Lula U Hopolela Letsatsi la Jehova Haufi
“Matsatsing a ho qetela ho tla tla basomi.”—2 PETROSE 3:3.
1. Mokreste e mong oa kajeno o bile le boikutlo bofe ba ho potlaka?
EO E bileng mosebeletsi oa nako e tletseng ka lilemo tse fetang 66 o ile a ngola: “Kamehla ke ’nile ka ba le boikutlo bo matla ba ho potlaka. Monahanong oa ka kamehla Armagedone e ne e tla tla ha ho feta hosasane. (Tšenolo 16:14, 16) Joaloka Ntate le Ntate-moholo, ke phetse bophelo ba ka joalokaha moapostola [Petrose] a ile a phehella, ke ‘lutse ke hopolela haufi ho ba teng ha letsatsi la Jehova.’ Kamehla ke ’nile ka talima lefatše le lecha le tšepisitsoeng e le ‘ntho ea sebele le hoja e sa bonoe.’”—2 Petrose 3:11, 12; Baheberu 11:1; Esaia 11:6-9; Tšenolo 21:3, 4.
2. Ho lula u hopolela letsatsi la Jehova haufi ho bolela’ng?
2 Polelo ea Petrose e reng ‘ho lula u hopolela haufi’ ha a bua ka letsatsi la Jehova e bolela hore ha re le khutlisetse morao ka likelellong tsa rōna. Ha rea lokela ho lebala hore letsatsi leo ka lona Jehova a tla felisa tsamaiso ena ea lintho e le selelekela sa ho theha lefatše la hae le lecha le tšepisitsoeng, le haufi haholo. Le lokela hore e be la sebele ho rōna hoo re le bonang ka ho hlaka, e le le haufi haholo ka pele ho rōna. Ke kamoo e neng e le la sebele kateng ho baprofeta ba Molimo ba boholo-holo, ’me hangata ba ne ba bua ka lona e le le haufi.—Esaia 13:6; Joele 1:15; 2:1; Obadia 15; Sofonia 1:7, 14.
3. Ka ho hlakileng keletso ea Petrose mabapi le letsatsi la Jehova e ile ea susumetsoa ke’ng?
3 Ke hobane’ng ha Petrose a ile a re phehella ho talima letsatsi la Jehova joalokaha eka ka puo ea tšoantšetso le ne le ka tla “ha ho feta hosasane”? Hobane ho hlakile hore ba bang ba ne ba qalile ho soma khopolo ea ho ba teng ha Kreste ho tšepisitsoeng hoo nakong ea hona bafosi ba neng ba tla otloa. (2 Petrose 3:3, 4) Ka hona khaolong ea 3 ea lengolo la hae la bobeli, eo re tla e hlahloba hona joale, Petrose o araba liqoso tsa basomi bana.
Boipiletso bo Mofuthu bo Lokelang ho Hopoloa
4. Petrose o batla hore re hopole eng?
4 Boikutlo bo mofuthu ba Petrose bakeng sa barab’abo bo bontšoa ke ha khaolong ena a ba bitsa “baratuoa” khafetsa. Ha a ipiletsa ho bona ka mofuthu hore ba se lebale seo ba se rutiloeng, Petrose o qala ka ho re: ‘Baratuoa, ka khopotso ke tsosa matla a lōna a hlakileng a ho nahana, e le hore le ka hopola lipolelo tse ileng tsa buuoa pele ke baprofeta ba halalelang le taelo ea Morena le Mopholosi ka baapostola ba lōna.’—2 Petrose 3:1, 2, 8, 14, 17; Jude 17.
5. Baprofeta ba bang ba ile ba re’ng ka letsatsi la Jehova?
5 Petrose o khothalletsa babali ho hopola ‘lipolelo life tse ileng tsa buuoa pele ke baprofeta ba halalelang’? Ka sebele, ke tse mabapi le ho ba teng ha Kreste matleng a ’Muso le tsa kahlolo ea ba sa tšabeng Molimo. Pejana Petrose o ne a ile a lebisa tlhokomelo lipolelong tsena. (2 Petrose 1:16-19; 2:3-10) Jude o bua ka Enoke, eo e neng e le moprofeta oa pele eo ho neng ho e-na le se tlalehiloeng ka eena, ea ileng a lemosa ka kahlolo e bohloko ea Molimo holim’a ba etsang bobe. (Jude 14, 15) Baprofeta ba bang ba ile ba tla ka mor’a Enoke, ’me Petrose ha a batle hore re lebale seo ba se ngotseng.—Esaia 66:15, 16; Sofonia 1:15-18; Zakaria 14:6-9.
