Arabela Litšepisong tsa Molimo ka ho Sebelisa Tumelo

“O [Jehova Molimo] re file ntle ho tefello litšepiso tsa bohlokoa le tse hlollang haholo ka botle.”—2 PETROSE 1:4, NW.

 1. Ke eng e re thusang ho sebelisa tumelo ea ’nete?

JEHOVA o batla hore re sebelise tumelo litšepisong tsa hae. Leha ho le joalo, “tumelo hase ea bohle.” (2 Ba-Thessalonika 3:2) Tšoaneleho ena ke tholoana ea moea o halalelang oa Molimo, kapa matla a sebetsang. (Ba-Galata 5:22, 23) Kahoo, ke ba tataisoang ke moea oa Jehova feela ba ka sebelisang tumelo.

 2. Moapostola Pauluse o hlalosa “tumelo” joang?

² Empa tumelo ke’ng? Moapostola Pauluse o e bitsa “pontšo e hlakileng ea lintho tsa sebele le hoja li sa bonoe.” Bopaki ba lintho tsena tsa sebele tse sa bonoeng bo matla hoo tumelo e lekanngoang le bona. Tumelo e boetse e bitsoa “tebello e kholisehileng ea lintho tse lebeletsoeng” hobane ba nang le tšoaneleho ena ba na le tiiso ea hore sohle se tšepisitsoeng ke Jehova Molimo se tiile hoo e seng e ntse eka se phethahalitsoe.—Ba-Heberu 11:1, NW.

Tumelo le Litšepiso tsa Jehova

 3. Bakreste ba tlotsitsoeng ba tla ba le phihlelo efe haeba ba sebelisa tumelo?

³ Ho khahlisa Jehova, re tlameha ho sebelisa tumelo litšepisong tsa hae. Moapostola Petrose o ile a bontša sena lengolong la hae la bobeli le bululetsoeng, leo a le ngotseng hoo e ka bang ka 64 C.E. O ile a bontša hore haeba Bakreste-’moho le eena ba tlotsitsoeng ba sebelisa tumelo, ba ne ba tla bona ho phethahatsoa ha “litšepiso tsa bohlokoa le tse hlollang haholo ka botle” tsa Molimo. E le phello ea hoo, ba ne ba tla “ba le kabelo sebōpehong sa bomolimo” e le majalefa-’moho le Jesu Kreste ’Musong oa leholimo. Ka tumelo le thuso ea Jehova Molimo, ba ne ba pholohile ho ba bokhobeng ba mekhoa le litloaelo tsa lefatše lena tse litšila. (2 Petrose 1:2-4, NW) Ak’u nahane! Kajeno ba sebelisang tumelo ea ’nete ba thabela tokoloho e tšoanang e ke keng ea lekanngoa le letho.

 4. Ke litšoaneleho life tseo re lokelang ho li ekelletsa tumelong ea rōna?

⁴ Tumelo litšepisong tsa Jehova le teboho bakeng sa tokoloho eo re e filoeng ke Molimo li lokela ho re susumeletsa ho etsa sohle seo re ka se khonang ho ba Bakreste ba behang mohlala. Petrose o itse: “Ka ho nehelana ha lōna ka boiteko bohle bo tiileng ha le arabela, ekeletsang tumelong ea lōna bokhabane, bokhabaneng ba lōna tsebo, tsebong ea lōna boitšoaro, boitšoarong ba lōna mamello, mamellong ea lōna boinehelo ba bomolimo, boinehelong ba lōna ba bomolimo kameho ea boena, kamehong ea lōna ea boena lerato.” (2 Petrose 1:5-7, NW) Kahoo Petrose o re fa lethathamo la lintho tseo e ka bang habohlokoa ho rōna ho li hopola. A re hlahlobisiseng litšoaneleho tsena haholoanyane.

Likarolo tsa Bohlokoa tsa Tumelo

 5, 6. Bokhabane ke eng, ’me ke joang re ka bo ekeletsang tumelong ea rōna?

⁵ Petrose o itse bokhabane, tsebo, boitšoaro, mamello, boinehelo ba bomolimo, kameho ea boena, le lerato li lokela ho ekeletsana tsona ka botsona le ho ekeletsoa tumelong ea rōna. Re tlameha ho sebetsa ka thata ho etsa hore litšoaneleho tsena e be likarolo tsa bohlokoa tsa tumelo ea rōna. Ka mohlala, bokhabane hase tšoaneleho eo re ka e bonahatsang ka ntle ho tumelo. Mongoli oa buka e hlalosang mantsoe W. E. Vine o bontša hore ho 2 Petrose 1:5, “bokhabane bo eketsoa e le tšoaneleho ea bohlokoa ho sebeliseng tumelo.” E ’ngoe le e ’ngoe ea litšoaneleho tse ling tseo Petrose a li boletseng e lokela ho ba karolo ea tumelo ea rōna.

