Bahlanka ba Jehova ba na le Tšepo ea Sebele

“Ba setseng ba Jakobo ba tla ba joaloka phoka e tsoang ho Jehova har’a lichaba tse ngata . . . tse sa lebelleng ho motho.”—MIKEA 5:7.

 1. Ke joang Iseraele ea moea e leng mohloli oa khatholoho?

JEHOVA ke Moetsi e moholo oa pula le phoka. Ke halefeela ho tšepa hore batho ba ka nesa phoka kapa pula. Moprofeta Mikea o ile a ngola: “Ba setseng ba Jakobo ba tla ba joaloka phoka e tsoang ho Jehova har’a lichaba tse ngata, joaloka lipula tsa melupe holim’a limela, tse sa lebelleng ho motho kapa ho letela bara ba motho oa lefatše.” (Mikea 5:7) “Ba setseng ba Jakobo” ke bo-mang kajeno? Ke Baiseraele ba moea, masala a “Iseraele ea Molimo.” (Bagalata 6:16) Ba joaloka ‘phoka e khathollang e tsoang ho Jehova’ le joaloka “lipula tsa melupe holim’a limela” ho “lichaba tse ngata.” Ha e le hantle, kajeno Bakreste ba tlotsitsoeng ke mohloli oa khatholoho ho batho, o tsoang ho Molimo. Kaha ke baboleli ba ’Muso, Jehova o ba sebelisa ho fetisetsa molaetsa oa hae oa tšepo ea sebele ho batho.

 2. Ke hobane’ng ha re e-na le tšepo ea sebele le hoja re phela lefatšeng lee le likhathatso?

² Ha hoa lokela ho re makatsa hore ebe lefatše lena ha le na tšepo ea sebele. Ho hloka botsitso ha lipolotiki, ho hlepha ha boitšoaro, tlōlo ea molao, mathata a moruo, bokhukhuni, lintoa—ke lintho tseo re li lebeletseng lefatšeng le busoang ke Satane Diabolose. (1 Johanne 5:19) Ba bangata ba tšohile hore na ebe mohlomong bokamoso bo ba tšoaretse eng. Leha ho le joalo, joaloka barapeli ba Jehova ha rea tšoha, kaha re na le tšepo e tiileng ka bokamoso. Ke tšepo ea sebele hobane e thehiloe Lentsoeng la Molimo. Re na le tumelo ho Jehova le Lentsoeng la hae hobane seo a se buang kamehla sea phethahala.

 3. (a) Ke hobane’ng ha Jehova a ne a tla nkela Iseraele le Juda khato? (b) Ke hobane’ng ha mantsoe a Mikea a sebetsa le kajeno?

³ Boprofeta bo bululetsoeng ba Mikea bo re matlafalletsa ho tsamaea ka lebitso la Jehova ’me bo re fa motheo oa tšepo ea sebele. Lekholong la borobeli la lilemo B.C.E., ha Mikea a ne a profeta, batho ba Molimo ba selekane ba ne ba arohile lichaba tse peli—sa Iseraele le sa Juda—’me ka bobeli li ne li hlokomolohile selekane sa Molimo. Seo se ile sa fella ka boitšoaro bo hlephileng, bokoenehi le lerato le feteletseng la lintho tse bonahalang. Ka hona, Jehova o ile a lemosa hore o tla ba nkela khato. Ke ’nete hore Molimo o ne a lemosa batho ba mehleng ea Mikea. Leha ho le joalo, kajeno boemo bo tšoana le ba mehleng ea Mikea hoo mantsoe a hae a sebetsang le nakong ea joale. Sena se tla totobala ha re ntse re tšohla tse ling tsa lintlha-khōlō likhaolong tse supileng tsa buka ea Mikea.

Seo ho Hlahloba Buka Ena ho se Senolang

 4. Mikea khaolo ea 1 ho isa ho ea 3 e fana ka boitsebiso bofe?

⁴ A re ke re hlahlobeng hakhutšoanyane se fuperoeng ke buka ea Mikea. Khaolong ea 1, Jehova o pepesa bofetoheli ba Iseraele le Juda. Ka lebaka la borabele ba eona, Iseraele e tla felisoa ’me kotlo ea Juda e tla fihla lihekeng tsa Jerusalema. Khaolo ea 2 e senola hore barui le ba matla ba hatella ba fokolang le ba se nang mang-oe! Leha ho le joalo, Molimo o tšepisa ho itseng. Batho ba Molimo ba tla bokelloa hammoho hore ba be bonngoeng. Khaolo ea 3 e tlaleha liphatlalatso tsa Jehova khahlanong le baeta-pele ba sechaba le baprofeta ba marabele. Baeta-pele ba khopamisa toka, ’me baprofeta ba bua mashano. Ho sa tsotellehe sena, moea o halalelang o matlafatsa Mikea hore a phatlalatse kahlolo ea Jehova e tlang.

