le e sa laoleheng? Ha ho pelaelo hore o ne a ke ke a etsa joalo.
18. Ke’ng se lokelang ho nahanoa ka ho teba mabapi le ketsahalo efe kapa efe ea boithabiso?
18 Joale, ho thoe’ng ka liketsahalo life kapa life tse khethehileng tseo re ka ’nang ra li lokisetsa? Re batla ho hopola hore morero oa ho amohela ba bang ka mofuthu boeting ke hore kaofela re ka “ba basebetsi-’moho ’neteng.” Kahoo, ha hoa lekana ho bitsa ketsahalo e itseng pōkano ea “Lipaki.” Ho ka ’na ha botsoa potso, Na ha e le hantle e fana ka bopaki ba seo re leng sona le seo re se lumelang? Le ka mohla ha rea lokela ho talima liketsahalo tse joalo e le menyetla ea ho bona hore na re ka etsisa mekhoa ea lefatše ho ea bohōleng bofe, ka ho inehela ‘takatsong ea nama le takatsong ea mahlo le pontšong ea mponeng ea mokhoa oa motho oa boipheliso.’ (1 Johanne 2:15, 16) Ho e-na le hoo, liketsahalo tsena li tlameha ho bonahatsa hantle karolo ea rōna re le Lipaki tsa Jehova, ’me re lokela ho tiiseha hore seo re se etsang se tlisa khanya le tlotla ho Jehova.—Matheu 5:16; 1 Bakorinthe 10:31-33.
‘E-bang le Kamohelo e Mofuthu ea Baeti Ntle ho ho Honotha’
19. Ke hobane’ng ha ho hlokahala hore re be le “kamohelo e mofuthu ea baeti e mong ho e mong ntle ho ho honotha”?
19 Ha maemo a lefatše a ntse a mpefala ’me batho ba ntse ba arohana haholoanyane, ho hlokahala hore re etse sohle seo re ka se khonang ho matlafatsa tlamo e haufi e leng har’a Bakreste ba ’nete. (Bakolose 3:14) Ka lebaka lena re tlameha ho ba le “lerato le matla haholo e mong ho e mong,” joalokaha Petrose a ile a re phehella. Joale, boemong ba sebele, o ile a eketsa: “E-bang le kamohelo e mofuthu ea baeti e mong ho e mong ntle ho ho honotha.” (1 Petrose 4:7-9) Na re ikemiselitse ho nka bohato ba pele ba ho amohela barab’abo rōna ka mofuthu, ho ikitlaelletsa ho ba mosa le ho ba molemo? Kapa na rea honotha ha monyetla o joalo o hlaha? Haeba re etsa joalo, re senya thabo eo re neng re tla ba le eona, ’me re boetse re lahleheloa ke moputso oa thabo ea ho etsa se molemo.—Liproverbia 3:27; Liketso 20:35.
20. Re letetsoe ke litlhohonolofatso life haeba re ho etsa mokhoa oa rōna ho amohela baeti ka mofuthu lefatšeng la kajeno le arohaneng?
20 Ho sebetsa haufi-ufi le Bakreste-’moho le rōna, ho ba mosa le ho amohelana ka mofuthu boeting, ho tla tlisa litlhohonolofatso tse sa lekanngoeng. (Matheu 10:40-42) Ho ba joalo Jehova o ile a tšepisa hore o ne a tla “ala tente ea hae holim’a bona. Ba [ne ba sa tl’o] hlola ba lapa leha e le ho nyoroa.” Ho ba ka har’a tente ea Jehova ke ho thabela tšireletso ea hae le kamohelo ea hae e mofuthu boeting. (Tšenolo 7:15, 16; Esaia 25:6) E, ka pele feela ho na le tebello ea ho thabela kamohelo e mofuthu ea Jehova boeting ka ho sa feleng.—Pesaleme ea 27:4; 61:3, 4.
Na U ka Hlalosa?
◻ Ke’ng seo re sa tšoanelang ho se hlokomoloha haeba re batla ho fumana thabo le khotsofalo ea ’nete?
◻ “Likhutsana le bahlolohali” ke bo-mang, hona re lokela ho ba “hlokomela” joang?
◻ Re lokela ho ba le pono efe ka “bajaki” le “basele” ba har’a rōna?
◻ Ke bo-mang ba lokelang ho nahaneloa ka ho khethehileng kajeno?
◻ Liketsahalo tse khethehileng li lokela ho bontša moea oa ’nete oa kamohelo e mofuthu ea baeti joang?
[Setšoantšo se leqepheng la 16, 17]
Meketeng re ka amohela ka mofuthu basele, bana ba se nang bo-ntat’a bona, ba tšebeletsong ea nako e tletseng le baeti ba bang