Kamoo Batsoali ba ka Lulang ba Tiile ha Ngoana e E-ba Lerabele
MOSALI e mong oa Mokreste eo re tlang ho mo bitsa Joy o ile a leka ho hōlisa mor’a hae hore a rate Jehova Molimo. Leha ho le joalo, ha mora enoa a atamela ho ba lilemo li mashome a mabeli, e ile ea e-ba lerabele ’me a tloha lapeng. Joy o re: “Ke ne ke utloile bohloko boo ho seng mohla nkileng ka bo utloa. Ke ile ka ikutloa ke khathetse matla, ke nyahame ke bile ke ferekane. Ke ile ka apareloa ke maikutlo a ho felloa ke tšepo.”
Mohlomong le uena u lekile ho hōlisa bana hore ba rate Molimo le ho mo sebeletsa, empa hamorao e mong oa bona kapa ba ’maloa ba ile ba mo furalla. U ka sebetsana joang le masoabi a joalo a utloisang bohloko? Ke eng e tla u thusa hore u lule u tiile ha u sebeletsa Jehova?
Ha Bara ba Jehova e E-ba Marabele
Taba ea pele u lokela ho lemoha hore Jehova o tseba hantle kamoo u ikutloang kateng. Ho Esaia 49:15, rea bala: “Na mosali a ka lebala ngoana oa hae ea anyang hoo a ke keng a hauhela mora oa mpa ea hae? Esita le basali bana ba ka lebala, leha ho le joalo ’na nke ke ka u lebala.” Ka sebele Jehova le eena o utloa seo ka tloaelo bo-ntate le bo-’mè ba se utloang. Ka hona, nahana hore na e tlameha ebe o ne a thaba hakaakang ha bara bohle ba hae ba mangeloi ba ne ba mo rorisa ba bile ba mo sebeletsa. Ha a ne a araba mopatriareka Jobo “a le sefefong,” Jehova o ile a hopola linako tse thabisang tsa ha a ne a e-na le lelapa la hae la moea le kopaneng, a re: “U ne u le hokae ha ke theha lefatše? . . . Ha linaleli tsa hoseng li hoeletsa ka thabo hammoho, bara bohle ba Molimo ba qala ho hlaba litlatse?”—Jobo 38:1, 4, 7.
Hamorao, Molimo oa ’nete o ile a bona ha mora ea phethahetseng oa lengeloi a mo fetohela ’me e e-ba Satane, e bolelang “Mohanyetsi.” Jehova o ile a boela a bona ha mor’a hae oa pele oa motho, e leng Adama, hammoho le mosali oa hae ea phethahetseng, Eva, ba kena borabeleng boo. (Genese 3:1-6; Tšenolo 12:9) Hamorao, mangeloi a mang a ile “a furalla sebaka sa ’ona sa bolulo se loketseng” ’me a fetohela Molimo.—Juda 6.
Mangolo ha a re bolelle hore na Jehova o ile a ikutloa joang ha bara ba bang ba hae ba phethahetseng ba fetoha marabele. Leha ho le joalo, Bibele e bolela ka ho hlaka e re: “Jehova a bona hore bobe ba motho bo bongata lefatšeng ’me tšekamelo eohle ea menahano ea pelo ea hae e mpe feela ka linako tsohle. Jehova a ikutloa a soabile hore ebe o entse batho lefatšeng, ’me pelo ea hae ea utloa bohloko.” (Genese 6:5, 6) Ha batho ba khethiloeng ba Jehova, e leng Baiseraele, ba ne ba fetoha marabele, le bona ba ile ba “mo utloisa bohloko.”—Pesaleme ea 78:40, 41.
Ha ho pelaelo hore Jehova o qenehela batsoali ba utloisoang bohloko le ba hlabehileng ka lebaka la boitšoaro ba bana ba fetohang marabele. Ka Lentsoeng la hae Bibele, o fane ka keletso e molemo le khothatso hore a thuse batsoali ba joalo ho sebetsana ka katleho le boemo boo ba leng ho bona. Molimo o ba khothatsa hore ba lahlele matšoenyeho a bona ho eena, ba ikokobetse ’me ba eme khahlanong le Satane Diabolose. A re boneng hore na ho mamela keletso ena ho ka u thusa hore u eme u tiile joang ha ngoana oa hao e e-ba lerabele.