⁶ Tabeng ea pele, re tlameha ho ekeletsa bokhabane tumelong ea rōna. Ho ba khabane ho bolela ho etsa se molemo mahlong a Molimo. Bakeng sa lentsoe la Segerike le fetoletsoeng mona e le “bokhabane,” liphetolelo tse ling li sebelisa “molemo.” (New International Version; The Jerusalem Bible; Today’s English Version) Bokhabane bo re susumeletsa ho qoba ho etsa bobe kapa ho utloisa batho ba bang bohloko. (Pesaleme ea 97:10) Bo boetse bo susumetsa ketso e sebete ea ho etsa botle bakeng sa ho tsoela ba bang molemo moeeng, ’meleng, le maikutlong.

 7. Ke hobane’ng ha re lokela ho ekelletsa tsebo tumelong le bokhabaneng ba rōna?

⁷ Ke hobane’ng ha Petrose a re phehella ho ekeletsa tsebo tumelong le bokhabaneng ba rōna? Ha re talimana le liphephetso tse ncha tumelong ea rōna, re hloka tsebo hore re khetholle se nepahetseng ho se fosahetseng. (Ba-Heberu 5:14) Ka thuto ea Bibele le phihlelo ea ho sebelisa Lentsoe la Molimo le ho sebelisa bohlale bo sebetsang bophelong ba letsatsi le letsatsi, re eketsa tsebo ea rōna. Ho latelang, sena se etsa hore re khone ho boloka tumelo ea rōna le ho tsoela pele ho etsa se khabane ha re le tlas’a teko.—Liproverbia 2:6-8; Jakobo 1:5-8.

 8. Boitšoaro ke eng, ’me bo amana joang le mamello?

⁸ Ho re thusa ho thulana le liteko tsa rōna ka tumelo, re hloka ho ekeletsa boitšoaro tsebong ea rōna. Lentsoe la Segerike bakeng sa “boitšoaro” le bolela matla a ho khona ho itaola. Tholoana ena ea moea oa Molimo e re thusa ho bontša boitšoaro monahanong, puong, le boitšoarong. Ka ho phehella ho sebelisa boitšoaro, re bo ekeletsa mamello. Lentsoe la Segerike bakeng sa “mamello” le bolela ho tiea ho sebete, eseng ho inehela ka ho hlonama bothateng boo u ke keng ua bo phema. Jesu o ile a mamella thupa ea tlhokofatso ka lebaka la thabo e neng e behiloe ka pele ho eena. (Ba-Heberu 12:2) Ha matla a fanoeng ke Molimo a kopana le mamello a tšehetsa tumelo ea rōna ’me a re thusa ho thaba mahlomoleng, ho hana liteko, le ho qoba ho sekisetsa ha re hlorisoa.—Ba-Filippi 4:13.

 9. (a) Boinehelo ba bomolimo ke eng? (b) Ke hobane’ng ha re lokela ho ekeletsa kameho ea boena boinehelong ba rōna ba bomolimo? (c) Ke joang re ka ekelletsang lerato kamehong ea rōna ea boena?

⁹ Mamellong ea rōna re tlameha ho ekeletsa boinehelo ba bomolimo—tšabo, borapeli, le tšebeletso ho Jehova. Tumelo ea rōna e-ea hōla ha re sebelisa boinehelo ba bomolimo ’me re bona kamoo Jehova a sebetsanang le batho ba hae ka teng. Leha ho le joalo, ho bonahatsa bomolimo, re hloka kameho ea boena. Ebile, “ea sa rateng ngoan’abo eo a ’monang, a ka tseba joang ho rata Molimo oo a sa o boneng?” (1 Johanne 4:20) Lipelo tsa rōna li lokela ho re susumeletsa ho bontša kameho ea ’nete ho bahlanka ba bang ba Jehova le ho batla boiketlo ba bona ka linako tsohle. (Jakobo 2:14-17) Empa ke hobane’ng ha re bolelloa ho ekeletsa lerato ho kameho ea rōna ea boena? Ka ho hlakileng Petrose o ne a bolela hore re tlameha ho bontša lerato bakeng sa moloko oohle oa batho, eseng feela ho baena ba rōna. Lerato lena le bonahatsoa haholo-holo ka ho ruta litaba tse molemo le ho thusa batho moeeng.—Mattheu 24:14; 28:19, 20.