 5. Mikea khaolo ea 4 le ea 5 e fupere lintlha life tsa sehlooho?

⁵ Khaolo ea 4 e bolela esale pele hore karolong e qetellang ea matsatsi, lichaba tsohle li tla nyolohela thabeng e phahameng ea ntlo ea Jehova hore li rutoe ke eena. Pele ho moo Juda e tla isoa botlamuoeng Babylona, empa Jehova o tla e lopolla. Khaolo ea 5 e senola hore Mesia o tla tsoalloa Bethlehema ea Juda. O tla alosa batho ba hae le ho ba lopolla lichabeng tsa bahatelli.

6, 7. Ke lintlha life tse hlahisoang khaolong ea 6 le ea 7 ea boprofeta ba Mikea?

⁶ Mikea khaolo ea 6 e tlaleha lintho tseo Jehova a qosang batho ba hae ka tsona joalokaha eka ke nyeoe. O entse’ng hore ba mo fetohele? Ha aa etsa letho. Ha e le hantle, o bontša ho nahanela haholo ka seo a se hlokang ho bona. O batla hore barapeli ba hae ba sebelise toka ’me ba be mosa le ho ikokobetsa ha ba tsamaea le eena. Ho e-na le ho etsa hoo, Iseraele le Juda li nkile tsela ea bofetoheli ’me li tla kotula seo li se jetseng.

⁷ Khaolong ea ho qetela ea boprofeta ba hae, Mikea o nyatsa bokhopo ba batho ba mehleng ea hae. Leha ho le joalo, ha a nyahame, kaha o ikemiselitse ho “letela” Jehova. (Mikea 7:7) Buka ena e phetha ka mantsoe a bontšang ho kholiseha hore Jehova o tla hauhela batho ba hae. Histori e paka hore tšepo ena e ile ea phethahala. Ka 537 B.C.E., ha Jehova a se a qetile ho laea batho ba hae, ka mohau o ile a khutlisetsa masala naheng ea habo ’ona.

 8. U ka akaretsa se fuperoeng ke buka ea Mikea joang?

⁸ Jehova o senola boitsebiso bo hlollang hakaakang ka Mikea! Buka ena e bululetsoeng e fana ka mehlala e lemosang ea kamoo Molimo a sebetsanang kateng le ba ipolelang hore baa mo sebeletsa empa ba sa tšepahale. E bolela esale pele liketsahalo tse etsahalang kajeno. ’Me e fana ka keletso e tsoang ho Molimo mabapi le hore na re lokela ho itšoara joang linakong tsena tse thata e le hore re ka tiisa tšepo ea rōna.

’Musi Morena Jehova oa Bua

 9. Ho ea ka Mikea 1:2, Jehova o ne a tlil’o etsa’ng?

⁹ Joale a re hlahlobeng buka ea Mikea ka hloko. Ho Mikea 1:2, rea bala: “Utloang, Lōna lichaba, kaofela ha lōna; ela hloko, Uena lefatše le se tletseng ho uena, ’me ’Musi Morena Jehova e ke e be paki khahlanong le lōna, Jehova a le tempeleng ea hae e halalelang.” Ha ho pelaelo hore haeba u ne u phela mehleng ea Mikea, mantsoe ao a ka be a ile a hapa thahasello ea hao. Ha e le hantle, a hapa thahasello ea rōna kajeno hobane Jehova o bua a le tempeleng ea hae e halalelang ’me ha a bue le Baiseraele le Bajuda feela empa o bua le batho libakeng tsohle. Mehleng ea Mikea, batho ba ne ba hlokomolohile ’Musi Morena Jehova ka nako e telele. Lintho li ne li le haufi le ho fetoha. Jehova o ne a ikemiselitse ho nka khato e tiileng.