6. Ke lipolelo life tsa Kreste le baapostola ba hae tse re behang leseling mabapi le letsatsi la Jehova?
6 Ho ekelletsa moo, Petrose o bolella babali ba hae hore ba hopole “taelo ea Morena le Mopholosi.” Taelo ea Jesu e akarelletsa khothatso ena: “Ikeleng hloko hore lipelo tsa lōna le ka mohla e se ke ea e-ba tse imeloang . . . ’me ka tšohanyetso letsatsi leo la e-ba holim’a lōna hang-hang joaloka leraba.” “Lulang le talimile, le lule le falimehile, kaha ha le tsebe hore na nako e behiloeng e neng.” (Luka 21:34-36; Mareka 13:33) Petrose o boetse o re phehella ho ela hloko lipolelo tsa baapostola. Ka mohlala, moapostola Pauluse o ile a ngola: “Letsatsi la Jehova le tla hantle feela joaloka lesholu bosiu. Joale, kahoo, a re se keng ra tsoela pele ho robala joalokaha ba bang kaofela ba tsoela pele ho robala, empa a re luleng re falimehile ’me re lule re hlaphohetsoe likelellong.”—1 Bathesalonika 5:2, 6.
Litakatso Tsa Basomi
7, 8. (a) Ke batho ba mofuta ofe ba somang melaetsa ea Molimo e lemosang? (b) Basomi ba re’ng?
7 Joalokaha ho bontšitsoe pele, lebaka la keletso ea Petrose ke hore ba bang ba ne ba qalile ho soma litemoso tse joalo, joalokaha Baiseraele ba mehleng ea pele ba ile ba soma baprofeta ba Jehova. (2 Likronike 36:16) Petrose oa hlalosa: “Etsoe le tseba sena pele, hore matsatsing a ho qetela ho tla tla basomi ka ho soma ha bona, ba tsoela pele ho ea ka litakatso tsa bona.” (2 Petrose 3:3) Jude o bolela hore basomi bana ba lakatsa “lintho tse se nang bomolimo.” O ba bitsa “batho ba bophoofolo, ba se nang bomoea.”—Jude 17-19.
8 Mesuoe ea bohata eo Petrose a itseng ke e “tsoelang pele ho latela nama ka takatso ea ho e silafatsa” ho ka etsahala hore e har’a basomi bana ba se nang bomoea. (2 Petrose 2:1, 10, 14) Ka ho soma ba botsa Bakreste ba tšepahalang: “Ho kae ho ba teng hoo ho tšepisitsoeng ha hae? Ka sebele, ho tloha letsatsing la ha baholo-holo ba rōna ba robala lefung, lintho tsohle li tsoela pele hantle feela joaloka ho tloha tšimolohong ea pōpo.”—2 Petrose 3:4.
9. (a) Ke hobane’ng ha basomi ba leka ho khella fatše boikutlo ba ho potlaka bo atileng Lentsoeng la Molimo? (b) Ke joang ho lula re hopolela letsatsi la Jehova haufi e leng tširelo ho rōna?
9 Ba soma tjee molato? Ke hobane’ng ha ba fana ka maikutlo a hore ho ba teng ha Kreste ho ka ’na ha se be teng le ka mohla, hore Molimo le ka mohla ha a e-s’o kenelle litabeng tsa batho ’me ha a sa tla kenella? Ha e le hantle, ka ho khella fatše boikutlo ba ho potlaka bo tletseng hohle Lentsoeng la Molimo, basomi bana ba bophoofolo ba batla ho koeetsa ba bang hore ba be boemong ba boiphapanyo moeeng ’me ka tsela eo ba ba etse ba khelosoang habonolo ka lipolelo tsa boithati. Ke khothatso e matla hakaakang ho rōna kajeno hore re lule re falimehile moeeng! E se eka re ka lula re hopolela letsatsi la Jehova haufi ’me kamehla re hopole hore mahlo a hae a re shebile! Kahoo re tla susumelletseha ho sebeletsa Jehova ka cheseho re be re lule re hloekile boitšoarong.—Pesaleme ea 11:4; Esaia 29:15; Ezekiele 8:12; 12:27; Sofonia 1:12.