Lahlela Matšoenyeho a Hao ho Jehova
Jehova oa tseba hore batsoali ba tšoenyeha haholo ha ba nahana hore bana ba bona ba kotsing ea ho itematsa kapa ea ho lematsoa ke ba bang. Moapostola Petrose o bolela tsela e ’ngoe eo ka eona re ka sebetsanang le boemo bona le lintho tse ling tse re tšoenyang. Oa ngola: “Le [lahlele] matšoenyeho ’ohle a lōna ho [Jehova], hobane oa le tsotella.” (1 Petrose 5:7) Ke hobane’ng ha memo ee le khothatso ee e le tsa bohlokoa haholo-holo ho batsoali bao ngoana oa bona e leng lerabele?
Ha ngoana oa hao a sa le monyenyane, u ne u falimehela ho mo sireletsa likotsing, ’me ho ka etsahala hore ebe o ne a mamela tataiso ea hao e lerato. Leha ho le joalo, ha a ntse a hōla, mohlomong tšusumetso ea hao ho eena e ile ea fokotseha, empa takatso ea hao e matla ea ho mo sireletsa kotsing eona ha ea ka ea fokotseha. Ha e le hantle, ho ka etsahala hore ebe takatso eo e ile ea e-ba matla le ho feta.
Ka lebaka leo, ha ngoana oa hao e e-ba lerabele ’me a lemala moeeng, maikutlong kapa ’meleng, u ka ’na ua nahana hore ke uena ea molato. Joy, ea boletsoeng pejana, o ile a ikutloa joalo. O re: “Letsatsi le letsatsi, ke ne ke apareloa ke maikutlo a hore ke hlōlehile ’me ke ne ke lula ke nahana ka liketsahalo tsa nako e fetileng ke ipotsa hore na ebe ke ile ka fosa ha ke fihla hokae.” Jehova o batla hore u ‘lahlele matšoenyeho ’ohle a hao ho eena’ haholo-holo linakong tse joalo. Ha u etsa joalo, o tla u thusa. Mopesaleme o ile a re: “Lahlela moroalo oa hao ho Jehova, o tla u tšehetsa. Le ka mohla a ke ke a lumella ea lokileng hore a therekele.” (Pesaleme ea 55:22) Joy o ile a fumana matšeliso a joalo. O hlalosa tjena: “Ke ile ka phetlela Jehova sefuba ka mo bolella ntho e ’ngoe le e ’ngoe eo ke neng ke e nahana. Ke ile ka mo tšollela maikutlo a ka, ’me seo se ile sa etsa hore ke imolohe haholo.”
Kaha u motsoali ea sa phethahalang, e ka ’na eaba u ile ua etsa liphoso ha u ntse u hōlisa ngoana oa hao. Empa ke hobane’ng ha u nahana feela ka liphoso tsa hao? Ho totobetse hore Jehova ha a nahane ka liphoso tsa hao, kaha mopesaleme ea bululetsoeng o ile a bina a re: “Haeba u ne u talima liphoso, Jah, Jehova, ke mang ea neng a ka ema?” (Pesaleme ea 130:3) Esita le haeba u ne u le motsoali ea phethahetseng, ho ne ho ntse ho ka etsahala hore ngoana oa hao e be lerabele. Kahoo tšollela Jehova maikutlo a hao ka thapelo, ’me o tla u thusa ho sebetsana le boemo boo. Empa e le hore u tle u lule u tiile ha u sebeletsa Jehova ’me u qobe ho ba phofu ea Satane, u lokela ho etsa ho hong hape.
Ikokobetse
Petrose o ile a ngola a re: “Le ikokobetse tlas’a letsoho le matla la Molimo, e le hore a ka le phahamisa nakong e loketseng.” (1 Petrose 5:6) Ke hobane’ng ha ho hlokahala hore u ikokobetse ha ngoana oa hao e e-ba lerabele? Ha ngoana e e-ba lerabele, ha u ikutloe u le molato le ho utloa bohloko feela, empa hape u ka ’na ua hlajoa ke lihlong ka tsela e itseng. U ka ’na ua ameha ka hore liketso tsa ngoana oa hao li sentse botumo ba lelapa la hao, haholo-holo haeba a ile a tlameha ho khaoloa ka phuthehong ea Bokreste. Ha maikutlo a ho hlajoa ke lihlong a kopana le a ho tlotloloha, u ka ’na ua nyahama ebe ha u sa ea libokeng tsa Bokreste.