10. Ke hobane’ng ha mantsoe a Mikea 1:2 e le a bohlokoa ho rōna?

¹⁰ Boemo boa tšoana le mehleng ea rōna. Tšenolo 14:18-20 e bontša hore Jehova o boetse o bua a le tempeleng ea hae e halalelang. Haufinyane o tla nka khato e tiileng, ’me liketsahalo tse matla li tla boela li sisinye moloko oa batho. Lekhetlong lena, ‘morara o khopo oa lefatše’ o tla lahleloa ka sehatelong se seholo sa veine ea bohale ba Jehova, ho fihlela tsamaiso ea Satane ea lintho e felisitsoe ka ho feletseng.

11. Mantsoe a Mikea 1:3, 4 a bolela’ng?

¹¹ Mamela seo Jehova a tlang ho se etsa. Mikea 1:3, 4 e re: “Bonang! Jehova o tloha sebakeng sa hae, ’me ka sebele o tla theoha le ho hatakela libaka tse phahameng tsa lefatše. Lithaba li tla qhibiliha tlas’a hae, le likhohlo li tla arohana, joaloka boka ba linotši ka lebaka la mollo, joaloka metsi a tšolleloang sebakeng se motheō.” Na Jehova o tla tloha sebakeng sa hae sa leholimo ebe o ea Naheng e Tšepisitsoeng ho ea hatakela lithaba le likhohlo ka tsela ea sebele? Che. Ha ho hlokahale hore a etse joalo. Ho tla hlokahala feela hore a lebise tlhokomelo ea hae lefatšeng e le hore thato ea hae e phethahale. Ho feta moo, hase lefatše la sebele le tla hlaheloa ke lintho tse hlalositsoeng empa ke baahi ba lona. Ha Jehova a nka khato, phello e tla ba tlokotsi ho ba sa tšepahaleng—ho tla tšoana le ha eka lithaba li qhibilihile joaloka boka ba linotši ’me likhohlo li phatlotsoe ke tšisinyeho ea lefatše.

12, 13. Tumellanong le 2 Petrose 3:10-12, ke eng se tiisang tšepo ea rōna?

¹² Mantsoe a boprofeta a Mikea 1:3, 4 a ka ’na a u hopotsa boprofeta bo bong bo bululetsoeng bo bolelang esale pele ka litlokotsi tse tla hlahela lefatše. Joalokaha bo tlalehiloe ho 2 Petrose 3:10, moapostola Petrose o ile a ngola: “Letsatsi la Jehova le tla tla joaloka lesholu, leo ka lona maholimo a tla feta ka lerata le sheshang le hlabang, empa thepa ea motheo e le e chesang ka matla haholo e tla qhibiliha, ’me lefatše le mesebetsi e ho lona li tla pepesoa.” Mantsoe a Petrose, joaloka a boprofeta ba Mikea, ha a bolele maholimo a sebele le lefatše la sebele. A bolela matšoenyeho a maholo a tlang ho tlela tsamaiso ena ea lintho e se nang bomolimo.

¹³ Ho sa tsotellehe tlokotsi eo e tlang, Bakreste ba ka ba le tšepo ka bokamoso, joaloka Mikea. Joang? Ka ho latela keletso e litemaneng tse latelang tsa lengolo la Petrose. Moapostola o re: “Le tšoanela ho ba batho ba mofuta ofe liketsong tse halalelang tsa boitšoaro le liketsong tsa boinehelo ba bomolimo, le letile ’me le lutse le hopola ho ba teng ha letsatsi la Jehova!” (2 Petrose 3:11, 12) Tšepo ea rōna ka bokamoso e tla tiea haeba re hlaolela ho ba le lipelo tse utloang ’me re tiisa hore boitšoaro ba rōna boa halalela ’me bophelo ba rōna bo tletse liketso tsa boinehelo ba bomolimo. E le hore tšepo ea rōna e tiee, re boetse re lokela ho hopola hore ntle ho tikatiko letsatsi la Jehova le tla fihla.

14. Ke hobane’ng ha Baiseraele le Bajuda ba tšoaneloa ke kotlo?

¹⁴ Jehova o hlalosa lebaka leo ka lona batho ba hae ba boholo-holo ba tšoaneloang ke kotlo. Mikea 1:5 e re: “Ke ka lebaka la bofetoheli ba Jakobo sena sohle se leng teng, esita le ka lebaka la libe tsa ntlo ea Iseraele. Bofetoheli ba Jakobo ke eng? Na hase Samaria? Libaka tse phahameng tsa Juda ke eng? Na hase Jerusalema?” Baiseraele le Bajuda ba teng ka lebaka la Jehova. Leha ho le joalo, ba mo fetohetse, ’me bofetoheli ba bona bo kenella le metseng ea bona e meholo, e leng Samaria le Jerusalema.

