Balisa Bao e Leng “Mehlala ho Mohlape”

“Lisang mohlape oa Molimo o tlhokomelong ea lōna, . . . ka ho rata, . . . ka tabatabelo, . . . le e-ba mehlala ho mohlape.”—1 PETROSE 5:2, 3.

1, 2. (a) Jesu o ile a fa Petrose boikarabelo bofe, hona ke hobane’ng ha Jesu a ne a sa fosa ka ho mo tšepa? (b) Jehova o ikutloa joang ka balisa ba behiloeng ka phuthehong?

NAKOANA pele ho Pentekonta ea 33 C.E., Petrose le barutuoa ba bang ba tšeletseng ba ne ba ntse ba ja lijo tsa hoseng tse neng li apehiloe ke Jesu mabōpong a Leoatle la Galilea. E ne e se lekhetlo la pele Petrose a bona Jesu ka mor’a hore a tsosoe bafung, ’me ha ho pelaelo hore o ne a thabetse ho tseba hore Jesu oa phela. Empa ho ka etsahala hore ebe Petrose o ne a boetse a tšoenyehile. Lebaka e ne e le hore matsatsing a seng makae a fetileng, o ne a ile a latola pontšeng hore o tseba Jesu. (Luka 22:55-60; 24:34; Johanne 18:25-27; 21:1-14) Na Jesu o ile a khalemela Petrose ea bakileng ka matla hobane tumelo ea hae e ile ea fokola? Che. Ho e-na le hoo, o ile a fa Petrose boikarabelo ba ho fepa le ho lisa “linku . . . tse nyenyane” tsa Jesu. (Johanne 21:15-17) Joalokaha tlaleho ea Bibele ea histori ea phutheho ea Bokreste ea lekholong la pele la lilemo e bontša, Jesu o ne a sa fosa ka ho tšepa Petrose. Petrose le baapostola ba bang hammoho le banna ba bang ba baholo ba Jerusalema, ba ile ba lisa phutheho ea Bokreste nakong ea liteko tse matla ebile e le nakong eo e neng e eketseha ka potlako.—Liketso 1:15-26; 2:14; 15:6-9.

² Kajeno, Jehova o sebelisitse Jesu hore a behe banna ba tšoanelehang ba sebeletsang e le balisa ba moea hore ba etelle pele linku tsa Hae linakong tse mahlonoko bophelong ba batho. (Baefese 4:11, 12; 2 Timothea 3:1) Na ho na le lebaka le utloahalang la hore Jehova a tšepe banna baa? Mokhatlo oa Bokreste o nang le khotso o lefatšeng ka bophara oa bara ba motho, o bontša hore hase phoso ho ba tšepa. Ke ’nete hore balisa bana ke batho ba etsang liphoso, joalokaha Petrose a ne a etsa liphoso. (Bagalata 2:11-14; Jakobo 3:2) Leha ho le joalo, Jehova o ba tšepile hore ba tla hlokomela linku tseo “a [li] rekileng ka mali a Mora oa hae.” (Liketso 20:28) Jehova o rata banna bana haholo, ’me o nka hore ba “tšoaneloa ke tlhompho e habeli.”—1 Timothea 5:17.

 3. Balisa ba moea ba etsa joang hore ba lule ba e-na le moea oa boithaopo le oa cheseho?

³ Balisa ba moea ba etsa joang hore ba lule ba e-na le moea oa boithaopo le oa cheseho, ’me kahoo e e-ba mehlala ho mohlape? Joaloka Petrose le balisa ba bang ba lekholong la pele la lilemo, ba tšepa moea o halalelang oa Molimo, o ba fang matla ao ba a hlokang e le hore ba jare boikarabelo ba bona. (2 Bakorinthe 4:7) Moea o halalelang o boetse o hlahisa ka ho bona tholoana ea moea—e leng lerato, thabo, khotso, tiisetso, mosa, molemo, tumelo, bonolo le boitšoaro. (Bagalata 5:22, 23) A re ke re hlahlobeng litsela tse ling tse tobileng tseo ka tsona balisa ba ka behang mohlala ka ho bontša tholoana ena ha ba ntse ba lisitse mohlape oa Molimo o tlhokomelong ea bona.

Ratang Mohlape le Nku e ’Ngoe le e ’Ngoe

4, 5. (a) Jehova le Jesu ba bontša joang hore ba rata mohlape? (b) Ke litsela life tse ling tseo ka tsona balisa ba moea ba bontšang hore ba rata mohlape?