U lokela ho ba le bohlale bo sebetsang ha u sebetsana le boemo bo joalo. Liproverbia 18:1 ea lemosa: “Ea itšehlang thajana o tla batla tabatabelo ea hae ea boithati; o tla phasoloha khahlanong le bohlale bohle bo sebetsang.” Ho sa tsotellehe hore na u utloile bohloko hakae, ha u e-ba teng kamehla libokeng tsa Bokreste u tla fumana thupelo le khothatso ea bohlokoahali. Joy o re: “Qalong, ho hang ke ne ke sa batle ho kopana le motho leha e le ofe. Empa ke ile ka ikhopotsa kamoo kemiso ea ka ea litaba tsa moea e leng ea bohlokoa kateng. Ho feta moo, haeba ke ne ke lutse hae, ke ne ke tla lulela ho touta ka mathata a ka. Liboka li ile tsa nthusa ho tsepamisa kelello linthong tsa moea tse hahang. Ke leboha haholo hore ebe ha kea ka ka itšehla thajana ebe ke sitoa ho fumana tšehetso e lerato ea bara le barali beso.”—Baheberu 10:24, 25.
Hape, hopola hore motho e mong le e mong ka lapeng o lokela ho “jara mojaro oa hae” oa boikarabelo ba ho ba Mokreste. (Bagalata 6:5) Jehova o lebeletse hore batsoali ba rate bana ba bona ’me ba ba laee. Hape o lebeletse hore bana ba mamele le ho hlompha batsoali ba bona. Haeba batsoali ba etsa sohle se matleng a bona hore ba hōlise bana ba bona ka “taeo le kelello e laoloang ke Jehova,” batsoali ka bobona ba tla ba le botumo bo botle ho Molimo. (Baefese 6:1-4) Haeba ngoana a fetohela taeo e lerato ea batsoali ba hae, ke eena ea senyang botumo ba hae. Liproverbia 20:11 e re: “Esita le ka liketso tsa hae moshanyana o iketsa hore a hlokomeloe mabapi le hore na mosebetsi oa hae o hloekile ’me o lokile.” Ka sebele borabele ba Satane ha boa senya botumo ba Jehova ho batho ba tsebang linnete hantle.
Ema Khahlanong le Diabolose
Petrose oa lemosa: “Lulang le hlaphohetsoe likelellong, le lebele. Mohanyetsi oa lōna, Diabolose, o tsamaea joaloka tau e purumang, e batlang ho harola e mong.” (1 Petrose 5:8) Joaloka tau, hangata Diabolose o sheba ba banyenyane le ba se nang phihlelo hore a ba hlasele. Mehleng ea boholo-holo, litau li ne li solla naheng ea Iseraele ’me li ne li le kotsi liphoofolong tse ruuoang. Haeba konyana e ne e ka hlahlathela mohlapeng, e ne e ka hlaseloa habonolo ke tau. ’M’a eona e ne e ka ’na ea ipeha kotsing hore e sireletse konyana ea eona. Leha ho le joalo, esita le nku e khōlō e ne e ke ke ea loana le tau. Ka hona, ho ne ho hlokahala balisa ba sebete hore ba sireletse mohlape.—1 Samuele 17:34, 35.
Hore Jehova a sireletse linku tsa hae tsa tšoantšetso ‘taung e purumang,’ o lokiselitse hore balisa ba moea ba hlokomele mohlape o kalosong ea “molisa ea ka sehloohong,” e leng Jesu Kreste. (1 Petrose 5:4) Petrose o eletsa banna bao ba khethiloeng ka ho re: “Lisang mohlape oa Molimo o tlhokomelong ea lōna, eseng ka ho qobelloa, empa ka ho rata; eseng ka lebaka la lerato la leruo la ho se tšepahale, empa ka tabatabelo.” (1 Petrose 5:1, 2) Haeba lōna batsoali le sebelisana le balisa bana, mohlomong ba ka thusa mocha hore a hlaphoheloe moeeng.