Liphello tse Fapaneng

10. (a) Re tla itšoara joang haeba bokhabane, tsebo, boitšoaro, mamello, boinehelo ba bomolimo, kameho ea boena, le lerato li ekeletsoa tumelong ea rōna? (b) Ho etsahala eng haeba ea ipolelang e le Mokreste a haelloa ke litšoaneleho tsee?

¹⁰ Haeba re ekeletsa bokhabane, tsebo, boitšoaro, mamello, boinehelo ba bomolimo, kameho ea boena, le lerato tumelong ea rōna, re tla nahana, le ho bua, le ho etsa lintho ka litsela tse amoheloang ke Molimo. Ho fapana le moo, haeba ea ipolelang e le Mokreste a hlōleha ho bonahatsa litšoaneleho tsena, o foufala moeeng. O ‘koala mahlo a hae ho se bone leseli’ le tsoang ho Molimo ’me o lebala hore o hloekisitsoe libeng tsa nako e fetileng. (2 Petrose 1:8-10, NW; 2:20-22) Ho hang a re se keng ra hlōleha ka tsela eo ’me ra lahleheloa ke tumelo litšepisong tsa Molimo.

11. Ka ho nepahetseng re ka lebella eng ho ba tlotsitsoeng ba tšepahalang?

¹¹ Bakreste ba tlotsitsoeng ba tšepahalang ba na le tumelo litšepisong tsa Jehova ’me ba ikitlaeletsa ho tiisa ho bitsoa le ho khethoa ha bona. Ho sa tsotellehe likhopiso tseleng ea bona, re ka lebella hore ba bonahatse litšoaneleho tsa bomolimo. Ho ba tlotsitsoeng ba tšepahalang ‘ho fanoe ka sebaka se seholo sa ho kena ’musong o sa feleng oa Jesu Kreste’ ka ho tsosetsoa bophelong ba moea leholimong.—2 Petrose 1:11.

12. Re lokela ho utloisisa mantsoe a 2 Petrose 1:12-15 joang?

¹² Petrose o ile a hlokomela hore o ne a tla shoa haufinyane, ’me o ne a lebeletse hore qetellong o tla tsosetsoa bophelong ba leholimo. Empa hafeela a ne a ntse a phela “tabernakeleng ena”—’mele oa hae oa nama—o ile a leka ho haha tumelo ea balumeli-’moho le eena le ho ba tsosolosa ka ho ba hopotsa lintho tse hlokahalang bakeng sa kamohelo ea bomolimo. Ka mor’a lefu la hae, baena le likhaitseli ba Petrose ba moea ba ne ba ka matlafatsa tumelo ea bona ka ho hopola mantsoe a hae.—2 Petrose 1:12-15.

Tumelo Lentsoeng la Boprofeta

13. Ke joang Molimo a ileng a fana ka bopaki bo matlafatsang tumelo ba ho tla ha Kreste?

¹³ Molimo ka boeena o ile a fana ka bopaki bo matlafatsang tumelo ka bonnete ba ho tla ha Jesu “ka matla a maholo le ka khanya e kholo.” (Mattheu 24:30; 2 Petrose 1:16-18) Ka lebaka la ho haelloa ke bopaki, baprista ba bohetene ba ile ba bolela litšōmo tsa bohata ka melimo ea bona, empa Petrose, Jakobo, le Johanne e ne e le lipaki tse boneng ka mahlo tsa khanya ea Kreste ha a ne a fetoleloa sebōpehong se khanyang. (Mattheu 17:1-5) Ba ile ba ’mona a le khanyeng ’me ba utloa molumo oa lentsoe la Molimo le tsebahatsa Jesu e le Mor’a Hae ea ratoang. Kamohelo eo le ponahalo e khanyang e neng e fuoe Kreste ka nako eo e ne e le mpho ea tlhompho le khanya ho eena. Ka lebaka la tšenolo ena ea bomolimo, Petrose o ile a bitsa sebaka seo, seo e ka ’nang eaba se ne se le tlhōrōng ea Hermone, ‘thaba e halalelang.’—Bapisa le Exoda 3:4, 5.