Tsa ka Boomo le Tse Nyelisehang
10. Petrose o paka joang hore basomi ba fositse?
10 Basomi ba joalo ba hlokomoloha ’nete ea bohlokoa. Ba e hlokomoloha ka boomo ’me ba leka ho etsa hore ba bang ba e lebale. Hobane’ng? E le hore ba ka khelosa batho habonolo. Petrose oa ngola: “Etsoe, ho ea ka takatso ea bona, ’nete ena e phonyoha tlhokomelo ea bona.” ’Nete efe? “Hore ho ne ho e-na le maholimo ho tloha khale le lefatše le neng le eme le setlellane ho tsoa metsing le har’a metsi ka lentsoe la Molimo; ’me ka mekhoa eo lefatše la nakong eo le ile la timela ha le koaheloa ke metsi.” (2 Petrose 3:5, 6) E, Jehova o ile a tlosa bokhopo lefatšeng nakong ea Moroallo oa mehleng ea Noe, e leng ’nete eo Jesu le eena a ileng a e hatisa. (Matheu 24:37-39; Luka 17:26, 27; 2 Petrose 2:5) Ka hona, ho fapana le seo basomi ba se buang, lintho tsohle ha lia tsoela pele “hantle feela joaloka ho tloha tšimolohong ea pōpo.”
11. Ke litebello life tse bileng teng pele ho nako tsa Bakreste ba pele tse ileng tsa etsa hore ba bang ba ba some?
11 E ka ’na eaba basomi ba ile ba hla ba soma Bakreste ba tšepahalang hobane ka nako eo ba ne ba e-na le litebello tse e-song ho phethahale. Pejana Jesu a e-shoa, barutuoa ba hae “ba ne ba nahana hore ’muso oa Molimo o ne o tla iponahatsa hang-hang.” Joale, ka mor’a tsoho ea hae ba ile ba botsa hore na ’Muso o ne o tla thehoa hang-hang. Hape, hoo e ka bang lilemo tse leshome pele Petrose a ngola lengolo la hae la bobeli, ba bang ba ne ba “feha matšoafo” ka lebaka la “molaetsa oa molomo” kapa “lengolo,” oo ho neng ho lumeloa hore o ne o e-tsoa ho moapostola Pauluse kapa balekane ba hae, o “bolelang hore letsatsi la Jehova le fihlile.” (Luka 19:11; 2 Bathesalonika 2:2; Liketso 1:6) Leha ho le joalo, litebello tse joalo tsa barutuoa ba Jesu, e ne e se tsa bohata, li mpile tsa e-ba teng pele ho nako. Letsatsi la Jehova le ne le tla tla!
Lentsoe la Molimo Lea Tšepahala
12. Lentsoe la Molimo le ipakile le tšepahala joang boprofeteng ba lona mabapi le “letsatsi la Jehova”?
12 Joalokaha ho bontšitsoe pejana, baprofeta ba pele ho Bokreste ba ne ba atisa ho lemosa hore letsatsi la Jehova la phetetso le ne le le haufi. “Letsatsi la Jehova” le lenyenyane le ile la tla ka 607 B.C.E. ha Jehova a ne a iphetetsa ho batho ba hae ba tsoileng tseleng. (Sofonia 1:14-18) Hamorao, lichaba tse ling, ho akarelletsa Babylona le Egepeta, li ile tsa latsoa “letsatsi la Jehova” le joalo. (Esaia 13:6-9; Jeremia 46:1-10; Obadia 15) Bofelo ba tsamaiso ea Sejuda ea lekholong la pele la lilemo le bona bo ile ba boleloa esale pele, ’me bo ile ba fihla ha makhotla a Baroma a ripitla Judea ka 70 C.E. (Luka 19:41-44; 1 Petrose 4:7) Empa Petrose o bua ka “letsatsi la Jehova” la nakong e tlang le tla etsa hore esita le Moroallo oa lefatše lohle o bonahale o le monyenyane!