Liketso Tse Khopo li ja Setsi

15, 16. Batho ba mehleng ea Mikea ba ne ba le molato oa liketso life tse khopo?

¹⁵ Mohlala oa bokhopo ba batho ba mehleng ea Mikea o hlalosoa hantle ho Mikea 2:1, 2: “Ho malimabe ba rerang se kotsi, le ba tloaetseng ho etsa se sebe, libetheng tsa bona! Ka leseli la hoseng baa se etsa, hobane ho matleng a matsoho a bona. Ba lakalitse masimo ebile ba a nkile; le matlo, ’me ba a nkile; ba etselitse monna ea shahlileng bolotsana le ba ntlo ea hae, monna le lefa la hae.”

¹⁶ Batho ba meharo ba lula ba falimehile bosiu ba rera kamoo ba tla nkela baahelani ba bona masimo le matlo kateng. Hoseng, ba potlakela ho phethahatsa merero ea bona. Ba ne ba ke ke ba etsa liketso tse khopo joalo haeba ba ntse ba hopola selekane sa Jehova. Molao oa Moshe o na le melao e sireletsang mafutsana. Tlas’a oona, ha ho lelapa le lokelang ho lahleheloa ke lefa la lona ka ho sa feleng. Leha ho le joalo, seo ha se re letho ho batho bao ba meharo. Ba hlokomoloha mantsoe a Levitike 19:18, a reng: “U rate oa heno joalokaha u ithata.”

17. Ke’ng se ka etsahalang ha ba ipolelang hore ba sebeletsa Molimo ba etelletsa pele lintho tse bonahalang bophelong?

¹⁷ Sena se bontša se ka etsahalang ha batho ba ipolelang hore ba sebeletsa Molimo ba hlokomoloha lipakane tsa moea ’me ba etelletsa pele ho batla lintho tse bonahalang. Pauluse o ile a lemosa Bakreste ba mehleng ea hae: “Ba ikemiselitseng ho rua ba oela molekong le lerabeng le litakatsong tse ngata tse se nang kelello le tse kotsi, tse lihelang batho timetsong le tšenyehong.” (1 Timothea 6:9) Ha motho a etelletsa ho bokella chelete pele bophelong ba hae, ha e le hantle, o rapela molimo oa bohata—e leng Maruo. Molimo eo oa bohata ha a fane ka tšepo e tiileng ea bokamoso.—Matheu 6:24.

18. Batho ba mehleng ea Mikea ba ratang lintho tse bonahalang ba ne ba tlil’o hlaheloa ke eng?

¹⁸ Ba bangata mehleng ea Mikea ba ithuta ka tsela e bohloko hore ho itšetleha ka lintho tse bonahalang ke halefeela. Ho ea ka Mikea 2:4, Jehova o re: “Letsatsing leo e mong o tla hlahisa polelo ea maele malebana le lōna ’me ka sebele o tla lla sello, sello ka bosona. E mong o tla lokela ho re: ‘Ka sebele re tlatlapuoe! O fetola kabelo ea sechaba sa ka. O e tlosa ho ’na hakaakang! O arolela ea sa tšepahaleng masimo a rōna.’” E, masholu ao a matlo le a masimo a tla lahleheloa ke mafa a malapa a ’ona. A tla lelekeloa naheng esele, ’me matlotlo a ’ona a tla fetoha se tlatlapiloeng ke “ea sa tšepahaleng,” kapa batho ba lichaba. Tšepo leha e le efe ea bokamoso bo atlehileng e tla fela.

19, 20. Ho ile ha etsahala’ng ka Bajuda ba tšepileng Jehova?

¹⁹ Leha ho le joalo, tšepo ea ba tšepileng Jehova ha e na ho soetseha. Jehova o tšepahalla lilekane tseo a li entseng le Abrahama le Davida, ’me o hauhela ba mo ratang joaloka Mikea le ba utloisoang bohloko ke ho ikarola ha batho ba habo bona ho Molimo. Molemong oa bao ba lokileng, ho tla ba le tsosoloso ka nako ea Molimo e loketseng.