14. Tumelo ea rōna e lokela ho angoa joang ke ho fetoleloa ha Jesu sebōpehong se khanyang?

¹⁴ Ho fetoleloa ha Jesu sebōpehong se khanyang ho lokela ho ama tumelo ea rōna joang? Petrose o ile a re: “Ka lebaka leo re tiiselitsoe lentsoe la boprofeta haholoanyane; ’me le etsa hantle ha le le ela hloko joaloka lebone le khantšitseng sebakeng se lefifi, ho fihlela meso e hlaha ’me mphatlalatsane e hlaha, lipelong tsa lōna.” (2 Petrose 1:19, NW) Kamoo ho bonahalang ka teng “lentsoe la boprofeta” le ne le akareletsa boprofeta ba Mangolo a Seheberu ba Messia haesita le polelo ea Jesu ea hore o ne a tla tla “ka matla a maholo le ka khanya e kholo.” Ke joang lentsoe leo le ileng la ‘tiisoa haholoanyane’ ka ho khanya ha hae? Ketsahalo eo e ile ea tiisa lentsoe la boprofeta la ho tla ho khanyang ha Kreste ka matla a ’Muso.

15. Ho mamela lentsoe la boprofeta ho akareletsa eng?

¹⁵ Ho matlafatsa tumelo ea rōna, re tlameha ho tsepamisa mohopolo lentsoeng la boprofeta. Sena se akareletsa ho ithuta lentsoe leo, ho buisana ka lona libokeng tsa Bokreste, le ho sebelisa keletso ea lona. (Jakobo 1:22-27) Re tlameha ho le lumella ho ba “lebone le khantšitseng sebakeng se lefifi,” le khantšang lipelo tsa rōna. (Ba-Efese 1:18) Ke joalo feela le ka re tataisang ho fihlela “mphatlalatsane,” kapa, “naleli e khanyang ea meso,” Jesu Kreste, a itšenola ka khanya. (Tšenolo 22:16) Tšenolo eo e tla bolela timetso bakeng sa ba hlokang tumelo le litlhohonolofatso bakeng sa ba bontšang tumelo.—2 Ba-Thessalonika 1:6-10.

16. Ke hobane’ng ha re ka ba le tumelo hore litšepiso tsohle tsa boprofeta tse Lentsoeng la Molimo li tla phethahala?

¹⁶ Baprofeta ba Molimo e ne e se feela banna ba bohlale ba bolelang lintho esale pele, hobane Petrose o ile a re: “Ha ho boprofeta Lengolong bo hlahileng ka ho itlhalosetsa ha motho. Hobane ha e sa le, boprofeta ha boa ka ba tlisoa ke ho rata ha motho, empa ke ka tšusumetso ea Moea o Halalelang batho ba halalelang ba Molimo ba buileng.” (2 Petrose 1:20, 21) Ka mohlala, Davida o ile a re: “Moea oa Jehova o bua ka ’na.” (2 Samuele 23:1, 2) ’Me Pauluse o ile a ngola: “Lengolo lohle le bululetsoe ke Molimo.” (2 Timothea 3:16, NW) Kaha baprofeta ba Molimo ba ile ba bululeloa ka moea oa hae, re ka ba le tumelo ea hore litšepiso tsohle tse Lentsoeng la hae li tla phethahatsoa.

Ba ne ba E-na le Tumelo Litšepisong tsa Molimo

17. Ke tšepiso efe eo e neng e le motheo oa tumelo ea Abele?

¹⁷ Litšepiso tsa Jehova e ne e le motheo oa tumelo ea ‘leru le leholo’ la lipaki tsa hae tsa pele ho nako ea Bokreste. (Ba-Heberu 11:1–12:1) Ka mohlala, Abele o ne a e-na le tumelo tšepisong ea Molimo ea “peō” e neng e tla khoba “noha” hlooho. Ho ne ho na le bopaki ba ho phethahatsoa ha kahlolo ea Molimo ho batsoali ba Abele. Ka ntle ho Edene, Adama le lelapa la hae ba ile ba ja bohobe ka mofufutso oa liphatla tsa bona hobane lefatše le neng le rohakiloe le ne le hlahisa litšehlo le meutloa. E ka ’na eaba Abele o ne a hlokomela litakatso tsa Eva ho monna oa hae ’me a bona hore Adama oa ’musa. Ka sebele o ne a bua ka bohloko ba kemaro ea hae. ’Me tsela e kenang tšimong ea Edene e ne e lebetsoe ke likerubime le sabole e tukang malakabe. (Genese 3:14-19, 24) Sena sohle se ne se etsa likarolo tsa “pontšo e hlakileng” e neng e kholisa Abele hore topollo e tla tla ka Peō e tšepisitsoeng. Ka ho sebelisa tumelo, Abele o ile a nyehela Molimo sehlabelo se ileng sa ipaka e le sa bohlokoa bo boholoanyane ho feta sa Kaine.—Ba-Heberu 11:1, 4.