13. Ke mohlala ofe oa histori o bontšang hore bofelo ba tsamaiso ee ea lintho ke taba e tiileng?
13 Petrose o kenyelletsa tlhaloso ea hae ea timetso eo e tlang, ha a re: “Empa ka lentsoe le tšoanang.” O ne a sa tsoa bolela hore, “ka lentsoe la Molimo,” lefatše la pele ho Moroallo le ile la ema “ho tsoa metsing le har’a metsi.” Boemo bona, bo hlalositsoeng tlalehong ea Bibele ea pōpo, bo ile ba etsa hore Moroallo o be teng ha metsi a ne a tšolohela fatše ka taelo ea Molimo, kapa lentsoe. Petrose o tsoela pele: “Ka lentsoe le tšoanang [la Molimo] maholimo le lefatše tse teng hona joale li boloketsoe mollo ’me li ntse li bolokiloe ho fihlela letsatsing la kahlolo le la timetso ea batho ba se nang bomolimo.” (2 Petrose 3:5-7; Genese 1:6-8) Re na le lentsoe la Jehova le tšepahalang bakeng sa eona! O tla felisa “maholimo le lefatše”—tsamaiso ena ea lintho—khalefong e kang mollo ea letsatsi la hae le leholo! (Sofonia 3:8) Empa neng?
Ho Labalabela Hore Bofelo bo Tle
14. Ke hobane’ng ha re ka kholiseha hore hona joale re phela “matsatsing a ho qetela”?
14 Barutuoa ba Jesu ba ne ba batla ho tseba hore na bofelo bo tla tla neng, ka hona ba ile ba mo botsa: “Pontšo e tla ba efe ea ho ba teng ha hao le ea qetello ea tsamaiso ea lintho?” Ka sebele ba ne ba botsa mabapi le hore na tsamaiso ea Sejuda e ne e tla fela neng, empa karabo ea Jesu e ne e lebisitsoe haholo-holo tabeng ea hore na “maholimo le lefatše” tsa hona joale li ne li tla felisoa neng. Jesu o ile a bolela esale pele lintho tse kang lintoa tse khōlō, likhaello tsa lijo, litšisinyeho tsa lefatše, mafu le tlōlo ea molao. (Matheu 24:3-14; Luka 21:5-36) Ho tloha ka selemo sa 1914, re bone ho phethahala ha pontšo eo Jesu a faneng ka eona bakeng sa “qetello ea tsamaiso ea lintho” esita le lintho tseo moapostola Pauluse a ileng a bolela hore li ne li tla khetholla ‘matsatsi a ho qetela.’ (2 Timothea 3:1-5) Ka sebele, bopaki bo bongata ba hore re phela mehleng ea qetello ea tsamaiso ena ea lintho!
15. Bakreste ba ’nile ba sekamela ho etseng eng ho sa tsotellehe temoso ea Jesu?
15 Lipaki tsa Jehova li ’nile tsa labalabela ho tseba hore na letsatsi la Jehova le tla tla neng. Tabatabelong ea tsona, ka linako tse ling li ’nile tsa etsa boiteko ba ho hakanya hore na le ka tla neng. Empa ka ho etsa joalo, li hlōlehile, joalokaha barutuoa ba Jesu ba pele ba ile ba hlōleha ho ela hloko temoso ea Monghali oa bona ea hore ha re “tsebe hore na nako e behiloeng e neng.” (Mareka 13:32, 33) Basomi ba ’nile ba soma Bakreste ba tšepahalang bakeng sa litebello tsa bona tse bileng teng pele ho nako. (2 Petrose 3:3, 4) Leha ho le joalo, Petrose o tiisa hore letsatsi la Jehova le tla tla ho latela kemiso ea Hae ea nako.
Tlhokahalo ea ho ba le Pono ea Jehova
16. Ke keletso efe eo e leng bohlale hore re e ele hloko?
16 Ho hlokahala hore re be le pono ea Jehova ka nako, joalokaha Petrose joale a re hopotsa: “Leha ho le joalo, ’nete ena e le ’ngoe a e se ke ea phonyoha tlhokomelo ea lōna, baratuoa, hore letsatsi le le leng ho Jehova le joaloka lilemo tse sekete le lilemo tse sekete li joaloka letsatsi le le leng.” Nako eo re phelang ka eona ea lilemo tse 70 kapa 80 e khutšoanyane hakaakang ha ho bapisoa! (2 Petrose 3:8; Pesaleme ea 90:4, 10) Ka hona haeba ho bonahala eka phethahatso ea litšepiso tsa Molimo ea lieha, ho hlokahala hore re amohele keletso ea moprofeta oa Molimo: “Esita leha [nako e behiloeng] e ka lieha, u ’ne u e lebelle; hobane e tla fela e tle. E ke ke ea lieha.”—Habakuke 2:3, NW.