⁴ Tšobotsi e ka sehloohong e hlahisoang ke moea oa Molimo ke lerato. Jehova o bontša hore o rata mohlape kaofela ka ho o fa nala ea lijo tsa moea. (Esaia 65:13, 14; Matheu 24:45-47) Empa, ha a fepe mohlape feela. O boetse o ameha ka lerato ka nku e ’ngoe le e ’ngoe. (1 Petrose 5:6, 7) Jesu le eena o rata mohlape. O ile a nehelana ka moea oa hae molemong oa oona, ’me o tseba nku e ’ngoe le e ’ngoe ‘ka lebitso.’—Johanne 10:3, 14-16.

⁵ Balisa ba moea ba etsisa Jehova le Jesu. Ba bontša hore ba rata mohlape oohle oa Molimo ka ho ‘ikitlaelletsa ho ruta phutheho.’ Lipuo tsa bona tse thehiloeng Bibeleng li thusa hore mohlape o feptjoe o be o sireletsoe, ’me boikitlaetso ba bona ntlheng ena bo bonoa ke bohle. (1 Timothea 4:13, 16) Empa lintho tse sa bonoeng ke bohle ke nako eo ba e qetang ba hlokomela litlaleho tsa phutheho, ba sebetsana le mangolo, ba etsa likemiso le ho hlokomela makolopetso a mang a mangata ho tiisa hore liboka tsa phutheho le lintho tse ling li etsoa “ka mokhoa o hlomphehang le ka tlhophiso.” (1 Bakorinthe 14:40) Phutheho ha e bone boholo ba mosebetsi ona o etsoang ’me ba bangata ha ba tsebe ka oona. Ka sebele ke mosebetsi o etsoang ka lerato.—Bagalata 5:13.

6, 7. (a) Tsela e ’ngoe eo balisa ba tsebang linku hamolemo ka eona ke efe? (b) Ke hobane’ng ha ho le molemo hore ka linako tse ling re bolelle moholo kamoo re ikutloang kateng?

⁶ Balisa ba lerato ba Bakreste ba leka ho bontša thahasello nkung e ’ngoe le e ’ngoe e ka phuthehong. (Bafilipi 2:4) Tsela e ’ngoe eo balisa ba tsebang nku e ’ngoe le e ’ngoe ka eona ke ka ho sebetsa le tsona mosebetsing oa ho bolela phatlalatsa. Hangata Jesu o ne a tsamaea le balateli ba hae mosebetsing oa boboleli ’me o ne a sebelisa linako tse joalo hore a ba khothatse. (Luka 8:1) Molebeli e mong oa Mokreste ea nang le tsebo o re: “Ke ithutile hore tsela e ’ngoe e molemohali eo nka tsebang mora kapa morali’eso ka eona, ke ka ho sebetsa le eena tšimong.” Haeba ho se ho fetile nako e itseng ho se moholo eo u kileng ua sebetsa le eena tšimong, na ebe u ka etsa litokisetso tsa hore u sebetse le e mong oa bona haufinyane?

⁷ Lerato le ile la susumelletsa Jesu hore a thabe ’moho le balateli ba hae, a be a sareloe le bona. Ka mohlala, ha barutuoa ba hae ba 70 ba khutla ba thabile boboleling, Jesu o ile a “nyakalla.” (Luka 10:17-21) Empa, ‘Jesu o ile a lla’ ha a bona kamoo lefu la Lazaro le neng le amme Maria le ba lelapa labo hammoho le metsoalle kateng. (Johanne 11:33-35) Ka tsela e tšoanang, kajeno balisa ba nang le lerato ha ba iphapanyetse maikutlo a linku. Lerato le ba susumelletsa ho ‘thaba le batho ba thabileng’ le ho ‘lla le batho ba llang.’ (Baroma 12:15) Ha u thabile kapa u saretsoe bophelong, lokoloha ho hlalosetsa balisa ba Bakreste kamoo u ikutloang kateng. Ba tla khothala ha ba utloa hore u thabile. (Baroma 1:11, 12) Ba tla u matlafatsa le ho u khothatsa ha ba tseba liteko tsa hao.—1 Bathesalonika 1:6; 3:1-3.

8, 9. (a) Moholo e mong o ile a bontša joang hore o rata mosali oa hae? (b) Ho bohlokoa hakae hore molisa a bontše hore o rata lelapa la hae?