18, 19. Ke ka litsela life Abrahama le Sara ba ileng ba sebelisa tumelo?

¹⁸ Bapatriareka Abrahama, Isaaka, le Jakobo le bona ba ne ba e-na le tumelo litšepisong tsa Jehova. Abrahama o ile a sebelisa tumelo litšepisong tsa Molimo tsa hore malapa ’ohle a lefatše a ne a tla itlhohonolofatsa ka eena le hore peō ea hae e ne e tla fuoa naha. (Genese 12:1-9; 15:18-21) Mora oa hae Isaaka le setloholo sa hae Jakobo e ne e le “majalefa le eena a pallo e le ’ngoe.” Ka tumelo Abrahama o ile “a lula ka mokhoa oa mojaki naheng eo a e baletsoeng” ’me a lebella “motse o nang le motheo [“oa sebele,” NW],” ’Muso oa Molimo oa leholimo oo tlas’a oona a neng a tla tsosetsoa bophelong lefatšeng. (Ba-Heberu 11:8-10) Na u na le tumelo e tšoanang?

¹⁹ Mosali oa Abrahama, Sara, o ne a e-na le lilemo tse ka bang 90 ’me e le khale a fetile lilemo tsa ho beleha bana ha a bontša tumelo tšepisong ea Molimo ’me a fuoa matla “a ho emola peō” le ho beleha Isaaka. Kahoo, ho tsoa ho Abrahama ea lilemo li 100, ‘ea neng a se a ichoeletse’ mabapi le ho tsoala, ho ile ha qetella ho ‘hlahile bongata bo kaa ka linaleli tsa leholimo.’—Ba-Heberu 11:11, 12; Genese 17:15-17; 18:11; 21:1-7.

20. Le hoja bapatriareka ba sa ka ba bona ho phethahala ho felletseng ha litšepiso tsa Molimo ho bona, ba ile ba etsa’ng?

²⁰ Bapatriareka ba tšepahalang ba ile ba e-shoa ba e-s’o bone phethahatso e felletseng ea litšepiso tsa Molimo ho bona. Leha ho le joalo, ‘ba bonetse hōle [lintho tse tšepisitsoeng], ba li lumetse, ba li lumelisitse, ’me ba ipoletse hore ke basele le baeti lefatšeng.’ Ho ile ha feta meloko e mengata pele Naha e Tšepisitsoeng e e-ba lefa la bana ba Abrahama. Leha ho le joalo, nakong ea bophelo ba bona bapatriareka ba tšabang Molimo ba ile ba sebelisa tumelo litšepisong tsa Jehova. Hobane ba sa ka ba lahleheloa ke tumelo, haufinyane ba tla tsosetsoa bophelong sebakeng sa lefatše sa “motse” oo Molimo a ba lokiselitseng oona, ’Muso oa Bomessia. (Ba-Heberu 11:13-16) Ka tsela e tšoanang, tumelo e ka re boloka re tšepahala ho Jehova esita le haeba re sa bone litšepiso tsohle tsa hae tse hlollang li phethahatsoa hang-hang. Tumelo ea rōna e tla boela e re susumeletse ho mamela Molimo, joalokaha Abrahama a ile a etsa. ’Me joalokaha a ile a fetisetsa lefa lena la moea baneng ba hae, le rōna re ka thusa bana ba rōna ho sebelisa tumelo litšepisong tsa bohlokoa tsa Jehova.—Ba-Heberu 11:17-21.