17. Le hoja matsatsi a ho qetela a tsoetse pele halelele ho feta kamoo ba bangata ba neng ba lebeletse, re ka kholiseha ka eng?
17 Ke hobane’ng ha matsatsi a ho qetela a tsamaiso ee a tsoetse pele halelele ho feta kamoo ba bangata ba neng ba lebeletse? Ka lebaka le molemo, joalokaha hamorao Petrose a hlalosa: “Jehova ha a liehe mabapi le tšepiso ea hae, joalokaha batho ba bang ba ho nka e le tieho, empa ha a le felle pelo hobane ha a lakatse hore leha e le mang a timetsoe empa o lakatsa hore bohle ba fihle pakong.” (2 Petrose 3:9) Jehova o nahanela se leng molemong oa moloko oohle oa batho. O amehile ka bophelo ba batho, ’me o re: “Ha ke khahloe ke lefu la molotsana, ke khahloa ke molotsana ha a baka mokhoeng oa hae, hore a phele.” (Ezekiele 33:11) Ka hona re ka kholiseha hore bofelo bo tla tla ka nako e nepahetseng hantle ho phethahatsa morero oa ’Mōpi oa rōna ea bohlale ka hohle le ea lerato!
Ke’ng se Tla Feta?
18, 19. (a) Ke hobane’ng ha Jehova a ikemiselitse ho felisa tsamaiso ee ea lintho? (b) Petrose o hlalosa bofelo ba tsamaiso ee joang, ’me ha e le hantle ho tla felisoa eng?
18 Kaha Jehova o hlile o rata ba mo sebeletsang, o tla felisa ka ho feletseng bohle ba ba utloisang bohloko. (Pesaleme ea 37:9-11, 29) Ha Petrose a bontša, joalokaha Pauluse a ile a bontša pejana, hore timetso ena e ne e tla tla ka nako e sa lebelloang, oa ngola: “Letsatsi la Jehova le tla tla joaloka lesholu, leo ka lona maholimo a tla feta ka lerata le sheshang le hlabang, empa thepa ea motheo e le e chesang ka matla haholo e tla qhibiliha, ’me lefatše le mesebetsi e ho lona li tla pepesoa.” (2 Petrose 3:10; 1 Bathesalonika 5:2) Maholimo le lefatše tsa sebele ha lia ka tsa timela Moroallong, leha e le hona hore li tla timela letsatsing la Jehova. Joale, ke’ng e tla “feta,” kapa e tla timetsoa?
19 Mebuso ea batho e ’nileng ea busa moloko oa batho joaloka “maholimo,” e tla fela ’me ho tla etsahala se tšoanang ka “lefatše,” kapa mokhatlo oa batho ba sa tšabeng Molimo. “Lerata le sheshang le hlabang” mohlomong le bontša ho feta ho potlakileng ha maholimo. “Thepa ea motheo” e leng mokhatlo oa batho ba kajeno ba senyehileng e tla “qhibiliha,” kapa e timetsoe. ’Me “lefatše” le tla “pepesoa” hammoho le “mesebetsi e ho lona.” Jehova o tla pepesa ka ho feletseng liketso tse khopo tsa batho ha a felisa tsamaiso eohle ea lefatše eo ka nepo e lokelang ho felisoa.
Lula U Lebisitse Tlhokomelo Tšepong ea Hao
20. Liketsahalo tse larileng ka pele li lokela ho ama bophelo ba rōna joang?
20 Kaha liketsahalo tsena tse hapang tlhokomelo li haufi, Petrose o bolela hore re tšoanela ho ameha ‘liketsong tse halalelang tsa boitšoaro le liketsong tsa boinehelo ba bomolimo, re letile ’me re lutse re hopolela haufi ho ba teng ha letsatsi la Jehova.” Ho ke ke ha e-ba le pelaelo! ‘Maholimo ha a cha a tla qhibiliha le thepa ea motheo ha e chesa ka matla haholo e tla qhibiliha!’ (2 Petrose 3:11, 12) Taba ea hore liketsahalo tsena tse hapang tlhokomelo e ka ’na eaba li ka qala ho etsahala hosasane e lokela ho ama ntho e ’ngoe le e ’ngoe eo re e etsang kapa eo re lokisetsang ho e etsa.