⁸ Lerato leo molisa a ratang mohlape ka lona le totobala ka ho khethehileng ka tsela eo a tšoarang lelapa la hae ka eona. (1 Timothea 3:1, 4) Haeba a nyetse, lerato le tlhompho tseo a li bontšang mosali oa hae, li beha mohlala oo banna ba bang ba ka o etsisang. (Baefese 5:25; 1 Petrose 3:7) Nahana ka se ileng sa boleloa ke mosali e mong oa Mokreste ea bitsoang Linda. Monna oa hae o ile a sebetsa e le molebeli ka lilemo tse fetang tse 20 pele a hlokahala. O re: “Monna oa ka o ne a e-na le mosebetsi o mongata haholo oa ho hlokomela phutheho. Empa o ne a etsa hore ke ikutloe hore le ’na ke kentse letsoho ho seo a se etsang. Hangata o ne a leboha hore ebe ke mo tšehelitse, ’me ha a ne a sa etse mesebetsi ea phutheho, re ne re thaba hammoho. Ka lebaka leo, ke ne ke utloa hore oa nthata ’me ke sa boulele nako eo a neng a e qeta a sebeletsa phutheho.”

⁹ Haeba molisa oa Mokreste a e-na le bana, tsela e lerato eo ka eona a khalemelang bana bao a bileng a ba babatsang ka eona kamehla, e beha mohlala oo batsoali ba bang ba ka o latelang. (Baefese 6:4) Ha e le hantle, lerato leo a le bontšang lelapa la hae ke bopaki bo tsoelang pele ba hore o phelela boikarabelo boo a ileng a bo fuoa ha moea o halalelang o ne o mo beha hore e be molisa.—1 Timothea 3:4, 5.

Hōlisang Thabo le Khotso ka ho Buisana

10. (a) Ke eng e ka senyang thabo ea phutheho le khotso ea eona? (b) Ke khang efe e ileng ea sokela khotso ea phutheho ea lekholong la pele la lilemo, ’me khang ee e ile ea rarolloa joang?

¹⁰ Moea o halalelang o ka etsa hore ho be le thabo le khotso pelong ea Mokreste ka mong, sehlopheng sa baholo le phuthehong kaofela. Empa ha batho ba pata maikutlo a bona, thabo ena le khotso li ka senyeha. Solomone oa boholo-holo o ile a re: “Merero ea senyeha moo ho se nang lekunutu.” (Liproverbia 15:22) Empa, ho buisana ka tlhompho le ho se pate maikutlo ho hōlisa thabo le khotso. Ka mohlala, ha khang ea lebollo e ne e sokela khotso ea phutheho ea lekholong la pele la lilemo, sehlopha se busang se neng se le Jerusalema se ile sa batla tataiso ea moea o halalelang. Baholo bana le bona ba ile ba bolela maikutlo a bona a sa tšoaneng tabeng ena. Ka mor’a ho buisana halelele ka taba ena, ba ile ba fihlela qeto. Ha ba bolella liphutheho qeto ea bona e entsoeng ka tumellano, barab’abo rōna ba ile ba “thabela khothatso eo.” (Liketso 15:6-23, 25, 31; 16:4, 5) Thabo le khotso li ile tsa hōla.

11. Baholo ba ka hōlisa thabo le khotso joang ka phuthehong?

¹¹ Ka tsela e tšoanang, le kajeno balisa ba hōlisa thabo le khotso ka phuthehong ka hore ba buisane hantle. Ha ho bonahala hore mathata a ka senya khotso ea phutheho, baa kopana ebe ba bolela maikutlo a bona ka bolokolohi. Ba mamelana ka tlhompho ha e mong a bua. (Liproverbia 13:10; 18:13) Ka mor’a ho rapella moea o halalelang, ba theha liqeto tsa bona melao-motheong ea Bibele le tataisong e ngotsoeng ke “lekhoba le tšepahalang le le masene.” (Matheu 24:45-47; 1 Bakorinthe 4:6) Ha sehlopha sa baholo se entse qeto e thehiloeng Mangolong, moholo e mong le e mong o ikokobelletsa tataiso ea moea o halalelang ka ho tšehetsa qeto eo esita le haeba ba bangata ba sa lumellana le pono ea hae. Ho ikokobelletsa qeto e entsoeng ke bongata, ho hōlisa thabo le khotso ’me ho behela linku mohlala oa hore na li tsamaee le Molimo joang. (Mikea 6:8) Na ka boinyenyefatso u latela liqeto tse thehiloeng Bibeleng tse entsoeng ke balisa ba phutheho?