Ha balisa ba Bakreste ba lokela ho eletsa ngoana oa hao eo e leng lerabele, u ka ’na ua utloa u batla ho mo sireletsa hore a se ke a fuoa taeo. Empa ho etsa joalo e ka ba phoso e khōlō. Petrose o re: “Emang khahlanong le [Diabolose]”—eseng khahlanong le balisa ba moea.—1 Petrose 5:9.
Ha Taeo e le Matla
Haeba ngoana oa hao a sa bake ’me e le Mokreste ea kolobelitsoeng, a ka ’na a fuoa taeo e matla ka ho fetisisa ea hore a khaoloe ka phuthehong. Hore na u buisana le eena hakae ka mor’a moo, ho tla itšetleha ka hore na o lilemo li kae le ka maemo a mang.
Haeba ngoana eo a sa ntse a le monyenyane a bile a lula lapeng, ha ho pelaelo hore u tla tsoela pele u hlokomela litlhoko tsa hae tsa nama. Hape, ke boikarabelo ba hao hore u mo koetlise u be u mo laee litabeng tsa boitšoaro. (Liproverbia 1:8-18; 6:20-22; 29:17) U ka ’na ua mo khannela thuto ea Bibele, eo a tla itlhalosa ho eona. U ka mo hlokomelisa mangolo a fapa-fapaneng le lingoliloeng tse lokiselitsoeng ke “lekhoba le tšepahalang le le masene.” (Matheu 24:45) Hape u ka ea le ngoana eo libokeng tsa Bokreste ’me u lule le eena. U ka etsa sena sohle u tšepile hore o tla nka keletso eo ea Mangolo ka ho teba.
Empa boemo bo fapane haeba ngoana ea khaotsoeng a se a le lilemong a bile a sa lule lapeng. Moapostola Pauluse o ile a eletsa Bakreste ba Korinthe ea boholo-holo a re: “Le khaotse ho itsoakanya hammoho le mang kapa mang ea bitsoang mor’abo rōna eo e leng sehlola kapa motho ea meharo kapa morapeli oa litšoantšo kapa ea litlhapa kapa letahoa kapa mohanyapetsi, esita le ho ja le se ke la ja le motho ea joalo.” (1 Bakorinthe 5:11) Le hoja ho ka ’na ha hlokahala hore motsoali oa Mokreste a buisane le ngoana eo ea khaotsoeng haeba ho e-na le litaba tsa bohlokoa tsa lelapa, motsoali o lokela ho leka ka tieo hore a se ke a buisana le eena ho sa hlokahale.
Ha balisa ba Bakreste ba laea ngoana ea entseng phoso, e ke ke ea e-ba bohlale hore u leke ho hanyetsa kapa ho nyelisa khato eo ba e nkileng e thehiloeng Bibeleng. Ho tšehetsa ngoana oa hao eo e leng lerabele ho ke ke ha mo sireletsa ka tsela leha e le efe ho Diabolose. Ha e le hantle, u tla be u beha bophelo ba hao ba moea kotsing. Ka lehlakoreng le leng, ha u tšehetsa boiteko ba balisa, u tla lula u “tiile tumelong” ’me u tla be u thusa ngoana oa hao ka tsela e molemo haholo.—1 Petrose 5:9.
Jehova o Tla U Tšehetsa
Haeba ngoana oa hao a ka fetoha lerabele, u hopole hore seo ha se etsahalle uena feela. Batsoali ba bang ba Bakreste le bona ba fetile boemong boo. Ho sa tsotellehe hore na re thulana le liteko life, Jehova a ka re tšehetsa.—Pesaleme ea 68:19.
Tšepa Jehova ka ho rapela. Kopanela kamehla le phutheho ea Bokreste. Tšehetsa taeo ea balisa ba khethiloeng. Ha u etsa joalo, u tla khona ho lula u tiile. ’Me mohlala oa hao o motle o ka ’na oa thusa ngoana oa hao ho amohela memo e lerato ea Jehova ea hore a khutlele ho eena.—Malakia 3:6, 7.
[Litšoantšo tse leqepheng la 18]
Fumana matla ka ho rapela le ka phutheho ea Bokreste