21. Ke’ng e tla nkela maholimo a kajeno le lefatše la kajeno sebaka?
21 Joale Petrose o re bolella se tla nkela tsamaiso ea khale sebaka, ha a re: “Empa ho na le maholimo a macha le lefatše le lecha tseo re li letetseng ho ea ka tšepiso ea hae, ’me ho tsena ho loka ho tla aha.” (2 Petrose 3:13; Esaia 65:17) Khele, ho khatholla hakaakang! Kreste le ba 144 000 ba busang le eena e tla ba litho tsa ’muso oa “maholimo a macha,” ’me batho ba pholohang bofelo ba lefatše lena ba tla theha “lefatše le lecha.”—1 Johanne 2:17; Tšenolo 5:9, 10; 14:1, 3.
E-ba le Boikutlo ba ho Potlaka le ba ho Hloeka Boitšoarong
22. (a) Ke’ng se tla re thusa ho qoba letheba leha e le lefe la moea kapa sekoli? (b) Petrose o lemosa ka kotsi efe?
22 Petrose o tsoela pele: “Kahoo, baratuoa, kaha le letetse lintho tsena, le etse sohle se matleng a lōna hore qetellong a le fumane le se na letheba ebile le se na sekoli ’me le le khotsong. Ho feta moo, le nke ho se fele pelo ha Morena oa rōna e le poloko.” Ho leta ka tabatabelo, le ho talima eng kapa eng e ka ’nang ea bonahala e le ho lieha ha letsatsi la Jehova e le pontšo ea ho mamella ha Molimo ho tla re thusa ho qoba letheba kapa sekoli leha e le sefe sa moea. Empa, ho na le kotsi! Petrose o lemosa hore ka mangolong a “mor’abo rōna ea ratoang Pauluse . . . ho na le lintho tse ling tse thata ho utloisiseha, tseo ba sa rutoang le ba sa tsitsang ba li sothang, joalokaha ba etsa le ka Mangolo a mang kaofela, e leng ho isang timetsong ea bona.”—2 Petrose 3:14-16.
23. Keletso ea Petrose e phethang ke efe?
23 Ka sebele mesuoe ea bohata e ne e sotha mangolo a Pauluse mabapi le mosa o sa tšoanelang oa Molimo, e a sebelisa e le boikemelo bakeng sa boitšoaro bo hlephileng. Mohlomong Petrose o ne a nahanne sena ha a ngola keletso ea hae eo a khaohaneng le bona ka eona: “Ka hona, lōna baratuoa, le e-na le tsebo ena e fanoeng esale pele, le itebele e le hore le se ke la hulanngoa hammoho le bona ke phoso ea batho ba nyelisang molao ’me la oa ho tieeng ha lōna.” Joale o phetha lengolo la hae, ka ho phehella: “Le tsoele pele ho hōla moseng o sa tšoanelang le tsebong tsa Morena le Mopholosi oa rōna Jesu Kreste.”—2 Petrose 3:17, 18.
24. Bahlanka bohle ba Jehova ba lokela ho ba le boikutlo bofe?
24 Ho hlakile hore Petrose o batla ho matlafatsa barab’abo. O lakatsa hore bohle ba be le boikutlo bo bontšitsoeng ke Paki e tšepahalang e lilemo li 82 e qotsitsoeng qalong: “Ke phetse bophelo ba ka joalokaha moapostola a ile a phehella, ke ‘lutse ke hopolela haufi ho ba teng ha letsatsi la Jehova.’ Kamehla ke ’nile ka talima lefatše le lecha le tšepisitsoeng joaloka ‘ntho ea sebele le hoja e sa bonoe.’” E se eka kaofela re ka phela bophelo ba rōna ka tsela e tšoanang.
U ne U Tla Araba Joang?
◻ ‘Ho lula u hopolela haufi’ letsatsi la Jehova ho bolela’ng?
◻ Ke’ng seo basomi ba se hlokomolohang ka boomo, hona hobane’ng?
◻ Basomi ba somme Bakreste ba tšepahalang ka lebaka lefe?
◻ Ho hlokahala hore re lule re e-na le pono efe?
[Setšoantšo se leqepheng la 23]
Lula u hopolela letsatsi la Jehova haufi . . .
[Setšoantšo se leqepheng la 24]
. . . le lefatše le lecha le tla latela