Le Tiisetse ’Me le be Mosa

12. Ke hobane’ng ha ho ne ho hlokahala hore Jesu a tiisetse ’me a be mosa ha a sebelisana le baapostola?

¹² Jesu o ne a tiisetsa a bile a le mosa ha a sebelisana le baapostola ba hae, ho sa tsotellehe liphoso tseo ba neng ba li etsa nako le nako. Ka mohlala, nako le nako Jesu o ne a leka ho kenya ka botebo likelellong tsa bona hore boikokobetso ke ntho ea bohlokoa. (Matheu 18:1-4; 20:25-27) Leha ho le joalo, bosiung ba ho qetela ba ha Jesu a phela lefatšeng, nakoana ka mor’a ho ruta barutuoa boikokobetso ka ho ba hlatsoa maoto, ho ile “ha boela ha tsoha phehisano e chesang har’a bona ka hore na ke ofe ho bona ea neng a bonahala eka ke e moholo.” (Luka 22:24; Johanne 13:1-5) Na Jesu o ile a khalemela baapostola ka bohale? Che, o ile a buisana le bona ka mosa, a re: “Ke ofe e moholo, ea otlileng ka lehlakore tafoleng kapa ea sebeletsang? Na hase ea otlileng ka lehlakore tafoleng? Empa ’na ke har’a lōna joaloka ea sebeletsang.” (Luka 22:27) Qetellong, lipelo tsa baapostola li ile tsa angoa ke ho tiisetsa ha Jesu, hammoho le mosa oa hae le mohlala oa hae o motle.

13, 14. Balisa ba lokela ho ba mosa haholo-holo neng?

¹³ Ka ho tšoanang, ho ka ’na ha hlokahala hore nako le nako molisa oa moea a eletse motho e mong mabapi le bofokoli bo itseng. Molisa a ka ’na a halefisoa ke motho eo. Leha ho le joalo, haeba nakong eo a ‘eletsang ea sa laoleheng’ a ntse a hopola hore le eena oa fokola, a ka khona ho bontša mamello le mosa ho mor’abo. Ka tsela eo, o tla be a etsisa Jesu le Jehova, e leng bona ba bontšang litšobotsi tsena ho Bakreste bohle, ho akarelletsa le balisa.—1 Bathesalonika 5:14; Jakobo 2:13.

¹⁴ Ka linako tse ling, ho ka hlokahala hore balisa ba fane ka keletso e matla ha ba bua le motho ea entseng sebe se seholo. Haeba motho eo a sa bake, baholo ba lokela ho tlosa mofosi eo ka phuthehong. (1 Bakorinthe 5:11-13) Leha ho le joalo, mokhoa oo ba tšoarang motho eo ka oona o bontša hore ba hloile sebe, eseng moetsalibe. (Juda 23) Mosa oa balisa o ka ’na oa thusa nku e lahlehang hore qetellong e khutlele mohlapeng.—Luka 15:11-24.

Liketso Tse Molemo li Susumetsoa ke Tumelo

15. Tsela e ’ngoe eo balisa ba etsisang molemo oa Jehova ka eona ke efe, ’me ba susumetsoa ke eng hore ba etse joalo?

¹⁵ “Jehova o molemo ho bohle,” esita le ho ba sa leboheng seo a ba etsetsang sona. (Pesaleme ea 145:9; Matheu 5:45) Molemo oa Jehova o bonahala haholo ka hore o roma batho ba hae hore ba e’o bolela ‘litaba tse molemo tsa ’muso.’ (Matheu 24:14) Balisa ba bontša molemo oa Molimo ka ho etella pele mosebetsing ona oa boboleli. Ke eng se ba susumelletsang hore ba ’ne ba tsoele pele ka mosebetsi oo? Ke ho lumela ho Jehova le ho lumela litšepiso tsa hae ka matla.—Baroma 10:10, 13, 14.

16. Balisa ba ka “sebetsa se molemo” joang mabapi le linku?

¹⁶ Ntle ho ho ‘sebetsa se molemo ho bohle’ ka ho bolela litaba tse molemo, balisa ba boetse ba na le boikarabelo ba ho sebetsa se molemo “haholo-holo ho ba amanang le [bona] tumelong.” (Bagalata 6:10) Tsela e ’ngoe eo ba etsang sena ka eona ke ka maeto a khothatsang a bolisa. Moholo e mong o re: “Ke rata ho etsa maeto a bolisa. A mpha monyetla oa ho babatsa bara le barali beso ka boiteko ba bona le ho ba thusa ho utloisisa hore boikitlaetso ba bona boa ananeloa.” Ka linako tse ling, balisa ba ka eletsa mohoeletsi hore na a ka ntlafatsa joang tšebeletsong ea Jehova. Ka ho etsa joalo, balisa ba bohlale ba etsisa moapostola Pauluse. Nahana kamoo a ileng a ipiletsa kateng ho barab’abo ba Thesalonika ha a ne a re: “Re na le kholiseho ho Morena mabapi le lōna, hore lea etsa ’me le tla tsoela pele le etsa lintho tseo re li laelang.” (2 Bathesalonika 3:4) Mantsoe a kang ana, a bontšang hore balisa ba tšepa linku, a tsosa linku molota ’me a li nolofalletsa ho ‘mamela ba etellang pele.’ (Baheberu 13:17) Ha baholo ba u etetse ho tla u khothatsa, ke hobane’ng ha u sa bolele hore u thabetse hore ebe ba u etetse?