²⁰ Seo se etsahala ka 537 B.C.E., ka mor’a hore Babylona e oe ’me masala a Bajuda a khutlele naheng ea habo ’ona. Ka nako eo, mantsoe a Mikea 2:12 a phethahala ka lekhetlo la pele. Jehova o re: “Ka sebele ke tla bokella Jakobo, kaofela ha lōna; ruri ke tla phutha ba setseng ba Iseraele. Ke tla ba beha bonngoeng, joaloka mohlape ka lesakeng, joaloka mohlape o leng har’a lekhulo la oona; moo ho tla tlala lerata la batho.” Jehova o lerato hakaakang! Ka mor’a ho laea batho ba hae, o lumella masala hore a khutle ’me a mo sebeletse naheng eo a e fileng baholo-holo ba bona.

Ho Tšoana ho Hlollang le Mehleng ea Rōna

21. Maemo a teng kajeno a tšoana le a mehleng ea Mikea joang?

²¹ Na ha re ntse re tšohla likhaolo tse peli tse qalang tsa Mikea, ha ua ka ua hlolloa ke kamoo lintho li tšoanang le kajeno kateng? Joaloka mehleng ea Mikea, ba bangata kajeno ba ipolela hore ba sebeletsa Molimo. Leha ho le joalo, joaloka Bajuda le Baiseraele, ba arohile litsekana ebile ba ’nile ba loantšana. Ba bangata ba ruileng Bokreste-’mōtoaneng ba hateletse mafutsana. Baeta-pele ba bolumeli ba ntseng ba eketseha ba lumella mekhoa eo Bibele e e nyatsang ka ho hlaka. Ke kahoo haufinyane Bokreste-’mōtoana bo tlang ho felisoa hammoho le likarolo tse ling tsohle tsa “Babylona e Moholo,” e leng ’muso oa lefatše oa bolumeli ba bohata! (Tšenolo 18:1-5) Leha ho le joalo, tumellanong le mohlala oa mehleng ea Mikea, Jehova o tla siea bahlanka ba tšepahalang lefatšeng.

22. Ke lihlopha life tse peli tse tšepileng ’Muso oa Molimo?

²² Ka 1919, Bakreste ba tšepahalang ba tlotsitsoeng ba ile ba ikarola ka ho feletseng Bokreste-’mōtoaneng ’me ba ikemisetsa ho phatlalatsa litaba tse molemo tsa ’Muso lichabeng tsohle. (Matheu 24:14) Qalong, ba ile ba batla masala a Iseraele ea Molimo. Ha ntan’o qaloa ho bokella “linku tse ling,” ’me lihlopha tsena ka bobeli ea e-ba “mohlape o le mong, molisa a [le] mong.” (Johanne 10:16) Le hoja hona joale barapeli bana bohle ba tšepahalang ba sebeletsa Molimo linaheng tse 234, ba fela ba le “bonngoeng.” Hona joale, lesaka la linku le ‘tletse lerata la banna,’ hammoho le la basali le bana. Tšepo ea bona ha e tsamaisong ena ea lintho, empa e ’Musong oa Molimo, oo haufinyane o tlang ho tlisa Paradeise lefatšeng.

23. Ke hobane’ng ha u kholisehile hore tšepo ea hao ke ea sebele?

²³ Mabapi le barapeli bana ba tšepahalang ba Jehova, temana ea ho qetela ho Mikea khaolo ea 2 e re: “Morena oa bona o tla feta ka pel’a bona, Jehova a ba eteletse pele.” Na u ipona u le mokolokong oo oa tlhōlo, u latela Morena oa hao, Jesu Kreste, ’me Jehova a eteletse pele? Haeba ho joalo, kholiseha hore joang kapa joang tlhōlo e tla ba teng le hore tšepo ea hao ke ea sebele. Sena se tla totobala le ho feta ha re tšohla lintlha-khōlō tse eketsehileng tsa boprofeta ba Mikea.

U ka Araba Joang?

• Ke hobane’ng ha Jehova a ile a khetha ho nkela Juda le Iseraele khato mehleng ea Mikea?

• Ke’ng se ka etsahalang ha ba ipolelang hore ba sebeletsa Molimo ba etelletsa pele lithahasello tsa lintho tse bonahalang bophelong?

• Ka mor’a ho hlahloba Mikea khaolo ea 1 le ea 2, ke hobane’ng ha u kholisehile hore tšepo ea hao ke ea sebele?

[Setšoantšo se leqepheng la 9]

Boprofeta ba Mikea bo ka re matlafatsa moeeng

[Litšoantšo tse leqepheng la 10]

Joaloka masala a Bajuda ka 537 B.C.E., Baiseraele ba moea le metsoalle ea bona ba ntšetsa pele borapeli ba ’nete