Tumelo ke ea Bohlokoa Bakeng sa Bakreste

21. Ho amoheleha ho Molimo kajeno, re tlameha ho akareletsa eng tšebelisong ea rōna ea tumelo?

²¹ Ka ho hlakileng, tumelo e akareletsa ho hongata ho feta feela ho ba le tšepo ea ho phethahatsoa ha litšepiso tsa Jehova. Ho pholletsa le histori ea batho, ho ’nile ha hlokahala hore ho sebelisoe tumelo ho Molimo ka litsela tse fapaneng haeba re lokela ho thabela kamohelo ea hae. Pauluse o ile a bontša hore “tumelo ha e le sieo, ha ho kamoo Molimo o ka khahlisoang; ea atamelang Molimo e ka khona a lumele hobane o teng, le hoba ke oona moputsi oa ba o batlang.” (Ba-Heberu 11:6) Hore motho a amohelehe ho Jehova kajeno, o tlameha ho sebelisa tumelo ho Jesu Kreste le sehlabelong sa thekollo seo Molimo a faneng ka sona ka eena. (Ba-Roma 5:8; Ba-Galata 2:15, 16) Ho joalokaha Jesu ka boeena a boletse: “Hobane Molimo o ratile lefatše [la moloko oa batho] hakalo, o bile oa le nea Mora oa oona ea tsoetsoeng a ’notši; hore e mong le e mong ea lumelang ho eena, a se ke a timela, a mpe a be le bophelo bo sa feleng. Ea lumelang ho Mora, o na le bophelo bo sa feleng; ’me ea sa lumeleng ho Mora, a ke ke a bona bophelo, empa bohale ba Molimo bo sala holim’a hae.”—Johanne 3:16, 36.

22. ’Muso oa Bomessia o tla tlisa phethahatso ea tšepiso efe?

²² Jesu o phetha karolo ea bohlokoa phethahatsong ea litšepiso tsa Molimo mabapi le ’Muso oo Bakreste ba o rapellang. (Esaia 9:6, 7; Daniele 7:13, 14; Mattheu 6:9, 10) Joalokaha Petrose a bontšitse, ho fetoleloa ha Jesu sebōpehong se khanyang ho tiisa lentsoe la boprofeta mabapi le ho tla ha hae ka matla le khanya tsa ’Muso. ’Muso oa Bomessia o tla tlisa phethahatso ea tšepiso e ’ngoe ea Molimo, hobane Petrose o ile a ngola: “Re lebeletse, ka pallo [tšepiso] ea oona, maholimo a macha le lefatše le lecha moo ho loka ho ikahetseng teng.” (2 Petrose 3:13) Boprofeta bo tšoanang bo ile ba phethahatsoa ha batšoaruoa ba Bajode Babylona ba khutlisetsoa naheng ea habo bona ka 537 B.C.E. ka tlas’a ’muso oo Zorobabele e neng e le ’musisi ’me Joshua e le moprista ea phahameng. (Esaia 65:17) Empa Petrose o ile a supa nakong e tlang eo “maholimo a macha”—’Muso oa Bomessia oa leholimo—o neng o tla busa “lefatše le lecha,” mokhatlo oa batho ba lokileng ba phelang qitikoeng ena.—Bapisa le Pesaleme ea 96:1.

23. Ke lipotso life mabapi le bokhabane tse tla tšohloa nakong e tlang?

²³ Joaloka bahlanka ba tšepahalang ba Jehova le balateli ba Mor’a hae ea ratoang, Jesu Kreste, re laba-labela lefatše le lecha le tšepisitsoeng la Molimo. Rea tseba hore le haufi, ’me re na le tumelo ea hore litšepiso tsohle tsa bohlokoa tsa Jehova li tla phethahatsoa. Ho tsamaea ka tsela e amohelehang ho Molimo oa rōna, re tlameha ho matlafatsa tumelo ea rōna ka ho e ekeletsa bokhabane, tsebo, boitšoaro, mamello, boinehelo ba bomolimo, kameho ea boena, le lerato.a Tabeng ena, ho ka botsoa, Ke joang re ka bonahatsang bokhabane? ’Me ke joang ho ba khabane ha rōna ho ka re tsoelang molemo ’me ha tsoela le ba bang molemo, haholo-holo metsoalle ea rōna ea Bakreste, e arabetseng litšepisong tsa Molimo ka ho bontša tumelo?

[Mongolo o botlaaseng ba leqephe]

U ka Araba Joang?

◻ “Tumelo” e ka hlalosoa joang?

◻ Ho ea ka 2 Petrose 1:5-7, ke litšoaneleho life tse lokelang ho ekeletsoa tumelong ea rōna?

◻ Ho fetoleloa ha Jesu sebōpehong se khanyang ho lokela ho ba le phello efe tumelong ea rōna?

◻ Ke mehlala efe ea tumelo e ileng ea behoa ke Abele, Abrahama, Sara, le ba bang ba linakong tsa pele?

[Setšoantšo se leqepheng la 15]

Na u tseba kamoo ho fetoleloa ha Jesu sebōpehong se khanyang ho ka amang tumelo ea motho?