Bonolo bo Hloka Boitšoaro

17. Petrose o ile a ithuta eng ho Jesu?

¹⁷ Jesu o ne a le bonolo, esita leha a ne a halefisitsoe. (Matheu 11:29) Nakong eo Jesu a neng a ekoa le ho tšoaroa ka eona, o ile a bontša bonolo le boitšoaro haholo. Petrose o ile a hula sabole ka lepotlapotla ho iphetetsa. Empa Jesu o ile a mo hopotsa: “U nahana hore nke ke ka ipiletsa ho Ntate hore a mphe ka oona motsotso oo lilegione tse fetang leshome le metso e ’meli tsa mangeloi?” (Matheu 26:51-53; Johanne 18:10) Petrose o ile a tebisetsa taba ena pelong ’me hamorao o ile a hopotsa Bakreste, a re: “Kreste o ile a utloa bohloko bakeng sa lōna, a le siela mohlala hore le latele mehato ea hae haufi-ufi. . . . Ha a ne a ntse a hlapaoloa, ha aa ka a qala ho iphetetsa ka ho hlapaola. Ha a ne a utloa bohloko, ha aa ka a qala ho soka.”—1 Petrose 2:21-23.

18, 19. (a) Balisa ba lokela ho bontša bonolo le boitšoaro neng ka ho khethehileng? (b) Re tla tšohla lipotso life sehloohong se latelang?

¹⁸ Ka tsela e tšoanang, balisa ba atlehang ke ba bontšang bonolo esita le haeba ba sa tšoaroa hantle. Ka mohlala, batho ba bang bao ba lekang ho ba thusa ka phuthehong, ba ka ’na ba hana thuso. Haeba motho ea hlokang thuso a hlabehile kapa a kula moeeng, a ka ’na a ba araba ka ho ‘bua a sa nahane joalokaha eka ke ka ho hlaba ha sabole.’ (Liproverbia 12:18) Leha ho le joalo, joaloka Jesu, balisa ha ba busetse molamu sefateng ka mantsoe a bohale kapa ka liketso tsa boiphetetso. Ho e-na le hoo, baa itšoara ebe ba tsoela pele ho bontša kutloelo-bohloko, e leng se ka bang molemo ho motho ea hlokang thuso. (1 Petrose 3:8, 9) Na u ithuta mohlaleng oa baholo ’me u ba bonolo le ho itšoara ha u eletsoa?

¹⁹ Ha ho pelaelo hore Jehova le Jesu ba ananela mosebetsi o boima oa balisa ba baloang ka likete ba ithaopetseng ho hlokomela mohlape o lefatšeng lohle. Jehova le Mora oa hae ba boetse ba na le lerato le matla bakeng sa bahlanka ba sebeletsang ba baloang ka likete ba thusang baholo ho ‘sebeletsa bahalaleli.’ Ebe joale ke hobane’ng ha bara ba bang babo rōna ba kolobelitsoeng ba tsilatsila ho hahamalla “mosebetsi [oo] o motle”? (1 Timothea 3:1) Hona bao Jehova a ba behang hore e be balisa, o ba koetlisa joang? Re tla tšohla lipotso tsena sehloohong se latelang.

Na U sa Hopola?

• Litsela tse ling tseo balisa ba bontšang ho rata linku ka tsona ke life?

• Litho tsohle tsa phutheho li ka hōlisa thabo le khotso joang?

• Ke hobane’ng ha balisa ba mamella ebile ba le mosa ha ba fana ka keletso?

• Baholo ba bontša molemo le tumelo joang?

[Setšoantšo se leqepheng la 18]

Baholo ba susumetsoa ke lerato hore ba sebeletse phutheho

[Litšoantšo tse leqepheng la 18]

Ba boetse ba qeta nako ba e-na le malapa a bona boikhathollong . . . 

. . . le tšebeletsong

[Setšoantšo se leqepheng la 20]

Puisano e ntle pakeng tsa baholo e hōlisa thabo le khotso ka phuthehong